Mga Magmamantala sa Gingharian Nagtaho

“Ang Ngalan ni Jehova Maoy Usa ka Malig-ong Torre”

KITA nagkinabuhi sa mga panahon nga walay kasegurohan. Ang daw malig-on nato nga mga kinabuhi mahimong kalit nga mausab, ug nga walay pasidaan nakaplagan sa pipila ang ilang kaugalingon diha sa dakong kapeligrohan sa dili pa nila maamgohan kana. Ang kapeligrohan mahimong maggikan sa politikal nga kasamok, usa ka mapintas nga tig-atake, usa ka kinaiyanhong katalagman, o usa ka grabeng balatian. Bisan unsa man ang kahimtang, asa modangop ang usa ka Kristohanon sa dihang ang iyang kinabuhi mameligro?

Si David, usa ka misyonaryo nga nagpuyo sa usa sa mga sangang buhatan sa Watch Tower Society, nasayod sa tubag nianang pangutanaha gikan sa makahahadlok nga kasinatian. Kay naasayn nga drayber, mibiya siya sa sangang buhatan sayo sa buntag aron sa pagkuha sa pila ka tigbiyahe nga mga Bethelite (mga boluntaryo nga nagpuyo sa gawas sa sanga). Ngitngit pa niadto. Gihapit na niya si Rosalía ug miagi sa usa ka estasyonan sa polisiya sa dihang nadungog niya ang unang buto.

Dayon kalit lang nahitabo ang mga butang. Nakadungog siyag buto nga ingon sa usa ka dakong rebentador ug nakaamgo nga mihiyos ang usa sa mga ligid. Sa kalit lang nakita niya ang usa ka sundalo nga nagbarog sa tunga sa dalan nga nagtion sa pusil kaniya. Tulo ka butang ang halos nagdungan pagkahitabo: Sunod-sunod nga buto sa pusil ang nagtusaktusak sa kilid sa Jeep, nga nagpusgay sa mga bintana; mihupo si David ug Rosalía; ang sundalo mirakrak lapos sa sagang sa hangin sa lebel sa mata.

Samtang ang Jeep gipaulanan sa mga bala, si David mipreno kutob sa iyang mahimo bisan pag siya nagtikubo pa. Si David ug Rosalía naghunahuna nga sila mangamatay. Sila miampo ug kusog ngadto kang Jehova, nga naghangyo kaniya sa pagbantay kanila. Si Rosalía sa ulahi miingon nga niadtong mga tungora siya naghunahuna kon unsay bation sa iyang pamilya kon makabalita sila bahin sa iyang kamatayon!

Buhi Gihapon!

Ang mga buto-buto ug pagkapusgay sa bildo sa kataposan mihunong, ug si David mipasiplat kang Rosalía. Sa dihang nakakita siya ug gamay, lingin nga mansa sa dugo sa iyang likod, nahadlok siya pag-ayo. Apan ang usa ka tipik sa nalagpot nga bildo, dili bala, ang nalubong didto. Nagkadugo ang iyang mga tuhod nga nasamdan sa nangahulog nga bildo, apan gawas niana daw maayo ra siya.

Ang mga lalaki nga nagsul-ob ug uniporme sa militar nga may puti nga mga banda sa bukton miduol sa Jeep ug mimando kanila sa paggula nga ipataas ang mga kamot. Ang usa, dayag nga taas ug ranggo, miatubang sa usa ka sundalo ug miingon: “Wala kamo sultii nga motiro sa mga sibilyan.” Ang sundalo nangulipas, nga miingon nga nakadungog siya ug buto-buto ug naghunahuna nga kini naggikan sa Jeep.

Sa dihang gipaila ni David si Rosalía ug ang iyang kaugalingon ingong mga Saksi ni Jehova, maayo ang reaksiyon. Iyang gisaysay kon unsay iyang gihimo, apan buot gihapon silang dakpon sa mga sundalo. Ang lagmit nga nahitabo mao nga, sa kaadlawon, usa ka pundok sa militar ang mihimo ug coup d’état, ug kining mga sundaloha moilogay na sa estasyonan sa polisiya samtang miagi si David ug Rosalía nga sakay sa Jeep.

Si Rosalía gikulbaan pag-ayo apan maisogong nagpabiling kalmado samtang si David mihangyo nga sila pagawson. Sa kataposan gitugotan sila sa pagbiya​—nga wala ang Jeep. Kinahanglan silang molakaw paingon sa karsada sa unahan ug mosakay ug bus paingon sa sangang buhatan, diin si Rosalía giatiman sa infirmary.

Ang Gahom sa Pag-ampo

Si David nakakat-on ug usa ka butang gikan sa kasinatian​—ayaw gayod pakamenosa ang gahom sa tim-os nga pag-ampo, ug ayaw gayod kalimti nga ang maisogong pagpaila sa kaugalingon ingong usa sa mga Saksi ni Jehova kasagaran maoy usa ka panalipod. Mahimong tinuod kini sa literal nga paagi nga “ang ngalan ni Jehova maoy usa ka malig-ong torre. Ngadto niana ang matarong magadalagan ug hatagan ug panalipod.”​—Proverbio 15:29; 18:10; Filipos 4:6.

[Picture Credit Line sa panid 19]

Fotografia de Publicaciones Capriles, Caracas, Venezuela