Kalinaw—Ang Kamatuoran

PIPILA lang ang motamay sa mga tingusbawan luyo sa mga paningkamot sa Hiniusang Kanasoran sa pagbaton ug kalinaw. “‘Himoon Ta ang Atong mga Espada nga mga Punta sa Daro’ nagakanayon ang tumong sa Hiniusang Kanasoran alang sa kalinaw sa kalibotan,” matud pa sa “The World Book Encylcopedia,” nga nagdugang, “Ang Hiniusang Kanasoran adunay duha ka pangunang mga tumong: kalinaw ug tawhanong dignidad.”

Ang sinulat sa ubos sa estatuwa nga gipakita dinhi maoy inusab nga pagpahayag sa tagna sa Bibliya diha sa Isaias kapitulo 2, bersikulo 4. Kini ang mabasa, sumala sa usa ka bag-ong hubad:

“Ug ang ilang mga espada ilang himoon nga mga punta sa daro ug ang ilang mga bangkaw himoon nga mga galab.”

Kining halangdong mga pulong sa tino ang nakadasig sa membrong mga nasod sa HK sa pagbaton ug dumalayong kalinaw ug disarmamento. Apan, makapasubo, sukad nga gitukod kini sa naghinapos ang ikaduhang gubat sa kalibotan sa 1945, sukwahi ang gipadayag sa kasaysayan sa HK. Ngano? Tungod kay ang ibabaw nga mga pulong nga gikutlo gikan sa Isaias dili mahimong ilain sa pagsabot, sumala sa pagsabot sa tawhanong mga kagamhanan niini. Ang konteksto sa mga pulong hinungdanon kaayo. Konsideraha kon ngano.

Ang Mensahe ni Isaias

Usa ka manalagna si Isaias. Naghisgot siya bahin sa usa ka mahimayaong panan-awon sa pakigdait ug kalinaw alang sa mga tawo sa tanang rasa. Aron mahimong kamatuoran kini nga panan-awon, ang mga tawo kinahanglan dunay buhaton. Unsa man? Palandonga ang kahulogan sa mga bersikulo 2 ug 3 sanglit nalangkit man kini sa bersikulo 4.

“[2] Ug mahinabo sa ulahing mga adlaw nga ang bukid sa balay ni Jehova pagatukoron sa ibabaw sa tumoy sa kabukiran, ug igatuboy ibabaw sa mga bungtod; ug ang tanang mga nasod magaganayan ngadto kaniya. [3] Ug ang daghang katawhan mangadto ug manag-ingon: ‘Umari kamo, ug manungas kita sa bukid ni Jehova, ngadto sa balay sa Diyos ni Jacob; ug kita pagatudloan niya sa iyang mga dalan, ug manlakat kita sa iyang mga alagianan.’ Kay gikan sa Sion mogula ang kasugoan, ug ang pulong ni Jehova gikan sa Jerusalem. [4] Ug siya magahukom sa taliwala sa mga nasod ug magahusay sa daghang katawhan. Ug ang ilang mga espada himoon nga mga punta sa daro ug ang ilang mga bangkaw himoon nga mga galab. Usa ka nasod dili mobakyaw sa espada batok sa laing nasod, ug dili na gayod makakat-on pa sila mahitungod sa gubat.”

Una, kinahanglang atong dawaton nga ang atong Maglalalang, si Jehova, dunay katungod sa pagtudlo kanato “sa iyang mga dalan,” diin, sumala sa girekord ni Isaias sa ulahi, ‘labi pang hataas kay sa atong mga dalan.’ (Isaias 55:9) Daghang tawo, ilabina ang nagpaimportante-sa-kaugalingon nga mga lider sa kalibotan, maglisod sa pagdawat niining butanga. Ang ilang mga dalan lamang ang matarong sa ilang mga mata. Apan, ang kamatuoran nga ang ilang mga dalan wala modalag kalinaw sa kalibotan ug pagdisarmamento dayag nga nagpakita sa kakawangan sa paglakat diha sa maong dalan.

Ikaduha, matikdi ang hinungdanon tim-os nga tinguha sa mga indibiduwal sa pagsunod sa mga kasugoan sa Diyos: “Manlakat kita sa iyang mga alagianan.” Pinasukad lamang niana nga mahimo ang mga espada nga mga punta sa daro ug ang mga bangkaw nga mahimong mga galab sa tibuok yuta nga sukod. Sa unsang paagi ang dugay nang gipangandoy nga tumong matuman?

Balaan nga Instruksiyon

Daghang tawo ang dunay kopya sa Bibliya, ang basahon nga nasudlan sa mga instruksiyon ni Jehova, apan labaw pa ang gikinahanglan kay sa yanong pagbaton niana. Si Isaias nag-ingon nga ang kasugoan ug ang mga pulong ni Jehova nagagikan sa “Jerusalem.” Unsay kahulogan niana? Sa panahon ni Isaias, ang literal nga siyudad mao ang tuboran sa harianong gahom diin diha niana ang tanang matinumanong mga Israelitas nagalantaw. (Isaias 60:14) Sa ulahi, sa panahon sa mga apostoles ni Jesu-Kristo, ang Jerusalem mao gihapon ang sentro sa mga instruksiyon nga nagagikan sa Kristohanong nagamandong lawas niadtong siyudara.​—Buhat 15:2; 16:4.

Komosta karong adlawa? Matikdi nga gisugdan ni Isaias ang iyang mensahe uban sa pulong: “Kini mahinabo sa ulahing mga adlaw.” Ang ubang mga hubad nagaingon: “Sa kataposang mga adlaw.” (New International Version) Ang ebidensiya kanunay nga gipadayag sa mga panid niining magasina sa pagpamatuod nga kita nagakinabuhi na sa kataposang mga adlaw niining presenteng kahikayan sa kalibotan sukad sa 1914. Busa, unsay atong malaomang makita, sumala sa bersikulo 3 ug 4?

Usa ka dakong panon sa katawhan wala na makakat-on pa mahitungod sa gubat ug nagahimo na sa “ilang mga espada nga mga punta sa daro.” Ug nakita na nato sila! Kapin sa 3.5 ka milyong mga lalaki, babaye, ug mga kabataan sa tanang rasa diha sa kapin sa 200 ka kayutaan nagkahiusa, nagkinabuhi diha sa kalinaw sa usa ug usa ug nagasangyaw sa mensahe sa Bibliya sa kalinaw ngadto sa ilang mga silingan. Sila nailhan sa tibuok kalibotan ingong mga Saksi ni Jehova.

Sila adunay moderno Nagamandong Lawas sa tigulang Kristohanong mga lalaki nga gikan sa nagkalainlaing bahin sa yuta nga naghatag sa gikinahanglang pagdumala sa tibuok-kalibotan nga kalihokan sa katawhan sa Diyos. Kining mga tawhana, sama sa mga apostoles ug sa mga tigulang sa Jerusalem sa unang siglo, maoy dinihogang mga sakop sa matinumanon ug maalamong ulipon nga matang nga gitudlo ni Jesus aron sa pag-atiman sa tanan niyang mga intereses sa Gingharian dinhi sa yuta. Gipamatud-an sa kasaysayan nga sila kasaligan nga nagasunod sa pagtultol sa balaang espiritu ug nga sila wala magasalig sa tawhanong kaalam sa pagpanudlo sa panon sa Diyos sa mga dalan sa matuod nga kalinaw.​—Mateo 24:45-47; 1 Pedro 5:1-4.

Matuod nga Pagsimba

Labaw pa kay sa kahibalo o tinguhang magkinabuhi sumala sa mga instruksiyon sa Diyos ang nalangkit sa pagpuyo diha sa kalinaw. Ang debosyon sa kasingkasing ug ang pagsimba sa atong Maglalalang, si Jehova, hinungdanon, sumala sa gipatin-aw usab ni Isaias.

Ang propeta miingon nga “ang bukid sa balay ni Jehova pagatukoron sa ibabaw sa tumoy sa kabukiran” ug “igatuboy sa ibabaw sa mga bungtod.” Sa karaang panahon, ang ubang mga bukid ug mga bungtod nag-alagad ingong lugar sa pagsimba ug sa mga sangtuwaryo sa mga diyosdiyos. Sa dihang gidala ni Haring David ang balaang Arka sa balongbalong nga iyang gipatindog sa Bukid sa Sion (Jerusalem), nga duolan sa 760 ka metro sa ibabaw sa lebel sa dagat, siya sa dayag milihok sumala sa balaan nga pagtultol. Sa ulahi, sa dihang ang dakong templo ni Jehova gitukod sa Bukid sa Moria, ang terminong “Sion” naapil sa lugar sa templo, busa ang templo nagbantaaw kay sa pipila ka naglibot nga paganong mga lokasyon. Ang Jerusalem mismo gitawag usab nga iyang “bukid nga balaan”; busa, ang pagsimba ni Jehova nagpabilin diha sa usa ka hataas nga kahimtang.​—Isaias 8:18; 66:20.

Busa karong adlawa, ang pagsimba ni Jehova napataas sama sa usa ka simbolikong bukid. Ang pagkabantaaw niini maoy alang sa pagtan-aw sa tanan, sanglit nakahimo kinig usa ka butang nga wala mahimo sa ubang relihiyon. Unsa man kana? Kini nakapahiusa sa tanang mga magsisimba ni Jehova, kinsa malipayon sa paghimo sa ilang mga espada nga mga punta sa daro ug wala na magpakakat-on pa mahitungod sa gubat. Ang nasodnon ug ang rasanhong mga utlanan wala na magbahin kanila. Sila nagkinabuhi ingong hiniusang katawhan, usa ka panag-igsoonay, bisan pa nga sila nakatag sa tibuok nga mga nasod sa kalibotan.​—Salmo 33:12.

Panahon Na sa Paghimog Desisyon

Sa unsang paagi apektado ka niining tanan? Ang mga pulong sa laing Hebreohanong propeta ang labing tukma: “Mga panon sa katawhan, mga panon sa katawhan atua sa walog sa pagpakanaog sa hukom, kay ang adlaw ni Jehova haduol na sa walog sa pagpakanaog sa hukom.” (Joel 3:14) Kini maoy dinaliang panahon sa paghimog desisyon alang sa tanang katawhan, sa pagtuon sa mga dalan sa matuod nga kalinaw diha sa kamot sa Diyos o magpadayon sa pagsuportar sa nabansay-sa-hinagiban nga kinabuhi nga matapos sa dili madugay.

Si Jesus nanagna nga usa ka dakong buluhaton sa pagsangyaw ang himoon sa atong adlaw. Kana nga pagsangyaw maoy mahitungod sa “maayong balita” nga mohatag ug kalinaw ang Gingharian sa Diyos diha sa gigusbat sa gubat nga kalibotan. (Mateo 24:14) Sa miaging tuig kapin sa tulo ka milyong regular nga mga pagtuon sa Bibliya ang gidumala sa mga Saksi ni Jehova sa tibuok kalibotan. Ang uban niining senemanang mga panagtuon maoy uban sa mga indibiduwal, apan daghan gihimo uban sa mga grupo sa pamilya. Busa minilyong kabataan nahatagan ug tino nga paglaom alang sa ilang umaabot, ug ang ilang mga ginikanan nakabaton ug dugang-pasalig nga ang gubat, sama sa gubat nga ilang nasaksihan ug tingali naapilan, dili na unya bahin sa bag-ong kalibotan nga pagahimoon ni Jehova.

Pagkatahom unya kana nga kalibotana sa mutuwal nga pagsaligay ug kalinaw! Wala na unyay angay kabalak-an ang bahin sa disarmamento, sanglit ang tanang mga hinagiban sa gubat maoy butang na unya sa nangagi. Ug ang tanang pasalamat iya kang Jehova, “ang Diyos nga nagahatag kalinaw,” nga mahigugmaong nagatudlo kanato karon aron kita makaandam sa pagkinabuhi sa bug-os ubos sa iyang Gingharian sa pagkamatarong.​—Roma 15:33.