Pailob—Nganong Talagsa ra Kaayong Makita?

SI Emilio anaa na sa iyang pangedarong 60.a Siya miadto sa Oahu alang sa usa ka makasubong misyon​—aron sa paglubong sa iyang hingkod nga anak nga lalaki. Samtang naglakaw diha sa dili-kisaw nga dalan sa bungtod nga nakig-estorya sa pipila ka mga higala, si Emilio nakurat sa usa ka awto nga mibulhot pag-atras diha sa karsada. Hapit siyang mabanggaan sa awto, ug tungod sa kasuko ug kawalay-pailob, gisinggitan ni Emilio ang drayber ug gipukpok sa kamot ang likod sa kotse. Usa ka panaglalis ang misunod. Ingon sa daw gitulod sa drayber si Emilio, kinsa natumba ug naparok ang iyang ulo sa gahi nga semento. Sulod sa pipila ka adlaw, si Emilio namatay tungod sa kadaot sa iyang ulo. Pagkamakapasubong resulta!

Kita nagpuyo sa usa ka kalibotan diin ang pagpailob talagsa rang makita nga hiyas. Nagkadaghang drayber sa awto ang kusog kaayong mopadagan. Ang uban modutdot​—mosunod nga dip-ig kaayo​—sa mga awtong nagpadagan sa hustong katulinon. Bisan pa ang uban mopaikis-ikis gikan sa usa ka linya sa dalan ngadto sa lain tungod kay dili sila makapailob nga maulahi sa ubang sakyanan. Sa balay, tingali ipahungaw sa mga membro sa pamilya ang ilang grabeng kasuko ug mahimong mapintas. Bisan ang pipila ka Kristohanon tingalig masuko pag-ayo tungod sa mga kahuyangan o mga sayop sa ilang espirituwal nga mga igsoon.

Nganong ang pailob talagsa ra kaayong makita? Kini ingon ba gayod niana kanunay? Nganong lisod kaayong magpailob sa atong panahon?

Mga Panig-ingnan sa Kawalay-Pailob

Ang Bibliya naghisgot bahin sa usa ka babaye nga wala maghulat sa pagkonsulta sa iyang bana sa wala pa mohimog usa ka seryosong desisyon. Ang iyang ngalan mao si Eva. Wala maghulat kang Adan, tingali sa bahin tungod sa kawalay-pailob, siya mikaon sa gidiling bunga. (Genesis 3:1-6) Komosta ang iyang bana? Siya usab nagpakitag kawalay-pailob pinaagi sa pagsunod kang Eva ngadto sa sala nga wala una moduol sa iyang langitnong Amahan, si Jehova, alang sa tabang o pagtultol. Ang ilang kadalo, nga lagmit giduyogan sa kawalay-pailob nga mitultol ngadto sa sala, may makamatayng mga resulta alang kanatong tanan. Gikan kanila kita nakadawat usab ingong panulondon sa kiling sa pagbuhat ug mga sala, lakip nianang sa pagkamapahitas-on ug kawalay-pailob.​—Roma 5:12.

Mga 2,500 ka tuig human makasala ang atong unang mga ginikanan, ang piniling katawhan sa Diyos, ang mga Israelinhon, nagpakitag dulot, padayong kakulang ug pagtuo, maingon man sa kakulang ug pailob. Bisag bag-o pa silang giluwas ni Jehova sa milagrosong paagi gikan sa pagkaulipon sa Ehipto, sila daling “nakalimot sa iyang mga buhat” ug “wala maghulat sa iyang tambag.” (Salmo 106:7-14) Sa masubsob sila nangahulog sa seryosong kalapasan tungod kay sila dili mapailobon. Sila mihimog bulawang nating baka ug misimba niini; sila nagbagulbol sa materyal nga tagana ni Jehova nga manna alang kanila; ug daghan kanila mirebelde gani batok sa tinudlo sa Diyos nga hawas ni Jehova, si Moises. Sa pagkatinuod, ang ilang kakulang ug pailob mitultol kanila sa kasub-anan ug katalagman.

Giwala sa unang tawhanong hari sa Israel, si Saul, ang kahigayonan alang sa iyang mga anak nga lalaki nga mahimong iyang mga manununod sa pagkahari. Ngano? Tungod kay siya napakyas sa paghulat sa manalagna nga si Samuel, nga mao unta ang maghalad kang Jehova. Ang kahadlok sa tawo maoy nagpahinabo kang Saul sa pagpanguna kang Samuel sa pagtanyag ug halad. Hunahunaa kon unsay iyang gibati sa dihang mitungha si Samuel human lamang gayod nga nakatapos si Saul sa seremonyas! Kon nagpaabot pa lamang gayod unta siya ug pipila ka minuto!​—1 Samuel 13:6-14.

Kon si Eva naghulat pa unta kang Adan inay kay sa pagdalidalig kuha sa bunga! Kon ang mga Israelinhon nahinumdom pa unta sa paghulat sa tambag ni Jehova! Oo, ang pailob tingali nakatabang unta sa pagluwas kanila ug kanato gikan sa dagkong kasub-anan ug kasakit.

Mga Hinungdan sa Kawalay-Pailob

Ang Bibliya motabang kanato sa pagsabot sa usa ka pangunang hinungdan sa kawalay-pailob karon. Ang 2 Timoteo kapitulo 3 naghubit sa atong kaliwatan ingong nagkinabuhi sa “makuyaw nga mga panahong lisod sagubangon.” Kini nag-ingon nga ang mga tawo “maoy mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on . . . walay pagpugong-sa-kaugalingon, mabangis, walay gugma sa pagkamaayo.” (Bersikulo 2, 3) Ang maong kadalo ug maakohon nga tinamdan anaa sa mga kasingkasing ug mga hunahuna sa daghang katawhan, nga nagpalisod sa tanan, bisan sa matuod nga mga Kristohanon, sa pagpakita ug pailob. Kon kita makakita ug mga tawong kalibotanon nga paspas kaayong nagapadagan sa sakyanan o mosapaw sa atubangan sa mga linya o manginsulto kanato, ang atong pailob masulayan gayod. Kita tingali matintal sa pagsundog kanila o sa pagbalos kanila, nga sa ingon nagpahiuyon sa ilang sukdanan sa mahakogong garbo.

Usahay ang atong kaugalingong sayop nga mga panghinapos ang magpahinabo kanato nga mawad-ag pailob. Matikdi kon sa unsang paagi gipakita sa maalamong Haring Solomon ang koneksiyon tali sa madalidalion, sayop nga pangatarongan ug kawalay-pailob, masuk-anong pamatasan: “Labi pang maayo ang usa nga mapailobon kay sa usa nga mapahitas-on. Dili nimo pagdalidalion ang imong espiritu sa pagkasuko, kay ang pagkasuko nagpuyo diha sa sabakan sa mga buangbuang.” (Ecclesiastes 7:8, 9) Kon kita mogahig panahon aron makabaton ug bug-os, tukma nga hulagway sa usa ka situwasyon sa dili pa mohimog bisan unsang aksiyon, kita malagmit mahimong mas masinabtanon, mas mabination, mas mapailobon sa uban. Sa laing bahin, ang mapahitas-on, maako-akohon nga espiritu tingalig magpahinabo kanato nga mahimong hiktin-ug-panghunahuna, dili-mapailobon, ug madumtanon, sama sa bagulbolan, pating nga mga Israelinhon nga nagsakit kang Moises.​—Numeros 20:2-5, 10.

Ang laing hinungdan sa nagdugang nga kakulag pailob niining kalibotana mao ang kawalay-paglaom nga kahimtang niini, nga resulta sa pagkanahimulag gikan kang Jehova. Si David nagpahayag sa panginahanglan sa tawo sa paglaom kang Jehova: “Kalag ko, sa Diyos lamang maghulat ka sa hilom kay gikan kaniya ang akong paglaom.” (Salmo 62:5) Daghang tawo nga wala makaila kang Jehova adunay limitado, hanap nga panglantaw, busa sila naningkamot sa pagsakmit sa matag diyutayng kalipay ug nagpahimulos niana kutob sa ilang mahimo sa dili pa sila mamatay. Sama sa ilang espirituwal nga amahan, si Satanas nga Yawa, sila sagad dili magtagad kon sa unsang paagi ang ilang mga lihok makasakit sa uban.​—Juan 8:44; 1 Juan 5:19.

Dili ikahibulong nga ang pailob talagsa ra kaayong makita karon. Kining daotan, hakog nga sistema sa mga butang, nga ang diyos niini mao si Satanas, ug ang makasasalang mga hilig sa atong makasasalang unod naghimo niining malisod alang sa tanan, bisan sa mga sinsero, nga magpailob. Bisan pa, ang Bibliya nagtambag kanato nga “magmapailobon,” ilabina maylabot sa katumanan sa mga katuyoan sa Diyos. (Santiago 5:8) Nganong ang pailob hinungdanon kaayo? Unsang mga ganti ang ikahatag niini kanato?

Pailob​—Kon Nganong Hinungdanon Kaayo

“Sila usab nag-alagad niadtong nagpailob ug naghulat lamang.” Kadtong mga pulonga gisulti sa Ingles nga magbabalak nga si John Milton kapin sa tulo ka gatos ka tuig kanhi diha sa iyang balak nga “Sa Iyang Pagkabuta.” Sa unang bahin sa balak, gipahayag niya ang kahigawad ug kabalaka bahin sa iyang gibati nga dili makahimo sa pag-alagad sa Diyos sa bug-os tungod kay siya nabuta sa iyang pangedarong 40. Apan ingon sa makita sa kataposang linya sa balak nga gikutlo sa itaas, naamgohan niya nga ang usa makahimo sa pagsimba sa Diyos pinaagi sa mapailobong paglahutay sa kasakitan ug malinawong mangita sa mabatonang mga kahigayonan sa pag-alagad. Nakita ni Milton ang bili sa mapailobong pagsalig sa Diyos.

Ang kadaghanan kanato tingali may maayog panan-aw, apan kitang tanan adunay mga limitasyon nga magpahinabo kanato nga masuko o mabalaka. Sa unsang paagi kita makabaton ug makapakitag pailob?

Makapadasig nga mga Panig-ingnan

Ang Bibliya nagtagana kanatog ubay-ubayng maayong mga pananglitan sa pailob. Ang pailob ni Jehova nagpaposible sa kinabuhing walay kataposan alang sa milyonmilyong katawhan. (2 Pedro 3:9, 15) Diha sa iyang malulotong imbitasyon nga atong pas-anon ang iyang yugo ug “makakaplag ug kahayahay alang sa [atong] mga kalag,” si Jesus hingpit nga nagbanaag sa kahibulongang pailob sa iyang Amahan. (Mateo 11:28-30) Ang pagpalandong sa mga panig-ingnan ni Jehova ug ni Jesus makatabang kanato nga mas mapailobon.

Ang usa nga daw may igong katarongan nga masuko, magdumot, o manimalos mao ang anak nga lalaki ni Jacob nga si Jose. Gimaltrato siya pag-ayo sa iyang mga igsoong lalaki, giplanohan siya nga patyon ug sa kataposan gibaligya siya sa pagkaulipon. Sa Ehipto, bisan pa sa iyang tininuod, maunongong pag-alagad kang Potipar, si Jose sa pagkadi-makataronganon giakusar ug gibilanggo. Mapailobon niyang giantos ang tanan niyang mga kasakitan, malagmit nakasabot nga ang maong mga pagsulay mahimong mag-alagad sa mga katuyoan ni Jehova. (Genesis 45:5) Tungod kay naugmad niya ang pagtuo ug paglaom diha kang Jehova uban ang pagpaubos ug pagsabot, si Jose nakapakitag pailob bisan ilalom sa malisod kaayong mga kahimtang.

Ang laing hinungdanong tabang mao ang balaang espiritu ni Jehova. Kon, pananglit, kita dali kaayong masuko ug mahait ug sinultihan, kita makaampo alang sa tabang sa balaang espiritu aron nga kita makaugmad sa mga bunga niini. Ang pagpalandong sa matag usa niini nga mga bunga, sama sa taas-nga-pailob ug pagpugong-sa-kaugalingon, magtabang kanato sa pagkakita kon sa unsang paagi kini dulot nga nalangkit sa pagpailob.​—Galacia 5:22, 23.

Ang mga Ganti sa Pagpailob

Ang pagkamapailobon makahatag kanatog daghang kaayohan. Kini mopalig-on sa atong mga hiyas ug mopanalipod kanato batok sa paghimo sa dinalidali, binuang nga mga buhat. Kinsa ba kanato ang wala makahimog masakit nga kasaypanan tungod sa atong madalidalion kaayo nga pagsanong sa malisod o mabug-at nga mga kahimtang? Kita tingali nakasultig masakit nga pulong o milihok sa walay-tahod nga paagi. Tingali gitugotan nato ang gagmayng hitabo nga modako nga nahimong dakong away uban sa usa ka minahal. Human sa grabeng kasuko, kahigawad, ug kasakit, kita tingali mabasolong naghunahuna, ‘Kon nagpailob lang unta ako.’ Ang pagpailob makapanalipod kanato batok sa tanang matang sa kasubo. Kana nga kamatuoran lamang mohatag sa atong kinabuhi ug mas dugang kalinaw, kalig-on, ug katagbawan.​—Filipos 4:5-7.

Ang pagkamapailobon makatabang usab kanato nga makabaton ug malinawon, masaligong kasingkasing. Kini motultol ngadto sa atong pagpahimulos sa mas maayong pisikal, emosyonal, ug espirituwal nga kahimsog. (Proverbio 14:30) Kon dili makontrolar, ang nag-ulbo nga kasuko mopahinabog grabeng emosyonal ug pisikal nga kasakit ug kamatayon. Sa laing bahin, pinaagi sa pagkamapailobon kita makabaton ug mas positibong tinamdan sa uban, ilabina sa atong espirituwal nga mga igsoon ug mga membro sa pamilya. Kita unya mas kiling nga magmabination ug matinabangon inay masuk-anon ug hinawayon. Sa ingon, makita sa uban nga kita mas sayon ug mas maayo nga ikauban.

Ang mga ansiano sa Kristohanong kongregasyon ilabinang nagkinahanglan nga magpakitag pailob. Usahay, ang mga isigka-Kristohanon moduol kanila nga may seryosong mga problema. Kining mga sinsero tingali naglibog, nasuko, o naguol pag-ayo, samtang ang mga ansiano mismo tingalig gikapoy o nabalaka sa ilang kaugalingong mga problema o sa pamilya. Bisan pa, pagkahinungdanon nga ang mga ansiano magpakitag pailob sa maong masulayong mga kahimtang! Niining paagiha sila makatudlo nga “may kaaghop” ug “magtratar sa panon uban ang kalumo.” (2 Timoteo 2:24, 25; Buhat 20:28, 29) Bililhong mga kinabuhi ang nameligro. Pagkadako nga panalangin alang sa kongregasyon ang maluluton, mahigugmaon, ug mapailobong mga ansiano!

Angay tratahon sa mga ulo sa pamilya ang ilang panimalay nga may pailob, pagsabot, ug kalulot. Angay usab nilang dahomon ug dasigon ang tanang membro sa pamilya nga magpakita niining mga hiyasa. (Mateo 7:12) Kini dako gayod ug ikaamot sa gugma ug kalinaw sa panimalay.

Ang pagkamapailobon samtang nagapakigbahin sa ministeryo sa kanataran motabang sa Kristohanong mga ministro sa pagpahimulos niini nga pag-alagad nga mas bug-os pa. Mas maantos nila ang bisan unsang kawalay-pagtagad ug pagsupak nga masugatan. Imbes makiglalis sa nasukong mga tagbalay, ang mapailobong mga ministro makahimo sa paghatag ug malumong tubag o malinawong mobiya, sa ingon mahuptan ang kalinaw ug kalipay. (Mateo 10:12, 13) Dugang pa, kon tratahon sa mga Kristohanon ang matag usa nga may pailob ug kalulot, ang mga karnerohon madani sa mensahe sa Gingharian. Gipanalanginan ni Jehova ang mapailobong mga paningkamot sa tibuok-kalibotang sukod, samtang ang gatosan ka linibong maaghop nga mga nagpangita-sa-kamatuoran nanagpanon ngadto sa mahigugmaong kongregasyon ni Jehova matag tuig.

Sa pagkatinuod, ang pagkamapailobon mohatag kanatog maayong mga ganti. Atong malikayan ang daghang aksidente ug mga problema nga mahitabo tungod sa atong madalidaliong mga lihok o tungod sa dali kaayong paglabtik sa atong dila. Kita mas malipayon, mas malinawon, ug lagmit mas mahimsog. Kita makasinatig mas dakong kalipay ug kalinaw diha sa atong ministeryo, sa kongregasyon, ug sa panimalay. Apan labaw sa tanan, kita makatagamtam ug mas suod nga relasyon uban sa Diyos. Busa paghulat kang Jehova. Pagpakitag pailob!

[Footnote]

[Hulagway sa panid 10]

Unsa ikaw ka mapailobon sa imong matag adlawng kinabuhi?