Linaing mga Hitabo sa Bibliya Ang Awit ni Solomon 1:1–8:14

Ang Tinuod nga Gugma Madaogon!

Adunay gugma nga dili gayod mapakyas. Kini mapadayonon, malahutayon, madaogon. Kining dili-matarog nga gugma naglungtad taliwala ni Jesu-Kristo ug sa iyang “pangasaw-onon,” o inanak sa espiritu nga kongregasyon. (Pinadayag 21:2, 9; Efeso 5:21-33) Ug pagkatahom sa pagkahulagway niini nga gugma diha sa Ang Awit ni Solomon!

Gikomposo sa mga 3,000 ka tuig kanhi sa maalamong Haring Solomon sa Israel, kining “awit sa mga awit” (1:1) nag-asoy bahin sa gugma nga gibati sa magbalantay sa karnero ug sa dalagang banikanhon nga gikan sa balangay sa Shunem (Shulem). Bisan pa sa tanan niyang bahandi ug kamagilakon, wala madani sa hari ang gugma sa Shulamita, kay siya maunongon man sa iyang minahal nga magbalantay.

Sa dihang basahon ug maayo ug hatagag pagpabili kining balaknon kaayong basahon, kini nagahatag sa dili-minyo ug minyong mga alagad ni Jehova ug dakong pagkaon alang sa hunahuna maylabot sa kaputli, kalumo, pagkamaunongon, ug mapinadayonong gugma nga maoy angayng timaan sa Kristohanong kaminyoon. Sa pagkatinuod, kitang tanan makapahimulos gikan niining awita bahin sa kadaogan sa tinuod nga gugma.

Ang Shulamita diha sa Balongbalong ni Solomon

Palihog basaha Ang Awit ni Solomon 1:1-14. Diha sa mga balongbalong sa hari, ang Shulamita misulti nga daw anaa ang iyang hinigugmang magbalantay. Gidayeg ni Solomon ang iyang katahom ug misaad nga dayandayanan siya ug mga bulawan ug salapi. Apan mibalibad ang dalaga sa iyang mga pagbirigbirig ug gipahibalo siya nga ang iyang gibating tiunay nga gugma maoy alang lamang sa magbalantay sa karnero.

◆ 1:2, 3—Nganong kadtong mga pagtandi sa bino ug lana haom?

Ang bino makalipay sa kasingkasing ug makalig-on sa nasubong kalag. (Salmo 104:15; Proverbio 31:6) Ang lana ibubo sa hamiling mga dinapit tungod sa makahupayng mga substansiya niini. (Salmo 23:5; Lucas 7:38) Busa ang naguol nga Shulamita napalig-on ug napahalipayan sa paghinumdom sa “mga pulong sa pagmahal” sa magbalantay ug sa iyang “ngalan.” Sa susama, ang nahibilin sa dinihogang mga sumusunod ni Kristo nadasig sa pagpalandong sa gugma ug mga pasalig sa ilang Magbalantay, si Jesu-Kristo, bisan pa nga ania sila sa kalibotan ug nabulag gikan kaniya.

Pagtulon-an Alang Kanato: Adornohan unta ni Solomon ang Shulamita sa “mga sinalapid nga bulawan” ug sa “mga pernong salapi,” apan iyang gibalibaran kining materyal nga mga tintasyon ug mipahayag sa iyang dili-mapakyas nga gugma alang sa magbalantay. (1:11-14) Ang pagpalandong sa iyang tinamdan nakalig-on sa hukom sa “pangasaw-onon” nga matang sa pagsalikway sa mabihagong materyalismo sa kalibotan ug sa pagpabiling matinumanon sa ilang langitnong Pamanhonon. Kon ang atong mga paglaom yutan-on ug nagpalandong sa pagminyo, hinaot kining pananglitan sa dalaga mopalihok kanato sa paghimog espirituwal, dili materyal, nga intereses ingong atong pangunang kabalaka.

Ang Handom sa Usag-usa

Basaha ang 1:15–3:5. Misulod ang magbalantay sa kampo sa hari ug iyang gipahayag ang iyang gugma alang sa maligdong nga Shulamita, nga nagmahal kaniya labaw sa tanan. Dihang nagkabulag sila, gipalandong sa dalaga ang malipayong panahon uban sa iyang minahal ug nangaliyopo nga magdali sa pag-abot sa iyang kiliran. Sa gabii, siya nagahandom kaniya.

◆ 2:1-3—Unsay kahulogan niining mga pulong-pasumbingay?

Gitawag sa Shulamita ang iyang kaugalingon nga “usa lamang ka asaron sa kawalogan” tungod kay siya mapainubsanon, kasarangang babaye nga nag-isip sa iyang kaugalingon ingong usa sa daghang komung mga bulak. Apan, ang magbalantay, nahibalo nga siya “lirio taliwala sa katunokan,” kay siya buotan, may katakos, ug matinumanon kang Jehova. Alang sa dalaga, ang magbalantay “sama sa mansanas sa taliwala sa mga kahoy sa kakahoyan” tungod kay siya maikagon sa espirituwal nga batan-on ug debotado sa Diyos ug may maayong mga hiyas ug mga katakos. Ang dili-minyong Kristohanon nga nagapangita ug kauban sa kinabuhi angay mangita lamang ug matinumanon kaubang magtutuo nga may mga hiyas sama niadtong sa Shulamita o sa iyang hinigugmang magbalantay.

◆ 3:5—Nganong nalangkit kining panumpaa niining mga mananapa?

Ang mga usa ug ang pulang mga lagsaw nga baye maaghop, madanihong molihok, ug matahom nga mga mananap ug matulin usab ug malig-og mga tiil. Nan, sa diwa, gipanumpa sa dalaga ang “mga anak nga babaye sa Jerusalem” sa tanan nga madanihon ug matahom. Pinaagi niining mga mananapa, iyang gipaobligar kining mga babayehana sa dili pagpukaw sa iyang gugma alang sa kang bisan kinsa kondili diha lamang sa iyang hinigugmang magbalantay.

Pagtulon-an Alang Kanato: Gipanumpa sa dalaga ang “mga anak sa Jerusalem,” o mga babaye nga nag-alagad sa hari, nga ‘dili pukawon ang iyang gugma hangtod nga siya mahimuot.’ (2:7; 3:5) Kini nagpakita nga dili posible nga bation kag romantikong gugma kang bisan kinsa. Ang dalaga mismo wala maibog kang Solomon. Nan, pagkamaalamon alang sa dili-minyong Kristohanon nga nagplanog magminyo sa pagtagad lamang sa takos ug matinumanong magsisimba ni Jehova nga mahimong higugmaon!​—1 Corinto 7:39.

Ang Dalaga sa Jerusalem

Basaha ang 3:6–6:3. Mibalik si Solomon sa Jerusalem sa kamagilakon. Nagkita ang magbalantay ug dalaga didto ug gipasaligan siya sa mga ekspresyon sa pagmahal. Diha sa usa ka damgo, nalangan siya sa pagsanong sa panuktok sa iyang hinigugma ug gibinuangan sa mga guwardiya samtang nangita siya kaniya. Sa dihang gipangutana kon unsay nakahimo sa iyang hinigugma nga tagsaon, iyang gihatagan ang “mga anak sa Jerusalem” ug magilakong paghubit kaniya.

◆ 5:12—Sa unsang paagi ang mga mata sa magbalantay ‘sama sa mga salampati nga nangaligo sa gatas’?

Una pa niana, ang mga mata sa Shulamita gipaamgid sa mata sa salampati tungod kay kini hiloy, malulot. (1:15; 4:1) Tungod niana, gitawag sa magbalantay ang dalaga nga iyang “salampati.” (5:2) Dinhi gipaamgid sa nahigugmang dalaga ang mga mata sa magbalantay sa mga mata sa salampati nga asul-abuhon ug kolor nga naligo sa gatas. (5:8, 12) Tingali, kining kaamgiran nagpasabot sa maitom nga kalimutaw sa magbalantay nga gilibotan sa nagasidlak nga puti sa iyang mga mata.

Pagtulon-an Alang Kanato: Ang Shulamita sama sa “tanamang pinarilan.” (4:12) Samag parke ang tanaman sa karaang Israel, usa ka tinuod nga paraiso nga may tubod nga nagabugwak ug may nagkalainlaing mga utanon, mga bulak ug mga kahoy. Kasagaran, gilibotan kinig tanom o paril ug kasudlan lamang diha sa kinandadohang ganghaan. (Isaias 5:5) Alang sa magbalantay, ang moral nga kaputli ug kaanyag sa Shulamita kaamgid sa tanaman sa tagsaong katahom, maayong bunga, matam-is nga alimyon, ug makapabaskog nga kamadanihon. Ang iyang mga pagbati dili makuha kang bisan kinsa nga lalaki, kay siya maputli, sama sa “tanaman nga pinarilan” sa mga manunugok ug bukas lamang sa may katungod nga tag-iya niini. Tungod sa katarong sa moral ug sa pagkamaunongon sa Shulamita siya nahimong maayong sulondan alang sa dili-minyong Kristohanong mga babaye karon.

“Siga ni Jah”

Basaha ang 6:4–8:14. Gidayeg ni Solomon ang kaanyag sa dalaga, apan gisalikway siya sa dalaga ug mipahayag sa iyang debosyon sa magbalantay. Kay wala madani ang iyang gugma, gipapauli siya ni Solomon. Uban sa iyang “hinigugma” sa iyang kiliran, mipauli siya sa Shunem ingong hamtong nga babaye nga nakapamatuod sa kalig-on. Ang gugma tali kaniya ug sa magbalantay sama kalig-on sa kamatayon, ug ang mga pangidlakp niini sama sa “siga ni Jah.”

◆ 6:4—Unsa ang “Matahom nga Siyudad”?

Kining ekspresyona mahimong hubarong “Tirsa,” nga nagkahulogan “Makalipay, Makapahimuot.” Ilado ang siyudad sa Tirsa sa katahom nga nahimong unang kaulohan sa amihanang gingharian sa Israel.​—1 Hari 14:17; 16:5, 6, 8, 15.

◆ 7:4—Sa unsang paagi ang liog sa dalaga “sama sa torre nga garing”?

Tingali kini hamis sama sa garing ug sama ka hagpis sa torre. Una pa, ang iyang liog gipaamgid sa “torre ni David,” tingali ang torre sa Palasyo sa Hari diha sa sidlakang paril sa Jerusalem. Diha niini ‘gibitay ang libolibong mga taming sa mga tawong kusgan nga gipamitay,’ nga nagsugyot nga ang matahom nga liog sa Shulamita may kulentas nga dunay lingin nga mga adorno o mga mahalong mga bato.​—4:4; Nehemias 3:25-27.

◆ 8:6,7—Sa unsang paagi ang “gugma kusganon sama sa kamatayon”?

Ang kamatayon sa walay pagkapakyas nakakuha sa mga kinabuhi sa makasasalang mga tawo, ug ingon niana ka kusganon ang tinuod nga gugma. Sa paglugos niini sa tim-os nga pag-unong, kining gugmaha sama ka bangis sa Sheol (lubnganan) sa pagpangayo niini sa mga lawas sa mga minatay. Sanglit gibutang ni Jehova nga Diyos ang katakos sa paghigugma diha sa mga tawo, kining hiyasa nagagikan kaniya ug tukmang giterminohang “siga ni Jah.” Bisan ang adunahang Haring Solomon dili makapalit nianang gugmaha.

Pagtulon-an Alang Kanato: Ang kasinatian sa Shulamita uban kang Haring Solomon maoy maidlot nga pagsulay nga malamposon niyang nalabang. Siya dili mahuyang sa gugma ug kaligdong, sama sa may bisagrang pultahan nga mobukas dayon ug nagkinahanglag balabag nga tabla nga sidro aron dili kini mobukas alang sa tawong dili-angay o dili-maayo. Dili, nagmadaogon ang dalaga sa mga pangdani sa hari, nagbarog sama sa paril batok sa tanang materyal nga mga pangabig niining kalibotana. May pagsalig sa Diyos ug pinaagi sa pagpalandong sa maayong sulondan sa Shulamita, ang Kristohanong mga babaye karon makapamatuod usab sa ilang pagkabutang ingong mga indibiduwal nga malig-on sa maligdong nga mga prinsipyo sa kadayegan ni Jehova.​—8:8-10.

Siyempre, kining “awit sa mga awit,” diin gugma ang tema niini, nagapadasig sa atong pagpabili sa bugkos nga naglungtad tali kang Jesus ug niadtong gipili nga mahimong iyang langitnong “pangasaw-onon.” Apan ang tanang batan-ong mga lalaki ug mga babaye maingon man sa mga bana ug mga asawa nga nagapahinungod kang Jehova makapahimulos sa pagsundog sa pagkamaunongon sa Shulamita ug sa magbalantay sa atubangan sa mga pagsulay ug mga tintasyon. Ug kining matahom nga bahin sa Pulong sa Diyos angay mopukaw kanatong tanan sa pagpabiling maunongon sa tanang panahon kang Jehova, ang Tuboran sa madaogong gugma.