Kinalabwang Pagpanganak sa Yuta Nagauna sa Tibuok-Kalibotang Kasegurohan

“Natawo ang usa ka bata kanato, gihatag ang usa ka anak lalaki kanato; ug ang prinsipinhong pagmando igatungtong sa iyang abaga. Ug ang iyang ngalan pagatawgong Kahibulongang Magtatambag, Diyos nga Gamhanan, Amahang Walay Kataposan, Prinsipe sa Pakigdait.”—ISAIAS 9:6.

TIBUOK-KALIBOTANG kasegurohan! Ilalom sa “Prinsipe niining kalibotana,” si Satanas nga Yawa, kini usa ka damgo nga dili matuman. (Juan 12:31, The New English Bible) Apan ang tibuok-kalibotang kasegurohan ilalom sa “Prinsipe sa Pakigdait,” si Jesu-Kristo, bug-os nga segurado. Gipasalig kini kanato ni Jehova diha sa tagna mahitungod sa pagkatawo ug karera sa “Prinsipe sa Pakigdait.” Sa Isaias 9:6, 7, atong mabasa: “Alang kanato ang usa ka bata natawo, ang usa ka anak lalaki gihatag, ug ang prinsipinhong pagmando igatungtong sa iyang abaga. Ug ang iyang ngalan pagatawgon nga Kahibulongang Magtatambag, Diyos nga Gamhanan, Amahan nga Walay Kataposan, Prinsipe sa Pakigdait. Sa kadagaya sa prinsipinhong pagmando ug sa pakigdait walay kataposan, ibabaw sa trono ni David ug ibabaw sa iyang gingharian aron sa pagtukod niini nga malig-on ug sa paglig-on niini pinaagi sa hustisya ug pinaagi sa pagkamatarong, sukad karon ug hangtod sa panahong walay katinoan. Ang kakugi mismo ni Jehova sa mga panon ang magahimo niini.”

2. (a) Unsa ang mga kahimtang nga ubos niana ang tagna sa Isaias 9:6, 7 gihatag? (b) Giunsa nato pagkahibalong si Jehova sa walay pakyas magpabilin sa tugon nga iyang gihimo uban kang David alang sa walay-kataposang gingharian sa iyang linya sa kaliwatan?

² Kahibulongan gayod nga tagna! Kulbahinam ang pagsusi niining tagnaa mahitungod sa kinalabwang pagpanganak sa yuta. Apan sa dili pa nato mapabilhan kini sa bug-os, kinahanglang ipunting nato ang pagtagad sa mga kahimtang nga ilalom niana gihatag ang tagna. Panahon kadto sa internasyonal nga mga pagsabutsabot sulod sa mga adlaw sa gingharian sa Juda ilalom kang Haring Ahaz. Bisan tuod dili matinumanon kang Jehova, kadtong haria gitugotan sa paglingkod sa trono ni Jehova. Ang maong pailob gipakita kaniya tungod sa tugon nga gihimo ni Jehova uban kang David alang sa usa ka gingharian nga walay kataposan diha sa iyang kaliwatan. Bisan tuod si David gihikawan sa pribilehiyo sa pagtukod sa usa ka templo kang Jehova, ang Diyos mihatag kaniyag kapuling panalangin. Kini gipahayag diha sa mga pulong sa propetang si Natan: “Ug si Jehova nagsugilon kanimo nga si Jehova magabuhat kanimo ug usa ka balay. Ug ang imong balay ug ang imong gingharian pagahimoong malig-on sa panahong walay katinoan sa imong atubangan; ang imong trono mismo matukod nga malig-on sa panahong walay katinoan.” (2 Samuel 7:11, 16) Kanang balaang saad napamatud-ang makapatagbaw kaayo alang kang Haring David mao nga siya naglantaw sa mahimayaong pagkatuman niana.

3. (a) Kang kinsa ang maong tugon uban kang David natuman, ug sa unsang paagi ang maong tugon linain? (b) Unsay gihimo sa Yawa nga iyang tumong kon bahin sa tugon sa Gingharian?

³ Ang maong tugon uban kang David natuman diha sa dakong Anak ni David, si Jesu-Kristo, ang “Prinsipe sa Pakigdait.” Walay laing harianong balay sa nawong niining yutaa ang sukad nagpahimulos sa maong tugon alang sa usa ka gingharian, nga walay kataposan ang kadagaya sa prinsipinhong pagmando niini. Apan kanang pakigtugon sa Gingharian nagpadayag sa usa ka hagit sa tanang gingharian sa kalibotan nga niana si Satanas mao ang prinsipe, o magmamando. Busa ang Yawa ug ang iyang mga demonyo naghimo nga ilang tumong ang pagsingkamot sa paglaglag sa balay ni David ug sa ingon wagtangon ang kalaoman nga kini magbatog permanenteng manununod. Nakaplagan ni Satanas nga si Haring Rezin sa Sirya, si Haring Peka sa napulog-tribong gingharian sa Israel, ug ang hari sa Asirya maoy andam nga mga instrumento.

Pagsabutsabot Batok sa Tugon sa Gingharian

4. Sa unsang paagi gipadayon sa Yawa ang iyang pagsingkamot nga hunongon ang paglihok sa tugon sa Gingharian ni Jehova nga gihimo uban kang David?

⁴ Unsa ang laraw sa Yawa? Ang iyang tumong mao ang pagpugos kang Haring Ahaz sa Juda, tungod sa kahadlok, ngadto sa dili-tukmang pakig-alyado sa hari sa Asirya. Sa unsang paagi makahimo niadto ang Yawa? Aw, iyang gipahinabo nga si Haring Peka sa Israel ug si Haring Rezin sa Sirya moapil sa usa ka pagsabutsabot batok sa balay ni David. Sila nagsabutsabot sa pagpapahawa kang Ahaz gikan sa trono sa Juda aron palingkoron ang ilang kaugalingong tawo, ang anak ni Tabeel, ingong pahoy nga hari. Kinsa ba ang maong anak ni Tabeel? Makahuloganon nga siya dili usa ka kaliwat sa balay ni David. Busa, siya dili usa ka tawo nga pinaagi kaniya ang tugon sa Diyos ikapasa hangtod kini makakaplag sa permanenteng Manununod niini nga mao ang “Prinsipe sa Pakigdait.” Siya mao ang ilang tawo, dili ang tawo sa Diyos, diha sa trono sa Juda. Sa ingon giyagyag sa Bibliya ang singkamot ni Satanas sa pagpahunong sa paglihok sa tugon sa Gingharian ni Jehova nga gihimo uban kang David.

5, 6. Unsay sanong ni Haring Ahaz ngadto sa pagsabutsabot batok sa balay ni David, ug unsang makapadasig nga mensahe ang gihatag kaniya ni Jehova?

⁵ Unsa ang sanong ni Haring Ahaz sa maong hulga? Siya ug ang iyang katawhan nangurog sa kahadlok. Busa gihatagan siya ni Jehova ug pila ka makapadasig nga impormasyon sa pagpahilayo niya sa pagpormag usa ka makapanalipod nga alyansa uban sa hari sa nagauswag nga gahom sa kalibotan, ang Asirya. Gisugo ni Jehova ang iyang propetang si Isaias sa pagpakigtagbo kang Ahaz ug sa paghatod niining mensahea nga makita sa Isaias 7:4-9:

⁶ “Ayaw kahadlok . . . tungod kay ang Sirya uban sa Epraim [ang pangunang sakop sa gingharian sa Israel] ug ang anak ni Remalias [Peka] nagtambag kon unsay daotan batok kanimo, nga nagaingon: ‘Manungas kita batok sa Juda ug atong bungkagon kini ug pinaagi sa mga paglumpag bihagon ta kini, ug ibutang ta ang laing hari sa pagmando sulod niini, ang anak ni Tabeel.’ Kini ang giingon sa Soberano Ginoong Jehova: ‘Kini dili mobarog, ni kini mahitabo . . . Gawas kon kamo magbaton ug pagtuo, kamo sa ingon dili magdugay.’”

Usa ka Ilhanan sa Kapakyasan sa Pagsabutsabot

7. (a) Unsa ang mitultol sa talagsaong tagna sa Isaias 7:14? (b) Ang pagkatawo ni Immanuel usa ka kasaligang ilhanan sa unsa, ug ang mga anak ni Isaias nag-alagad nga unsa?

⁷ Busa, gitagna ni Jehova ang pagkapukan sa mga nagsabutsabot. Niadtong gutloa miabot ang panahon alang sa usa ka balaang tagna nga ang kahinungdanon makapauyog sa kalibotan, kay kadto mipunting sa harianong Manununod sa tugon sa Gingharian uban kang David. Apan unsay mitultol ngadto niadtong talagsaong tagna? Aw, si Jehova nakigsulti kang Haring Ahaz. Gisultihan niya si Ahaz sa pagpangayo sa usa ka milagrosong ilhanan nga iyang mahunahunaan, ug unya buhaton kana ni Jehova ingong bug-os nga garantiya nga bungkagon sa Diyos ang pagsabutsabot batok sa balay ni David. Apan si Ahaz wala mangayo sa maong ilhanan. Unsay sunod nga nahitabo? Ang Isaias 7:14 nagasulti kanato: “Busa si Jehova mismo mohatag kaninyo ug usa ka ilhanan: Ania karon! Ang ulay mismo manamkon, ug siya manganak sa usa ka anak lalaki, ug iyang pagatawgon ang iyang ngalan nga Immanuel.” Kanang ngalana nagkahulogang “Ang Diyos Uban Kanato.” Sanglit si Immanuel ug ang laing duha ka anak ni Isaias magsilbing mga ilhanan, ang propeta miingon sa Isaias 8:18: “Ania karon! Ako ug ang mga anak nga gihatag kanako ni Jehova maoy mga ilhanan ug mga katingalahan sa Israel gikan kang Jehova sa mga panon.” Busa ang pagkatawo ni Immanuel maoy usa ka kasaligang ilhanan nga ang tanang nagsabutsabot ug ang ilang mga pagsabutsabot batok sa tugon sa Gingharian sa Diyos ug sa Manununod niana makawang!

8. (a) Unsay giingon sa tagna sa Isaias 7:15, 16 mahitungod sa batang si Immanuel, ug unsa ang sangpotanan? (b) Ngano man tingaling ang pagkamao ni Immanuel sa mga adlaw ni Isaias nagapabiling wala matino?

⁸ Ang talaan sa Bibliya wala magsulti kon kinsay nanganak sa anak lalaking ginganlag Immanuel. Tingali kadto usa ka Hudiyang ulay nga nahimong ikaduhang asawa sa propetang Isaias. Sa bisan unsang kaso, ang tagna nagpadayon sa pag-ingon nga sa dili pa modako ang batang lalaki nga igong makaila sa maayo ug sa daotan, ang duha ka hari nga nagsabutsabot batok sa balay ni David mangalaglag. (Isaias 7:15, 16) Kadto natuman. Ang kamatuorang ang pagkamao ni Immanuel sa mga adlaw ni Isaias nagapabiling wala mapiho alang kanato tingali maoy aron dili mabalda ang pagtagad sa ulahing mga kaliwatan gikan sa Labaw nga Immanuel dihang siya motungha ingong usa ka milagrosong ilhanan gikan sa langit.

9. (a) Ang pagkatuman sa ilhanan ug ang pagkapukan sa pagsabutsabot batok sa tugon sa Gingharian nagpasalig sa unsa? (b) Unsa ang kinalabwang pagsabutsabot sa kalibotan sa tanang panahon?

⁹ Hinuon, sa mga adlaw ni Ahaz, may gamay lamang nga katumanan sa ilhanan ug pagkapukan sa kalibotanong pagsabutsabot batok sa tugon sa Gingharian sa Diyos. Apan kadtong unang katumanan nagpasalig nga ang ilhanan ug ang pagkapukan sa kalibotanong pagsabutsabot matuman sa dakong kahulogan sa atong kritikal nga panahon. Karong adlawa atong giatubang ang kinadak-ang pagsabutsabot sa kalibotan sa tanang panahon. Sa unsang kahulogan? Sa pagkaaging ang kanasoran bug-os wala magpakabana sa kahikayan ni Jehova sa pagpatunghag malungtarong pakigdait, ug nagasupak pa sila sa mga hawas sa “Prinsipe sa Pakigdait.” Ang pagsabutsabot maoy batok gayod sa Manununod sa tugon sa Gingharian, ang “Prinsipe sa Pakigdait.” Karon, komosta man ang bahin sa kompletong katumanan sa tagna? Kon atong naila ang ilhanan, nan atong mapabilhan nga ang dulnganan sa maong pagsabutsabot sa kalibotan nahibaloan na daan.

Pagkatawo sa “Prinsipe sa Pakigdait”

10. (a) Sa bug-os nga pagkatuman sa Isaias 7:14, kinsay nagpatungha sa bata ingon nga ilhanan ug Manununod sa tugon sa Gingharian? (b) Giunsa pagkonektar sa historyanong si Mateo ang ilhanan ni Immanuel uban sa balay ni David?

¹⁰ Sa kompletong katumanan sa tagna, ang ulay nga nanganak sa bata ingong ang ilhanan ug Manununod sa tugon sa Gingharian mao si Maria, usa ka Hudiyong ulay nga naggikan kang Haring David. Gisultihan siya sa manulondang Gabriel nga siya manganak sa usa ka anak lalaki nga paganganlang si Jesus, nga si Jehova nga Diyos “magahatag kaniya sa trono ni David ang iyang amahan,” ug “walay kataposan ang iyang gingharian.” (Lucas 1:26-33) Ang gidasig nga historyanong si Mateo nagkonektar sa ilhanan ni Immanuel uban sa balay ni David. Atong mabasa sa Mateo 1:20-23: “Ang manulonda ni Jehova mitungha kang [Jose] diha sa usa ka damgo, nga miingon: ‘Jose, anak ni David, ayaw kahadlok sa pagdala sa balay kang Maria ingon nga imong asawa, kay kanang iyang gisamkon gikan man sa balaang espiritu. Siya magaanak ug usa ka anak nga lalaki, ug pagatawgon mo ang iyang ngalan nga Jesus, kay iyang pagaluwason ang iyang katawhan gikan sa ilang mga sala.’ Kadtong tanan aktuwal nahitabo aron matuman kadtong gipamulong ni Jehova pinaagi sa iyang manalagna, nga nag-ingon: ‘Ania karon! Ang ulay manamkon ug manganak sa usa ka anak lalaki, ug ilang pagatawgon ang iyang ngalan nga Immanuel,’ nga nagkahulogan, dihang pagahubaron, ‘Ang Diyos Uban Kanato.’”

11. Kanus-a ug diin nahitabo ang gitagnang pagkatawo ni Immanuel?

¹¹ Kanus-a ug diin nahitabo kining gitagnang pagkatawo ni Immanuel? Ang tanang Hudiyonhong mata giliso sa hustong direksiyon pinaagi sa mga pulong sa Miqueas 5:2, nga gikutlo sa Mateo 2:6: “Ug, ikaw, O Bethlehem sa yuta sa Juda, dili gayod ang labing gamay nga siyudad taliwala sa mga gobernador sa Juda; kay gikan kanimo mogula ang usa ka magamando, kinsa magaatiman sa akong katawhan, ang Israel.” Maoy sa tuig 2 W.K.P. sa siyudad sa Bethlehem nga ang “Prinsipe sa Pakigdait” natawo, ug nagsugod pagkatuman ang makalipay nga tagna sa Isaias 9:6, 7.

12, 13. Magdalag kadungganan ni kinsa ang pagkatawo sa “Prinsipe sa Pakigdait,” ug unsang mahimayaon ug masilakong mga kinaiya ang nag-uban sa maong pagkatawo?

¹² Kinsa ba kanato ang dili mag-isip nga usa ka kadungganan ug kalipay nga mahimong ginikanan sa usa nga magbaton sa titulong “Prinsipe sa Pakigdait”? Busa kadto naghatag ug dakong himaya sa harianong Amahan sa maong Prinsipe. Sa pagkamatuod, wala gayod, wala pa gayod sukad, nga ang usa ka tawhanong pagkatawo giubanan sa maong mahimayaon ug masilakong mga kinaiya.

¹³ Ang masilakong manulonda ni Jehova nagpakita ngadto sa mga magbalantay nga nagbantay sa ilang mga panon sa gabii sa mga kapatagan sa gawas sa Bethlehem, ug “ang himaya ni Jehova midan-ag sa ilang palibot.” Unya ang manulonda nagpahibalo sa pagkatawo ingong katumanan sa balaang tagna, nga nag-ingon: “Natawo diha kaninyo karong adlawa ang usa ka Manluluwas, kinsa mao si Kristo ang Ginoo, sa siyudad ni David.” Nga daw kadto dili pa mahimayaon nga igo, mipakita sa kalangitan sa kahitas-an ang kapid-an ka manulonda nga nagdayeg sa Amahan sa bag-ong natawong anak ug nanag-ingon nga sama sa usa ka tingog: “Himaya sa Diyos sa kahitas-an, ug sa yuta pakigdait sa mga tawo nga may maayong kabubut-on.” Pagkaangay nga ang mga manulonda magpahibalo sa pagkatawo sa destinadong “Prinsipe sa Pakigdait” nga adunay balaang pakigdait alang sa tanang tawo nga nakabaton sa maayong kabubut-on sa Diyos!​—Lucas 2:8-14.

14, 15. (a) Tungod sa unsang mga hitabo nga ang langitnong mga anak sa Diyos nagdayeg kang Jehova? (b) Nganong walay laing pagpanganak sa tibuok tawhanong kasaysayan ang sama niini?

¹⁴ Dugay na una sa pagkatawo sa usa nga mahimong “Prinsipe sa Pakigdait,” ang mga manulonda nagdayeg sa Diyos sa usa ka linaing okasyon. Kadto maoy sa dihang, sa pagpanglalang, iyang gitukod ang yuta. (Job 38:4) Nakakita ka bag mga letrato sa atong yuta nga kinuha sa mga astronot gikan sa kawanangan? Nan imong nakita ang butang nga ang mga manulonda lamang ang nakakita niadtong mga panahona. Ug unsay sanong niadto sa mga manulonda? Ang Job 38:7 nagasulti kanato: “Ang mga bituon sa kabuntagon nagduyog sa pagsinggit sa kalipay, ug ang tanang anak sa Diyos naninggit sa pahalipay.”

¹⁵ Ang kinalabwang pagkatawo nga sukad magpasidungog sa yuta maoy hitabo usab nga tungod niana ang mga anak sa Diyos maghiusa sa ilang mananoy nga mga tingog sa usa ka awit sa pagdayeg. Maingon nga ang usa ka yutan-ong amahan pahalipayan sa pagkatawo sa iyang panganay nga anak lalaki, ang langitnong Amahan nga responsable sa maong kinalabwang pagkatawo nga sukad nahitabo sa yuta takos usab pagabayawon diha sa awit sa mga sakop sa iyang langitnong pamilya. Gikalipayan gayod ug dako sa balaang Usa ang matahom kaayong konsiyerto sa iyang pagkahimong amahan sa unang panahon diha sa bug-os bag-ong hugpong sa kahimtangan! Walay pagpanganak ang ikatandi sukad masukad sa tibuok kasaysayan sa uniberso sa iya sa destinadong “Prinsipe sa Pakigdait.”

“Usa ka Dakong Kahayag” Misidlak

16. Kanus-a ug sa unsang paagi may dugang katumanan sa Isaias kapitulo 9?

¹⁶ Sa gisugdan ni Jesus ang iyang publikong ministeryo, may dugang katumanan sa Isaias kapitulo 9. Kini maylabot sa unang duha ka bersikulo, nga mitagna nga “ang usa ka dakong kahayag” mosidlak diha sa katawhang “nagalakaw sa kangitngitan.” Ang katumanan nianang mga bersikuloha gisaysay alang kanato sa gidasig nga historyano si Mateo sa kapitulo 4, mga bersikulo 13 hangtod 17: “Dugang pa, sa pagpahawa sa Nazaret, [si Jesus] miadto ug mipuyo sa Capernaum sa daplin sa dagat diha sa mga distrito sa Zabulun ug Neptali, aron mamatuman ang gisulti pinaagi kang Isaias ang manalagna, nga miingon: ‘Oh yuta sa Zabulon ug yuta sa Neptali nga ubay sa dalan sa dagat, sa tabok sa Jordan, Galilea sa mga nasod! ang katawhang naglingkod sa kangitngit nakakita sa usa ka dakong kahayag, ug alang niadtong nagalingkod sa usa ka rehiyon sa landong sa kamatayon, ang kahayag misidlak diha kanila.’ Sukad niadtong panahona si Jesus misugod sa pagwali ug miingon: ‘Paghinulsol kamo, kamong katawhan, kay ang gingharian sa mga langit haduol na.’”

17. Nganong napasidlak ni Jesus ang kahayag didto sa katawhan sa Zabulun ug Neptali, ug mahimong unsay kahulogan sa maong kahayag alang niadtong naglingkod sa kangitngitan?

¹⁷ Ang Zabulon ug Neptali nahimutang sa amihanang tumoy sa Israel ug nag-apil sa distrito sa Galilea. Ang Neptali namaybay sa tibuok kasadpanhong baybay sa Dagat sa Galilea. Busa maoy pinaagi sa pagwali sa maayong balita sa Gingharian sa Diyos sa maong mga dapit nga si Jesus, uban sa iyang mga tinun-an, nagpasidlak sa kahayag ngadto sa katawhan didto nga dugay nang naglingkod sa kangitngitan. Si Jesus miingon sa Juan 8:12: “Ako mao ang kahayag sa kalibotan. Siya nga nagasunod kanako dili gayod magalakaw sa kangitngit, apan magbaton sa kahayag sa kinabuhi.” Busa, pinaagi kang Jesus “kadtong naglingkod sa rehiyon sa landong sa kamatayon” nakabaton sa “kahayag sa kinabuhi” tungod kay iyang gihatag ang iyang kinabuhi “nga usa ka lukat ilis sa daghan.” Siya mao ang gigamit ni Jehova sa pagdan-ag sa kahayag sa paagi nga niana ang mga tawo makabaton ug kinabuhi.​—Mateo 4:23; 20:28.

18. (a) Nganong ang maong “dakong kahayag” dili limitado ngadto sa katawhan sa Galilea? (b) Unsay pagahisgotan sa sunod nga artikulo?

¹⁸ Kining “dakong kahayag” nga nagasaad sa kaluwasan gikan sa kamatayon ug pagpanglupig wala ilimite ngadto sa mga tawo sa Galilea. Wala ba si Isaias magtagna nga ang kadagaya sa kagamhanan maoy walay kataposan? Ug wala ba si Isaias magtagna nga ang papel sa “Prinsipe sa Pakigdait” mahimong dako sa labihan? Oo, kay ang Isaias 9:6, 7 nagaingon: “Ang iyang ngalan pagatawgon nga Kahibulongang Magtatambag, Diyos nga Gamhanan, Amahang Walay Kataposan, Prinsipe sa Pakigdait. Sa kadagaya sa prinsipinhong pagmando ug sa pakigdait walay kataposan.” Sa sunod nga artikulo, among pagahisgotan ang papel ni Jesu-Kristo ingong “Kahibulongang Magtatambag, Diyos nga Gamhanan, Amahang Walay Kataposan,” ingon man “Prinsipe sa Pakigdait.”

Tibuok-Kalibotang Kasegurohan Ilalom sa “Prinsipe sa Pakigdait”

“Sa kadagaya sa prinsipinhong pagmando ug sa pakigdait walay kataposan, ibabaw sa trono ni David ug ibabaw sa iyang gingharian aron sa pagtukod niini nga malig-on ug sa pagtuboy niini pinaagi sa hustisya ug sa pagkamatarong, sukad karon ug hangtod sa panahong walay katinoan. Ang kakugi ni Jehova sa mga panon maoy magahimo niini.”—ISAIAS 9:7.

MAINGON nga ang pagkatawo ni Jesus, ang hingpit tawhanong bata, maoy usa ka okasyon nga sa talagsaon makapasadya, ang pagkatawo usab sa iyang dugay-nang-gisaad nga Gingharian maoy okasyon sa labihang kasadya. (Salmo 96:10-12) Sumala sa mga hitabo sa modernong kasaysayan, kanang kagamhanana gibutang sa abaga sa hinimayang Jesus sa 1914. Ang paglungtad sa organisasyong Hiniusang Kanasoran wala manghimakak nianang kamatuorana. Walay mausa sa mga magmamando sa 159 ka membro sa HK ang sakop sa balay ni David. Bisan pa niana, ang karta sa maong pagsabutsabot sa kalibotan nagahatag kanila sa buluhaton nga mao ang pagkab-ot sa tibuok-kalibotang pakigdait ug kasegurohan alang sa katawhan.

1, 2. (a) Ang pagkatawo sa Gingharian sa Diyos maoy okasyon alang sa unsa, ug kanus-a nahitabo ang maong pagkatawo? (b) Ang karta sa Hiniusang Kanasoran nagahatag sa unsang buluhaton nganha sa maong organisasyon, apan unsay gihatag nga buluhaton sa tugon sa Gingharian kang Jesu-Kristo? (c) Giunsa nato pagkahibalong si Jehova sa walay pakyas magmatinumanon sa tugon sa Gingharian?

² Apan ang tugon ni Jehova alang sa Gingharian wala sukad mapapas. Sa Isaias 9:7 ang pamulong “ibabaw sa trono ni David” nagalig-on sa tugon nga gihimo sa Diyos uban kang David alang sa dili-matapos nga gingharian. Dugang pa, si Jehova nanumpa sa malamposong pagkatuman niana. Nga si Jehova mohawid sa maong tugon gitin-aw sa Salmo 89:3, 4, 35, 36: “Gibuhat ko ang usa ka tugon uban sa akong pinili; nanumpa ako kang David nga akong alagad, ‘Pagalig-onon ko ang imong binhi sa panahong walay katinoan, ug tukoron ko ang imong trono sa kaliwatan ngadto sa kaliwatan.’ Sa dihang ako nanumpa sa akong kabalaan, kang David ako dili mamakak. Ang iyang binhi mismo magapadayon sa panahong walay katinoan, ug ang iyang trono ingon sa adlaw sa atubangon ko.” Kanang tugona, ingon man ang titulong “Prinsipe sa Pakigdait,” nagahatag sa buluhaton nga mao ang pagpatungha sa tibuok-kalibotang kasegurohan ngadto kang Jesu-Kristo.

3. Nganong ang panahon nga ang “Prinsipe sa Pakigdait” mosugod sa iyang pagmando dili panahon sa kalinaw alang sa langit o alang sa yuta?

³ Ugaling lamang, ang panahon nga igabutang ni Jehova nga Diyos ang kagamhanan ibabaw sa abaga sa iyang Sumusunod nga Prinsipe maoy dili tuig sa kalinaw sa langit sa kahitas-an kaha o sa yuta sa ubos. Sumala sa Pinadayag kapitulo 12, ang pagkatawo sa iyang Gingharian pagasundan sa gubat sa langit. Si Satanas nga Yawa ug iyang mga demonyo nakig-away batok sa bag-ong-natukod nga kagamhanan, ug ang bag-ong-naentronong Hari uban sa iyang balaang mga manulonda nakig-away sa maong demonyohanong mga puwersa. Ang resulta mao nga si Satanas ug iyang mga demonyo gitambog gikan sa mga langit nganhi sa silinganan sa atong yuta. Busa, milanog ang pagpatugbaw: “Alaot ang yuta ug ang dagat, tungod kay ang Yawa nanaog kaninyo, nga may dakong kasuko, kay siya nahibalo nga siya may hamubo na lamang nga panahon.” (Pinadayag 12:12) Sukad sa pagtambog sa Yawa, ikasubo nga ang atong yuta nahimong dapit sa walay-katupong nga kabangisan ug gubat. Gikinahanglan gayod sa katawhan ang pagmando sa “Prinsipe sa Pakigdait,” kay kini mosangpot sa tibuok-kalibotang kasegurohan!

4. Nganong ang titulong “Diyos nga Gamhanan” dili saypon sa Diyos nga makagagahom sa tanan?

⁴ Sumala sa Isaias 9:6, ang ubang titulo, gawas pa sa “Prinsipe sa Pakigdait,” idugang ngadto sa mahimayaong ngalan ni Jesu-Kristo. Usa sa maong mga titulo maoy “Diyos nga Gamhanan.” Siya dili tawgong Diyos nga makagagahom sa tanan, nga daw siya sakop nga kasama sa usa ka trinidad sa mga diyos. Bisan sa adlaw sa iyang pagkabanhaw, iyang gipahibalo nga siya ubos gihapon kang Jehova. Siya mipakita kang Maria Magdalena ug misugo kaniya sa pagpahibalo sa iyang mabalak-ong mga tinun-an nga siya mobalik ngadto sa ilang Amahan ug iyang Amahan ug ngadto sa ilang Diyos ug iyang Diyos. (Juan 20:17) Hangtod niining adlawa mismo, siya nagapadayon sa pagpanguna sa tanang linalang sa pagsimba sa “Diyos sa mga diyos,” si Jehova. (Daniel 11:36) Ah, oo, si Jesu-Kristo may Diyos ug ang maong Diyos dili si Jesus mismo kondili ang langitnong Amahan si Jehova. Sa pagkatalagsaon gayod ang “Prinsipe sa Pakigdait” nagasilbing mag-uuna sa malungtarong pakigdait ug kasegurohan sa tibuok uniberso!

5. Nganong si Jesu-Kristo ang labing takos sa pagpanguna sa tanang intelihenteng linalang sa pagsimba sa matuod ug buhing Diyos, si Jehova?

⁵ Sa panahong walay kataposan, ang hinimayang Anak sa Diyos mopadayon sa pagpanguna sa tanang intelihenteng mga linalang sa pagsimba niining usa ug matuod buhing Diyos, si Jehova. Ang binayaw nga Anak sa Diyos tataw nga may katakos alang niini. Sa tanang linalang sa langit ug sa yuta, ang hinimayang Anak sa Diyos mao ang usang nakaila kang Jehova sulod sa kinatas-ang yugto sa panahon ug sa labing suod nga paagi. Sa 1 Corinto 2:11 si apostol Pablo nagaingon: “Kay kinsa ba taliwala sa mga tawo ang nahibalo sa mga butang sa usa ka tawo gawas sa espiritu sa tawo nga anaa kaniya?” Mao usab sa kahimtang ni Jesu-Kristo. Bisan tuod siya gigamit ni Jehova nga Diyos sa paglalang sa tawo, laing butang nga siya sa aktuwal mahimong tawo mismo, nga pagalibotan sa tanang yutan-ong kahimtang ug makasinati sa direkta sa mga pagbati sa usa ka tawo. Busa nahisulat kini nga “bisan tuod siya usa ka Anak, siya nakatuon sa pagkamasinugtanon gikan sa mga butang iyang giantos” ingon nga usa ka tawo dinhi sa yuta. (Hebreohanon 5:8) Siya nagpamatuod gayod nga takos nga saligan sa ‘tanang pagbulot-an sa langit ug sa yuta’ ug sa pagdala sa titulong “Diyos nga Gamhanan.”​—Mateo 28:18; itandi ang Filipos 2:5-11.

“Kahibulongang Magtatambag” ug “Amahan nga Walay Kataposan”

6. Sa unsang paagi si Jesu-Kristo nagaalagad nga “Kahibulongang Magtatambag,” ug sa unsang paagi ang “dakong panon” nakabatog kaayohan gikan sa iyang kahibulongang tambag?

⁶ Tungod niining tanang gamhanang katarongan, ang langitnong Prinsipe sa Diyos bug-os makaarang sa pag-alagad sa katawhan ingong “Kahibulongang Magtatambag.” (Isaias 9:6) Ang iyang tambag kanunay nga maalamon, hingpit, ug dili masayop. Ingong Tigpataliwala ni Jehova nga Diyos ug niadtong gipasulod sa bag-ong tugon, siya nagaalagad gayod nga usa ka kahibulongang magtatambag sulod na niining miaging 19 ka siglo. Karon, sukad sa 1935, ang “usa ka dakong panon” sa iyang “ubang mga karnero” nagadawat sa iyang kahibulongang tambag ug nagbaton sa kinamaayohang instruksiyon ug giya. (Pinadayag 7:9-17; Juan 10:16) Ingong usa ka galamiton alang niining buluhaton sa pagpanambag, niining “konklusyon sa sistema sa mga butang” iyang gipatungha ang gisaad nga “matinumanon ug maalamong ulipon” nga matang ug gipadumala sa tanan niyang yutan-ong kabtangan, o harianong intereses. (Mateo 24:3, 45-47; Lucas 12:42-44) Ang “dakong panon” karon nagadawat sa espirituwal nga tambag nga kahibulongan gayod ug kasaligan tungod kay gipasukad man kini sa Pulong sa Diyos.

7. Nganong si Satanas nga Yawa dili na diyos nga gamhanan alang sa katawhan ni Jehova?

⁷ Tungod sa ilang pagdawat nianang tambaga, si Satanas nga Yawa, “ang diyos niining sistema sa mga butang,” dili na diyos nga gamhanan alang kanato ingong katawhan ni Jehova. (2 Corinto 4:4) Kita masinugtanong migula sa Dakong Babilonya, ang imperyo sa kalibotan sa bakak nga relihiyon, ug kita wala na makaambit sa iyang mangil-ad nga mga sala. Kita midapig nga dili matarog sa kiliran sa Usa sa kang kansang abaga gibutang ni Jehova nga Diyos ang Iyang kagamhanan.

8. (a) Nganong ang titulong “Amahan nga Walay Kataposan” makapadani ilabina alang sa “dakong panon”? (b) Unsay mahitabo niadtong motugot nga si Satanas nga Yawa mao ang ilang espirituwal nga amahan?

⁸ Ang titulong “Amahan nga Walay Kataposan” maoy titulo sa pagmahal. Ang “dakong panon” sa “ubang mga karnero” nagapabili ilabina niining terminoha. Ang pagkaamahan ni Satanas nga Yawa wala makapadani kanila. Mangurog sila samtang ilang hinumdoman ang Hudiyong relihiyosong mga pangulo nga misupak kang Jesus ug si kinsa iyang giingnan: “Kamo gikan sa inyong amahan ang Yawa, ug buot ninyong buhaton ang mga tinguha sa inyong amahan. Kana siya usa ka mamumuno sa iyang sinugdan, ug siya wala magpabiling malig-on sa kamatuoran, tungod kay ang kamatuoran wala diha kaniya. Inigsulti niya sa bakak, siya nagasulti sumala sa iyang kaugalingong kinaiya, tungod kay siya bakakon man ug ang amahan sa bakak.” (Juan 8:44) Ang “dakong panon” nanggula gikan sa taliwala nianang espirituwal nga mga anak ni Satanas nga Yawa, kansang pagkaamahan ibabaw sa nahulog nga katawhan dili mahimong walay kataposan. Kadtong motugot niya nga mahimong ilang espirituwal nga amahan malaglag uban kaniya. Ang bug-os nga kalaglagan, nga gisimbolohan sa “kalayo nga walay kataposan” sa Mateo 25:41, nagapaabot sa Yawa ug sa tanang tawo nga wala makagawas gikan sa ilalom sa iyang pagkaamahan.​—Mateo 25:41-46.

9. Sa unsang paagi ang “dakong panon” nakatilaw sa pagkaamahan sa “Amahan nga Walay Kataposan”?

⁹ Sa laing bahin, natilawan na sa “dakong panon” ang pagkaamahan sa “Amahan nga Walay Kataposan.”a Sa unsang paagi? Pinaagi sa pagpatalinghog sa iyang tingog ug pagkahimong iyang “ubang mga karnero” ug pinaagi sa pagpakig-uban sa nahibilin sa espirituwal nga Israel. Kining mainitong pamilyahanong relasyon nagapaila sa kalinaw. Sa pagsulat ubos sa inspirasyon, si apostol Pablo nagtawag kang Jehova sa Roma 16:20 ingong “ang Diyos nga nagahatag ug pakigdait.” Nan, pagkatukmang ang iyang bugtong nga Anak pagatawgong “Prinsipe sa Pakigdait”! Pinaagi sa pagpasig-uli sa pakigdait sa tibuok uniberso, ang “Prinsipe sa Pakigdait” walay pakyas nga magkinabuhi sumala sa kahulogan sa iyang dakong titulo.

Ang Harianong Kagamhanan sa “Prinsipe sa Pakigdait”

10, 11. Tapos sa pagtagna sa kinalabwang pagpanganak sukad, unsay giingon ni Isaias, ug unsay kahulogan sa iyang mga pulong?

¹⁰ Tapos sa pagtagna ni Isaias sa kinalabwang pagpanganak sukad​—oo, ang iya sa Anak sa Diyos nga pasidunggan sa titulong “Prinsipe sa Pakigdait”​—ang manalagna giagak sa espiritu ni Jehova sa pag-ingon: “Sa kadagaya sa prinsipinhong pagmando ug sa pakigdait walay kataposan . . . Ang kakugi mismo ni Jehova sa mga panon ang magabuhat niini.”​—Isaias 9:7.

¹¹ Sa pag-ingong “sa kadagaya sa prinsipinhong pagmando,” ang tagna nagapadayag nga ang dominyo sa “Prinsipe sa Pakigdait” magasakop gayod sa tibuok yuta. Walay mga utlanan sa yuta ang magalimite sa iyang dominyo. Kana magakobre sa tibuok globo. Dugang pa, sa umaabot nga Paraisong yuta, wala unyay pagkatapos ang pakigdait. Sa bisan diin wala na unyay mga kagubot. Ang pakigdait molukop sa tibuok yuta ug modagaya sa tanang panahon. (Salmo 72:7) Ang pakigdait o kalinaw niining kahimtanga nagkahulogan ug labaw pa kay sa pagkawalay kabangisan ug gubat. Kini magaapil sa hustisya ug pagkamatarong, kay si Isaias miingon nga ang prinsipinhong pagmando pagalig-onon “pinaagi sa hustisya ug pinaagi sa pagkamatarong, sukad karon hangtod sa panahong walay katinoan.” Aduna unyay daghang panalangin alang sa katawhan. Ug ang dili-maupos nga kadasig ni Jehova nga Diyos maoy magapalampos niini sulod sa atong panahon.

¹² Bisan karon, kining kagamhanana diha sa abaga sa “Prinsipe sa Pakigdait” gihawasan sa tibuok yuta. Kusog ang pagkaylap sa pagdawat sa iyang harianong langitnong kagamhanan. Ang nahibilin sa inanak-sa-espiritung mga tinun-an ni Jesu-Kristo bug-os natigom na gikan sa taliwala sa kanasoran. Dugang pa, ang “dakong panon” ginatigom na gikan sa kapin sa 200 ka nagkalainlaing kayutaan. Aduna na karoy 3,229,022 ka saksi ni Jehova, ug ang masadyaong buluhaton sa pagpanigom wala pa mahuman. Kining “dakong panon” nagaabiba sa kagamhanan nga gipahimutang sa abaga sa “Prinsipe sa Pakigdait.” Ang mga sakop niini labing mapasalamaton nga magpasakop nianang kagamhanana ug mahimong mga envoy o tinugyanan niini sa tibuok yuta, sa pagpakig-uban sa “mga embahador nga puli kang Kristo,” ang dinihogang nahibilin.​—2 Corinto 5:20.

Modernong-Adlawng Pagsabutsabot Pagabungkagon

13. (a) Unsay gipaningkamotan sa mga tinugyanan o envoy sa Gingharian sa pagbuhat sa ilang taliwala? (b) Unsay pag-isip sa Diyos sa Hiniusang Kanasoran?

¹³ Nahuptan usab sa mga envoy o tinugyanan sa Gingharian ang pakigdait sa ilang taliwala. Sila ‘masingkamoton sa pagpatunhay sa pagkausa sa espiritu sa nagapahiusang bugkos sa pakigdait.’ (Efeso 4:3) Kini ilang ginabuhat bisan pa sa kagubot nga karon nagasilaob sa tibuok yuta. Ang mga nasod sulod ug gawas sa Hiniusang Kanasoran sa pagkamatuod nahan-ay batok sa kagamhanan sa “Prinsipe sa Pakigdait.” Sumala sa pag-isip niini sa Diyos, ang Hiniusang Kanasoran maoy dako kaayong pagsabutsabot sa kalibotan. Ngano man? Kay ginapahayag niini nga kini magakab-ot sa mga tumong nga gihikay sa Diyos nga kab-oton lamang sa iyang “Prinsipe sa Pakigdait.” Ug kini nagaawhag sa mga katawhan sa tanang nasod sa pagpaluyo niini aron tukoron ang tibuok-kalibotang kasegurohan pinaagi sa paningkamot sa tawo. Kini nagproklamar pa sa 1986 ingong “Internasyonal nga Tuig sa Pakigdait.” Sa ingon kini nagapamatuod nga usa ka pagsabutsabot batok sa “Prinsipe sa Pakigdait” ug batok sa tugon ni Jehova uban kaniya alang sa walay-kataposang Gingharian.

14. Giunsa sa manalagna Isaias ang pagpasidaan sa tanang nagasupak kang Jehova ug sa iyang tugon sa Gingharian?

¹⁴ Tungod sa usa ka hinungdang sama niana, si propeta Isaias nagpasidaan kang Haring Ahaz ug sa iyang mga ginsakpan niadto batok sa pagtinguhag pakigdait ug kasegurohan pinaagi sa pagpakig-alyado sa Asiryanhong Gahom sa Kalibotan. Ang pasidaan makaplagan sa Isaias 8:9, 10. Sa balaknong katahom, ang propeta nagapasidaan sa tanang masupakon kang Jehova ug sa iyang tugon sa Gingharian: “Mangadaot kamo, Oh kamong mga katawhan, ug mangabungkag kamo; ug magpatalinghog kamo, kamong tanang atua sa halayong mga bahin sa yuta! Managsul-ob kamo, ug mangadugmok kamo! Panagsabot kamo, ug kini mabungkag! Isulti ang pulong, ug kini dili mobarog, kay ang Diyos nagauban kanamo!”

15. Unsay mahitabo sa pagsabutsabot batok sa tugon sa Gingharian karong adlawa, sumala sa gipasundayag sa pagsabutsabot sa mga adlaw ni Haring Ahaz?

¹⁵ Busa pasagding ang kanasoran ilalom sa prinsipe niining kalibotana, si Satanas nga Yawa, magsabutsabot batok sa tugon sa Gingharian ug sa iyang prinsipinhong Manununod ug Magmamando. Ang pagsabutsabot mabungkag, sama ra sa pagsabutsabot sa mga adlaw ni Haring Ahaz. Si Haring Rezin sa Sirya ug si Haring Peka sa Israel wala mahadlok kang Jehova sa mga panon kondili nagsabutsabot batok sa iyang tugon alang sa Gingharian. Aw, ang ilang pagsabutsabot nabungkag. Sa susama, si Haring Ahaz sa Juda wala mahadlok kang Jehova kondili misulod sa pagsabutsabot uban sa gahom sa kalibotan sa Asirya. Kadto wala gayod makatabang kang Ahaz ug magpatunghag pakigdait ug kasegurohan alang kaniya. Kadto nagpatungha sa kasakitan ug kaulipnan. Labing grabe sa tanan, si Ahaz nawad-an sa pabor ni Jehova tungod niadto.

16. Giunsa pagbungkag ni Jehova ang Asiryanhong pagsabutsabot batok sa tugon sa Gingharian, ug unsay gilandongan niini sa atong adlaw?

¹⁶ Tapos sa pagkamatay ni Ahaz ug sa mga adlaw sa iyang anak si Ezekias, si Jehova sa mga panon nagbungkag sa Asiryanhong pagsabutsabot batok sa tugon sa Gingharian. Ang hari sa Asirya napugos sa pagsibog gikan sa yuta sa Juda human laglaga sa manulonda ni Jehova ang 185,000 sa iyang mga sundalo. Ang kaaway wala gani makaluthang bisan sa usa ka pana batok sa siyudad sa Jerusalem. (Isaias 37:33-36) Ang samang kaparotan sa presenteng-adlawng pagsabutsabot sa kalibotan batok sa tugon sa Gingharian ni Jehova ug sa “Prinsipe sa Pakigdait” maoy tino, kay ang Diyos nagauban sa iyang Prinsipe Immanuel ug sa tanang nagaabiba kaniya!

Pagbarog nga Dili-Mahadlok Dapig sa Unibersohanong Pagkasoberano ni Jehova

17. (a) Unsay buhaton sa dili madugay sa politikanhong mga elemento ngadto sa Dakong Babilonya, ug unsay kinahanglan unya ug madawat sa katawhan ni Jehova? (b) Tapos sa paglaglag sa Dakong Babilonya, unsay buhaton unya sa ateyistikanhong mga magmamando, nga magatukmod kang Jehova sa pagbuhat sa unsa?

¹⁷ Ang politikanhong mga elemento sa dili madugay magatumong sa ilang paningkamot dili lamang batok sa Kakristiyanohan kondili batok sa tibuok Dakong Babilonya, ang tibuok imperyo sa kalibotan sa bakak nga relihiyon, aron sa pagpuo niana. Nianang kritikal nga higayon, kinahanglang ipasundayag sa talagsaong gidak-on ang balaang pagpanalipod sa katawhan ni Jehova. Kay nadasig sa mangilngig nga kadaogan batok sa Dakong Babilonya, ang ateyistikanhong mga magmamando mosulong batok niadtong dapig sa kagamhanan sa Diyos pinaagi ni Jesu-Kristo. Unya gamiton ni Jehova ang iyang “Prinsipe sa Pakigdait” aron sa pagbugno sa “gubat sa dakong adlaw sa Diyos nga Makagagahom sa Tanan.” (Pinadayag 16:14) Si Jesu-Kristo mapamatud-an unyang dili-mapukan nga Manggugubat kang kansang kagamhanan dili makaagom sa pag-us-os. Siya mapamatud-ang “Diyos nga Gamhanan” ilalom sa madaogong Diyos nga makagagahom sa tanan, si Jehova. Kining “Diyos nga Gamhanan” magpurongpurong sa iyang masilakong karera sa kadaogan sa Armageddon nga molanog nga walay pagkaawop sa panahong walay kataposan. Mabuhi ang maong walay-ingong kadaogan!

18. Atubangan sa modernong-adlawng pagsabutsabot batok sa tugon sa Gingharian, ang mga Saksi ni Jehova determinado sa pagbuhat sa unsa, ug unsa ang sangpotanan?

¹⁸ Busa, padayon ngadto sa labawng pagkainila sa kalibotan kay sukad masukad, kamong tanang saksi ni Jehova, nga may bug-os nga pagsalig sa inyong Diyos ug sa iyang nagamandong Hari, ang “Prinsipe sa Pakigdait”! Ipasundayag ang bug-os nga pagkawalay-kahadlok sa presenteng pagsabutsabot sa kalibotan. Pinaagi sa inyong pagpahayag sa bisan diin sa mensahe sa Gingharian ug sa umaabot niining kadaogan batok sa pagsabutsabot sa kalibotan sa Armageddon, mahimo unta kamong tanan nga mga ilhanan ug mga milagro sa kadungganan ni Jehova. Dihang palisoon sa Yawa ang kalibotanong mga magmamando batok kanato, hinumdomi, ang kadaogan maiya niadtong nagapabiling matuod ug matinumanon sa pagdapig sa Gingharian ni Immanuel, ang “Prinsipe sa Pakigdait,” kay “Ang Diyos Uban Kanato”! (Mateo 1:23; itandi ang Isaias 8:10.) Ug pasagding ang tanang manulonda sa langit ug tanang nagahupot-sa-integridad nga katawhan sa yuta magaingong “Amen” sa kabayawan sa pagkasoberano ni Jehova sa ibabaw sa tanang gilalang nga butang sa langit ug sa yuta, uban ang kasegurohan nga dili gayod matapos!