Kapitulo Bayente-dos
Ang Pagkamatarong Moturok sa Zion
1, 2. Unsang kausaban ang hapit nang mahitabo sa Israel, ug kinsay magpahinabo niini?
IPAMANTALA ang kagawasan! Gihukom ni Jehova nga pagawson ang iyang katawhan ug ipasig-uli sila ngadto sa yuta sa ilang katigulangan. Sama sa binhi nga moturok human sa taligsik, ang matuod nga pagsimba mogimaw pag-usab. Inig-abot nianang adlawa, ang kaguol pulihan ug malipayong pagdayeg, ug ang mga ulo nga napunog abo sa pagbangotan sa nangagi mapurongan sa balaang pag-uyon.
2 Kinsay magpahinabo niining kahibulongang kausaban? Si Jehova lang ang makahimo niana. (Salmo 9:19, 20; Isaias 40:25) Ang manalagnang Sofonias matagnaong nagsugo: “Hugyaw sa kalipay, Oh anak nga babaye sa Zion! Singgit sa kasadya, Oh Israel! Pagmaya ug pagsadya sa bug-os nga kasingkasing, Oh anak nga babaye sa Jerusalem! Gikuha ni Jehova ang mga paghukom gikan kanimo.” (Sofonias 3:14, 15) Pagkamalipayon unya ang maong panahon! Sa dihang tigomon ni Jehova ang napasig-uling nahibilin gikan sa Babilonya sa 537 W.K.P., kini mahisama sa usa ka damgo nga natuman.—Salmo 126:1.
3. Unsay mga katumanan sa matagnaong mga pulong sa Isaias kapitulo 61?
3 Ang maong pagpasig-uli gitagna sa Isaias kapitulo 61. Bisan pa niana, samtang ang maong tagna tin-awng may katumanan sa 537 W.K.P., kini natuman nga mas detalyado sa ulahing yugto. Ang mas detalyadong katumanan naglangkit kang Jesus ug sa iyang mga sumusunod sa unang siglo ug sa katawhan ni Jehova sa modernong mga panahon. Nan, pagkahinungdanon ang maong dinasig nga mga pulong!
“Ang Tuig sa Maayong Kabubut-on”
4. Kinsay gisugo sa pagsulti sa maayong balita sa unang katumanan sa Isaias 61:1, ug kinsa sa ikaduha?
4 Si Isaias nagsulat: “Ang espiritu sa Soberanong Ginoong Jehova ania kanako, tungod kay si Jehova nagdihog kanako sa pagsulti sa maayong balita ngadto sa mga maaghop. Siya nagpadala kanako aron sa pagbugkos sa mga may gun-ob nga kasingkasing, sa pagmantala ug kagawasan niadtong mga gidalang binihag ug sa pagpabuka pag-ayo sa mga mata bisan sa mga binilanggo.” (Isaias 61:1) Kinsay gisugo sa pagsulti sa maayong balita? Kalagmitan, sa unang higayon mao si Isaias, kinsa gidasig sa Diyos nga isulat ang maayong balita alang sa mga binihag sa Babilonya. Bisan pa niana, si Jesus mipunting sa labing hinungdanong katumanan sa gipadapat niya ang mga pulong ni Isaias sa iyang kaugalingon. (Lucas 4:16-21) Oo, si Jesus gipadala aron isulti ang maayong balita ngadto sa mga maaghop, ug sa maong katuyoan siya gidihogan sa balaang espiritu panahon sa iyang bawtismo.—Mateo 3:16, 17.
5. Kinsay nagsangyaw sa maayong balita sulod na sa mga 2,000 ka tuig?
5 Dugang pa, si Jesus nagtudlo sa iyang mga sumusunod nga mahimong mga tig-ebanghelyo, o mga magwawali sa maayong balita. Sa Pentekostes 33 K.P., mga 120 kanila gidihogan sa balaang espiritu ug nahimong espirituwal nga mga anak sa Diyos. (Buhat 2:1-4, 14-42; Roma 8:14-16) Sila usab gisugo sa pagsulti sa maayong balita ngadto sa mga maaghop ug may gun-ob nga kasingkasing. Kadtong 120 mao ang una sa 144,000 nga gidihogan sa maong paagi. Ang mga nahibilin niining grupoha aktibo pa sa yuta karong adlawa. Busa, sulod na sa mga 2,000 ka tuig, ang dinihogang mga sumusunod ni Jesus nagsangyaw “mahitungod sa paghinulsol ngadto sa Diyos ug sa pagtuo diha sa atong Ginoong Jesus.”—Buhat 20:21.
6. Kinsay nahupayan sa pagkadungog sa maayong balita nga gisangyaw sa karaang mga panahon, ug komosta karong adlawa?
6 Ang dinasig nga mensahe ni Isaias naghatag ug kahupayan sa mahinulsolong mga Hudiyo sa Babilonya. Sa mga adlaw ni Jesus ug sa iyang mga tinun-an, kadto nagdalag kahupayan sa mga Hudiyo, kinsa may gun-ob nga kasingkasing tungod sa pagkadaotan sa Israel ug nag-antos sa pagkabinihag sa bakak nga relihiyosong mga tradisyon sa Hudaismo sa unang siglo. (Mateo 15:3-6) Karong adlawa ang minilyong nabitik sa paganong mga batasan ug nagapakaulaw-sa-Diyos nga mga tradisyon sa Kakristiyanohan “nagapanghupaw ug nagaagulo” tungod sa dulumtanang mga butang nga gibuhat sa maong relihiyosong sistema. (Ezequiel 9:4) Kadtong mosanong sa maayong balita mapagawas gikan nianang alaot nga kahimtang. (Mateo 9:35-38) Ang ilang mga mata sa pagsabot gibuksan ug dako sa dihang sila nakakat-on sa pagsimba kang Jehova “uban sa espiritu ug sa kamatuoran.”—Juan 4:24.
7, 8. (a) Unsa ang duha ka “tuig sa maayong kabubut-on”? (b) Unsa ang ‘mga adlaw sa panimalos’ ni Jehova?
7 Ang pagsangyaw sa maayong balita adunay eskedyul. Si Jesus ug ang iyang mga sumusunod gisugo: ‘Imantala ang tuig sa maayong kabubut-on sa bahin ni Jehova ug ang adlaw sa panimalos sa bahin sa atong Diyos; sa paghupay sa tanang nagbangotan.’ (Isaias 61:2) Ang usa ka tuig maoy hataas nga panahon, apan kini adunay sinugdanan ug kataposan. Ang “tuig sa maayong kabubut-on” ni Jehova mao ang yugto nga nianang panahona siya mohatag ug kahigayonan sa mga maaghop nga mosanong sa iyang pagmantala sa kagawasan.
8 Sa unang siglo, ang tuig sa maayong kabubut-on alang sa Hudiyohanong nasod nagsugod sa 29 K.P. sa dihang gisugdan ni Jesus ang iyang yutan-ong ministeryo. Gisultihan niya ang mga Hudiyo: “Paghinulsol kamo, kay ang gingharian sa mga langit haduol na.” (Mateo 4:17) Kadtong tuiga sa maayong kabubut-on milungtad hangtod sa “adlaw sa panimalos” ni Jehova, nga misangko sa 70 K.P. sa dihang gitugotan ni Jehova ang Romanong kasundalohan sa paglaglag sa Jerusalem ug sa templo niini. (Mateo 24:3-22) Karong adlawa kita nagkinabuhi sa laing tuig sa maayong kabubut-on, nga nagsugod sa pagkatukod sa Gingharian sa Diyos sa mga langit sa 1914. Kining tuiga sa maayong kabubut-on taposon sa lain, mas malukpanong adlaw sa panimalos sa dihang ipahinabo ni Jehova ang kalaglagan niining tibuok-kalibotang sistema sa mga butang panahon sa “dakong kasakitan.”—Mateo 24:21.
9. Kinsay makabatog kaayohan gikan sa tuig sa maayong kabubut-on ni Jehova karong adlawa?
9 Kinsay makabatog kaayohan gikan sa tuig sa maayong kabubut-on sa Diyos karong adlawa? Kadtong modawat sa mensahe, magpasundayag sa pagkamaaghop, ug madasigong magpaluyo sa pagmantala sa Gingharian sa Diyos sa “tanang kanasoran.” (Marcos 13:10) Kanang mga tawhana nakadiskobre nga ang maayong balita mohatag ug tinuod nga kahupayan. Hinunoa, kadtong mosalikway sa mensahe, nga dili magpahimulos sa tuig sa maayong kabubut-on ni Jehova, sa dili madugay moatubang sa katinuoran sa iyang adlaw sa panimalos.—2 Tesalonica 1:6-9.
Espirituwal nga mga Bunga nga Magahimaya sa Diyos
10. Sa unsang paagi naapektahan ang mga Hudiyong namauli gikan sa Babilonya sa dakong buhat ni Jehova alang kanila?
10 Ang mga Hudiyong namauli gikan sa Babilonya nakaamgo nga gihimo ni Jehova ang usa ka dakong buhat alang kanila. Ang ilang pagbangotan ingong mga binihag nahimong paghugyaw ug pagdayeg tungod kay sa kataposan sila nakagawas na. Busa, si Isaias nagtuman sa iyang matagnaong buluhaton, nga mao, “sa pagtudlo niadtong nagbangotan labot sa Zion, sa paghatag kanila ug purong inay abo, sa lana sa kasadya inay sa pagbangotan, sa kupo sa pagdayeg inay sa nagsubo nga espiritu; ug sila pagatawgon nga dagkong kahoy sa pagkamatarong, ang tinanom ni Jehova, aron siya patahomon.”—Isaias 61:3.
11. Kinsa sa unang siglo ang may maayong katarongan sa pagdayeg kang Jehova tungod sa iyang dakong buhat?
11 Sa unang siglo, ang mga Hudiyong nakadawat ug kagawasan gikan sa pagkabihag sa bakak nga relihiyon nagdayeg usab sa Diyos tungod sa iyang dakong buhat alang kanila. Ang ilang minghoy nga espiritu napulihan sa “kupo sa pagdayeg” sa dihang giluwas sila gikan sa patay-sa-espirituwal nga nasod. Ang maong kausaban unang nasinati sa mga tinun-an ni Jesus sa dihang ang ilang pagbangotan tungod sa iyang kamatayon nahimong kasadya kay gidihogan silag balaang espiritu sa nabanhaw nilang Ginoo. Sa wala madugay, ang susamang kausaban nasinati sa 3,000 ka tawong maaghop nga misanong sa pagsangyaw sa maong bag-ong dinihogang mga Kristohanon ug nabawtismohan panahon sa Pentekostes 33 K.P. (Buhat 2:41) Pagkamaayo ang pagsalig nga ang panalangin ni Jehova mabatonan! Inay “nagbangotan labot sa Zion,” sila nakadawat sa balaang espiritu ug nahayahay tungod sa “lana sa kasadya,” nga nagsimbolo sa kasadya niadtong dagayang gipanalanginan ni Jehova.—Hebreohanon 1:9.
12, 13. (a) Kinsa ang “dagkong kahoy sa pagkamatarong” taliwala sa namalik nga mga Hudiyo sa 537 W.K.P.? (b) Kinsa ang “dagkong kahoy sa pagkamatarong” sukad sa Pentekostes 33 K.P.?
12 Gipanalanginan ni Jehova ang iyang katawhan sa “dagkong kahoy sa pagkamatarong.” Kinsa ba ang maong dagkong mga kahoy? Sa katuigan human sa 537 W.K.P., sila maoy mga indibiduwal nga nagtuon ug namalandong sa Pulong sa Diyos ug nag-ugmad sa hataas nga mga sukdanan ni Jehova. (Salmo 1:1-3; Isaias 44:2-4; Jeremias 17:7, 8) Ang mga lalaking sama kang Esdras, Haggeo, Zacarias, ug sa Hataas nga Saserdoteng si Josue napamatud-ang talagsaon nga “dagkong kahoy”—mga balwarte dapig sa kamatuoran ug batok sa espirituwal nga kahugawan sa nasod.
13 Sukad sa Pentekostes 33 K.P. paunahan, ang Diyos nagtanom sa susamang “dagkong kahoy sa pagkamatarong”—maisogon nga dinihogang mga Kristohanon—diha sa espirituwal nga yuta sa iyang bag-ong nasod, ang “Israel sa Diyos.” (Galacia 6:16) Latas sa kasiglohan, ang maong ‘mga kahoy’ mikabat ug 144,000, nga namungag matarong nga mga bunga aron sa pagpatahom o pagdalag kahimayaan kang Jehova nga Diyos. (Pinadayag 14:3) Ang mga nahibilin niining habog nga ‘mga kahoy’ naglambo sa katuigan sukad sa 1919, sa dihang gibuhi na usab ni Jehova ang mga nahibilin sa Israel sa Diyos gikan sa ilang temporaryong kahimtang sa pagkawalay-kalihokan. Pinaagi sa pagtagana kanilag dagayang suplay sa espirituwal nga tubig, si Jehova nakapatungha ug samag lasang sa matarong, nagapamunga nga kakahoyan.—Isaias 27:6.
14, 15. Unsang mga proyekto ang gihimo sa napagawas nga mga magsisimba ni Jehova sugod sa (a) 537 W.K.P.? (b) 33 K.P.? (c) 1919?
14 Sa pagpasiugda sa buluhaton niining ‘mga kahoy,’ si Isaias nagpadayon: “Ilang pagatukoron pag-usab ang dugay nang nagun-ob nga mga dapit; ilang patindogon bisan ang gihimong biniyaan nga mga dapit sa kanhing kapanahonan, ug tinong bag-ohon nila ang nagun-ob nga mga siyudad, ang mga dapit nga biniyaan sa sunodsunod nga mga kaliwatan.” (Isaias 61:4) Ubos sa balaod ni Haring Ciro sa Persia, ang matinumanong mga Hudiyo nga namauli gikan sa Babilonya nagtukod pag-usab sa Jerusalem ug sa templo niini, nga biniyaan sa dugay kaayong panahon. Ang mga proyekto sa pagpasig-uli magpaila usab sa mga tuig tapos sa 33 K.P. ug sa 1919.
15 Sa 33 K.P., ang mga tinun-an ni Jesus nasubo kaayo tungod sa pagdakop, paghusay, ug pagpatay kaniya. (Mateo 26:31) Bisan pa niana, ang ilang panglantaw nausab sa dihang siya nagpakita kanila human sa iyang pagkabanhaw. Ug sa gibubo ang balaang espiritu diha kanila, sila napuliki sa buluhatong pagsangyaw sa maayong balita, “sa Jerusalem ug sa tibuok Judea ug Samaria ug hangtod sa kinalay-ang dapit sa yuta.” (Buhat 1:8) Sa ingon ilang gisugdan ang pagpasig-uli sa maputling pagsimba. Sa susamang paagi, gikan sa 1919 paunahan gipatukod pag-usab ni Jesu-Kristo sa nahibilin sa iyang dinihogang mga igsoon ang “mga dapit nga biniyaan sa sunodsunod nga mga kaliwatan.” Sulod sa kasiglohan ang klero sa Kakristiyanohan napakyas pagbutyag sa kahibalo bahin kang Jehova, nga nagpuli niana sa ginamag-tawo nga mga tradisyon ug dili-kasulatanhong mga doktrina. Ang dinihogang mga Kristohanon naghinlo gikan sa ilang mga kongregasyon sa mga tulumanong namansahan sa bakak nga relihiyon mao nga ang pagpasig-uli sa matuod nga pagsimba nakapadayon sa unahan. Ug gisugdan nila ang nahimong kinadak-ang kampanya sa pagsangyaw nga nasayran sukad sa kalibotan.—Marcos 13:10.
16. Kinsay nagtabang sa dinihogang mga Kristohanon sa ilang buluhaton sa pagpasig-uli, ug unsang mga tahas ang gipiyal kanila?
16 Kadto maoy dako kaayong buluhaton. Sa unsang paagi ang pipila ra ka nahibilin sa Israel sa Diyos makatuman sa maong tahas? Si Jehova nagdasig kang Isaias sa pagpahayag: “Ang mga estranyo sa pagkatinuod mobarog ug magbantay sa inyong mga panon sa kahayopan, ug ang mga langyaw mahimong inyong mga mag-uuma ug inyong mga tig-atiman sa parasan.” (Isaias 61:5) Ang masambingayong mga estranyo ug mga langyaw mao diay ang “usa ka dakong panon” sa “ubang mga karnero” ni Jesus.a (Pinadayag 7:9; Juan 10:11, 16) Sila wala dihogi sa balaang espiritu uban ang palaaboton nga usa ka langitnong panulondon. Sa kapulihay, nabatonan nila ang paglaom nga kinabuhing walay kataposan sa paraisong yuta. (Pinadayag 21:3, 4) Bisan pa niana, sila nahigugma kang Jehova ug gipiyalan sa espirituwal nga pagbantay, pag-uma, ug mga buluhaton sa pag-atiman sa kaparasan. Ang maong mga kalihokan dili kay dili-madungganong mga tahas. Ilalom sa pagdumala sa mga nahibilin sa Israel sa Diyos, ang maong mga magbubuhat motabang sa pagbantay, pagbansay, ug pag-ani sa mga tawo.—Lucas 10:2; Buhat 20:28; 1 Pedro 5:2; Pinadayag 14:15, 16.
17. (a) Unsay pagtawag sa mga membro sa Israel sa Diyos? (b) Unsang bugtong halad ang gikinahanglan alang sa kapasayloan sa mga sala?
17 Komosta man ang Israel sa Diyos? Si Jehova nagsulti kanila, pinaagi ni Isaias: “Bahin kaninyo, kamo pagatawgon nga mga saserdote ni Jehova; igaingon nga kamo mga alagad sa atong Diyos. Ang mga kahinguhaan sa kanasoran inyong pagakan-on, ug sa ilang himaya kamo mosulting mapagarbohon bahin sa inyong kaugalingon.” (Isaias 61:6) Sa karaang Israel, gitagana ni Jehova ang Levihanong mga saserdote aron magtanyag ug mga halad alang sa mga saserdote mismo ug sa ilang isigka-Israelinhon. Bisan pa niana, sa 33 K.P., si Jehova mihunong paggamit sa Levihanong mga saserdote ug giinagurahan ang mas maayong kahikayan. Gidawat niya ang hingpit nga kinabuhi ni Jesus ingong halad alang sa mga sala sa katawhan. Sukad niadto, wala na kinahanglana ang laing halad. Ang halad ni Jesus maoy balido sa tanang panahon.—Juan 14:6; Colosas 2:13, 14; Hebreohanon 9:11-14, 24.
18. Naporma nga unsang matang sa lawas sa mga saserdote ang Israel sa Diyos, ug unsa ang ilang buluhaton?
18 Nan, sa unsang paagi ang mga membro sa Israel sa Diyos mao ang “mga saserdote ni Jehova”? Sa pagsulat ngadto sa isigkadinihogan nga mga Kristohanon, si apostol Pedro miingon: “Kamo maoy ‘usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya, aron kaylap ninyong ipahayag ang mga kahamili’ sa usa nga nagtawag kaninyo gikan sa kangitngit ngadto sa iyang katingalahang kahayag.” (1 Pedro 2:9) Busa, ingong usa ka grupo, ang dinihogang mga Kristohanon naporma nga usa ka lawas sa mga saserdote nga may tinong buluhaton: ang pagsulti sa mga nasod mahitungod sa himaya ni Jehova. Sila mahimong iyang mga saksi. (Isaias 43:10-12) Latas sa kataposang mga adlaw, ang dinihogang mga Kristohanon matinumanong nagtuman niining bililhong buluhaton. Ingong resulta, minilyon karon nagapakig-ambit uban nila sa buluhatong pagsangyaw bahin sa Gingharian ni Jehova.
19. Ang dinihogang mga Kristohanon makapribilehiyo sa pagtuman sa unsang pag-alagad?
19 Dugang pa, ang mga membro sa Israel sa Diyos naglaom nga moalagad ingong mga saserdote sa laing paagi. Sa ilang pagkamatay, sila banhawon ngadto sa dili-mamatay nga espiritung kinabuhi sa langit. Didto sila magaalagad dili lamang ingong mga magmamando uban ni Jesus diha sa iyang Gingharian kondili ingon usab nga mga saserdote sa Diyos. (Pinadayag 5:10; 20:6) Sa ingong kahimtang, sila makapribilehiyo sa pagpadapat sa mga kaayohan sa halad lukat ni Jesus nganha sa matinumanong katawhan sa yuta. Sa panan-awon ni apostol Juan nga natala sa Pinadayag kapitulo 22, sila gibatbat na usab ingong “mga kahoy.” Ang tanang 144,000 nga “mga kahoy” nakita sa langit, nga nagapatunghag “napulog-duha ka abot nga bunga, nga nagapamunga matag bulan. Ug ang mga dahon sa mga kahoy [maoy] tambal alang sa kanasoran.” (Pinadayag 22:1, 2) Pagkatalagsaon nga saserdotehanong pag-alagad kana!
Kaulawan ug Pagkanaulawan, Unya Pagmaya
20. Bisan pa sa pagsupak, ang harianong mga saserdote naghulat sa unsang panalangin?
20 Sukad sa 1914 sa dihang nagsugod ang tuig sa maayong kabubut-on ni Jehova, ang harianong mga saserdote nakasinati lamang ug pagsupak gikan sa klero sa Kakristiyanohan. (Pinadayag 12:17) Bisan pa niana, napakyas sa kataposan ang tanang panlimbasog nga pugngan ang pagsangyaw sa maayong balita. Ang tagna ni Isaias nagtagna niini, nga nag-ingon: “Inay sa inyong kaulawan aduna unyay dobleng bahin, ug inay sa pagkanaulawan sila mohugyaw sa kalipay labot sa ilang bahin. Busa diha sa ilang yuta ilang panag-iyahon ang doble pang bahin. Ang pagmaya hangtod sa panahong walay tino ilang maangkon.”—Isaias 61:7.
21. Sa unsang paagi ang dinihogang mga Kristohanon nakapahimulos ug dobleng bahin sa mga panalangin?
21 Panahon sa Gubat sa Kalibotan I, ang dinihogang nahibilin nakaagom ug kaulawan ug pagkanaulawan diha sa mga kamot sa nasyonalistikong Kakristiyanohan. Ang mga membro sa klero nahilakip niadtong binakak nga nagsumbong sa walo ka matinumanong mga igsoon sa hedkuwarter sa Brooklyn sa pag-alsa sa kagamhanan. Kadtong mga igsoona dili-makataronganong gibilanggo sulod sa siyam ka bulan. Sa kataposan, sa tingpamulak sa 1919, sila gipagawas, ug sa ulahi gidismis ang tanang sumbong batok kanila. Busa ang laraw nga pahunongon ang buluhaton sa pagsangyaw misumbalik. Inay itugot nga ang iyang mga magsisimba magaantos sa malungtarong kaulawan, si Jehova nagpagawas kanila ug nagpasig-uli kanila sa ilang espirituwal nga kaumahan, sa “ilang yuta.” Sila nakadawat didto ug dobleng bahin sa mga panalangin. Ang pagbaton sa panalangin ni Jehova dagayang nagbakwi sa tanang ilang giantos. Sa pagkatinuod sila may katarongang mohugyaw sa kalipay!
22, 23. Sa unsang paagi ang dinihogang mga Kristohanon nagsundog kang Jehova, ug sa unsang paagi siya nagganti kanila?
22 Ang sunod nga gisulti ni Jehova mohatag ug laing katarongan nga magmaya ang mga Kristohanon karon: “Ako, si Jehova, nahigugma sa hustisya, nagdumot sa panulis uban sa pagkadili-matarong. Ug sa kamatinud-anon ihatag ko ang ilang suhol, ug kanila akong himoon ang usa ka pakigsaad nga mohangtod sa panahong walay tino.” (Isaias 61:8) Pinaagi sa ilang pagtuon sa Bibliya, ang dinihogang nahibilin nakakat-on sa paghigugma sa hustisya ug pagdumot sa pagkadaotan. (Proverbio 6:12-19; 11:20) Sila nakatuon sa ‘pagsalsal sa ilang mga espada nga mga punta sa daro,’ nga nagpabiling neyutral sa mga gubat ug sa politikanhong mga kagubot sa katawhan. (Isaias 2:4) Gibiyaan usab nila ang nagapakaulaw-sa-Diyos nga mga batasan, sama sa pagbutangbutang, pagpanapaw, pangawat, ug paghuboghubog.—Galacia 5:19-21.
23 Tungod kay ang dinihogang mga Kristohanon may gugma sa hustisya sama sa ilang Maglalalang, si Jehova naghatag kanila ‘sa kamatinud-anon sa ilang suhol.’ Ang usa sa maong “suhol” mao ang pakigsaad nga mohangtod sa panahong walay tino—ang bag-ong pakigsaad—nga gipahibalo ni Jesus ngadto sa iyang mga sumusunod sa gabii una siya mamatay. Maoy pinasukad niining pakigsaara nga sila nahimong usa ka espirituwal nga nasod, ang linaing katawhan sa Diyos. (Jeremias 31:31-34; Lucas 22:20) Ilalom niana, ipadapat ni Jehova ang tanang kaayohan sa halad lukat ni Jesus, lakip ang pagpasaylo sa mga sala alang sa mga dinihogan ug sa tanang ubang matinumanong katawhan.
Paglipay Tungod sa mga Panalangin ni Jehova
24. Kinsa gikan sa taliwala sa mga nasod “ang mga anak” nga napanalanginan, ug sa unsang paagi sila nahimong “mga anak”?
24 Ang pipila sa taliwala sa mga nasod nakaila sa panalangin ni Jehova diha sa iyang katawhan. Gitagna kini sa saad ni Jehova: “Ang ilang mga anak sa pagkatinuod mailhan bisan taliwala sa kanasoran, ug ang ilang mga kaliwat taliwala sa mga katawhan. Ang tanan nga makakita kanila makaila kanila, nga sila mao ang mga anak nga gipanalanginan ni Jehova.” (Isaias 61:9) Ang mga membro sa Israel sa Diyos, ang dinihogang mga Kristohanon, maoy aktibo taliwala sa mga nasod sa tuig sa maayong kabubut-on ni Jehova. Karong adlawa kadtong misanong sa ilang ministeryo mikabat ug minilyon. Pinaagi sa pakigtambayayong sa Israel sa Diyos, kadtong gikan sa mga nasod nakabaton sa pribilehiyo nga mahimong “ang mga anak nga gipanalanginan ni Jehova.” Ang ilang malipayong kahimtang nakita sa tanang tawo.
25, 26. Sa unsang paagi ang tanang Kristohanon nagpatugbaw sa mga pagbating gipahayag sa Isaias 61:10?
25 Ang tanang Kristohanon, ang dinihogan ug ubang mga karnero, naglantaw sa pagdayeg kang Jehova sa walay kataposan. Sila bug-os-kasingkasing nga mouyon sa manalagnang Isaias, kinsa dinasig nga nag-ingon: “Sa walay pakyas ako magsadya diha kang Jehova. Ang akong kalag magakalipay diha sa akong Diyos. Kay siya nagsul-ob kanako sa mga besti sa kaluwasan; sa walay bukton nga kupo sa pagkamatarong iya akong gibukotan, sama sa pamanhonon kinsa, sa saserdotehanong paagi, nagsul-ob ug purong, ug sama sa pangasaw-onon nga nagdayandayan sa iyang kaugalingon sa iyang mga pahiyas.”—Isaias 61:10.
26 Nga nagsul-ob ug “walay bukton nga kupo sa pagkamatarong,” ang dinihogang mga Kristohanon determinadong magpabilin nga putli ug hinlo sa mga mata ni Jehova. (2 Corinto 11:1, 2) Kay gipahayag ni Jehova nga matarong uban ang panglantaw nga magapanunod ug langitnong kinabuhi, dili na gayod sila mobalik sa biniyaang kahimtang sa Dakong Babilonya, nga gikan niana sila gipagawas. (Roma 5:9; 8:30) Ang mga besti sa kaluwasan labing bililhon alang kanila. Ang ilang kauban nga ubang mga karnero susamang determinado nga mosunod sa hataas nga mga sukdanan ni Jehova nga Diyos sa maputling pagsimba. Kay ‘gilabhan ang ilang hatag-as nga mga besti ug gipaputi sila sa dugo sa Kordero,’ sila gipahayag nga matarong ug makalabang-buhi sa “dakong kasakitan.” (Pinadayag 7:14; Santiago 2:23, 25) Hangtod sa maong panahon, sila nagsundog sa ilang dinihogang mga kauban nga maglikay nga mahugawan sa Dakong Babilonya.
27. (a) Panahon sa Milenyong Paghari, aduna unyay unsang talagsaong ‘pagturok’? (b) Sa unsang paagi ang pagkamatarong nanurok na taliwala sa katawhan?
27 Karong adlawa ang mga magsisimba ni Jehova nahimuot nga anaa sa espirituwal nga paraiso. Sa dili madugay tagamtamon usab nila ang Paraiso sa pisikal nga diwa. Sa bug-os natong kasingkasing atong gihulat kanang panahona, nga tin-awng gibatbat sa kataposang mga pulong sa Isaias kapitulo 61: “Ingon nga ang yuta magpatungha sa turok niini, ug ingon nga ang tanaman magpaturok sa mga butang nga gipugas diha niini, sa samang paagi ang Soberanong Ginoong Jehova magpaturok sa pagkamatarong ug sa pagdayeg sa atubangan sa tanang kanasoran.” (Isaias 61:11) Panahon sa Milenyong Paghari ni Kristo, ang yuta makasinati sa ‘pagturok sa pagkamatarong.’ Ang mga tawo mosinggit nga madaogon, ug ang pagkamatarong mokaylap ngadto sa mga kinatumyan sa yuta. (Isaias 26:9) Hinuon, kita dili kinahanglang maghulat nianang mahimayaong adlaw aron mohatag ug pagdayeg atubangan sa tanang nasod. Ang pagkamatarong nanurok na taliwala sa minilyon nga naghatag ug himaya sa Diyos sa langit ug nagmantala sa maayong balita bahin sa iyang Gingharian. Bisan karon ang atong pagtuo ug atong paglaom mohatag kanato sa tanang katarongan sa paghugyaw tungod sa mga panalangin sa atong Diyos.
[Footnote]
a Ang Isaias 61:5 may katumanan sa karaang mga panahon, sanglit ang mga dili-Hudiyo mikuyog sa kinaiyanhong mga Hudiyo sa ilang pagbalik sa Jerusalem ug lagmit mitabang sa pagpasig-uli sa yuta. (Esdras 2:43-58) Bisan pa niana, gikan sa bersikulo 6 ang tagna maorag mapadapat lamang sa Israel sa Diyos.
[Hulagway sa panid 323]
Si Isaias may maayong balita nga imantala ngadto sa Hudiyong mga binihag
[Hulagway sa panid 331]
Sugod sa 33 K.P., si Jehova nagtanom ug 144,000 ka “dagkong kahoy sa pagkamatarong”
[Hulagway sa panid 334]
Ang yuta magpaturok sa pagkamatarong