Si Jehova Naghatag ug Garantiya sa Iyang Saad nga Paraiso

 1. Unsay mensahe ni propetang Isaias sa mga Israelinhon?

SI PROPETANG Isaias miingon nga si Jehova “Diyos sa kamatuoran.” Ang pulong nga gihubad ug “kamatuoran” literal nga nagpasabot ug “amen.” (Isa. 65:16, footnote) Ang “amen” nagpasabot nga “matuman kana,” o “segurado.” Dihang gamiton sa Bibliya ang pulong “amen” bahin kang Jehova o Jesus, garantiya ni nga tinuod ang gisulti. Busa, klaro ang mensahe ni Isaias sa mga Israelinhon: Kanunay nga kasaligan ang isulti ni Jehova. Gipamatud-an kana ni Jehova pinaagi sa pagtuman sa tanan niyang saad.

 2. Nganong makasalig ta sa mga saad ni Jehova bahin sa atong kaugmaon, ug unsang mga pangutana ang atong konsiderahon?

² Makasalig pod ba ta sa mga saad ni Jehova bahin sa atong kaugmaon? Halos 800 ka tuig human sa panahon ni Isaias, gipatin-aw ni apostol Pablo kon nganong kanunayng kasaligan ang mga saad sa Diyos. Si Pablo miingon: “Ang Diyos dili gayod mamakak.” (Heb. 6:18) Sama nga ang tubod sa tab-ang nga tubig dili makapatunghag parat nga tubig, si Jehova, ang Tinubdan sa kamatuoran, dili makasultig bakak. Busa bug-os tang makasalig sa tanang isulti ni Jehova, apil na ang tanan niyang saad bahin sa atong kaugmaon. Niini nga artikulo, atong konsiderahon kini nga mga pangutana: Unsay gisaad ni Jehova nga iyang ihatag kanato sa umaabot? Ug unsang garantiya ang gihatag ni Jehova aron pasaligan ta nga matuman ang iyang saad?

 3. (a) Unsang saad ang paborito kaayo sa mga alagad sa Diyos? (Pinadayag 21:3, 4) (b) Unsay reaksiyon sa uban dihang sultihan nato sila niini nga saad?

³ Atong hisgotan ang saad nga paborito kaayo sa mga alagad sa Diyos sa tibuok kalibotan. (Basaha ang Pinadayag 21:3, 4.) Si Jehova nagsaad nga sa umaabot “ang kamatayon mawala na, ug wala na unyay pagbangotan, pagtiyabaw, ug kasakit.” Daghan nato ang mogamit niining makapahupay nga teksto dihang magsangyaw bahin sa kinabuhi sa Paraiso. Unsay reaksiyon sa uban dihang sultihan nato sila niini nga saad? Tingali moingon sila, “Nindot na, pero morag imposible man nang mahitabo.”

 4. (a) Unsay nahibaloan na daan ni Jehova? (b) Gawas sa paghatag ug saad, unsa pay gihimo ni Jehova?

⁴ Siyempre, dihang gigiyahan ni Jehova si apostol Juan nga isulat kini nga saad bahin sa kinabuhi sa Paraiso, nahibalo Siya nga sa atong panahon, isulti nato sa uban kini nga paglaom dihang magsangyaw bahin sa Gingharian. Nahibalo pod si Jehova nga daghan ang malisdan sa pagtuo niining gisaad nga “bag-ong mga butang.” (Isa. 42:9; 60:2; 2 Cor. 4:3, 4) Busa sa unsang paagi nato mapasaligan ang uban—ug ang atong kaugalingon—nga mahitabo gyod ang mga panalangin nga gihisgotan sa Pinadayag 21:3, 4? Si Jehova wala lang basta maghatag ug makapalipay nga saad. Naghatag pod siya ug makapakombinsir nga mga rason kon nganong makasalig ta niana. Unsa na nga mga rason?

 5. Nganong makasalig ta sa saad sa Diyos nga Paraiso, ug asa nato makita ang mga rason?

⁵ Sa sunod nga mga bersikulo, makita nato ang mga rason kon nganong makasalig ta sa saad ni Jehova nga Paraiso. Atong mabasa: “Ang Usa nga naglingkod sa trono miingon: ‘Tan-awa! Ginabag-o nako ang tanang butang.’ Siya usab miingon: ‘Isulat kini, kay kining mga pulonga kasaligan ug matuod.’ Ug siya miingon kanako: ‘Nahitabo na kini! Ako ang Alfa ug ang Omega, ang sinugdanan ug ang kataposan.’”—Pin. 21:5, 6a.

 6. Nganong ang Pinadayag 21:5, 6 makapalig-on sa atong pagsalig sa saad sa Diyos?

⁶ Nganong kini nga teksto makapalig-on sa atong pagsalig sa saad sa Diyos? Bahin niini nga mga bersikulo, ang librong Pinadayag nag-ingon: “Si Jehova samag nagpirmag usa ka garantiya o kalig-onan [titulo] niining umaabot nga mga panalangin alang sa matinumanong katawhan.”b Ang saad sa Diyos narekord sa Pinadayag 21:3, 4. Pero sa bersikulo 5 ug 6, atong makita ang mga pulong nga nagsilbing pirma ni Jehova, nga naghatag ug garantiya nga kasaligan gyod ang iyang saad. Atong susihon ang mga pulong nga gigamit ni Jehova ingong garantiya.

 7. Nganong espesyal ang unang bahin sa garantiya sa Diyos, ug unsay gipakita niana?

⁷ Ang garantiya sa Diyos nagsugod niining mga pulonga: “Ang Usa nga naglingkod sa trono miingon.” (Pin. 21:5a) Espesyal ning mga pulonga kay kini ang usa sa tulo lang ka higayon sa basahon sa Pinadayag nga si Jehova nagsulti diha sa panan-awon. Busa kini nga garantiya wala ihatag pinaagi sa usa ka gamhanang anghel ug bisan sa gibanhawng si Jesus; kini gikan mismo kang Jehova! Kini nagpakita nga kasaligan gyod ang sunod niyang gisulti. Ngano? Kay si Jehova “dili gyod mamakak.” (Tito 1:2) Busa makasalig gyod ta sa giingon sa Pinadayag 21:5, 6.

 8. Giunsa pagpasiugda ni Jehova nga matuman ang iyang saad? (Isaias 46:10)

⁸ Sunod, atong konsiderahon ang pulong “Tan-awa!” (Pin. 21:5) Ang Gregong pulong nga gihubad ug “tan-awa!” balikbalik nga gigamit sa basahon sa Pinadayag. Ang usa ka reperensiya nag-ingon nga kini nga pulong gigamit aron “mapokus ang atensiyon sa magbabasa sa sunod nga mga pulong.” Unsay sunod nga gisulti sa Diyos? Siya miingon: “Ginabag-o nako ang tanang butang.” Tinuod, sa umaabot pa himoon ni Jehova kini nga mga kausaban, pero kay segurado man siya nga matuman ang iyang saad, iya kining gisulti nga sama bag nagakahitabo na kini.—Basaha ang Isaias 46:10.

 9. (a) Unsang duha ka butang ang gitumong ni Jehova dihang siya miingon: “Ginabag-o nako ang tanang butang”? (b) Unsay mahitabo sa presenteng “langit” ug “yuta”?

⁹ Atong susihon ang sunod nga giingon sa Pinadayag 21:5: “Ginabag-o nako ang tanang butang.” Niini nga kapitulo, kini nagtumong sa duha ka butang nga himoon ni Jehova—pagtangtang ug pagpasig-uli. Una, unsay tangtangon ni Jehova? Sa Pinadayag 21:1, atong mabasa: “Ang unang langit ug ang unang yuta nahanaw na.” “Ang unang langit” nagtumong sa tawhanong mga gobyerno nga giimpluwensiyahan ni Satanas ug sa iyang mga demonyo. (Mat. 4:8, 9; 1 Juan 5:19) Sa Bibliya, ang “yuta” gigamit pod sa pagtumong sa mga tawo. (Gen. 11:1; Sal. 96:1) Busa, “ang unang yuta” nagtumong sa daotang katawhan karon. Dili lang kay basta i-remodel o ayohon ni Jehova ang presenteng “langit” ug “yuta”; iya kining tangtangon ug pulihan. Iyang pulihan ang presenteng langit ug yuta ug “bag-ong langit ug bag-ong yuta”—sa ato pa, bag-ong gobyerno ug bag-ong katilingban sa katawhan.

10. Unsay bag-ohon ni Jehova?

¹⁰ Sa Pinadayag 21:5, mabasa nato ang giingon ni Jehova bahin sa mga butang nga iyang bag-ohon. Matikdi nga si Jehova wala moingon: “Naghimo kog bag-ong mga butang.” Hinuon, siya miingon: “Ginabag-o nako ang tanang butang.” Himoon ni Jehova nga samag bag-o ang yuta ug ang mga tawo pinaagi sa pagpasig-uli kanila sa pagkahingpit. Sama sa gitagna ni Isaias, ang tibuok yuta mahimong samag garden nga park—usa ka tibuok kalibotang Eden. Ang matag usa pod nato mabag-o, o mapasig-uli. Ang mga bakol, buta ug amang ayohon, ug bisan ang mga patay banhawon.—Isa. 25:8; 35:1-7.

11. Unsay gisugo ni Jehova kang Juan, ug ngano?

¹¹ Unsa pa ang laing bahin sa garantiya sa Diyos? Giingnan ni Jehova si Juan: “Isulat kini, kay kining mga pulonga kasaligan ug matuod.” (Pin. 21:5) Si Jehova wala lang basta maghatag sa sugo nga “isulat.” Naghatag pod siyag rason. Siya miingon: “Kay kining mga pulonga kasaligan ug matuod”—buot ipasabot, ang mga pulong sa Diyos kasaligan ug matuman gyod. Mapasalamaton ta nga gisunod ni Juan ang sugo nga “isulat.” Tungod ana, atong mabasa ang saad sa Diyos nga Paraiso ug mapamalandong ang nindot nga mga panalangin nga nagpaabot nato.

12. Nganong si Jehova miingon: “Nahitabo na kini!”

¹² Unsay sunod nga giingon sa Diyos? “Nahitabo na kini!” (Pin. 21:6) Matikdi nga si Jehova nagsulti nga sama bag nahitabo na ang tanang butang bahin sa iyang gisaad nga Paraiso. Ug makasulti siya niana kay walay makapugong niya sa pagtuman sa iyang katuyoan. Naghatag pod si Jehova ug lain pang lig-on nga pasalig nga matuman ang iyang saad. Ato nang makita sa sunod nga bahin sa iyang garantiya. Unsa kana?

13. Nganong si Jehova miingon: “Ako ang Alfa ug ang Omega”?

¹³ Sa nahisgotan na sa miagi, si Jehova mismo katulo misulti diha sa mga panan-awon ni Juan. (Pin. 1:8; 21:5, 6; 22:13) Sa matag higayon niana, si Jehova miingon: “Ako ang Alfa ug ang Omega.” Ang letrang alfa mao ang sinugdanan sa Grego nga alphabet, ug ang omega mao ang kataposan. Pinaagi sa pagsulti nga siya “ang Alfa ug ang Omega,” gipakita ni Jehova nga kon naa siyay sugdan, iya gyod ning humanon hangtod nga molampos kini.

14. (a) Paghatag ug pananglitan dihang si Jehova samag miingon ug “Alfa,” ug kon kanus-a siya samag moingon ug “Omega.” (b) Unsang garantiya ang naa sa Genesis 2:1-3?

¹⁴ Human buhata ni Jehova si Adan ug Eva, gisulti Niya ang iyang orihinal nga katuyoan para sa tawo ug sa yuta. Kini ang atong mabasa sa Bibliya: “Ang Diyos nagpanalangin kanila ug miingon: ‘Panganak mo ug pagdaghan, pun-a ang yuta ug gamhi kini.’” (Gen. 1:28) Nianang tungora, si Jehova samag miingon ug “Alfa.” Klaro niyang gisulti ang iyang katuyoan: Moabot ang panahon nga pun-on sa hingpit, masinugtanong mga kaliwat ni Adan ug Eva ang yuta ug himoon kining paraiso. Nianang panahona sa umaabot, si Jehova samag moingon ug “Omega.” Dihang nahuman ni Jehova paglalang “ang langit ug ang yuta ug ang tanang naa niini,” siya naghatag ug garantiya. Makita kini sa Genesis 2:1-3. (Basaha.) Gilain ni Jehova ang ikapitong adlaw ug gihimo niya kining sagrado. Unsay gipasabot niana? Si Jehova naghatag ug garantiya nga iya gyong tumanon ang iyang katuyoan para sa tawo ug sa yuta. Kini bug-os nga matuman sa kataposan sa ikapitong adlaw.

15. Nganong posibleng naghunahuna si Satanas nga napugngan niya ang katuyoan sa Diyos para sa tawo?

¹⁵ Human mirebelde si Adan ug Eva, sila nahimong makasasala ug ilang napasa ang sala ug kamatayon ngadto sa ilang mga kaliwat. (Roma 5:12) Tungod ana, mora bag napugngan ni Satanas ang katuyoan sa Diyos nga pun-on ang yuta ug hingpit, masinugtanong katawhan; daw gihimong imposible ni Satanas nga mosulti si Jehova ug “Omega.” Tingali nagtuo si Satanas nga si Jehova gamay ra kaayog kapiliang solusyon sa pagtuman sa Iyang katuyoan. Ang usa niana mao nga patyon si Adan ug Eva ug dayon maghimog laing hingpit nga magtiayon aron matuman ang Iyang katuyoan para sa tawo. Pero kon himoon na sa Diyos, akusahan Siya sa Yawa ingong bakakon. Ngano? Kay sumala sa narekord sa Genesis 1:28, giingnan ni Jehova si Adan ug Eva nga ang yuta mapuno sa ilang mga kaliwat.

16. Ngano tingaling naghunahuna si Satanas nga maakusahan niya si Jehova nga wala makatuman sa Iyang saad?

¹⁶ Unsa pa kahay nahunahunaan ni Satanas nga posibleng himoon sa Diyos? Tingali naghunahuna si Satanas nga tugotan ni Jehova si Adan ug Eva nga magpatunghag dili hingpit nga kaliwat kinsa imposible na nga mahimong hingpit. (Eccl. 7:20; Roma 3:23) Kon mao, seguradong akusahan sa Yawa si Jehova nga wala makatuman sa Iyang saad. Ngano? Tungod kay kini nga solusyon dili makatuman sa katuyoan sa Diyos—nga ang Paraisong yuta mapuno sa hingpit, masinugtanong mga kaliwat ni Adan ug Eva.

17. Giunsa pagsulbad ni Jehova ang pagrebelde ni Satanas ug sa unang mga tawo, ug unsay resulta niana sa umaabot? (Tan-awa sab ang hulagway.)

¹⁷ Maayo kaayo ang solusyon nga gipili ni Jehova sa pagsulbad sa pagrebelde ni Satanas ug sa unang mga tawo, ug seguradong wala gyod to damha ni Satanas. (Sal. 92:5) Gipamatud-an ni Jehova nga dili siya bakakon; iyang gipakita nga tinuod ang iyang gisulti kay gitugotan niya si Adan ug Eva nga makabaton ug mga anak. Gipamatud-an pod ni Jehova nga wala siya mapakyas; hinuon siya nagmadaogon. Iyang giseguro nga matuman ang iyang katuyoan pinaagi sa pagtaganag “kaliwat” nga magluwas sa masinugtanong mga kaliwat ni Adan ug Eva. (Gen. 3:15; 22:18) Seguradong nakurat si Satanas sa kahikayan nga gihimo ni Jehova bahin sa lukat! Ngano? Tungod kay ang lukat gibase sa dili hakog nga gugma. (Mat. 20:28; Juan 3:16) Si Satanas wala niana nga hiyas kay siya hakog. Busa unsay mahitabo tungod sa kahikayan sa lukat? Human sa Usa ka Libo ka Tuig nga Pagmando sa Kristo, ang hingpit, masinugtanong mga kaliwat ni Adan ug Eva magpuyo sa paraisong yuta—nga maoy orihinal nga katuyoan ni Jehova. Nianang panahona, si Jehova samag moingon ug “Omega.”

18. Unsa ang tulo ka pasalig nga gihatag sa Diyos kanato? (Tan-awa sab ang kahong “Tulo ka Rason nga Mosalig sa Saad ni Jehova.”)

¹⁸ Sumala sa atong nahisgotan, unsang mga pasalig ang puwede natong isulti sa uban aron makatuo sila nga matuman gyod ang saad sa Diyos nga Paraiso? Una, si Jehova mismo ang nagsaad. Kini ang narekord sa basahon sa Pinadayag: “Ang Usa nga naglingkod sa trono miingon: ‘Tan-awa! Ginabag-o nako ang tanang butang.’” Si Jehova dunay kaalam, gahom, ug tinguha nga tumanon ang iyang saad. Ikaduha, segurado kaayo nga matuman ang iyang saad, kay sa panglantaw ni Jehova kini samag nahitabo na. Mao nga siya miingon: “Kining mga pulonga kasaligan ug matuod. . . . Nahitabo na kini!” Ikatulo, dihang naay sugdan si Jehova, iya gyod ning humanon hangtod nga molampos kini, sumala sa gipasiugda niini nga ekspresyon: “Ako ang Alfa ug ang Omega.” Pamatud-an ni Jehova nga bakakon gyod si Satanas ug dili siya makapugong kang Jehova sa pagtuman sa Iyang katuyoan.

19. Dihang malisdan ang mga tawo nga motuo sa saad sa Diyos nga Paraiso, unsay puwede nimong himoon?

¹⁹ Hinumdomi nga sa matag higayon nga imong isulti sa uban ang garantiya sa Diyos, mas molalom ang imong pagsalig sa mga saad ni Jehova. Pero unsa kahay imong himoon kon, human nimog basa sa Pinadayag 21:4 bahin sa gisaad nga Paraiso, naay moingon, “Nindot na, pero morag imposible man nang mahitabo”? Puwede nimong basahon ug ipatin-aw ang bersikulo 5 ug 6. Ipakita kon sa unsang paagi si Jehova naggarantiya sa iyang saad pinaagi sa “pagpirma” niini.—Isa. 65:16.