Ang Kagamhanang Mopatunghag Paraiso

Sa dinhi pa si Jesus sa yuta, iyang gisugo ang iyang mga sumusunod sa pag-ampo sa Gingharian sa Diyos: “Paanhia ang imong gingharian. Matuman ang imong kabubut-on sa langit, dinhi usab sa yuta.” (Mateo 6:​9, 10) Kanunay usab siyang maghisgot sa “maayong balita sa gingharian.” (Mateo 4:​23) Sa pagkatinuod, mas daghan ang iyang gisulti bahin sa Gingharian kay sa ubang butang. Ngano? Tungod kay ang Gingharian mao ang kasangkapan nga gamiton sa Diyos sa pagsulbad sa mga suliran nga nakahimo sa kinabuhi karon nga malisod kaayo. Pinaagi sa Gingharian, taposon sa Diyos sa dili madugay ang mga gubat, gutom, sakit, ug krimen, ug mopatungha siyag panaghiusa ug pakigdait.

Buot ka bang mopuyo nianang matanga sa kalibotan? Kon mao, nan angay nimong basahon kining pulyetoha. Dinhi niini, imong mahibaloan nga ang Gingharian maoy usa ka kagamhanan, ug mas maayo kini kay sa ubang kagamhanan nga nakamando sukad sa katawhan. Imong makita usab ang kulbahinam nga paagi nga anam-anam nga gipatin-aw sa Diyos ngadto sa iyang mga alagad ang iyang katuyoan bahin sa Gingharian. Dugang pa, imong makita kon sa unsang paagi makatabang ang Gingharian kanimo karon.

Sa pagkamatuod, karon mismo ikaw mahimong sakop sa Gingharian sa Diyos. Apan sa dili ka pa mopili niini, kinahanglang masayod ka ug dugang pa bahin niini. Busa among gidasig kamo sa pagsusi ning pulyetoha. Ang tanan nga gipahayag niini kanimo bahin sa Gingharian gikuha gikan sa Bibliya.

Una sa tanan, atong tan-awon kon nganong dako kaayo ang atong panginahanglan sa Gingharian sa Diyos.

Sa sinugdan sa tawhanong kasaysayan, gilalang sa Diyos ang tawo nga hingpit ug gibutang siya sa paraiso. Niadtong panahona walay panginahanglan sa Gingharian. Apan, si Adan ug Eva, ang atong unang mga ginikanan, namati kang Satanas, usa ka maalsahong manulonda. Kabakakan ang iyang gisulti kanila bahin sa Diyos ug maoy nagpalihok kanila sa pag-alsa batok sa Diyos. Busa takos silang mamatay, tungod kay “ang suhol sa sala mao ang kamatayon.”​—Roma 6:23.

Ang dili-hingpit, makasasalang tawo dili makapatunghag hingpit nga mga anak. Busa ang tanang anak ni Adan nangatawo nga dili-hingpit, makasasala, mamatay.​—Roma 5:12.

Sukad niadto, nagkinahanglan ang mga tawo sa Gingharian sa Diyos sa pagtabang kanila aron matubos gikan sa tunglo sa sala ug kamatayon. Ibayaw usab sa Gingharian ang ngalan sa Diyos gikan sa kabakakan nga gipamulong ni Satanas batok niini.

Si Jehova nga Diyos misaad nga usa ka espesyal nga “binhi” (o kaliwat) ang matawo aron sa pagluwas sa katawhan gikan sa sala. (Genesis 3:​15) Kini nga “binhi” mao ang Hari sa Gingharian sa Diyos. Kinsa siya?

Hapit 2,000 ka tuig human nga nakasala si Adan, dihay matinumanon kaayong tawo nga ginganlag Abraham. Gisugo ni Jehova si Abraham sa pagbiya sa iyang kaugalingong siyudad ug sa pagpuyo sa mga balongbalong sa yuta sa Palestina.

Gisunod ni Abraham ang tanang gisugo ni Jehova kaniya, lakip sa usa ka lisod kaayong butang. Gisugo siya ni Jehova sa paghalad sa iyang anak si Isaac diha sa halaran.

Tinong wala magkinahanglan si Jehova ug tawhanong halad. Apan buot siyang masayod kon unsa ka dako ang pagmahal ni Abraham kaniya. Gisanta siya ni Jehova sa gutlo nga patyon na unta ni Abraham si Isaac.

Tungod sa dakong pagtuo ni Abraham, misaad si Jehova nga ihatag ang yuta sa Palestina ngadto sa iyang kaanakan ug miingon nga ang gisaad nga Binhi motungha diha sa iyang kaliwat, ug pinaagi kana sa iyang anak si Isaac.​—Genesis 22:​17, 18; 26:​4, 5.

Nakabaton si Isaac ug kaluhang anak, si Esau ug Jacob. Si Jehova miingon nga moabot ang gisaad nga Binhi pinaagi kang Jacob.​—Genesis 28:13-15.

Si Jacob, nga ginganlan usab ni Jehova nga Israel, adunay 12 ka anak, ang tanan sa ulahi nakabaton ug mga anak. Busa ang mga anak ni Abraham misugod sa pagdaghan.​—Genesis 46:​8-27.

Sa miabot ang dakong gutom sa maong dapit, si Jacob ug ang iyang pamilya mibalhin ngadto sa Ehipto sa pagdapit ni Paraon, ang magmamando sa Ehipto.​—Genesis 45:​16-20.

Sa Ehipto gipadayag nga ang gisaad nga Binhi magagikan sa kaliwat sa anak ni Jacob si Juda.​—Genesis 49:10.

Namatay si Jacob sa ulahi, ug midaghan ang iyang kaanakan hangtod nga nahisama sila sa usa ka nasod. Nahadlok ang mga Ehiptohanon kanila ug gihimo silang mga ulipon.​—Exodo 1:​7-14.

Sa ulahi gipadala ni Jehova si Moises, usa ka matinumanon kaayong tawo, sa paghangyo kang Paraon sa pagpagawas sa mga anak sa Israel.​—Exodo 6:​10, 11.

Wala mosugot si Paraon, busa mipahamtang si Jehova ug napulo ka hampak sa mga Ehiptohanon. Sa kataposang hampak, iyang gipadala ang manulonda sa kamatayon sa pagpatay sa tanang panganayng anak nga lalaki sa Ehipto.​—Exodo, kapitulo 7 ngadto sa 12.

Gisultihan sa Diyos ang mga Israelita nga kon mag-ihaw sila ug nating karnero alang sa ilang panihapon ug iwisik ang ubang dugo niini diha sa ilang pultahan, labyan sa manulonda sa kamatayon ang ilang mga balay. Busa naluwas ang panganayng mga anak nga lalaki sa Israel.​—Exodo 12:​1-35.

Tungod niana, mimando si Paraon sa mga Israelita sa paggawas sa Ehipto. Apan nausab ang iyang hunahuna ug iyang gigukod sila sa pagpabalik kanila.

Mihimog paagi si Jehova aron ang mga Israelita makaikyas latas sa Pulang Dagat. Ug sa misunod kanila si Paraon ug ang iyang mga sundalo, nalumos sila.​—Exodo 15:​5-21.

Gidala ni Jehova ang mga anak sa Israel sa usa ka bukid nga gitawag Sinai sa disyerto. Didto, iyang gihatagan sila sa iyang Kasugoan ug miingon nga kon sundon nila kini, sila mahimong usa ka gingharian sa mga saserdote ug usa ka balaang nasod. Busa, sa naglakat ang panahon, ang mga Israelita may higayon nga mahimong usa ka hinungdanong bahin sa Gingharian sa Diyos.​—Exodo 19:​6; 24:​3-8.

Human nga nakapuyo ang mga Israelita sa Bukid sa Sinai hapit usa ka tuig, gidala sila ni Jehova sa Palestina, ang yuta nga iyang gisaad kang Abraham nga ilang kagikan.

Sa Palestina, gitugotan sa Diyos sa ulahi ang mga Israelita nga mandoan sa mga hari. Busa, nakabaton ang Diyos ug usa ka gingharian sa yuta.

Ang ikaduhang hari sa Israel mao si David, kaliwat ni Juda. Gipukan ni David ang tanang kaaway sa Israel, ug iyang gihimo ang Jerusalem nga kaulohang siyudad sa nasod.

Ang mga hitabo sa pagmando ni David nagpadayag nga kon magpaluyo si Jehova sa usa ka hari, walay yutan-ong magmamando ang makapukan kaniya.

Si Jehova miingon nga ang gisaad nga Binhi maoy usa sa kaliwat ni David.​—1 Cronicas 17:7, 11, 14.

Si Solomon, nga anak ni David, nagmando sunod kaniya. Usa siya ka maalamong hari, ug miuswag ang Israel ilalom sa iyang pagmando.

Nagtukod usab si Solomon ug matahom nga templo kang Jehova sa Jerusalem. Ang mga kahimtang sa Israel ilalom sa pagmando ni Solomon nagpakita kanato sa pipila sa mga panalangin nga ipatungha sa umaabot nga Gingharian sa Diyos diha sa katawhan.—1 Hari 4:​24, 25.

Apan, daghang hari sunod kang Solomon dili matinumanon.

Samtang nagmando pa ang mga kaliwat ni David sa Jerusalem, gigamit ni Jehova ang iyang propetang si Isaias sa pagpanagna bahin sa umaabot nga Anak ni David nga magmando sa tibuok yuta sa pagkamatinumanon. Kini mao ang gisaad nga Binhi.​—Isaias 9:​6, 7.

Si propetang Isaias nagtagna nga ang Iyang pagmando mas mahimayaon kay kang Solomon.​—Isaias, kapitulo 11 ug 65.

Karon, sukad masukad, nahibulong ang mga alagad sa Diyos kon kinsa kining maong Binhi.

Apan, sa wala pa miabot ang Binhi, nahimong daotan kaayo ang mga hari sa Israel nga sa 607 W.K.P. gitugotan ni Jehova nga Diyos nga mapukan ang nasod pinaagi sa mga Babilonyanhon, ug ang kadaghanan sa mga tawo gibihag sa Babilonya. Apan wala mahikalimot ang Diyos sa iyang panaad. Ang Binhi umaabot pa diha sa kaliwat ni David.​—Ezekiel 21:​25-27.

Ang nahitabo sa Israel nagpakita nga bisag makapatunghag mga kaayohan ang maalamon, matinumanon tawhanong hari, may kinutuban kining mga kaayohana. Mangamatay ang matinumanong mga tawo ug hayan dili matinumanon ang ilang mga manununod. Unsa ang sulbad? Ang gisaad nga Binhi.

Sa ulahi, human sa libolibong katuigan, miabot ang Binhi. Kinsa kadto?

Usa ka manulonda nga gikan sa Diyos mihatag sa tubag ngadto sa usa ka dalagang Israelita nga ginganlag Maria. Iyang gisultihan siya nga makabaton siyag anak kansang ngalan mao si Jesus. Mao kini ang gisulti sa manulonda:

“Siya mahimong bantogan ug pagatawgong Anak sa Labing Hataas; ug kaniya igahatag ni Jehova nga Diyos ang trono ni David nga iyang amahan, ug siya magmando ingong hari.”​—Lucas 1:​32, 33.

Busa si Jesus mao ang gisaad nga Binhi ug sa kataposan ang Hari sa Gingharian sa Diyos. Apan nganong lahi si Jesus sa matinumanong mga tawo nga nabuhi kanhi?

Natawo si Jesus pinaagi sa milagro. Dalagang ulay ang iyang inahan, ug siya walay tawhanong amahan. Nabuhi na si Jesus sa langit ug ang balaang espiritu sa Diyos, o aktibong gahom, nagbalhin sa kinabuhi ni Jesus gikan sa langit ngadto sa tagoangkan ni Maria. Busa, wala siya makapanunod sa sala ni Adan. Sa tibuok niyang kinabuhi, wala makasala si Jesus.​—1 Pedro 2:22.

Sa dihang 30 anyos na siya, gibawtismohan si Jesus.

Iyang gisultihan ang mga tawo bahin sa Gingharian sa Diyos ug sa ulahi nagpailaila sa iyang kaugalingon ingong Hari niana nga Gingharian.​—Mateo 4:​23; 21:​4-11.

Nakahimo usab siya ug daghang milagro.

Iyang giayo ang mga masakiton.​—Mateo 9:35.

Sa milagrosong paagi iyang gipakaon ang mga gigutom.​—Mateo 14:​14-22.

Iyang gibanhaw pa ngani ang mga patay.​—Juan 11:​38-44.

Kining mga milagroha nagpakita kon unsang matanga sa mga butang ang buhaton ni Jesus alang sa katawhan ingong Hari sa Gingharian sa Diyos.

Nahinumdom ka ba kon giunsa ni Haring David sa paghimo sa Jerusalem nga maoy kaulohang siyudad sa iyang gingharian? Gipatin-aw ni Jesus nga dili sa yuta ang Gingharian sa Diyos, kondili sa langit. (Juan 18:36) Tungod niana tawgon ang Gingharian nga “langitnong Jerusalem.”​—Hebreohanon 12:​22, 28.

Gilatid ni Jesus nga kinahanglang sundon sa mga sakop niana nga Gingharian ang mga balaod. Kining mga balaora makita sa Bibliya. Ang labing hinungdanong balaod mao nga kinahanglang higugmaon sa mga tawo ang Diyos ug nga maghigugmaay sila sa usag usa.​—Mateo 22:​37-39.

Gipadayag usab ni Jesus nga dili siya mag-inusara sa pagmando sa iyang Gingharian. Adunay mga tawo nga pilion sa pag-adto sa langit ug sa pagmando didto uban kaniya. (Lucas 12:​32; Juan 14:3) Pila sila? Ang Pinadayag 14:1 nagtubag: 144,000.

Kon 144,000 lamang ang makaadto sa langit sa pagmando uban kang Jesus, unsay paglaom sa nanghibilin sa katawhan?

Ang Bibliya nag-ingon: “Ang mga matarong makapanunod sa yuta, ug sila magapuyo diha niini sa walay kataposan.”​—Salmo 37:29.

Kadtong magpuyo sa yuta sa walay kataposan gitawag nga “ubang mga karnero.”​—Juan 10:16.

Busa adunay duha ka paglaom. Adunay 144,000 nga gidapit ni Jehova nga Diyos sa pag-adto sa langit sa pagmando uban kang Jesu-Kristo. Apan duna pay minilyong makabaton ug seguradong paglaom sa pagpuyo sa yuta sa walay kataposan ingong mga sakop sa iyang Gingharian.​—Pinadayag 5:10.

Gidumtan ni Satanas si Jesus ug mibatok kaniya. Human nga nakawali si Jesus sa tulo ug tunga ka tuig, gipadakop ug gipapatay siya ni Satanas pinaagi sa paglansang diha sa kahoy. Nganong gitugotan kini sa Diyos?

Hinumdomi, kay kaliwat ni Adan, kitang tanan makasasala ug takos sa kamatayon.​—Roma 6:23.

Hinumdomi, usab, nga tungod sa milagrosong paagi natawo si Jesus, hingpit siya ug dili takos sa kamatayon. Apan, gitugotan sa Diyos si Satanas sa ‘pagsamad sa tikod ni Jesus,’ sa pagpatay kaniya. Apan gibanhaw siya sa Diyos diha sa dili-mamatayng espiritu. Sanglit may katungod siya sa hingpit tawhanong kinabuhi, iyang magamit kini karon sa paglukat kanatong mga tawhanon gikan sa sala.​—Genesis 3:​15; Roma 5:12, 21; Mateo 20:28.

Aron bug-os natong masabtan kon unsay kahulogan sa halad ni Jesus, gihisgotan kini sa Bibliya pinaagi sa matagnaong mga hulad.

Pananglitan, nakahinumdom ka ba kon giunsa sa pagsugo ni Jehova si Abraham sa paghalad sa iyang anak, sa pagsulay sa iyang gugma?

Kini maoy matagnaong hulad sa halad ni Jesus. Nagpakita kini kon unsa ka dako ang gugma ni Jehova sa katawhan nga tungod niini iyang gitugotan ang iyang Anak, si Jesus, nga mamatay alang kanato aron makabaton kita ug kinabuhi.​—Juan 3:16.

Nakahinumdom ka ba sa paagi sa pagluwas ni Jehova sa mga Israelita gikan sa Ehipto ug sa pagluwas sa ilang panganayng mga anak sa paglabay sa manulonda sa kamatayon ibabaw kanila?​—Exodo 12:​12, 13.

Kini maoy matagnaong hulad. Sama nga nakahatag kinabuhi ang dugo sa kordero sa panganayng mga anak sa Israelita, sa ingon ang naulang dugo ni Jesus makahatag kinabuhi niadtong motuo kaniya. Ug sama nga nakahatag kagawasan sa mga Israelita ang mga hitabo nianang gabhiona, sa ingon ang kamatayon ni Jesus makahatag sa katawhan ug kagawasan gikan sa sala ug kamatayon.

Maoy hinungdan nga gitawag si Jesus nga “ang Kordero sa Diyos nga magakuha sa sala sa kalibotan.”​—Juan 1:29.

Apan, sa dinhi pa si Jesus sa yuta nagtigom siyag mga tinun-an ug nagbansay kanila sa pagwali sa maayong balita sa Gingharian, bisan human sa iyang kamatayon.​—Mateo 10:​5; Lucas 10:1.

Kini sila mao ang unang mga tawo nga gipili sa Diyos sa pagmando uban kang Jesus diha sa iyang Gingharian.​—Lucas 12:​32.

Nakahinumdom ka ba nga gisaaran sa Diyos ang mga Hudiyo nga kon ilang sundon ang Kasugoan, mahimo silang “usa ka gingharian sa mga saserdote”? Karon may higayon sila nga mahimong bahin sa Gingharian sa Diyos ug mag-alagad ingong langitnong mga saserdote kon ilang dawaton si Jesus. Apan ang kadaghanan kanila misalikway kang Jesus.

Busa sukad niadto, wala na mahimong piniling nasod sa Diyos ang mga Hudiyo; dili na usa ka Yutang Saad ang Palestina.​—Mateo 21:​43; 23:​37, 38.

Sukad sa adlaw ni Jesus hangtod sa atong panahon, padayong gitigom ni Jehova kadtong momando sa langit uban kang Jesus. Adunay pipila ka libo pa kanilang buhi karon sa yuta. Gitawag nato sila karon nga dinihogang nanghibilin.​—Pinadayag 12:17.

Karon, nagkatin-aw na kanimo kon unsa ang Gingharian sa Diyos. Kini maoy usa ka kagamhanan sa langit, ang Hari niini mao si Jesu-Kristo, ug duyogan siya sa 144,000 ka tawo gikan sa yuta. Magmando kini ibabaw sa matinumanong katawhan sa yuta ug may gahom sa paghatag pakigdait sa yuta.

Human sa iyang kamatayon, gibanhaw si Jesus ug miadto sa langit. Didto, naghulat siya sa Diyos sa pagsulti kon kanus-a moabot ang iyang panahon sa pagsugod sa pagmando ingong Hari sa Gingharian sa Diyos. (Salmo 110:1) Kanus-a kaha kini?

May mga panahong mihatag si Jehova sa mga tawo ug mga damgo aron sa pagsulti kanila sa mga butang bahin sa iyang Gingharian.

Sa panahon ni Daniel, mihatag si Jehova ug damgo kang Nabucodonosor, ang hari sa Babilonya. Bahin kadto sa usa ka dako kaayong kahoy.​—Daniel 4:​10-37.

Giputol ang kahoy ug gipikitan ang tuod sulod sa pito ka tuig.

Naglarawan ang kahoy kang Nabucodonosor. Sama nga gipikitan ang kahoy sulod sa pito ka tuig, sa ingon nawad-an si Nabucodonosor sa iyang kabuot sa pito ka tuig. Dayon gibalikan siya sa iyang kabuot.

Kining tanan maoy matagnaong hulad. Si Nabucodonosor naglarawan sa tibuok-yutang pagmando ni Jehova. Sa sinugdan, gidumala kini sa mga kaliwat ni Haring David sa Jerusalem. Sa gipukan sa Babilonya ang Jerusalem sa 607 W.K.P., nabalda kanang linya sa mga hari. Wala nay laing hari nga motungha diha sa kaliwat ni David “hangtod nga moabot siya nga may legal nga katungod.” (Ezekiel 21:​27) Kana mao si Jesu-Kristo.

Unsa pa ka dugaya gikan sa 607 W.K.P. hangtod nga magsugod si Jesus sa paghari? Pito ka matagnaong tuig. Nga mao, 2,520 ka tuig. (Pinadayag 12:​6, 14) Ug ang 2,520 ka tuig gikan sa 607 W.K.P. motultol kanato sa 1914 K.P.

Busa misugod si Jesus sa pagmando sa langit sa 1914. Unsay kahulogan niana?

Ang Bibliya nagpahayag kanato pinaagi sa usa ka panan-awon nga nakita ni apostol Juan.

Iyang nakita ang usa ka babaye sa langit nga nanganak ug batang lalaki.​—Pinadayag 12:​1-12.

Naglarawan ang babaye sa langitnong organisasyon sa Diyos, nga gilangkoban sa tanang mga alagad nga manulonda sa Diyos sa langit. Ang batang lalaki naglarawan sa Gingharian sa Diyos. Kini “natawo” sa 1914.

Unsay sunod nga nahitabo? Ang unang gihimo ni Jesus ingong Hari mao ang pagtambog kang Satanas, lakip sa mga manulonda nga mialsa batok kaniya, gikan sa langit ngadto sa yuta.​—Pinadayag 12:9.

Ang Bibliya nagsugilon kanato sa gidangatan: “Paglipay, kamo nga kalangitan ug kamo nga nanagpuyo niini! Apan alaut ang yuta ug dagat, kay ang Yawa nanaog kaninyo nga may dakong kasuko, kay nasayod siya nga hamubo na lamang ang iyang panahon.”​—Pinadayag 12:12.

Busa sa misugod si Jesus sa paghari sa langit, nahimong aktibo kaayo ang iyang mga kaaway sa yuta. Sumala sa gitagna sa Bibliya, siya misugod sa paghari sa taliwala sa iyang mga kaaway.​—Salmo 110:​1, 2.

Unsay kahulogan niini alang sa katawhan?

Si Jesus nag-ingon kanato: mga gubat, kanihit sa pagkaon, mga sakit, ug mga linog.​—Mateo 24:​7, 8; Lucas 21:​10, 11.

Nakita nato kining mga butanga nga nahitabo sukad sa 1914, nga maoy laing katarongan kon nganong nahibalo kita nga misugod na sa pagmando ang Gingharian sukad niadto.

Aduna usab unyay “kaguol sa kanasoran, nga wala mahibalo sa lutsanan . . . ang mga tawo panguyapan tungod sa kahadlok.” (Lucas 21:​25, 26) Atong nakita usab, kini, sukad sa 1914.

Si apostol Pablo midugang nga ang mga tawo unya “mga mahigugmaon sa ilang kaugalingon, mahigugmaon sa salapi, . . . masukihon sa mga ginikanan, . . . dili ikasabot, tigbutangbutang, walay pagpugong sa kaugalingon.”​—2 Timoteo 3:​1-5.

Nan nasayod ka na kon nganong lisod kaayo ang kinabuhi karon. Aktibo na kaayo si Satanas. Apan aktibo usab ang Gingharian sa Diyos.

Human sa 1914, ang nanghibilin niadtong naglaom nga magmando sa langit uban kang Jesus misugod sa pagwali sa maayong balita nga natukod na ang Gingharian. Kining buluhatona karon kaylap na sa tibuok yuta, sumala sa giingon ni Jesus.​—Mateo 24:14.

Unsay katuyoan ning buluhaton sa pagsangyaw?

Una, sa pagsulti sa mga tawo bahin sa Gingharian sa Diyos.

Ikaduha, sa pagtabang sa mga tawo sa pagdesider kon sila ba buot mahimong mga sakop niana nga Gingharian.

Si Jesus miingon nga sa atong mga adlaw ang tanang katawhan bahinbahinon samag karnero ug samag kanding nga mga tawo.​—Mateo 25:​31-46.

Ang “mga karnero” mao kadtong nahigugma kaniya ug sa iyang mga igsoon. Ang “mga kanding” mao kadto silang walay paghigugma kaniya.

Ang “mga karnero” makabaton ug kinabuhing dayon ug ang “mga kanding” dili.

Kining buluhaton sa pagbahinbahin ginahimo pinaagi sa pagsangyaw sa maayong balita sa Gingharian.

Aniay gitagna ni protetang Isaias.

“Ug mahinabo sa kaulahiang bahin sa mga adlaw nga ang bukid sa balay ni Jehova lig-ong pagatukoron sa ibabaw sa kabukiran, ug igatuboy kini sa ibabaw sa mga bungtod; ug ang tanang nasod magaganayan ngadto kaniya.”​—Isaias 2:​2.

Giatubang na karon sa katawhan “ang kaulahiang bahin sa mga adlaw.”

Ang “balay” ni Jehova sa pagsimba “igatuboy” sa ibabaw sa bakak nga mga relihiyon.

“Ug daghang katawhan mangadto ug manag-ingon: ‘Umari, kamo nga katawhan, manungas kita ngadto sa bukid ni Jehova, ngadto sa balay sa Diyos ni Jacob; ug kita pagatudloan niya sa iyang mga dalan, ug manlakat kita sa iyang mga alagianan.’”​—Isaias 2:3.

Busa, daghan gikan sa tanang nasod miadto sa pagsimba kang Jehova ug nagdapit sa uban sa pagduyog kanila. Nakakat-on sila sa paglakaw sa dalan nga gitinguha ni Jehova.

“Ug ang ilang mga espada ilang himoon nga mga punta sa daro ug ang ilang mga bangkaw himoon nga mga galab. Ang nasod dili mobakyaw sa espada batok sa laing nasod, ni makakat-on pa sila mahitungod sa gubat.”​—Isaias 2:4.

Kadtong nagsimba kang Jehova nahiusa ug makigdaiton.

Ang bunga niining buluhaton sa Gingharian sa Diyos mao nga karon dunay milyonmilyong katawhan sa tibuok yuta nga mga sakop sa Gingharian.

Gitigom sila taliwala sa nanghibilin, ang mga nanghibilin niadtong naglaom nga moadto sa langit ug magmando uban kang Kristo.

Nakadawat silag espirituwal nga pagkaon pinaagi sa organisasyon sa Diyos.​—Mateo 24:​45-47.

Sila adunay internasyonal nga panag-igsoonay sa mga Kristohanon nga tinuod naghigugmaay sa usag usa.​—Juan 13:35.

Nakatagamtam sila ug kalinaw sa hunahuna, usa ka paglaom alang sa umaabot.​—Filipos 4:7.

Sa dili madugay, matapos na unya ang pagwali sa maayong balita. Ang “mga karnero” matigom na unya. Nan unsay himoon sa Gingharian?

Nakahinumdom ka ba kon giunsa pagpukan sa matinumanong Haring David ang tanang mga kaaway sa katawhan sa Diyos? Buweno, mao usab kanay buhaton ni Haring Jesus.

Nagdamgo si Nabucodonosor ug usa ka dakong larawan nga gisimbolohan sa tanang mga imperyo sa kalibotan sukad sa iyang adlaw hangtod sa atong adlaw.

Dayon nakakita siyag bato nga gitibhang gikan sa usa ka bukid, ug gigupok niini ang larawan. Naghulagway ang bato sa Gingharian sa Diyos.

Nagkahulogan kini sa kalaglagan sa presenteng daotang sistema sa mga butang.​—Daniel 2:44.

Aniay pipila ka butang nga pukanon sa Gingharian.

Mangahanaw ang bakak nga relihiyon, sama sa usa ka galingan nga gilabog sa dagat.​—Pinadayag 18:21.

Maoy hinungdan nga gidasig ang tanang mga mahigugmaon sa Diyos sa paggula sa bakak nga relihiyon KARON.​—Pinadayag 18:4.

Sunod “hampakon [ni Haring Jesus] ang tanang kanasoran . . . ug siya magabantay kanila pinaagi sa olisi nga puthaw.”​—Pinadayag 19:15.

Busa, ang mga Saksi ni Jehova, bisag nagbayad sila sa ilang mga buhis ug nagsunod sa mga balaod sa yuta, dili mag-apil-apil sa politika.

Sa kataposan, itambog si Satanas, ang dakong “dragon” sa bung-aw.​—Pinadayag 20:​2, 3.

Ang “mga karnero” lamang, nga nagpasakop kang Jesus ingong Hari, ang makalabang-buhi niini nga kasakitan.​—Mateo 25:​31-34, 41, 46.

Nakakita si apostol Juan ug panan-awon sa “mga karnero” nga nakalabang-buhi sa dakong kasakitan.

“Ug nakita ko, ug, tan-awa! usa ka dakong panon sa katawhan, nga walay makaihap, gikan sa tanang kanasoran ug mga kabanayan ug katawhan ug pinulongan, nga sa atubangan sa trono ug sa Kordero, nagtindog sila ug nagsul-ob ug maputing mga besti; nagdalag mga palwa sa palmera sa ilang mga kamot.”​—Pinadayag 7:9.

Ang “dakong panon” gilangkoban niadtong tanan nga misanong sa pagwali sa maayong balita.

Sila “nagpakalabang sa dakong kasakitan.”​—Pinadayag 7:14.

Ang “mga palwa sa palmera” nagpakita nga ilang giabiabi si Jesus ingong ilang Hari.

Ang ilang pagsul-ob ug “maputing mga besti” naglarawan nga may pagtuo sila sa halad ni Jesus.

Ang “Kordero” mao si Jesu-Kristo.

Unsang mga panalangin ang ilang gitagamtam karon? Nakahinumdom ka ba sa kalipay sa Israel sa naghari pa ang matinumanong Haring Solomon? Kini maoy usa ka gamayng larawan sa kalipayan sa yuta ilalom ni Haring Jesus.

Aduna unyay literal nga pakigdait taliwala sa katawhan ug tali sa mga tawo ug mga hayop, sumala sa gitagna ni Isaias.​—Salmo 46:​9; Isaias 11:​6-9.

Sama nga giayo ni Jesus ang mga masakiton sa dinhi pa siya sa yuta, sa ingon iyang wad-on ang sakit gikan sa tanang katawhan.​—Isaias 33:​24.

Sama nga iyang gipakaon ang panon sa katawhan, sa ingon iyang paphaon ang kanihit sa pagkaon gikan sa tanang katawhan.​—Salmo 72:16.

Sama nga iyang gibanhaw ang mga patay, sa ingon iyang banhawon ang tanang patay nga wala makabaton sa bug-os nga higayon sa pagpasakop sa ilang kaugalingon sa Gingharian sa Diyos.​—Juan 5:​28, 29.

Sa anam-anam, iyang agakon ang katawhan balik sa kahingpitan nga giwala ni Adan.

Dili ba usa ka katingalahang umaabot kana? Buot ka bang makakita niana? Kon mao, pagkugi aron makapasakop ka karon sa Gingharian sa Diyos ug mahimong usa sa “mga karnero.”

Pagtuon sa Bibliya ug pagkuhag kahibalo bahin kang Jehova nga Diyos ug kang Jesu-Kristo.​—Juan 17:3.

Pakig-uban sa mga tawong nagpasakop sa Gingharian.​—Hebreohanon 10:25.

Sayri ang mga balaod sa Gingharian ug sunda sila.​—Isaias 2:​3, 4.

Ipahinungod ang imong kinabuhi sa pag-alagad kang Jehova, ug magpabawtismo.​—Mateo 28:​19, 20.

Likayi ang mga butang, sama sa pagpangawat, pagpamakak, imoralidad, ug paghuboghubog, nga dili makapahimuot kang Jehova nga Diyos.​—1 Corinto 6:​9-11.

Pakigbahin sa pagwali sa maayong balita sa Gingharian.​—Mateo 24:14.

Dayon pinaagi sa tabang sa Diyos, imong makita nga ipasig-uli ang Paraiso nga giwala ni Adan alang sa iyang mga kaanakan, ug imong makita kining saara nga matuman: “Ug nadungog ko gikan sa trono ang usa ka kusog nga tingog nga nag-ingon: ‘Tan-awa! Ang puloy-anan sa Diyos anaa uban sa mga tawo, ug siya magapuyo uban kanila, ug siya mahimong iyang mga katawhan. Ug ang Diyos magauban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.’”​—Pinadayag 21:​3, 4.

[Chart sa panid 20]

(Alang sa aktuwal nga pagkahan-ay, tan-awa ang publikasyon)

607 B.C.E. 1914 C.E.

B.C.E. | C.E.

500 1,000 1,500 2,000 2,520

[Mga hulagway sa panid 11]

Abraham

Isaac

Jacob

Juda

David

[Hulagway sa panid 14]

144,000

[Mga hulagway sa panid 16]

Adan

Jesus