Ang Kadaogan sa Matuod nga Pagsimba Haduol Na

“Si Jehova magahari gayod sa tibuok yuta.”​—ZACARIAS 14:9.

 1. Unsa ang kasinatian sa dinihogang mga Kristohanon sulod sa Gubat sa Kalibotan I, ug giunsa kadto pagtagna?

PANAHON sa unang gubat sa kalibotan, ang dinihogang mga Kristohanon nag-antos sa daghang kalisdanan ug sa mga pagkabilanggo diha sa mga kamot sa naggubatay nga mga nasod. Ang ilang mga halad sa pagdayeg kang Jehova grabeng gipiotan, ug sila nahidangat sa kahimtang sa pagkabinihag sa espirituwal. Kining tanan gitagna sa Zacarias 142, nga nagbatbat sa usa ka internasyonal nga pag-atake sa Jerusalem. Ang siyudad sa maong tagna mao ang “langitnong Jerusalem,” ang langitnong Gingharian sa Diyos ug ang dapit sa “trono sa Diyos ug sa Kordero.” (Hebreohanon 12:22, 28; 13:14; Pinadayag 22:3) Ang mga dinihogan sa Diyos sa yuta maoy naghawas sa maong siyudad. Ang mga matinumanon sa ilang taliwala nakalabang sa pag-atake, nga wala motugot nga sila madestiyero “gikan sa siyudad.”a

2, 3. (a) Sa unsang paagi ang pagsimba kang Jehova nagmadaogon sukad 1919? (b) Sukad 1935, unsang kaugmaran ang nahitabo?

² Niadtong 1919 ang matinumanong mga dinihogan gibuhian gikan sa ilang binihag nga kahimtang, ug sila sa gilayon nagpahimulos sa yugto sa kalinaw pagkahuman sa gubat. Ingong mga embahador sa langitnong Jerusalem, ilang gipahimuslan ang talagsaong higayon nga iwali ang maayong balita sa Gingharian sa Diyos ug mibulig sa pagtigom sa kataposang mga membro sa 144,000. (Mateo 24:14; 2 Corinto 5:20) Niadtong 1931 gisagop nila ang haom nga Kasulatanhong ngalang mga Saksi ni Jehova.​—Isaias 43:10, 12.

³ Sukad niadto, ang dinihogang mga Saksi sa Diyos nagpadayon sa pag-uswag. Bisan si Hitler uban sa iyang Nazi nga politikanhon ug militaryong organisasyon wala makapahilom kanila. Bisan pa sa tibuok-kalibotan nga paglutos, ang ilang buluhaton namunga sa tibuok yuta. Ilabina sukad sa tuig 1935, sila gikuyogan sa internasyonal nga “dakong panon,” nga gitagna diha sa basahong Pinadayag. Kini sila usab maoy nagpahinungod, bawtismadong mga Kristohanon ug ‘naglaba sa ilang mga taas-nga-bisti ug nagpaputi niini sa dugo sa Kordero,’ si Jesu-Kristo. (Pinadayag 7:9, 14) Bisan pa niana, sila dili mga dinihogan, nga may paglaom sa langitnong kinabuhi. Ang ilang paglaom mao ang pagpanunod sa giwala ni Adan ug Eva, nga mao, ang hingpit tawhanong kinabuhi diha sa usa ka paraisong yuta. (Salmo 37:29; Mateo 25:34) Karong adlawa, ang dakong panon mokabat ug kapin sa lima ka milyong kalag. Ang matuod nga pagsimba ni Jehova nagamadaogon, apan ang kataposang kadaogan niini umaabot pa.

Mga Langyaw Diha sa Espirituwal nga Templo sa Diyos

4, 5. (a) Diin nagsimba kang Jehova ang dakong panon? (b) Unsang mga pribilehiyo ang ilang gipahimuslan, ug ingong katumanan sa unsang tagna?

⁴ Sumala sa gitagna, ang dakong panon “nagasimba [sa Diyos] adlaw ug gabii diha sa iyang templo.” (Pinadayag 7:15, potnot) Sanglit dili sila espirituwal, saserdotehanong mga Israelinhon, lagmit si Juan nakakita nga sila nagtindog diha sa templo diha sa gawas nga sawang sa mga Hentil. (1 Pedro 2:5) Nahimo gayong mahimayaon kaayo ang espirituwal nga templo ni Jehova, kay ang mga lawak niini napuno man niining dakong panon si kinsa, uban sa nahibilin sa espirituwal nga Israel, nagadayeg kaniya!

⁵ Ang dakong panon wala mag-alagad sa Diyos diha sa kahimtang nga gihulagwayan sa sulodnong saserdotehanong sawang. Sila wala ipahayag nga matarong sa katuyoan nga mahimong sinagop, espirituwal nga mga anak sa Diyos. (Roma 8:1, 15) Bisan pa niana, pinaagi sa pagpakitag pagtuo sa lukat ni Jesus, sila adunay mahinlong baroganan atubangan ni Jehova. Sila gipahayag nga matarong uban sa katuyoan nga mahimong iyang mga higala. (Itandi ang Santiago 2:21, 23.) Sila usab may pribilehiyo sa pagtanyag ug dalawatong mga halad diha sa espirituwal nga halaran sa Diyos. Busa, bahin niining dakong panon, ang tagna sa Isaias 56:6, 7 nagakatuman nga mahimayaon: “Ang mga langyaw nga nakigtipon sa ilang kaugalingon kang Jehova aron sa pag-alagad kaniya ug sa paghigugma sa ngalan ni Jehova, . . . pagadad-on ko usab sila ngadto sa akong balaang bukid ug himoon silang masadyaon sulod sa akong balay ampoanan. Ang ilang tibuok nga mga halad-nga-sinunog ug ang ilang mga halad pagadawaton diha sa akong halaran. Kay ang akong balay mismo tawgon gani nga balay ampoanan alang sa tanang katawhan.”

 6. (a) Unsang matang sa mga halad ang ginatanyag sa mga langyaw? (b) Ang sudlanan sa tubig sa saserdotehanong sawang nagpahinumdom kanila sa unsa?

⁶ Apil sa mga halad nga ginatanyag sa maong mga langyaw mao “ang bunga sa mga ngabil [samag pino nga pagkagaling nga mga halad nga lugas] nga nagahimo ug pagpahayag diha sa dayag sa ngalan [sa Diyos]” ug “ang pagbuhat sa maayo ug ang pagpakig-ambitay sa mga butang sa uban.” (Hebreohanon 13:15, 16) Ang dakong sudlanan ug tubig nga gigamit sa mga saserdote sa paghugas sa ilang kaugalingon maoy hinungdanon usab nga pahinumdom sa maong mga langyaw. Sila usab kinahanglang magpailalom sa espirituwal ug moral nga paghinlo samtang ang Pulong sa Diyos gihimong mas tin-aw nga progresibo kanila.

Ang Balaan ug ang mga Kasangkapan Niini

 7. (a) Giunsa sa dakong panon pag-isip ang mga pribilehiyo sa balaang pagkasaserdote? (b) Unsang dugang nga mga pribilehiyo ang nadawat sa pipila ka langyaw?

⁷ Ang Balaan ug ang mga kasangkapan niini duna bay kahulogan alang niining dakong panon sa mga langyaw? Aw, sila dili gayod maanaa sa kahimtang nga gihulagwayan sa Balaan. Sila wala ipanganak pag-usab ingong espirituwal nga mga anak sa Diyos nga may langitnong pagkalungsoranon. Kini ba nagpabati kanila nga masinahon o maibogon? Wala. Hinunoa, sila nagkalipay sa ilang pribilehiyo sa pagpaluyo sa nahibilin sa 144,000, ug sila nagpakitag lalom nga apresasyon sa katuyoan sa Diyos sa pagsagop niining espirituwal nga mga anak, kinsa makig-ambit uban kang Kristo sa pagtuboy sa katawhan ngadto sa pagkahingpit. Gawas pa, ang dakong panon sa mga langyaw nahinangop sa talagsaong dili-takos nga kalulot sa Diyos sa paghatag kanilag yutan-ong paglaom sa kinabuhing walay kataposan diha sa Paraiso. Pipila sa maong mga langyaw, sama sa mga Netinim sa kakaraanan, gihatagag mga pribilehiyo sa pagkamagbalantay aron pagbulig sa balaang pagkasaserdote.b (Isaias 61:5) Gikan kanila si Jesus nagtudlog “mga prinsipe sa tibuok yuta.”​—Salmo 45:16.

8, 9. Unsang kaayohan ang nabatonan sa dakong panon gikan sa pagpalandong sa mga kasangkapan sa Balaan?

⁸ Bisan pag sila dili gayod mosulod sa antitipikong Balaan, ang dakong panon sa mga langyaw makakat-on ug bililhong mga pagtulon-an gikan sa mga kasangkapan niini. Maingon nga ang tangkawan nagkinahanglag padayong abiyo sa lana, ang mga langyaw usab nagkinahanglag balaang espiritu aron sa pagtabang kanila sa pagsabot sa progresibong mga kamatuoran gikan sa Pulong sa Diyos, nga gipaagi sa “kasaligan ug mabuot nga ulipon.” (Mateo 24:45-47) Dugang pa, ang espiritu sa Diyos nagtabang kanila sa pagsanong niining imbitasyona: “Ang espiritu ug ang pangasaw-onon [ang dinihogang nahibilin] padayong nagaingon: ‘Umari ka!’ Ug si bisan kinsa nga nagapaminaw paingna: ‘Umari ka!’ Ug si bisan kinsa nga giuhaw paaria; ang si bisan kinsa nga buot pakuhaa sa tubig sa kinabuhi nga libre.” (Pinadayag 22:17) Sa ingon niana, ang tangkawan maoy usa ka pahinumdom sa dakong panon bahin sa ilang obligasyon nga molamdag ingong mga Kristohanon ug maglikay sa bisan unsa diha sa tinamdan, panghunahuna, pulong, o buhat nga makapaguol sa balaang espiritu sa Diyos.​—Efeso 4:30.

⁹ Ang lamesa sa pasundayag nga tinapay nagpahinumdom sa dakong panon nga aron magpabiling himsog sa espirituwal, kinahanglang regular silang mokaon sa espirituwal nga pagkaon gikan sa Bibliya ug sa mga publikasyon sa “kasaligan ug mabuot nga ulipon.” (Mateo 4:4) Ang halaran sa insenso nagpahinumdom kanila sa bili sa madasigong pag-ampo kang Jehova alang sa tabang aron padayong mahuptan ang ilang integridad. (Lucas 21:36) Ang ilang mga pag-ampo angayng maglakip sa kinasingkasing nga mga kapahayagan sa pagdayeg ug pagpasalamat. (Salmo 106:1) Ang halaran sa insenso nagpahinumdom usab kanila sa panginahanglan nga dayegon ang Diyos sa ubang mga paagi, sama nga pinaagi sa ilang tibuok-kasingkasing nga pag-awit ug mga alawiton sa Gingharian panahon sa Kristohanong mga tigom ug pinaagi sa ilang pag-andam pag-ayo aron makahimog epektibong “pagpahayag diha sa dayag alang sa kaluwasan.”​—Roma 10:10.

Ang Hingpit nga Kadaogan sa Matuod nga Pagsimba

10. (a) Makapanlantaw kita sa unsang dakong kalaoman sa unahan? (b) Unsang kaugmaran ang kinahanglang mahitabo una?

¹⁰ Karong adlawa “daghang mga katawhan” gikan sa tanang nasod nagaganayan ngadto sa balay sa pagsimba ni Jehova. (Isaias 2:2, 3) Sa paglig-on niini, ang Pinadayag 15:4 nag-ingon: “Kinsa ba gayod ang dili mahadlok kanimo, Jehova, ug magahimaya sa imong ngalan, tungod kay ikaw lamang ang maunongon? Kay ang tanang kanasoran manganhi ug mosimba kanimo, tungod kay ang imong matarong nga mga mando gikapadayag.” Ang Zacarias kapitulo 14 nagbatbat kon unsay mosunod. Sa duol nga umaabot, ang daotang tinamdan sa kinabag-an sa katawhan sa yuta modangat sa kinatayuktokan samtang sila magkatigom sa kataposang panahon aron sa pagpakiggubat sa Jerusalem​—ang mga hawas sa langitnong Jerusalem diha sa yuta. Unya si Jehova molihok na. Ingong Manggugubat-Diyos, siya “moasdang gayod ug makiggubat batok nianang mga nasod” nga mangahas sa paghimo sa maong pagsulong.​—Zacarias 14:2, 3.

11, 12. (a) Sa unsang paagi si Jehova mosanong ngadto sa umaabot tibuok-yutang pag-atake sa mga magsisimba diha sa iyang templo? (b) Unsa unya ang sangpotanan sa gubat sa Diyos?

¹¹ “Mapamatud-an unya kini nga mao ang hampak nga igahampak ni Jehova sa tanang mga katawhan nga makiggubat gayod batok sa Jerusalem: Mangadunot unya ang unod sa usa, samtang siya nagatindog pa; ug ang iyang mga mata mangadunot samtang anaa pa sa ilang mga luyak, ug ang iyang dila mismo madunot diha sa iyang baba. Ug mahitabo gayod nianang adlawa nga ang kaguliyang gikan ni Jehova mokaylap sa ilang taliwala; ug sila magakupot gayod, ang matag usa sa kamot sa iyang kauban, ug ang iyang kamot mobakyaw gayod batok sa kamot sa iyang kauban.”​—Zacarias 14:12, 13.

¹² Kon kaha kining hampaka literal o masambingayon, kinahanglang kita magpaabot. Bisan pa niana, usa ka butang ang tino. Samtang ang mga kaaway sa Diyos nagapadulong sa paghimo sa ilang tibuok-yutang pag-atake sa mga alagad ni Jehova, sila pahunongon sa talagsaong mga pasundayag sa labing dakong gahom sa Diyos. Pahilomon ang ilang mga baba. Mahisama unya kana nga daw ang ilang mga dila sa pagkamasukolon nadunot. Ang ilang nahiusang tumong mahanap sa ilang panan-aw, nga samag ang ilang mga mata nadunot. Ang ilang lawasnong mga kusog, nga maoy nagpaisog kanila aron sa pag-atake, maluya. Sa kalibog, sila mag-unay sa pag-atake sa usag usa uban sa dakong pagpinatyanay. Sa ingon ang tanang yutan-ong mga kaaway sa pagsimba sa Diyos malaglag. Sa kataposan, ang tanang nasod mapugos sa pag-ila sa unibersohanong pagkamagmamando ni Jehova. Ang tagna matuman na: “Si Jehova magahari gayod ibabaw sa tibuok yuta.” (Zacarias 14:9) Human niana, si Satanas ug ang iyang mga demonyo pagagaposon samtang ang Usa ka Libo ka Tuig nga Paghari ni Kristo mosugod uban ang dagkong mga panalangin nga gitagana alang sa katawhan.​—Pinadayag 20:1, 2; 21:3, 4.

Ang Yutan-ong Pagkabanhaw

13. Kinsa ang “nahibilin sa tanang nasod”?

¹³ Ang tagna ni Zacarias nagpadayon sa kapitulo 14, bersikulo 16: “Mahitabo gayod nga, mahitungod sa tanan nga nahibilin sa tanang nasod nga nagaanha batok sa Jerusalem, sila kinahanglan usab nga motungas sa tuigtuig aron sa pagyukbo ngadto sa Hari, si Jehova sa mga panon, ug aron sa pagsaulog sa piyesta sa mga balongbalong.” Sumala sa Bibliya, ang tanang tawo nga buhi karong adlawa nga nagpadayong buhi hangtod sa kataposan niining tuman-kadaotang sistema ug nga nagpabiling mga kaaway sa matuod nga pagsimba makaagom sa “hudisyal nga silot sa kalaglagang walay-kataposan.” (2 Tesalonica 1:7-9; tan-awa usab ang Mateo 25:31-33, 46.) Sila dili pagabanhawon. Nan, lagmit nga ang mga “nahibilin” naglakip sa mga membro sa mga nasod nga namatay una pa sa kataposang gubat sa Diyos ug alang kanila adunay gipasukad-sa-Bibliya nga paglaom sa pagkabanhaw. “Ang takna nagasingabot,” misaad si Jesus, “diin kadtong tanan nga anaa sa handomanang mga lubnganan makadungog sa iyang tingog ug managpanggula, kadtong mga nagbuhat ug maayong mga butang ngadto sa pagkabanhaw sa kinabuhi, kadtong mga nagbuhat ug ngil-ad nga mga butang ngadto sa pagkabanhaw sa paghukom.”​—Juan 5:28, 29.

14. (a) Unsay pagabuhaton sa mga binanhaw aron makabaton ug kinabuhing walay kataposan? (b) Unsay mahitabo kang bisan kinsa nga modumili sa pagpahinungod sa ilang kaugalingon kang Jehova ug pagtuman sa matuod nga pagsimba?

¹⁴ Kanang tanang binanhaw kinahanglang may buhaton aron ang ilang pagkabanhaw mosangpot nga pagkabanhaw sa kinabuhi ug dili sa daotang paghukom. Kinahanglang sila mosulod sa yutan-ong mga sawang sa templo ni Jehova ug moyukbo diha sa pagpahinungod ngadto sa Diyos pinaagi ni Jesu-Kristo. Si bisan kinsang mga binanhaw nga dili mohimo niini makaagom sa samang hampak nga naagoman sa kanasoran karon. (Zacarias 14:18) Kinsay nasayod kon pila ang mga binanhaw nga malipayong moduyog sa dakong panon sa pagsaulog sa antitipikong Piyesta sa mga Balongbalong? Sa walay duhaduha, adunay daghan unya, ug ang dakong espirituwal nga templo ni Jehova mahimong labi pang mahimayaon ingong sangpotanan niana!

Ang Antitipikong Piyesta sa mga Balongbalong

15. (a) Unsa ang pipila ka talagsaong mga bahin sa karaang Israelinhong Piyesta sa mga Balongbalong? (b) Nganong 70 ka laking baka ang gitanyag sulod sa piyesta?

¹⁵ Kada tuig, ang karaang Israel gibaoran nga magsaulog sa Piyesta sa mga Balongbalong. Kadto milungtad ug usa ka semana ug natapos sa paghipos sa ilang ani. Usa kadto ka masadyaong panahon sa pagpasalamat. Sulod sa semana, kinahanglang magpuyo sila sa temporaryong mga puy-anan nga inaptan ug mga dahon sa kakahoyan, ilabina ang mga palwa sa palma. Ang maong piyesta nagpahinumdom sa Israel kon giunsa sa Diyos pagluwas ang ilang mga katigulangan gikan sa Ehipto ug giunsa niya pag-atiman sila samtang sila nagpuyo sa mga balongbalong samtang naglaaglaag sulod sa 40 ka tuig sa kamingawan hangtod nga sila nakaabot sa Yutang Saad. (Levitico 23:39-43) Panahon sa piyesta, 70 ka laking baka ang gihalad ibabaw sa halaran sa templo. Dayag, kining bahina sa piyesta matagnaon sa hingpit ug kompletong nagaluwas-kinabuhi nga buluhatong gihimo ni Jesu-Kristo. Ang mga kaayohan sa iyang halad lukat sa ngadtongadto moagos ngadto sa daghang kaliwat sa 70 ka pamilya sa katawhan nga naggikan ni Noe.​—Genesis 10:1-29; Numeros 29:12-34; Mateo 20:28.

16, 17. (a) Kanus-a nagsugod ang antitipikong Piyesta sa mga Balongbalong, ug sa unsang paagi kana nagpadayon? (b) Sa unsang paagi ang dakong panon nakig-ambit sa pagsaulog?

¹⁶ Busa ang karaang Piyesta sa mga Balongbalong mipunting sa malipayong pagkatigom sa nalukat nga mga makasasala ngadto sa dakong espirituwal nga templo ni Jehova. Ang katumanan niining piyestaha nagsugod sa Pentekostes sa 33 K.P. duyog sa pagsugod sa malipayong pagtigom sa espirituwal nga mga Israelinhon nganha sa Kristohanong kongregasyon. (Buhat 2:41, 46, 47) Ang maong mga dinihogan nag-ila nga sila “mga temporaryong pumoluyo” sa kalibotan ni Satanas tungod kay ang ilang tinuod nga “pagkalungsoranon nagalungtad sa mga langit.” (1 Pedro 2:11; Filipos 3:20) Ang malipayong piyesta temporaryong nahawngan sa apostasya nga misangpot sa pagkaporma sa Kakristiyanohan. (2 Tesalonica 2:1-3) Bisan pa niana, ang piyesta nagpadayon sa 1919 duyog sa malipayong pagtigom sa nahibiling mga membro sa 144,000 espirituwal nga mga Israelinhon, nga gisundan sa mga membro sa internasyonal nga dakong panon sa Pinadayag 7:9.

¹⁷ Ang dakong panon gihulagway ingong nagkupot ug mga palwa sa palma diha sa ilang mga kamot, nga nagpakitang sila usab malipayong mga tigsaulog sa antitipikong Piyesta sa mga Balongbalong. Ingong nagpahinungod nga mga Kristohanon, sila malipayong nakig-ambit sa buluhatong pagtigom ug mas daghang mga magsisimba nganha sa templo ni Jehova. Dugang pa, ingong mga makasasala, ilang giila nga sila walay permanenteng mga katungod sa pagpuyo sa yuta. Sila, kauban sa umaabot nga mga binanhaw, kinahanglang magpadayon sa pagpakitag pagtuo diha sa halad lukat ni Kristo hangtod nga sila mahidangat sa tawhanong kahingpitan sa kataposan sa Usa ka Libo ka Tuig nga Pagmando ni Kristo.​—Pinadayag 20:5.

18. (a) Unsay mahitabo sa kataposan sa Usa ka Libo ka Tuig nga Pagmando ni Jesu-Kristo? (b) Sa unsang paagi ang matuod nga pagsimba kang Jehova sa kataposan magmadaogon?

¹⁸ Sa maong panahon, ang mga magsisimba sa Diyos sa yuta mobarog atubangan niya diha sa tawhanong kahingpitan nga dili na magkinahanglag langitnong pagkasaserdote. Ang panahon moabot na unya sa dihang si Jesu-Kristo ‘magatugyan sa gingharian ngadto sa iyang Diyos ug Amahan.’ (1 Corinto 15:24) Si Satanas buhian “sa diyutayng panahon” aron sa pagsulay sa nahingpit nang katawhan. Si bisan kinsa nga dili matinumanon pagalaglagon sa walay kataposan, kauban ni Satanas ug sa iyang mga demonyo. Kadtong magpabiling matinumanon pagahatagag kinabuhing walay kataposan. Sila mahimong permanenteng mga molupyo sa yutan-ong Paraiso. Sa ingon ang antitipikong Piyesta sa mga Balongbalong modangat sa mahimayaon, malamposong kataposan. Ang matuod nga pagsimba magmadaogon sa walay-kataposang himaya ni Jehova ug dumalayong kalipay sa katawhan.​—Pinadayag 20:3, 7-10, 14, 15.

[Mga footnote]

Mga Pangutana Agig Pagsubli

◻ Sa unsang paagi ang “Jerusalem” giatake panahon sa unang gubat sa kalibotan?​—Zacarias 14:2.

◻ Unsay nahitabo sa katawhan sa Diyos sukad 1919?

◻ Kinsa karong adlawa ang nakig-ambit sa pagsaulog sa antitipikong Piyesta sa mga Balongbalong?

◻ Sa unsang paagi ang matuod nga pagsimba sa hingpit magmadaogon?

[Hulagway sa panid 23]

Ang mga palwa sa palma gigamit sa pagsaulog sa Piyesta sa mga Balongbalong