Gilaayan Ka ba sa Imong Trabaho?

LAGMIT nagtrabaho kag mga walo ka oras sa usa ka adlaw. Dako kaayong panahon kana ug dako kaayong bahin sa kinabuhi nga mawagtang tungod sa kalaay! Galing lang, daghang trabaho sa ika-20ng siglo ang makalaay ug dili gayod ikapasigarbo sa trabahante.

Busa makabenepisyo kag dako pinaagi sa paghimong makaiikag sa imong trabaho. Makasinati kag dakong kalipay gikan sa pagtrabaho, ug imong makat-onan ang sekreto sa paghimong mas makaiikag sa bisan unsang umaabot nga trabaho nga buhaton nimo. Nan, susihon nato ang pipila ka paagi sa paghimo niini.

Lihok nga Madasigon

Ang pipila ka awtoridad nagsugyot nga motrabaho ka nga morag imo kanang gikahimut-an. Kon imo kanang himoon, ang imong tinamdan basin mosunod.

‘Apan dili gayod ako magmadasigon sa akong trabaho!’ tingali motubag ka. Ang imong trabaho basin naglangkit sa mapig-otong rutina, sama sa balikbalik pinirasong trabaho sa pabrika. O tingalig nagtrabaho ka sa imong trabaho sa daghan kaayong katuigan nga imong gibati nga imposibleng maikag ka na usab niini. Bisan pa niana, ang yanong mga taktika sama sa pagpahiyom ug matul-id nga pagbarog basin makatabang kanimo nga mas magmadasigon sa imong trabaho.

Basin makatabang usab kon imong ihatag ang bug-os nga pagtagad nganha sa imong gibuhat. Ayaw pagbuhat nga awtomatiko lamang, ug ayaw pagtrabaho samtang naghunahuna bahin sa takna sa paniudto, sa hinapos sa semana, o bisan sa laing trabahong buhatonon. Kasagarang maalamon nga ihatag ang bug-os nga pagtagad nganha sa imong gitrabaho. Ang resulta? Mahimong kahimut-an nimo ang trabaho, ug unya morag ang oras mokilab lamang.

Kinaiyanhong mahitabo kini kon ibug-os nimo ang imong pagtagad sa usa ka kalihokang gusto kaayo nimo. Mahimong imong makab-ot ang samang epekto pinaagi sa pagpugos sa imong kaugalingon nga ihatag ang bug-os nga pagtagad nganha sa trabaho nga imong gibuhat nga sagad wala nimo magustohi.

Himoa ang Imong Kinamaayohan

Ang paghimo sa imong kinamaayohan makatabang kanimo nga matagbaw sa trabaho. Siyempre, kanang tambaga mosumpaki sa popular nga ideya nga kon imong hikaplagang ang trabaho di-makaiikag, angayng sulayan nimo ang paghimo sa trabaho nga dili kaayo mahago. Apan ang pagpasagad, pagpaugmaugma, ug labing gamayng kabudlay lagmit makapaluya kanimo ug makadugang sa kabalaka ug kakapoy. Sa pipila ka kahimtang ang tawong mopauli sa balay nga bug-at ug panimati, mabalak-on, ug gikapoy lagmit nag-antos kay wala magmakugihon sa trabaho.

Sumala sa Bibliya, ang pagkugi sa pagbuhat sa usa ka proyekto maghimo ganing mas makapahimuot sa bakanteng mga oras. “Alang sa usa ka tawo walay butang nga labi pang maayo kay nga siya mokaon gayod ug moinom ug pakit-on ang iyang kalag ug maayo tungod sa iyang pagbudlay.” (Ecclesiastes 2:24) Alang sa pipila, tingali kini morag karaan nang panultihon, apan ang uban nagpadapat niining matunhayon nga prinsipyo. Mouyon sila nga, tinuoray, “walay butang nga labi pang maayo” kay sa pagakalipayan nila ang mga bunga sa ilang pagbudlay. Ang librong The Joy of Working nag-ila: “Ang usa ka trabahong maayong pagkabuhat makahatag ug madasigong katagbawan sa kahiladman.”

Busa, himoa ang labing maayong trabaho nga imong mahimo, ug lagmit magmabaskogon ka. Buhata ang labaw kay sa labing diyutay lamang, ug mahimong mas magmalipayon ka. Unaha pagbuhat ang hinungdanong mga buluhaton, ug malipay ka sa imong mga pahulay alang sa paniudto ug mga hinapos sa semana nga labaw kay sa tawong naghago sa iyang kaugalingon tungod sa pagpaugmaugma.​—Itandi ang Ester 10:​2; Roma 12:​11; 2 Timoteo 2:15.

Inay makig-indig sa uban, panlimbasog nga malabwan ang imong kaugalingon. (Galacia 6:4) Ibutang ang bag-ong mga sukdanan, bag-ong mga tumong. Paningkamoti nga mahimo nimo ang mas maayo. Usa ka babaye, kansang trabaho naglakip sa balikbalik nga pagtahi nga isipon sa uban nga puol kaayo, naghimog usa ka dula nga orasan ang iyang kaugalingon. Gisubay niya ang iyang ora-por-ora nga trabahong mahuman, ug unya iyang gipaningkamotan ang pagpadaghan niana. Siya nahimuot kaayo sa iyang trabaho kay siya nanlimbasog nga makab-ot ang iyang natagong katakos sa trabaho.​—Proverbio 31:31.

‘Dayandayani’ ang Imong Trabaho

Si Dr. Dennis T. Jaffe ug Dr. Cynthia D. Scott nagrekomendar: “Isipa ang imong trabaho nga usa ka balay nga walay sulod. Mobalhin ka niini ug motan-aw sa dagway ug estraktura niini. Unya mapukaw ang imong kamamugnaon. Idisenyo nimo ang imong espasyo, dayandayanan, ug himoon ang balay nga imong pinuy-anan. Himoon nimo kining personal pinaagi sa pagbutang sa imong timre niini.”

Ang kadaghanang trabaho ihatag kanimo uban ang linangkob nga kahubitan sa mga latid ug mga lagda. Ang pagbuhat lamang kon unsay gidahom nahisama sa pagpuyo sa usa ka balayng walay mga kasangkapan. Wala ing personalidad. Apan kon idugang nimo ang imong personal nga estilo, ang imong trabaho mamahimong labi pang makaiikag. Walay duha ka tawo ang ‘magdayandayan’ sa usa ka trabaho sa samang paagi. Usa ka silbidor magsag-ulo sa mga pagkaong kinaham sa regular nga mga suki. Ang lain linaing magmaluluton ug magmatinahoron. Silang duha nagkalipay sa ilang trabaho kay ilang gibutang ang usa ka bahin nila diha sa ilang ginabuhat.

Magpadayon sa Pagkakat-on

Ang laing paagi sa pagkalipay sa trabaho mao ang pagkakat-on. Ang librong Tension Turnaround nagsaysay nga samtang kita nagtubo, ang atong utok magpauswag sa katakos niini sa pagproseso sa impormasyon. Kini nagpatin-aw kon nganong ang mga butang nga nakapaukyab kanato sa nangagi tingali makapuol na kanato karon. Ang solusyon mao ang pagtagbaw sa gana sa utok alang sa bag-ong impormasyon pinaagi sa pagkakat-on ug bag-ong mga butang.

Ang pagkakat-on ug labaw pa mahitungod sa imong trabaho basin ngadtongadto mosangpot nga hatagan kag trabahong mas madanihon. Apan bisan pag dili kana mahitabo, ang proseso sa pagkakat-on sa kaugalingon maghimo sa imong trabaho nga mas makaiikag ug makapatagbaw. Ang mga awtor nga si Charles Cameron ug Suzanne Elusorr mipunting: “Ang pagkakat-on dili lamang mopauswag sa imong pagsalig tungod sa pagpauswag sa imong mga katakos, kini mag-apektar usab sa imong katibuk-ang tinamdan sa kinabuhi: nga ang mga suliran masulbad, ang mga kalisdanan mabuntog, ang mga kahadlok makunhoran, ug mas daghang butang ang posible kay sa imong gihunahuna.”

‘Apan,’ tingali motutol ka, ‘akong nasayran ang tanang angayng masayran bahin sa akong trabaho dugay na kanhi!’ Nianang kahimtanga, makat-onan ba nimo ang mga butang nga di-laktod may kalangkitan sa imong trabaho? Pananglitan, basin mohukom ka nga makakat-on ug labaw bahin sa tawhanong relasyon o mahitungod sa imong kahimanan. Tingali makakat-on ka kon unsaon pagsulat ug mas maayong mubong sulat sa opisina o kon unsaon pagdumala ang mas maayong miting. Mahimong makakat-on ka sa labing epektibong mga paagi sa pagpakiglabot sa mga magdudumala.

Sa unsang paagi makakat-on ka niining mga butanga? Tingali ang inyong kompaniya naghatag ug mga kurso nga mahimo nimong mapahimuslan. O ang usa ka librarya tingali dunay mga libro nga imong gikinahanglan. Apan ayawg kalimti ang dili kaayo dayag nga mga tinubdan sa impormasyon. Ang pagtan-aw sa mga tawong nagtrabaho ug pagmatikod sa ilang maayong mga hiyas ug mga kahuyangan tingali matulon-anon. Ikaw makakat-on gikan sa imong mga sayop, ug ikaw makakat-on gikan sa imong mga kalamposan usab, pinaagi sa pag-analisar sa butang nga husto nimong pagkabuhat. Ang imong hikat-onan gikan sa imong kaugalingong mga kasinatian ug gikan sa pagpaniid sa uban makatudlo kanimo sa butang nga tingali dili gayod nimo mabasa sa mga libro o mabatian sa usa ka klase.

Pipila ka Kataposang mga Sugyot

Adunay laing paagi sa pag-isip sa imong trabaho. Makahukom ka nga takos ka sa mas maayo​—nga ang uban maoy nakabaton sa tanang kahigayonan ug wala ka gayod hatagig higayon sa pagbuhat sa trabahong gusto gayod nimong buhaton. Ikaw makigsulti kanunay sa uban nga uyon kanimo, ug tingali makombinsir ka nga kining tanan tinuod.

Apan tingali kana dili tinuod. Daghang tawo nga nagkalipay sa ilang trabaho nakakat-on sa pagkalipay niana. Ang usa ka tawong magkalipay sa pagdisenyo ug mga balay basin magkalipay usab sa pagmanehog usa ka bus. Ngano? Tungod kay ang iyang mamugnaong pag-isip sa trabaho maghatag kaniyag kalipay ug katagbawan.

Busa wagtanga ang negatibong panghunahuna nga maghimo sa semana sa trabaho nga masulub-on nga sukwahi sa hinapos sa semana. Ayaw usiki ang panahon sa pagpalandong sa imong nangaging mga kapakyasan, nga maghunahuna kon unsay sunod nga masayop, ug mabalaka bahin sa hunahunaon sa uban kanimo. Tan-awa ang trabahong anaa sa imong atubangan. Ihatag niana ang imong bug-os nga pagtagad. Paningkamoting malingaw niana sama ra sa imong pagkalingaw sa imong paboritong pasatiempo. Himoa kana nga imong labing maayong panlimbasog, ug magkalipay sa trabaho nga maayong pagkabuhat.

[Kahon/Hulagway sa panid 11]

Ayawg Pasagdi ang Imong Trabaho

Ang Bibliya nag-ingon, sa Proverbio 27:​23, 24: “Angay gayod nga mailhan nimo ang dagway sa imong panon. Ibutang ang imong kasingkasing nganha sa imong mga panon; kay ang bahandi dili man hangtod sa panahong walay tino, ni ang diadema sa tanang kaliwatan.” Unsay ipasabot niana?

Nagpasabot kana nga ang katigayonan (bahandi) ug mga katungdanang dungganon (usa ka diadema), kon ugaling maangkon man, sagad maoy temporaryo. Busa, ang usa ka magbalantay sa karnero sa panahon sa Bibliya nagpakitag kaalam kon siya naghatag ug makugihong pagtagad sa pag-atiman sa iyang mga karnero, nga mao, ‘nagbutang sa iyang kasingkasing nganha sa iyang mga panon.’ Sumala sa ipakita sa mosunod nga tulo ka bersikulo, ang resulta maoy materyal nga kasegurohan alang sa trabahante ug sa iyang pamilya.​—Proverbio 27:​25-27.

Unsa na man karong adlawa? Ang mga tawo sagad magbutang sa ilang mga kasingkasing sa pagbaton ug bahandi o dungganong katungdanan, nga, ilang gilaoman, magpaarang kanila nga biyaan ang ilang presenteng mga trabaho. Ang pipila adunay realistikong mga plano; ang uban nangandoy lamang. Sa bisan haing kaso dili maalamon ang pagtamay o pagpasagad sa presenteng trabaho sa usa. Kini mao, ug tingali magpadayong mao, ang labing kasaligang tuboran sa kita. Labi pang maalamon nga ibutang sa usa ka tawo ang iyang kasingkasing nganha sa iyang “mga panon,” nga ihatag ang bug-os nga pagtagad nganha sa iyang kasaligang natad sa trabaho. Ang paghimo niya niana lagmit mosangpot sa presente ug umaabot nga materyal nga kasegurohan.