Nagtudlo ba ang Bibliya nga Lapad ang Yuta?

Wala. Ang Bibliya wala magtudlo nga lapad, o flat, ang yuta.a Ang Bibliya dili libro sa siyensiya. Bisan pa niana, wala ni gisulti nga supak sa kon unsay napamatud-an sa siyensiya. Ang giingon sa Bibliya ‘kanunayng kasaligan, karon ug hangtod sa hangtod.’—Salmo 111:8.

• Unsay gipasabot sa Bibliya sa pag-ingon ug “upat ka suok sa yuta”?

• Komosta ang pagtental sa Yawa kang Jesus?

Ang mga ekspresyon sa Bibliya nga “upat ka suok sa yuta” ug “mga kinatumyan sa yuta” dili angayng literalon ug sabot, nga morag kuwadrado o naay mga kanto ang yuta. (Isaias 11:12; Job 37:3) Klaro nga mahulagwayon lang ning mga ekspresyona, nga nagtumong sa tibuok yuta. Ingon ana pod ang gipasabot sa Bibliya sa paggamit niini sa upat ka direksiyon sa kompas.—Lucas 13:29.

Ang Hebreohanong termino nga gihubad ug “suok” o “mga kinatumyan” posibleng usa ka idiom nga gibase sa ekspresyong “mga pako.” Ang The International Standard Bible Encyclopedia nag-ingon nga “tungod kay ang pako sa langgam gigamit sa pagtabon sa anak niini, [kining Hebreohanong termino] nagpasabot ug kinatumyang mga bahin sa bisan unsa nga gibukhad.” Ang mao gihapong reperensiya midugang nga sa Job 37:3 ug Isaias 11:12, “ang termino nagtumong sa mga utlanan o kinatumyang mga bahin sa yuta.”b

Aron tentalon si Jesus, “gidala siya sa Yawa sa bukid nga talagsaon ang kahabog, ug gipakita kaniya ang tanang gingharian sa kalibotan ug ang himaya niini.” (Mateo 4:8) Ang uban nag-ingon nga kining tekstoha nagtudlo nga ang tibuok kalibotan makita gikan sa usa ka lokasyon diha sa lapad o flat nga yuta. Pero niining tekstoha, ang “bukid nga talagsaon ang kahabog” morag dili literal nga lokasyon. Tagda kon nganong makataronganon ni nga konklusyon.

• Walay literal nga bukid sa yuta diin makita ang tanang gingharian sa kalibotan.

• Gipakita sa Yawa kang Jesus dili lang ang tanang gingharian kondili ang “himaya [sab] niini.” Dili nâ makita gikan sa layo, busa lagmit migamit ang Yawa ug panan-awon aron ipakita kana kang Jesus. Parehas ni sa paggamit ug projector ug screen aron ipakita ang mga hulagway sa lainlaing lugar sa yuta.

• Ang susamang asoy sa Lucas 4:5 nag-ingon nga gipakita sa Yawa kang Jesus “sa daklit . . . ang tanang gingharian sa yuta,” nga imposibleng mahitabo pinaagig normal nga panan-aw. Kini nagpasabot nga gipakita sa Yawa kang Jesus ang maong tentasyon sa laing paagi.