YERBANG-PAALIMYON

Ang bisan unsang matang sa mga produkto gikan sa humot nga tanom, lakip ang aloe, balsamo, calamo, casia, kaningag, kamangyan, galbanum, labdanum, mira, ug estacte. Bisan tuod ang mga pangpalami sa pagkaon sama sa cumino, yerbabuyna, eneldo, ug asin gihisgotan sa Bibliya, ang orihinal nga mga pulong nga gihubad nga “yerbang-paalimyon” ug “mga yerbang-paalimyon” wala ipadapat sa mga panimpla sa pagkaon.

Ang mga yerbang-paalimyon gigamit sa paghimog balaang igdidihog nga lana ug sa insenso nga gigamit lamang alang sa sangtuwaryo. (Ex 30:23-25, 34-37) Kini gigamit usab sa pagpreparar sa patayng lawas alang sa paglubong, ug ang mira ug aloe espesipikong gihisgotan sa paglubong kang Jesus. (Ju 19:​39, 40; tan-awa usab ang Mar 16:1; Luc 23:56; 24:1.) Maylabot sa paglubong kang Haring Asa sa Juda, gihimo ang dako kaayong pagsunog sa paglubong​—dili pagsunog sa patayng lawas, kondili pagsunog sa mga yerbang-paalimyon. (2Cr 16:14) Sa karaang panahon ang mga bino sakotan ug mga yerbang-paalimyon aron mosamot pa ang “kaisog” niini.​—Aw 8:2.

Ang tanaman sa yerbang-paalimyon nga gihisgotan sa Awit ni Solomon (5:​1, 13; 6:2) lagmit nagtumong sa humot nga mga hilba sa kinatibuk-an o, sumala sa gituohan sa pipila ka eskolar, mao ang balsamo (Commiphora opobalsamum). Ang “lamas Indiyano” sa Pinadayag 18:13 sa literal maoy “amomum,” usa ka humot nga kahoykahoy nga kapamilya sa luy-a.