Kapitulo Tres
“Akong Pinili, nga Giuyonan sa Akong Kalag!”
1, 2. Nganong ang kapitulo 42 sa Isaias makapaikag sa mga Kristohanon karong adlawa?
“‘KAMO mao ang akong mga saksi,’ mao ang giingon ni Jehova, ‘ang akong alagad nga akong gipili.’” (Isaias 43:10) Kining gipahayag ni Jehova, nga gitala sa manalagnang si Isaias sa ikawalong siglo W.K.P., nagpakita nga ang karaang katawhang may pakigsaad kang Jehova maoy usa ka nasod sa mga saksi. Sila ang piniling alagad sa Diyos. Mga 2,600 ka tuig sa ulahi, sa 1931, ang dinihogang mga Kristohanon nagpahayag sa publiko nga kining mga pulonga napadapat kanila. Gisagop nila ang ngalang mga Saksi ni Jehova ug bug-os kasingkasing nga nagdawat sa mga responsabilidad nga nalangkit sa pagkahimong yutan-ong alagad sa Diyos.
2 Ang mga Saksi ni Jehova maikagon kaayo nga magpahimuot sa Diyos. Tungod niini, ang ika-42 nga kapitulo sa basahon ni Isaias makapaikag gayod sa matag usa kanila, kay mohatag kinig hulagway sa usa ka alagad nga giuyonan ni Jehova ug laing hulagway sa usa ka alagad nga iyang gisalikway. Ang pagtagad niining tagnaa ug sa katumanan niini mohatag ug halalom nga pagsabot sa kon unsay motultol sa pag-uyon sa Diyos ug kon unsay motultol sa iyang dili pag-uyon.
“Akong Gibutang ang Akong Espiritu Diha Kaniya”
3. Unsay gitagna ni Jehova pinaagi ni Isaias bahin sa “akong alagad”?
3 Pinaagi ni Isaias, si Jehova nagtagna sa pag-abot sa usa ka alagad nga iyang pagapilion: “Tan-awa! Ang akong alagad, nga kaniya ako hugot nga naghawid! Ang akong pinili, nga giuyonan sa akong kalag! Akong gibutang ang akong espiritu diha kaniya. Siya magdalag hustisya ngadto sa mga nasod. Siya dili mosinggit o mopatugbaw sa iyang tingog, ug sa dalan dili niya ipadungog ang iyang tingog. Walay gupok nga tangbo nga iyang balion; ug kon bahin sa nag-awop nga pabilong lino, siya dili magpalong niini. Diha sa kamatinud-anon siya magdalag hustisya. Siya dili maawop ni mahugno hangtod nga iyang ikapahimutang ang hustisya sa yuta; ug ang kapuloan magpadayon sa paghulat sa iyang balaod.”—Isaias 42:1-4.
4. Kinsa ang gitagnang “pinili,” ug sa unsang paagi nahibaloan nato kini?
4 Kinsa ba ang Alagad nga gihisgotan dinhi? Kita walay katarongan sa pagduhaduha. Makaplagan nato kining mga pulonga nga gikutlo diha sa Ebanghelyo ni Mateo ug gipadapat kang Jesu-Kristo. (Mateo 12:15-21) Si Jesus mao ang minahal nga Alagad, ang “pinili.” Kanus-a ba gibutang ni Jehova ang iyang espiritu diha kang Jesus? Sa 29 K.P., sa panahon sa pagbawtismo kang Jesus. Ang dinasig nga talaan nagbatbat sa pagbawtismo ug nag-ingon nga sa paghaw-as ni Jesus sa tubig, “ang langit nabuksan ug ang balaang espiritu sa dagway nga lawasnon ingon sa usa ka salampati mikunsad diha kaniya, ug usa ka tingog migula gikan sa langit: ‘Ikaw mao ang akong Anak, ang hinigugma; giuyonan ko ikaw.’” Niining paagiha si Jehova personal nga nagpaila sa iyang minahal nga Alagad. Ang misunod nga ministeryo ni Jesus ug ang milagrosong mga buhat nga iyang gihimo nagpamatuod nga ang espiritu ni Jehova tinuod nga diha kaniya.—Lucas 3:21, 22; 4:14-21; Mateo 3:16, 17.
“Siya Magdalag Hustisya Ngadto sa mga Nasod”
5. Nganong ang pagpatin-aw sa hustisya gikinahanglan sa unang siglo K.P.?
5 Ang Pinili ni Jehova ‘magdala,’ o magpadayag, sa matuod nga hustisya. “Iyang ipatin-aw kon unsa ang hustisya ngadto sa mga nasod.” (Mateo 12:18) Gikinahanglan gayod kini sa unang siglo K.P.! Ang Hudiyong relihiyosong mga pangulo nagtudlog tinuis nga panghunahuna bahin sa hustisya ug pagkamatarong. Gitinguha nila nga makab-ot ang pagkamatarong pinaagi sa pagsunod sa estriktong talaan sa mga balaod—nga daghan maoy ginama nila. Ang ilang tuman ka estriktong hustisya nawad-an sa kaluoy ug kahangawa.
6. Sa unsang mga paagi gipahibalo ni Jesus ang matuod nga hustisya?
6 Sa katugbang, si Jesus nagpadayag sa panghunahuna sa Diyos bahin sa hustisya. Pinaagi sa iyang gitudlo ug pagkinabuhi, si Jesus nagpakita nga ang matuod nga hustisya maoy mahangawaon ug maluluy-on. Palandonga lamang ang iyang bantogang Wali sa Bukid. (Mateo, mga kapitulo 5-7) Pagkabug-os nga katin-awan kon unsay angay nga hustisya ug pagkamatarong! Inigbasa nato sa mga talaan sa Ebanghelyo, dili ba kita matandog sa kahangawa ni Jesus alang sa kabos ug sinakit? (Mateo 20:34; Marcos 1:41; 6:34; Lucas 7:13) Gidala niya ang iyang makapahupayng mensahe ngadto sa daghan nga nahisamag gupok nga mga tangbo, nga nabawog ug gibunalbunal. Sila nahisamag nag-awop nga pabilong lino, nga ang ilang kataposang kidlap sa kalayo hapit nang mapalong. Si Jesus wala gayod magbali sa usa ka “gupok nga tangbo” ni nagpalong sa “nag-awop nga pabilong lino.” Sa kapulihay, ang iyang mahigugmaon ug mahangawaong mga pulong ug mga kalihokan nagpasadya sa mga kasingkasing sa maaghop.—Mateo 11:28-30.
7. Nganong ang tagna nakaingon nga si Jesus ‘dili mosinggit o mopatugbaw sa iyang tingog diha sa dalan’?
7 Nan, nganong ang tagna nag-ingon nga si Jesus “dili mosinggit o mopatugbaw sa iyang tingog, ug sa dalan dili niya ipadungog ang iyang tingog”? Tungod kay wala niya ituboy ang iyang kaugalingon, sama sa gihimo sa daghan sa iyang adlaw. (Mateo 6:5) Sa dihang nag-ayo sa usa ka sanlahon, iyang giingnan ang naayo nga tawo: “Tinoa nga walay bisan kinsa nga imong sultihan.” (Marcos 1:40-44) Inay magtinguhag pagtagad sa publiko ug ang katawhan mahidangat sa mga konklusyon pinasukad sa dili-direktang mga taho, buot ni Jesus nga ilang maila sa ilang kaugalingon pinasukad sa lig-ong ebidensiya nga siya mao ang Kristo, ang dinihogang Alagad ni Jehova.
8. (a) Sa unsang paagi si Jesus nagdalag “hustisya ngadto sa mga nasod”? (b) Unsay ginatudlo kanato mahitungod sa hustisya sa ilustrasyon ni Jesus sa maluloton nga Samarianhon?
8 Ang Piniling Alagad maoy magdalag “hustisya ngadto sa mga nasod.” Gihimo kini ni Jesus. Gawas sa pagpasiugda sa mahangawaong kinaiya sa diyosnong hustisya, si Jesus nagtudlo nga kini angayng magsakop sa tanang tawo. Sa usa ka higayon si Jesus nagpahinumdom sa usa ka tawong batid sa Balaod nga siya kinahanglang mahigugma sa Diyos ug sa iyang silingan. Ang tawo nangutana kang Jesus: “Kinsa ba gayod ang akong silingan?” Tingali iyang gidahom nga motubag si Jesus: “Ang imong isigka-Hudiyo.” Apan si Jesus miasoy sa sambingay bahin sa maluloton nga Samarianhon. Sa sambingay ang usa ka Samarianhon mitabang sa usa ka tawong giatake sa mga tulisan, samtang ang usa ka Levihanon ug usa ka saserdote midumili sa pagtabang. Ang nangutana midawat gayod nga sa maong higayon ang tinamayng Samarianhon mao ang silingan, dili ang Levihanon o ang saserdote. Gitapos ni Jesus ang iyang ilustrasyon uban sa tambag: “Buhata ang ingon.”—Lucas 10:25-37; Levitico 19:18.
“Siya Dili Maawop ni Mahugno”
9. Sa unsang paagi moapektar kanato ang pagkasabot sa diwa sa matuod nga hustisya?
9 Sanglit gitin-aw ni Jesus ang diwa sa matuod nga hustisya, ang iyang mga tinun-an nakakat-on sa pagpadayag sa maong kinaiya. Kinahanglan nga mao usab kita. Una sa tanan, gikinahanglan nga atong dawaton ang mga sukdanan sa Diyos sa maayo ug daotan, sanglit siya ang may katungod sa paghukom kon unsay matul-id ug matarong. Samtang maningkamot kita sa pagbuhat sa mga butang sa paagi ni Jehova, ang atong matul-id nga panggawi tin-awng mopadayag kon unsay matuod nga hustisya.—1 Pedro 2:12.
10. Nganong ang pagpasundayag sa hustisya naglangkit sa pagpakig-ambit sa buluhatong pagsangyaw ug pagpanudlo?
10 Ipasundayag usab nato ang matuod nga hustisya sa dihang kita makugihong mosalmot sa buluhatong pagsangyaw ug pagpanudlo. Si Jehova madagayaong nagtaganag nagaluwas-sa-kinabuhing kahibalo bahin sa iyang kaugalingon, iyang Anak, ug iyang mga katuyoan. (Juan 17:3) Dili matarong o matul-id nga ang maong kahibalo dili ipaambit sa uban. “Ayaw ihikaw ang maayo gikan kanila nga takos niini, sa dihang anaa sa gahom sa imong kamot ang pagbuhat niini,” matod ni Solomon. (Proverbio 3:27) Bug-os kasingkasing natong ipaambit kon unsay nahibaloan nato bahin sa Diyos ngadto sa tanang tawo, bisan kon unsay ilang rasanhon, etniko, o nasodnong kagikan.—Buhat 10:34, 35.
11. Sa pagsundog kang Jesus, unsaon nato pagtagad ang uban?
11 Dugang pa, ang usa ka tinuod nga Kristohanon magatagad sa uban sama sa gihimo ni Jesus. Daghan karong adlawa ang nag-atubang ug makapaluyang mga suliran ug nagkinahanglan sa kahangawa ug pagdasig. Bisan ang pipila ka dedikadong mga Kristohanon tingali dinagmalan sa mga kahimtang nga sila nahisamag nagupok nga mga tangbo o nag-awop nga mga pabilo. Dili ba gikinahanglan nila ang atong pagpaluyo? (Lucas 22:32; Buhat 11:23) Pagkamakapalagsik nga mahimong bahin sa kapunongan sa matuod nga mga Kristohanon, kinsa naningkamot sa pagsundog kang Jesus diha sa pagpasundayag ug hustisya!
12. Nganong kita makasalig nga ang hustisya alang sa tanan sa dili madugay matuman na?
12 Mabatonan ba gayod ang hustisya alang sa tanan? Oo, mabatonan gayod. Ang Pinili ni Jehova “dili maawop ni mahugno hangtod nga iyang ikapahimutang ang hustisya sa yuta.” Sa dili na madugay ang naentronong Hari, ang nabanhawng si Kristo Jesus, ‘manimalos kanilang wala makaila sa Diyos.’ (2 Tesalonica 1:6-9; Pinadayag 16:14-16) Ang tawhanong pagmando pulihan sa Gingharian sa Diyos. Modagaya ang hustisya ug pagkamatarong. (Proverbio 2:21, 22; Isaias 11:3-5; Daniel 2:44; 2 Pedro 3:13) Uban ang maikagong pagdahom, ang mga alagad ni Jehova sa bisan diin—bisan kadtong atua sa hilit nga mga dapit, “ang kapuloan”—maghulat nianang adlawa.
‘Akong Ihatag Siya Ingong Kahayag sa Kanasoran’
13. Unsay gitagna ni Jehova mahitungod sa iyang Piniling Alagad?
13 Si Isaias nagpadayon: “Mao kini ang giingon sa matuod nga Diyos, si Jehova, ang Maglalalang sa mga langit ug ang Dakong Usa nga nagbuklad niini nila; ang Usa nga nagpahimutang sa yuta ug sa abot niini, ang Usa nga naghatag ug gininhawa ngadto sa katawhan ibabaw niini, ug espiritu ngadto niadtong naglakaw diha niana.” (Isaias 42:5) Pagkakusganong kabatbatan kang Jehova, ang Maglalalang! Kining pahinumdom bahin sa gahom ni Jehova mohatag ug dakong kabug-at sa iyang gipamulong. Si Jehova nag-ingon: “Ako, si Jehova, nagtawag kanimo sa pagkamatarong, ug akong gigunitan ang imong kamot. Ug ako magpanalipod kanimo ug maghatag kanimo ingong usa ka pakigsaad sa katawhan, ingong kahayag sa kanasoran, aron imong pabukahon ang mga mata nga buta, aron pagulaon gikan sa atob ang binilanggo, gikan sa bilanggoan kadtong mga naglingkod sa kangitngit.”—Isaias 42:6, 7.
14. (a) Unsay gipasabot nga gigunitan ni Jehova ang kamot sa iyang inuyonang Alagad? (b) Unsang papel ang ginadula sa Piniling Alagad?
14 Ang Dakong Maglalalang sa uniberso, ang Maghahatag ug Tigsustento sa kinabuhi magagunit sa kamot sa iyang Piniling Alagad ug nagsaad sa bug-os ug makanunayong pagpaluyo. Pagkamakapalig-on kana! Dugang pa, si Jehova nagatipig kaniya nga luwas aron ihatag siya ingong “usa ka pakigsaad sa katawhan.” Ang usa ka pakigsaad maoy usa ka kontrata, usa ka kasabotan, usa ka ugdang nga panaad. Kini usa ka seguradong mando. Oo, si Jehova naghimo sa iyang Alagad nga “usa ka garantiya ngadto sa katawhan.”—An American Translation.
15, 16. Sa unsang paagi si Jesus nag-alagad nga “kahayag sa kanasoran”?
15 Ingon nga “kahayag sa kanasoran,” ang gisaad nga Alagad magabuka sa “mga mata nga buta” ug magpagula ‘niadtong mga naglingkod sa kangitngit.’ Gihimo kini ni Jesus. Pinaagi sa pagpamatuod sa kamatuoran, gihimaya ni Jesus ang ngalan sa iyang langitnong Amahan. (Juan 17:4, 6) Giyagyag niya ang relihiyosong mga kabakakan, giwali ang maayong balita sa Gingharian, ug gibuksan ang ganghaan ngadto sa espirituwal nga kagawasan alang niadtong anaa sa relihiyosong kaulipnan. (Mateo 15:3-9; Lucas 4:43; Juan 18:37) Siya nagpasidaan batok sa paghimo sa mga buhat nga iya sa kangitngit ug nagyagyag kang Satanas ingon nga “ang amahan sa bakak” ug “ang magmamando niining kalibotana.”—Juan 3:19-21; 8:44; 16:11.
16 Si Jesus miingon: “Ako mao ang kahayag sa kalibotan.” (Juan 8:12) Iyang gipamatud-an sa talagsaong paagi nga siya maoy ingon sa dihang iyang gihalad ang iyang hingpit tawhanong kinabuhi ingon nga usa ka lukat. Busa alang sa mga magpasundayag ug pagtuo, iyang gibuksan ang dalan alang sa pagbaton ug kapasayloan sa mga sala, sa usa ka inuyonang relasyon uban sa Diyos, ug sa palaaboton nga kinabuhing dayon. (Mateo 20:28; Juan 3:16) Pinaagi sa paghupot sa diyosnong pagkamahinalaron sa tibuok niyang kinabuhi, si Jesus nagtuboy sa pagkasoberano ni Jehova ug nagpamatuod nga bakakon ang Yawa. Si Jesus tinuod nga tighatag ug panan-aw sa buta ug tigpagawas sa mga nabilanggo sa espirituwal nga kangitngitan.
17. Sa unsang mga paagi nagaalagad kita ingon nga mga tigdala sa kahayag?
17 Sa Wali sa Bukid, giingnan ni Jesus ang iyang mga tinun-an: “Kamo ang kahayag sa kalibotan.” (Mateo 5:14) Dili ba usab kita mga tigdala sa kahayag? Pinaagi sa atong paagi sa pagkinabuhi ug sa atong buluhaton sa pagsangyaw, kita adunay pribilehiyo sa pagtultol sa uban ngadto kang Jehova, ang Tinubdan sa matuod nga kalamdagan. Sa pagsunod kang Jesus, atong ginapaila ang ngalan ni Jehova, ginatuboy ang Iyang pagkasoberano, ug ginamantala ang Iyang Gingharian ingon nga bugtong paglaom sa katawhan. Dugang pa, ingon nga mga tigdala sa kahayag kita nagayagyag sa relihiyosong kabakakan, nagapasidaan batok sa mahugaw nga mga buhat nga iya sa kangitngitan, ug nagayagyag kang Satanas, ang usa nga daotan.—Buhat 1:8; 1 Juan 5:19.
“Awiti si Jehova ug Usa ka Bag-ong Awit”
18. Unsay gipahinabo ni Jehova nga mahibaloan sa iyang katawhan?
18 Karon si Jehova nagliso sa iyang pagtagad ngadto sa iyang katawhan, nga nag-ingon: “Ako mao si Jehova. Kana ang akong ngalan; ug dili ko ihatag kang bisan kinsa ang akong kaugalingong himaya, ni ang akong pagdayeg ngadto sa kinulit nga mga larawan. Ang unang mga butang—ania sila miabot na, apan akong ipahayag ang bag-ong mga butang. Sa dili pa sila motungha, akong ipahinabo nga inyong madungog kini sila.” (Isaias 42:8, 9) Ang tagna bahin sa “akong alagad” gilitok, dili sa usa sa way-pulos nga mga diyos, kondili sa bugtong buhi ug matuod nga Diyos. Kana tino nga matuman, ug kana natuman gayod. Si Jehova nga Diyos mao gayod ang Awtor sa bag-ong mga butang, ug iyang ipahinabo nga ang iyang katawhan mahibalo kanila sa dili pa kini mahitabo. Unsay angay natong sanong?
19, 20. (a) Unsang awit ang kinahanglang awiton? (b) Kinsa karong adlawa ang nagaawit sa awit sa pagdayeg kang Jehova?
19 Si Isaias nagsulat: “Awiti si Jehova ug usa ka bag-ong awit, ang iyang pagdayeg gikan sa kinatumyan sa yuta, kamong mga tawo nga manaog ngadto sa dagat ug sa mga anaa niana, kamong kapuloan ug kamong nagpuyo kanila. Ipatugbaw sa kamingawan ug sa mga siyudad niini ang ilang tingog, ang kabalangayan nga gipuy-an sa Kedar. Pahugyawa sa kalipay ang mga molupyo sa pangpang. Gikan sa ibabaw sa kabukiran pasinggita ang katawhan. Pahataga sila ug himaya kang Jehova, ug diha sa kapuloan papahayaga sila bisan sa iyang pagdayeg.”—Isaias 42:10-12.
20 Ang mga molupyo sa mga siyudad, sa mga balangay sa kamingawan, sa kapuloan, bisan sa “Kedar,” o sa mga kampo sa mga desyerto—ang katawhan bisan diin—giawhag sa pag-awit ug usa ka awit sa pagdayeg kang Jehova. Pagkamakapaukyab nga sa atong adlaw minilyon ang misanong sa maong matagnaong pag-awhag! Gidawat nila ang kamatuoran sa Pulong sa Diyos ug gihimo nila si Jehova nga ilang Diyos. Ang katawhan ni Jehova nagaawit niining bag-ong awit—nga nagahatag ug himaya kang Jehova—diha sa kapin sa 230 ka nasod. Pagkamakalipay ang pag-awit niining daghag-kultura, daghag-pinulongan, ug daghag-rasa nga koro!
21. Nganong ang mga kaaway sa katawhan sa Diyos dili molampos sa pagpahilom sa awit sa pagdayeg kang Jehova?
21 Ang mga magsusupak makabarog ba batok sa Diyos ug makapahilom niining awita sa pagdayeg? Imposible! “Sama sa usa ka tawong gamhanan si Jehova mogula. Sama sa usa ka manggugubat siya magpukaw ug kasibot. Siya mosinggit, oo, siya mosinggit ug singgit sa pakiggubat; batok sa iyang mga kaaway iyang ipakita nga siya mas gamhanan.” (Isaias 42:13) Unsang gahoma ang makabarog batok kang Jehova? Mga 3,500 ka tuig kanhi, ang manalagnang si Moises ug ang mga anak sa Israel miawit: “Si Jehova maoy kusganong lalaki sa panggubatan. Jehova ang iyang ngalan. Ang mga karo ni Paraon ug ang iyang mga kasundalohan iyang gitambog sa dagat, ug ang iyang pinili nga mga manggugubat gipang-unlod sa Pulang Dagat.” (Exodo 15:3, 4) Si Jehova nagmadaogon batok sa labing gamhanang kasundalohan niadtong panahona. Walay kaaway sa katawhan sa Diyos ang mahimong molampos sa dihang si Jehova mogula ingon nga usa ka gamhanang manggugubat.
“Ako Naghilom Sulod sa Taas nga Panahon”
22, 23. Nganong si Jehova “naghilom sulod sa taas nga panahon”?
22 Si Jehova walay pinalabi ug makataronganon, bisan sa dihang magapatuman sa paghukom batok sa iyang mga kaaway. Siya nag-ingon: “Ako naghilom sulod sa taas nga panahon. Ako nagpabiling walay timik. Ako nagpadayon sa pagpugong-sa-kaugalingon. Sama sa usa ka babayeng manganak ako mag-agulo, maghangos, ug maghingahinga sa samang higayon. Akong gun-obon ang mga bukid ug mga bungtod, ug ang tanan nilang mga tanom akong palayaon. Ug ang mga suba himoon kong kapuloan, ug ang punog-tangbo nga mga linaw akong pamalahon.”—Isaias 42:14, 15.
23 Sa dili pa mohimog hudisyal nga aksiyon, palabyon una ni Jehova ang panahon aron kahatagag higayon ang mga mamumuhat ug daotan sa pagtalikod gikan sa ilang daotang mga panggawi. (Jeremias 18:7-10; 2 Pedro 3:9) Palandonga ang kahimtang sa mga Babilonyanhon, kinsa, ingon nga labaw nga gahom sa kalibotan, naglaglag sa Jerusalem sa tuig 607 W.K.P. Gitugotan kini ni Jehova aron pagdisiplina sa mga Israelinhon tungod sa ilang pagkadili-matinumanon. Bisan pa niana, ang mga Babilonyanhon napakyas sa pag-ila sa papel nga ilang gidula. Ilang gitratar nga labi pang mapintason ang katawhan sa Diyos kay sa gikinahanglan sa paghukom sa Diyos. (Isaias 47:6, 7; Zacarias 1:15) Pagkadako sa kasakit nga gibati sa matuod nga Diyos sa pagkakitang nag-antos ang iyang katawhan! Apan siya nagpugong sa paglihok hangtod sa iyang gitakdang panahon. Nianang panahona siya nagbati—sama sa usa ka babayeng nanganak—aron sa pagpagawas sa iyang katawhang may pakigsaad ug nagpatungha kanila ingong usa ka independenteng nasod. Sa pagpalampos niini, sa 539 W.K.P., iyang gipahubsan ug gigun-ob ang Babilonya ug iyang mga depensa.
24. Unsang palaaboton ang gibuksan ni Jehova alang sa iyang katawhang Israel?
24 Pagkadako sa kahinam sa katawhan sa Diyos sa dihang, human sa daghang katuigan sa pagkadestiyero, sa kataposan ang dalan sa ilang pagpauli nabuksan alang kanila! (2 Cronicas 36:22, 23) Sila nalipay gayod nga makasinati sa katumanan sa saad ni Jehova: “Palakwon ko ang mga buta sa usa ka dalan nga wala nila masinati; sa usa ka alagianan nga wala nila masinati pataakon ko sila. Ako magahimo sa usa ka ngitngit nga dapit nga kahayag sa ilang atubangan, ug ang gansangong yuta nga patag nga yuta. Mao kini ang akong pagabuhaton alang kanila, ug ako dili magabiya kanila.”—Isaias 42:16.
25. (a) Bahin sa unsa nga makatino ang katawhan ni Jehova karong adlawa? (b) Angay nga unsay atong determinasyon?
25 Sa unsang paagi mapadapat kining mga pulonga karong adlawa? Aw, sulod sa taas nga panahon na karon—sulod sa mga siglo—gipasagdan ni Jehova ang mga nasod sa pagbuhat kon unsay ilang gusto. Ugaling lang, nagsingabot na ang iyang tinudlong panahon sa paghusay sa mga butang. Sa modernong kapanahonan siya nagpatunghag usa ka katawhan nga magpamatuod sa iyang ngalan. Pinaagi sa pagpatag sa bisan unsang pagsupak batok kanila, gihapsay niya ang dalan alang kanila aron sa pagsimba kaniya “uban sa espiritu ug sa kamatuoran.” (Juan 4:24) Siya misaad: “Ako dili magabiya kanila,” ug siya nagtuman sa iyang pulong. Komosta kadtong nagpadayon sa pagsimbag bakak nga mga diyos? Si Jehova nag-ingon: “Sila pabalikon gayod, sila mangaulaw pag-ayo, silang nagbutang sa pagsalig diha sa linilok nga larawan, silang nag-ingon sa usa ka inumol nga larawan: ‘Kamo mao ang among mga diyos.’” (Isaias 42:17) Pagkabililhon nga kita magpabiling matinumanon kang Jehova, sama sa iyang Pinili!
‘Usa ka Alagad nga Bungol ug Buta’
26, 27. Sa unsang paagi ang Israel napamatud-ang ‘usa ka alagad nga bungol ug buta,’ ug may unsang mga sangpotanan?
26 Ang Piniling Alagad sa Diyos, si Jesu-Kristo, nagpabiling matinumanon hangtod sa kamatayon. Ang katawhan ni Jehova nga Israel, hinunoa, nahimong usa ka dili-matinumanong alagad, bungol ug buta sa espirituwal nga diwa. Sa pagpamulong ngadto kanila, si Jehova nag-ingon: “Pamati, kamong mga bungol; ug tan-aw aron makakita, kamong mga buta. Kinsa ba ang buta, kon dili ang akong alagad, ug kinsa ba ang bungol ingon sa akong mensahero nga akong gipadala? Kinsa ba ang buta ingon sa usa nga gigantihan, o buta ingon sa alagad ni Jehova? Kadto maoy labot sa pagkakita ug daghang butang, apan ikaw wala magpadayon sa pagtan-aw. Kadto maoy labot sa pagbukas sa mga igdulungog, apan ikaw wala magpadayon sa pagpamati. Si Jehova may kahimuot tungod sa iyang pagkamatarong mao nga iyang padakoon ang balaod ug himoon kining halangdon.”—Isaias 42:18-21.
27 Pagkamakapasubo ang kapakyasan sa Israel! Ang iyang katawhan balikbalik nga nahulog sa pagsimba sa demonyong mga diyos sa mga nasod. Balikbalik nga nagpadala si Jehova sa iyang mga mensahero, apan ang iyang katawhan wala mamati. (2 Cronicas 36:14-16) Si Isaias nagtagna sa mga sangpotanan: “Kini maoy usa ka katawhan nga giagawan ug giilogan, silang tanan nangabitik sa mga gahong, ug diha sa mga bilanggoan sila gitagoan. Sila nahimong alang sa pag-agaw nga walay magaluwas, alang sa pag-ilog nga walay usa nga moingon: ‘Iuli!’ Kinsa taliwala kaninyo ang magpatalinghog niini? Kinsa ang motagad ug mamati alang sa ulahing mga panahon? Kinsa ang naghatag kang Jacob aron mailog lamang, ug sa Israel ngadto sa mga mang-aagaw? Dili ba si Jehova, ang Usa nga batok kaniya kita nakasala, ug kansang mga dalan dili nila buot laktan ug kansang balaod wala nila pamatii? Busa Siya nagpadayon sa pagbubo nganha kaniya sa kaaligutgot, ang iyang kasuko, ug ang kusog sa gubat. Ug kini nagpadayon sa pag-ut-ot kaniya sa tibuok palibot, apan wala siya magtagad; ug kini nagpadayon sa pagsilaob batok kaniya, apan wala siyay gibutang sa kasingkasing.”—Isaias 42:22-25.
28. (a) Unsay makat-onan nato gikan sa panig-ingnan sa mga molupyo sa Juda? (b) Sa unsang paagi makapangita kita sa pag-uyon ni Jehova?
28 Tungod sa pagkadili-matinumanon sa mga molupyo niini, gitugotan ni Jehova ang yuta sa Juda nga maagawan ug mailogan sa mga katigayonan niadtong 607 W.K.P. Ang mga Babilonyanhon nagsunog sa templo ni Jehova, naghimong awaaw sa Jerusalem, ug nagdalang binihag sa mga Hudiyo. (2 Cronicas 36:17-21) Hinaot itisok nato sa kasingkasing kining panig-ingnana isip pasidaan ug dili gayod magpabungolbungol sa mga instruksiyon ni Jehova o magpabutabuta sa iyang sinulat nga Pulong. Sa kapulihay, hinaot atong pangitaon ang pag-uyon ni Jehova pinaagi sa pagsundog kang Kristo Jesus, ang Alagad nga giuyonan ni Jehova mismo. Sama kang Jesus, hinaot atong ipahibalo ang matuod nga hustisya pinaagi sa atong ginasulti ug ginabuhat. Niining paagiha, kita magpabiling kauban sa katawhan ni Jehova, nga magaalagad nga mga tigdala sa kahayag nga nagadayeg sa matuod nga Diyos ug nagahatag kaniyag himaya.
[Mga hulagway sa panid 33]
Ang matuod nga hustisya maoy mahangawaon ug maluluy-on
[Hulagway sa panid 34]
Sa sambingay sa maluloton nga Samarianhon, gipakita ni Jesus nga ang matuod nga hustisya magsakop sa tanang tawo
[Mga hulagway sa panid 36]
Pinaagi sa pagkamakapadasig ug pagkamaluloton, kita nagapasundayag sa diyosnong hustisya
[Mga hulagway sa panid 39]
Pinaagi sa atong buluhatong pagsangyaw, atong gipasundayag ang diyosnong hustisya
[Hulagway sa panid 40]
Ang inuyonan nga Alagad gihatag “ingong kahayag sa kanasoran”