Pabiling Luwas Ingong Bahin sa Organisasyon sa Diyos

“Ang ngalan ni Jehova maoy usa ka malig-ong torre. Ang matarong modagan ngadto niana ug hatagag kaluwasan.”​—PROVERBIO 18:10.

 1. Sumala sa pag-ampo ni Jesus, nailalom sa unsang malisod nga kahimtang ang mga Kristohanon?

WALA magdugay una pa siya namatay, si Jesus miampo sa iyang langitnong Amahan alang sa iyang mga sumusunod. Uban sa mahigugmaong kabalaka, siya miingon: “Akong gihatag ang imong pulong kanila, apan ang kalibotan nagdumot kanila, tungod kay sila dili man bahin sa kalibotan, maingon nga ako dili bahin sa kalibotan. Ako nagahangyo kanimo, dili sa pagkuha kanila gikan sa kalibotan, kondili sa pagbantay kanila tungod sa tuman-kadaotang usa.” (Juan 17:14, 15) Si Jesus nahibalo nga ang kalibotan mahimong usa ka makuyawng dapit alang sa mga Kristohanon. Kini magpakita sa pagdumot kanila pinaagi sa pagpamakak mahitungod kanila ug sa paglutos kanila. (Mateo 5:11, 12; 10:16, 17) Kini mahimo usab nga tuboran sa kadunotan.​—2 Timoteo 4:10; 1 Juan 2:15, 16.

 2. Asa makakaplag ang mga Kristohanon ug luwas nga espirituwal nga dapit?

² Ang kalibotan nga magdumot sa mga Kristohanon gilangkoban niadtong nahimulag sa Diyos ug nailalom sa paggahom ni Satanas. (1 Juan 5:19) Kining kalibotana mas dako pa kay sa Kristohanong kongregasyon, ug si Satanas mismo mas gamhanan kay sa kang bisan kinsang tawo. Busa, ang pagdumot sa kalibotan maoy usa ka tinuod nga hulga. Asa man makakaplag ang mga sumusunod ni Jesus ug luwas nga espirituwal nga dapit? Ang mga pulong sa Disyembre 1, 1922, nga gula sa The Watchtower nagsugyot sa tubag: “Kita ania na sa daotang adlaw. Ang pakiggubat nagsugod na tali sa organisasyon ni Satanas ug sa organisasyon sa Diyos. Usa kini ka kritikal nga pakiggubat.” Niini nga pakig-away, ang organisasyon sa Diyos anaa sa luwas nga espirituwal nga dapit. Ang pulong “organisasyon” dili makita diha sa Bibliya, ug balik sa mga tuig sa 1920, ang “organisasyon sa Diyos” maoy usa ka bag-ong ekspresyon. Nan, unsa kining organisasyona? Ug sa unsang paagi kita makakaplag ug panalipod niini?

Organisasyon ni Jehova

3, 4. (a) Sumala sa usa ka diksiyonaryo ug sa The Watchtower, unsa ang organisasyon? (b) Sa unsang diwa nga ang internasyonal nga panag-ubanay sa mga Saksi ni Jehova matawag nga usa ka organisasyon?

³ Ang organisasyon maoy “usa ka organisadong lawas,” sumala sa Concise Oxford Dictionary. Uban niana nga hunahuna, atong masabot nga tungod kay giorganisar sa mga apostoles ang unang-siglong mga Kristohanon ngadto sa lokal nga mga kongregasyon ilalom sa pagdumala sa nagamandong lawas sa Jerusalem, husto ang paghisgot niana nga “kapunongan sa mga igsoon” ingong usa ka organisasyon. (1 Pedro 2:17) Ang mga Saksi ni Jehova karon adunay samang organisasyonal nga gambalay. Ang panaghiusa sa unang-siglong lawas gipalig-on sa “mga gasa nga mga tawo,” sama sa ‘mga magbalantay ug mga magtutudlo.’ Ang pipila kanila nagbiyahe gikan sa kongregasyon ngadto sa kongregasyon, samtang ang uban maoy mga ansiyano sa lokal nga mga kongregasyon. (Efeso 4:8, 11, 12; Buhat 20:28) Ang samang “mga gasa” nagpalig-on sa panaghiusa sa mga Saksi ni Jehova karong adlawa.

⁴ Ang Nobyembre 1, 1922, nga gula sa The Watchtower nag-ingon bahin sa pulong “organisasyon”: “Ang usa ka organisasyon maoy usa ka asosasyon sa mga tawo alang sa katuyoan sa pagtuman sa usa ka natukod nga laraw.” Ang The Watchtower nagpadayon sa pagsaysay nga ang pagtawag sa mga Saksi ni Jehova nga usa ka organisasyon wala maghimo kanila nga “usa ka sekta sa diwa sumala sa pagkagamit nianang terminoha, apan kini yanong nagkahulogan nga ang mga Estudyante sa Bibliya [mga Saksi ni Jehova] naningkamot sa pagtuman sa mga katuyoan sa Diyos ug sa pagbuhat niini sama sa pagbuhat sa Ginoo sa tanang butang, sa usa ka mahapsayng paagi.” (1 Corinto 14:33) Gipakita ni apostol Pablo nga ang mga Kristohanon sa iyang adlaw milihok usab sa mahapsayng paagi. Iyang gitandi ang dinihogang panag-ubanayng Kristohanon sa tawhanong lawas, nga adunay daghang sangkap, ang matag sangkap adunay iyang natudlong papel aron ang lawas makalihok sa maayong paagi. (1 Corinto 12:12-26) Kana maoy usa ka maayo kaayong ilustrasyon sa usa ka organisasyon! Nganong giorganisar ang mga Kristohanon? Aron sa pag-alagad sa “mga katuyoan sa Diyos,” sa pagtuman sa kabubut-on ni Jehova.

 5. Unsa ang makitang organisasyon sa Diyos?

⁵ Ang Bibliya nagtagna nga ang tinuod nga mga Kristohanon karon magkahiusa, nahiusa ngadto sa usa ka “yuta” ingong usa ka “nasod,” diin sila “nagasidlak ingong mga magbabanwag sa kalibotan.” (Isaias 66:8; Filipos 2:15) Kining organisadong “nasod” karon may gidaghanong kapin sa lima ug tunga ka milyon. (Isaias 60:8-10, 22) Apan, dili kana ang bug-os nga sukod sa organisasyon sa Diyos. Ang mga manulonda usab nalangkit.

 6. Sa mas sangkad nga diwa niini, kinsa ang naglangkob sa organisasyon sa Diyos?

⁶ Adunay daghang higayon nga nakigtambayayong ang mga manulonda uban sa tawhanong mga alagad sa Diyos. (Genesis 28:12; Daniel 10:12-14; 12:1; Hebreohanon 1:13, 14; Pinadayag 14:14-16) Nan, ang Mayo 15, 1925, nga gula sa The Watchtower husto sa pag-ingon: “Ang tanang balaang mga manulonda maoy usa ka bahin sa organisasyon sa Diyos.” Dugang pa, kini nag-ingon: “Diha sa ulo sa organisasyon sa Diyos, nga nakabaton sa tanang gahom ug awtoridad, [mao] ang Ginoong Jesu-Kristo.” (Mateo 28:18) Busa, sa mas sangkad nga diwa niini, ang organisasyon sa Diyos gilangkoban niadtong tanan nga anaa sa langit ug sa yuta nga nagtinabangay sa pagtuman sa kabubut-on sa Diyos. (Tan-awa ang kahon.) Pagkadakong pribilehiyo nga mahimong bahin niini! Ug pagkadakong kalipay ang pagpaabot sa panahon sa dihang ang tanang buhing mga linalang, langitnon man ug yutan-on, maorganisar sa pagdayeg kang Jehova nga Diyos diha sa panaghiusa! (Pinadayag 5:13, 14) Apan, unsay ikasulti bahin sa panalipod nga gitagana sa organisasyon sa Diyos karon?

Gipanalipdan sa Organisasyon sa Diyos—Sa Unsang Paagi?

 7. Sa unsang paagi ang organisasyon sa Diyos nagpanalipod kanato?

⁷ Ang organisasyon sa Diyos makatabang sa pagpanalipod kanato batok kang Satanas ug sa iyang mga lipatlipat. (Efeso 6:11) Si Satanas nagpamugos, nagapanglutos, ug nagsulay sa mga magsisimba ni Jehova nga may usa lamang ka tumong sa hunahuna: sa pagpahilayo kanila gikan sa ‘dalan nga angay nilang pagalaktan.’ (Isaias 48:17; itandi ang Mateo 4:1-11.) Kita dili gayod bug-os makalikay niadtong maong mga pag-atake niining sistemaha sa mga butang. Apan, ang atong suod nga relasyon uban sa Diyos ug sa iyang organisasyon magpalig-on ug magpanalipod kanato ug busa magtabang kanato nga makapabilin diha sa “dalan.” Tungod niini, kita dili mapildihan maylabot sa atong paglaom.

 8. Sa unsang paagi ang dili-makitang organisasyon ni Jehova nagpaluyo sa iyang yutan-ong mga alagad?

⁸ Sa unsang paagi gitagana sa organisasyon sa Diyos kini nga panalipod? Una, atong nabatonan ang dili-mapakyas nga pagpaluyo sa mga alagad nga espiritu ni Jehova. Sa dihang si Jesus nailalom sa grabeng kalisod, siya gialagaran sa usa ka manulonda. (Lucas 22:43) Sa dihang nailalom sa hulga sa kamatayon, si Pedro milagrosong giluwas sa usa ka manulonda. (Buhat 12:6-11) Bisag wala nay ingon niana nga mga milagro karon, ang katawhan ni Jehova gisaaran ug pagpaluyo sa manulonda diha sa ilang buluhatong pagsangyaw. (Pinadayag 14:6, 7) Sila sagad adunay kabaskog nga labaw sa kasarangan sa dihang nag-atubang ug malisod nga mga kahimtang. (2 Corinto 4:7) Dugang pa, sila nahibalo nga “ang manulonda ni Jehova nagpahiluna libot niadtong may kahadlok kaniya, ug siya magaluwas kanila.”​—Salmo 34:7.

9, 10. Nganong ikaingon nga “ang ngalan ni Jehova maoy usa ka malig-ong torre,” ug sa unsang paagi kining prinsipyoha aplikado sa organisasyon sa Diyos sa katibuk-an?

⁹ Ang makitang organisasyon ni Jehova maoy usa ka panalipod usab. Sa unsang paagi? Diha sa Proverbio 18:10, atong mabasa: “Ang ngalan ni Jehova maoy usa ka malig-ong torre. Ang mga matarong modangop ngadto niana ug hatagan ug panalipod.” Wala kini magpasabot nga ang yanong pagtawag sa ngalan sa Diyos makahatag ug panalipod. Hinunoa, ang atong pagdangop sa ngalan sa Diyos nagpasabot nga kita may pagsalig kang Jehova mismo. (Salmo 20:1; 122:4) Kini nagkahulogan ug pagsuportar sa iyang pagkasoberano, pagtuboy sa iyang mga kasugoan ug mga prinsipyo, ug pagbaton ug pagtuo sa iyang mga saad. (Salmo 8:1-9; Isaias 50:10; Hebreohanon 11:6) Kini naglakip sa paghatag kang Jehova sa eksklusibong debosyon. Kadto lamang mosimba kang Jehova niining paagiha maoy makaduyog sa pagsulti uban sa salmista: “Diha [kang Jehova] magakalipay ang among kasingkasing; kay kami misalig man sa iyang balaang ngalan.”​—Salmo 33:21; 124:8.

¹⁰ Karon ang tanan diha sa makitang organisasyon sa Diyos nag-ingon uban kang Miqueas: “Kita, sa atong bahin, magalakaw sa ngalan ni Jehova nga atong Diyos ngadto sa panahong walay katinoan, bisan hangtod sa kahangtoran.” (Miqueas 4:5) Ang modernong-adlawng organisasyon nagtigom libot sa “Israel sa Diyos,” nga gitawag sa Bibliya nga “usa ka katawhan alang sa iyang ngalan.” (Galacia 6:16; Buhat 15:14; Isaias 43:6, 7; 1 Pedro 2:17) Busa, ang pagkahimong bahin sa organisasyon ni Jehova nagkahulogag pagkahimong bahin sa usa ka katawhan nga nangita, ug nakadawat, ug panalipod sa ngalan sa Diyos.

11. Sa unsang espesipikong mga paagi nga naghatag ug panalipod ang organisasyon ni Jehova alang niadtong bahin niana?

¹¹ Dugang pa, ang makitang organisasyon sa Diyos maoy usa ka komunidad sa pagtuo, usa ka asosasyon sa isigkamagtutuo nga naglig-onay ug nagdinasigay sa usag usa. (Proverbio 13:20; Roma 1:12) Kini maoy usa ka dapit diin ang Kristohanong mga magbalantay nag-atiman sa mga karnero, nagdasig sa mga masakiton ug nagmasulub-on, ug naningkamot nga mapasig-uli kadtong nangapukan. (Isaias 32:1, 2; 1 Pedro 5:2-4) ‘Ang matinumanon ug maalamong ulipon’ nagtaganag “pagkaon sa hustong panahon” pinaagi sa organisasyon. (Mateo 24:45) Kana nga “ulipon,” nga gilangkoban sa dinihogang mga Kristohanon, nagtagana sa kinamaayohan sa espirituwal nga maayong mga butang​—tukma, pinasukad-sa-Bibliya nga kahibalo nga motultol sa kinabuhing dayon. (Juan 17:3) Tungod sa paggiya sa “ulipon,” ang mga Kristohanon natabangan sa paghupot ug taas nga moral nga mga sukdanan ug sa pagkahimong “mabinantayon ingon sa mga halas apan inosente ingon sa mga salampati” diha sa makuyawng palibot nga naglibot kanila. (Mateo 10:16) Ug sila gitabangan kanunay nga makabaton ug “daghang buhaton diha sa buluhaton sa Ginoo,” nga usa ka gamhanan nga panalipod mismo.​—1 Corinto 15:58.

Kinsay Bahin sa Organisasyon sa Diyos?

12. Kinsa ang gipaila ingong bahin sa langitnong organisasyon sa Diyos?

¹² Sanglit kini nga panalipod mabatonan sa tanan niadtong bahin sa organisasyon sa Diyos, kinsay nalakip niini? Mahitungod sa langitnong organisasyon, dili kaduhaduhaan ang tubag niining pangutanaha. Si Satanas ug ang iyang mga manulonda wala na sa langit. Sa laing bahin, ang matinumanong mga manulonda atua gihapon didto ‘sa pangatibuk-ang panagkatigom.’ Nakita ni apostol Juan nga sa panahon sa kataposang mga adlaw, ang “Kordero,” ang mga kerubin (“upat ka buhing linalang”), ug ‘daghang manulonda’ magpaduol sa trono sa Diyos. Uban kanila mao ang 24 ka tigulang​—naghawas niadtong dinihogang mga Kristohanon nga nakasulod na diha sa ilang mahimayaong langitnong panulondon. (Hebreohanon 12:22, 23; Pinadayag 5:6, 11; 12:7-12) Ang tanan maoy tin-awng bahin sa organisasyon sa Diyos. Apan, taliwala sa mga tawhanon, ang mga butang dili kaayo tin-aw.

13. Sa unsang paagi gipaila ni Jesus kadtong bahin sa organisasyon sa Diyos ug kadtong dili bahin?

¹³ Si Jesus miingon bahin sa uban nga nangangkong nagsunod kaniya: “Daghan ang moingon kanako nianang adlawa, ‘Ginoo, Ginoo, wala ba kami managpropesiya sa imong ngalan, ug nanghingilin ug mga demonyo sa imong ngalan, ug mihimog daghan gamhanang mga buhat sa imong ngalan?’ Apan unya akong ipahayag ngadto kanila: Wala ko gayod kamo hiilhi! Pahilayo gikan kanako, kamong mga mamumuhat sa kalapasan.” (Mateo 7:22, 23) Kon ang usa maoy usa ka mamumuhat ug kalapasan, siya dayag nga dili gayod bahin sa organisasyon sa Diyos, bisag unsa pay iyang mga pangangkon, ug bisag asa pa siya moadto sa pagsimba. Si Jesus nagpakita usab kon unsaon pag-ila niadtong si kinsa maoy bahin sa organisasyon sa Diyos. Siya nag-ingon: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kundili ang usa nga nagabuhat sa kabubut-on sa akong Amahan nga anaa sa mga langit.”​—Mateo 7:21.

14. Unsang mga bahin sa kabubut-on sa Diyos ang gipaila nga kinahanglang tumanon niadtong bahin sa organisasyon sa Diyos?

¹⁴ Busa, aron mahimong bahin sa organisasyon sa Diyos​—diin ang “gingharian sa mga langit” mao ang sentro nga bahin​—ang usa kinahanglang nagtuman sa kabubut-on sa Diyos. Unsa ang iyang kabubut-on? Gipadayag ni Pablo ang hinungdanong bahin niini sa dihang siya miingon: “Ang kabubut-on [sa Diyos] mao nga ang tanang matang sa mga tawo maluwas ug makadangat sa tukmang kahibalo sa kamatuoran.” (1 Timoteo 2:4) Kon ang usa ka tawo maningkamot pag-ayo sa pagbaton ug tukmang kahibalo gikan sa Bibliya, sa pagpadapat niini sa iyang kinabuhi, ug sa pagsangyaw niini ngadto sa “tanang matang sa mga tawo,” siya nagatuman sa kabubut-on sa Diyos. (Mateo 28:19, 20; Roma 10:13-15) Kabubut-on usab sa Diyos nga mapakaon ug maatiman ang mga karnero ni Jehova. (Juan 21:15-17) Ang Kristohanong mga tigom nagdula ug hinungdanong papel niini. Ang usa ka tawo nga walay kababagan sa pagtambong sa maong mga tigom apan dili motambong walay pagpabili sa iyang dapit diha sa organisasyon sa Diyos.​—Hebreohanon 10:23-25.

Pagpakighigala sa Kalibotan

15. Unsang pasidaan ang gihatag ni Santiago ngadto sa mga kongregasyon sa iyang panahon?

¹⁵ Mga 30 ka tuig human nga namatay si Jesus, ang iyang igsoon sa inahan nga si Santiago nagpadayag ug pipila ka butang nga magpameligro sa dapit sa usa diha sa organisasyon sa Diyos. Siya nagsulat: “Mga mananapaw, wala ba kamo mahibalo nga ang pakighigala sa kalibotan maoy pakigdumot sa Diyos? Busa, ang bisan kinsa nga buot mahimong higala sa kalibotan nagahimo sa iyang kaugalingon nga usa ka kaaway sa Diyos.” (Santiago 4:4) Ang usa ka kaaway sa Diyos dayag nga dili gayod bahin sa iyang organisasyon. Nan, unsa ang pagpakighigala sa kalibotan? Gipatin-aw nga kini adunay nagkalainlaing matang, sama sa pag-ugmad o pagpakigbuylog uban sa dili maayong mga panag-uban. Dugang pa, si Santiago nagpunting sa usa ka butang nga espesipiko kaayo​—sayop nga mga tinamdan sa hunahuna nga motultol sa dili maayong paggawi.

16. Unsa ang konteksto sa pasidaan ni Santiago nga ang pagpakighigala sa kalibotan maoy pagpakig-away sa Diyos?

¹⁶ Diha sa Santiago 4:1-3, atong mabasa: “Gikan sa unsa bang tinubdan nga may mga gubat ug gikan sa unsa bang tinubdan nga may mga away taliwala kaninyo? Dili ba kini sila gikan man niining tinubdana, nga mao, gikan sa inyong mga pagpangandoy sa mahilayong mga kalipayan nga nagapakigsangka diha sa inyong mga sangkap? Nagatinguha kamo, apan wala kamo makabaton. Padayon kamong nagpangbuno ug naibog sa hinakog, apan wala kamo makaangkon. Padayon kamong nakig-away ug nagpakiggubat. Wala kamo makabaton tungod kay kamo wala man magapangayo. Kamo nagapangayo, apan wala kamo makadawat, tungod kay nagapangayo man kamo sa sayop nga katuyoan, aron nga inyong gamiton kini sa inyong mga gana sa mahilayong kalipayan.” Human gisulat kining mga pulonga nga nagpasidaan si Santiago batok sa pagpakighigala sa kalibotan.

17. Sa unsang paagi dihay “mga gubat” ug “mga panag-awayay” sa unang-siglong Kristohanong kongregasyon?

¹⁷ Mga siglo human namatay si Santiago, nakiggubat ug nagpinatyanay ang mini nga mga Kristohanon sa usag usa sa literal nga diwa. Apan, si Santiago nagsulat ngadto sa unang-siglong mga membro sa “Israel sa Diyos,” ang umaabot nga langitnong ‘mga saserdote ug mga hari.’ (Pinadayag 20:6) Sila wala magbunoay sa usag usa o magpinatyanay sa usag usa diha sa literal nga mga gubat. Busa nganong naghisgot si Santiago bahin sa maong mga butang taliwala sa mga Kristohanon? Aw, gitawag ni apostol Juan ang bisan kinsa nga nagdumot sa iyang igsoon nga usa ka mamumuno. Ug gihisgotan ni Pablo ang panagbangi sa personalidad ug pagbatokay diha sa mga kongregasyon ingong “mga panag-awayay” ug “panagbangiay.” (Tito 3:9; 2 Timoteo 2:14; 1 Juan 3:15-17) May kalabotan gihapon niini, dayag nga anaa sa hunahuna ni Santiago ang kapakyasan sa paghigugma sa isigka-Kristohanon. Tali kanila, ang mga Kristohanon naglihok sa paagi nga sama sa sagad nga pagpakiglabot sa kalibotan sa usag usa.

18. Unsay motultol sa dili-mahigugmaong mga lihok ug mga pagbati taliwala sa mga Kristohanon?

¹⁸ Nganong ang maong mga butang nahitabo sa Kristohanong mga kongregasyon? Tungod sa dili hustong mga tinamdan, sama sa pagkamaibogon ug ‘pagpangandoy sa mahilayong mga kalingawan.’ Ang garbo, kasina, ug ambisyon makadaot usab sa mahigugmaong Kristohanong panag-ubanay diha sa kongregasyon. (Santiago 3:6, 14) Ang maong mga tinamdan naghimo sa usa nga higala sa kalibotan ug, busa, usa ka kaaway sa Diyos. Walay usa nga adunay sama niini nga mga tinamdan ang makadahom nga makapabilin ingong bahin sa organisasyon sa Diyos.

19. (a) Kinsa sa panguna ang mabasol kon makita sa usa ka Kristohanon nga nagkaugmad ang dili hustong panghunahuna diha sa iyang kasingkasing? (b) Sa unsang paagi mabuntog sa Kristohanon ang dili hustong panghunahuna?

¹⁹ Kinsay atong mabasol kon atong makita ang dili hustong panghunahuna nga nagkaugmad diha sa atong kasingkasing? Si Satanas ba? Sa usa ka sukod, oo. Siya mao ang “magmamando sa awtoridad sa hangin” niining kalibotana, diin kaylap ang maong mga tinamdan. (Efeso 2:1, 2; Tito 2:12) Kasagaran, hinunoa, ang mga gamot sa sayop nga panghunahuna anaa sa atong kaugalingong dili-hingpit nga unod. Human sa pagpasidaan batok sa pagpakighigala niining kalibotana, si Santiago nagsulat: “Nagahunahuna ba kamo nga wala lamay hinungdan ang pag-ingon sa kasulatan: ‘Uban sa kiling sa pagkasina nga ang espiritu nga mipuyo sulod kanato padayong nagapangandoy’?” (Santiago 4:5) Kitang tanan adunay dala-sa-pagkatawo nga kiling sa paghimog daotan. (Genesis 8:21; Roma 7:18-20) Apan, makasukol kita nianang kilinga kon atong dawaton ang atong mga kahuyangan ug mosalig sa tabang ni Jehova sa pagbuntog niini. Si Santiago nag-ingon: “Ang dili-takos nga kalulot nga gihatag [sa Diyos] mas labaw [kay sa atong dala-sa-pagkatawo nga kiling sa pagkasina].” (Santiago 4:6) Tungod sa tabang sa balaang espiritu sa Diyos ug sa tabang sa matinumanong Kristohanong mga igsoon, ug pinaagi sa bili sa halad lukat ni Jesus, ang matinumanong mga Kristohanon dili mabuntog sa mga kahuyangan sa ilang unod. (Roma 7:24, 25) Sila luwas diha sa organisasyon sa Diyos, nga mga higala sa Diyos, dili sa kalibotan.

20. Unsang dagkong mga panalangin ang matagamtam niadtong bahin sa organisasyon sa Diyos?

²⁰ Ang Bibliya nagsaad: “Si Jehova magahatag ug kusog sa iyang katawhan. Si Jehova magapanalangin sa iyang katawhan ug pakigdait.” (Salmo 29:11) Kon kita tinuod gayod nga bahin sa modernong-adlawng “nasod” ni Jehova, ang iyang makitang organisasyon, kita makaambit sa kusog nga iyang ihatag ug matagamtam ang pakigdait nga iyang igapanalangin sa iyang katawhan. Tinuod, ang kalibotan ni Satanas mas dako kay sa makitang organisasyon ni Jehova, ug si Satanas mas kusgan kay kanato. Apan si Jehova mao ang Labing Makagagahom. Ang iyang aktibong gahom dili-mabuntog. Ang iyang gamhanang mga manulonda usab nahiusa uban kanato sa pag-alagad sa Diyos. Busa, bisan pa sa pagdumot nga atong giatubang, kita makabarog nga malig-on. Sama kang Jesus, kita makabuntog sa kalibotan.​—Juan 16:33; 1 Juan 4:4.

Makapatin-aw Ka Ba?

◻ Unsa ang makitang organisasyon sa Diyos?

◻ Sa unsang mga paagi ang organisasyon sa Diyos nagtaganag panalipod?

◻ Kinsa ang bahin sa organisasyon sa Diyos?

◻ Sa unsang paagi kita makalikay nga mahimong mga higala sa kalibotan?

[Kahon sa panid 9]

Unsa ang Organisasyon sa Diyos?

Diha sa basahon sa mga Saksi ni Jehova, ang ekspresyong “organisasyon sa Diyos” gigamit sa tulo ka paagi.

1 Ang langitnon, dili-makitang organisasyon ni Jehova nga gilangkoban sa matinumanong espiritu nga mga linalang. Kini gitawag ug “Jerusalem sa ibabaw” diha sa Bibliya.​—Galacia 4:26.

2 Ang tawhanon, makitang organisasyon ni Jehova. Karon, kini gilangkoban sa dinihogang nahibilin nga giduyogan sa dakong panon.

3 Ang unibersal nga organisasyon ni Jehova. Karon, kini gilangkoban sa langitnong organisasyon ni Jehova uban sa iyang dinihogan, sinagop nga mga anak sa yuta, nga adunay espirituwal nga paglaom. Sa ngadtongadto, kini usab maglakip sa nahingpit nga mga tawo sa yuta.

[Hulagway sa panid 10]

Ang labing maayong espirituwal nga pagkaon gitagana pinaagi sa organisasyon ni Jehova