Moingon Ka ba, “Ania Ako! Ipadala Ako”?

“Si Jehova [miingon]: ‘Kinsay akong ipadala, ug kinsa ang moadto alang kanamo?’ Unya ako miingon: ‘Ania ako! Ipadala ako.’”—ISAIAS 6:8.

“MALIPAYON kami sa pagpadala sa among sulat sa pagdawat sa pag-adto sa Colombia. Nalipay kami sa among pribilehiyo sa pag-alagad dinhi sa Ecuador nga dili ikahubit sa makinelya.” Matud pa sa sulat gikan sa duha ka Saksi ni Jehova nga miadto sa Ecuador dihang gitukod ang bag-ong sangang buhatan sa Watch Tower Society.

1, 2. Unsang linaing katarongan sa kalipay sa magtiayon?

² Miadto kining mga ministroha sa Ecuador sa pagbuhat ug labaw pa kay sa pagtabang lamang sa pagtukod; sila makatabang usab ingong Kristohanong mga magtutudlo. Sila misulat: “Among nakita nga ang pag-alagad sa kanataran mao ang usa sa labing hinungdanong butang. Sa miagi lamang nga tulo ka semana, walo kanamo miadto sa tiyanggihan ug nakapahilunag 73 ka libro ug kapin sa 40 ka magasin. Sa miaging semana, nakasugod kami ug duha ka pagtuon sa Bibliya. Nakita gayod namo ang panginahanglan sa bag-ong sanga. Ako ug ang akong asawa buot magpasalamat kaninyo sa pribilehiyo nga makapadayon niining espesyal nga porma sa bug-os panahong pag-alagad” karon sa Colombia.

3. Sa unsang paagi gipabanaag sa kadaghanan ang espiritu sama nianang gipakita ni Isaias?

³ Kining magtiayona, ug ginatos pang uban nga nagtanyag nga ipadala ngadto sa langyawng nasod, nagpabanaag ug espiritu sama kang propetang Isaias. Dihang nadunggan namong miingon si Jehova: “Kinsay akong ipadala, ug kinsay moadto alang kanamo?” Si Isaias mitubag: “Ania ako! Ipadala ako.” Unya ang Diyos misugo: “Lakaw, ug sultihi kining katawhan, ‘Kamo makadaghan nang nakadungog, Oh katawhan, apan wala makasabot.’” (Isaias 6:8, 9) Unsay gibolunteran ni Isaias nga ipadala, ug unsay miresulta niini? Ug unsay atong makat-onan gikan ning maong kasaysayan kon bahin sa modernong mga katugbang ug unsay pagtulon-an niini alang kanato?

Ang Sugo ni Isaias sa Pagwali

4, 5. (a) Unsay naglungtad nga kahimtang dihang nadawat ni Isaias ang panan-awon nga narekord sa kapitulo 6? (b) Unsay nakita ni Isaias niini nga panan-awon?

⁴ Gipangutana ni Jehova nga Diyos si Isaias, “Kinsay akong ipadala?” sa tuig nga namatay si Haring Uzzias. (Isaias 6:1) Tuig kadto sa 777 W.K.P., o mga usa ka siglo ug tulo sa ikaupat nga bahin sa wala pa laglaga sa mga Babilonyanhon ang Jerusalem ug sa wala pa lumpaga ang yuta sa Juda. Nakita ni Jehova nga umaabot kanang makasubong hitabo, ug iyang gisugo si Isaias sa paghatag ug mensahe mahitungod niana. Unsay atong makat-onan gikan sa iyang sugo sa pagwali?

⁵ Sama kanato, naikag kaayo si Isaias sa kahimtang dihang nadawat niya ang iyang sugo. Siya misulat: “Nakita ko . . . si Jehova, nga naglingkod sa trono nga hataas ug tinuboy, ug ang iyang sapot nakapuno sa templo. Sa ibabaw kaniya nagbarog ang mga serapines. Ang tagsatagsa may unom ka pako. Sa duha gitabonan ang iyang nawong, ug sa duha gitabonan ang iyang mga tiil, ug sa duha siya makalupad. Ug ang usa misinggit sa usa ug miingon: ‘Balaan, balaan, balaan si Jehova sa mga panon. Ang tibuok nga yuta napuno sa iyang himaya.’”​—Isaias 6:1-3.

6. Nganong usa ka pribilehiyo nga nakita ni Isaias ang iyang nakita?

⁶ Nahibalo si Isaias nga gisanla si Uzzias dihang siya, sanglit dili man banay sa mga saserdote, nangahas sa pagsulod sa Balaan nga dapit sa templo sa pagsunog ug insenso. Busa, pagkadako sa pribilehiyo ni Isaias nga nakakita sa presensiya sa Diyos! Si Isaias, nga usa ka dili-hingpit nga tawo, wala gayod sa literal nakakita kang Jehova, apan siya gitugotan sa pagkakita Kaniya diha panan-awon. (Exodo 33:20-23) Ang pagkahalangdon niini gipasiugda sa mga manulonda nga hataas ug ranggo, (mga serapines) nga nag-alagad sa trono ni Jehova. Sila, nahibalo sa pagkabalaan sa Diyos, matinahurong nagtabon sa ilang ‘mga nawong.’ Bisan pa ning mapaubsanong buhat, mapasiugdahon nilang giwali ang pagkabalaan sa Diyos. Unsay epekto sa hunahuna mo niining tanan diha sa mga tawo?

7. Unsay reaksiyon ni Isaias, ug nganong ingon usab niana usahay ang atong bation?

⁷ Pasagdi si Isaias sa pagtubag. “Mipadayon ako sa pag-ingon: ‘Pagkaalaot ko! Kay sama ra nga gipahilom ako, tungod kay usa ka tawo nga mahugaw ug mga ngabil, ug ako nagapuyo sa taliwala sa mga tawo nga mahugaw ug mga ngabil; kay ang akong mga mata nakakita sa Hari, si Jehova sa mga panon!’” (Isaias 6:5) Nahibalo si Isaias nga tigpamaba siya sa Diyos, apan kining maong panan-awon napasilsil kaniya nga siya mahugaw, nga walay putling mga ngabil nga angay sa usa ka tigpamaba niining mahimayaon ug balaang Hari. Tingali, ang pipila kanato nadaog sa atong pagkamakasasala, mobati nga dili takos sa pagduol sa Diyos diha sa pag-ampo, ilabina kay kita gitawag sa iyang ngalan. Nan, ilabinang makadasig ang ubang mga eksperyensiya ni Isaias.

8. Unsang pag-alagad ang gihimo sa manulonda, ug uban sa unsang epekto?

⁸ Ang usa sa mialagad nga serapines milupad diha kaniya nga may usa ka nagbaga nga karbon gikan sa halaran sa mananap. Gidapat ang karbon diha sa baba ni Isaias, ang manulonda miingon: “Tan-awa! Kini nakadapat sa imong mga ngabil, ug ang imong kasal-anan mibulag na ug ang imong sala natabonan na.” (Isaias 6:6, 7) Sa panahon ni Solomon, ang kalayo gikan sa langit maoy pamatuod nga gidawat ni Jehova ang halad diha halaran, bisag dili gayod sa bug-os makahinlo ang halad sa mga saserdote atubangan sa Diyos. (2 Cronicas 7:1-3; Hebreohanon 10:1-4, 11) Sa gihapon, dihang gipasunog ni Isaias ang iyang pagkahugaw sa nagbaga nga karbon, makadawat siya sa paghukom ni Jehova nga natabonan na ang iyang pagkamakasasala sumala sa gikinahanglan aron makadawat sa linain nga tinudlong-buluhaton sa pagwali. Unsa ang makaikag nga mga timailhan ang gisugyot niini bahin sa umaabot?

9. Unsay diwa sa mensahe ni Isaias?

⁹ Kining katingalahang hitabo mitultol sa pagkadawat sa propeta sa tinudlong-buluhaton sa pagwali. (Isaias 6:8, 9) Apan nganong miingon si Isaias nga ang tawo makadaghan nang nakadungog apan wala gihapon makabaton sa kahibalo? Ang tingog sa Diyos midugang: “Pakubali ang kasingkasing niining mga tawhana, himoang bungol ang ilang mga igdulongog, ug papitli ang ilang mga mata, aron sila dili makakita . . . aron dili sila mobalik ug mamaayo.” (Isaias 6:10) Nagpasabot ba kana nga gisanta ni Isaias, pinaagi sa pagkaprangka ug pagkawalay taktika, ang mga Hudiyo aron sila magpabiling kaaway ni Jehova? Dili. Gipakita lamang niini ang reaksiyon sa kadaghanang mga Hudiyo bisan unsa pa ka matinumanon ug ka tim-os ni Isaias sa pagtuman sa buluhaton sa pagwali nga niini siya mibolunter pinaagi sa pag-ingon, “Ania ako! Ipadala ako.”

10. (a) Kinsa ang nagkulang bahin sa pagkabuta ug pagkabungol sa mga tawo? (b) Unsay gipasabot ni Isaias sa pagpangutana, “Hangtod kanus-a?”

¹⁰ Ang tawo ang nagkulang. Bisan pang gitugotan sila ni Isaias aron “makadungog sa makadaghan,” wala gayod sila modawat sa kahibalo ug sa pagbaton ug pagsabot. Mipahayag na ang Diyos sa sinugdan pa nga ang kadaghanan, dili gayod mosanong tungod sa ilang pagkagahig-ulo ug sa walay espiritung tinamdan. Tingali namati ang pipila. Apan ang kadaghanan buta ingon nga daw ang ilang mga mata gipapitlan ug lig-on kaayong papilit, kon mahanduraw mo kana. Hangtod kanus-a nga magpadayon kining daotang kahimtang? Kana, imbes kon pila ka tuig nga siya magpadayon sa pag-alagad, mao ang gipangutana ni Isaias niining mga pulonga: “Hangtod kanus-a, O Jehova?” Busa ang Diyos mitubag: “Hangtod nga ang mga siyudad mahimo nang kalumpagan, nga mawad-an sa molupyo.” Ug busa kadto nahitabo, sa namatay na si Isaias. Gilaglag sa Babilonyanhon ang katawhan, ang Juda “nahimong kalumpagan.”​—Isaias 6:11, 12; 2 Hari 25:1-26.

11. Sa unsang paagi nakahatag kalipay ang pagsangyaw ni Isaias?

¹¹ Apan, sa kataposan, gipasaligan ni Jehova si Isaias nga may paglaom pa. “Apan aduna pay ikapulo ka bahin niini [sa yuta].” Oo, sama kadto sa ‘dakong kahoy nga, kon kini pagaputlon, mabilin ang tuod, ang balaan nga binhi.’ (Isaias 6:13) Human sa 70 ka tuig sa pagkabihag sa Babilonya, ang binhi, o nabilin, mibalik sa yuta, ingon nga daw may bag-ong saha mga mitubo gikan sa tuod sa dakong kahoy. (2 Cronicas 36:22, 23; Esdras 1:1-4; itandi sa Job 14:7-9; Daniel 4:10, 13-15, 26.) Busa, samtang makasubo ang mensahe ni Isaias, kini nasudlan ug makapalipayng bahin. Apan kita adunay Kasulatanhong katarongan, sa paglantaw kang Isaias ingong sumbanan alang sa umaabot nga mga hitabo. Sa unsang paagi?

Mas Dagkong mga Katumanan

12. Unsang Kasulatanhong basehanan ang pagtawag kang Jesus nga Dakong Isaias?

¹² Sa mga kasiglohan tapos nga namatay si Isaias, may usa nga miabot nga atong matawag nga Dakong Isaias​—si Jesu-Kristo. Sa iyang una-tawhanong paglungtad, siya mibolunter nga ipadala sa iyang Amahan sa yuta, diin iyang gilakip sa iyang pagwali ang mga butang nga gisulat ni Isaias. (Proverbio 8:30, 31; Juan 3:17, 34; 5:36-38; 7:28; 8:42; Lucas 4:16-19; Isaias 61:1) Sa matin-aw, gilangkit ni Jesus ang iyang kaugalingon sa Isaias kapitulo 6 dihang Iyang gisaysay nganong nagpanudlo siya sa Iyang gitudlo. (Mateo 13:10-15; Marcos 4:10-12; Lucas 8:9, 10) Kadto haom, kay ang kadaghanang mga Hudiyo nga nakadungog kang Jesus wala modawat sa iyang mensahe ug molihok niana sama sa mga tawo nga nakadungog kang propetang Isaias. (Juan 12:36-43) Dugang pa, sa 70 K.P. ang mga Hudiyo nga naghimo sa ilang kaugalingon nga ‘buta ug bungol’ sa mensahe ni Jesus midangat sa kalaglagan sama niadtong sa 607 W.K.P. Kining hitabo sa unang siglo maoy kasakit sa Jerusalem nga ‘ang ingon wala pa mahitabo sukad sa sinugdan sa kalibotan hangtod karon ug dili na gayod mahitabo pa pag-usab.’ (Mateo 24:21) Bisan pa, sumala sa gitagna ni Isaias, ang nahibilin, o “balaan nga binhi,” mipakitag pagtuo. Sila napormang espirituwal nga nasod, ang dinihogan nga “Israel sa Diyos.”​—Galacia 6:16.

13. Nganong makapaabot pa kita ug laing katumanan sa Isaias 6?

¹³ Karon hisgotan nato ang laing binase sa Bibliya nga katumanan sa Isaias kapitulo 6. Ang yawi aron masabtan kini, mao ang mga pulong ni apostol Pablo sa mga tuig 60 K.P. Iyang gisaysay kon nganong daghang mga Hudiyo nga nakadungog kaniya sa Roma wala modawat sa iyang “pagpamatuod bahin sa gingharian sa Diyos.” Ang katarongan mao nga ang Isaias 6:9, 10 natuman na usab. (Buhat 28:17-27) Nagkahulogan ba kini nga dihang mibiya si Jesus sa yuta, ang iyang dinihogang mga disipulo mao ang mohimo sa tinudlong-buluhaton sama niadtong kang Isaias? Oo, tinuod kana!

14. Sa unsang paagi himoon sa mga disipulo ni Jesus ang buluhaton sama niadto kang Isaias?

¹⁴ Sa wala pa mosaka sa langit ang Dakong Isaias, siya miingon nga ang iyang mga disipulo makadawat sa balaang espiritu ug human niana “mahimong [iyang] mga saksi sa Jerusalem ug sa tibuok Judea ug sa Samaria ug sa kinatumyang bahin sa yuta.” (Buhat 1:8) Sama nga nagtagana ang halaran sa mga halad sa gikinahanglan aron mobulag ang sala ni Isaias, sa ingon ang halad ni Jesus mao ang basehanan alang sa iyang mga disipulo aron ang ilang ‘kasal-anan matabonan.’ (Levitico 6:12, 13; Hebreohanon 10:5-10; 13:10-15) Busa, gidihogan sila sa Diyos sa balaang espiritu, nga mohatag usab nilag gahom nga mahimong ‘mga saksi sa kinatumyang bahin sa yuta.’ Ang propetang Isaias ug ang Dakong Isaias gipadala sa pagwali sa mensahe sa Diyos. Sa susama, ang dinihogang mga sumusunod ni Jesus “gipadala sa Diyos . . . uban kang Kristo.”​—2 Corinto 2:17.

15. Unsay katibuk-ang reaksiyon sa atong panahon sa pagsangyaw sama niadtong gihimo ni Isaias, nagapunting sa unsang palaabuton?

¹⁵ Sa modernong mga panahon, ilabina sa kataposan sa Gubat sa kalibotan I, nakita sa dinihogang mga Kristohanon ang panginahanglan sa pagmantala sa mensahe sa Diyos. Lakip niini ang makasubong kamatuoran nga “ang adlaw sa panimalos sa atong Diyos” haduol na. (Isaias 61:2) Ang kalumpagan maoy usa ka dakong hampak ilabina sa Kakristiyanohan, nga dugay nang nag-angkon nga katawhan sa Diyos, sama sa Israel sa karaan. Bisan pa sa dekada sa maunongong pagsangyaw sa dinihogang mga saksi sa Diyos, ang dakong bahin sa Kakristiyanohan ‘nagpakubal sa ilang kasingkasing ug gipabungol ang ilang igdulongog; gipapitlan ang ilang mga mata.’ Ang tagna ni Isaias nagpakita nga magpadayon nga ingon niini ang kahimtang “hangtod ang mga siyudad mahimong kalumpagan, nga mawad-an ug mga molupyo, ug mawad-an ug tawo ang mga balay, ug ang yuta lumpagon hangtod mahimong kamingawan.” Kini mao unyay timaan sa kataposan sa daotang sistema sa mga butang.​—Isaias 6:10-12.

“Ipadala Ako”

16. Nganong ikaingon nga ang “dakong panon” nakigbahin sa buluhaton sama niadtong kang Isaias?

¹⁶ Karon, adunay milyonmilyong debotadong mga Kristohanon nga may Biblikanhong paglaom nga mabuhi sa walay kataposan diha sa paraiso sa yuta. Pinasukad sa dugo nga gihalad ni Jesus, mapasaylo ang sala niining “dakong panon” sumala sa gikinahanglan karon. Sila makadawat usab ug gahom ug pagpaluyo pinaagi sa espiritu sa Diyos samtang nakig-uban sila sa pipila ka nabiling dinihogang mga Kristohanon sa pag-ingon, “Ania ako! Ipadala ako.” Ipadala sila sa pagbuhat ug unsa? Si Pablo miingon diha sa Roma 10:13-15: “‘Ang tanan nga mosangpit sa ngalan ni Jehova mamaluwas.’ Apan, unsaon man sa mga tawo sa pagsangpit kaniya nga wala nila tuohi? Ug unsaon man nila sa pagtuo kaniya nga gayod nila hidunggi? Ug unsaon man nila sa pagkadungog kon walay magwawali? Ug unsaon man sa pagwali gawas kon sila gipadala? Ingon sa nahisulat [sa Isaias 52:7]: ‘Katahom gayod sa mga tiil sa nagawali sa maayong balita sa maayong mga butang!’”​—Pinadayag 7:9-15.

17. Sama sa tagna ni Isaias, unsa ang diwa sa atong mensahe?

¹⁷ Hinumdomi nga wala pa niya hibaloi ang bug-os nga kahulogan sa mensahe dihang si Isaias miingon, “Ania ako! Ipadala ako.” Sa kasukwahi, kita nahibalo kon unsay buot ipahayag sa Diyos karon sa mga tawong nagasanong sa iyang imbitasyon: “Kinsay akong ipadala, ug kinsay moadto alang kanamo?” Naglakip kini sa pagpasidaan bahin sa “adlaw sa panimalos sa atong Diyos.” Apan, ang mensahe naglakip usab sa “maayong balita sa maayong mga butang.” Pananglitan, kadtong “gipadala” nakigbahin sa pagmantala sa “kagawasan sa mga binihag ug sa pag-abli sa mga mata sa mga binilanggo.” Dili ba tuboran sa dakong kalipay ang pagbuhat niana?​—Isaias 61:1, 2.

18, 19. Sa unsang linain nga mga paagi daghan ang nagaingon, “Ipadala ako”?

¹⁸ Kon ikaw nagamantala na sa “maayong balita sa maayong mga butang,” kini nga pagrepaso sa Isaias kapitulo 6 tingali mopukaw kanimo sa pagpangutana: Unsaon nako sa pagsanong sa mag bug-os pa sumala sa diwa sa Isaias 6:8? Sama sa magtiayon nga gihisgotan sa sinugdan, gatos-gatos ang nakaambit sa programa sa International Volunteer Construction Workers. Daghan pa, nga walay eksperyensiya sa pagpanukod, mibalhin ngadto sa mga yuta diin mas dako ang panginahanglan sa mga magwawali sa Gingharian. Labing maayong himoon kini tapos nga mangayog tambag gikan sa sangang buhatan sa Watch Tower Society. Siyempre, hinungdanon ang pagplano, kay ang pinulongan, mga sukdanan sa kinabuhi, mga trabaho, ug lahi kaayo ang ubang butang diha sa langyaw nga nasod. Bisan pa, ayaw kuhaa kanang posibilidara tungod lang kay nagkinahanglan kang maghimog dakong mga kausaban. Daghan niadtong may tinamdang “Ania ako! Ipadala ako” mihimo niini ug tugob nga gipanalanginan sa Diyos sa pagbuhat sa ingon.​—Itandi sa Proverbio 24:27; Lucas 14:28-30.

¹⁹ Ang uban pa​—dili-minyong mga igsoong lalaki ug babaye, mga magtiayon, bisan ang tibuok nga mga pamilya​—mibalhin sa laing nasod o lugar diin adunay mas dakong panginahanglan alang sa mga magwawali o sa Kristohanong mga magtatan-aw. (Buhat 16:9, 10) Nagkinahanglan kinig mga pagsakripisyo, sama sa pagpangitag laing matang sa sekular nga trabaho, tingali mas gamay pa ang suweldo. Ang uban miretirog sayo sa trabaho nga may gamayng pensiyon ug nakakitag partaym nga trabaho aron mas daghan ang panahon alang sa ministeryo. Pagkadalayegon kon ang tibuok nga pamilya moingon, “Ania kami! Ipadala kami.” Kini, usab, nagapabanaag sa kahimtang ni Isaias. Ang iyang asawa aktibong nakigbahin sa pagbuhat sa kabubut-on sa Diyos ingong babayeng propeta, ug ang iyang mga anak nga lalaki nalangkit sa matagnaong mga mensahe.​—Isaias 7:3, 14-17; 8:3, 4.

20. Uban sa Isaias 6:8 diha sa hunahuna, unsa ang angay nimong palandongon?

²⁰ Bisan pa nga dili makatugot kanimo ang imong presenteng kahimtang sa maong dakong kausaban, ikaw mahimong makapalandong, ‘Ginahimo ko ba kutob sa akong maarangan aron masundog ko ang pagkamainandamon ni Isaias?’ Pagkugi sa pagmantala sa mensahe sa Diyos, bisan sa dili maayong panahon o sa atubangan sa pagkawalay pagtagad sa publiko; tinuod, gihimo usab kana ni Isaias. Magmainiton sa pagsulti sa uban bahin sa “maayong balita sa maayong mga butang!” Si Jehova miingon, “Kinsay akong ipadala?” Pamatud-i, sama kang Isaias sa karaan, nga ang imong tubag mao, “Ania ako! Ipadala ako” sa pagmantala sa Iyang mensahe.

Mga Punto Agig Repaso

◻ Unsang sirkumstansiya nga nadawat ni Isaias ang panan-awon sa kapitulo 6, ug unsay iyang nakita?

◻ Unsay matang sa tinudlong-buluhaton ang nadawat ni Isaias?

◻ Nganong matawag si Jesus nga Dakong Isaias, ug sa unsang paagi nalangkit ang iyang mga disipulo sa buluhaton sama kang Isaias?

◻ Sa unsang paagi imong mapasundayag ang espiritu sama nianang kang Isaias?

[Hulagway sa panid 17]

Giputli si Isaias ug gipadala sa pagwali

[Hulagway sa panid 18]

Daghan ang misanong, nga nagaingon, “Ania ako! Ipadala ako”