ADLAW NI JEHOVA

Ang linaing yugto sa panahon, dili 24 oras, nga si Jehova dayag nga molihok batok sa iyang mga kaaway ug alang sa iyang katawhan. Sa pagpahamtang sa paghukom sa Diyos batok sa mga daotan, si Jehova magmadaogon batok sa iyang mga magsusupak niana nga “adlaw.” Kini maoy panahon usab sa kaluwasan ug kagawasan alang sa mga matarong, ang adlaw nga niana si Jehova pagabayawon pag-ayo ingong Supremong Usa. Busa, sa duha ka paagi kini nga dakong adlaw maoy talagsaon ug iya lamang gayod ni Jehova.

Kini nga adlaw detalyadong gihubit diha sa Kasulatan ingong panahon sa gubat, usa ka dako ug makalilisang nga adlaw sa kangitngit ug nagsilaob nga kasuko, usa ka adlaw sa mabangis nga kasuko, kasakitan, kagul-anan, kagun-oban, ug kahadlok. “Nan, unsa ang kahulogan sa adlaw ni Jehova alang kaninyo?” Gisukna sa Diyos ang sukihang Israel pinaagi sa baba sa iyang manalagna nga si Amos. Mao kini: “Kini kangitngit, ug walay kahayag, sama sa dihang ang usa ka tawo mokalagiw tungod sa leyon, ug ang oso mosugat kaniya; ug sama sa dihang siya miadto sa balay ug nanukod ang iyang kamot sa bungbong, ug ang halas mipaak kaniya.” (Am 5:18-20) Si Isaias giingnan: “Tan-awa! Ang adlaw ni Jehova nagsingabot, mapintas uban sa mabangis nga kasuko ug sa nagsilaob nga kasuko.” (Isa 13:9) “Kanang adlawa maoy usa ka adlaw sa mabangis nga kasuko, usa ka adlaw sa kasakitan ug kagul-anan, usa ka adlaw sa bagyo ug sa kagun-oban, usa ka adlaw sa kangitngit ug kangiob, usa ka adlaw sa panganod ug sa mabagang kangiob.” (Sof 1:15) Sa maong panahon sa kalisdanan, ang salapi sa usa ka tawo wala gayoy bili. “Ilang isalibay ang ilang salapi sa kadalanan . . . Ang ilang salapi ug ang ilang bulawan dili makaluwas kanila sa adlaw sa mabangis nga kasuko ni Jehova.”​—Eze 7:19; Sof 1:18.

Ang pagkadinalian sa adlaw ni Jehova gipasiugda sa mga manalagna, kinsa sublisubli nga nagpasidaan sa pagkaduol na niini. “Ang dakong adlaw ni Jehova haduol na. Kini haduol na, ug nagadali sa hilabihan.” (Sof 1:14) “Pagkaalaot sa maong adlaw; tungod kay ang adlaw ni Jehova haduol na.” “Pagubota ang tanang molupyo sa yuta; kay ang adlaw ni Jehova moabot, kay kini haduol na!”​—Joe 1:15; 2:​1, 2.

Mga Panahon sa Malaglagong Paghukom. Pinasukad sa pipila ka mahinungdanong bahin sa mga tagna ug sa misunod niini nga mga panghitabo, mopatim-aw nga ang ekspresyon nga “adlaw ni Jehova,” sa gamayng paagi, nagtumong sa nagkalainlaing mga panahon sa malaglagong paghukom nga nahitabo dugay na kanhi pinaagi sa mga kamot sa Labing Hataas. Pananglitan, nakita ni Isaias sa panan-awon kon unsay mahitabo sa dili-matinumanong Juda ug Jerusalem sa “adlaw nga iya ni Jehova sa mga panon,” nga modangat “sa matag usa nga nagbayaw sa kaugalingon ug nagpataas” taliwala kanila. (Isa 2:11-17) Si Ezequiel namulong ngadto sa dili-matinumanong mga manalagna sa Israel, nga nagpasidaan nga sila dili gayod makapalig-on sa ilang mga siyudad “aron mobarog diha sa gubat sa adlaw ni Jehova.” (Eze 13:5) Pinaagi sa baba sa iyang manalagna nga si Sofonias, si Jehova mitagna nga siya hapit na gayong mobakyaw sa iyang kamot batok sa Juda ug Jerusalem, nga naghatag ug linaing pagtagad aron bisan ang mga prinsipe o mga anak nga lalaki sa hari dili makalingkawas. (Sof 1:4-8) Sumala sa gipakita sa mga kamatuoran, kana nga “adlaw ni Jehova” midangat sa mga molupyo sa Jerusalem niadtong 607 W.K.P.

Sa maong makapaguol nga panahon sa kasakitan sa Juda ug Jerusalem, ang iyang silingang mga nasod sama sa Edom nagpakita sa ilang pagdumot kang Jehova ug sa iyang katawhan, nga tungod niana si manalagnang Abdias (ber 1, 15) mitagna batok kanila: “Kay haduol na ang adlaw ni Jehova batok sa tanang kanasoran. Ingon sa imong gibuhat, kini pagabuhaton kanimo.” Sa susama, “ang adlaw ni Jehova” ug ang tanang kalayonhong kalaglagan nga lakip sa diwa niini nga ekspresyon midangat sa Babilonya ug Ehipto sumala sa gitagna.​—Isa 13:​1, 6; Jer 46:​1, 2, 10.

Sa ulahi, pinaagi ni manalagnang Malaquias, ang lain pang “dako ug makalilisang nga adlaw ni Jehova” gitagna, ug giingong kini pagaunhan sa pag-abot ni “Elias nga manalagna.” (Mal 4:​5, 6) Ang orihinal nga Elias nabuhi na mga 500 ka tuig una pa ipahayag kana nga tagna, apan sa unang siglo K.P. gipaila ni Jesus nga si Juan nga Tigbawtismo mao ang gitagna nga katugbang ni Elias. (Mat 11:12-14; Mar 9:11-13) Busa sa maong panahon dihay usa ka “adlaw ni Jehova” nga haduol na. Sa Pentekostes sa 33 K.P., gipatin-aw ni Pedro nga ang nahitabo maoy katumanan sa tagna ni Joel (Joe 2:28-32) bahin sa pagbubo sa espiritu sa Diyos ug nga kini usab gitakdang mahitabo una pa “ang dako ug bantogang adlaw ni Jehova.” (Buh 2:16-21) Ang maong “adlaw ni Jehova” miabot niadtong 70 K.P., sa dihang, ingong katumanan sa iyang Pulong, gipahinabo ni Jehova nga ang kasundalohan sa Roma mopahamtang sa iyang paghukom batok sa nasod nga misalikway sa Anak sa Diyos ug masuklanong misinggit: “Kami walay hari gawas kang Cesar.”​—Ju 19:15; Dan 9:24-27.

Hinunoa, ang Kasulatan nagpunting sa lain pang “adlaw ni Jehova.” Human mapasig-uli ang mga Hudiyo ngadto sa Jerusalem gikan sa pagkadestiyero sa Babilonya, si Jehova nagsugo sa iyang manalagnang si Zacarias (14:1-3) sa pagtagna ug ‘usa ka adlaw nga iya ni Jehova’ sa dihang siya magtigom dili lamang sa usa ka nasod kondili sa ‘tanang kanasoran batok sa Jerusalem,’ nga sa kinatayuktokan niana nga adlaw “si Jehova mogula gayod ug makiggubat batok niadtong mga nasora,” aron magpuo kanila. Si apostol Pablo, nga ubos sa pag-inspirar, naglangkit sa umaabot nga “adlaw ni Jehova” sa presensiya ni Kristo. (2Te 2:​1, 2) Ug si Pedro naghisgot niini labot sa pagtukod sa ‘bag-ong mga langit ug usa ka bag-ong yuta nga niini magpuyo ang pagkamatarong.’​—2Pe 3:10-13.

Ang kasegurohan ug kaluwasan sa panahon sa dakong adlaw ni Jehova angayng kabalak-an sa matag usa. Human mangutana, “Kinsa ang makasugakod niana?” si Joel miingon, “Si Jehova mahimong dalangpanan sa iyang katawhan.” (Joe 2:11; 3:16) Ang pagdapit mapuangorong gipaabot ngadto sa tanan, apan diyutay lamang ang nagpahimulos niining gitagana nga dalangpanan pinaagi sa pagsunod sa tambag ni Sofonias: “Sa dili pa ang lagda magpatunghag bisan unsa, sa dili pa molabay ang adlaw sama sa tahop, sa dili pa modangat kaninyo ang nagasilaob nga kasuko ni Jehova, sa dili pa modangat kaninyo ang adlaw sa kasuko ni Jehova, pangitaa ninyo si Jehova, kamong tanang maaghop sa yuta, nga nagbuhat sa Iyang hudisyal nga hukom. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”​—Sof 2:​2, 3.