Kapitulo Bayente-kuwatro
Si Jehova Maghimog Usa ka Matahom nga Ngalan Alang sa Iyang Kaugalingon
1, 2. (a) Unsay personal nga interes sa mga Kristohanon bahin sa umaabot nga “adlaw ni Jehova”? (b) Unsang dakong isyu ang nalangkit sa pag-abot sa adlaw ni Jehova?
SA DUOLAG duha ka libo ka tuig, ang mga Kristohanon “nagapaabot ug nagabutang kanunay sa hunahuna sa presensiya sa adlaw ni Jehova.” (2 Pedro 3:12; Tito 2:13) Hisabtan nga sila maikagon sa pag-abot nianang adlawa. Ngani, kana magatimaan sa pagsugod sa ilang kahupayan gikan sa mga kadaot sa pagkadili-hingpit. (Roma 8:22) Kana magpasabot usab sa kataposan sa mga kapit-osan nga ilang giantos niining “makuyaw nga mga panahong lisod sagubangon.”—2 Timoteo 3:1.
2 Hinunoa, samtang ang adlaw ni Jehova magadalag kahupayan alang sa mga matarong, kini magpasabot usab sa kalaglagan “kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.” (2 Tesalonica 1:7, 8) Makapahinuklog ang pagpalandong niini. Pagalaglagon ba gayod sa Diyos ang mga daotan aron lamang maluwas ang iyang katawhan gikan sa malisod nga mga kahimtang? Ang ika-63 nga kapitulo sa Isaias nagpakita nga nalangkit ang mas dakong isyu, nga mao, ang pagbalaan sa ngalan sa Diyos.
Ang Martsa sa Madaogong Manggugubat
3, 4. (a) Unsa ang mga panghitabo sa panahong gipahayag ang tagna sa Isaias kapitulo 63? (b) Kinsay nakita ni Isaias nga nagmartsa paingon sa Jerusalem, ug giila sa pipila ka eskolar nga kinsa siya?
3 Sa Isaias kapitulo 62, mabasa nato ang bahin sa pagkagawas sa mga Hudiyo gikan sa pagkabihag sa Babilonya ug ang pagkapasig-uli nila sa ilang yutang-natawhan. Natural lamang, ang pangutana motungha: Ang napasig-uli nga nahibiling mga Hudiyo angay bang mahadlok sa dugang nga pagpanglaglag nga ipahinabo sa ubang kaawayng mga nasod? Ang panan-awon ni Isaias makahupay ug dako sa ilang kahadlok. Ang tagna nagsugod: “Kinsa kining nagsingabot gikan sa Edom, ang usa nga may mga besti nga magilawon ang mga bulok gikan sa Bozra, kining usa nga dungganon sa iyang besti, nga naglakaw diha sa kadagaya sa iyang kusog?”—Isaias 63:1a.
4 Si Isaias nakakita ug usa ka manggugubat, nga maabtikon ug madaogon, nga nagmartsa paingon sa Jerusalem. Ang matahom kaayo niyang besti nagpasabot nga siya adunay hataas kaayong ranggo. Siya naggikan sa direksiyon sa labing iladong siyudad sa Edom, ang Bozra, nga nagpailang siya nagmadaogon pag-ayo batok nianang kaawayng nasod. Kinsa ba ang maong manggugubat? Gipaila sa pipila ka eskolar nga siya mao si Jesu-Kristo. Ang uban nagtuo nga siya mao ang Hudiyong pangulong militar nga si Judas Makabeo. Bisan pa niana, ang manggugubat mismo nagpaila sa iyang kaugalingon sa iyang gitubag ang nahisgotang pangutana pinaagi sa pag-ingon: “Ako, ang Usa nga nagsulti sa pagkamatarong, ang Usa nga dagaya sa gahom aron sa pagluwas.”—Isaias 63:1b.
5. Kinsa ang manggugubat nga nakita ni Isaias, ug nganong kana ang imong tubag?
5 Walay duhaduha nga ang maong manggugubat mao si Jehova nga Diyos mismo. Sa laing mga teksto, siya gibatbat ingon nga adunay “kadagaya sa dinamikong kusog” ug ingon nga “nagpahayag kon unsay matul-id.” (Isaias 40:26; 45:19, 23) Ang matahom kaayong besti sa manggugubat magpahinumdom kanato sa mga pulong sa salmista: “Oh Jehova nga akong Diyos, ikaw dako kaayo. Gibestihan mo ang imong kaugalingon sa dignidad ug pagkahalangdon.” (Salmo 104:1) Bisan pag si Jehova mao ang Diyos sa gugma, gipakita sa Bibliya nga iyang isul-ob ang besti sa usa ka manggugubat kon gikinahanglan.—Isaias 34:2; 1 Juan 4:16.
6. Nganong si Jehova nagapauli man gikan sa usa ka pakiggubat sa Edom?
6 Apan, nganong si Jehova nagapauli man gikan sa usa ka pakiggubat sa Edom? Ang mga Edomhanon, nga padayong naghambin ug pagdumot nga nagsugod pa sa ilang katigulangan, si Esau, maoy karaang mga kaaway sa katawhang may pakigsaad sa Diyos. (Genesis 25:24-34; Numeros 20:14-21) Ang dulot nga pagdumot sa Edom alang sa Juda ilabinang nadayag panahon sa paglaglag sa Jerusalem sa dihang ang mga Edomhanon nag-abiba sa Babilonyanhong mga sundalo. (Salmo 137:7) Giisip ni Jehova ang maong pagdumot nga sala batok kaniya mismo. Dili katingad-an nga siya mihukom nga hus-on ang iyang espada sa panimalos batok sa Edom!—Isaias 34:5-15; Jeremias 49:7-22.
7. (a) Sa unsang paagi ang tagna batok sa Edom unang natuman? (b) Unsay gisimbolohan sa Edom?
7 Busa ang panan-awon ni Isaias makapadasig gayod sa mga Hudiyo nga namauli sa Jerusalem. Kana nagpasalig kanila sa luwas nga pagpuyo diha sa ilang bag-ong pinuy-anan. Sa pagkatinuod, sa mga adlaw sa manalagnang si Malaquias, gihimo sa Diyos ang “mga bukid [sa Edom] nga usa ka awaaw ug ang iyang panulondon gihatag sa mga iro nga ihalas sa kamingawan.” (Malaquias 1:3) Nan, nagpasabot ba kini nga ang tagna ni Isaias natuman sa bug-os sa pagdangat sa panahon ni Malaquias? Wala, kay bisan pa sa awaaw nga kahimtang niini, ang Edom nagtinguha gayod sa pagtukod pag-usab sa nagun-ob nga mga dapit niini, ug si Malaquias nagpadayon sa pagtawag sa Edom “ang teritoryo sa pagkadaotan” ug “ang katawhan nga mahukmanong gisaway ni Jehova hangtod sa panahong walay tino.”a (Malaquias 1:4, 5) Ugaling, sa matagnaong paagi, ang Edom nagsakop dili lamang sa mga kaliwat ni Esau. Kini nagsilbing usa ka simbolo sa tanang nasod nga nagpamatuod sa ilang kaugalingon nga mga kaaway sa mga magsisimba ni Jehova. Ang mga nasod sa Kakristiyanohan ilabinang ilado niining bahina. Unsay mahitabo niining modernong-adlaw nga Edom?
Ang Pug-anan sa Bino
8, 9. (a) Unsay gihimo sa manggugubat sumala sa nakita ni Isaias? (b) Kanus-a ug sa unsang paagi tamaktamakan ang simbolikong pug-anan sa bino?
8 Si Isaias nangutana sa nagpauli nga manggugubat: “Nganong pula man ang imong besti, ug ang imong mga sapot sama nianang sa usa nga nagtamaktamak sa pug-anan sa bino?” Si Jehova mitubag: “Ako nagtamaktamak sa pasong sa bino nga ako ra, sa dihang walay tawo nga uban kanako gikan sa mga katawhan. Ug ako nagtamaktamak kanila sa akong kasuko, ug ako nagyatak kanila sa akong kaaligutgot. Ug ang ilang nagsidlit nga dugo mipisik sa akong mga besti, ug ang tanan nakong mga besti akong nahugawan.”—Isaias 63:2, 3.
9 Kining tatawng mga pulong nagbatbat sa usa ka pagpamatay. Aw, bisan ang eleganteng mga besti sa Diyos namansahan, nga sama sa besti sa usa nga nagtamaktamak sa pug-anan sa bino! Ang usa ka pug-anan sa bino maoy haom nga simbolo sa nasikop nga kahimtang nga nahimutangan sa mga kaaway ni Jehova nga Diyos sa dihang siya molihok aron pagalaglagon sila. Kanus-a tamaktamakan kining simbolikong pug-anan sa bino? Ang mga tagna ni Joel ug ni apostol Juan naghisgot usab bahin sa usa ka simbolikong pug-anan sa bino. Ang pug-anan sa bino sa maong mga tagna tamaktamakan sa dihang tamaktamakan ni Jehova ang iyang mga kaaway hangtod nga mangalaglag panahon sa Armagedon. (Joel 3:13; Pinadayag 14:18-20; 16:16) Ang matagnaong pug-anan sa bino ni Isaias mopunting sa samang panahon.
10. Nganong si Jehova nag-ingon nga siya lamang ang nagtamaktamak sa pug-anan sa bino?
10 Apan, nganong si Jehova nag-ingon nga siya lamang ang nagtamaktamak sa maong pug-anan sa bino, samtang walay tawo nga uban kaniya gikan sa mga katawhan? Dili ba si Jesu-Kristo, ingong hawas sa Diyos, maoy manguna sa pagtamaktamak sa pug-anan sa bino? (Pinadayag 19:11-16) Oo, apan si Jehova nagatumong sa mga tawo, dili sa espiritung mga linalang. Siya nagaingon nga walay tawo ang makaarang sa pagwagtang sa mga sumusunod ni Satanas gikan sa yuta. (Isaias 59:15, 16) Anaa lang sa Diyos nga Labing Gamhanan ang pagtamaktamak kanila tungod sa iyang kasuko, hangtod nga sila madugmok sa bug-os.
11. (a) Nganong si Jehova magpahinabo sa usa ka “adlaw sa panimalos”? (b) Kinsa ang “mga linukat” sa karaang kapanahonan, ug kinsa sila karong adlawa?
11 Si Jehova dugang nagpatin-aw kon nganong siya mismo ang mohimo nianang buluhatona, nga nag-ingon: “Ang adlaw sa panimalos ania sa akong kasingkasing, ug ang mismong tuig sa akong mga linukat miabot na.” (Isaias 63:4)b Si Jehova lamang ang may katungod nga magpahamtang ug panimalos nganha sa mga magdaot sa iyang katawhan. (Deuteronomio 32:35) Sa karaang kapanahonan ang “mga linukat” mao ang mga Hudiyong nag-antos diha sa mga kamot sa mga Babilonyanhon. (Isaias 35:10; 43:1; 48:20) Sa modernong kapanahonan kini sila mao ang dinihogang nahibilin. (Pinadayag 12:17) Sama sa ilang karaang mga katumbas, sila gilukat gikan sa relihiyosong pagkabihag. Ug sama niadtong mga Hudiyo, ang mga dinihogan, duyog sa ilang mga kauban nga “ubang mga karnero,” nabiktima sa paglutos ug pagsupak. (Juan 10:16) Sa ingon ang tagna ni Isaias nagpasalig sa mga Kristohanon karong adlawa nga sa tinudlong panahon sa Diyos, Siya mosalga alang kanila.
12, 13. (a) Sa unsang paagi walay magtatabang alang kang Jehova? (b) Sa unsang paagi ang bukton ni Jehova naghatag ug kaluwasan, ug sa unsang paagi ang iyang kaaligutgot nagpalig-on kaniya?
12 Si Jehova nagpadayon: “Ako mitan-aw, apan walay magtatabang; ug ako mismo mipakita nga nahingangha, apan walay usa nga nagtanyag ug tabang. Busa ang akong bukton mihatag kanakog kaluwasan, ug ang akong kaaligutgot mao ang nagpalig-on kanako. Ug ako nagtamak sa mga katawhan sa akong kasuko, ug akong gihubog sila sa akong kaaligutgot ug giula ang ilang nagsidlit nga dugo sa yuta.”—Isaias 63:5, 6.
13 Walay tawhanong magtatabang ang makapangangkon sa dungog alang sa dakong adlaw sa panimalos ni Jehova. Ni gikinahanglan ni Jehova ang tabang sa tawo aron tumanon ang iyang kabubut-on.c Ang iyang labihan ka kusganong bukton igo na alang sa maong tahas. (Salmo 44:3; 98:1; Jeremias 27:5) Dugang pa, ang iyang kaaligutgot nagpalig-on kaniya. Sa unsang paagi? Sa pagkaaging ang kaaligutgot sa Diyos maoy dili kay dili-makontrolar nga emosyon kondili matarong nga kasuko. Sanglit si Jehova kanunayng molihok pinasukad sa matarong nga mga prinsipyo, ang iyang kaaligutgot magpalig-on ug magtukmod kaniya sa ‘pag-ula sa yuta’ sa “nagsidlit nga dugo“ sa iyang mga kaaway, sa ilang kaulawan ug kaparotan.—Salmo 75:8; Isaias 25:10; 26:5.
Mga Mahigugmaong-Kalulot sa Diyos
14. Unsang nahiangayng mga pahinumdom ang gihatag karon ni Isaias?
14 Sa nangaging kapanahonan, ang mga Hudiyo daling nawad-ag pagpabili sa mga butang nga gibuhat ni Jehova alang kanila. Nan, nahiangay nga si Isaias magpahinumdom kanila kon nganong gibuhat ni Jehova kadtong mga butanga. Si Isaias nagpahayag: “Ang mga mahigugmaong-kalulot ni Jehova akong pagahisgotan, ang mga pagdayeg kang Jehova, sumala sa tanang gibuhat ni Jehova kanato, bisan ang dagayang pagkamaayo ngadto sa balay sa Israel nga iyang gibuhat kanila sumala sa iyang mga kaluoy ug sumala sa kadagaya sa iyang mga mahigugmaong-kalulot. Ug siya miingon: ‘Sa pagkatinuod sila akong katawhan, mga anak nga dili magaluib.’ Busa siya nahimong Manluluwas alang kanila. Sa panahon sa tanan nilang kasakit kadto nakapasakit kaniya. Ug ang iyang kaugalingong mensahero nagluwas kanila. Sa iyang gugma ug sa iyang kaluoy siya naglukat kanila, ug siya nagsakwat kanila ug nagdala kanila sa tanang adlaw kanhi.”—Isaias 63:7-9.
15. Sa unsang paagi ug nganong si Jehova nagpakitag mahigugmaong-kalulot sa mga kaliwat ni Abraham sa Ehipto?
15 Pagkatalagsaon nga panig-ingnan ang gihatag ni Jehova aron ipasundayag ang mahigugmaong-kalulot, o maunongong gugma! (Salmo 36:7; 62:12) Naugmad ni Jehova ang mahigugmaong pagbati kang Abraham. (Miqueas 7:20) Gisaaran niya ang patriarka nga pinaagi sa iyang binhi, o kaliwat, ang tanang nasod sa yuta magapanalangin sa ilang kaugalingon. (Genesis 22:17, 18) Gituman ni Jehova ang maong saad, nga nagpakitag dagayang pagkamaayo ngadto sa balay sa Israel. Ilado taliwala sa iyang maunongong mga buhat mao ang iyang pagluwas sa mga kaliwat ni Abraham gikan sa kaulipnan sa Ehipto.—Exodo 14:30.
16. (a) Unsay punto de bista ni Jehova sa dihang iyang gihimo ang iyang pakigsaad uban sa Israel? (b) Sa unsang paagi ang Diyos makiglabot sa iyang katawhan?
16 Human sa Exodo, gidala ni Jehova ang Israel ngadto sa Bukid sa Sinai ug gisaad kini: “Kon kamo hugot nga magasugot sa akong tingog ug magatuman gayod sa akong pakigsaad, nan kamo tinong mahimong akong linaing katigayonan . . . Ug kamo mahimong usa ka gingharian sa mga saserdote ug usa ka balaan nga nasod.” (Exodo 19:5, 6) Si Jehova nagmalansison ba sa pagtanyag niana? Wala, kay gipadayag ni Isaias nga si Jehova miingon sa iyang kaugalingon: “Sa pagkatinuod sila akong katawhan, mga anak nga dili magaluib.” Usa ka eskolar nagpahayag: “Ang ‘sa pagkatinuod’ dili gipasukad sa katungod sa pagmando o sa katakos sa pagkahibalo-daan: ang paglaom ug pagsalig maoy tungod sa gugma.” Oo, gihimo ni Jehova ang iyang pakigsaad uban ang maayong motibo, nga sinserong nagtinguha nga ang iyang katawhan magmalamposon. Bisan pa sa dayag nilang mga kahuyangan, may pagsalig siya kanila. Pagkatalagsaon nga magsimba sa Diyos nga may dakong pagsalig sa iyang mga magsisimba! Ang mga ansiyano karong adlawa dakog mahimo aron sa pagpalig-on niadtong gipaatiman kanila kon ilang ipasundayag ang susamang pagsalig sa paninugdang pagkamaayo sa katawhan sa Diyos.—2 Tesalonica 3:4; Hebreohanon 6:9, 10.
17. (a) Unsang ebidensiya ang gihatag ni Jehova bahin sa iyang gugma alang sa mga Israelinhon? (b) Unsang pagsalig ang mahimong mabatonan nato karong adlawa?
17 Bisan pa niana, ang salmista nag-ingon mahitungod sa mga Israelinhon: “Nakalimot sila sa Diyos nga ilang Manluluwas, ang Magbubuhat sa dagkong mga butang sa Ehipto.” (Salmo 106:21) Ang ilang dili-masinugtanon, tikig-liog nga tinamdan sagad misangpot sa paghidangat nila sa daotang mga kahimtang. (Deuteronomio 9:6) Mihunong ba si Jehova sa pagpakita kanilag mahigugmaong-kalulot? Sa kasukwahi, si Isaias nag-asoy nga “sa panahon sa tanan nilang kasakit kadto nakapasakit kaniya.” Pagkamabination ni Jehova! Sama ni bisan kinsang mahigugmaong amahan, nakapaguol sa Diyos nga makita nga ang iyang mga anak nag-antos, bisan pag ang pag-antos maoy tungod sa ilang kaugalingong kabuangan. Sumala sa gitagna ug ingong ebidensiya sa iyang gugma, iyang gisugo ang iyang “kaugalingong mensahero,” lagmit si Jesus sa iyang una-tawhanong paglungtad, aron tultolan sila paingon sa Yutang Saad. (Exodo 23:20) Sa ingon gibayaw ni Jehova ang nasod ug gidala kana, “ingon sa usa ka tawo nga nagdala sa iyang anak.” (Deuteronomio 1:31; Salmo 106:10) Karong adlawa kita makasalig nga si Jehova samang nahibalo bahin sa atong mga pag-antos ug siya maluoy kanato sa dihang kita anaa sa kasakitan. Kita sa pagkamasaligon ‘makatugyan kaniya sa tanan natong mga kabalaka kay siya may kahingawa kanato.’—1 Pedro 5:7.
Ang Diyos Mahimong Kaaway
18. Nganong si Jehova nahimong kaaway sa iyang katawhan?
18 Apan, dili gayod angay nga hagiton nato ang mahigugmaong-kalulot sa Diyos. Si Isaias nagpadayon: “Sila misukol ug nagpasakit sa iyang balaang espiritu. Siya karon nahimo na nga ilang kaaway; siya nakiggubat batok kanila.” (Isaias 63:10) Si Jehova nagpasidaan nga bisan pag siya maoy Diyos nga maluluy-on ug mapuangoron, “siya dili gayod magpahigawas gikan sa silot.” (Exodo 34:6, 7) Gihan-ay sa mga Israelinhon ang ilang kaugalingon alang sa silot pinaagi sa pagbatasan sa pagkamasuklanon. “Ayaw kalimti kon giunsa nimo pagpasuko si Jehova nga imong Diyos didto sa kamingawan,” nagpahinumdom si Moises. “Sukad sa adlaw sa imong paggula sa yuta sa Ehipto hangtod sa inyong pag-abot niining dapita kamo nagmasuklanon kang Jehova.” (Deuteronomio 9:7) Pinaagi sa pagsagang sa maayong mga epekto sa espiritu sa Diyos, sila nagpasakit o nagpaguol niini. (Efeso 4:30) Ilang gipugos si Jehova nga mahimong ilang kaaway.—Levitico 26:17; Deuteronomio 28:63.
19, 20. Unsang mga butang ang nahinumdoman sa mga Hudiyo, ug ngano?
19 Taliwala sa ilang kasakitan, ang pipila ka Hudiyo natukmod sa pagpamalandong bahin sa kagahapon. Matod ni Isaias: “Ang Usa nahinumdom sa mga adlaw kanhi, kang Moises nga iyang alagad: ‘Hain man ang Usa nga nagpagawas kanila gikan sa dagat uban sa mga magbalantay sa iyang panon? Hain man ang Usa nga nagbutang sa sulod niya sa Iyang balaang espiritu? Ang Usa nga nagpauban sa Iyang matahom nga bukton sa tuong kamot ni Moises; ang Usa nga nagpikas sa mga tubig gikan sa ilang atubangan aron sa paghimog usa ka ngalan nga mohangtod sa panahong walay tino alang sa iyang kaugalingon; ang Usa nga nagpalakaw kanila latas sa nagbul-og nga katubigan mao nga, sama sa usa ka kabayo diha sa kamingawan, sila wala mapandol? Ingon sa dihang ang usa ka mananap molugsong ngadto sa patag sa walog, ang mismong espiritu ni Jehova nagpapahulay kanila.’”—Isaias 63:11-14a.d
20 Oo, kay nag-antos sa mga resulta sa pagkadili-masinugtanon, ang mga Hudiyo nangandoy sa mga adlaw sa dihang si Jehova mao ang ilang Manluluwas inay ilang kaaway. Sila nahinumdom kon sa unsang paagi ang ilang “mga magbalantay,” si Moises ug Aaron, nagdala kanilang luwas latas sa Pulang Dagat. (Salmo 77:20; Isaias 51:10) Sila nahinumdom sa panahon nga inay pagul-on ang espiritu sa Diyos, sila gitultolan niini pinaagi sa paggiya ni Moises ug sa ubang tinudlo-sa-espiritu nga mga ansiyano. (Numeros 11:16, 17) Ilang nahinumdoman usab nga nakakita sila sa “matahom nga bukton” sa kusog ni Jehova nga gigamit alang kanila pinaagi ni Moises! Sa ngadtongadto, gikuha sila sa Diyos gikan sa dako ug makalilisang nga kamingawan ug gidala sila ngadto sa usa ka yutang nag-agay sa gatas ug dugos—usa ka dapit nga pahulayanan. (Deuteronomio 1:19; Josue 5:6; 22:4) Apan, karon ang mga Israelinhon nag-antos tungod kay nawad-an sa ilang maayong relasyon uban sa Diyos!
‘Usa ka Matahom nga Ngalan Alang sa Iyang Kaugalingon’
21. (a) Unsang dakong pribilehiyo ang nabatonan unta sa Israel may kalabotan sa ngalan sa Diyos? (b) Unsa ang pangunang katarongan sa Diyos sa pagpagawas sa mga kaliwat ni Abraham gikan sa Ehipto?
21 Bisan pa, ang materyal nga kapildihan sa mga Israelinhon gamay kaayo kon itandi sa kapildihan sa pribilehiyo nga ilang gisalikway, nga mao, ang pagpakig-ambit sa paghimaya sa ngalan sa Diyos. Si Moises misaad sa mga Hudiyo: “Si Jehova magtukod kanimo ingong usa ka katawhan nga balaan alang kaniya, ingon sa iyang gipanumpa kanimo, tungod kay nagpadayon ka sa pagtuman sa kasugoan ni Jehova nga imong Diyos, ug naglakaw ka sa iyang mga dalan. Ug ang tanang katawhan sa yuta makakita nga ikaw gitawag sa ngalan ni Jehova, ug sila sa pagkatinuod mangahadlok kanimo.” (Deuteronomio 28:9, 10) Sa dihang si Jehova milihok sa pagpanalipod sa mga kaliwat ni Abraham, nga nagluwas kanila gikan sa kaulipnan sa Ehipto, siya wala lang maghimo niana aron ang kinabuhi mahimong mas sayon o kahimut-anan alang kanila. Siya milihok alang sa butang nga labi pang hinungdanon—ang iyang ngalan. Oo, siya nagtino nga ang iyang ngalan “ikapahayag sa tibuok yuta.” (Exodo 9:15, 16) Ug sa dihang ang Diyos nagpakitag kaluoy human sa pagkamasuklanon sa Israel sa kamingawan, ang iyang katarongan sa paghimo niana maoy dili lamang pagkamabination. Si Jehova mismo miingon: “Ako milihok alang sa akong kaugalingong ngalan aron kini dili mapasipalahan atubangan sa mga mata sa kanasoran.”—Ezequiel 20:8-10.
22. (a) Sa umaabot, nganong ang Diyos makig-away na usab alang sa iyang katawhan? (b) Sa unsang mga paagi ang atong gugma alang sa ngalan sa Diyos mag-apektar sa atong mga lihok?
22 Pagkakusganon ang panghinapos nga gihatag niadto ni Isaias sa maong tagna! Siya miingon: “Sa ingon gitultolan mo ang imong katawhan aron sa paghimog usa ka matahom nga ngalan alang sa imong kaugalingon.” (Isaias 63:14b) Tin-aw nga masabtan karon kon nganong si Jehova nakig-away nga kusganon sa kaayohan sa iyang katawhan. Kini mao ang paghimog usa ka matahom nga ngalan alang sa iyang kaugalingon. Ang tagna ni Isaias sa ingon nagsilbing usa ka kusganong pahinumdom nga ang pagdala sa ngalan ni Jehova maoy usa ka makapahingangha nga pribilehiyo ug usa ka dakong responsabilidad. Ang matuod nga mga Kristohanon karong adlawa nahigugma sa ngalan ni Jehova nga labaw pa kay sa ilang mga kinabuhi mismo. (Isaias 56:6; Hebreohanon 6:10) Sila nag-ayad sa pagbuhat sa bisan unsa nga lagmit makadalag kaulawan sa maong sagradong ngalan. Mosanong sila sa maunongong gugma sa Diyos pinaagi sa pagpabiling maunongon kaniya. Ug tungod kay sila nahigugma sa matahom nga ngalan ni Jehova, sila nangandoy sa adlaw sa dihang iyang pagatamaktamakan ang iyang mga kaaway diha sa pug-anan sa bino sa iyang kasuko—dili lamang tungod kay kini makahatag kanilag kaayohan kondili tungod kay kini motultol sa paghimaya sa ngalan sa Diyos nga ilang gihigugma.—Mateo 6:9.
[Mga footnote]
a Ang mga Herodes sa unang siglo K.P. maoy mga Edomhanon.
b Ang pamulong nga “tuig sa akong mga linukat” tingali nagtumong sa yugto sa panahon nga sama sa terminong “adlaw sa panimalos.” Matikdi kon giunsa paggamit ang susamang mga termino sa Isaias 34:8.
c Si Jehova nagpahayag ug kahingangha nga walay naghatag ug tabang. Mahimong isipon gayod nga makapahingangha nga sa duolag 2,000 ka tuig pagkatapos sa kamatayon ni Jesus, ang mga gamhanan sa katawhan nagsupak gihapon sa kabubut-on sa Diyos.—Salmo 2:2-12; Isaias 59:16.
d Kining bersikuloha mahimo usab nga mosugod: “Siya nahinumdom.” (Isaias 63:11, potnot) Bisan pa niana, kini wala gayod magpasabot nga si Jehova mao ang usa nga nahinumdom. Ang mosunod nga mga pulong nagpahayag sa mga pagbati sa katawhan sa Diyos ug dili kang Jehova mismo. Ang Soncino Books of the Bible sa ingon naghubad niining mga pulonga: “Unya ang Iyang katawhan nahinumdom sa mga adlaw sa karaan.”
[Hulagway sa panid 359]
Si Jehova adunay dagkong mga paglaom alang sa iyang katawhan