Ang mga Paghukom sa Diyos Kinahanglang Ipahayag
“Motindog ka ug mosulti kanila sa tanan nga akong gisugo kanimo. Ayaw kalisang tungod kanila.”—JEREMIAS 1:17.
1. Sa unsang paagi ang mga Saksi ni Jehova ‘nagpasidlak sa ilang kahayag’ sa Nazi nga Alemanya?
“ANG paglutos sa mga Saksi ni Jehova sa Gingharian sa Katalagman [Nazi nga Alemanya] nakabaton sa iyang dapit taliwala sa ubang mga panahon sa pagsulay sa ilang kasaysayan.” (Holocaust Studies Annual, Volume II—The Churches’ Response to the Holocaust) Ang South African Daily News sa Hulyo 15, 1939, mikomento usab bahin sa Alemang mga Saksi: “Sama sa usa ka suga nga dili gayod moawop-awop, kining gamayng pundok sa Kristohanong mga lalaki ug mga babaye nagabarog nga malig-on sa ilang pagtuo, usa ka tunok sa kilid sa Monarko sa Munich [Adolf Hitler] ug usa ka buhing pamatuod sa iyang pagkahimalatyon.” Kining mga pulonga mopahinumdom kanato nga giingon ni Jesus nga ang iyang mga sumusunod mao “ang kahayag sa kalibotan” ug kinahanglang magpasidlak sa ilang kahayag atubangan sa kalibotan, bisan unsay mahitabo.—Mateo 5:11, 12, 14-16.
2, 3. Unsang panig-ingnan sa maisogong pagsangyaw ang nahitabo sa Sri Lanka?
2 Ang laing taho, gikan sa gibungkag-sa-teroristang Sri Lanka, nagasugid mahitungod sa usa ka batan-ong Tamil nga Saksi, si David Gunaratnam, si kinsa, sa tinuod Jeremias nga paagi, maisogong misangyaw ngadto sa militaryong mga awtoridad. Gironda siya kauban sa ubang mga batan-ong lalaki aron sukitsukiton. Ang taho nag-ingon: “Ang opisyales ug ang mga lalaki nakadayeg kaayo sa kahibalo sa batan-on, ug labaw pa niana, sa iyang dayag nga pagkasinsero, ilabina sa miingon siya, ‘Ug kon mahibalag ko ang gitawag nga mga terorista, isangyaw ko usab kanila kining butanga.’”
3 Niadtong gabhiona mismo gikidnap siya gikan sa iyang balay sa mga terorista, nga nag-akusar nga konsabo siya sa kasundalohan. Mipugos siya nga siya neyutral ug nagsangyaw lang siya sa mensahe sa Gingharian sa Diyos. “Ginabuhat ko ang buluhaton sa Diyos ug ipadayon ko ang pagbuhat niini. Sangyawan ko si bisan kinsang manimati.” Kining maisogong Saksi gipusil ug gipatay sa mga terorista, nga nagbilin ug usa ka batan-ong biyuda ug usa ka batang lalaki.—Itandi ang Buhat 7:51-60.
4. Unsang giuyonan-sa-klerong paglutos sa mga Saksi ni Jehova ang nahitabo sa usa ka nasod sa Latin Amerika?
4 Gikan sa usa ka nasod sa Latin Amerika, diin ang paglutos sa mga Saksi ni Jehova giuyonan ug gikonsentir sa pila ka klero nga Katoliko ug Presbyteriano, nagagikan kining tahoa: “Dihay lima ka Saksi ni Jehova sa garrison . . . Kanunay silang bunalan ug gipriso nga walay pagkaon. Ang politikal nga opisyal nga nagdumala sa pagdoktrina sa among yunit nagsilot kanila kay nagsangyaw sila ngadto sa ubang sundalo. Miingon siyang sa tanang relihiyosong rebelde, ang mga Saksi ni Jehova mao ang labing peligroso.”
Motibo ug Reaksiyon
5. Sama sa kahimtang ni Jeremias, kadaghanan unsay hinungdan sa paglutos sa mga Saksi?
5 Oo, maingon nga si Jeremias gilutos sa relihiyoso ug politikanhong mga pangulo sa iyang adlaw, giatubang usab sa mga Saksi ni Jehova ang pagsupak sa tibuok kalibotan gikan sa mao mismong mga elemento. Unsay hinungdan niining mga aksiyona? Bisan pag ang mga Saksi mao ang labing malinawon ug masundanon-sa-balaod nga seksiyon sa bisan unsang komunidad, giisip sa ilang mga kaaway nga peligroso ang Pulong sa Diyos, kay gikayugtan nila ug gisalikway ang mensahe niini mahitungod sa Gingharian sa Diyos. Ang ilang dili-mokompromisong pagsangyaw ug mga prinsipyo nagayagyag sa kahakog ug kamalinglahon sa politikanhon, komersiyal, ug relihiyosong mga elemento sa sistema ni Satanas.—Juan 15:18, 19; 1 Juan 5:19.
6. Unsay reaksiyon sa mga Saksi ni Jehova sa paglutos?
6 Ugaling, bisan pa sa pagbilanggo, mga pagbunal, ug bisan kamatayon, ang mga Saksi ni Jehova sa tibuok kalibotan nagalihok nga sama kang Jeremias sa kakaraanan. Samtang nagpakitag gugma ug taktika, sila nagapadayon sa pagwali sa dili-popular nga mga paghukom sa Diyos ngadto sa kanasoran. (2 Timoteo 2:23-26) Nahibalo silang kinahanglang mosugot sila sa Diyos ingong Magmamando inay ang mga tawo. (Buhat 4:19, 20; 5:29) Sila mahunahunaon sa tambag ni Pablo ngadto sa Hebreohanong mga Kristohanon, nga mao, ipadayon ang pagbuhat sa kabubut-on sa Diyos. Unya makita nila ang pagkatuman sa saad, ang kinabuhing walay kataposan. Busa, sama kang Pablo ug Jeremias, kita angay makaingon: “Karon kita dili mao ang matang nga mosibog ngadto sa kalaglagan, kondili ang matang nga adunay pagtuo sa pagtipig nga buhi sa kalag.”—Hebreohanon 10:35-39.
Ang Modernong Jeremias Nagyagyag sa Kakristiyanohan
7. Sa unsang paagi ang mga Saksi sa ika-20ng siglo nagsunod sa panig-ingnan sa matinumanong mga manalagna ni Jehova nga gipadala ngadto sa Israel ug Juda?
7 Maingong si Jehova nagpadayon sa pagpadala sa iyang mga manalagna ngadto sa Israel ug sa Juda, siya nagpadala sa iyang mga saksi aron sa balikbalik ipasabot ang mensahe sa iyang umaabot nga paghukom. (Jeremias 7:25, 26; 25:4, 8, 9) Ilabina sukad sa makapadasig-sa-espirituwal nga tuig 1919, ang dinihogang nahibilin sa mga igsoon ni Kristo maisogong nagpahayag sa mga paghukom sa Diyos, sa gamhanang mga mensahe sa katalagman, ngadto sa Kakristiyanohan. (Itandi ang Jeremias 11:9-13.) Nianang tuiga gilansad ang magasing The Golden Age. Latas sa katuigan ug uban ang gibag-ong mga titulo, Consolation (1937) ug Awake! (1946), kini nagyagyag sa relihiyosong kabakakan sa Kakristiyanohan ug sa mini nga Kristiyanidad niini.
8, 9. (a) Nganong ang mga iglesya giyagyag niadtong 1922? (b) Unsang katalagman ang gitagna alang kanila?
8 Pananglitan, ang Golden Age sa Oktubre 11, 1922, nagsaway sa bakak nga relihiyon niining mga pulonga: “Ang tanang paningkamot sa mga denominasyon sa relihiyon, ilang klero, ilang mga pangulo ug ilang mga alyado, nga luwason ug tukoron pag-usab ang kahikayan sa mga butang sa yuta . . . tinong mapakyas, kay sila dili bahin sa gingharian sa Mesiyas. Nga sa kaatbang, sa panahon sa Gubat sa Kalibotan [I] ang klero nianang nagkalainlaing denominasyon sa relihiyon wala magmaunongon sa Ginoong Jesu-Kristo niini, nga sila sa kasayop nakighiusa sa dagkong negosyo ug dagkong mga politiko aron ipadayon ang Gubat sa Kalibotan.”
9 Ang pagsaway nagpadayon: “Sila dugang nagsalikway sa Ginoo ug sa iyang gingharian ug nagpakita sa ilang pagkadili-maunongon pinaagi sa kinabubut-ong pakighiusa sa organisasyon ni Satanas ug maisogong nagpahayag ngadto sa kalibotan nga ang Liga sa Kanasoran mao ang politikanhong ekspresyon sa gingharian sa Diyos sa yuta.” Sa kataposan miabot ang mensahe sa “katalagman,” o paghukom: “Karon dunay umaabot ug hapit nang mahitabo sa kanasoran sa yuta, sumala sa mga pulong ni Kristo Jesus, usa ka dakong panahon sa ‘kasakitan nga wala pa mahitabo sukad sa sinugdanan sa kalibotan hangtod niining panahona, wala, ni mahitabo pa kini pag-usab.’”
10. Unsang pagyagyag ang gihimo niadtong 1926?
10 Ang papel ni Jeremias napadako pinaagi sa paggamit sa ubang basahon, sama sa magasing Bantayanang Torre, mga pulyeto, ug mga libro. Pananglitan, sa 1926 ang librong Deliverance naglakip sa usa ka kusganong pagsaway sa malimbongong mga pagtulon-an sa Kakristiyanohan. Sa panid 203 kini nagaingon: “Ang bakak nga mga doktrina libreng gipasulod [sa apostatang Kakristiyanohan] ug gipuli sa kamatuoran. Apil niini kanila niadto ug karon mao ang mga doktrina sa trinidad, imortalidad sa tanang kalag, walay-kataposang pagsakit sa mga daotan, ang balaang katungod sa klero ug ang balaang katungod sa mga hari sa pagmando. Sa lakat sa panahon si Maria, ang inahan sa batang si Jesus, gipakadiyos; ug ang katawhan giawhag sa pagsimba kaniya isip ang inahan sa Diyos.”
Gipasidan-an ang Makapabahing Kakristiyanohan
11, 12. (a) Sa unsang paagi nabutyag ang dili-neyutral nga baroganan sa klero? (b) Unsang pasidaan ang gihatag sa Jeremias nga matang?
11 Ang samang basahon nagsaway sa pakigkonsabo sa klero sa mga gubat, nga miingon: “Ang klero niining nagkadaiyang eklesiastikanhong mga sistema nagbendisyon sa mga kasundalohan nga gipadala sa komersiyal ug politikanhong mga bahin, ug ang ilang pagbendisyon gihatag walay sapayan kon sa unsang mga kiliran nagapakig-away ang maong mga kasundalohan. Ang klero tanan nagpakaaron-ingnong nagaampo sa samang Diyos alang sa panalangin diha sa nagbugnoayng kasundalohan sa duha ka kiliran.” (Itandi ang Jeremias 7:31.) Unya gipasabot ang usa ka umaabot nga paghukom: “Kining tanang elemento nga nagalangkob sa makitang bahin sa organisasyon ni Satanas ginatigom ug ginaasembol alang sa dakong gubat sa Armageddon.”—Pinadayag 16:14-16.
12 Sama sa adlaw ni Jeremias, sa miingon ang mga pangulo nga sila luwas ug may pakigdait sa Diyos, “ang maong eklesiastikanhong mga pangulo nagapahayag usab kanila nga sila luwas, nga kinahanglan lang nga sila tawgon sa ngalan ni Kristo, samtang padayon silang nagadula sa kalayo sa Yawa. Gibutaan nila ang ilang kaugalingon sa tinuod nga kahimtang pinaagi sa pagbutang ug balas sa ilang mga mata mismo ug sa mga mata usab sa ilang isigkatawo.” (Deliverance, panid 270) Ang ilang paglimbong-sa-kaugalingon giyagyag sa maong masibotong mga Estudyante sa Bibliya, sumala sa pagkaila niadto sa mga Saksi ni Jehova.—Mateo 7:21-23.
13. Unsa ang nahitabo niadtong 1931, ug nganong kadto haom?
13 Sa paglabay sa panahon, ang mga Estudyante sa Bibliya labi pang nailhang susama kang Jeremias, sa dihang, sa 1931, sa usa ka kombensiyon sa Columbus, Ohio, U.S.A., gipahibalo nga ang Biblikanhong ngalan sa maong maisogong pundok sa mga Kristohanon angay nga “mga Saksi ni Jehova.” (Isaias 43:10-12) Kanang ngalana napaila sa ikawalong siglo W.K.P. sa gigamit kana ni Jehova alang sa Israel. Busa, mga usa ka gatos ka tuig sa ulahi, sa dihang si Jeremias nag-alagad nga manalagna, siya saksi ni Jehova usab. (Jeremias 16:21) Sa susama si Jesus, sa mianhi siya sa yuta ingong Hudiyo, maoy saksi sa iyang Amahan, si Jehova. (Juan 17:25, 26; Pinadayag 1:5; 3:14) Busa, nahiangay nga sa nahaigong panahon sa Diyos, ang iyang katawhan sa kataposan mahimong takos sa maong tinudlo-sa-Diyos nga ngalan—“mga Saksi ni Jehova.”—Juan 17:6, 11, 12.
Gitangtang ang Takoban sa Kakristiyanohan
14. Sa unsang paagi ang Kakristiyanohan giyagyag latas sa miaging 70 ka tuig?
14 Latas sa miaging kapitoan ka tuig, dungan sa pagmantala sa mahimayaong paglaom sa umaabot nga Gingharian ni Jehova, ang mga Saksi ni Jehova nagsangyaw sa tibuok kalibotan sa halos lunop sa pagsaway ug paghukom. Sa ginatos ka milyong prangka, misantako gipasukad-Bibliyang mga basahon, ilang giyagyag ang Kakristiyanohan ingong labing gamhanang puwersa sa relihiyosong bigaon, ang “Dakong Babilonya,” nga giyagyag sa Pinadayag kapitulo 17 ug 18. (Tan-awa ang “Babylon the Great Has Fallen!” God’s Kingdom Rules!, mga panid 576-615, nga gipatik sa 1963 sa Watchtower Bible and Tract Society of New York, Inc.)
15. Sa unsang paagi giyagyag ang Kakristiyanohan niadtong 1955?
15 Sa 1955 ang mga Saksi ni Jehova nagtagtag sa milyonmilyong kopya sa pulyetong Christendom or Christianity—Which One Is “the Light of the World”? Libolibo ang laktud gihatod ngadto sa klero sa Kakristiyanohan. Ug unsay gisulti kanila niadtong pulyetoha? Sa tinuod Jeremias nga paagi, kadto nag-ingon: “Bisan pa sa tanan niyang mga bentaha nga nagduso kaniya sa unahan sa ekonomikanhon, mental ug militaryanhong paagi, ang Kakristiyanohan wala magpamatuod nga mao ‘ang kahayag sa kalibotan.’ Nganong wala man? . . . Siya wala magwali o magtuman sa Kristiyanidad [sa Bibliya].” Unya gipatungha niana ang pangutana: “Ang pagyagyag sa bakak nga mga relihiyon usa ba ka paglutos sa mga sumusunod nila? Dili-Kristohanon ba kini nga pagkapanatiko?”
16. Pagkapanatiko ba nga giyagyag sa mga Saksi ang Kakristiyanohan? Isaysay.
16 Ang tubag mao: “Dili; kay kon mao pa si Jesu-Kristo panatikong maglulutos unta sa mga Hudiyo, . . . ug ang tanang manalagna ni Jehova sa karaang mga panahon [apil si Jeremias] una kang Jesus maoy mga maglulutos ug mga panatiko, kay silang tanan nagyagyag sa bakak nga relihiyon sa apostatang mga Hudiyo ug sa paganong kanasoran.” Sa pagkamatuod, aron ang matuod nga mga Kristohanon mahimong “ang kahayag sa kalibotan,” nan ang espirituwal nga “kangitngitan” kinahanglang iyagyag. (2 Corinto 6:14-17) Kini wala magkahulogan nga giatake ang mga indibiduwal apan, hinunoa, ang sistema nga nagaulipon kanila. Busa, gihatag ni Jehova ang sugo kang Jeremias: “Baksan mo ang imong hawak, ug kinahanglang motindog ka ug mosulti kanila sa tanan nga akong gisugo kanimo. Ayaw kalisang tungod kanila . . . Ug sila makig-away batok kanimo, apan sila dili makadaog kanimo, kay ‘Ako nagauban kanimo,’ nagaingon si Jehova, ‘sa pagluwas kanimo.’”—Jeremias 1:17, 19.
Ang Jeremias nga Buluhaton Hapit Nang Mahuman
17, 18. (a) Sa unsang paagi gipadayon sa mga Saksi ni Jehova ang ilang Jeremias nga buluhaton sa katuigang dili pa dugay? (b) Unsang tambag ang gihatag sa mga tawong buotan ug kasingkasing?
17 Gihinayan ba sa mga Saksi ni Jehova ang pagpahayag sa paghukom sa Diyos? Tinuod, kita nagapuyo sa usa ka panahon sa dihang giisip nga dili angay ang pagsaway sa laing relihiyon. Bisan pa niana, ang mga basahon sa mga Saksi ni Jehova nagapahayag sa samang mensahe sa paghukom alang sa Kakristiyanohan sumala sa kanunay nilang ginabuhat. Pananglitan, sa miaging upat ka tuig gipatik sa mga Saksi ni Jehova ang 32 milyong kopya sa librong Ikaw Mabuhing Walay Kataposan sa Paraiso sa Yuta, diha sa 76 ka pinulongan. Kining basahona nagapahayag sa mga tubag sa daghang pangutana karon, sama sa “Unsay Mahitabo sa Pagkamatay?” “Nganong Gitugotan sa Diyos ang Pagkadaotan?” ug “Pag-ila sa Matuod nga Relihiyon.” Apan kini nagahatag usab ug tin-awng pasidaan mahitungod sa imperyo sa bakak nga relihiyon sa kalibotan.
18 Sa kapitulo 25, nga nag-ulohang “Dapig sa Kalibotan ni Satanas, kun Dapig sa Bag-ong Sistema sa Diyos?” kini nagapahayag: “Sa Bibliya ang bakak nga relihiyon gihawasan sa ‘dakong bigaon,’ o pampam, nga ginganlag ‘Dakong Babilonya.’ . . . Ug tinuod nga sa tibuok kasaysayan ang relihiyon nakig-apil sa politika, nga kanunay momando sa mga kagamhanan unsay buhaton.” Busa, unsang dalan ang ginasugyot sa basahon? Kini nangutana: “Buot mo bang mahimong bahin sa kalibotan ni Satanas? O dapig ka ba sa bag-ong sistema sa Diyos? Kon dapig ka sa bag-ong sistema sa Diyos, mobulag ka sa kalibotan, apil sa bakak nga relihiyon niana. Sundon mo ang sugo: ‘Gumula ka kaniya [Dakong Babilonya], akong katawhan.’ (Pinadayag 18:4)”
19. Sa unsang paagi imong ikapakita nga ang tingog sa modernong Jeremias wala mapahilom hangtod niining mga adlawa?
19 Kining samang kusganong mensahe sa pagbulag ug paghukom tin-aw diha sa librong Tibuok-Kalibotang Kasegurohan Ilalom sa “Prinsipe sa Pakigdait,” nga gipatik sa 1986 (unom ka milyong kopya sa 25 ka pinulongan). Kini nagayagyag sa klero sa Kakristiyanohan tungod sa ‘pagwali aron mosulod ang mga batan-ong lalaki sa mga natad-panggubatan’ sa Gubat sa Kalibotan I. Kini nagapadayon: “Ang Kakristiyanohan nagapadayon ingon nga kaaway sa Diyos nga Labing Gamhanan hangtod niining panahona mismo. Tinong siya wala makabatog balaang panalipod, ug tungod niining bililhong hinungdan ang iyang paglungtad mismo nagapabiling dili tino.” (Tan-awa ang mga panid 30-2.) Ang tingog sa modernong Jeremias wala mapahilom! Bisan tuod nagapaningkamot ang klero ug mga politiko sa pagpukgo sa pagsangyaw sa mga paghukom sa Diyos, ang matinumanon niyang mga saksi nagapadayon, nga determinadong taposon ang buluhaton sa pagpasidaan.—Jeremias 18:18.
20. Nganong ang mga Saksi ni Jehova mopadayon sa pagpahayag sa mga paghukom ni Jehova ngadto sa kanasoran?
20 Ug nganong kining buluhatona kinahanglang taposon? Kay si Jehova, ang buhing Soberanong Ginoo sa uniberso, magahusay sa kanasoran ug sa ilang mga relihiyon. Maingon nga si Jehova nangutana sa Juda ug Jerusalem, ang pangutana samang mapadapat sa Kakristiyanohan karong adlawa: “‘Dili ba ako magahimog husay tungod niining mga butanga?’ nagaingon si Jehova. ‘Dili ba ang akong kalag manimalos sa usa ka nasod nga sama niini?’” Busa, ang mga Saksi ni Jehova mopadayon sa pagduaw sa katawhan sa kanasoran uban ang mensahe nga magasakit sa kinabag-an ingong dili-popular nga paghukom apan makapalipayng maayong balita alang sa minoriya—ang maayong balita sa Gingharian sa Diyos.—Jeremias 5:9, 29; 9:9; Buhat 8:4, 12.
21. Bisan pa sa gitagnang katalagman, unsang dakong paglaom ang anaa atubangan niadtong nagapamati sa Jeremias nga buluhaton? (Salmo 37:9, 11, 18, 19, 28, 29)?
21 Bisan tuod si Jeremias kadaghan ginganlag tigmantala sa katalagman, pero tinuod usab nga ang iyang mensahe mihatag ug mga silaw sa paglaom alang sa mga Hudiyo. (Jeremias 23:5, 6; 31:16, 17) Sa susamang paagi, bisan tuod ang mga Saksi ni Jehova nagapahayag sa umaabot nga “dakong kasakitan,” uban ang paghukom sa Diyos sa Armageddon, sila nagamantala usab sa mga panalangin sa “bag-ong mga langit ug usa ka bag-ong yuta” nga mosangpot sa pagpasig-uli sa hustisya ug sa Paraiso niining planetaha, uban ang kinabuhing walay kataposan. (Mateo 24:21, 22; Pinadayag 16:16; 21:1-4) Busa, karon na ang panahon sa pagpamati sa mensahe sa paghukom ni Jehova ug pagsuportar sa pagtapos sa buluhaton sa dakong Jeremias.—Itandi ang Jeremias 38:7-13.
Nahinumdom Ka Ba?
◻ Sama kang Jeremias, sa unsang paagi ang mga Saksi ni Jehova ginalutos?
◻ Nganong ang mga Saksi nagapadayon sa pagsangyaw?
◻ Sa unsang paagi ang Jeremias nga buluhaton gipadako?
◻ Unsang bag-ong mga panig-ingnan ang nagapakitang ang pagsaway wala mausab?
◻ Bisan pa sa mensahe sa katalagman, unsang paglaom ang ginatanyag usab?
[Hulagway sa panid 23]
Sa kadugayan, si Maria gipakadiyos ug ang mga tawo giawhag sa pagsimba kaniya isip “Inahan sa Diyos”
[Hulagway sa panid 24]
Niadtong 1931 ang mga Estudyante sa Bibliya nagdawat sa ngalang “mga Saksi ni Jehova” sa panahon sa ilang kombensiyon sa Columbus, Ohio
[Mga hulagway sa panid 25]
Ang mga Saksi ni Jehova sa tibuok kalibotan nagasunod sa panig-ingnan ni Jeremias