Gamitang Maalamon ang Imong Kristohanong Kagawasan

“Mahimong sama sa katawhang may kagawasan, apan naghupot sa inyong kagawasan . . . ingong mga ulipon sa Diyos.”​—1 PEDRO 2:16.

 1. Unsang kagawasan ang giwala ni Adan, ug sa unsang kagawasan igapasig-uli ni Jehova ang katawhan?

SA NAKASALA ang atong unang mga ginikanan sa tanaman sa Eden, ilang giwala alang sa ilang mga anak ang usa ka panulondong mahimayaon​—ang kagawasan gikan sa sala ug kadunotan. Ingong sangpotanan, kitang tanan nangatawo nga mga ulipon sa kadunotan ug sa kamatayon. Hinuon, ikalipay, katuyoan ni Jehova nga ipasig-uli ang matinuohong mga tawo ngadto sa usa ka kahibulongang kagawasan. Karong adlawa, ang mga tawong matarong ug kasingkasing maikagong nagapaabot sa “pagpadayag sa mga anak sa Diyos,” nga sangpotanan niana mao nga sila “mahigawas sa pagkaulipon sa kadunotan ug magbaton sa mahimayaong kagawasan sa mga anak sa Diyos.”​—Roma 8:19-21.

‘Gidihogan Aron sa Pagwali’

 2, 3. (a) Kinsa “ang mga anak sa Diyos”? (b) Unsang kahibulongang pagbarog ang ilang gitagamtam, nga nagdala sa unsang kaakohan?

² Kinsa ba kining “mga anak sa Diyos”? Sila mao ang dinihogan-sa-espiritung mga igsoon ni Jesus nga mahimong iyang kaubang mga magmamando sa langitnong Gingharian. Una niini kanila mitungha sa unang siglo K.P. Sila midawat sa magpagawas nga kamatuoran nga gitudlo ni Jesus, ug sukad sa Pentekostes 33 K.P., sila nakig-ambit sa mahimayaong mga pribilehiyo nga gihisgotan ni Pedro sa dihang siya misulat kanila: “Kamo ‘usa ka piniling banay, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya.’”​—1 Pedro 2:9a; Juan 8:32.

³ Mahimong panag-iyahon sa linain sa Diyos​—kahibulongan gayod nga panalangin! Ug ang modernong-adlawng nahibilin ning dinihogang mga anak sa Diyos nagtagamtam ug samang bulahang pagbarog uban sa Diyos. Apan uban nianang binayaw nga pribilehiyo moabot ang mga kaakohan. Giawhag ni Pedro sa pagtagad ang usa nianang maong mga kaakohan sa mipadayon siya sa pag-ingon: “‘Angay ninyong igamantala sa halayo ang mga kahalangdon’ sa usa nga nagtawag kaninyo gikan sa kangitngit ngadto sa iyang katingalahang kahayag.”​—1 Pedro 2:9b.

 4. Sa unsang paagi gituman sa dinihogang mga Kristohanon ang kaakohan nga nagauban sa ilang Kristohanong kagawasan?

⁴ Gituman ba sa dinihogang mga Kristohanon ang maong kaakohan sa pagmantala sa halayo sa mga kahalangdon sa Diyos? Oo. Sa paghisgot nga matagnaon sa mga dinihogan sukad sa 1919, si Isaias miingon: “Ang espiritu sa Soberano Ginoong Jehova ania kanako, tungod kay gidihogan ako ni Jehova sa pagpahayag sa maayong balita ngadto sa mga maaghop. Ako gipadala niya aron sa pagbugkos sa mga dugmok ug kasingkasing, aron sa pagmantala ug kagawasan ngadto sa mga binihag ug sa pag-abli ug dako sa mga mata bisan alang sa mga binilanggo; sa pagmantala sa tuig sa maayong kabubut-on sa bahin ni Jehova ug sa adlaw sa panimalos sa bahin sa atong Diyos.” (Isaias 61:1, 2) Karong adlawa, ang dinihogang nahibilin, sa pagsunod sa panig-ingnan ni Jesus, nga kaniya pangunang mapadapat kining kasulatana, madasigong nagpahayag sa uban sa maayong balita sa kagawasan.​—Mateo 4:23-25; Lucas 4:14-21.

 5, 6. (a) Unsay misangpot sa madasigong pagwali sa dinihogang mga Kristohanon? (b) Unsang mga pribilehiyo ug mga kaakohan ang natagamtam sa mga sakop sa dakong panon?

⁵ Ingong sangpotanan sa ilang madasigong pagwali, ang usa ka dakong panon sa ubang mga karnero mitungha sa talan-awon sa kalibotan niining hinapos nga mga adlaw. Sila nanggula sa tanang nasod aron moduyog sa mga dinihogan sa pag-alagad kang Jehova, ug ang kamatuoran naghatag usab kanila ug kagawasan. (Zacarias 8:23; Juan 10:16) Sama kang Abraham sila gipahayag nga matarong pinasukad sa pagtuo ug nahisulod sa suod nga relasyon uban kang Jehova nga Diyos. Ug sama kang Rahab ang ilang pagkagipahayag nga matarong nagpalinya kanila alang sa kaluwasan​—sa ilang kahimtang, ang paglabang-buhi sa Armageddon. (Santiago 2:23-25; Pinadayag 16:14, 16) Apan ang maong binayaw nga mga pribilehiyo naglangkit usab sa kaakohan sa pagsulti sa uban mahitungod sa himaya sa Diyos. Kana ang hinungdan sila nakita ni Juan nga sa dayag nagdayeg kang Jehova, “nga nagsinggit uban sa makusog nga tingog, nga nag-ingon: ‘Ang kaluwasan nautang namo sa among Diyos, kinsa naglingkod sa trono, ug sa Kordero.’”​—Pinadayag 7:9, 10, 14.

⁶ Sa miaging tuig ang dakong panon, nga karon may gidaghanon nga kapig upat ka milyon, uban sa gamayng nahibiling pundok sa dinihogang mga Kristohanon, migugol ug halos usa ka bilyong oras nga nagmantala sa halayo sa mga kahalangdon ni Jehova. Kadto ang labing maayo posibleng paggamit sa ilang espirituwal nga kagawasan.

“Pasidunggi ang Hari”

 7, 8. Unsang kaakohan ngadto sa sekular nga awtoridad ang nalangkit sa Kristohanong kagawasan, ug niining bahina, unsang sayop nga tinamdan ang kinahanglang atong likayan?

⁷ Ang atong Kristohanong kagawasan naglangkit sa ubang mga kaakohan. Si Pedro mipunting sa pipila sa misulat siya: “Pasidunggi ninyo ang mga tawo sa tanang matang, higugmaa ang tibuok nga kapunongan sa mga igsoon, kahadloki ang Diyos, pasidunggi ang hari.” (1 Pedro 2:17) Unsay gipasabot sa pamulong “pasidunggi ang hari”?

⁸ “Ang hari” naghawas sa sekular nga mga magmamando. Karong adlawa, ang espiritu sa pagkadili-matinahoron sa awtoridad naugmad sa kalibotan, ug kini daling makaapektar sa mga Kristohanon. Ang Kristohanon tingali mahibulong nganong angay niyang pasidunggan “ang hari,” sanglit “ang tibuok nga kalibotan nahiluna sa gahom sa usang daotan.” (1 Juan 5:19) Tungod niining mga pulonga, basin mobati siyang may kagawasan sa pagsupak sa dili-kombenyenteng mga balaod ug dili ihatag ang buhis kon siya dili matiktikan. Apan kana maoy supak sa tin-awng sugo ni Jesus nga “ibayad . . . ang mga butang ni Cesar kang Cesar.” Sa pagkatinuod, kana maoy ‘paggamit sa iyang kagawasan ingong takoban sa pagkadaotan.’​—Mateo 22:21; 1 Pedro 2:16.

 9. Unsa ang duha ka maayong hinungdan sa pagkamasinugtanon sa sekular nga awtoridad?

⁹ Ang mga Kristohanon obligado nga magpasidungog sa awtoridad ug magpasakop niana​—bisan pag kini sa relatibo o igoigo nga paagi. (Buhat 5:29) Ngano? Sa 1 Pedro 2:14, 15, si Pedro mipunting sa tulo ka hinungdan sa dihang siya miingon nga ang mga magmamando “gipadala sa [Diyos] aron sa pagsilot sa mga mamumuhat ug daotan apan sa pagdayeg sa mga mamumuhat ug maayo.” Ang kahadlok sa silot maoy igong hinungdan sa pagsugot sa awtoridad. Pagkamakaulaw unya nga ang usa ka Saksi ni Jehova mamultahan o mabilanggo tungod sa pagpangatake, pangawat, o ubang krimen! Hunahunaa unsa ka dako sa kahimuot sa pipila nga imantala kana! Sa laing bahin, samtang maugmad nato ang dungog sa pagkamasinugtanon sa gobyerno, madawat nato ang pagdayeg gikan sa makiangayong mga administrador. Kita tingali hatagan pag dugang kagawasan sa pagtuman sa atong buluhaton sa pagwali sa maayong balita. Dugang pa, ‘pinaagi sa pagbuhat ug maayo atong mapahilom ang walay-alamag nga sinultihan sa mga tawong walay salabotan.’ (1 Pedro 2:15b) Kini ikaduhang hinungdan sa pagsugot sa awtoridad.​—Roma 13:3.

10. Unsa ang labing lig-ong hinungdan sa pagsugot sa sekular nga awtoridad?

¹⁰ Apan adunay labi pang dakong hinungdan. Ang mga awtoridad nagalungtad tungod sa pagtugot ni Jehova. Sumala sa giingon ni Pedro, ang politikanhong mga magmamando “gipadala” ni Jehova, ug mao “ang kabubut-on sa Diyos” nga ang mga Kristohanon magpabiling nagapasakop kanila. (1 Pedro 2:15a) Sa susamang paagi, si apostol Pablo miingon: “Ang nagalungtad nga mga pagbulot-an nahimutang diha sa ilang angay nga dapit pinaagi sa Diyos.” Busa, ang atong nabansay-sa-Bibliya nga konsensiya magtukmod kanato sa pagsugot sa mga awtoridad. Kon modumili kita sa pagpasakop kanila, kita “nagasupak sa kahikayan sa Diyos.” (Roma 13:1, 2, 5) Kinsa kanato ang kinabubut-ong magtinguha sa pagsupak sa kahikayan sa Diyos? Pagkasayop gayod kana nga paggamit sa Kristohanong kagawasan!

‘Higugmaa ang mga Igsoon’

11, 12. (a) Unsang kaakohan ngadto sa isigkamagtutuo ang nagauban sa atong Kristohanong kagawasan? (b) Kinsa ilabina ang angayan sa atong mahigugmaong konsiderasyon, ug ngano?

¹¹ Si Pedro miingon usab nga ang usa ka Kristohanon angay nga “mahigugma sa tibuok kapunongan sa mga igsoon.” (1 Pedro 2:17) Kini laing kaakohan nga nagauban sa Kristohanong kagawasan. Kadaghanan kanato sakop sa usa ka kongregasyon. Sa pagkatinuod, tanan kita sakop sa internasyonal nga asosasyon, o organisasyon, sa mga igsoon. Ang pagpakitag gugma kanila maoy maalamong paggamit sa atong kagawasan.​—Juan 15:12, 13.

¹² Gipunting ni apostol Pablo ang usa ka pundok sa mga Kristohanon nga angay ilabina sa atong gugma. Matud niya: “Magmasinugtanon kamo sa mga nagapanguna kaninyo ug magpasakop, kay sila nagabantay sa inyong mga kalag sama niadtong magahatag ug husay; aron sila magbuhat niini uban sa kalipay ug dili uban sa panghayhay, kay kini makadaot kaninyo.” (Hebreohanon 13:17) Kadtong nagapanguna sa kongregasyon mao ang mga ansiano. Tinuod, kining mga tawhana dili hingpit. Bisan pa niana, sila gitudlo ubos sa pagdumala sa Nagamandong Lawas. Sila nagapanguna pinaagi sa panig-ingnan ug uban ang pagkamay-konsiderasyon, ug sila gitudlo sa pagbantay sa atong mga kalag. Pagkabug-at nga buluhaton! (Hebreohanon 13:7) Ikalipay, kadaghanang kongregasyon adunay maayo, matinabangon nga espiritu, ug kalipay sa mga ansiano ang pagbuhat uban kanila. Labaw nga lisod sa dihang ang mga indibiduwal dili buot motimbayayong. Ang ansiano nagabuhat gihapon sa iyang buluhaton, apan sumala sa giingon ni Pablo, siya nagabuhat niana uban sa “panghayhay.” Tino, dili nato buot nga manghayhay ang mga ansiano! Buot nato nga malipay sila sa ilang buluhaton aron sila makapalig-on kanato.

13. Unsa ang pila ka paagi nga niana kita makatambayayong sa mga ansiano?

¹³ Unsa ang pila ka paagi nga niana kita makatambayayong sa mga ansiano? Usa maoy sa pagtabang sa mentenasyon ug paghinlo sa Kingdom Hall. Ang lain maoy pinaagi sa pagtambayayong diha sa buluhaton sa pagduaw sa mga masakiton ug pagtabang sa mga baldado. Dugang pa, kita makapanlimbasog nga magpabiling lig-on sa espirituwal, aron dili mahimong kabug-at. Usa ka hinungdanong bahin sa pagtambayayong maoy diha sa paghupot sa moral ug espirituwal nga kahinlo sa kongregasyon, pinaagi sa atong kagawian mismo ug pinaagi sa pagtaho sa mga kaso sa seryosong sala nga atong mahibaloan.

14. Sa unsang paagi kita angay makigtambayayong sa pagdisiplina nga himoon sa mga ansiano?

¹⁴ Usahay, aron mahuptang hinlo ang kongregasyon, ang mga ansiano kinahanglang magpalagpot sa usa ka dili-mahinulsolong mamumuhat ug daotan. (1 Corinto 5:1-5) Kini nagapanalipod sa kongregasyon. Kini basin makatabang usab sa mamumuhat ug daotan. Kasagaran, ang maong disiplina nagatabang sa pagpasig-uli sa makasasala sa iyang maayong kaisipan. Nan, komosta man kon ang gipalagpot usa ka suod nga higala o paryente? Pananglitan ang indibiduwal mao ang atong amahan o inahan o atong anak lalaki o anak babaye. Ato ba gihapong tahoron ang aksiyon nga gihimo sa mga ansiano? Tinuod, kini tingali lisod. Apan dako kaayong pag-abusar sa atong kagawasan ang pagkuwestiyon sa desisyon sa mga ansiano ug magpadayon sa pagpakig-uban sa espirituwal nga paagi sa usa nga napamatud-ang daotang impluwensiya diha sa kongregasyon! (2 Juan 10, 11) Ang katawhan ni Jehova sa katibuk-an pagadayegon tungod sa ilang pagtambayayong sa maong mga butang. Ingong sangpotanan, ang organisasyon ni Jehova nagapabiling wala mahugawi niining mahugaw nga kalibotan.​—Santiago 1:27.

15. Kon ang usa ka indibiduwal makahimog seryosong sala, unsay angay niyang buhaton dayon?

¹⁵ Unsa man kon kita makahimog seryosong sala? Si Haring David nagbatbat niadtong giuyonan ni Jehova sa miingon siya: “Kinsa ang makatungas sa bukid ni Jehova, ug kinsa ang makatindog diha sa iyang balaan nga dapit? Si bisan kinsa nga walay sala sa iyang mga kamot ug mahinlo sa kasingkasing, kinsa wala magdala sa Akong kalag ngadto sa kawalay-kapuslanan, ni nanumpa nga malimbongon.” (Salmo 24:3, 4) Kon tungod sa usa ka hinungdan kita dili na ‘walay sala sa atong mga kamot ug mahinlo sa kasingkasing,’ kinahanglang kita molihok dayon. Nameligro ang atong kinabuhing walay kataposan.

16, 17. Nganong ang usa nga sad-an sa seryosong mga sala dili angay magsulbad sa butang sa iyang kaugalingon?

¹⁶ Ang pipila natental sa pagtago sa seryosong mga sala, tingali mangatarongan: ‘Ako misugid na kang Jehova ug naghinulsol. Busa nganong ilangkit pa ang mga ansiano?’ Ang mamumuhat ug daotan tingali maulaw o mahadlok kon unsay buhaton sa mga ansiano. Bisan pa niana, angay siyang mahinumdom nga bisan pag si Jehova lamang ang makahinlo kanato sa sala, Siya naghimo sa mga ansiano nga sa panguna maoy responsable sa kahinlo sa kongregasyon. (Salmo 51:2) Sila anaa dinha alang sa pagpang-ayo, alang sa “pagpasibo sa mga balaan.” (Efeso 4:12) Ang dili pagduol kanila sa dihang gikinahanglan nato ang espirituwal nga tabang maoy sama sa dili pag-adto sa doktor sa dihang kita may sakit.

¹⁷ Ang pipila nga nagasulay sa pagsulbad sa mga butang nga siyasiya ra makadiskobre nga sa mga bulan o mga tuig sa ulahi, gitulisok gihapon sila sa ilang konsensiya. Grabe pa, ang uban nga nagatago ug seryosong sala mahulog sa sala sa ikaduha ug ikatulo pang beses. Sa dihang ang butang sa kataposan mahibaloan sa mga ansiano, kini maoy kaso sa gisublisubli nga pagbuhat ug daotan. Pagkalabi pang maayo ang pagsunod sa tambag ni Santiago! Misulat siya: “May nagmasakiton ba kaninyo? Ipatawag niya ang mga ansiano sa kongregasyon, ug papaampoa sila ibabaw kaniya, nga magadihog kaniya sa lana diha sa ngalan ni Jehova.” (Santiago 5:14) Duol sa mga ansiano samtang may panahon pa sa pagkaayo. Kon mohulat kitag dugay kaayo, basin kita magmagahion na sa buhat sa pagpakasala.​—Ecclesiastes 3:3; Isaias 32:1, 2.

Panagway ug Lulinghayaw

18, 19. Nganong ang usa ka pari nakadayeg sa mga Saksi ni Jehova?

¹⁸ Lima ka tuig kanhi, sa usa ka magasin sa parokya, usa ka Katolikong pari sa Italya midayeg sa mga Saksi ni Jehova.a Matud niya: “Sa personal, moangay ako sa mga Saksi ni Jehova; ako dayag nagaadmitir niini. . . . Ang mga nailhan nako maayog pamatasan, lumong manulti . . . [ug] labing makapadani. Kanus-a ba nato hisabti nga ang kamatuoran nagkinahanglag dalawaton nga panagway? Nga kadtong nagapahayag sa kamatuoran kinahanglan dili taphaw, baho, kalkag ug buhok, nagkato?”

¹⁹ Sumala nianang mga pulonga, ang pari nakadayeg, apil sa ubang mga butang, sa pamiste sa mga Saksi ug sa ilang panagway. Dayag, kadtong iyang nahibalag namati sa tambag nga gihatag sa “matinumanon ug maalamong ulipon” latas sa katuigan. (Mateo 24:45) Ang Bibliya nagaingon nga ang biste alang sa mga babaye angay nga ‘maayong pagkahikay ug kasarangan.’ (1 Timoteo 2:9) Niining nagkadaot nga panahon, kanang tambaga kinahanglanon usab sa mga lalaki. Dili ba makataronganon nga ang mga hawas sa Gingharian sa Diyos angay nga desenteng tan-awon alang sa mga tagagawas?

20. Nganong ang Kristohanon angay nga magmahunahunaon sa iyang pamiste sa tanang panahon?

²⁰ Ang pipila tingali mouyon nga sa mga tigom ug sa pagsangyaw sa kanataran, sila angay magbantay sa ilang pamiste, apan tingali mobati sila nga ang mga prinsipyo sa Bibliya dili mapadapat sa ubang mga panahon. Apan, kita ba may panahong mohunong sa pagkahawas sa Gingharian sa Diyos? Tinuod, lainlain ang mga sirkumstansiya. Kon kita nagatabang sa pagtukod ug Kingdom Hall, lahi ang atong pamiste kay sa dihang nagatambong kitag tigom sa samang Kingdom Hall. Sa dihang kita nagalulinghayaw, lagmit nga kita magbiste sa mas relaks nga paagi. Apan sa dihang kita hikit-an sa uban, ang atong biste angay nga sa tanang panahon maayong pagkahikay ug kasarangan.

21, 22. Sa unsang paagi kita napanalipdan batok sa makadaot nga lulinghayaw, ug sa unsang paagi angay natong isipon ang tambag sa maong mga butang?

²¹ Ang laing bahin nga nakadawat ug dakong pagtagad mao ang lulinghayaw. Ang mga tawo​—ilabina mga batan-on—​nagkinahanglag lulinghayaw. Dili sala o pag-usik ug panahon ang pag-eskedyul ug lulinghayaw alang sa pamilya. Bisan si Jesus nagdapit sa iyang mga tinun-an nga “mopahulay sa kadiyut.” (Marcos 6:31) Apan bantayi nga ang lulinghayaw dili magbukas sa pultahan alang sa espirituwal nga kahugawan. Kita nagapuyo sa kalibotan diin ang lulinghayaw nagapasiugda sa seksuwal nga imoralidad, hinobrang kapintasan, pagkamakalilisang, ug espiritismo. (2 Timoteo 3:3; Pinadayag 22:15) Ang matinumanon ug maalamong ulipon igmat sa maong mga kapeligrohan ug kanunay nagapasidaan kanato batok kanila. Gibati ba nimo nga ang maong mga pahinumdom maoy paghilabot sa imong kagawasan? O mapasalamaton ka ba nga ang organisasyon ni Jehova may igong pagtagad kanimo sa kanunay nga pag-awhag sa imong pagtagad sa maong mga kapeligrohan?​—Salmo 19:7; 119:95.

²² Ayaw gayod kalimot nga bisan pag ang atong kagawasan nagagikan kang Jehova, kita may tulubagon kon giunsa nato kana paggamit. Kon dili kita magpakabana sa maayong tambag ug mohimog sayop nga mga desisyon, kita dili makabasol ug laing tawo. Si apostol Pablo nagaingon: “Ang matag usa kanato magahatag ug husay sa Diyos alang sa iyang kaugalingon.”​—Roma 14:12; Hebreohanon 4:13.

Pagpaabot nga Mahinamon sa Kagawasan sa mga Anak sa Diyos

23. (a) Unsang mga panalangin maylabot sa kagawasan ang ato karong gitagamtam? (b) Unsang mga panalangin ang atong maikagong gipaabot?

²³ Kita sa tinuod maoy bulahang katawhan. Kita may kagawasan gikan sa bakak nga relihiyon ug patuotuo. Salamat sa halad lukat, kita makaduol kang Jehova uban sa hinlong konsensiya, nga nahigawas sa espirituwal nga paagi gikan sa pagkaulipon sa sala ug kamatayon. Ug sa dili madugay moabot “ang pagpadayag sa mga anak sa Diyos.” Sa Armageddon, ang mga igsoon ni Jesus diha sa ilang langitnong himaya igapadayag sa mga tawo ingong mga tiglaglag sa mga kaaway ni Jehova. (Roma 8:19; 2 Tesalonica 1:6-8; Pinadayag 2:26, 27) Human niana, ang maong mga anak sa Diyos igapadayag ingong mga kanal alang sa mga panalangin nga moagos gikan sa trono sa Diyos ngadto sa katawhan. (Pinadayag 22:1-5) Sa ngadtongadto, ang maong pagpadayag sa mga anak sa Diyos mosangpot sa pagpanalangin sa matinumanong katawhan sa mahimayaong kagawasan sa mga anak sa Diyos. Gipangandoy mo ba ang maong panahon? Nan gamitang maalamon ang imong Kristohanong kagawasan. Magpaulipon sa Diyos karon, ug imong matagamtam kanang kahibulongang kagawasan hangtod sa hangtod!

[Footnote]

Kahon sa Pagsubli

◻ Sa unsang paagi ang dinihogan ug ang ubang mga karnero naghimaya kang Jehova?

◻ Nganong ang mga Kristohanon magpasidungog sa sekular nga awtoridad?

◻ Sa unsang mga paagi ang usa ka Kristohanon makatambayayong sa mga ansiano?

◻ Mahitungod sa pamiste, nganong ang mga Saksi ni Jehova lahi sa daghan sa kalibotan?

◻ Unsay atong pagalikayan kon mahitungod sa lulinghayaw?

[Hulagway sa panid 17]

Ang mga ansiano angay ilabina sa atong gugma ug pakigtambayayong

[Hulagway sa panid 18]

Ang biste sa usa ka Kristohanon angay nga maayong pagkahikay, kasarangan, ug nahiangay sa okasyon