Kapitulo Bayente-tres
Magpaabot Kang Jehova
1, 2. (a) Unsay unod sa Isaias kapitulo 30? (b) Unsang mga pangutana ang ato karong hisgotan?
SA Isaias kapitulo 30, makabasa kitag dugang balaanong mga pahayag batok sa mga daotan. Bisan pa niana, gipasiugda niining bahina sa tagna ni Isaias ang pipila ka kahimut-anang mga hiyas ni Jehova. Ngani, ang mga kinaiya ni Jehova gibatbat sa mga terminong matin-aw kaayo nga kita, ingnon ta, makakita sa iyang makapahupay nga presensiya, makadungog sa iyang nagagiyang tingog, ug makabatyag sa iyang makapaayog-sakit nga paghikap.—Isaias 30:20, 21, 26.
2 Bisan pag ingon, ang mga katagilungsod ni Isaias, ang apostatang mga molupyo sa Juda, midumili sa pagbalik kang Jehova. Sa kapulihay, sila misalig sa tawo. Unsay gibati ni Jehova bahin niana? Ug sa unsang paagi kining bahina sa tagna ni Isaias motabang sa mga Kristohanon karong adlawa sa pagpaabot kang Jehova? (Isaias 30:18) Atong susihon.
Kabuangan ug Pagkahinukman sa Katalagman
3. Unsang daotang laraw ang gibutyag ni Jehova?
3 Sa taastaas nang panahon ang mga pangulo sa Juda sekretong nagsabotsabot nga mangitag paagi sa paglikay nga mailalom sa yugo sa Asirya. Ugaling lang, si Jehova nakakita. Karon siya nagyagyag sa ilang daotang laraw: “‘Alaot ang gahiang mga anak,’ mao ang giingon ni Jehova, ‘kadtong mga nakiling sa pagtuman sa laraw, apan dili nianang gikan kanako; ug sa pagbubo ug halad-nga-ilimnon, apan dili uban sa akong espiritu, aron sa pagdugang ug sala sa sala; kadtong mga nanglugsong sa Ehipto.’”—Isaias 30:1, 2a.
4. Sa unsang paagi ang masuklanong katawhan sa Diyos nagbutang sa Ehipto sa dapit sa Diyos?
4 Hilabihang kurata niadtong malansisong mga pangulo sa pagkadungog nga nabutyag ang ilang plano! Ang pagpanaw paingon sa Ehipto sa pagpakig-alyansa uban niya dili lamang kay pagbatok sa Asirya; kadto pagsukol batok kang Jehova nga Diyos. Sa panahon ni Haring David, ang nasod misalig kang Jehova ingon nga salipdanan ug midangop ‘sa landong sa iyang mga pako.’ (Salmo 27:1; 36:7) Karon sila ‘mipasilong sa salipdanan ni Paraon’ ug ‘midangop sa landong sa Ehipto.’ (Isaias 30:2b) Gibutang nila ang Ehipto sa dapit sa Diyos! Pagkamaluibon!—Basaha ang Isaias 30:3-5.
5, 6. (a) Nganong ang pakig-alyansa sa Ehipto usa ka makapalaglag nga kasaypanan? (b) Unsang sayosayong panaw nga gihimo sa katawhan sa Diyos ang nagpasiugda sa pagkabinuang sa maong pagpanaw ngadto sa Ehipto?
5 Nga daw pagtubag sa bisan unsang pagpasabot nga ang pag-adto nga may misyon sa Ehipto maoy wala-planohang pagduaw lamang, si Isaias mihatag ug dugang nga mga detalye. “Ang pahayag batok sa mga mananap sa habagatan: Latas sa yuta sa kasakit ug malisod nga mga kahimtang, sa leyon ug sa leopardo nga nagngulob, sa malala nga halas ug sa nagalupad nga kalayonhong halas, sa mga abaga sa hingkod nga mga asno ilang ginadala ang ilang mga kahinguhaan, ug ang ilang mga abiyo sa mga bugdo sa bukobuko sa mga kamelyo.” (Isaias 30:6a) Tin-aw, maayong pagkaplano ang panaw. Giorganisar sa mga sinugo ang usa ka panon sa mga kamelyo ug mga asno, nga gikargahan nilag mahalong mga manggad ug gigiyahan paingon sa Ehipto agi sa umaw nga kamingawan nga gisuroysuroyan ug nagngulob nga mga leyon ug malala nga mga halas. Sa kataposan, ang mga sinugo nakaabot sa ilang dulnganan ug gihatag ang ilang mahalong mga butang ngadto sa mga Ehiptohanon. Ang panalipod ilang gipalit—o kanay ilang hunahuna. Bisan pa niana, si Jehova nag-ingon: “Alang sa katawhan kini sila dili magpulos. Ug ang mga Ehiptohanon kakawangan lamang, ug sila motabang sa walay kapuslanan lamang. Busa akong gitawag kini siya nga: ‘Rahab—sila alang sa paglingkod nga walay lihok.’” (Isaias 30:6b, 7) Ang “Rahab,” usa ka “mangtas sa dagat,” nagsimbolo sa Ehipto. (Isaias 51:9, 10) Kini siya mosaad sa tanang butang apan walay ginahimo. Ang pakig-alyansa sa Juda uban niya maoy makapalaglag nga kasaypanan.
6 Samtang si Isaias nagbatbat sa panaw sa mga sinugo, tingalig nahinumdoman sa iyang mga mamiminaw ang susamang panaw nga gihimo sa mga adlaw ni Moises. Ang ilang mga katigulangan milatas sa mao mismong “makapalisang nga kamingawan.” (Deuteronomio 8:14-16) Sa adlaw ni Moises, hinunoa, ang mga Israelinhon mipanaw palayo sa Ehipto ug pagawas sa pagkaulipon. Niadtong higayona ang mga sinugo mipanaw paingon sa Ehipto ug, sa pagkatinuod, paingon sa pagkaulipon. Kabuangan gayod! Hinaot kita dili gayod mohimog ingon ka daotang desisyon ug ibaylo ang atong espirituwal nga kagawasan sa kaulipnan!—Itandi ang Galacia 5:1.
Pagsupak sa Mensahe sa Manalagna
7. Nganong gipasulat ni Jehova kang Isaias ang Iyang pasidaan sa Juda?
7 Gisugo ni Jehova si Isaias nga isulat ang mensahe nga bag-o pa niyang gipahayag aron “kini magsilbi sa umaabot nga adlaw, ingong usa ka saksi hangtod sa panahong walay tino.” (Isaias 30:8) Ang dili pag-uyon ni Jehova sa pagpalabi sa mga pakig-alyansa sa tawo kay sa pagsalig Kaniya kinahanglang isulat alang sa kaayohan sa umaabot nga mga kaliwatan—lakip ang atong kaliwatan karong adlawa. (2 Pedro 3:1-4) Apan adunay mas dinaliang panginahanglan sa usa ka sinulat nga talaan. “Kini usa ka masuklanong katawhan, dili-matinud-anong mga anak, mga anak nga dili buot maminaw sa balaod ni Jehova.” (Isaias 30:9) Ang katawhan nagsalikway sa tambag sa Diyos. Busa, kinahanglang kini isulat aron sa ulahi sila dili makalimod nga sila nakadawat ug angay nga pasidaan.—Proverbio 28:9; Isaias 8:1, 2.
8, 9. (a) Sa unsang paagi ang mga pangulo sa Juda nagsulay sa pagdaot sa mga manalagna ni Jehova? (b) Sa unsang paagi ginapasundayag ni Isaias nga siya dili puwedeng hadlokon?
8 Karon si Isaias naghatag ug usa ka pananglitan sa masuklanong tinamdan sa katawhan. Sila “nag-ingon ngadto sa mga nakakita, ‘Ayaw gayod kamo pagtan-aw,’ ug ngadto kanilang adunay mga panan-awon, ‘Ayaw gayod kamo pagpanan-aw alang kanamo ug bisan unsang matul-id nga mga butang. Sultihi kami ug kahimut-anang mga butang; pagpanan-aw ug malinglahong mga butang.’” (Isaias 30:10) Pinaagi sa pagsugo sa matinumanong mga manalagna nga mohunong pagsulti kon unsay “matul-id,” o tinuod, ug sa pagsulti hinuon kon unsay ‘kahimut-anan’ ug ‘malinglahon,’ o bakak, gipadayag sa mga pangulo sa Juda nga gusto nilang magitik ang ilang mga igdulungog. Buot nilang dayegon sila, dili hukman sa kalaglagan. Sa ilang hunahuna, si bisan kinsang manalagna nga dili buot managna sumala sa ilang gusto angayng ‘mosimang gikan sa dalan; motipas gikan sa alagianan.’ (Isaias 30:11a) Angay nga siya mosulti ug mga butang nga makapahimuot-sa-igdulungog o bug-os mohunong sa pagsangyaw!
9 Ang mga kaaway ni Isaias mipugos: “Pahunonga ang Balaang Usa sa Israel gumikan lamang kanamo.” (Isaias 30:11b) Pahunonga si Isaias sa pagsulti diha sa ngalan ni Jehova, “ang Balaang Usa sa Israel”! Kining tituloha mismo nakapalagot kanila tungod kay ang hataas nga mga sukdanan ni Jehova nagpadayag sa ilang talamayong kahimtang. Unsay sanong ni Isaias? Siya nagpahayag: “Mao kini ang giingon sa Balaang Usa sa Israel.” (Isaias 30:12a) Sa walay pag-ukon-ukon, gisulti ni Isaias ang mga pulong mismo nga dili buot madungog sa iyang mga magsusupak. Dili siya puwedeng hadlokon. Pagkamaayong panig-ingnan alang kanato! Kon bahin sa pagmantala sa mensahe sa Diyos, ang mga Kristohanon dili gayod angayng mokompromiso. (Buhat 5:27-29) Sama kang Isaias, sila magpadayon sa pagmantala: ‘Mao kini ang giingon ni Jehova’!
Ang mga Sangpotanan sa Pagsukol
10, 11. Unsa unya ang mga sangpotanan sa pagsukol sa Juda?
10 Ang Juda nagsalikway sa pulong sa Diyos, misalig sa usa ka kabakakan, ug misandig sa “kon unsay hiwi.” (Isaias 30:12b) Unsa unya ang mga sangpotanan? Si Jehova, inay mobiya sa esena sumala sa gusto sa nasod, magpahinabo sa pagkawagtang sa nasod! Kalit ug bug-os kining mahitabo, sumala sa gipasiugda ni Isaias pinaagig usa ka ilustrasyon. Ang pagkamasuklanon sa nasod maoy sama sa “naguba nga bahin nga hapit nang matumpag, usa ka busyad sa gipatas-an pag-ayo nga paril, nga ang pagkahugno niini moabot sa kalit, sa hinanali.” (Isaias 30:13) Ingon nga ang nagkadakong busyad sa hataas nga paril ngadtongadto makatumpag sa paril, busa ang nagkadakong pagkamasuklanon sa mga katalirongan ni Isaias magpahinabo sa pagkatumpag sa nasod.
11 Pinaagi sa laing ilustrasyon gipakita ni Isaias ang pagkabug-os sa umaabot nga kalaglagan: “Ang usa tinong magbuak niini sama sa pagbuak sa usa ka tadyaw sa mga magkukulon, nga magdugmok nga walay mahibilin niini, mao nga walay makaplagan taliwala sa mga buak niini nga usa ka bika nga ikandos ug kalayo gikan sa dapog o ikahapaw ug tubig gikan sa kalamakan.” (Isaias 30:14) Ang pagkalaglag sa Juda mahimong bug-os kaayo nga walay mahibilin nga bililhong butang—wala bisan usa ka bika nga may pagkadako aron ikandos ug init nga abo gikan sa dapog o ikahapaw ug tubig gikan sa kalamakan. Makauulaw gayod nga kalaglagan! Ang umaabot nga kalaglagan niadtong mosukol batok sa matuod nga pagsimba karon maoy sama ka kalit ug bug-os.—Hebreohanon 6:4-8; 2 Pedro 2:1.
Tanyag ni Jehova Gisalikway
12. Sa unsang paagi ang katawhan sa Juda makalikay sa kalaglagan?
12 Hinuon, alang sa mga mamiminaw ni Isaias, ang kalaglagan dili kay dili-malikayan. Adunay usa ka kaikyasan. Ang manalagna nagsaysay: “Kini ang giingon sa Soberanong Ginoong Jehova, ang Balaang Usa sa Israel: ‘Pinaagi sa pagbalik ug sa pagpahulay kamo maluwas. Ang inyong pagkagamhanan mapamatud-an nga anaa lamang sa pagpadayong wala-matugaw ug sa pagkamasaligon.’” (Isaias 30:15a) Si Jehova andam moluwas sa iyang katawhan—kon sila magpakitag pagtuo pinaagi sa “pagpahulay,” o paglikay sa paningkamot sa pagbatog kaluwasan pinaagi sa tawhanong mga pakig-alyansa, ug pinaagi sa “pagpadayong wala-matugaw,” o pagpakitag pagsalig diha sa gahom sa Diyos nga manalipod pinaagi sa dili pagpadaog sa kahadlok. “Apan,” si Isaias nagsulti sa katawhan, “dili kamo buot niana.”—Isaias 30:15b.
13. Diha sa unsa ginabutang sa mga pangulo sa Juda ang ilang pagsalig, ug makataronganon ba ang maong pagsalig?
13 Unya si Isaias naghubit: “Ug kamo miingon: ‘Dili, apan kami mokalagiw sakay sa mga kabayo!’ Mao nga kamo mokalagiw. ‘Ug sa matulin nga mga kabayo kami mosakay!’ Mao nga kadtong mga naggukod kaninyo magpakita sa ilang kaugalingon nga matulin.” (Isaias 30:16) Ang mga taga-Juda naghunahuna nga ang matuling mga kabayo, inay si Jehova, maoy makaluwas kanila. (Deuteronomio 17:16; Proverbio 21:31) Bisan pa niana, ang manalagna mitubag, ang ilang pagsalig mahimong usa ka handurawan kay ang ilang mga kaaway makaapas kanila. Bisan ang gidaghanon dili makatabang kanila. “Ang usa ka libo mangurog gumikan sa pagbadlong sa usa; gumikan sa pagbadlong sa lima kamo mokalagiw.” (Isaias 30:17a) Ang kasundalohan sa Juda mangalisang ug mokalagiw inigsinggit sa pipila ra ka kaaway.a Sa kataposan, usa lang ka nahibilin ang magpabilin, nga biyaan lang sila, “sama sa usa ka palo sa tumoy sa bukid ug sama sa usa ka timaan ibabaw sa bungtod.” (Isaias 30:17b) Ingon nga katumanan sa tagna, sa dihang ang Jerusalem nalaglag sa 607 W.K.P., naluwas ang usa lang ka nahibilin.—Jeremias 25:8-11.
Paghupay Taliwala sa Paghukom sa Kalaglagan
14, 15. Unsang kahupayan ang ginahatag sa mga pulong sa Isaias 30:18 ngadto sa mga molupyo sa Juda sa karaang mga panahon ug sa matuod nga mga Kristohanon karon?
14 Samtang ang maong makapahinuklog nga mga pulong naglanoglanog pa sa mga igdulungog sa mga mamiminaw ni Isaias, nausob ang kinaiya sa iyang mensahe. Ang hulga sa katalagman giilisan sa usa ka saad sa mga panalangin. “Busa si Jehova magpaabot nga pakitaan kamog pabor, ug busa siya motindog aron pakitaan kamog kaluoy. Kay si Jehova usa ka Diyos sa paghukom. Malipayon kadtong tanan nga nagapaabot kaniya.” (Isaias 30:18) Makapadasig gayod nga mga pulong! Si Jehova maoy mahangawaon nga Amahan nga nangandoy sa pagtabang sa iyang mga anak. Siya malipay sa pagpakitag kaluoy.—Salmo 103:13; Isaias 55:7.
15 Kining mapasaligong mga pulong mapadapat ngadto sa Hudiyong nahibilin nga sa kamaluluy-on giluwas sa pagkalaglag sa Jerusalem sa 607 W.K.P. ug ngadto sa pipilang mibalik ngadto sa Yutang Saad sa 537 W.K.P. Bisan pa niana, ang mga pulong sa manalagna makapahupay usab sa mga Kristohanon karon. Kita gipahinumdoman nga si Jehova “motindog” alang kanato, nga maglaglag niining daotang kalibotan. Ang matinumanong mga magsisimba makasalig nga si Jehova—“usa ka Diyos sa paghukom”—dili motugot nga ang kalibotan ni Satanas molungtad ug usa ka adlaw pa kay sa gipangayo sa hustisya. Busa, ‘kadtong nagapaabot kaniya’ dakog katarongan sa paglipay.
Si Jehova Maghupay sa Iyang Katawhan Pinaagi sa Pagtubag sa mga Pag-ampo
16. Sa unsang paagi si Jehova nagahupay sa mga naluya?
16 Hinuon, ang pipila tingali mobatig kaluya kay ang kaluwasan wala dayon moabot sumala sa ilang gidahom. (Proverbio 13:12; 2 Pedro 3:9) Hinaot sila makabatog kahupayan gikan sa sunod nga mga pulong ni Isaias, nga nagpasiugda sa usa ka linaing bahin sa personalidad ni Jehova. “Sa dihang ang katawhan mismo sa Zion mopuyo sa Jerusalem, ikaw dili gayod mohilak. Siya sa walay pakyas magpakitag pabor kanimo sa tingog sa imong pagtuaw; inigkadungog gayod niya niini siya sa tinuod motubag kanimo.” (Isaias 30:19) Gipasabot ni Isaias ang pagkamabination niining mga pulonga pinaagi sa pagbalhin gikan sa plural nga “kamo” sa Isa 30 bersikulo 18 ngadto sa singular nga “ikaw” sa Isa 30 bersikulo 19. Sa dihang si Jehova maghupay sa mga magul-anon, siya makiglabot sa matag usa ka tawo. Sama sa usa ka Amahan, siya dili mangutana sa usa ka anak nga naluya, ‘Nganong dili ka man magmalig-on sama sa imong igsoon?’ (Galacia 6:4) Hinunoa, siya mamati pag-ayo sa matag usa. Ngani, “inigkadungog gayod niya niini siya sa tinuod motubag kanimo.” Pagkamapasaligong mga pulong! Ang mga naluya mahimong mapalig-on pag-ayo kon sila moampo kang Jehova.—Salmo 65:2.
Pamatia ang Nagagiyang Tingog sa Diyos Pinaagi sa Pagbasa sa Iyang Pulong
17, 18. Bisan sa lisod nga mga panahon, sa unsang paagi si Jehova nagtagana ug giya?
17 Samtang gipadayon ni Isaias ang iyang pagpakigsulti, iyang gipahinumdoman ang iyang mga mamiminaw nga ang kasakitan moabot. Ang katawhan makadawat ug “tinapay sa dagway nga kasakit ug tubig sa dagway nga pagpanglupig.” (Isaias 30:20a) Ang kasakitan ug pagpanglupig nga ilang masinati sa dihang atakehon mahimong kasagaran na lamang sama sa tinapay ug tubig. Bisan pag ingon, si Jehova andam motabang sa mga tawong matarong ug kasingkasing. “Ang imong Dakong Instruktor dili na magtago sa iyang kaugalingon, ug ang imong mga mata mahimo gayong mga mata nga makakita sa imong Dakong Instruktor. Ug ang imong mga igdulungog makadungog ug pulong sa imong luyo nga mag-ingon: ‘Mao kini ang dalan. Lakaw kamo niini,’ kon kamo moadto sa tuo o kon kamo moadto sa wala.”—Isaias 30:20b, 21.b
18 Si Jehova mao ang “Dakong Instruktor.” Siya walay katupong ingong magtutudlo. Apan, sa unsang paagi ang katawhan “makakita” ug “makadungog” kaniya? Si Jehova magpadayag sa iyang kaugalingon pinaagi sa iyang mga manalagna, kansang mga pulong nahitala diha sa Bibliya. (Amos 3:6, 7) Karong adlawa, sa dihang ang matinumanong mga magsisimba magbasa sa Bibliya, sama kinig ang inamahan nga tingog sa Diyos nagtug-an kanila sa dalan nga pagalaktan ug nag-agda kanila nga ipasibo ang ilang panggawi aron sa pagsubay niini. Ang matag Kristohanon angayng mamati pag-ayo samtang si Jehova magasulti pinaagi sa mga panid sa Bibliya ug pinaagi sa binase-sa-Bibliya nga mga basahong gitagana sa ‘matinumanon ug maalamong ulipon.’ (Mateo 24:45-47) Pasagding ang matag usa magkugi sa pagbasa sa Bibliya, kay ‘kini nagkahulogan sa iyang kinabuhi.’—Deuteronomio 32:46, 47; Isaias 48:17.
Palandonga ang Umaabot nga mga Panalangin
19, 20. Unsang mga panalangin ang ginatagana alang niadtong mosanong sa tingog sa Dakong Instruktor?
19 Kadtong mosanong sa tingog sa Dakong Instruktor magkay-ag sa kinulit nilang mga larawan, nga mag-isip niana nga dulumtanan. (Basaha ang Isaias 30:22.) Unya, kadtong mga mosanong magtagamtam sa kahibulongang mga panalangin. Kini gibatbat ni Isaias, sumala sa nahitala sa Isaias 30:23-26, nga maoy makapahimuot nga tagna bahin sa kapasig-ulian nga may unang katumanan sa dihang ang Hudiyong nahibilin mibalik gikan sa pagkabihag sa 537 W.K.P. Karong adlawa, kining tagnaa motabang kanato sa pagsabot sa kahibulongang mga panalangin nga ipatungha sa Mesiyas diha sa espirituwal nga paraiso karon ug sa literal nga Paraiso nga moabot.
20 “Siya tinong maghatag sa ulan alang sa imong binhi nga maoy imong gipugas sa yuta, ug tinapay ingong abot sa yuta, nga mahimo gayong mantekaon ug lanahon. Ang imong kahayopan manibsib nianang adlawa sa usa ka luag nga sibsibanan. Ug ang mga baka ug ang hingkod nga mga asno nga nagadaro sa yuta mokaon ug kompay nga sinaktan ug asedera, nga gipaliran pinaagi sa pala ug sa kahig.” (Isaias 30:23, 24) Ang “mantekaon ug lanahon” nga tinapay—pagkaon nga tugob sa sustansiya—mao unya ang matag-adlawng pagkaon sa tawo. Ang yuta mobunga nga madagayaon kaayo nga bisan ang kahayopan makapahimulos. Ang binuhing kahayopan pakaonon ug “kompay nga sinaktan ug asedera”—lamiang kompay nga gitagana alang sa talagsaong mga okasyon. Kining pagkaona “gipaliran” pa—usa ka paagi nga kasagarang gihimo lamang sa lugasong pagkaon nga ipakaon sa tawo. Pagkamakalipayng mga detalye ang ginapahayag dinhi ni Isaias aron ihulagway ang katugob sa mga panalangin ni Jehova diha sa matinumanong katawhan!
21. Batbata ang kabug-osan sa mga panalangin nga moabot.
21 “Sa matag hataas nga bukid ug sa matag habog nga bungtod aduna gayod unyay mga sapa.” (Isaias 30:25a)c Ginapahayag ni Isaias ang usa ka haom nga kabatbatan nga nagpasiugda sa kabug-osan sa mga panalangin ni Jehova. Walay kanihit sa tubig—usa ka bililhong butang nga moagos dili lamang sa kapatagan kondili sa matag bukid, bisan “sa matag hataas nga bukid ug sa matag habog nga bungtod.” Oo, ang kagutmanan mahimo nang usa ka butang sa kagahapon. (Salmo 72:16) Dugang pa, ang pagtagad sa manalagna nabalhin ngadto sa mga butang nga mas taas pa kay sa kabukiran. “Ang kahayag sa takdol nga bulan mahimo gayod nga sama sa kahayag sa nagadan-ag nga adlaw; ug ang kahayag mismo sa nagadan-ag nga adlaw mahimong pito ka pilo nga labi pa, sama sa kahayag sa pito ka adlaw, sa adlaw nga bugkosan ni Jehova ang kadaot sa iyang katawhan ug ayohon bisan ang grabeng samad nga resulta sa iyang paghampak.” (Isaias 30:26) Kulbahinam kaayong sangkoanan niining talagsaong tagna! Ang himaya sa Diyos modan-ag sa bug-os nga katahom niini. Ang mga panalangin nga gitagana alang sa matinumanong mga magsisimba sa Diyos molabaw pag-ayo—pito ka pilo—sa bisan unsang ilang nasinati sa nangagi.
Paghukom ug Kangaya
22. Kasukwahi sa mga panalangin nga moabot alang sa mga matinumanon, unsay ginatagana ni Jehova alang sa mga daotan?
22 Ang kinaiya sa mensahe ni Isaias nausob na pod. “Tan-awa!” siya nag-ingon, nga daw sa pagdani sa pagtagad sa iyang mga mamiminaw. “Ang ngalan ni Jehova nagsingabot gikan sa halayo, nagdilaab uban sa iyang kasuko ug uban sa mabagang mga panganod. Kon bahin sa iyang mga ngabil, kini napuno sa mahukmanong pagsaway, ug ang iyang dila maoy sama sa nagalamoy nga kalayo.” (Isaias 30:27) Hangtod sa maong panahon, si Jehova nagpahilayo, nga nagtugot sa mga kaaway sa iyang katawhan nga mosubay sa ilang dalan mismo. Karon siya nagsingabot—samag bagyo nga inanayng nagsingabot nga inubanan sa kilat ug dalugdog—aron sa pagpatuman sa paghukom. “Ang iyang espiritu sama sa bul-og sa baha nga tagaliog, aron sa pag-alig-ig sa mga nasod pinaagig ayagan sa kawalay-kapuslanan; ug ang usa ka busal nga magpasalaag sa usa maanaa unya sa apapangig sa mga katawhan.” (Isaias 30:28) Ang mga kaaway sa katawhan sa Diyos pagaliyokan sa “bul-og sa baha,” nga kusog nga giuyog nga ‘gialig-ig pinaagig ayagan,’ ug gipugngan sa “usa ka busal.” Sila pagalaglagon.
23. Unsay nagapahinabo sa “pagmaya sa kasingkasing” alang sa mga Kristohanon karon?
23 Ang sinultihan ni Isaias nausob pag-usab samtang gibatbat niya ang malipayong kahimtang sa matinumanong mga magsisimba nga sa usa ka adlaw mobalik ngadto sa ilang yuta. “Kamo aduna unyay awit nga sama nianang sa gabii nga balaanon sa usa ang kaugalingon alang sa usa ka pista, ug pagmaya sa kasingkasing sama nianang sa usa nga naglakaw nga may plawta sa pagsulod ngadto sa bukid ni Jehova, ngadto sa Bato sa Israel.” (Isaias 30:29) Ang matuod nga mga Kristohanon karon nakasinatig susamang “pagmaya sa kasingkasing” samtang sila magpalandong sa paghukom sa kalibotan ni Satanas; sa panalipod nga gihatag kanila ni Jehova, ang “Bato sa kaluwasan;” ug sa umaabot nga mga panalangin sa Gingharian.—Salmo 95:1.
24, 25. Sa unsang paagi ang tagna ni Isaias nagpasiugda sa kamatuoran sa umaabot nga paghukom sa Asirya?
24 Human sa maong pagpahayag sa kasadya, si Isaias mibalik ngadto sa tema sa paghukom ug nagpaila sa tumong sa kapungot sa Diyos. “Tinong himoon ni Jehova nga madungog ang dignidad sa iyang tingog ug makita ang pagpaubos sa iyang bukton, diha sa pagsilaob sa kasuko ug sa siga sa nagalamoy nga kalayo ug sa pagbunok sa ulan ug sa bagyo ug sa ulan nga yelo. Kay tungod sa tingog ni Jehova ang Asirya malisang; iyang hampakon gayod kini sa sungkod.” (Isaias 30:30, 31) Pinaagi niining tin-aw nga kahubitan, gipasiugda ni Isaias ang kamatuoran sa paghukom sa Diyos sa Asirya. Sa pagkatinuod, ang Asirya nagbarog atubangan sa Diyos ug nagakurog sa pagkakita sa iyang ‘nagpaubos nga bukton’ sa paghukom.
25 Ang manalagna nagpadayon: “Ang matag huyad sa iyang bunal sa pagkastigo nga ipahamtang ni Jehova sa Asirya tinong maoy uban sa mga tamborin ug sa mga alpa; ug uban sa mga gubat sa mga pagbakyaw siya makig-away gayod batok kanila. Kay ang iyang Topet hapsay nga giandam sukad sa bag-o pang kapanahonan; kini giandam usab alang sa hari. Iyang gipalawom ang tapok niini. Ang kalayo ug kahoy daghan. Ang gininhawa ni Jehova, sama sa buhagay sa asupre, nagsunog niini.” (Isaias 30:32, 33) Ang Topet, sa Walog sa Hinom, gigamit dinhi ingon nga masambingayong dapit nga nagdilaab sa kalayo. Pinaagi sa pagpakita nga ang Asirya mosangko didto, si Isaias nagpasiugda sa kalit ug bug-os nga kalaglagan nga modangat nianang nasora.—Itandi ang 2 Hari 23:10.
26. (a) Ang mga pahayag ni Jehova batok sa Asirya adunay unsang modernong-adlawng kapadapatan? (b) Sa unsang paagi ang mga Kristohanon karon nagapaabot kang Jehova?
26 Bisan pag ang maong mensahe sa paghukom gitumong batok sa Asirya, ang kahulogan sa tagna ni Isaias moabot ug layo. (Roma 15:4) Si Jehova moabot, ingnon ta, gikan sa halayo aron sa pagpabaha, pag-uyog, ug pagbusal sa tanan niadtong nagapanglupig sa iyang katawhan. (Ezequiel 38:18-23; 2 Pedro 3:7; Pinadayag 19:11-21) Hinaot kanang adlawa moabot sa madali! Kasamtangan, ang mga Kristohanon maikagong nagpaabot sa adlaw sa kaluwasan. Makabaton silag kalig-on gikan sa pagpalandong sa tin-awng mga pulong nga nahitala sa Isaias kapitulo 30. Kining mga pulonga magdasig sa mga alagad sa Diyos sa pagmahal sa pribilehiyo sa pag-ampo, pagkugi sa ilang kaugalingon sa pagtuon sa Bibliya, ug pagpalandong sa mga panalangin sa Gingharian nga moabot. (Salmo 42:1, 2; Proverbio 2:1-6; Roma 12:12) Sa ingon ang mga pulong ni Isaias motabang kanatong tanan sa pagpaabot kang Jehova.
[Mga footnote]
a Matikdi nga kon nagmatinumanon pa ang Juda, ang katugbang gayod unta ang nahitabo.—Levitico 26:7, 8.
b Niining dapita lamang sa Bibliya nga si Jehova gitawag ug “Dakong Instruktor.”
c Ang Isaias 30:25b mabasa: “Sa adlaw sa dakong pagpamatay dihang ang mga torre mapukan.” Sa unang katumanan, kini mahimong magtumong sa pagkapukan sa Babilonya, nga nag-abli sa dalan aron ang Israel makapahimulos sa mga panalangin nga gitagna sa Isaias 30:18-26. (Tan-awa ang parapo 19.) Kini mahimong magtumong usab sa kalaglagan sa Armagedon, nga magpahinabo sa kinalabwang katumanan nianang mga panalangina sa bag-ong kalibotan.
[Mga hulagway sa panid 305]
Sa adlaw ni Moises, ang mga Israelinhon miikyas sa Ehipto. Sa adlaw ni Isaias, ang Juda miadto sa Ehipto alang sa tabang
[Hulagway sa panid 311]
“Sa matag habog nga bungtod aduna gayod unyay mga sapa”
[Hulagway sa panid 312]
Si Jehova moabot “uban sa iyang kasuko ug uban sa mabagang mga panganod”