Kapitulo Dos

Matagnaong mga Pulong sa Kahupayan nga Maglangkit Kanimo

Isaias 41:1-29

 1. Nganong angay kitang maikag sa tagna ni Isaias?

SI Isaias nagsulat sa basahon nga nagdala sa iyang ngalan halos 3,000 ka tuig kanhi, apan kini adunay tinuod nga bili alang kanato karong adlawa. Makakat-on kitag hinungdanong mga prinsipyo gikan sa mga hitabo sa kasaysayan nga iyang gitala. Ug makapalig-on kita sa atong pagtuo pinaagi sa pagtuon sa mga tagna nga iyang gisulat diha sa ngalan ni Jehova. Oo, si Isaias maoy usa ka manalagna sa Diyos nga buhi. Si Jehova nagdasig kaniya sa pagsulat nga abante sa kasaysayan—sa pagbatbat sa mga hitabo una pa kini mahitabo. Sa ingon gipasundayag ni Jehova nga siya makatagna ug makaumol sa ugma-damlag. Human sa pagtuon sa basahon ni Isaias, ang matuod nga mga Kristohanon makatuo nga pagatumanon ni Jehova ang tanan nga iyang gisaad.

 2. Unsa ang kahimtang sa Jerusalem sa dihang gisulat ni Isaias ang iyang basahon sa tagna, ug unsang kausaban ang mahitabo?

² Sa panahon nga nahuman ni Isaias ang pagsulat sa iyang tagna, ang Jerusalem naluwas na sa panghulga sa Asirya. Ang templo nagbarog gihapon, ug ang katawhan nagpadayon sa ilang adlaw-adlawng kahikayan sama gayod sa ilang gihimo sulod sa ginatos ka katuigan. Ugaling lang, ang maong kahimtang mausab. Ang panahon moabot sa dihang ang bahandi sa Hudiyong mga hari dad-on ngadto sa Babilonya ug ang batan-ong mga Hudiyo mahimong opisyales sa palasyo sa maong siyudad.a (Isaias 39:6, 7) Nahitabo kini kapig 100 ka tuig sa ulahi.—2 Hari 24:12-17; Daniel 1:19.

 3. Unsang mensahe ang hikaplagan sa Isaias kapitulo 41?

³ Bisan pa niana, ang mensahe sa Diyos pinaagi ni Isaias dili kay mensahe lamang sa kalaglagan. Ang Isa kapitulo 40 sa iyang basahon nagsugod sa pulong nga “Hupaya.”b Ang mga Hudiyo mahupay sa pasalig nga sila o ang ilang mga anak makabalik ngadto sa ilang yutang-natawhan. Ang Isa kapitulo 41 nagpadayon nianang makahupayng mensahe ug nagtagna nga si Jehova magpatunghag usa ka gamhanang hari aron sa pagtuman sa balaang kabubut-on. Kini naundan sa mga pasalig ug naghatag sa pagdasig nga mosalig sa Diyos. Nagyagyag usab kini sa pagkawalay gahom sa bakak nga mga diyos nga gisaligan sa katawhan sa mga nasod. Niining tanan, adunay daghang impormasyon nga makapalig-on sa pagtuo, sa adlaw ni Isaias ug sa atong adlaw.

Si Jehova Naghagit sa mga Nasod

 4. Pinaagi sa unsang mga pulong nga si Jehova naghagit sa mga nasod?

⁴ Si Jehova pinaagi sa iyang manalagna nag-ingon: “Tagda ako sa kahilom, kamong kapuloan; ug pabatona pag-usab ug kusog ang nasodnong mga pundok. Paduola sila. Nianang panahona pasultiha sila. Magtigom kita sa tingob alang sa paghukom.” (Isaias 41:1) Pinaagi niining mga pulonga si Jehova naghagit sa mga nasod nga mosupak sa iyang katawhan. Pabaroga sila sa iyang atubangan ug mangandam sila sa pagsulti! Ingon nga makita sa ulahi, si Jehova mihangyo, nga samag siya usa ka maghuhukom sa usa ka hukmanan, nga ang maong mga nasod magpamatuod nga ang ilang mga diyosdiyos maoy tinuod nga mga diyos. Ang maong mga diyos makatagna ba sa mga buhat sa pagluwas alang sa ilang mga magsisimba o sa mga paghukom batok sa ilang mga kaaway? Kon mao man, sila ba makatuman sa maong mga tagna? Ang tubag maoy dili. Si Jehova lamang ang makabuhat niining mga butanga.

 5. Ipatin-aw kon sa unsang paagi ang mga tagna ni Isaias adunay labaw sa usa ka katumanan.

⁵ Samtang ginatun-an nato ang tagna ni Isaias, atong hinumdoman nga, sama sa daghang tagna sa Bibliya, ang iyang mga pulong adunay labaw sa usa ka katumanan. Sa 607 W.K.P., ang Juda nadestiyero sa Babilonya. Bisan pa niana, ang tagna ni Isaias nagpadayag nga pagaluwason ni Jehova ang mga Israelinhon nga nabihag didto. Nahitabo kini sa 537 W.K.P. Ang maong pagkagawas nahisama sa unang mga adlaw sa ika-20ng siglo. Panahon sa unang gubat sa kalibotan, ang dinihogang mga alagad ni Jehova sa yuta nakasinatig usa ka yugto sa kasakitan. Sa 1918 ang pagpit-os gikan sa kalibotan ni Satanas—nga gisibahan sa Kakristiyanohan ingon nga pangunang bahin sa Dakong Babilonya—nagpahunong gayod sa organisadong pagwali sa maayong balita. (Pinadayag 11:5-10) Ang pipila ka may-katungdanang opisyales sa Watch Tower Society gibalhog sa bilanggoan pinasukad sa tinumotumong mga sumbong. Mipatim-aw nga ang kalibotan nagmadaogon sa pakigbugno niini batok sa mga alagad sa Diyos. Unya, sama sa nahitabo balik sa 537 W.K.P., si Jehova sa kalit nagpahinabo sa ilang kagawasan. Sa 1919 ang nabilanggong opisyales gipagawas, ug sa ulahi ang mga sumbong batok kanila gidismis. Ang usa ka kombensiyon sa Cedar Point, Ohio, sa Septiyembre 1919 nagpabaskog sa mga alagad ni Jehova aron ipadayon ang buluhaton sa pagwali sa maayong balita sa Gingharian. (Pinadayag 11:11, 12) Sukad niadto hangtod karon, talagsaon ang pag-uswag sa gidak-on sa maong buluhaton sa pagwali. Dugang pa, daghan sa mga pulong ni Isaias ang makabaton ug kahibulongang katumanan diha sa umaabot nga Paraisong yuta. Busa, ang mga pulong ni Isaias sa dugay na kanhi naglangkit sa tanang nasod ug mga katawhan karong adlawa.

Usa ka Manluluwas Gipatungha

 6. Giunsa pagbatbat sa manalagna ang usa ka umaabot nga magpupukan?

⁶ Pinaagi ni Isaias, si Jehova nagtagna sa usa ka magpupukan nga magaluwas sa katawhan sa Diyos gikan sa Babilonya ug magpatuman sa paghukom diha sa ilang mga kaaway. Si Jehova nangutana: “Kinsay nagpukaw sa usa gikan sa silangan sa adlaw? Kinsay sa pagkamatarong nagtawag kaniya ngadto sa Iyang mga tiil, aron ihatag sa iyang atubangan ang mga nasod, ug aron iyang pukanon bisan ang mga hari? Kinsay padayong nagtugyan kanila samag abog ngadto sa iyang espada, mao nga sila gipadpad sama lamang ug dagami pinaagi sa iyang pana? Kinsay nagpadayon sa paggukod kanila, nga nagpadayon sa paglakaw nga malinawon diha sa alagianan nga wala niya agii? Kinsay milihok ug nakabuhat niini, nga nagtawag sa mga kaliwatan sukad sa sinugdan? Ako, si Jehova, ang Una; ug sa mga ulahi ako mao gihapon.”—Isaias 41:2-4.

 7. Kinsa ang umaabot nga magpupukan, ug unsay iyang himoon?

⁷ Kinsa ba ang pukawon gikan sa silangan sa adlaw, gikan sa sidlakang mga bahin? Ang mga nasod sa Medo-Persia ug Elam nahimutang sa silangan sa Babilonya. Gikan didto si Ciro nga Persianhon mimartsa, kauban ang iyang gamhanang kasundalohan. (Isaias 41:25; 44:28; 45:1-4, 13; 46:11) Bisan kon si Ciro dili usa ka magsisimba ni Jehova, siya milihok nga kaharmonya sa kabubut-on ni Jehova, ang Diyos nga matarong. Si Ciro nagpukan ug mga hari, ug kini sila natibulaag nga samag abog sa iyang atubangan. Sa pagtinguha sa pagpamukan, siya miagi nga “malinawon,” o layo sa peligro, sa mga alagian nga dili naandang agian, nga nagbuntog sa tanang kababagan. Sa pagkatuig 539 W.K.P., si Ciro nakaabot sa gamhanang siyudad sa Babilonya ug nagpukan niana. Ingong sangpotanan, ang katawhan sa Diyos gipagawas aron sila makabalik ngadto sa Jerusalem aron sa pagtukod pag-usab sa maputling pagsimba.—Esdras 1:1-7.c

 8. Unsang butanga nga si Jehova lamang ang makahimo?

⁸ Busa, pinaagi ni Isaias, si Jehova nagtagna sa pagtungha ni Ciro dugay na sa wala pa matawo ang maong hari. Ang matuod nga Diyos lamang ang tukmang makatagna sa maong butang. Si Jehova walay katupong taliwala sa bakak nga mga diyos sa mga nasod. Nga may balidong katarongan, si Jehova nag-ingon: “Dili ko ihatag kang bisan kinsa ang akong kaugalingong himaya.” Si Jehova lamang ang may-katungod nga makaingon: “Ako ang una ug ako ang ulahi, ug gawas kanako wala nay Diyos.”—Isaias 42:8; 44:6, 7.

Nahadlok nga mga Katawhan Nagsalig sa mga Diyosdiyos

9-11. Unsa ang reaksiyon sa mga nasod sa pag-abante ni Ciro?

⁹ Si Isaias karon nagbatbat sa reaksiyon sa mga nasod sa maong umaabot nga magpupukan: “Ang kapuloan nakakita ug nahadlok. Ang mga kinatumyan mismo sa yuta nangurog. Sila miduol ug nagpadayon pagpangabot. Ang matag usa kanila nagtabang sa iyang isigkaingon, ug ang usa magaingon sa iyang igsoon: ‘Magmakusganon.’ Busa ang artesano nagpalig-on sa platero; ang usa nga nagpahapsay pinaagi sa maso kaniya nga nagmaso sa puthawng salsalan, nga nag-ingon mahitungod sa pagkasolda: ‘Kini maayo.’ Sa kataposan ang usa nagpatapot niini pinaagig mga lansang aron kini dili matarog.”—Isaias 41:5-7.

¹⁰ Sa paglantaw sa mga 200 ka tuig sa unahan, si Jehova nagsusi sa kahimtang sa kalibotan. Ang gamhanang kasundalohan ubos kang Ciro tulin nga milihok, nga nagpukan sa tanang kaatbang. Ang mga katawhan—bisan ang mga molupyo sa kapuloan, kadtong atua sa kinalay-ang mga dapit—nangurog sa iyang pagsingabot. Tungod sa kahadlok sila naghiusa sa pagsupak sa usa nga gipatawag ni Jehova gikan sa silangan aron ipatuman ang paghukom. Sila nagsulay sa pagdasigay sa usag usa, nga nag-ingon: “Magmakusganon.”

¹¹ Ang mga artesano nagtambayayongay sa pag-umol ug mga diyosdiyos aron sa pagluwas sa mga tawo. Ang kahoyng bayanan pormahon sa usa ka panday, kinsa magdasig sa platero sa paghal-op nianag metal, tingali bulawan. Ang usa ka eskultor magdukdok sa metal aron mahamis kana ug maoy moaprobar sa pagkasolda. Tingali uban sa kantalita gihisgotan ang pagpatapot niana pinaagi sa mga lansang aron kini dili matarog o mahuyang, sama sa idolo ni Dagon nga natumba sa atubangan sa arka ni Jehova.—1 Samuel 5:4.

Ayaw Kahadlok!

12. Unsang pagpasalig ang gihatag ni Jehova sa Israel?

¹² Karon si Jehova nagliso sa iyang pagtagad ngadto sa iyang katawhan. Dili sama sa mga nasod nga nagsalig sa way-kinabuhing mga diyosdiyos, kadtong nagsalig sa matuod nga Diyos dili gayod mahadlok. Ang pagpasalig ni Jehova nagsugod pinaagi sa pahinumdom nga ang Israel mao ang kaliwat sa iyang higalang si Abraham. Sa usa ka kasulatang mabination kaayo, si Isaias nagtaho sa mga pulong ni Jehova: “Ikaw, Oh Israel, akong alagad, ikaw, Oh Jacob, nga akong gipili, ang binhi ni Abraham nga akong higala; ikaw, nga akong gigunitan gikan sa mga kinatumyan sa yuta, ug ikaw, nga akong gitawag bisan gikan sa halayong mga bahin niini. Ug busa ako miingon kanimo, ‘Ikaw akong alagad; ako nagpili kanimo, ug ako wala magsalikway kanimo. Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo. Ako sa pagkatinuod magahawid kanimo sa akong tuong kamot sa pagkamatarong.”—Isaias 41:8-10.

13. Nganong ang mga pulong ni Jehova makapahupay sa binihag nga mga Hudiyo?

¹³ Makapahupay gayod kadtong mga pulonga alang sa matinumanong mga Hudiyo nga gihuptang binihag sa usa ka langyawng yuta! Makapadasig gayod unya ang pagkadungog nga si Jehova magtawag kanila nga “akong alagad” sa panahon nga sila mga destiyero, mga alagad sa hari sa Babilonya! (2 Cronicas 36:20) Bisan tuod si Jehova magadisiplina kanila tungod sa ilang pagkadili-matinumanon, siya dili magsalikway kanila. Ang Israel iya ni Jehova, dili iya sa Babilonya. Walay katarongan nga ang mga alagad sa Diyos mangurog sa pagsingabot sa nagapamukan nga Ciro. Si Jehova magauban sa iyang katawhan aron sa pagtabang kanila.

14. Sa unsang paagi ang mga pulong ni Jehova sa Israel makapahupay sa mga alagad sa Diyos karong adlawa?

¹⁴ Kining mga pulonga nagpasalig ug nagpalig-on sa mga alagad sa Diyos bisan hangtod sa atong adlaw. Niadtong 1918 sila nangandoy nga mahibalo sa kabubut-on ni Jehova alang kanila. Sila nangandoy sa kaluwasan gikan sa ilang kahimtang sa espirituwal nga pagkabihag. Karong adlawa kita nangandoy sa kahupayan gikan sa mga kapit-osang gipahamtang kanato ni Satanas, sa kalibotan, ug sa atong kaugalingong pagkadili-hingpit. Apan kita nag-ila nga si Jehova nahibalo sa tukma kon kanus-a ug kon sa unsang paagi molihok alang sa iyang katawhan. Samag gagmayng mga bata, kita nagagunit sa iyang kusganong kamot, nga masaligon nga kita iyang tabangan aron makasagubang. (Salmo 63:7, 8) Si Jehova nagmahal niadtong nagaalagad kaniya. Siya nagpaluyo kanato karong adlawa maingon nga siya nagpaluyo sa iyang katawhan latas sa lisod nga yugto sa 1918-19 ug maingon nga siya nagpaluyo sa matinumanong mga Israelinhon dugay na kaayo kanhi.

15, 16. (a) Unsay mahitabo sa mga kaaway sa Israel, ug sa unsang mga paagi ang Israel nahisama sa usa ka ulod? (b) Tungod sa unsang umaabot nga pag-atake nga ang mga pulong ni Jehova ilabinang makapadasig karong adlawa?

¹⁵ Tagda kon unsay sunod nga giingon ni Jehova pinaagi ni Isaias: “‘Tan-awa! Ang tanan nga nanginit batok kanimo mangaulaw ug ipaubos. Ang mga tawo nga nakig-away kanimo mahimong sama sa wala ug malaglag. Ikaw mangita kanila, apan dili nimo sila makaplagan, kadtong mga tawo nga nakigbugno batok kanimo. Sila mahisama sa wala maglungtad ug sama sa wala, kadtong mga tawo nga nakiggubat batok kanimo. Kay ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, “Ayaw kahadlok. Ako magatabang kanimo.” Ayaw kahadlok, ikaw ulod nga Jacob, kamong mga tawo sa Israel. Ako magatabang kanimo,’ mao ang giingon ni Jehova, ang imo gayong Manlulukat, ang Balaang Usa sa Israel.”—Isaias 41:11-14.

¹⁶ Ang mga kaaway sa Israel dili makadaog. Kadtong nanginit batok sa Israel mangaulaw. Kadtong makig-away batok kanila mangahanaw. Bisan pag ang binihag nga mga Israelinhon morag luya ug way-depensa sama sa usa ka ulod nga nagkisikisi diha sa abog, si Jehova motabang kanila. Pagkamakapadasig niini latas gayod sa “kataposang mga adlaw” samtang ginaatubang sa matuod nga mga Kristohanon ang hugot nga pagkamabatokon sa daghan kaayo sa kalibotan! (2 Timoteo 3:1) Ug pagkamakapalig-on ang saad ni Jehova tungod sa umaabot nga pag-atake ni Satanas, nga gitumong diha sa tagna ingong “Gog sa yuta sa Magog”! Ubos sa mabangis nga pag-atake ni Gog, ang katawhan ni Jehova mopatim-aw unya nga sama ka way-depensa sa usa ka ulod—usa ka katawhang “nagapuyo nga walay paril” ug walay “bisan trangka ug mga pultahan.” Bisan pa niana, kadtong nagalaom kang Jehova dili gayod mangurog sa kahadlok. Ang Labing Gamhanan mismo makig-away aron sa pagluwas kanila.—Ezequiel 38:2, 11, 14-16, 21-23; 2 Corinto 1:3.

Kahupayan Alang sa Israel

17, 18. Giunsa pagbatbat ni Isaias ang paghatag ug gahom sa Israel, ug bahin sa unsang katumanan nga kita mahimong makasalig?

¹⁷ Si Jehova nagpadayon sa paghupay sa iyang katawhan: “Tan-awa! Ako naghimo kanimo nga usa ka balsang panggiok, usa ka bag-ong galamiton sa paggiok nga ang mga ngipon duhay sulab. Imong yatakan ang kabukiran ug dugmokon kini; ug ang mga bungtod imong himoong sama sa tahop. Ikaw magpalid kanila, ug ang hangin magdala kanila, ug ang unos magpadpad kanila sa lainlaing direksiyon. Ug ikaw magakalipay diha kang Jehova. Diha sa Balaang Usa sa Israel ikaw magpasigarbo labot sa imong kaugalingon.”—Isaias 41:15, 16.

¹⁸ Ang kusog ihatag sa Israel aron sila ang mosulong ug, sa espirituwal nga diwa, aron pukanon ang iyang samag-bukid nga mga kaaway. Sa dihang ang Israel nahibalik gikan sa pagkadestiyero, siya nagmadaogon batok sa mga kaaway nga misulay sa pagsanta sa pagtukod pag-usab sa templo ug sa mga paril sa Jerusalem. (Esdras 6:12; Nehemias 6:16) Hinunoa, ang mga pulong ni Jehova matuman sa dakong sukod sa “Israel sa Diyos.” (Galacia 6:16) Si Jesus nagsaad sa dinihogang mga Kristohanon: “Kaniya nga magmadaogon ug magatuman sa akong mga buhat hangtod sa kataposan ihatag ko kaniya ang awtoridad ibabaw sa kanasoran, ug siya magabantay sa katawhan pinaagig olisi nga puthaw aron sila mangadugmok sama sa kulonon nga mga sudlanan, ingon sa nadawat ko gikan sa akong Amahan.” (Pinadayag 2:26, 27) Ang panahon tinong moabot sa dihang ang mga igsoon ni Kristo nga nabanhaw na ngadto sa langitnong himaya makigbahin sa paglaglag sa mga kaaway ni Jehova nga Diyos.—2 Tesalonica 1:7, 8; Pinadayag 20:4, 6.

19, 20. Unsay gisulat ni Isaias bahin sa pagpasig-uli sa Israel ngadto sa usa ka matahom nga dapit, ug sa unsang paagi natuman kini?

¹⁹ Sa masambingayong pinulongan, si Jehova karon naglig-on sa iyang saad sa pagtabang sa iyang katawhan. Si Isaias nagsulat: “Ang mga sinakit ug ang mga kabos nagapangitag tubig, apan wala. Tungod sa kauhaw ang ilang dila nauga. Ako, si Jehova, motubag kanila. Ako, ang Diyos sa Israel, dili mobiya kanila. Sa hawan nga mga bungtod ako magbukas ug mga suba, ug taliwala sa kapatagan sa walog, mga tubod. Ang kamingawan akong himoong punog-tangbo nga linaw sa tubig, ug ang walay-tubig nga yuta nga mga tuboran sa tubig. Sa kamingawan akong ipahimutang ang kahoyng sedro, ang akasya ug ang mirto ug ang kahoyng oleifero. Sa desyertong kapatagan akong ibutang ang kahoyng junipero, ang fresno ug ang sipres sa samang higayon; aron ang mga tawo makakita ug makahibalo ug mopatalinghog ug makabaton ug hait nga salabotan sa samang higayon, nga ang kamot mismo ni Jehova nagbuhat niini, ug ang Balaang Usa sa Israel naglalang niini.”—Isaias 41:17-20.

²⁰ Bisan pag ang nadestiyerong mga Israelinhon nagpuyo sa kaulohang siyudad sa usa ka bahandianong gahom sa kalibotan, alang kanila kadto nahisamag way-tubig nga desyerto. Gibati nila nga sama ni David sa dihang siya nagtago gikan kang Haring Saul. Sa 537 W.K.P., gibuksan ni Jehova ang dalan aron sila makabalik ngadto sa Juda ug tukoron pag-usab ang iyang templo didto sa Jerusalem, sa ingon ipasig-uli ang matuod nga pagsimba. Si Jehova, sa baylo, magapanalangin kanila. Sa usa ka tagna sa ulahi, si Isaias nagtagna: “Si Jehova tinong maghupay sa Zion. Siya sa tino maghupay sa tanan niyang nagun-ob nga mga dapit, ug iyang himoon ang iyang kamingawan nga sama sa Eden ug ang iyang desyertong kapatagan nga sama sa tanaman ni Jehova.” (Isaias 51:3) Kini nahitabo gayod sa paghibalik sa mga Hudiyo ngadto sa ilang yutang-natawhan.

21. Unsang pagpasig-uli ang nahitabo sa modernong kapanahonan, ug unsay mahitabo sa umaabot?

²¹ Ang susamang butang nahitabo sa modernong kapanahonan sa dihang ang Dakong Ciro, si Kristo Jesus, nagpagawas sa iyang dinihogang mga sumusunod gikan sa espirituwal nga pagkabihag aron sila makabuhat sa pagpasig-uli sa maputling pagsimba. Kadtong mga matinumanon gipanalanginan sa usa ka tugob nga espirituwal nga paraiso, usa ka masambingayong tanaman sa Eden. (Isaias 11:6-9; 35:1-7) Sa dili madugay, sa dihang laglagon sa Diyos ang iyang mga kaaway, ang tibuok yuta mahimong usa ka pisikal nga paraiso, sumala gayod sa gisaad ni Jesus sa mamumuhat ug daotan didto sa kahoy sa pagsakit.—Lucas 23:43.

Usa ka Hagit Ngadto sa mga Kaaway sa Israel

22. Pinaagi sa unsang mga pulong nga si Jehova nagahagit na usab sa mga nasod?

²² Si Jehova karon mibalik ngadto sa iyang pakiglantugi batok sa mga nasod ug sa ilang idolong mga diyosdiyos: “‘Ipasaka ang inyong gikasungiang kaso,’ nag-ingon si Jehova. ‘Ipatungha ang inyong mga argumento,’ nag-ingon ang Hari ni Jacob. ‘Ipatungha ug isulti kanamo ang mga butang nga mahitabo. Ang unang mga butang—kon unsa kini sila—isulti gayod, aron among ikabutang ang among kasingkasing ug mahibaloan ang ilang umalabot. O ipadungog kanamo bisan ang mga butang nga nagasingabot. Isulti ang mga butang nga moabot human niana, aron kami mahibalo nga kamo maoy mga diyos. Oo, kamo angayng mohimo ug maayo o mohimo ug daotan, aron kami makasud-ong ug makakita niini sa samang higayon. Tan-awa! Kamo maoy butang nga wala-maglungtad, ug ang inyong nahimo walay-pulos. Usa ka dulumtanang butang ang bisan kinsa nga mopili kaninyo.’” (Isaias 41:21-24) Ang mga diyos ba sa mga nasod makaarang sa pagtagna nga tukma ug sa ingon makapamatuod nga sila adunay labaw-kinaiyanhong kahibalo? Kon makahimo sila, tinong adunay mga sangpotanan, maayo o daotan, aron sa pagpaluyo sa ilang mga pangangkon. Sa pagkatinuod, hinunoa, ang idolong mga diyosdiyos walay arang mahimo ug sama nga wala maglungtad.

23. Nganong si Jehova, pinaagi sa iyang mga manalagna, nagsaway nga way-hunong sa mga diyosdiyos?

²³ Sa atong adlaw ang uban tingali mahibulong kon nganong si Jehova, pinaagi ni Isaias ug sa iyang kaubang mga manalagna, migugol ug daghan kaayong panahon sa pagsaway sa kabuangan sa pagsimbag diyosdiyos. Ang kawalay-pulos sa ginamag-tawong mga diyosdiyos tingali morag dayag sa daghan karong adlawa. Bisan pa niana, sa dihang ang usa ka bakak nga sistema sa tinuohan natukod ug kaylap nga gidawat, lisod ang paglangkat niana gikan sa mga hunahuna niadtong nagtuo niana. Daghang tinuohan karong panahona maoy binuang sama sa tinuohan nga ang way-kinabuhing mga imahen maoy tinuod nga mga diyos. Bisan pa niana, ang mga tawo mohawid sa maong mga tinuohan bisan pa sa makapadaning mga argumento batok kanila. Pinaagi lamang sa pagpamati nga balikbalik sa kamatuoran nga ang pipila matandog sa pagkasabot sa kaalam sa pagsalig diha kang Jehova.

24, 25. Sa unsang paagi si Jehova naghisgot na usab kang Ciro, ug unsang laing tagna ang gipahinumdom niini kanato?

²⁴ Si Jehova naghisgot na usab kang Ciro: “Akong gipukaw ang usa gikan sa amihanan, ug siya moabot. Gikan sa silangan sa adlaw siya magtawag sa akong ngalan. Ug siya modangat nganha sa mga luyoluyong magmamando nga daw sila yutang-kulonon ug ingon sa usa ka magkukulon nga magayatak sa umog nga yutang-kulonon.” (Isaias 41:25)d Sukwahi sa mga diyos sa mga nasod, si Jehova makapahinabo sa mga butang. Sa dihang iyang gipatungha si Ciro gikan sa silangan, gikan “sa silangan sa adlaw,” ipasundayag sa Diyos ang iyang katakos sa pagtagna ug unya umolon ang ugma-damlag aron sa pagtuman sa iyang panagna.

²⁵ Kining mga pulonga magpahinumdom kanato sa matagnaong pagbatbat ni apostol Juan sa mga hari nga pukawon aron molihok sa atong panahon. Sa Pinadayag 16:12, atong mabasa nga ang dalan pagaandamon “para sa mga hari gikan sa silangan sa adlaw.” Kining mga haria maoy walay lain kondili si Jehova nga Diyos ug si Jesu-Kristo. Maingon nga si Ciro nagluwas sa katawhan sa Diyos dugay na kanhi, kining mas gamhanang mga hari magalaglag sa mga kaaway ni Jehova ug magagiya sa iyang katawhan latas sa dakong kasakitan ngadto sa bag-ong kalibotan sa pagkamatarong.—Salmo 2:8, 9; 2 Pedro 3:13; Pinadayag 7:14-17.

Si Jehova Maoy Kinalabwan!

26. Unsang pangutana ang gisukna karon ni Jehova, ug gitubag ba kini?

²⁶ Sa makausa pa, si Jehova nagpahayag sa kamatuoran nga siya lamang mao ang matuod nga Diyos. Siya nangutana: “Kinsay nagsulti ug bisan unsa sukad sa sinugdan, aron kami mahibalo, o sukad sa kapanahonang miagi, aron kami makaingon, ‘Siya husto’? Sa pagkatinuod walay usa nga nagasulti. Sa pagkatinuod walay usa nga nagpahinabo nga adunay makadungog. Sa pagkatinuod walay usa nga nakadungog sa bisan unsa sa inyong pulong.” (Isaias 41:26) Walay diyosdiyos ang nagpahibalo sa pag-abot sa usa ka magpupukan aron sa pagpagawas niadtong nagsalig niini. Ang tanang ingon nga mga diyos maoy way-kinabuhi, amang. Sila dili gayod mga diyos.

27, 28. Unsang bililhong kamatuoran ang gipasiugda diha sa hinapos nga mga bersikulo sa Isaias 41, ug kinsa lamang ang nagmantala niini?

²⁷ Human sa pagtaho niining makapaukyab nga matagnaong mga pulong ni Jehova, si Isaias nagpasiugda sa usa ka bililhong kamatuoran: “Adunay nag-una, nga nag-ingon sa Zion: ‘Tan-awa! Ania sila!’ ug sa Jerusalem ako maghatag ug tigdalag maayong balita. Ug ako nagpadayon sa pagtan-aw, ug walay usa ka tawo; ug gikan niini nila walay usa usab nga naghatag ug tambag. Ug ako nagpadayon sa pagpangutana kanila, aron sila motubag. Tan-awa! Silang tanan wala-maglungtad. Ang ilang mga buhat walay-pulos. Ang ilang mga inumol nga larawan maoy hangin ug butang nga dili tinuod.”—Isaias 41:27-29.

²⁸ Si Jehova maoy una. Siya maoy kinalabwan! Siya mao ang matuod nga Diyos, kinsa nagpahibalo sa pagluwas sa iyang katawhan, nga nagdalag maayong balita alang kanila. Ug ang iyang mga Saksi lamang ang nagmantala sa iyang pagkadako ngadto sa mga nasod. Nga mayubiton, si Jehova nagsaway niadtong nagsalig sa pagsimbag diyosdiyos, nga nagpakaway-bili sa ilang mga diyosdiyos ingon nga “hangin ug butang nga dili tinuod.” Pagkalig-ong katarongan nga mohawid sa matuod nga Diyos! Si Jehova lamang ang takos sa atong malig-ong pagsalig.

[Mga footnote]

[Hulagway sa panid 19]

Si Ciro, bisan pagano, napili aron buhaton ang buluhaton sa Diyos

[Hulagway sa panid 21]

Ang mga nasod nagsalig sa way-kinabuhing mga diyosdiyos

[Mga hulagway sa panid 27]

Ang Israel, samag “usa ka balsang panggiok,” ‘magadugmok sa kabukiran’