Ilang Dalangpanan—Usa ka Bakak!

“Kay ang usa ka bakak gihimo namo nga among dalangpanan ug sa kabakakan kami nagtago sa among kaugalingon.”—ISAIAS 28:15.

 1, 2. (a) Haing organisasyona karong adlawa ang angay magmatikod kon unsay nahitabo sa karaang gingharian sa Juda? (b) Unsang sayop-pagkabutang nga pagsalig ang nabatonan sa Juda?

KANA bang mga pulonga mapadapat sa Kakristiyanohan karong adlawa sama ra ngadto sa karaang duhag-tribong gingharian sa Juda? Segurado, mapadapat kana! Ug ang maong kasamahan nagpasabot ug kadaotan alang sa modernong-adlawng Kakristiyanohan. Nagkahulogan kini nga duol nang hiapsan sa katalagman kanang apostatang relihiyosong organisasyon.

² Sa amihanan sa Juda mao ang napulog-tribong gingharian sa Israel. Sa dihang ang Israel wala na magmatinumanon, gitugotan ni Jehova nga siya mapukan sa Asirya niadtong 740 W.K.P. Ang iyang igsoong gingharian, ang Juda, nakasaksi niadtong makapasubong hitabo apan dayag mibati nga dili gayod kana mahitabo kaniya. ‘Aw,’ nanghambog ang iyang mga pangulo, ‘dili ba ang templo ni Jehova anaa sa Jerusalem? Dili ba kami katawhang inuyonan sa Diyos? Dili ba ang mga saserdote ug mga propeta nagasulti diha sa ngalan ni Jehova?’ (Itandi ang Jeremias 7:4, 8-11.) Kadtong relihiyosong mga pangulo masaligon nga sila layo sa peligro. Apan nasayop sila! Sila wala na magmatinumanon sama ra sa ilang mga kabanay sa amihanan. Busa, ang nahitabo sa Samaria mahitabo usab sa Jerusalem.

 3. Nganong gibati sa Kakristiyanohan nga masaligon bahin sa umaabot, apan may maayo bang hinungdan sa iyang pagsalig?

³ Sa susamang paagi, ang Kakristiyanohan nangangkon nga may espesyal nga relasyon uban sa Diyos. ‘Aw,’ siya nanghambog, ‘kami may tinagpulo ka libong simbahan ug propesyonal nga klero, ingon man ginatos ka milyong sumusunod. Nakabaton usab kamig Bibliya, ug gigamit usab namo ang ngalan ni Jesus diha sa among pagsimba. Segurado, kami giuyonan sa Diyos!’ Apan ang nahitabo sa karaang Jerusalem nagbarog nga usa ka pig-ot nga pasidaan. Bisan pa sa talagsaong mga panghitabong politikanhon karong bag-o, nahibalo kita nga si Jehova duol nang molihok nga mahukmanon batok sa Kakristiyanohan ug sa tanang ubang bakak nga relihiyon.

“Usa ka Pakigsaad Uban sa Kamatayon”

 4. Unsang pakigsaad ang gihunahuna sa Juda nga iyang gihimo?

⁴ Sa karaang mga panahon, ang dili-matinumanong Jerusalem nakadawat ug daghang pasidaan pinaagi sa matuod nga mga propeta sa Diyos, apan wala sila motuo niadto. Hinunoa, siya nanghambog nga ang kamatayon dili gayod magdala kaniya ngadto sa Sheol, ang lubnganan, sama nga kadto nagdala sa amihanang gingharian sa Israel. Si Isaias ang propeta gidasig sa pag-ingon ngadto sa Juda: “Busa pamatia ninyo ang pulong ni Jehova, kamong mga hambogiro, kamong mga magmamando niining katawhan nga anaa sa Jerusalem: Tungod kay kamo nag-ingon: ‘Kami naghimo sa usa ka pakigsaad uban sa Kamatayon; ug uban sa Sheol among gipatungha ang usa ka panan-awon; ang mobul-og nga baha, kon ugaling kini moagi, dili modangat kanamo, kay ang usa ka bakak gihimo namo nga among dalangpanan ug sa kabakakan kami nagtago sa among kaugalingon.’”​—Isaias 28:14, 15.

 5. (a) Unsa man ang giingong pakigsaad sa Juda uban sa kamatayon? (b) Unsang pasidaang gihatag kang Haring Asa ang nahikalimtan sa Juda?

⁵ Oo, ang mga pangulo sa Jerusalem naghunahuna nga sila may kasabotan, ingnon ta, uban sa kamatayon ug sa Sheol aron ang ilang siyudad maluwas. Apan ang giingong pakigsaad sa Jerusalem uban sa kamatayon nagkahulogan ba nga siya naghinulsol sa iyang mga sala ug karon misalig kang Jehova alang sa kaluwasan? (Jeremias 8:6, 7) Dili gayod! Hinunoa, siya midangop sa tawhanong politikanhong mga magmamando alang sa tabang. Apan ang iyang pagsalig sa kalibotanong mga kombuya maoy handurawan, usa ka bakak. Ang mga kalibotanon nga iyang gisaligan dili makaluwas kaniya. Ug sanglit gibiyaan niya si Jehova, si Jehova mibiya sa Jerusalem. Nahitabo ang sumala sa gipasidaan ni propetang Azarias kang Haring Asa: “Si Jehova magauban kanimo samtang ikaw magauban kaniya; ug kon imong pangitaon siya, imo siyang hikaplagan, apan kon imo siyang biyaan ikaw iyang pagabiyaan.”​—2 Cronicas 15:2.

 6, 7. Unsang mga tikang ang gihimo sa Juda aron matino ang iyang kasegurohan, apan unsay sangpotanan sa kataposan?

⁶ Kay masaligon sa ilang politikanhong mga pakigkombuya, ang mga pangulo sa Jerusalem naneguro nga walay “mobul-og nga baha” sa nagasulong nga kasundalohan ang mopaduol kanila aron sa pagtugaw sa ilang pakigdait ug kasegurohan. Sa nameligro sa panagkombuya sa Israel ug Sirya, ang Juda midangop sa Asirya alang sa tabang. (2 Hari 16:5-9) Sa ulahi, sa nameligro sa militaryong mga puwersa sa Babilonya, siya midangop sa Ehipto alang sa suportar ug si Paraon misanong, nga nagpadalag kasundalohan aron sa pagtabang.​—Jeremias 37:5-8; Ezekiel 17:11-15.

⁷ Apan ang kasundalohan sa Babilonya gamhanan kaayo, ug ang mga sundalo sa Ehipto kinahanglang mosibog. Ang pagsalig sa Jerusalem sa Ehipto napamatud-ang usa ka sayop, ug niadtong 607 W.K.P., gipasagdan siya ni Jehova ngadto sa kalaglagan nga iyang gitagna. Busa ang mga magmamando ug mga saserdote sa Jerusalem maoy sayop! Ang ilang pagsalig sa kalibotanong mga panagkombuya alang sa pakigdait ug kasegurohan maoy “usa ka bakak” nga gibanlas sa kusog nga baha sa kasundalohan sa Babilonya.

Pagsalikway sa “Sinulayan nga Bato”

 8. Sa unsang paagi ang Kakristiyanohan mikuha sa baroganan nga sama kaayo sa iya sa karaang Juda?

⁸ May katumbas bang kahimtang karong adlawa? Oo, aduna. Gibati usab sa klero sa Kakristiyanohan nga dili sila hiapsan sa katalagman. Sa pagkamatuod, sila nagaingon sumala sa gitagna ni Isaias: “Kami naghimo sa usa ka pakigsaad uban sa Kamatayon; ug uban sa Sheol among gipatungha ang usa ka panan-awon; ang mobul-og nga baha, kon ugaling kini moagi, dili modangat kanamo, kay ang usa ka bakak gihimo namo nga among dalangpanan ug sa kabakakan kami nagtago sa among kaugalingon.” (Isaias 28:15) Sama sa karaang Jerusalem, ang Kakristiyanohan midangop sa kalibotanong mga panagkombuya alang sa kasegurohan, ug ang iyang klero dili modangop kang Jehova. Aw, dili gani sila mogamit sa iyang ngalan, ug sila nagatamay ug nagalutos niadtong nagapasidungog nianang ngalana. Ang klero sa Kakristiyanohan nagbuhat gayod kon unsay gibuhat sa Hudiyong pangulong mga saserdote sa unang siglo sa dihang gisalikway nila si Kristo. Sa pagkamatuod sila nagaingon, “Kami walay laing hari gawas kang Cesar.”​—Juan 19:15.

 9. (a) Kinsay nagapasidaan sa Kakristiyanohan karong adlawa sa samang paagi nga si Isaias nagpasidaan sa Juda? (b) Kang kinsa angay modangop ang Kakristiyanohan?

⁹ Karong adlawa, ang mga Saksi ni Jehova nagpasidaan nga ang usa ka baha sa kasundalohang tiglaglag duol nang mosalanap sa Kakristiyanohan. Dugang pa, gipunting nila ang tinuod nga dapit nga dalangpanan gikan sa maong baha. Gikutlo nila ang Isaias 28:16, nga nagaingon: “Kini mao ang giingon sa Soberano Ginoong Jehova: ‘Ania akong gibutang nga usa ka patukoranan sa Sion ang usa ka bato, usa ka sinulayan nga bato, ang bililhon nga batong pamag-ang sa usa ka patukoranan nga malig-on. Walay mausa nga motuo kaniya ang magmahadlokon.’” Kinsa ba kining ‘bililhong batong pamag-ang’? Gikutlo ni apostol Pedro kining mga pulonga ug gipadapat kang Jesu-Kristo. (1 Pedro 2:6) Kon ang Kakristiyanohan nagtinguhag pakigdait uban sa Hari ni Jehova, si Jesu-Kristo, nan iya untang malikayan ang umaabot kusog nga baha.​—Itandi ang Lucas 19:42-44.

10. Unsang mga pakiglangkit ang giugmad sa Kakristiyanohan?

¹⁰ Ugaling, wala niya buhata kana. Sa kapulihay, sa iyang pagtinguha sa pakigdait ug kasegurohan, siya nagpaayon sa iyang kaugalingon sa kabubut-on sa politikanhong mga pangulo sa mga nasod​—bisan pa sa pasidaan sa Bibliya nga ang pakighigala sa kalibotan maoy pagpakig-away sa Diyos. (Santiago 4:4) Dugang pa, niadtong 1919 kusganon niyang gipasiugda ang Liga sa Kanasoran ingong labing maayong paglaom sa tawo alang sa pakigdait. Sukad 1945 gibutang niya ang iyang paglaom diha sa Hiniusang Kanasoran. (Itandi ang Pinadayag 17:3, 11.) Unsa ka bug-os ang iyang pakiglangkit sa maong organisasyon?

11. Unsang paghawas ang nabatonan sa relihiyon diha sa HK?

¹¹ Ang usa ka bag-ong basahon nagahatag ug ideya sa nagaingon kini: “Dili momenos sa kawhaag-upat ka Katolikong organisasyon gihawasan diha sa HK o UN. Ang ubay-ubay sa relihiyosong mga pangulo sa kalibotan miduaw sa internasyonal nga organisasyon. Labing halandumon mao ang mga pagduaw sa Iyang Kasantosan Papa Paulo VI panahon sa Heneral nga Asembliya niadtong 1965 ug ni Papa Juan Paulo II niadtong 1979. Daghang relihiyon may espesyal nga mga pangaliya, mga pag-ampo, mga himno ug mga serbisyo alang sa Hiniusang Kanasoran. Ang labing dagkong mga pananglitan mao ang iya sa Katoliko, Unitarian-Universalist, Baptist ug Bahai nga mga pagtuo.”

Kawang nga mga Paglaom Alang sa Pakigdait

12, 13. Bisan pa sa kaylap nga mga paglaom nga ang pakigdait hapit nang mabatonan, nganong ang mga saksi ni Jehova masaligon nga ang ilang mga pasidaan matuod?

¹² Usa sa labing gamhanang politikanhong mga pangulo sa kalibotan nagpalanog sa mga paglaom sa daghan sa miingon siya: “Kining kaliwatana sa katawhan sa yuta mahimong makasaksi sa pag-abot sa dili-mabalik nga yugto sa pakigdait sa kasaysayan sa sibilisasyon.” Husto ba siya? Ang bag-ong mga panghitabo nagkahulogan ba nga ang mga pasidaan nga gipahayag sa mga Saksi ni Jehova mahitungod sa pagpatuman ni Jehova sa paghukom diha sa kanasoran dili mamatuman? Sayop ba ang mga Saksi ni Jehova?

¹³ Dili, sila dili sayop. Nahibalo sila nga sila nagasulti sa tinuod kay gibutang nila ang ilang pagsalig diha kang Jehova ug diha sa Bibliya, nga mao ang sa Diyos mismo nga Pulong sa kamatuoran. Ang Tito 1:2 nag-ingon: “Ang Diyos . . . dili mahimong magbakak.” Busa sila may bug-os nga pagsalig nga sa dihang ang usa ka tagna sa Bibliya magaingon nga mahitabo ang usa ka butang, kana sa walay pagkapakyas matuman. Si Jehova mismo nagaingon: “Busa ang akong pulong nga magagula sa akong baba mamao. Kini dili mobalik kanako nga walay sangpotanan, apan pagabuhaton gayod niini ang akong gikahimut-an.”​—Isaias 55:11.

14, 15. (a) Unsay gimantala sa mga pangulo sa Juda sa dayon na ang kalaglagan sa Jerusalem sa 607 W.K.P.? (b) Unsay gitagna ni Pablo nga igamantala sa dili pa modangat ang kalit nga kalaglagan niining kalibotana? (c) Unsay atong madahom sa kinakusgang pagmantala nga gitagna sa 1 Tesalonica 5:3?

¹⁴ Sa mga tuig una sa pagkalaglag sa Jerusalem niadtong 607 W.K.P., mitaho si Jeremias nga ang mga pangulo nagsinggit, “Adunay pakigdait! Adunay pakigdait!” (Jeremias 8:11) Bisan pa niadto, kadto usa ka bakak. Ang Jerusalem nalaglag ingong katumanan sa dinasig nga mga pasidaan sa matuod nga mga propeta ni Jehova. Si apostol Pablo nagpasidaan nga ang butang susama mahitabo sa atong adlaw. Siya miingon nga ang mga tawo mosinggit ug “Pakigdait ug kasegurohan!” Apan unya, siya miingon, ang “kalit nga kalaglagan” “modangat kanila.”​—1 Tesalonica 5:3.

¹⁵ Sa pagsulod nato sa katuigang 1990, ang mga mantalaan ug mga magasin sa bisan diin nag-ingon nga natapos na ang Bugnawng Gubat ug ang pakigdait sa kalibotan sa kataposan maaninaw na. Apan unya misilaob ang gubat nga nagpinusilay sa Tungang Sidlakan. Bisan pa niana, sa madugay o sa madali ang kahimtang sa kalibotan modangat sa punto diin ang singgit nga “Pakigdait ug kasegurohan” nga gitagna sa 1 Tesalonica 5:2, 3 moabot sa kinakusgan. Kay ang atong mga paglaom hugot naangkla diha sa Pulong sa Diyos, kita nahibalo nga, sa pag-abot sa maong kinakusgan, ang mga paghukom sa Diyos igapatuman sa madali ug sa walay pagkasayop. Walay inayom-ayom nga mga pagpahayag sa pakigdait ug kasegurohan ang magpahunahuna nato nga dili moabot ang kalaglagan nga gitagna sa Diyos. Ang mga paghukom ni Jehova sa walay pagkabalhin nahitala diha sa iyang Pulong ang Bibliya. Ang Kakristiyanohan, uban sa tanang ubang bakak nga relihiyon, pagalaglagon. Ug unya ang mga paghukom sa kalaglagan nga iya ni Jehova igapahayag batok sa nahibilin sa kalibotan ni Satanas. (2 Tesalonica 1:6-8; 2:8; Pinadayag 18:21; 19:19-21) Sanglit ang mga Saksi ni Jehova masaligon nga pagatumanon ni Jehova ang iyang pulong, sila magapadayon sa pagtukaw ubos sa paggiya sa matinumanon ug maalamong ulipon nga matang ug mainampingong maniid kon sa unsang paagi madayag ang mga panghitabo sa kalibotan. (Mateo 24:45-47) Sa pagkamatuod, walay paningkamot sa panagdait sa tawo ang magpahunahuna kanato nga gibiyaan ni Jehova ang iyang katuyoan sa pagpahinabo sa kusog nga baha sa kalaglagan diha sa punog-sala nga Kakristiyanohan.

‘Ang Diyos Mao ang Among Dalangpanan’

16, 17. Unsay sanong sa mga Saksi ni Jehova kon ang pipila masilo sa pagkaprangka sa ilang mensahe?

¹⁶ Ang pipila tingali masilo sa pagkaprangka sa mga Saksi ni Jehova sa pagmantala niini. Ugaling, sa dihang sila nagaingon nga ang relihiyosong mga pangulo sa Kakristiyanohan midangop sa usa ka bakak nga kahikayan, sila yanong nagasulti kon unsay gipamulong sa Bibliya. Sa dihang sila nagaingon nga ang Kakristiyanohan angay silotan tungod kay siya nahimong bahin sa kalibotan, sila yanong nagtaho sa ginaingon sa Diyos diha sa Bibliya. (Filipos 3:18, 19) Dugang pa, tungod kay ang Kakristiyanohan nagabutang sa iyang pagsalig diha sa mga plano nga gisugyot niining kalibotana, siya aktuwal nagasuportar sa diyos niining kalibotana, si Satanas nga Yawa, nga giingon ni Jesus mao ang amahan sa bakak.​—Juan 8:44; 2 Corinto 4:4.

¹⁷ Busa, ang mga Saksi ni Jehova nagapahayag: Bahin kanamo, kami wala magdasig sa bakak nga mga paglaom sa pakigdait sa kalibotan tungod sa nagkabalhing panghitabo sa politika. Hinunoa, gipalanog namo ang mga pulong sa salmista: “Ang Diyos maoy usa ka dalangpanan alang kanamo. . . . Ang mga anak sa yutan-ong tawo maoy usa ka gininhawa, ang mga anak sa katawhan maoy usa ka bakak. Sa dihang ibutang sa timbangan silang tanan labi pang gaan kay sa gininhawa.” (Salmo 62:8, 9) Ang tawhanong mga plano sa pagpasiugda ug pagtipig sa Kakristiyanohan ug nahibilin niining sistema sa mga butang maoy kabakakan, usa ka bakak! Silang tanan nga iponon walay gahom sa paglangan sa mga katuyoan ni Jehova sama ra sa init nga gininhawa sa baba!

18. Unsang pasidaan sa salmista ang nahiangay karong adlawa?

¹⁸ Ang mga Saksi ni Jehova nagakutlo usab sa Salmo 33, mga bersikulo 17 hangtod 19, nga nagapahayag: “Ang kabayo [sa Ehipto, nga nagasimbolo sa pakiggubat] maoy usa ka limbong alang sa kaluwasan, ug pinaagi sa dako nga kusog niini kini dili makataganag kaikyasan. Tan-awa! Ang mata ni Jehova maoy anaa niadtong nahadlok kaniya, niadtong nagpaabot sa iyang mahigugmaong-kalulot, aron sa pagluwas sa ilang kalag gikan sa kamatayon mismo, ug sa pagtipig kanilang buhi sa panahon sa gutom.” Karong adlawa, ang matuod nga mga Kristohanon nagasalig kang Jehova ug sa iyang langitnong Gingharian, ang bugtong kahikayan nga makapatunghag malungtarong pakigdait.

Kakristiyanohan “Usa ka Dapit nga Pagatamakan”

19. Nganong usa ka handurawan ang pagsalig sa politikanhong mga organisasyon sa pagpatunghag pakigdait sa kalibotan?

¹⁹ Ang pagsalig sa bisan unsang ginamag-tawong kapuli sa Gingharian sa Diyos nagahimo sa maong kapuli nga usa ka larawan, usa ka tumong sa pagsimba. (Pinadayag 13:14, 15) Busa, ang pagdasig sa pagsalig sa politikanhong mga institusyon, sama sa Hiniusang Kanasoran, alang sa pakigdait ug kasegurohan maoy usa ka handurawan, usa ka bakak. Mahitungod sa maong mga tumong sa bakak nga mga paglaom, si Jeremias miingon: “Ang iyang linilok nga larawan maoy kabakakan, ug walay espiritu diha kanila. Sila kakawangan, usa ka buhat sa pagtamay. Sa panahon nga sila pagatagdon sila mahanaw.” (Jeremias 10:14, 15) Busa, ang mga kabayong iggugubat sa antitipikong Ehipto, nga mao, ang militaryo-politikanhong gahom sa kanasoran karong adlawa, dili manalipod sa relihiyosong dominyo sa Kakristiyanohan sa iyang adlaw sa kasakitan. Ang pakigkombuya sa mga relihiyon sa Kakristiyanohan uban niining kalibotana tinong mapakyas sa pagpanalipod kanila.

20, 21. (a) Unsay nahitabo sa Liga sa Kanasoran, ug nganong ang Hiniusang Kanasoran dili mas maayog kahimtang? (b) Giunsa pagpakita ni Isaias nga ang mga pakigkombuya sa Kakristiyanohan uban sa kalibotan dili magluwas kaniya?

²⁰ Ang Kakristiyanohan nagsandig sa iyang mga paglaom diha sa Liga sa Kanasoran, apan kana napukan bisag wala pa moabot ang Armageddon. Karon gibalhin niya ang iyang pag-unong ngadto sa Hiniusang Kanasoran. Apan kini duol nang moatubang sa “gubat sa dakong adlaw sa Diyos nga Makagagahom sa Tanan,” ug kini dili molahutay. (Pinadayag 16:14) Bisan ang nabuhi-pag-usab nga UN o HK dili gayod makapatunghag pakigdait ug kasegurohan. Gipakita sa matagnaong Pulong sa Diyos nga ang organisasyong Hiniusang Kanasoran uban sa membrong kanasoran niini “makiggubat sa Kordero [si Kristo nga may gahom sa Gingharian], apan, kay siya Ginoo sa mga ginoo ug Hari sa mga hari, ang Kordero magpukan kanila.”​—Pinadayag 17:14.

²¹ Ang mga Saksi ni Jehova masaligong nagaingon nga walay kaluwasan alang sa Kakristiyanohan diha sa iyang mga pakigkombuya sa kalibotan ni Satanas. Ug sa dihang sila nagaingon niini, sila nagapunting lamang sa ginaingon mismo sa Bibliya. Ang Isaias 28:17, 18 nagakutlo kang Jehova nga nagaingon: “Ug ang hustisya himoon ko nga latid ug ang pagkamatarong mao ang pamato; ug ang graniso molaglag sa dalangpanan sa kabakakan, ug ang mga tubig mismo mosalanap sa dapit nga tagoanan. Ug ang inyong pakigsaad sa Kamatayon pagapalaon, ug ang inyong panan-awon uban sa Sheol dili molungtad. Ang mobul-og kusog nga baha, sa moagi kini​—kamo mahimo usab nga dapit pagatamakan alang niini.”

22. Sa dihang ang hingpit nga hustisya ipadapat sa Kakristiyanohan, unsay mosangpot?

²² Sa dihang ang hudisyal nga desisyon ni Jehova pagatumanon, kini maoy sumala sa hingpit nga hustisya. Ug ang pasikaranan sa pagsalig sa Kakristiyanohan, ang iyang “pakigsaad uban sa Kamatayon,” bug-os mabanlas samag pinaagi sa kusog nga baha. Si Isaias nagpadayon sa pag-ingon: “Sa buntag-buntag kini moagi, sa adlaw ug sa gabii; ug kini mahimong usa gayod ka hinungdan sa pagpangurog aron pasabton ang uban kon unsay nadungog.” (Isaias 28:19) Pagkamakalilisang unya alang sa mga tumatan-aw ang pagkasaksi sa bug-os nga gahom sa paghukom ni Jehova! Pagkadaotan unya alang sa klero sa Kakristiyanohan ug sa ilang mga sumusunod sa pagkasayod, nga ulahi na kaayo, nga sila misalig sa usa ka bakak!

Ngalan ni Jehova “Usa ka Torre nga Malig-on”

23, 24. Inay magtinguhag kasegurohan niining kalibotana, unsay pagabuhaton sa mga Saksi ni Jehova?

²³ Apan unsa na man ang mga Saksi ni Jehova? Bisan sa atubangan sa internasyonal nga pagdumot ug paglutos, sila nagapabiling bulag sa kalibotan. Wala gayod sila malimot sa giingon ni Jesus mahitungod sa iyang mga sumusunod: “Sila dili bahin sa kalibotan, maingon nga ako dili bahin sa kalibotan.” (Juan 17:16) Niining kataposang mga adlaw, ilang gibutang ang ilang pagsalig sa Gingharian ni Jehova, dili diha sa tawhanong mga plano. Busa, ang katalagman sa Kakristiyanohan dili magpalisang sa mga Saksi ni Jehova. Sumala sa gitagna ni Isaias: “Walay usa nga nagtuo ang mahadlok.”​—Isaias 28:16.

²⁴ Ang Proverbio 18:10 nagaingon: “Ang ngalan ni Jehova maoy usa ka torre nga malig-on. Nganha niana ang matarong magadalagan ug hatagan sa panalipod.” Busa gidapit namo ang tanang samag-karnero nga mga tawo nga modangop kang Jehova ug sa iyang Gingharian pinaagi ni Kristo. Ingong dapit tagoanan, si Jehova dili kabakakan! Ang iyang Gingharian pinaagi ni Kristo dili bakak! Ang dalangpanan sa Kakristiyanohan maoy usa ka bakak, apan ang dalangpanan sa matuod nga mga Kristohanon mao ang kamatuoran.

Makapatin-aw Ka Ba?

◻ Sa unsang paagi ang karaang Juda midangop sa usa ka bakak?

◻ Sa unsang paagi ang Kakristiyanohan misulay sa pagtago sa iyang kaugalingon diha sa kabakakan?

◻ Giunsa pagpasidaan ni Isaias ang Juda, ug sa unsang paagi ang mga Saksi ni Jehova nagapahayag ug susamang pasidaan karong adlawa?

◻ Sa unsang paagi masusihan sa Kakristiyanohan nga sayop pagkabutang ang iyang pagsalig?

◻ Kasukwahi sa Kakristiyanohan, unsang baroganan ang padayong gihuptan sa mga Saksi ni Jehova?

[Kahon sa panid 17]

DAGKONG MGA PAGLAOM GIPAHAYAG ALANG SA HINIUSANG KANASORAN

“Sa unang panahon sukad sa Gubat sa Kalibotan II ang internasyonal nga komunidad nahiusa. Ang pagpangulo sa Hiniusang Kanasoran, nga niadto usa lamang ka mithi nga gilaoman, karon nagalig-on sa panan-awon sa magtutukod niini. . . . Busa ang kalibotan makapahimulos niining higayona sa pagtuman sa dugay-nang-gituohang saad sa usa ka bag-ong kalibotan nga kahikayan.”—Presidente Bush sa Tinipong Bansa sa iyang Estado sa Unyon nga mensahe alang nianang nasora, Enero 29, 1991