Mapasalamaton Ka ba sa Organisasyon ni Jehova?
“Mao kini ang giingon ni Jehova: ‘Ang langit mao ang akong trono, ug ang yuta mao ang akong tumbanan.’”—ISAIAS 66:1.
1, 2. (a) Unsang makitang ebidensiya sa organisasyon ni Jehova ang imong mapunting? (b) Diin nagpuyo si Jehova?
NAGTUO ka ba nga si Jehova adunay usa ka organisasyon? Kon mao, nganong nagtuo ka man niini? Tingali motubag ka: ‘Aw, kita adunay Kingdom Hall. Kita adunay maayo kaayong pagkahikayng kongregasyon nga adunay lawas sa mga ansiyano. Kita adunay tukmang pagkatudlo nga magtatan-aw sa sirkito nga regular nga nagaduaw kanato. Kita nagatambong sa organisadong mga asembliya ug mga kombensiyon. Kita adunay sangang buhatan sa Watch Tower Society sa atong nasod. Siyempre, kining tanan ug daghan pa nagpamatuod nga si Jehova adunay nagalihok nga organisasyon.’
2 Kining mga bahina nahisama rag ebidensiya sa usa ka organisasyon. Apan kon ang ato rang nakita ug giila mao ang ania dinhi sa yuta, kita wala gayod makasabot sa bug-os sa organisasyon ni Jehova. Gisultihan ni Jehova si Isaias nga Iyang tumbanan lamang ang yuta, apan ang langit mao ang Iyang trono. (Isaias 66:1) Unsang “langit” ang gipunting ni Jehova? Ang ato bang atmospera? Ang wanang ba? O ang ubang ang-ang ba sa kinabuhi? Si Isaias naghisgot bahin sa “hataas nga puloy-anan sa pagkabalaan ug katahom” ni Jehova, ug ang salmista naghubit niining langita ingong “ang natukod nga dapit nga iyang gipuy-an.” Busa, ang “langit” diha sa Isaias 66:1 nagpunting sa dili-makitang espiritu nga gingharian diin gihuptan ni Jehova ang kinalabwan, o kinadak-ang, katungdanan.—Isaias 63:15; Salmo 33:13, 14.
3. Sa unsang paagi atong mabuntog ang mga pagduhaduha?
3 Busa, kon kita buot gayod makahibalo ug makasabot sa organisasyon ni Jehova, kita kinahanglang motan-aw sa kalangitan. Ug nianang bahina nagkaproblema ang uban. Sanglit ang langitnong organisasyon ni Jehova dili-makita, sa unsang paagi kita nahibalo nga kini tinuod gayod nga naglungtad? Ang uban tingali moagig pagduhaduha, nga mangutana, ‘Sa unsang paagi makaseguro kita?’ Aw, sa unsang paagi ang pagtuo makabuntog sa pagduhaduha? Duha ka dagkong paagi mao ang makugihong personal nga pagtuon sa Pulong sa Diyos ug regular nga pagtambong ug pagpakigbahin sa Kristohanong mga tigom. Sa ingon atong makita ang kahayag sa kamatuoran nga magwala sa atong mga pagduhaduha. Dihay ubang mga alagad sa Diyos nga nagduhaduha. Atong hisgotan ang kahimtang sa sulogoon ni Elias sa dihang ang Israel giatake sa hari sa Syria.—Itandi ang Juan 20:24-29; Santiago 1:5-8.
Ang Usa nga Nakakita sa Langitnong mga Panon
4, 5. (a) Unsay problema sa sulugoon ni Eliseo? (b) Sa unsang paagi gitubag ni Jehova ang pag-ampo ni Eliseo?
4 Nagpadala ang hari sa Syria ug daghang kasundalohan sa gabii ngadto sa Dotan aron sa pagdakop kang Eliseo. Sa dihang ang sulugoon ni Elias mibangon sayo sa buntag ug migawas, tingali aron makahanggab ug preskong hangin diha sa patag nga atop sa ilang Tungang Silangang balay, pagkadako sa iyang kakurat! Gilibotan sa tibuok kasundalohang mga Siryanhon nga nagsakayg mga kabayo ug mga karo ang lungsod, nga naghulat sa pagdakop sa manalagna sa Diyos. Ang sulugoon misinggit kang Eliseo: “Pastilan, agalon ko! Unsay atong himoon?” Dayag, sa kalmado ug uban sa dakong pagtuo, si Eliseo mitubag: “Ayaw kahadlok, kay sila nga ania uban kanato mas daghan pa kay sa nagauban kanila.” Tingali ang sulugoon nangutana, ‘Hain man sila? Wala akoy nakita kanila!’ Usahay ingon tingali usab niana ang atong problema—ang pagkadili-makakita uban sa mga mata sa pagsabot, o sa pag-ila, sa langitnong mga panon.—2 Hari 6:8-16; Efeso 1:18.
5 Si Eliseo nag-ampo nga mabuksan ang mga mata sa iyang sulugoon. Unsay sunod nga nahitabo? “Dihadiha gibuksan ni Jehova ang mga mata sa iyang katabang, mao nga siya nakakita; ug, tan-awa! ang mga bukid napuno sa mga kabayo ug mga karo nga kalayo nga naglibot kang Eliseo.” (2 Hari 6:17) Oo, iyang nakita ang langitnong mga panon, mga kasundalohang manulonda nga naghulat sa pagpanalipod sa sulugoon sa Diyos. Karon iyang nasabtan ang pagsalig ni Eliseo.
6. Sa unsang paagi kita makakuha ug katin-awan sa langitnong organisasyon ni Jehova?
6 May mga panahon ba nga kita usahay adunay problema nga susama sa problema sa sulugoon ni Eliseo? Ang ato ba lang makita mao ang pisikal nga bahin sa mga kahimtang nga nagahulga kanato o sa Kristohanong buluhaton sa pipila ka nasod? Kon mao, makalaom ba kita ug usa ka linain nga panan-awon aron kita madan-agan? Dili, tungod kay kita nakabaton ug usa ka butang nga wala mabatoni sa sulugoon ni Eliseo—usa ka tibuok basahon nga nasudlan ug daghang panan-awon, ang Bibliya, nga makahatag kanato ug katin-awan sa langitnong organisasyon. Kanang dinasig nga Pulong naghatag usab ug mga prinsipyo nga nagagiya aron sa pagtul-id sa atong panghunahuna ug sa atong dalan sa kinabuhi. Apan, kinahanglang maningkamot kita sa pagpangitag pagsabot ug sa pag-ugmad sa pagpabili sa kahikayan ni Jehova. Ug kana atong mahimo pinaagi sa personal nga pagtuon, lakip sa pag-ampo ug pagpamalandong.—Roma 12:12; Filipos 4:6; 2 Timoteo 3:15-17.
Pagtuon Aron Makahibalo
7. (a) Unsa kahay problema sa pipila labot sa personal nga pagtuon sa Bibliya? (b) Nganong ang personal nga pagtuon takos sa paningkamot?
7 Ang personal nga pagtuon makalaay alang sa daghang tawo, sama niadtong dili gayod malingawng magtuon sa eskuylahan o wala gayod makahigayon sa pagtuon. Apan, kon kita buot makahibalo ug makasabot sa organisasyon ni Jehova pinaagi sa atong mga mata sa pagsabot, kinahanglang atong ugmaron ang kaikag sa pagtuon. Ganahan ka ba ug lamiang pagkaon kon walay pagpangandam? Sama sa isulti kanimo sa tanang mga maestro kosinero o magluluto, daghang trabaho ang gikinahanglan sa pagpangandam ug lamiang pagkaon. Bisan pa, kini mahimong kan-on sa tunga sa oras o ubos pa. Sa laing bahin, ang personal nga mga kaayohan sa pagtuon mahimong molungtad sa tibuok-kinabuhi. Ang personal nga pagtuon anam-anam nga matun-an nga kaikagan kon atong makita ang kauswagan nga atong mahimo. Si apostol Pablo tukmang nag-ingon nga kinahanglang magpadayon kita sa paghatag ug pagtagad sa atong kaugalingon ug sa atong pagpanudlo ug magpadayon sa pagpadapat sa publikong pagbasa. Gikinahanglan ang makanunayong paningkamot, apan ang mga kaayohan dumalayon.—1 Timoteo 4:13-16.
8. Unsang tinamdan ang girekomendar sa Proverbio?
8 Usa ka tawong maalamon sa kakaraanan nag-ingon: “Anak kong lalaki [o, babaye], kon imong dawaton ang akong mga pulong ug imong pabilhan ang akong mga sugo diha kanimo, aron mamati ka sa kaalam pinaagi sa imong igdulungog, aron imong ikiling ang imong kasingkasing sa salabotan; dugang pa, kon magatawag ka sa pagsabot ug magsangpit ka sa salabotan, kon imong padayong pangitaon kana ingon sa salapi, ug ingon sa tinipigang mga bahandi, sa ingon imong masabtan ang pagkahadlok kang Jehova, ug imong makaplagan ang mismong kahibalo sa Diyos.”—Proverbio 2:1-5.
9. (a) Sa unsang paagi ang kantidad sa bulawan ikatandi sa “mismong kahibalo sa Diyos”? (b) Unsang mga giya ang atong gikinahanglan aron makabaton ug tukmang kahibalo?
9 Nakaalinggat ka ba kon hain nasandig ang responsibilidad? Matikdi ang gibalikbalik nga pulong ‘kon imong.’ Ug matikdi ang ekspresyong, ‘Kon imong padayong pangitaon kana ingon sa tinipigang mga bahandi.’ Hunahunaa ang mga minero kinsa sa daghang kasiglohan nangalot ug salapi ug bulawan sa Aprika del Sur, Bolivia, Mexico, ug ubang kanasoran. Nagkugi sila sa pagtrabaho, ginamit ang mga piko ug mga pala, sa pagkubkob sa bato nga diha niana ilang makuha ang mahal nga mga metal. Gipabilhan gayod nilag dako ang bulawan nga tungod niana diha sa usa ka mina sa California, T.B.A., sila nakakalot ug 591 kilometros nga mga tunel, nga nakaabot sa pinatindog nga giladmong mga 1.5 kilometros—aron lang makakita ug bulawan. Apan, makaon ba nimo ang bulawan? Mainom ba ang bulawan? Mabuhi ka ba niini diha sa desyerto kon ikaw himalatyon sa kagutom ug kauhaw? Dili, ang kantidad niini artipisyal ug dili-piho, nagausab-usab sa matag adlaw ingon sa makita diha sa internasyonal nga mga merkado. Bisan pa niana, ang mga tawo nangamatay alang niana. Karon unsang paningkamot ang kinahanglang himoon aron makakuhag espirituwal nga bulawan, “ang mismong kahibalo sa Diyos”? Hunahunaa kini, ang mismong kahibalo sa Soberanong Ginoo sa uniberso, sa iyang organisasyon, ug sa iyang mga katuyoan! Niining bahina, atong magamit ang espirituwal nga mga piko ug mga pala. Kana maoy binase-sa-Bibliya nga mga publikasyon nga motabang kanato sa pagpangalot sa Pulong ni Jehova ug sa pagsabot sa kahulogan niini.—Job 28:12-19.
Pagpangalot sa Pagsabot
10. Unsay nakita ni Daniel diha sa panan-awon?
10 Maghimo kita ug pipila ka espirituwal nga pagpangalot aron makasugod sa pagkasabot sa mismong kahibalo sa langitnong organisasyon ni Jehova. Alang sa pangunang pagsabot, balikan nato ang panan-awon ni Daniel sa Karaan sa mga Adlaw diha sa iyang trono. Si Daniel nagsulat: “Ako nagtan-aw hangtod dihay gibutang nga mga trono ug ang Karaan sa mga Adlaw milingkod. Ang iyang besti puti sama sa niyebe, ug ang buhok sa iyang ulo sama sa mahinlong balhibo sa karnero. Ang iyang trono nagdilaab nga kalayo; ang mga ligid niini nagsiga nga kalayo. Dihay suba sa kalayo nga midagayday ug migula gikan sa iyang atubangan. Dihay linibo ka libo ang nagpadayon sa pag-alagad kaniya, ug napulo ka libo ka napulo ka libo ang nagpadayon sa pagtindog sa iyang atubangan. Ang Paghukom gisugdan, ug dihay mga basahon nga gibuksan.” (Daniel 7:9, 10) Kinsa kining linibo nga nag-alagad kang Jehova? Ang mga reperensiya diha sa margin sa New World Translation, nga gigamit ingong “mga piko” ug “mga pala,” motultol kanato sa mga reperensiya sama sa Salmo 68:17 ug Hebreohanon 1:14. Oo, ang mga nanag-alagad mao ang langitnong mga manulonda!
11. Sa unsang paagi ang panan-awon ni Daniel makatabang kanato sa pagsabot sa mga pulong ni Eliseo?
11 Ang asoy ni Daniel wala mag-ingon nga iyang nakita ang tanang matinumanong mga manulonda nga magamit sa Diyos sa pagtuman sa iyang isugo. Tingali dihay minilyon pa. Apan seguradong atong masabtan na karon kon nganong si Eliseo nakaingon: “Sila nga ania uban kanato mas daghan pa kay sa nagauban kanila.” Ang kasundalohan sa hari sa Syria, bisag gipaluyohan sa sukihang mga manulonda, ang mga demonyo, nalabwan sa gidaghanon sa langitnong kasundalohan ni Jehova!—Salmo 34:7; 91:11.
12. Sa unsang paagi ikaw masayod pag dugang bahin sa mga manulonda?
12 Tingali buot kang masayod ug dugang pa bahin niining maong mga manulonda, sama sa papel nga ilang gidula sa pag-alagad kang Jehova. Gikan sa Gregong pulong alang sa manulonda, atong masabtan nga sila mga mensahero tungod kay kining pulonga nagkahulogan usab nga “mensahero.” Ugaling, labaw pa niana ang ilang mga buluhaton. Hinunoa, aron masuta kon unsa kini, kinahanglang mangalot ka. Kon aduna kay Insight on the Scriptures, makatuon ka sa artikulong “Angels,” o makatan-aw ka sa nangaging mga artikulo sa Ang Bantayanang Torre bahin sa mga manulonda. Ikaw makurat kon unsa ka daghan ang imong makat-onan bahin niining langitnong mga alagad sa Diyos ug makasabot sa ilang pagpaluyo. (Pinadayag 14:6, 7) Apan, sa langitnong organisasyon sa Diyos, ang ubang espiritu nga mga linalang nag-alagad ug linain nga mga katuyoan.
Kon Unsay Nakita ni Isaias
13, 14. Unsay nakita ni Isaias diha sa panan-awon, ug sa unsang paagi siya natandog niini?
13 Karon mangalot kita diha sa panan-awon ni Isaias. Kon imong basahon ang kapitulo 6, mga bersikulo 1 ngadto sa 7, maikag ka gayod. Si Isaias nag-ingon nga siya “nakakita kang Jehova, nga naglingkod sa trono,” ug “ang mga serapines nagtindog ibabaw kaniya.” Sila nagpahayag sa himaya ni Jehova, nagbayaw sa iyang pagkabalaan. Matandog ka gayod bisan sa pagbasa niining asoya. Unsay reaksiyon ni Isaias? “Ako miingon: ‘Alaot ako! Kay sama ra ako nga gipahilom [sa Sheol], tungod kay ako usa ka tawong mahugaw ug mga ngabil, ug ako nagpuyo taliwala sa mga tawong mahugaw ug mga ngabil; kay ang akong mga mata nakakita sa Hari, si Jehova sa mga panon, mismo!’” Napukaw kaayo siya sa maong panan-awon! Ikaw napukaw ba?
14 Busa sa unsang paagi nakalahutay si Isaias niining mahimayaong talan-awon? Siya miingon nga usa ka serapines miabot sa pagluwas kaniya ug miingon: “Ang imong kalapasan mibulag na ug ang imong sala gitabonan na.” (Isaias 6:7) Si Isaias makasalig sa kaluoy sa Diyos ug namati sa mga pulong ni Jehova. Karon, dili ka ba buot mahibalo pag dugang bahin niining tag-as-ug-ranggong espiritu nga mga linalang? Nan unsay imong kinahanglang himoon? Pangalot pag dugang nga impormasyon. Ang usa ka tabang nga gamiton mao ang Watch Tower Publications Index, nga subayon ang mga reperensiya niini ngadto sa daghang tuboran sa nagapatin-awng impormasyon.
Unsay Nakita ni Ezequiel?
15. Unsay nagpakita nga kasaligan ang panan-awon ni Ezequiel?
15 Mobali na usab kita sa laing matang sa espiritu nga linalang. Si Ezequiel nakapribilehiyo sa pagkakita ug usa ka makapadasig nga panan-awon samtang usa pa siya ka bihag sa Babilonya. Buksi ang imong Bibliya sa Ezequiel kapitulo 1, diha sa unang tulo ka bersikulo. Sa unsang paagi gisugdan ang asoy? Kini ba nag-ingon, ‘Sa kanhiayng panahon, diha sa usa ka halayong yuta . . .’? Wala, dili kini sugilanong engkantohanon nga hinanduraw ang panahon. Ang bersikulo 1 nag-ingon: “Karon nahitabo nga sa ikakatloan ka tuig, sa ikaupat ka bulan, sa ikalimang adlaw sa bulan, samtang diha ako taliwala sa mga tawong nangabihag diha sa suba sa Chebar, nga ang mga langit gibuksan ug ako nakakita sa mga panan-awon sa Diyos.” Unsay imong namatikdan niining bersikuloha? Naghatag kini ug eksaktong petsa ug eksaktong dapit. Kining maong mga detalye nagpunting sa ikalimang tuig sa pagkabihag ni Haring Jehoiachin, sa tuig 613 W.K.P.
16. Unsay nakita ni Ezequiel?
16 Ang kamot ni Jehova mitapion kang Ezequiel, ug siya nagsugod sa pagkakita ug makapukawg-kadasig nga panan-awon sa trono ni Jehova diha sa dakong langitnong karo nga adunay dagkong mga ligid nga adunay mga mata sa tanang yantas niini. Ang detalye nga makapaikag kanato dinhi mao ang upat ka linalang, ang usa nagtindog sa matag ligid. “Kini mao ang ilang panagway: sila may may-ong sa tawo sa yuta. Ug ang matag usa adunay upat ka nawong, ug ang matag usa kanila adunay upat ka pako. . . . Ug mahitungod sa may-ong sa ilang mga nawong, ang upat kanila may nawong sa tawo nga may nawong sa leyon diha sa tuo, ug ang upat kanila may nawong sa baka diha sa wala; ang upat kanila may nawong usab sa agila.”—Ezequiel 1:5, 6, 10.
17. Unsay gihawasan sa upat ka nawong sa mga kerubin?
17 Unsa kining upat ka buhing linalang? Si Ezequiel mismo nag-asoy kanato nga sila maoy mga kerubin. (Ezequiel 10:1-3, 14) Nganong sila aduna may upat ka nawong? Aron sa paghawas sa upat ka talagsaong mga hiyas sa Soberanong Ginoong Jehova. Ang nawong sa agila maoy simbolo sa halayog-panan-aw nga kaalam. (Job 39:27-29) Unsay gihawasan sa nawong sa baka? Pinaagi sa kusgan kaayong liog ug mga abaga niini, ang usa ka torong baka nahibaloan nga makapalagpot ug kabayo ug magkakabayo ngadto sa hangin. Matin-aw, ang baka maoy simbolo sa walay-kinutobang gahom ni Jehova. Ang leyon gigamit ingong simbolo sa maisogong hustisya. Sa kataposan, ang nawong sa usa ka tawo tukmang naghawas sa gugma sa Diyos, sanglit ang tawo mao lamang ang yutan-ong linalang nga makapasundayag niining hiyasa sa maalamong paagi.—Mateo 22:37, 39; 1 Juan 4:8.
18. Sa unsang paagi gidugangan ni apostol Juan ang atong pagsabot sa langitnong organisasyon?
18 Adunay laing mga panan-awon nga makatabang kanato sa pagbaton ug hingpit nga larawan. Kini naglakip sa mga panan-awon ni Juan nga giasoy diha sa basahon sa Bibliya nga Pinadayag. Siya, sama kang Ezequiel, nakakita kang Jehova diha sa usa ka mahimayaong trono nga giubanan sa mga kerubin. Unsay gibuhat sa mga kerubin? Ilang gipalanog ang proklamasyon sa mga serapines sa Isaias kapitulo 6, nga nag-ingon: “Balaan, balaan, balaan si Jehova nga Diyos, ang Labing-Gamhanan, nga mao ang kaniadto ug ang karon ug ang umaabot.” (Pinadayag 4:6-8) Nakakita usab si Juan ug usa ka kordero tupad sa trono. Kinsa kahay gihawasan niana? Ang mismong Kordero sa Diyos, si Jesu-Kristo.—Pinadayag 5:13, 14.
19. Pinaagi niini nga pagtuon, unsay imong nahibaloan bahin sa organisasyon ni Jehova?
19 Busa pinaagi niini nga mga panan-awon, unsay atong nahibaloan? Nga diha sa kinatayuktokan sa langitnong organisasyon anaa si Jehova nga Diyos diha sa iyang trono nga giubanan sa Kordero, si Jesu-Kristo, kinsa mao ang Pulong, o Logos. Dayon kita nakakita ug langitnong panon sa mga manulonda, lakip ang mga serapines ug mga kerubin. Sila maoy bahin sa usa ka dako, nahiusang organisasyon nga nag-alagad sa katuyoan ni Jehova. Ug ang usa sa maong mga katuyoan mao ang pagsangyaw sa maayong balita sa tibuok-kalibotan niining panahon sa kataposan.—Marcos 13:10; Juan 1:1-3; Pinadayag 14:6, 7.
20. Unsang mga pangutana ang pagatubagon sa sunod nga artikulo?
20 Sa kataposan, kita adunay mga Saksi ni Jehova dinhi sa yuta nga nanagtigom sa ilang mga Kingdom Hall sa pagtuon kon unsaon sa pagtuman sa kabubut-on sa Soberanong Ginoo. Siyempre, kita karon nakasabot nga mas daghan pa ang ania uban kanato kay sa niadtong anaa uban kang Satanas ug sa mga kaaway sa kamatuoran. Nagpabilin ang pangutana, Unsa may labot sa langitnong organisasyon sa pagsangyaw sa maayong balita sa Gingharian? Susihon sa sunod nga artikulo kana ug ang ubang mga butang.
Mga Pangutana Agig Repaso
◻ Aron masabtan ang organisasyon ni Jehova, unsa ang kinahanglan natong mahibaloan?
◻ Unsay naeksperyensiyahan sa sulugoon ni Eliseo, ug sa unsang paagi gidasig siya sa manalagna?
◻ Sa unsang paagi pagalantawon nato ang personal nga pagtuon?
◻ Sa unsang paagi gidetalye ni Daniel, Isaias, ug Ezequiel ang langitnong organisasyon?
[Hulagway sa panid 13]
Ang mga kaayohan sa personal nga pagtuon mas dako pa kay sa usa ka maayong pagkaandam nga pagkaon
[Hulagway sa panid 15]
Usa ka panan-awon sa langitnong mga panon mao ang tubag ni Jehova sa pag-ampo ni Eliseo