Paghingpit sa Pagkabalaan Diha sa Pagkahadlok sa Diyos

“Atong hinloan ang atong kaugalingon sa tanang kahugawan sa unod ug espiritu, nga hingpiton ang pagkabalaan diha sa pagkahadlok sa Diyos.”—2 CORINTO 7:1.

1. Giunsa nato pagkasayod nga ang tag-as-katungdanang mga manulonda nagaila sa pagkabalaan ni Jehova?

SI Jehova maoy Diyos nga balaan. Ang tag-as-katungdanang mga manulonda sa langit nagamantala sa iyang pagkabalaan sa tinong mga pulong. “Balaan, balaan, balaan si Jehova sa mga panon. Ang kabug-osan sa tibuok yuta mao ang iyang himaya.” Kana ang masibotong agda sa mga serapines nga nakita sa propetang Isaias sa usa ka panan-awon sa ikawalong siglo W.K.P. Sa pagkatapos sa unang siglo K.P., nakita ni apostol Juan ang mga panan-awon kon unsay mahitabo sa “adlaw sa Ginoo,” nga ania na kita karon. Nakita niya ang upat ka buhing linalang palibot sa trono ni Jehova ug nadunggan nga sila nagamantala sa walay hunong: “Balaan, balaan, balaan si Jehova nga Diyos, ang Makagagahom sa Tanan, nga mao ang sa kagahapon ug sa karon, ug ang sa umaabot.” Kining tulo-ka-pilong pagmantala sa langitnon espiritung mga linalang ni Jehova nagapasiugda sa kinalabwang pagkabalaan sa Maglalalang.​—Isaias 6:2, 3; Pinadayag 1:10; 4:6-8.

Pagkabalaan ug Pagkabulag

2. (a) Unsa ang duha ka bahin sa pagkabalaan, ug sa unsang paagi si Jehova balaan sa maong duha ka bahin? (b) Giunsa pagpasiugda ni Moises ang pagkabalaan ni Jehova?

² Ang pagkabalaan nagkahulogan dili lamang sa relihiyosong pagkahinlo ug kaputli kondili sa pagkabulag, o pagkasagrado. Si Jehova maoy kinalabwan sa kahinlo, o kaputli; siya bug-os gibulag usab gikan sa tanang mahugawng mga diyos sa kanasoran. Kining bahina sa iyang pagkabalaan, o pagkasagrado, gipasiugda ni Moises sa miawit siya: “Kinsa man ang sama kanimo, Oh Jehova, taliwala sa mga diyos? Kinsa man ang sama kanimo, nga nagapamatuod sa imong kaugalingon nga gamhanan sa pagkabalaan?”​—Exodo 15:11.

3. Sa unsang mga paagi ang tanang Israelinhon gibaoran nga mahimong balaan, ug giunsa ni Jehova pagtabang sila niining bahina?

³ Ang balaang Diyos nga Jehova mibaod nga ang karaang mga Israelinhon, ang iyang katawhan sa yuta, angay usab nga mahimong balaan. Kadto gibaod dili lamang sa mga saserdote ug sa mga Levihanon kondili sa tibuok usab nga nasod. Si Jehova miingon ngadto kang Moises: “Isulti mo sa tibuok nga katilingban sa mga anak sa Israel, ug isulti mo kanila, ‘Magbalaan kamo, tungod kay ako si Jehova nga inyong Diyos balaan man.’” (Levitico 19:2) Sa maong katuyoan, si Jehova mihatag kanilag mga kasugoan sa pagbulig nila nga magpabiling hinlo sa espirituwal, sa moral, sa hunahuna, sa lawas, ug sa seremonyal, nga ang naulahi may kalabotan sa ilang pagsimba diha sa tabernakulo ug, sa ulahi, sa templo.

Usa ka Katawhan nga Linain

4, 5. (a) Sa unsang paagi ang Israel sa unod usa ka gisagradong nasod? (b) Unsay gibaod sa espirituwal nga mga Israelinhon, ug giunsa kini paglig-on ni apostol Pedro?

⁴ Sa gidak-on nga ang mga Israelinhon nagtuman sa mga kasugoan sa Diyos, sila nalahi gikan sa mahilayong mga nasod alirong nila. Sila nailhan nga usa ka katawhan nga gilain, o gisagrado, alang sa pag-alagad sa balaang Diyos nga si Jehova. Giingnan sila ni Moises: “Kamo usa ka katawhan nga balaan alang kang Jehova nga inyong Diyos. Kamo mao ang gipili ni Jehova nga inyong Diyos aron mahimong iyang katawhan, usa ka linaing kabtangan, gikan sa mga katawhan nga anaa sa nawong sa yuta.”​—Deuteronomio 7:6.

⁵ Ang maong kahinlo ug pagkabulag gibaod usab sa espirituwal nga Israel. Si apostol Pedro misulat ngadto sa mga pinili nga mahimong espirituwal nga mga Israelinhon: “Ingong masinugtanong mga anak, hunong na kamo sa pagpahiuyon sumala sa mga pangibog nga sa nangagi inyong nabatonan sa inyong kawalay-alamag, kondili, sumala sa Balaang Usa nga nagtawag kaninyo, magbalaan usab kamo sa tanan ninyong kagawian, tungod kay nahisulat: ‘Kinahanglang kamo magbalaan, tungod kay ako balaan man.’”​—1 Pedro 1:1, 14-16.

6, 7. (a) Sa unsang paagi ang mga sakop sa “dakong panon” gibatbat diha sa Pinadayag kapitulo 7, ug unsay makataronganong gibaod kanila? (b) Unsay pagahisgotan sa sunod nga mga parapo?

⁶ Sa Pinadayag kapitulo 7, ang mga sakop sa “dakong panon” gibatbat ingong “nagtindog sa atubangan sa trono [ni Jehova] ug sa atubangan sa Kordero, nga nagsul-ob sa mga bisteng maputi,” kay “nanaglaba sa ilang mga biste ug nagpaputi kanila sa dugo sa Kordero.” (Pinadayag 7:9, 14) Ang ilang maputing mga biste nagasimbolo sa ilang hinlo, matarong nga pagbarog atubangan ni Jehova, nga iyang ginahatag kanila tungod sa ilang pagtuo diha sa nagatubos nga dugo ni Kristo. Nan, tin-aw nga dili lamang ang dinihogang mga Kristohanon kondili ang “ubang mga karnero” usab kinahanglang magpabiling hinlo sa espiritu ug sa moral aron makasimba kang Jehova sa dalawatong paagi.​—Juan 10:16.

⁷ Karon atong hisgotan sa unsang paagi ang katawhan ni Jehova sa nangagi gipangayoan nga magmahinlo ug magbalaan ug nganong ang samang mga prinsipyo mapadapat sa katawhan sa Diyos karong adlawa.

Kahinlo sa Espiritu

8. Tungod sa unsang mga hinungdan ang mga Israelinhon kinahanglang magpabiling bulag gikan sa mga relihiyon sa Canaan?

⁸ Ang mga Israelinhon sa unod kinahanglang magpabiling higpit nga nabulag gikan sa mahugawng mga relihiyosong tulomanon sa ubang kanasoran. Sa pagpakigsulti pinaagi kang Moises, si Jehova miingon sa Israel: “Pagbantay nga dili ka magbuhat sa usa ka pakigtugon uban sa mga pumoluyo sa yuta nga imong pagaadtoan, kay basi kini mahimong lit-ag sa imong taliwala. Apan ang ilang mga halaran inyo nga pagagub-on, ug ang ilang balaang mga haligi [nga gigamit maylabot sa mangil-ad nga pagsimba sa sekso] inyo nga pagadugmokon, ug ang ilang sagradong mga poste inyo nga pagaputlon. Kay dili ka magasimba sa laing diyos, tungod kay si Jehova, kansang ngalan maoy Abughoan, siya usa ka abughoan nga Diyos [o, “usa ka Diyos nga nagapangayog linaing debosyon,” New World Translation Reference Bible, potnot]; kay basi nga magbuhat ka sa usa ka pakigtugon uban sa mga pumoluyo sa yuta, kay sila tinong makighilawas uban sa ilang mga diyos ug magahalad ngadto sa ilang mga diyos.”​—Exodo 34:12-15.

9. Unsang tukmang mga instruksiyon ang gihatag ngadto sa matinumanong nahibilin nga mibiya sa Babilonya sa 537 W.K.P.?

⁹ Kasiglohan sa ulahi, gidasig ni Jehova si Isaias sa pagpamulong niining matagnaong mga pulong ngadto sa matinumanong nahibilin nga mibalik sa Juda gikan sa Babilonya: “Pahalayo kamo, pahalayo kamo, gumula kamo gikan dinha, ayaw pagkamkam ug butang mahugaw; gumula kamo gikan sa iyang taliwala, panaghinlo kamo, kamo nga nagadala sa mga sudlanan ni Jehova [nga pagagamiton sa pagpasig-uli sa maputling pagsimba sa templo sa Jerusalem].”​—Isaias 52:11.

10, 11. (a) Unsang susamang mga instruksiyon ang gihatag ngadto sa espirituwal nga mga Israelinhon sa unang siglo K.P.? (b) Sa unsang paagi ang maong mga instruksiyon gisunod ilabina sukad sa 1919 ug 1935, ug sa unsang laing paagi ang mga dinihogan ug ilang mga kauban nagapabiling mahinlo sa espirituwal?

¹⁰ Sa susama, ang espirituwal nga mga Israelinhon ug ilang mga kauban kinahanglang magpabiling wala mahugawi sa idolatrosong mga relihiyon niining kalibotana. Sa pagsulat ngadto sa dinihogang mga Kristohanon sa kongregasyon sa Corinto, si apostol Pablo mipahayag: “Unsa may pakig-uyonan sa templo sa Diyos uban sa mga diyosdiyos? Kay kita mao ang templo sa Diyos nga buhi; sumala sa giingon sa Diyos: ‘Ako mopuyo sa ilang taliwala, ug ako mahimong ilang Diyos, ug sila mahimong akong katawhan.’ ‘“Busa gumula kamo gikan sa ilang taliwala, ug bumulag kamo,” matud ni Jehova, “ug ayaw na kamo paghikap sa butang mahugaw”’; ‘“ug kamo akong pasudlon.”’”​—2 Corinto 6:16, 17.

¹¹ Sukad sa 1919 ang nahinloan ug naputli nga mga sakop sa dinihogang nahibilin napahigawas gikan sa mahugaw, idolatrosong mga relihiyon sa Dakong Babilonya. (Malakias 3:1-3) Gipamatian nila ang langitnong panawag: “Gumula kamo kaniya, katawhan ko, kon dili mo buot makaambit sa iyang mga sala, ug kon dili mo buot makadawat ug bahin sa iyang mga hampak.” (Pinadayag 18:4) Sukad sa 1935 ang nagkadaghang dakong panon sa “ubang mga karnero” samang namati sa maong panawag ug nagbiya sa mahugaw Babilonyanhong relihiyon. Ang mga dinihogan ug ilang mga kauban nagapabilin usab nga mahinlo sa espirituwal pinaagi sa paglikay sa tanang pakigkontak sa madaotong mga ideya sa mga apostata.​—Juan 10:16; 2 Juan 9-11.

Moral nga Kahinlo

12. (a) Pinaagi sa unsang mga kasugoan nga gibayaw ni Jehova ang moral nga kahimtang sa mga Israelinhon nga labaw kaayo sa iya sa mga nasod sa palibot? (b) Unsang mga lagda ang ilabinang higpit alang sa mga saserdote?

¹² Pinaagi sa pakigtugon sa Kasugoan, gibayaw ni Jehova ang moral nga kahimtang sa mga Israelinhon nga labaw kaayo sa mahilayong kahimtang sa mga nasod sa palibot. Ang kaminyoon ug pamilyahanong kinabuhi maoy gipanalipdang mga institusyon sa Israel. Ang ikapito sa Napulo ka Sugo nagdili sa pagpanapaw. Ang pagpanapaw ug pakighilawas grabeg silot. (Deuteronomio 22:22-24) Ang mga ulay gipanalipdan ilalom sa Kasugoan. (Deuteronomio 22:28, 29) Ang mga lagda sa kaminyoon higpit ilabina alang sa mga saserdote. Bahin sa hataas nga saserdote, siya gibaoran nga mopilig maputling ulay alang sa usa ka asawa.​—Levitico 21:6, 7, 10, 13.

13. Kang kinsa gipanig-ingon ang mga membro sa “pangasaw-onon” ni Kristo, ug ngano?

¹³ Sa susama, ang dakong Hataas nga Saserdote, si Jesu-Kristo, dunay “pangasaw-onon” nga gilangkoban sa 144,000 dinihogang mga Kristohanon, nga gipanig-ingon sa “mga ulay.” (Pinadayag 14:1-5; 21:9) Nagapabilin sila nga wala mahugawi sa kalibotan ni Satanas ug nagapabiling putli sa doktrina ug sa moral. Si apostol Pablo misulat ngadto sa dinihogang mga Kristohanon sa Corinto: “Ako nangabugho tungod kaninyo sa diyosnong pangabugho, kay ako kamong gikasaad nga maminyo sa usa ka bana aron ikatanyag ko kamo ingong maputling ulay kang Kristo.” (2 Corinto 11:2) Si Pablo misulat usab: “Si Kristo nahigugma usab sa kongregasyon ug mitugyan sa iyang kaugalingon alang niana, aron siya makabalaan niana, nga maghinlo niana pinaagi sa kaligo sa tubig pinaagi sa pulong, aron siya makatanyag sa kongregasyon alang sa iyang kaugalingon diha sa katahom niini, nga walay buling o kunot o bisan unsang susama niini, kondili nga kini magabalaan ug walay hugaw.”​—Efeso 5:25-27.

14, 15. (a) Unsay kinahanglang moduyog sa espirituwal nga kaputli sa pangasaw-onon nga matang, ug unsang kasulatan ang nagapakita niini? (b) Nganong dayag nga ang susamang mga kinahanglanon sa kaputli sa moral mapadapat usab sa ubang mga karnero?

¹⁴ Kining espirituwal nga kaputli sa pangasaw-onon ni Kristo kinahanglang duyogan sa moral nga kahinlo sa bahin sa mga membro niini. Si apostol Pablo miingon: “Ayaw kamo pagpalimbong. Ni ang mga makihilawason, ni mga tigsimbag diyosdiyos, ni mga mananapaw . . . magapanunod sa gingharian sa Diyos. Ug ngani ang pipila kaninyo maoy ingon niana sa nangagi. Apan kamo gihinloan na, apan kamo gibalaan na.”​—1 Corinto 6:9-11.

¹⁵ Nga ang maong mga kinahanglanon sa moral nga kaputli mapadapat usab sa ubang mga karnero madayag sa dihang atong tagdon kadtong ipahigawas ni Jehova gikan sa iyang gisaad nga bag-ong langit ug bag-ong yuta. Atong mabasa: “Apan mahitungod . . . niadtong dulumtanan sa ilang kahugawan ug mga mamumuno ug mga makihilawason . . . , ang ilang bahin mao unyay sa lanaw nga nagadilaab sa kalayo ug asupre. Kini nagkahulogan sa ikaduhang kamatayon.”​—Pinadayag 21:1, 8.

Madungganong Kaminyoon

16, 17. (a) Unsang mga kasulatan ang nagapakita nga ang pagkadili-minyo dili usa ka kinahanglanon sa moral nga kahinlo? (b) Sa unsang paagi ikapakita sa Kristohanon ang tukmang kahadlok sa Diyos sa pagpilig kapikas sa kaminyoon, ug nganong dili maalamon ang dili pagtagad sa apostolikanhong pagpiot?

¹⁶ Sa pagpabiling hinlo sa moral, ang dinihogang mga membro sa pangasaw-onon nga matang ug ang ubang mga karnero wala baori nga magpabiling dili minyo. Ang pinugos nga dili-pagminyo maoy dili kasulatanhon. (1 Timoteo 4:1-3) Ang relasyong seksuwal sulod sa talikala sa kaminyoon dili kay mahugaw. Ang Pulong sa Diyos nagaingon: “Himoa nga ang kaminyoon madungganon sa tanan, ug ang higdaanan sa kaminyoon walay kahugawan, kay ang Diyos magahukom sa mga makihilawason ug mga mananapaw.”​—Hebreohanon 13:4.

¹⁷ Bisan pa niana, ang Kristohanon nga buot ‘maghingpit sa pagkabalaan diha sa pagkahadlok sa Diyos’ dili angay mobating libre sa pagminyo kang bisan kinsa nga gusto niya. Sa dayon nang pagtambag sa iyang isigka-Kristohanon nga ‘hinloan ang ilang kaugalingon sa tanang kahugawan sa unod ug sa espiritu, nga hingpiton ang pagkabalaan diha sa pagkahadlok sa Diyos,’ si apostol Pablo misulat: “Ayaw kamo pagpakigyugo nga dili managsama sa mga dili magtutuo. Kay unsang panagkauban ang nabatonan sa pagkamatarong ug pagkamalapason? . . . O unsang bahin ang nabatonan sa usa ka tawong matinuohon sa dili magtutuo?” (2 Corinto 6:14, 15; 7:1) Ingong usa ka membro sa bulag ug hinlo nga katawhan ni Jehova, ang usa ka Kristohanong lalaki o babaye nga buot magminyo magdawat sa apostolikanhong pagpiot nga magminyo “diha lamang sa Ginoo,” nga mao, pinaagi sa pagpili sa usa nga nagpahinungod, nabawtismohan, ug matinumanong alagad ni Jehova. (1 Corinto 7:39) Sama sa nangagi, mao usab karong adlawa, tinong dili maalamon nga dili tagdon sa mga nagpahinungod taliwala sa katawhan sa Diyos ang maong Kasulatanhong tambag. (Itandi sa Deuteronomio 7:3, 4; Nehemias 13:23-27.) Kana dili pagpakitag maayong kahadlok sa atong Dakong Agalon, si Jehova.​—Malakias 1:6.

18. Sa unsang laing paagi ang mga Kristohanon makatipig sa ilang kaminyoon nga madungganon?

¹⁸ Dugang pa, sa Israel, ang mga kasugoan nagpahamtang ug mga limitasyon sa seksuwal nga mga buhat bisan sa sulod sa talikala sa kaminyoon. Ang usa ka bana magalikay sa pagpakigsekso sa iyang asawa panahon sa iyang regla. (Levitico 15:24; 18:19; 20:18) Kadto nangayog mahigugmaong konsiderasyon ug pagpugong-sa-kaugalingon sa bahin sa Israelinhong kalalakin-an. Dili ba ang mga Kristohanon angay magpakitag samang konsiderasyon sa ilang mga asawa? Si apostol Pedro miingon nga ang Kristohanong mga bana angay makig-ipon sa ilang mga asawa “sumala sa kahibalo,” nga mao, kahibalo sa ilang kahulmahan ingong “mas mahuyang nga sudlanan, ang babaye.”​—1 Pedro 3:7.

Paglakaw Subay sa “Dalan sa Pagkabalaan”

19, 20. (a) Batbata ang haluag nga dalan nga ginasunod sa kinabag-an sa katawhan. (b) Sa unsang paagi ang katawhan ni Jehova kinahanglang lahi sa kalibotan ni Satanas? (c) Unsang dalan ang ginasubay sa katawhan sa Diyos, kanus-a kini gibuksan, ug kinsa lamang ang gitugotan sa pagsubay niana?

¹⁹ Ang nahaunang kasayoran nagapasiugda sa kanunay-nagkalapad nga bung-aw nga nagabulag sa katawhan ni Jehova gikan sa kalibotan ni Satanas. Ang kalibotanong sistema sa mga butang karon mausbawon nga nagamatinugoton ug mapatuyangon-sa-kaugalingon. Si Jesus miingon: “Sumulod kamo sa sigpit nga pultahan; tungod kay sangkad ug haluag ang dalan padulong sa kalaglagan, ug daghan ang nagaagi niini.” (Mateo 7:13) Ang maong halapad nga dalan ginasubay sa kinabag-ang katawhan. Sa pagkutlo kang apostol Pedro, kini mao ang dalan sa “malaw-ay nga kagawian, mga kaulag, mga paghingapin sa bino, mga hudyaka-bahakhak, mga bangga sa inom, ug supak-sa-kasugoan nga mga pagsimbag diyosdiyos,” usa ka dalan nga mosangpot sa “pagkaunlod sa pagkadaotan.” (1 Pedro 4:3, 4) Ang tumoy niana mao ang kalaglagan.

²⁰ Ang katawhan sa Diyos, sa laing bahin, nagalakaw subay sa lahi nga dalan, usa ka mahinlong dalan nga ginasubay sa mahinlong katawhan. Ang pag-abli niining dalana sa panahon sa kataposan gitagna ni propetang Isaias, kinsa misulat: “Ug mahitabo nga adunay usa ka dalan didto, bisan usa ka dalan; ug kini pagatawgon ang Dalan sa Pagkabalaan. Ang usang mahugaw dili moagi niana.” (Isaias 35:8) Sa pagkomento bahin niining tagnaa, ang librong Worldwide Security Under the “Prince of Peace” nagaingon: “Sa 1919 ang masambingayong dalan gibuksan sa malipayong mga alagad sa Diyos. Kadtong buot mahimong balaan sa panan-aw ni Jehova mao ang naglakaw subay nianang ‘dalana,’ ‘ang Dalan sa Pagkabalaan.’ . . . Karong adlawa, nga halalom na kaayo sa ‘kataposan sa sistema sa mga butang,’ kanang gitagana sa Diyos nga ‘dalan’ nagapabiling bukas. Ang mga panon sa mapabilhong katawhan . . . nagasulod sa ruta sa espirituwal nga paraiso, ‘ang Dalan sa Pagkabalaan.’”a

21. Sa unsang paagi ug nganong ang mga alagad ni Jehova magpaila sa ilang kaugalingon gikan sa panon sa Yawa, ug unsay pagahisgotan sa sunod nga artikulo?

²¹ Oo, ang dinihogang nahibilin sa espirituwal nga mga Israelinhon ug ilang mga kauban, ang ubang mga karnero, nagapaila sa ilang kaugalingon karong adlawa ingong usa ka katawhan nga gilain gikan sa kalibotan ni Satanas, nga alang kaniya ang pagkabalaan nawad-an sa tanang kahulogan. Walay butang sagrado alang sa panon sa Yawa nga nagalakaw subay sa “sangkad ug haluag . . . nga dalan padulong sa kalaglagan.” Dili lamang sila mahugaw sa espirituwal ug sa moral kondili sa daghang kaso sila mahugaw sa lawasnon ug ang ilang panagway nagkato, sa pagsulting labing menos. Bisan pa niana, si apostol Pablo miingon: “Hinloan nato ang atong kaugalingon sa tanang kahugawan sa unod ug sa espiritu, nga hingpiton ang pagkabalaan diha sa pagkahadlok sa Diyos.” (2 Corinto 7:1) Kon sa unsang mga paagi ang katawhan sa Diyos magmaampingon nga magmahinlo sa kaisipan ug lawas pagahisgotan sa sunod nga artikulo.

[Mga Footnote]

Mga Punto Alang sa Pagsubli

◻ Unsa ang duha ka bahin sa pagkabalaan, ug nganong ikaingon nga si Jehova maoy kinalabwan sa pagkabalaan?

◻ Sa unsang duha ka paagi ang mga Israelinhon magpamatuod nga sila balaang nasod?

◻ Unsay gibaod sa espirituwal nga mga Israelinhon ug sa ilang mga kauban, ang ubang mga karnero?

◻ Sa unsang paagi ang atong pagkahadlok sa Diyos magaapektar sa atong pagpilig kapikas sa kaminyoon?

◻ Unsang duha ka dalan ang masubay karong adlawa, ug nganong pagahimoon ang tin-awng pagpili?

[Hulagway sa panid 13]

Ang Pulong sa Diyos nagaingon: “Himoa nga madungganon ang kaminyoon”