Pagdepensa sa Atong Pagtuo

“Balaana ang Kristo ingong Ginoo diha sa inyong mga kasingkasing, nga sa kanunay andam sa paghimo ug depensa atubangan sa tanan nga mangayo kaninyo ug katarungan sa paglaom nga anaa kaninyo.”​—1 PEDRO 3:15.

 1, 2. Nganong ang mga Saksi ni Jehova dili matingala sa pagsupak, apan unsay ilang gitinguha?

SA KADAGHANANG nasod, ang mga Saksi ni Jehova kasagarang nailhan ingong matinud-anon, hinlo-sa-moral nga mga tawo. Daghan ang nag-isip kanila ingong maayong mga silingan kinsa dili magpahinabog bisan unsang kasamok. Bisan pa niana, sa kasukwahi, kining mahigugmaon-sa-kalinaw nga mga Kristohanon nag-antos ug dili-makataronganong paglutos​—sa mga panahon sa gubat ug kalinaw. Wala sila matingala sa maong pagsupak. Sa pagkatinuod, gidahom nila kini. Kon buot hunahunaon, sila nahibalo nga ang matinumanong mga Kristohanon sa unang siglo K.P. maoy “mga dulumtanan,” busa nganong kadtong naningkamot nga mahimong tinuod nga mga sumusunod ni Kristo karon magdahom nga tratahong lahi niana? (Mateo 10:22) Gawas pa, ang Bibliya nag-ingon: “Ang tanan kanila nga nagatinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.”​—2 Timoteo 3:12.

² Ang mga Saksi ni Jehova wala magtinguha nga lutoson, ni sila malipay sa mga kalisdanan​—mga multa, pagkabilanggo, o mabangis nga pagtratar​—nga mahimong ipahinabo niana. Sila nagtinguha nga “magkinabuhi sa usa ka walay-gubot ug malinawong kinabuhi” aron sila makasangyaw sa maayong balita sa Gingharian sa Diyos nga walay babag. (1 Timoteo 2:1, 2) Ilang giapresyar ang relihiyosong kagawasan nga ilang nabatonan sa kadaghanang nasod aron sa pagpadayon sa ilang pagsimba, ug sila matanlagong naghimo kon unsay ilang mahimo nga “magmadaiton sa tanang tawo,” lakip sa mga magmamando sa tawhanong mga kagamhanan. (Roma 12:18; 13:1-7) Nan, nganong ‘ginadumtan’ man sila?

 3. Unsa ang usa ka katarongan kon nganong ang mga Saksi ni Jehova dili-makataronganong ginadumtan?

³ Sa sukaranan, ang mga Saksi ni Jehova dili-makataronganong ginadumtan tungod sa mao gihapong mga rason nga gilutos ang unang mga Kristohanon. Una, ang mga Saksi ni Jehova molihok sumala sa ilang relihiyosong mga tinuohan sa mga paagi nga naghimo kanilang dili popular sa uban. Pananglitan, sila masibotong nagsangyaw sa maayong balita sa Gingharian sa Diyos, apan ang mga tawo kasagarang wala makasabot sa ilang kasibot, nga naglantaw sa ilang pagsangyaw ingong “agresibong pagpangabig.” (Itandi ang Buhat 4:19, 20.) Sila usab neyutral sa politika ug sa mga gubat sa mga nasod, ug usahay kini sayop nga gisabot nga nagkahulogang ang mga Saksi maoy dili-maunongong mga lungsoranon.​—Miqueas 4:3, 4.

 4, 5. (a) Sa unsang paagi gipuntirya ang mga Saksi ni Jehova sa bakak nga mga akusasyon? (b) Kinsa ang kasagaran nga pangunang mga tighulhog sa paglutos sa mga alagad ni Jehova?

⁴ Ikaduha, ang mga Saksi ni Jehova maoy gipuntirya sa bakak nga mga akusasyon​—bug-os nga kabakakan ug tinuis nga pagpahayag sa ilang mga tinuohan. Ingong resulta, sila sayop nga gipuntirya sa dili-makataronganong pag-atake diha sa ubang mga nasod. Dugang pa, tungod kay sila nagtinguha ug walay-dugo nga pagtambal nga kaharmonya sa ilang tinguha sa pagsugot sa sugo sa Bibliya nga ‘maglikay sa dugo,’ sila sayop nga gihinganlag “mga mamumuno ug bata” ug “usa ka nagahikog nga kulto.” (Buhat 15:29) Apan ang kamatuoran mao nga ang mga Saksi ni Jehova nagpabili pag-ayo sa kinabuhi, ug sila nagtinguha nga mabatonan ang kinamaayohan nga mabatonang medikal nga pag-atiman alang sa ilang kaugalingon ug sa ilang mga anak. Ang akusasyon nga daghang anak sa mga Saksi ni Jehova ang nangamatay kada tuig ingong resulta sa dili pagpaabono ug dugo wala gayoy pasikaranan. Dugang pa, tungod kay ang kamatuoran sa Bibliya walay samang epekto diha sa tanang membro sa pamilya, ang mga Saksi giakusar usab nga nagabungkag sa mga pamilya. Bisan pa niana, kadtong nasinati sa mga Saksi ni Jehova nahibalo nga sila dunay taas nga pagtamod sa pamilyahanong kinabuhi ug naningkamot sa pagsunod sa mga sugo sa Bibliya nga ang bana ug asawa mahigugma ug motahod sa usag usa ug nga ang mga anak mosugot sa ilang mga ginikanan magtutuo man sila o dili.​—Efeso 5:21–​6:3.

⁵ Sa daghang kahimtang, ang pangunang mga tighulhog sa paglutos sa mga alagad ni Jehova mao diay ang relihiyosong mga magsusupak nga migamit sa ilang impluwensiya sa politikanhong mga awtoridad ug sa palaumagian sa balita sa pagpaningkamot nga sumpoon ang mga kalihokan sa mga Saksi. Sa unsang paagi kita, nga mga Saksi ni Jehova, mosanong sa maong pagsupak​—kon kaha kini maoy resulta sa atong mga tinuohan ug mga tulumanon o tungod sa bakak nga mga akusasyon?

“Ipaila ang Inyong Pagkamakatarunganon Ngadto sa Tanang Tawo”

 6. Nganong hinungdanon ang pagbaton ug timbang nga panglantaw niadtong anaa sa gawas sa Kristohanong kongregasyon?

⁶ Sa pagsugod, kinahanglang makabaton kita ug hustong panglantaw​—panglantaw ni Jehova​—niadtong dili pareho natog relihiyosong mga pagtuo. Kon dili, basin sa wala kinahanglana ipahinabo nato ang pagsupak o pagpasipala gikan sa uban. “Ipaila ang inyong pagkamakatarunganon ngadto sa tanang tawo,” misulat si apostol Pablo. (Filipos 4:5) Busa, ang Bibliya nagdasig kanato sa pagbaton ug timbang nga panglantaw niadtong anaa sa gawas sa Kristohanong kongregasyon.

 7. Unsay nalangkit sa pag-amping sa atong kaugalingon nga “dili mabulingan sa kalibotan”?

⁷ Sa laing bahin, ang Kasulatan tin-aw kaayong nagtambag kanato sa “pag-amping [sa atong kaugalingon] nga dili mabulingan sa kalibotan.” (Santiago 1:27; 4:4) Ang terminong “kalibotan” dinhi, maingon man sa daghang bahin sa Bibliya, nagtumong sa grupo sa katawhan nga nahimulag sa tinuod nga mga Kristohanon. Nagpuyo kita sa taliwala niining katilingban sa katawhan; mahibalag nato sila sa trabahoan, sa tunghaan, sa silinganan. (Juan 17:11, 15; 1 Corinto 5:9, 10) Bisan pa niana, mahuptan nato ang atong kaugalingon nga dili mabulingan sa kalibotan pinaagi sa pagsalikway sa mga tinamdan, sinultihan, ug panggawi nga kasumpaki sa matarong nga mga dalan sa Diyos. Hinungdanon usab nga atong maila ang kapeligrohan sa suod nga pagpakig-uban niining kalibotana, ilabina uban niadtong nagpakita ug tumang kawalay-pagtagad sa mga sukdanan ni Jehova.​—Proverbio 13:20.

 8. Nganong ang tambag nga magpabiling dili mabulingan sa kalibotan wala magahatag kanato ug bisan unsang pasikaranan sa pagyubit sa uban?

⁸ Apan, ang tambag nga magpabiling dili mabulingan sa kalibotan wala maghatag kanato ug bisan unsang pasikaranan sa bug-os nga pagpakamenos niadtong dili mga Saksi ni Jehova. (Proverbio 8:13) Hinumdomi ang pananglitan sa Hudiyong relihiyosong mga lider, nga gihisgotan sa miaging artikulo. Ang matang sa relihiyon nga ilang giugmad wala makabaton sa pabor ni Jehova; ni nakaamot kini sa maayong mga relasyon uban sa mga dili-Hudiyo. (Mateo 21:43, 45) Gikan sa ilang binayaw nga panglantaw sa ilang kaugalingon, kining panatikong mga tawo nagyubit sa mga Hentil. Wala kita maghupot nianang hiktin nga panglantaw, nga nagtratar sa mga dili-Saksi uban ang pagtamay. Sama ni apostol Pablo, ang atong tinguha mao nga ang tanan nga makadungog sa mensahe sa Bibliya sa kamatuoran makaangkon sa pag-uyon sa Diyos.​—Buhat 26:29; 1 Timoteo 2:3, 4.

 9. Ang timbang, Kasulatanhong panglantaw kinahanglang dunay unsang epekto sa paagi nga kita mosulti mahitungod niadtong dili pareho natog mga tinuohan?

⁹ Ang timbang, Kasulatanhong panglantaw kinahanglang makaapekto sa paagi nga kita nagasulti mahitungod sa mga dili-Saksi. Gisugo ni Pablo si Tito sa pagpahinumdom sa mga Kristohanon sa isla sa Creta nga “dili mamulong nga madaoton labot kang bisan kinsa, dili magpalaaway, magmakatarunganon, magapasundayag ug bug-os nga kalumo ngadto sa tanang tawo.” (Tito 3:2) Matikdi nga ang mga Kristohanon dili mamulong nga madinaoton labot “kang bisan kinsa”​—bisan gani sa mga dili-Kristohanon sa Creta, nga ang pipila kanila ilado sa ilang pagpamakak, kaulitan sa pagkaon ug pag-inom, ug katapolan. (Tito 1:12) Busa dili-kasulatanhon kon kita mogamit ug mabiaybiayong mga termino sa dihang naghisgot sa mga tawo nga dili pareho natog mga tinuohan. Ang mapahitas-ong tinamdan dili makadani sa uban sa pagsimba ni Jehova. Hinunoa, kon lantawon ug trataron nato ang uban sumala sa makataronganong mga prinsipyo sa Pulong ni Jehova, atong “madayandayanan ang pagtulon-an” sa Diyos.​—Tito 2:10.

Kon Kanus-a Mohilom, Kon Kanus-a Mosulti

10, 11. Sa unsang paagi gipasundayag ni Jesus nga nahibalo siya kon kanus-a ang (a) “panahon sa paghilom”? (b) “panahon sa pagsulti”?

¹⁰ Dunay “panahon sa paghilom ug panahon sa pagsulti,” matod sa Ecclesiastes 3:7. Nan, ania ang suliran: ang paghukom kon kanus-a dili panumbalingon ang mga magsusupak ug kon kanus-a mosulti aron sa pagdepensa sa atong pagtuo. Makakat-on kitag dako gikan sa pananglitan sa usa nga kanunayng hingpit sa panghukom​—si Jesus. (1 Pedro 2:21) Nahibalo siya kon kanus-a ang “panahon sa paghilom.” Pananglitan, sa dihang ang pangulong mga saserdote ug ang tigulang nga mga lalaki sayop nga nag-akusar kaniya atubangan kang Pilato, si Jesus ‘wala motubag.’ (Mateo 27:11-14) Dili niya gustong mosulti ug bisan unsa nga makabalda sa pagtuman sa kabubut-on sa Diyos alang kaniya. Hinunoa, gipalabi niya nga ang iyang dayag nga mga binuhatan maoy mosulti mismo. Siya nahibalo nga bisan ang kamatuoran dili makapausab sa ilang mapahitas-ong mga hunahuna ug mga kasingkasing. Busa wala niya panumbalinga ang ilang sumbong, nga gipadayon ang iyang may katuyoang paghilom.​—Isaias 53:7.

¹¹ Bisan pa niana, nahibalo usab si Jesus kon kanus-a ang “panahon sa pagsulti.” Usahay, siya madayganon ug dayag nga nakiglalis sa iyang mga kritiko, nga nagpanghimakak sa ilang bakak nga mga akusasyon. Pananglitan, sa dihang ang mga eskriba ug mga Pariseo misulay sa pagpakaulaw kaniya atubangan sa usa ka panon pinaagi sa pag-akusar kaniya nga nagpagula ug mga demonyo pinaagi ni Beelzebub, wala pasagdi ni Jesus ang maong bakak nga mga sumbong. Uban ang maayo kaayong lohika ug gamhanang ilustrasyon, iyang gipukan ang bakak. (Marcos 3:20-​30; tan-awa usab ang Mateo 15:1-​11; 22:17-​21; Juan 18:37) Sa susama, sa dihang si Jesus, human sa pagbudhi ug pagdakop kaniya, gitaral atubangan sa Sanhedrin, ang Hataas nga Saserdoteng si Caifas malansisong mimando: “Sa buhi nga Diyos ako nagpailalom kanimo sa panumpa nga mosulti kanamo kon ikaw ba ang Kristo ang Anak sa Diyos!” Kini usab maoy “panahon sa pagsulti,” kay ang paghilom mahimong sabton ingong paglimod sa iyang pagka-Kristo. Busa si Jesus mitubag: “Mao ako.”​—Mateo 26:63, 64; Marcos 14:61, 62.

12. Unsang mga sirkumstansiya ang nagpalihok kang Pablo ug Bernabe sa pagsulti nga maisogon sa Iconio?

¹² Tagda usab ang pananglitan ni Pablo ug Bernabe. Ang Buhat 14:1, 2 nag-ingon: “Sa Iconio sila nagkuyog sa pagsulod sa sinagoga sa mga Judio ug namulong sa ingon nga paagi nga usa ka dakong panon sa mga Judio ug mga Griego ang nahimong mga magtutuo. Apan ang mga Judio nga wala motuo nagsugnib ug sa masalaypon nag-impluwensiya sa mga kalag sa katawhan sa kanasoran batok sa mga igsoon.” Ang The New English Bible mabasa: “Apan ang wala-makabig nga mga Hudiyo naghulhog sa mga Hentil ug naghilo sa ilang mga hunahuna batok sa mga Kristohanon.” Wala makontento sa pagsalikway mismo sa mensahe, ang Hudiyong mga magsusupak milansad ug usa ka kampanya sa walay-pamatuod nga mga sumbong, nga naningkamot nga pihigon sa Hentil nga populasyon ang mga Kristohanon.a Pagkadulot gayod kaha sa ilang pagdumot sa Kristiyanidad! (Itandi ang Buhat 10:28.) Kini, gibati ni Pablo ug Bernabe, maoy “panahon sa pagsulti,” basig ang bag-ong mga tinun-an maluya sa pasipala sa publiko. “Busa sila [si Pablo ug Bernabe] migugol ug taas-taas nga panahon nga namulong uban ang kaisog pinaagi sa awtoridad ni Jehova,” kinsa nagpakita sa iyang pag-uyon pinaagi sa paghatag kanilag gahom sa paghimog milagrosong mga ilhanan. Kini miresulta nga ‘ang pipila maoy dapig sa mga Hudiyo apan ang uban sa mga apostol.’​—Buhat 14:3, 4.

13. Sa pagdumala sa pagpakaulaw, kasagarang kanus-a ang “panahon sa paghilom”?

¹³ Nan, sa unsang paagi kita mosanong sa dihang kita pakaulawan? Nagdepende kana sa mga sirkumstansiya. Ang ubang mga kahimtang nagkinahanglan nga ipadapat nato ang prinsipyo nga dunay “panahon sa paghilom.” Ilabinang buhaton kini sa dihang ang determinadong mga magsusupak mosulay sa paglakip kanato sa walay-kapuslanang mga lantugi. Kinahanglang dili nato kalimtan nga ang ubang mga tawo dili gayod buot mahibalo sa kamatuoran. (2 Tesalonica 2:9-12) Walay kapuslanan ang pagpaningkamot sa pagpangatarongan uban niadtong kansang kasingkasing sa pagkamapahitas-on dili gayod motuo. Labaw pa niana, kon malinga kita sa pagpakiglantugi sa matag bakakong tig-akusar nga moatake kanato, mahimong mahitipas kita gikan sa labi pang hinungdanon ug magantihong kalihokan​—kanang pagtabang sa mga matinud-anog-kasingkasing nga buot gayod nga makakat-on sa kamatuoran sa Bibliya. Busa sa dihang atubangon sa mga kaaway nga determinadong magpakaylap ug mga bakak mahitungod kanato, ang dinasig nga tambag mao: “Maglikay kanila.”​—Roma 16:17, 18; Mateo 7:6.

14. Sa unsang mga paagi madepensahan nato ang atong pagtuo atubangan sa uban?

¹⁴ Siyempre, wala kini magpasabot nga dili nato depensahan ang atong pagtuo. Kon buot hunahunaon, duna usab ing “panahon sa pagsulti.” Kita angayang mabalaka mahitungod sa sinserong mga tawo nga naladlad sa mapanamastamasong pagsaway kanato. Kita andam nga mohatag ug tin-awng pagsaysay sa atong kinasingkasing nga mga pagtuo ngadto sa uban; sa pagkatinuod, malipay kita sa kahigayonan. Si Pedro misulat: “Balaana ang Kristo ingong Ginoo diha sa inyong mga kasingkasing, nga sa kanunay andam sa paghimo ug depensa atubangan sa tanan nga mangayo kaninyo ug katarungan sa paglaom nga anaa kaninyo, apan magabuhat sa ingon uban ang kalumo sa buot ug halawom nga pagtahod.” (1 Pedro 3:15) Kon ang tinuod nga interesadong mga tawo mangayog pamatuod alang sa mga tinuohan nga atong gipabilhan, kon mangutana sila mahitungod sa bakak nga mga sumbong nga gipatungha sa mga magsusupak, atong responsibilidad ang pagdepensa sa atong pagtuo, nga magtagana ug hustong mga tubag gikan sa Bibliya. Dugang pa, ang atong maayong panggawi mahimong dakong pamatuod. Samtang ang bukas-ug-hunahuna nga mga tigpaniid makamatikod nga kita tinuod nga naningkamot sa pagkinabuhi nga kaharmonya sa matarong nga mga sukdanan sa Diyos, sila makasabot dayon nga ang mga sumbong batok kanato maoy bakak.​—1 Pedro 2:12-15.

Komosta ang Mapasipalahong Publisidad?

15. Unsa ang usa ka pananglitan kon sa unsang paagi ang mga Saksi ni Jehova gipuntirya sa tinuis nga impormasyon diha sa palaumagian sa balita?

¹⁵ Usahay, ang mga Saksi ni Jehova maoy gipuntirya sa tinuis nga impormasyon diha sa palaumagian sa balita. Pananglitan, sa Agosto 1, 1997, usa ka Rusong mantalaan nagpatik ug mapasipalahong artikulo nga nag-angkon, lakip sa ubang mga butang, nga ang mga Saksi bug-os nga nagbaod sa mga membro sa ‘pagsalikway sa ilang mga asawa, mga bana, ug mga ginikanan kon dili sila mosabot ug dili makig-ambit sa ilang pagtuo.’ Si bisan kinsa nga tinuod nga nasinati sa mga Saksi ni Jehova nahibalo nga bakak ang sumbong. Ang Bibliya nagpakita nga ang mga Kristohanon angayng magtratar sa dili-magtutuong mga membro sa pamilya uban ang gugma ug pagtahod, ug ang mga Saksi naningkamot sa pagsunod sa maong sugo. (1 Corinto 7:12-​16; 1 Pedro 3:1-4) Bisan pa niana, ang artikulo gipatik, ug daghang magbabasa ang sa ingon gihatagag sayop nga impormasyon. Unsaon nato pagdepensa ang atong pagtuo kon kita sayop nga giakusar?

16, 17, ug kahon sa panid 16. (a) Unsay giingon kas-a sa Ang Bantayanang Torre mahitungod sa pagtubag sa bakak nga impormasyon diha sa palaumagian sa balita? (b) Ubos sa unsang mga sirkumstansiya nga ang mga Saksi ni Jehova tingali motubag sa negatibong mga taho diha sa palaumagian sa balita?

¹⁶ Dinhi usab, dunay “panahon sa paghilom ug panahon sa pagsulti.” Ang Bantayanang Torre kas-a nagpahayag niana niining paagiha: “Dili man nato panumbalingon ang bakak nga impormasyon diha sa palaumagian sa balita o kaha depensahan ang kamatuoran pinaagi sa angayang mga paagi nagdepende sa mga sirkumstansiya, sa naghulhog sa pagsaway, ug sa iyang tumong.” Sa pipila ka kaso labing maayo tingali nga dili-panumbalingon ang negatibong mga taho, sa ingon dili na mabandilyo pa ang mga bakak.

¹⁷ Sa ubang mga kaso mahimong “panahon sa pagsulti.” Ang usa ka kasaligang magsusulat o tigbalita hayan nakadawat ug sayop nga impormasyon bahin sa mga Saksi ni Jehova ug hayan malipayng makadawat ug tinuod nga impormasyon mahitungod kanato. (Tan-awa ang kahong “Pagtul-id sa Sayop nga Opinyon.”) Kon ang negatibong mga taho diha sa palaumagian sa balita magpukaw sa pagpihigpihig nga mobabag sa atong buluhatong pagsangyaw, ang mga hawas sa sangang buhatan sa Watch Tower Society mahimong manguna sa pagdepensa sa kamatuoran pinaagi sa pipila ka haom nga mga paagi.b Pananglitan, ang kuwalipikadong mga ansiyano mahimong itudlo sa pagpresentar sa mga kamatuoran, sama diha sa programa sa TV, diin ang dili pagtungha mahimong magpasabot nga ang mga Saksi ni Jehova walay tubag. Ang tagsatagsa ka Saksi maalamong mokooperar sa pagtultol sa Watch Tower Society ug sa mga hawas niini sa maong mga butang.​—Hebreohanon 13:17.

Legal nga Pagdepensa sa Maayong Balita

18. (a) Nganong wala kita magkinahanglag pagtugot sa tawhanong mga kagamhanan nga mosangyaw? (b) Unsang kurso ang atong sundon sa dihang wala tugoti sa pagsangyaw?

¹⁸ Ang atong awtorisasyon sa pagsangyaw sa maayong balita sa Gingharian sa Diyos naggikan sa langit. Si Jesus, kinsa nagsugo kanato sa paghimo niining buluhatona, gihatagan sa ‘tanang awtoridad sa langit ug yuta.’ (Mateo 28:18-​20; Filipos 2:9-​11) Busa, wala kita magkinahanglag pagtugot sa tawhanong mga kagamhanan nga mosangyaw. Bisan pa niana, atong giila nga ang pagbaton ug relihiyosong kagawasan makaabag sa pagpakaylap sa mensahe sa Gingharian. Sa mga nasod diin duna kitay kagawasan sa pagpadayon sa atong pagsimba, gamiton nato ang legal nga sistema sa pagpanalipod niana. Diin kita gihikawan sa maong kagawasan, kita, sulod sa gambalay sa balaod, maningkamot nga mabatonan kana. Ang atong tumong mao, dili ang pagreporma sa katilingban, kondili ang ‘pagdepensa ug legal nga pagpundar sa maayong balita.’c​—Filipos 1:7.

19. (a) Unsa tingaliy resulta sa atong ‘pagbayad sa mga butang sa Diyos ngadto sa Diyos’? (b) Unsay atong determinadong buhaton?

¹⁹ Ingong mga Saksi ni Jehova, atong giila si Jehova ingong Unibersohanong Soberano. Kinalabwan ang iyang balaod. Kita matanlagong mosugot sa tawhanong mga kagamhanan, sa ingon ‘nagbayad sa mga butang ni Cesar ngadto kang Cesar.’ Apan dili nato tugotan ang bisan unsa nga mobalda sa atong pagtuman sa labi pang hinungdanong responsibilidad​—‘pagbayad sa mga butang sa Diyos ngadto sa Diyos.’ (Mateo 22:21) Kita bug-os nga nakasabot nga ang pagbuhat niana maghimo kanato nga “mga dulumtanan” sa mga nasod, apan atong gidawat kini ingong bahin sa galastohan sa pagkatinun-an. Ang legal nga rekord sa mga Saksi ni Jehova sa ika-20ng siglo maoy pamatuod sa atong determinasyon sa pagdepensa sa atong pagtuo. Uban sa tabang ug pagpaluyo ni Jehova, kita magpadayon nga “walay hunong sa pagpanudlo ug sa pagpahayag sa maayong balita.”​—Buhat 5:42.

[Mga footnote]

Nahinumdom Ka Ba?

◻ Nganong ang mga Saksi ni Jehova maoy “mga dulumtanan”?

◻ Unsaon nato paglantaw kadtong dili pareho natog relihiyosong mga tinuohan?

◻ Sa pagdumala sa mga magsusupak, unsang timbang nga pananglitan ang gipakita ni Jesus?

◻ Kon kita pakaulawan, unsaon nato pagpadapat ang prinsipyo nga dunay “panahon sa paghilom ug panahon sa pagsulti”?

[Kahon sa panid 16]

Pagtul-id sa sayop nga opinyon

“Sa Yacuiba, Bolivia, ang usa ka lokal nga ebanghelikal nga grupo naghikay sa usa ka estasyonan sa TV sa pagpasalida sa usa ka pelikula nga dayag nga gihimo sa mga apostata. Tungod sa dili maayong mga epekto sa maong programa, ang mga ansiyano mihukom sa pagduaw sa duha ka estasyonan sa TV ug mitanyag sa pagbayad aron ipasalida nila sa publiko ang mga video nga Jehovah’s Witnesses​—The Organization Behind the Name ug ang The Bible​—A Book of Fact and Prophecy. Human makita ang mga video sa Sosyedad, ang tag-iya sa usa ka estasyon sa radyo nasuko sa sayop nga mga opinyon diha sa programa sa mga apostata ug mitanyag nga mohimog libre nga mugbong mga anunsiyo tali sa mga programa alang sa mga Saksi ni Jehova mahitungod sa ilang nagsingabot nga distritong kombensiyon. Talagsaon ang gidaghanon sa nanambong, ug daghang matinud-anog-kasingkasing nga mga tawo ang misugod sa pagpatunghag sinserong mga pangutana sa dihang ang mga Saksi miduaw kanila diha sa ministeryo.”​—1997 Yearbook of Jehovah’s Witnesses, mga panid 61-2.

[Hulagway sa panid 17]

Usahay, si Jesus dayag nga nagpanghimakak sa bakak nga mga akusasyon sa iyang mga kritiko