-
Puwede Kang Mahimong Higala ni JehovaMabuhi Ka Hangtod sa Hangtod!—Interactive nga Pagtuon sa Bibliya
-
-
5. Kon unsay gihangyo ni Jehova sa iyang mga higala
Sagad naa tay gidahom gikan sa atong mga higala.
Unsa ang mga butang nga gusto nimong himoon sa imong mga higala para kanimo?
Basaha ang 1 Juan 5:3, ug dayon hisgoti kini nga pangutana:
Unsay gidahom ni Jehova sa iyang mga higala?
Aron masunod si Jehova, kinahanglan tingali tang mohimog kausaban sa atong panggawi o personalidad. Basaha ang Isaias 48:17, 18, ug dayon hisgoti kini nga pangutana:
Nganong gusto ni Jehova nga mohimog kausaban ang iyang mga higala?
Ang maayong higala magpahinumdom nato sa mga butang nga makahatag natog proteksiyon ug kaayohan. Kana poy himoon ni Jehova sa iyang mga higala
-
-
Unsaon Nato Pagpakita ang Atong Gugma Kang Jehova?Mabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 34
Unsaon Nato Pagpakita ang Atong Gugma Kang Jehova?
Mibati ba ka nga mas nasuod ka sa Diyos sukad nga nagtuon ka sa Bibliya? Gusto ba nimo nga padayong palig-onon ang inyong panaghigalaay? Kon mao, hinumdomi nga kon makita ni Jehova nga magkadako ang imong gugma kaniya, mas higugmaon ug panggaon ka niya. Unsaon nimo pagpakita kang Jehova nga gihigugma nimo siya?
1. Unsaon nato pagpakita kang Jehova nga gihigugma nato siya?
Ikapakita nato ang atong gugma kang Jehova pinaagi sa pagsunod kaniya. (Basaha ang 1 Juan 5:3.) Dili niya pugson si bisan kinsa nga sundon siya. Hinuon, gihatagan niyag kahigayonan ang matag usa kanato sa pagpili kon sundon ba nato siya o dili. Ngano? Kay gusto ni Jehova nga kita ‘kinasingkasing nga magmasinugtanon.’ (Roma 6:17) Sa ato pa, gusto niya nga sundon nimo siya, dili tungod kay kinahanglan nimo nang himoon, kondili kay gihigugma nimo siya. Ang Seksiyon 3 ug 4 niini nga libro makatabang nga mapakita nimo ang imong gugma kang Jehova pinaagi sa pagbuhat sa kon unsay makapalipay niya ug sa paglikay sa kon unsay makapaguol sa iyang kasingkasing.
2. Nganong ang pagpakita sa atong gugma kang Jehova dili kanunayng sayon?
“Daghan ang kalisdanan sa matarong.” (Salmo 34:19) Kitang tanan nakigbisog sa atong pagkadili-hingpit. Ug tingali nag-atubang tag mga problema sa kuwarta, inhustisya, ug uban pang kalisdanan. Dihang makaeksperyensiya tag kalisdanan, mobati tingali ta nga dili sayon ang pagsunod kang Jehova. Tungod na kay mas sayon tingali ang dili pagsunod kang Jehova. Pero kon matinumanon nimong himoon ang ipahimo ni Jehova kanimo, imong gipakita nga gihigugma nimo siya labaw sa tanan. Gipamatud-an pod nimo nga maunongon ka kaniya. Sa baylo, magmaunongon siya nimo. Dili gyod ka niya biyaan.—Basaha ang Salmo 4:3.
TUN-IG DUGANG
Susiha kon nganong ang imong pagkamasinugtanon importante kang Jehova, ug sayra kon unsay makatabang nga makapabilin kang matinumanon kaniya.
3. Isyu nga naapil ka
Sumala sa Job, nga basahon sa Bibliya, giakusahan ni Satanas dili lang si Job kondili ang tanang tawo nga gustong moalagad kang Jehova. Basaha ang Job 1:1, 6–2:10, ug dayon hisgoti kini nga mga pangutana:
Sumala kang Satanas, nganong nagmasinugtanon si Job kang Jehova?—Tan-awa ang Job 1:9-11.
Unsay akusasyon ni Satanas sa tanang tawo, apil ka?—Tan-awa ang Job 2:4.
Basaha ang Job 27:5b, ug dayon hisgoti kini nga pangutana:
Sa unsang paagi gipamatud-an ni Job nga gihigugma gyod niya si Jehova?
Gipamatud-an ni Job ang iyang gugma kang Jehova pinaagi sa pagpabiling maunongon kaniya
Mapamatud-an nato ang atong gugma kang Jehova pinaagi sa pagpabiling maunongon kaniya
4. Lipaya ang kasingkasing ni Jehova
Basaha ang Proverbio 27:11, ug dayon hisgoti kini nga mga pangutana:
Unsay bation ni Jehova kon magmaalamon ka ug imo siyang sundon? Ngano?
5. Kaya nimong magmaunongon kang Jehova
Ang atong gugma kang Jehova magpalihok nato nga mosulti sa uban bahin niya. Ang atong pagkamaunongon niya magpalihok nato nga himoon na bisan dihang dili na sayon himoon. I-play ang VIDEO, ug dayon hisgoti ang mosunod nga mga pangutana:
Naa bay panahon nga malisdan ka sa pagsulti sa uban bahin kang Jehova?
Sa video, unsay nakatabang kang Grayson nga dili madaog sa kahadlok?
Mas sayon nga magmaunongon kang Jehova kon atong higugmaon ang iyang gihigugma ug dumtan ang iyang gidumtan. Basaha ang Salmo 97:10, ug dayon hisgoti kini nga mga pangutana:
Base sa imong nakat-onan, unsa ang mga butang nga gihigugma ni Jehova? Unsa ang mga butang nga iyang gidumtan?
Unsay imong himoon aron makakat-on ka sa paghigugma kon unsay maayo ug sa pagdumot kon unsay daotan?
6. Makabenepisyo ta kon magmasinugtanon ta kang Jehova
Ang pagsunod kang Jehova mao ang pinakamaayong himoon kanunay. Basaha ang Isaias 48:17, 18, ug dayon hisgoti kini nga mga pangutana:
Para nimo, makasalig ba ta nga si Jehova kanunayng nahibalo kon unsay pinakamaayo para nato? Ngano?
Unsay nakuha nimong mga kaayohan sa pagtuon sa Bibliya ug sa pagtuon bahin sa matuod nga Diyos, si Jehova?
ANG UBAN MOINGON: “Balewala ra man sa Diyos ang akong ginahimo.”
Unsang teksto ang imong gamiton aron ipakita nga ang atong ginahimo makaapektar sa pagbati ni Jehova?
SUMARYO
Ikapakita nimo ang imong gugma kang Jehova pinaagi sa pagsunod kaniya ug sa pagpabiling maunongon kaniya bisan pa sa mga kalisdanan.
Review
Unsay imong nakat-onan sa ehemplo ni Job?
Unsaon nimo pagpamatuod ang imong gugma kang Jehova?
Unsay makatabang nga makapabilin kang maunongon kang Jehova?
SUSIHA
Sayra kon unsaon nimo pagpakita nga maunongon ka kang Jehova ug sa kongregasyon.
Sayrag dugang ang bahin sa mga akusasyon ni Satanas sa mga tawo.
“Si Job Nagpabiling Matinumanon sa Diyos” (Ang Bibliya—Unsay Mensahe Niini? seksiyon 6)
Tan-awa kon sa unsang paagi ikapakita bisan sa mga bata ang ilang gugma kang Jehova.
Sa unsang paagi ang usa ka batan-on makapabiling maunongon kang Jehova bisan dihang tentalon siya sa ubang batan-on sa paghimog dili maayo?
-
-
Kon Unsaon Paghimog Maayong mga DesisyonMabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 35
Kon Unsaon Paghimog Maayong mga Desisyon
Kitang tanan kinahanglang mohimog mga desisyon. Daghan niana naay dakong epekto nato ug sa atong relasyon kang Jehova. Pananglitan, modesisyon ta kon asa ta magpuyo, kon unsaon nato pagpanginabuhi, o kon magminyo ba ta o dili. Dihang mohimo tag maayong mga desisyon, magmalipayon ta ug mapalipay nato si Jehova.
1. Unsay imong himoon aron matabangan ka sa Bibliya sa paghimog maayong mga desisyon?
Sa dili pa ka mohimog desisyon, pag-ampo para sa tabang ni Jehova ug susiha ang Bibliya kon unsay iyang panghunahuna bahin sa maong butang. (Basaha ang Proverbio 2:3-6.) Sa ubang kahimtang, naay klarong sugo si Jehova. Kon mao, ang pinakamaayong desisyon nga imong mahimo mao ang pagsunod niana.
Pero komosta kon walay klarong giingon ang Bibliya kon unsay imong himoon? Giyahan gihapon ka ni Jehova “sa dalan nga angay nimong laktan.” (Isaias 48:17) Sa unsang paagi? Tingali naay mga prinsipyo nga makagiya nimo. Ang mga prinsipyo sa Bibliya maoy mga kamatuoran nga nagpakita sa panghunahuna ug pagbati sa Diyos. Sagad mahibaloan nato ang pagbati sa Diyos bahin sa usa ka butang dihang mobasa ta ug estorya sa Bibliya. Dihang makita nato kon unsay pagbati ni Jehova, makahimo tag mga desisyon nga makapalipay niya.
2. Unsay angay nimong konsiderahon sa dili pa mohimog desisyon?
Ang Bibliya nag-ingon: “Ang maalamon mamalandong sa matag lakang.” (Proverbio 14:15) Nagpasabot ni nga sa dili pa ta mohimog desisyon, angay tang mogahin ug panahon nga hunahunaon ang atong mga kapilian. Samtang timbangtimbangon nimo ang matag kapilian, pangutan-a ang imong kaugalingon: ‘Unsang mga prinsipyo sa Bibliya ang mapadapat ani? Asa sa mga kapilian ang makahatag nakog kalinaw sa hunahuna? Unsay epekto sa uban sa akong desisyon? Labaw sa tanan, makapalipay ba ni kang Jehova?’—Deuteronomio 32:29.
Si Jehova naay katungod sa pagsulti nato kon unsay maayo ug kon unsay daotan. Kon mahibalo ta pag-ayo sa iyang mga balaod ug prinsipyo ug determinado nga sundon kana, mabansay nato ang atong konsensiya. Sultihan ta sa atong konsensiya kon ang usa ka butang husto o sayop. (Roma 2:14, 15) Ang nabansay nga konsensiya motabang nato sa paghimog maayong mga desisyon.
TUN-IG DUGANG
Sayra kon sa unsang paagi ang mga prinsipyo sa Bibliya ug ang atong konsensiya makatabang nato sa paghimog mga desisyon.
3. Pagiya sa Bibliya
Sa unsang paagi ang mga prinsipyo sa Bibliya makagiya nato sa paghimog mga desisyon? I-play ang VIDEO, ug dayon hisgoti ang mosunod nga mga pangutana:
Unsa ang kagawasan sa pagpili?
Nganong gihatagan ta ni Jehova ug kagawasan sa pagpili?
Unsay iyang gitagana aron matabangan ta nga gamiton sa pinakamaayong paagi ang atong kagawasan sa pagpili?
Ingong pananglitan sa usa ka prinsipyo sa Bibliya, basaha ang Efeso 5:15, 16. Dayon hisgoti kon unsaon nimo ‘paggamit ang imong panahon sa kinamaayohang paagi’ aron . . .
regular nga makabasa sa Bibliya.
mahimong mas maayong kapikas, ginikanan, o anak.
makatambong sa mga tigom sa kongregasyon.
4. Bansaya ang imong konsensiya sa paghimog maayong mga desisyon
Sayon ra mohimog hustong desisyon kon naay klarong giingon ang Bibliya bahin sa usa ka butang. Pero komosta kon walay klarong sugo? I-play ang VIDEO, ug dayon hisgoti ang mosunod nga pangutana:
Sa video, unsay gihimo sa sister aron mabansay niya ang iyang konsensiya ug makahimog desisyon nga makapalipay kang Jehova?
Nganong dili nato angayng padesisyonon ang uban para nato? Basaha ang Hebreohanon 5:14, ug dayon hisgoti kini nga mga pangutana:
Tingali mas sayon nga ang uban maoy atong padesisyonon para nato. Pero angay natong mahibaloan kon unsaon pag-ila ang unsa?
Unsang mga tagana ang makatabang nimo nga mabansay ang imong konsensiya ug makahimog maayong mga desisyon?
Samag mapa, ang atong konsensiya makagiya nato sa paghimog desisyon
5. Tahora ang konsensiya sa uban
Kada tawo lainlain ug desisyon. Unsaon nato pagpakita nga gitahod nato ang konsensiya sa uban? Matikdi ang duha ka situwasyon:
Situwasyon 1: Ang sister nga ganahang mag-makeup mibalhin ug kongregasyon. Dili madawat sa konsensiya sa daghang sister sa maong kongregasyon kon makakita silag nag-makeup.
Basaha ang Roma 15:1 ug 1 Corinto 10:23, 24, ug dayon hisgoti kini nga mga pangutana:
Base niini nga mga teksto, unsa kahay desisyon sa maong sister? Unsay imong himoon kon ang konsensiya sa imong kauban dili makadawat sa butang nga madawat ra sa imong konsensiya?
Situwasyon 2: Ang usa ka brader nahibalo nga wala idili sa Bibliya ang pag-inom ug alkoholikong ilimnon, pero midesisyon siya nga dili moinom. Giimbitar siya sa usa ka tapoktapok diin ang mga brader miinom ug alkoholikong ilimnon.
Basaha ang Ecclesiastes 7:16 ug Roma 14:1, 10, ug dayon hisgoti kini nga mga pangutana:
Base niini nga mga teksto, unsa kahay desisyon sa maong brader? Unsay imong himoon kon buhaton sa usa ka tawo ang butang nga dili madawat sa imong konsensiya?
Unsay angayng himoon aron makahimog maayong mga desisyon?
1. Hangyoa si Jehova nga tabangan ka sa pagdesisyon kon unsay himoon.—Santiago 1:5.
2. Pag-research sa Bibliya ug sa mga publikasyon nga binase sa Bibliya aron makakita kag mga prinsipyo nga makatabang. Puwede pod kang mangayog tambag sa eksperyensiyadong mga Kristohanon.
3. Konsideraha ang epekto sa desisyon diha sa imong konsensiya ug sa konsensiya sa uban.
ANG UBAN MOINGON: “Naa koy katungod sa pagbuhat bisan unsay akong gusto. Wala koy labot sa hunahunaon sa uban.”
Nganong angay natong konsiderahon ang bation sa Diyos ug sa uban?
SUMARYO
Makahimo tag maayong mga desisyon kon atong sayron ang pagbati ni Jehova bahin sa usa ka butang ug dayon konsiderahon kon ang atong himoon makatabang ba sa uban o makadaot nila.
Review
Unsaon nimo paghimog mga desisyon nga makapalipay kang Jehova?
Unsaon nimo pagbansay ang imong konsensiya?
Unsaon nimo pagpakita nga gitahod nimo ang konsensiya sa uban?
SUSIHA
Unsaon nimo paghimog mga desisyon nga makapalig-on sa imong relasyon sa Diyos?
“Paghimog mga Desisyon nga Magpasidungog sa Diyos” (Ang Bantayanang Torre, Abril 15, 2011)
Sayrag dugang kon sa unsang paagi si Jehova mohatag natog tambag.
Tan-awa kon unsay nakatabang sa usa ka tawo sa paghimog lisod nga desisyon.
Si Jehova Naggarantiya nga Iyang Ihatag Kanato ang Tanang Maayo (5:46)
Sayrag dugang kon sa unsang paagi nato mapalipay si Jehova dihang wala siyay klarong sugo bahin sa usa ka butang.
-