Ang Diyos ba Dunay Empatiya?

Ang empatiya mao ang “katakos nga mobati sa mga pagbati ug kasinatian sa uban pinaagi sa pagbutang sa kaugalingon sa kahimtang sa uban.” Ang usa ka mental-health expert nga si Dr. Rick Hanson, miingon nga “natural na kanato ang pagpakitag empatiya.”

HUNAHUNAA KINI: Nganong duna tay katakos sa pagpakitag empatiya, kinaiya nga wala sa ubang linalang? Ang Bibliya nag-ingon nga gilalang ta sumala sa larawan sa Diyos. (Genesis 1:26) Kay gilalang ta sumala sa larawan sa Diyos, duna kitay katakos sa pagsundog sa iyang personalidad ug makapakita sa iyang maayong mga kinaiya. Dihang ang tawo motabang sa uban tungod sa empatiya, iyang gisundog ang atong maluluy-ong Maglalalang, si Jehova nga Diyos.—Proverbio 14:31.

Kay dunay empatiya ang Diyos, dili niya gustong makita tang nag-antos. Kon bahin sa mga tawo sa karaang Israel, nga nag-antos sa pagkaulipon sa Ehipto ug nakasinatig 40 ka tuig nga kalisdanan sa kamingawan, ang Bibliya nag-ingon: “Siya nasakitan sa tanan nilang kasakit.” (Isaias 63:9) Matikdi nga ang Diyos wala lang basta mahibalo sa ilang mga kasakit. Iyang gibati ang ilang kasakit. Siya miingon: “Nahibalo gyod ko sa ilang mga kasakit.” (Exodo 3:7) “Bisan kinsa nga nagtandog kaninyo,” ang Diyos nag-ingon, “nagtandog sa akong kalimutaw.” (Zacarias 2:8) Kon pasakitan ta, masakitan sab ang Diyos.

Ang Bibliya nagpasalig kanato nga bisag mobati tang dili angayan sa empatiya sa Diyos, “ang Diyos mas labaw sa atong kasingkasing ug nahibalo sa tanang butang.” (1 Juan 3:19, 20) Ang Diyos mas nakaila nato kay sa atong kaugalingon. Siya nahibalo pag-ayo sa atong kahimtang, hunahuna, ug pagbati. Siya dunay empatiya kanato.

Ang Bibliya nagpasalig nato

• “Motawag ka, ug si Jehova motubag; motuaw ka alang sa tabang, ug siya moingon, ‘Ania ko!’”—ISAIAS 58:9.

• “‘Kay nahibalo ko pag-ayo kon unsay akong buhaton kaninyo,’ miingon si Jehova, ‘hatagan mo nakog kalinaw, ug dili katalagman, aron makabaton mog maayong kaugmaon ug paglaom. Ug kamo motawag kanako ug moanhi ug moampo kanako, ug ako mamati kaninyo.’”—JEREMIAS 29:11, 12.

• “Tigoma ang akong mga luha sa imong panit nga sudlanan. Dili ba natala man kini sa imong basahon?”—SALMO 56:8.

Ang pagkahibalo ba nga ang Diyos dunay empatiya makatabang nato nga makalahutay sa kalisdanan? Pamalandonga ang kasinatian ni Maria:

“Gibati nako nga lisod ug way ayo ang kinabuhi dihang nasinati nako ang grabeng kaguol kay namatay ang akong 18 anyos nga anak nga lalaki human sa iyang duha ka tuig nga pag-antos sa kanser. Nasuko ko kang Jehova kay wala niya ayoha ang akong anak!

“Paglabayg unom ka tuig, usa ka mahigugmaon ug maluluy-ong higala sa among kongregasyon ang naminaw nako samtang akong gisulti niya ang akong gibati nga si Jehova wala nahigugma nako. Naminaw ra gyod siya sulod sa pipila ka oras ug dayon iyang gikutlo ang teksto nga nakapatandog nako—ang 1 Juan 3:19, 20, nga nag-ingon: ‘Ang Diyos mas labaw sa atong kasingkasing ug nahibalo sa tanang butang.’ Iyang gipasabot nako nga si Jehova nakasabot sa atong mga kasakit.

“Bisan pa niana, wala dayon mawala ang akong kasuko! Dayon akong gibasa ang Salmo 94:19, nga nag-ingon: ‘Dihang nalumsan ko sa mga kabalaka, ang imong paghupay nakapalipay kanako.’ Para gyod nako ning tekstoha! Sa ngadtongadto, dihang akong iampo kang Jehova ang akong mga kalisdanan mahupayan na ko kay nahibalo ko nga siya maminaw ug makasabot nako.”

Makapahupay gyod ang pagkahibalo nga ang Diyos nakasabot ug dunay empatiya kanato! Pero nganong daghan ang pag-antos? Silot ba na sa Diyos tungod sa atong mga sala? Duna bay himoon ang Diyos aron taposon ang tanang pag-antos? Kini tubagon sa mosunod nga mga artikulo.