Ikaw Makabatog “Kasingkasing Ingon sa Leyon”

ANG Bibliya usahay nagagamit sa leyon ingong usa ka simbolo sa kaisog ug pagsalig. Ang banggiitan o maisog nga mga lalaki gihubit ingong may “kasingkasing ingon sa leyon,” ug ang matarong gikaingon nga “samag usa ka itoy nga leyon nga masaligon.” (2 Samuel 17:10; Proverbio 28:1) Ilabina kon hagiton, ipakita sa leyon nga takos kini sa reputasyon niini ingong “ang labing gamhanan taliwala sa mga mananap.”​—Proverbio 30:30.

Gipakasama ni Jehova nga Diyos ang pagkawalay-kahadlok sa leyon sa iyang determinasyon sa pagpanalipod sa iyang katawhan. Ang Isaias 31:4, 5 nag-ingon: “Ingon nga ang leyon ug itoy sa leyon magangulob sa ibabaw sa iyang tinukob, kon ang usa ka panon sa mga magbalantay sa karnero pagatawgon batok kaniya, ug bisan pa sa ilang tingog siya dili mahadlok ug bisan pa sa ilang pagkaguliyang siya dili magpaubos; mao man si Jehova sa mga panon manaog aron sa pagpakig-away alang sa Bukid sa Sion . . . Manalipod kaniya, siya usab maghatag kaniya ug kaikyasan. Magpalingkawas kaniya, siya usab magpahinabo gayod ug kaikyasan kaniya.” Busa si Jehova nagpasalig sa iyang mga alagad sa iyang aktibong pag-atiman, ilabina kon mag-atubang ug kalisdanan.

Gipanag-ing sa Bibliya ang kinadak-ang kaaway sa katawhan, si Satanas nga Yawa, sa usa ka nagangulob, manunukob nga leyon. Aron dili mahimong iyang biktima, kita gisultihan sa Kasulatan: “Padayong hupti ang inyong panimuot, magmabinantayon.” (1 Pedro 5:8) Ang usa ka paagi sa paghimo niini mao ang paglikay sa makamatay espirituwal nga pagduka. Niining bahina si Jesus nag-ingon: “Tagda ang inyong kaugalingon nga ang inyong mga kasingkasing dili gayod mabug-atan sa pagpalabig kaon ug pagpalabig inom ug sa mga kabalaka sa kinabuhi.” (Lucas 21:34-36) Oo, ang pagtukaw kanunay sa espirituwal niining “kataposang mga adlaw” makahatag kanatog “kasingkasing ingon sa leyon,” usa nga ‘malig-on, masaligon diha kang Jehova.’​—2 Timoteo 3:1; Salmo 112:7, 8.