Linaing mga Gasa nga Nakapatalagsaon Kanato

‘Ang siyentipiko magtuon sa kinaiyahan tungod kay malingaw siya niini, ug siya malingaw niini tungod kay kini matahom.’—JULES-HENRI POINCARÉ, PRANSES NGA SIYENTIPIKO UG MATEMATIKO (1854-​1912).

SI Poincaré nakadayeg pag-ayo sa katahom sa kinaiyanhong kalibotan, ilabina “kanang labaw nga katahom” sa kaharmonya ug kahusay nga nakapadani sa siyentipikanhong hunahuna. Apan, ang usa dili kinahanglang mahimong usa ka siyentipiko aron makadayeg sa katahom ug kahusay sa palibot nato. Mga 3,000 ka tuig kanhi, ang salmistang si David natandog pag-ayo sa disenyo nga makita diha sa kalalangan​—ilabina sa disenyo sa lawas sa tawo. Busa, siya miampo: “Pagadayegon ko ikaw tungod kay sa makalilisang nga paagi ako katingalahan nga pagkabuhat. Ang imong mga buhat katingalahan, ingon sa nasayran pag-ayo sa akong kalag.”​—Salmo 139:14.

Ang maong katingala ug kataha bation lamang sa tawo, nga dili bation bisan sa labing intelihenteng mananap. Apan, ang atong kaikag sa kinaiyanhong kalibotan mas dulot pa gani. Ang makataronganong mga tawo sa tanang panahon nangutana: Unsa ang tuboran sa katingalahang disenyo sa buhing mga butang? Sa pagkatinuod, nganong naglungtad man ang buhing mga butang? Ug unsay atong dapit niining kahikayan sa mga butang? Ang siyensiya ug ang pagsusi sa kaugalingon dili makatubag niining mga pangutanaha. Apan ang Bibliya, nga inspirado sa Diyos, nagtagana ug makapatagbaw gayod nga mga tubag.​—2 Pedro 1:​20, 21.

Kining karaang sagrado nga basahon nagpatin-aw nga ang atong talagsaong tawhanon nga mga hiyas maoy resulta sa atong pagkalalang “sa larawan sa Diyos”​—buot ipasabot nga kita may katakos sa pagpasundayag (bisan sa mas gamayng sukod) sa mga hiyas sa atong Maglalalang. (Genesis 1:27) Busa bisan tuod wala kitay mga mata nga sama sa iya sa agila, makapasundayag kita ug taas nga panglantaw ug kaalam. Ang atong pandungog tingali wala ra sa kumingking kon itandi nianang sa kabog, apan kita malingaw sa kabildohay, musika, ug sa mananoy nga mga tingog sa kinaiyahan. Ug bisan tuod wala kitay kinaiyanhong kompas, pinaagi sa pagliso ngadto sa Pulong sa Diyos, ang Bibliya, madawat nato ang kinamaayohang giya sa kinabuhi.​—Proverbio 3:​5, 6.

Ang pagkagilalang nato sa larawan sa Diyos nagpatin-aw usab kon nganong kita lamang ang dunay espirituwal nga panginahanglan. “Ang tawo mabuhi, dili sa tinapay lamang,” matod ni Jesus, “kondili sa matag pulong nga magagula sa baba ni Jehova.” (Mateo 4:4) Ikaw ba regular nga nakig-ambit nianang makapalagsik nga mga pulong pinaagi sa pagbasa sa Bibliya?

Sa dihang bug-os nga naatiman sa Pulong sa Diyos, ang atong espirituwalidad makapasangkad sa atong mga katakos sa pag-ila nga saylo pa sa mga limitasyon sa atong pisikal nga mga igbalati. Sa unsang paagi? Pinaagi sa pagpalig-on sa atong pagtuo. Ang tiunay, pinasukad-sa-Bibliya nga pagtuo makapaarang kanato sa ‘pagkakita’ sa dili-makitang Diyos​—sama kang Moises​—ug sa pag-ila usab sa Iyang katuyoan alang sa umaabot.​—Hebreohanon 11:​1, 27.

Usa ka Mahimayaong Kaugmaon Alang Niadtong “Nakakita” sa Diyos

Ang Bibliya nagtudlo kanato nga ang Maglalalang, si Jehova nga Diyos, nahigugma sa yuta ug sa tanang buhing mga linalang niini, ilabina ang mahinadlokon-sa-Diyos nga mga tawo. Busa, nagsaad siya nga taposon ang tanang pagkadaotan, lakip na kadtong hinakog nga “nagalaglag sa yuta.” (Pinadayag 11:18; Salmo 37:​10, 11; 2 Tesalonica 1:8) Human niana, siya magahatag ug walay-kataposang kinabuhi ngadto sa mga tawo nga nahigugma ug nagmasinugtanon kaniya. Dugang pa, sila motabang sa paghimo sa tibuok planeta nga usa ka paraiso nga nagsugwak sa kinabuhi. Pagkanindot nga kaugmaon!​—Lucas 23:43.

Handurawa kon unsay imong mahimo ug madiskobrehan sa dihang ang kinabuhi ug maayong panglawas wala nay kinutoban! “Ang kinaiyahan,” misulat ang usa ka siyentipiko, “kanunay nga dunay talagsaong butang, kadagaya, ug katahom nga dili gayod matiti.” Ingon niini ang pagkapahayag niana sa Bibliya: “Ang tanang butang gihimo [sa Diyos] nga matahom sa panahon niini. Bisan ang panahong walay tino iyang gibutang sa ilang kasingkasing, aron ang tawo dili makatugkad sa buhat nga nahimo sa matuod nga Diyos sukad sa sinugdan hangtod sa kataposan.”​—Ecclesiastes 3:11.

Sa unsang paagi ikaw mahimong bahin sa Paraiso nga gihubit diha sa Bibliya? Pinaagi sa pagkat-on bahin sa katuyoan sa Diyos karon ug pinaagi sa pagpadapat sa imong nakat-onan. “Kini nagkahulogan ug kinabuhing walay kataposan,” matod ni Jesus, “ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

[Hulagway sa panid 10]

Gamita ang imong mga igbalati sa pagpauswag sa imong apresasyon alang sa Maglalalang

[Hulagway sa panid 11]

Ang pagbasa sa Bibliya mao ang kinamaayohang paagi nga masinati sa imong Maglalalang