Mga Panalangin Pinaagi sa Haring Giniyahan sa Espiritu sa Diyos!
“Ang espiritu ni Jehova mopahiluna kaniya.”—ISA. 11:2.
1. Unsang mga kabalaka ang gipahayag sa pipila bahin sa mga problema sa kalibotan?
“DIHA sa kalibotan nga labihan ka gubot ang politika, katilingban ug kalikopan, makalahutay pa kaha ang tawhanong kaliwatan sa sunod 100 ka tuig?” Kana ang pangutana sa siyentipikong si Stephen Hawking niadtong 2006. Usa ka artikulo sa magasing New Statesman miingon: “Wala nato matapos ang kakabos ni mapatungha ang kalinaw sa tibuok kalibotan. Morag sukwahi niana ang atong nakab-ot. Samag wala lang kita maningkamot. Apan ato nang gisulayan ang tanan, gikan sa komunismo ngadto sa kapitalismo; gikan sa Liga sa Kanasoran ngadto sa paggamag nukleyar nga armas. Gibugno nato ang daghan kaayong ‘gubat sa pagtapos sa mga gubat’ kay nagtuo nga nahibalo kita kon unsaon pagtapos ang gubat.”
2. Sa dili madugay, sa unsang paagi gamiton ni Jehova ang iyang awtoridad ingong Soberano sa tibuok yuta?
2 Ang mga alagad ni Jehova dili na matingala sa maong mga komento. Ang Bibliya nag-ingon nga ang tawo gilalang dili aron magmando sa kaugalingon. (Jer. 10:23) Si Jehova lamang ang angay natong Soberano. Busa, siya ang may katungod sa pagtakdag mga sukdanan alang kanato, pagpaila kon unsay angayng katuyoan sa atong kinabuhi, ug paggiya kanato aron matuman ang maong katuyoan. Dugang pa, sa dili madugay gamiton niya ang iyang awtoridad sa pagtapos sa pakyas nga paningkamot sa mga tawo nga mandoan ang ilang kaugalingon. Sa samang higayon, iyang laglagon ang tanan nga nagsalikway sa iyang pagkasoberano, kinsa padayong nag-ulipon sa mga tawo ngadto sa sala, pagkadili-hingpit, ug ngadto sa “diyos niini nga sistema sa mga butang,” si Satanas nga Yawa.—2 Cor. 4:4.
3. Unsay gitagna ni Isaias bahin sa Mesiyas?
3 Sa bag-ong kalibotan, ang Mesiyanikong Gingharian mao ang gamiton ni Jehova sa pagpahayag sa iyang mahigugmaong pagmando sa katawhan. (Dan. 7:13, 14) Bahin sa Hari niini, si Isaias mitagna: “Mogitib gayod ang usa ka gamayng sanga gikan sa tuod ni Jese; ug gikan sa iyang mga gamot ang usa ka turok magmabungahon. Ug ang espiritu ni Jehova mopahiluna kaniya, ang espiritu sa kaalam ug sa pagsabot, ang espiritu sa tambag ug sa pagkagamhanan, ang espiritu sa kahibalo ug sa pagkahadlok kang Jehova.” (Isa. 11:1, 2) Sa unsang mga paagi ang balaang espiritu sa Diyos nagkuwalipikar sa “gamayng sanga gikan sa tuod ni Jese,” si Jesu-Kristo, aron magmando sa katawhan? Unsang mga panalangin ang moresulta sa iyang pagmando? Ug unsay kinahanglan natong buhaton aron matagamtam ang maong mga panalangin?
Takos Magmando sa Tabang sa Diyos
4-6. Unsang bililhong kahibalo ang nabatonan ni Jesus aron makaalagad siya ingong maalamon ug maluluy-ong Hari, Hataas nga Saserdote, ug Maghuhukom?
4 Buot ni Jehova nga ang iyang tawhanong mga sakop makadangat sa kahingpitan ubos sa paggiya sa maalamon ug maluluy-ong Hari, Hataas nga Saserdote, ug Maghuhukom. Kanay katarongan nga gipili sa Diyos si Jesu-Kristo, nga pinaagi sa balaang espiritu nahimong kuwalipikado alang sa maong importante kaayong mga responsabilidad. Tagda ang pipila ka katarongan nga matuman ni Jesus ang mga katungdanan nga gihatag sa Diyos kaniya.
5 Si Jesus nakaila gayod sa Diyos. Ang bugtong Anak sa Diyos nakaila sa iyang Amahan nga mas dugay na kay ni bisan kinsa, lagmit sa binilyong katuigan. Nianang panahona, si Jesus bug-os nakaila kang Jehova mao nga mahubit siya ingong “larawan sa dili-makita nga Diyos.” (Col. 1:15) Si Jesus mismo miingon: “Siya nga nakakita kanako nakakita usab sa Amahan.”—Juan 14:9.
6 Sunod kang Jehova, si Jesus adunay bug-os nga kahibalo sa tanang linalang, apil ang tawo. Ang Colosas 1:16, 17 mabasa: “Pinaagi kaniya [Anak sa Diyos] gilalang ang tanang ubang butang sa langit ug sa yuta, ang mga butang nga makita ug ang mga butang nga dili-makita . . . Dugang pa, siya mao ang una sa tanang ubang butang ug pinaagi kaniya ang tanang ubang butang gipatungha.” Hunahunaa kana! Si Jesus, ingong “batid nga magbubuhat” sa Diyos, may bahin sa paglalang sa tanang ubang butang. Busa, nasabtan niya ang tanang detalye sa tibuok uniberso, gikan sa atomo ngadto sa katingalahang utok sa tawo. Sa pagkatinuod, si Kristo personipikasyon sa kaalam!—Prov. 8:12, 22, 30, 31.
7, 8. Sa unsang paagi ang espiritu sa Diyos nagtabang kang Jesus sa iyang ministeryo?
7 Si Jesus gidihogan sa balaang espiritu sa Diyos. “Ang espiritu ni Jehova ania kanako,” matod ni Jesus, “tungod kay siya nagdihog kanako aron sa pagpahayag sa maayong balita ngadto sa mga kabos, siya nagpadala kanako aron sa pagwali sa kagawasan ngadto sa mga binihag ug sa kapasig-ulian sa panan-aw ngadto sa mga buta, aron sa pagpalakat sa mga dinaogdaog uban ang kagawasan, aron sa pagwali sa dalawatong tuig ni Jehova.” (Luc. 4:18, 19) Sa gibawtismohan si Jesus, ang balaang espiritu lagmit nagpahinumdom kaniya sa iyang nakat-onan una pa siya mahimong tawo, lakip ang katuyoan sa Diyos nga iyang pagatumanon panahon sa iyang ministeryo sa yuta ingong Mesiyas.—Basaha ang Isaias 42:1; Lucas 3:21, 22; Juan 12:50.
8 Tungod kay si Jesus gihatagag gahom sa balaang espiritu ug hingpit sa lawas ug kaisipan, siya ang labing bantogang tawo nga nabuhi sukad ug ang labing dakong Magtutudlo. Gani, ang iyang mamiminaw “nahingangha sa iyang paagi sa pagpanudlo.” (Mat. 7:28) Gipatin-aw ni Jesus ang pangunang mga hinungdan sa problema sa katawhan—sala, pagkadili-hingpit, ug pagkawalay-kahibalo bahin sa Diyos. Lain pa, nahibalo usab siya kon unsay diha sa kasingkasing sa mga tawo ug gitratar sila sumala niana.—Mat. 9:4; Juan 1:47.
9. Nganong modako ang imong pagsalig kang Jesus ingong Magmamando kon imong pamalandongon ang iyang mga kasinatian sa yuta?
9 Si Jesus nagkinabuhi ingong tawo. Ang iyang kasinatian ingong tawo ug ang iyang suod nga pagpakig-uban sa dili-hingpit nga mga tawo nakatabang ug dako aron makuwalipikado si Jesus nga Hari. Si apostol Pablo misulat: “Kinahanglan nga [si Jesus] mahisama sa iyang ‘mga igsoon’ sa tanang paagi, aron siya mahimong maluluy-on ug matinumanong hataas nga saserdote sa mga butang maylabot sa Diyos, aron sa pagtanyag ug halad pasig-uli alang sa mga sala sa katawhan. Tungod kay siya nag-antos sa dihang gisulayan, siya makaarang sa pagtabang kanila nga ginasulayan.” (Heb. 2:17, 18) Tungod kay “gisulayan” si Jesus, siya makasimpatiya niadtong nakaagom ug pagsulay. Ang kamaluluy-on ni Jesus tin-awng nadayag panahon sa iyang ministeryo sa yuta. Ang mga masakiton, baldado, dinaogdaog—bisan mga bata—wala magpanuko sa pagduol kaniya. (Mar. 5:22-24, 38-42; 10:14-16) Ang mga maaghop ug mga interesadong mokat-on bahin sa Diyos nadani usab niya. Sa laing bahin, ang mga hambogiro, mapahitas-on, ug kadtong ‘wala makabaton sa gugma sa Diyos’ nagsalikway, nagdumot, ug nagsupak kaniya.—Juan 5:40-42; 11:47-53.
10. Unsa ang dakong pamatuod sa gugma ni Jesus alang kanato?
10 Gihatag ni Jesus ang iyang kinabuhi alang kanato. Tingali ang kinadak-ang pamatuod nga si Jesus lamang ang labing maayong Magmamando mao ang iyang pagkaandam nga mamatay alang kanato. (Basaha ang Salmo 40:6-10.) Si Kristo miingon: “Walay usa nga may gugmang labaw pa kay niini, nga ang usa magtugyan sa iyang kalag alang sa iyang mga higala.” (Juan 15:13) Lahi sa ubang dili-hingpit nga magmamando, kinsa sagad maluhong nagkinabuhi tungod sa ilang pagpamentaha sa mga tawo, si Jesus naghatag sa iyang kinabuhi alang sa katawhan.—Mat. 20:28.
Gihatagag Gahom sa Pagpadapat sa mga Benepisyo sa Lukat
11. Nganong makasalig gayod kita kang Jesus ingong atong Manunubos?
11 Ingong Hataas nga Saserdote, si Jesus ang angayng manguna sa pagpadapat sa mga benepisyo sa iyang halad-lukat kanato! Sa iyang ministeryo sa yuta, gipakita ni Jesus kon unsay iyang pagahimoon ingong Manunubos sulod sa iyang Usa ka Libo ka Tuig nga Pagmando, nga atong matagamtam kon kita magmatinumanon. Siya nag-ayo ug mga masakiton ug baldado, nagbanhaw ug mga patay, nagpakaon ug libolibo, ug nagpakalma pa gani sa kusog nga hangin. (Mat. 8:26; 14:14-21; Luc. 7:14, 15) Dugang pa, iya kadtong gihimo dili aron ipakita ang iyang awtoridad ug gahom, kondili aron ipasundayag ang iyang kaluoy ug gugma. “Buot ko,” miingon siya sa usa ka sanlahon nga nangaliyupo nga ayohon. (Mar. 1:40, 41) Ipasundayag ni Jesus ang samang kaluoy panahon sa iyang Milenyong Pagmando—sa tibuok kalibotan.
12. Sa unsang paagi matuman ang Isaias 11:9?
12 Ipadayon usab ni Kristo ug sa iyang kaubang mga magmamando ang programa sa espirituwal nga edukasyon nga gisugdan ni Jesus mga 2,000 ka tuig kanhi. Busa matuman unya ang mga pulong sa Isaias 11:9: “Ang yuta mapuno sa kahibalo kang Jehova ingon sa katubigan nga nagtabon sa dagat mismo.” Ang maong espirituwal nga edukasyon tinong maglakip sa instruksiyon kon unsaon pag-atiman ang yuta ug ang daghang linalang niini, ingon sa gisugo kang Adan kanhi. Pagkatapos sa 1,000 ka tuig, ang orihinal nga katuyoan sa Diyos sumala sa Genesis 1:28 matuman na, ug ang halad lukat bug-os nang mapadapat.
Gihatagag Gahom sa Paghukom
13. Sa unsang paagi gipakita ni Jesus ang iyang gugma sa pagkamatarong?
13 Si Kristo mao “ang gitudlo sa Diyos nga mahimong maghuhukom sa mga buhi ug sa mga patay.” (Buh. 10:42) Nan, makapahupay gayod ang pagkahibalo nga si Jesus matinud-anon, nga ang pagkamatarong ug pagkamatinumanon nahisamag bakos sa iyang hawak! (Isa. 11:5) Iyang gipakita nga siya nagdumot sa kadalo, kasalingkapaw, ug ubang pagkadaotan, ug nagbadlong niadtong walay simpatiya sa pag-antos sa uban. (Mat. 23:1-8, 25-28; Mar. 3:5) Dugang pa, gipakita ni Jesus nga dili siya malingla sa panggawas nga dagway, “kay siya nahibalo kon unsa ang anaa sa tawo.”—Juan 2:25.
14. Sa unsang paagi gipasundayag ni Jesus ang iyang gugma sa pagkamatarong ug sa hustisya karon, ug unsay angay natong isukna sa kaugalingon?
14 Padayong gipakita ni Jesus ang iyang gugma sa pagkamatarong ug hustisya pinaagi sa pagdumala sa kinadak-ang buluhaton sa pagsangyaw ug pagpanudlo karon. Walay tawo, tawhanong gobyerno, ug daotang espiritu nga makapugong sa kalamposan niining buluhatona sa bug-os nga katagbawan sa Diyos. Busa, makasalig gayod kita nga human sa Armagedon, mopatigbabaw ang hustisya. (Basaha ang Isaias 11:4; Mateo 16:27.) Suknaa ang kaugalingon: ‘Ako bang gipasundayag ang tinamdan ni Jesus ngadto sa mga tawo sa dihang ako magsangyaw? Ako bang gihatag kang Jehova ang kinamaayohan bisan pag limitado ang akong mahimo tungod sa akong panglawas o personal nga kahimtang?’
15. Unsay atong hinumdoman aron makaalagad sa Diyos nga bug-os kalag?
15 Kita makaalagad sa Diyos nga bug-os kalag kon atong hinumdoman nga iya sa Diyos ang buluhaton sa pagsangyaw. Siya ang nagsugo niini; pinaagi sa iyang Anak siya ang nagtultol niini; ug pinaagi sa balaang espiritu gihatagan niyag katakos ang mga nakigbahin niini. Gipabilhan ba nimo ang imong pribilehiyo sa pag-alagad isip kaubang magbubuhat sa Diyos ug sa iyang Anak nga giniyahan sa iyang espiritu? Wala nay lain gawas kang Jehova nga makatukmod sa kapig pito ka milyong tawo, nga ang kadaghanan kanila giisip nga “dili edukado ug ordinaryo,” aron ipaambit ang mensahe sa Gingharian ngadto sa katawhan sa 236 ka kayutaan.—Buh. 4:13.
Pinaagi ni Kristo, Tagamtama ang mga Panalangin!
16. Unsay gipasabot sa Genesis 22:18 bahin sa panalangin sa Diyos?
16 Si Jehova miingon kang Abraham: “Pinaagi sa imong binhi ang tanang nasod sa yuta tinong magapanalangin sa ilang kaugalingon tungod kay ikaw namati sa akong tingog.” (Gen. 22:18) Kini nagpasabot nga kadtong nagpabili sa ilang pag-alagad sa Diyos makasalig nga ilang matagamtam ang mga panalangin sa Mesiyanikong Binhi. Ug sila aktibong nag-alagad karon nga naghunahuna sa maong mga panalangin.
17, 18. Unsay gisaad ni Jehova diha sa Deuteronomio 28:2, ug unsay kahulogan niini alang kanato?
17 Sa mga kaliwat ni Abraham, ang nasod sa Israel, ang Diyos kanhi miingon: “Kining tanang panalangin [nga gipahayag diha sa pakigsaad sa Balaod] moabot kanimo ug modangat kanimo, tungod kay ikaw nagpadayon sa pagpamati sa tingog ni Jehova nga imong Diyos.” (Deut. 28:2) Kana ikapadapat usab sa mga alagad sa Diyos karon. Kon imong gitinguha ang panalangin ni Jehova, ‘padayon sa pagpamati’ sa iyang tingog. Unya ang iyang mga panalangin ‘moabot ug modangat kanimo.’ Apan unsay nalangkit sa “pagpamati”?
18 Ang pagpamati tinong naglakip sa seryosong pagpamalandong sa gisulti sa Pulong sa Diyos ug sa espirituwal nga pagkaon nga iyang gitagana. (Mat. 24:45) Kini usab nagkahulogan sa pagkamasinugtanon ngadto sa Diyos ug sa iyang Anak. Si Jesus miingon: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kondili ang usa nga nagabuhat sa kabubut-on sa akong Amahan nga anaa sa mga langit.” (Mat. 7:21) Ang pagpamati sa Diyos nagkahulogan usab nga ang usa kinabubut-ong magpasakop sa Kristohanong kongregasyon nga gitukod sa Diyos, nga may tinudlong mga ansiyano, ang “mga gasa nga mga lalaki.”—Efe. 4:8.
19. Sa unsang paagi matagamtam nato ang panalangin sa Diyos?
19 Ang “mga gasa nga mga lalaki” naglakip sa mga membro sa Nagamandong Lawas, nga naghawas sa tibuok Kristohanong kongregasyon. (Buh. 15:2, 6) Sa pagkatinuod, ang atong tinamdan bahin sa espirituwal nga mga igsoon ni Kristo maoy dakong basehanan kon unsay ihukom kanato sa umaabot nga dakong kasakitan. (Mat. 25:34-40) Busa, ang atong maunongong pagsuportar sa mga dinihogan sa Diyos maoy usa ka paagi nga atong matagamtam ang panalangin.
20. (a) Unsay pangunang responsabilidad sa “mga gasa nga mga lalaki”? (b) Sa unsang paagi nato ikapakita nga ato silang gipabilhan?
20 Ang “mga gasa nga mga lalaki” naglakip usab sa mga membro sa Komite sa Sanga, mga nagapanawng magtatan-aw, ug mga ansiyano sa kongregasyon—sila gitudlo sa balaang espiritu. (Buh. 20:28) Ang ilang pangunang responsabilidad mao ang paglig-on sa katawhan sa Diyos ‘hangtod ang tanan makadangat sa pagkausa sa pagtuo ug sa tukmang kahibalo sa Anak sa Diyos, sa pagkahingkod nga tawo, sa gidak-on nga iya sa kabug-osan ni Kristo.’ (Efe. 4:13) Tinuod, sila dili hingpit sama nato. Bisan pa niana, atong matagamtam ang mga panalangin kon kita magmapasalamaton ug mosanong sa ilang mahigugmaong pag-atiman ingong magbalantay.—Heb. 13:7, 17.
21. Nganong importante gayod nga magmasinugtanon kita sa Anak sa Diyos karon?
21 Sa dili na madugay, laglagon ni Kristo ang daotang sistema ni Satanas. Sa pagkahitabo niana, ang atong kinabuhi magdepende sa paghukom ni Jesus kay siya ang gihatagag awtoridad sa Diyos aron giyahan ang gitagnang “dakong panon” ngadto sa “mga tuboran sa mga tubig sa kinabuhi.” (Pin. 7:9, 16, 17) Busa, buhaton nato karon ang atong maarangan nga kinabubut-ong magpasakop ug magmapasalamaton sa Hari nga giniyahan sa espiritu ni Jehova.
Unsay Imong Nakat-onan sa . . .
• Buhat 10:42?
[Hulagway sa panid 17]
Ang kaluoy ni Jesus nadayag sa iyang pagbanhaw sa anak nga babaye ni Jairo
[Mga hulagway sa panid 18]
Si Jesu-Kristo ang nagdumala sa kinadak-ang buluhaton sa pagsangyaw