SARON

1. Ang patag nga duol sa dagat tali sa Patag sa Dor (sa H sa Carmelo) ug sa Patag sa Filistia. Gikan sa amihanang utlanan niini nga mao ang Suba sa Buaya (Nahr ez-Zerqa), ang Saron miabot pa sa habagatan ug mga 60 km (40 mi) ngadto sa dapit sa Jope ug ang gilapdon niini maoy gikan sa mga 16 ngadto sa 19 km (10 ngadto sa 12 mi). Ang daghang bungdo sa pinadpad nga balas makaplagan ubay sa baybayon. Gitadlasan sa dagkong mga dalan, ang maong dapit kanhi hinungdanon kaayo alang sa militar ug sa negosyo.

Ang Saron nabantog sa pagkatabunok niini (itandi ang Isa 35:2), sanglit usa kini ka rehiyon nga abunda ug tubig nga latas niana nagaagos ang ubay-ubayng mga sapa. Ang panon sa mga karnero ug ang panon sa mga baka manibsib didto. (1Cr 27:29; itandi ang Isa 65:10.) Ang dakong kalasangan sa mga robles maoy nag-okupar kanhi sa amihanang bahin sa Saron, samtang ang habagatang bahin lagmit mas natikad pag-ayo sama karong adlawa. Mopatim-aw nga ang dakong bahin sa rehiyon nahimong awaaw sa dihang misulong ang mga Asiryanhon sa ikawalong siglo W.K.P.​—Isa 33:9.

Sa Awit ni Solomon ang Sulamita gihulagway nga naghubit sa iyang kaugalingon ingong “usa lamang ka safron sa patag daplin sa baybayon,” dayag nga nagkahulogang siya usa lamang ka ordinaryong bulak taliwala sa daghang nanubong mga bulak sa Saron.​—Aw 2:1.

2. Sumala sa 1 Cronicas 5:​16, ang tribo ni Gad nagpuyo didto sa “Gilead, sa Basan ug sa mga lungsod nga sakop niini ug sa tanang sibsibanan sa Saron.” Ang pipila ka eskolar naghunahuna nga kini nagpasabot nga ang mga Gadhanon nagpasibsib sa ilang mga panon sa kahayopan diha sa kapatagan daplin sa baybayon sa Saron. Apan, ang Gad nakadawat ug teritoryo sa S sa Jordan, ug ang Gilead ug Basan nahimutang nianang dapita. Busa daghan ang nanghinapos nga dihay rehiyon usab sa teritoryo sa Gad nga gitawag ug Saron.