“Mga Magbalantay nga Uyon sa Akong Kasingkasing”

1, 2. (a) Unsay mahitabo kon dili mapanalipdan ang panon sa mga karnero? (b) Sa karaang panahon, unsay buluhaton sa usa ka magbalantay sa karnero?

SI Hiroyasu bata pang gamay didto sa Japan sa dihang gipalitan siya sa iyang inahan ug karnerong laki ug baye. Iya kining giatiman, ug ang baye nanganak ug tagurha kada tuig, busa ang mga karnero midaghan. Pag-edad niyag 12, diha nay 12 o 13 ka karnero. “Usa ka sayo sa buntag niana, samtang naghigda pa ko,” siya nahinumdom, “akong nadungog nga sila nagbahihi. Wala ko mogawas dayon. Sa dihang migawas ra gyod ko, nakita ko ang usa ka panon sa ihalas nga mga iro nga nanagan pahilayo sa akong mga nating karnero nga nangayasyas na ang tiyan. Natarantar kog pangita sa inahan. Nakita ko kini nga nagginhawa pa, nga naglunang sa dugo. Ang laking karnero ra ang naluwas. Ako nahugno gayod. Maayo pag migawas ko dayon aron sutaon ang ilang kahimtang sa dihang una kong nadungog ang ilang pagbahihi. Wala intawon silay bawot sa mga iro.”

² Niadtong karaang panahon, halos tanan sinati sa buluhaton sa magbalantay sa karnero. Siya magdala sa iyang panon ngadto sa mga sibsibanan ug paneguroon nga ang mga hayop nga iyang giatiman makakaon pag-ayo. Iya usab kining panalipdan batok sa mga manunukob ug pangitaon ang mga nahisalaag. (1 Sam. 17:34-36) Papahulayon sa magbalantay ang iyang panon nga dili matugaw. Motabang usab siya sa pagpaanak niini ug iyang atimanon ang mga nati niini. Gipakasama sa daghang magsusulat sa Bibliya, lakip si Jeremias, ngadto sa usa ka magbalantay sa karnero ang usa ka tawo nga gipiyalan sa pag-atiman sa katawhan ingong ilang magmamando o espirituwal nga magtatan-aw.

 3. Unsay gipasabot ni Jeremias sa dihang siya naghisgot bahin sa mga terminong “magbalantay” ug “nagabantay”?

³ Tingali ang pipila sa Kristohanong kongregasyon naghunahuna nga ang mga ansiyano mga magbalantay lamang sa dihang sila moduaw sa mga igsoon sa pagtabang ug pagdasig kanila. Apan, makita nato nga gipadapat ni Jeremias ang mga terminong “magbalantay” ug “nagabantay” sa tanang aspekto sa pagpakiglabot sa mga magtatan-aw sa Juda ngadto sa katawhan niini. Sagad gikondenar sa Diyos ang mga prinsipe, manalagna, ug mga saserdote sa Juda ingong daotang mga magbalantay tungod kay wala nila tinguhaa ang kaayohan sa katawhan. (Jer. 2:8) Ilang gidaogdaog, gipahisalaag, ug gipasagdan ang ilang “mga karnero” samtang sila mahakogong nangagpas sa ilang kaugalingong mga kaayohan. Ang katawhan sa Diyos gipasagdang nag-antos sa makaluluoyng espirituwal nga kahimtang. Gipahayag ni Jehova nga “alaot” ang maong mini nga mga magbalantay, ug iyang gipasaligan ang iyang katawhan nga siya maghatag kanilag mapinanggaon, maayong moatiman nga mga magbalantay nga manalipod gayod sa panon.—Basaha ang Jeremias 3:15; 23:1-4.

 4. Kinsay nag-atiman sa panon sa Diyos karong adlawa, ug unsa nga espiritu ang ilang gipakita?

⁴ Ang saad sa Diyos pangunang natuman diha kang Jesus, ang Pangulong Magbalantay sa mga karnero ni Jehova, kinsa nahimong Ulo sa Kristohanong kongregasyon. Siya nagtawag sa iyang kaugalingon nga “ang maayong magbalantay,” kinsa nagpakitag tinuod nga kaluoy niadtong iyang gipangunahan. (Juan 10:11-15) Karong adlawa, gigamit ni Jehova sa pag-atiman sa iyang yutan-ong panon ang luyoluyong mga magbalantay, ang dinihogang mga igsoon nga sakop sa matinumanon ug maalamong ulipon nga matang ug ang makugihong mga ansiyano sa “dakong panon.” (Pin. 7:9) Kini nga mga magbalantay naningkamot sa pagsundog kang Jesus sa pagsakripisyo sa kaugalingon. Agig pagsundog kang Kristo, buot nilang pakan-on ug atimanon ang kongregasyon. Alaot kadtong nagpasagad o nagharihari sa ilang mga igsoon o kadtong nagpakitag mapig-oton o mapahitas-ong tinamdan kanila! (Mat. 20:25-27; 1 Ped. 5:2, 3) Unsay gidahom ni Jehova sa Kristohanong mga magbalantay karon? Unsay atong makat-onan sa mga sinulat ni Jeremias bahin sa nahiangayng mga tinamdan ug motibo nga batonan sa mga ansiyano samtang ilang tumanon ang ilang mga responsibilidad? Susihon nato ang ilang mga papel ingong mga tigtabang ug tigpanalipod, ingong mga magtutudlo sa sulod ug sa gawas sa kongregasyon, ug ingong mga maghuhukom.

5-7. (a) Sa unsang paagi buot ni Jehova nga atimanon ang iyang mga karnero, ug ngano? (b) Sa unsang paagi ang mga ansiyano makapakitag tinuod nga gugma sa ilang mga igsoon, lakip na niadtong mga nahisalaag?

⁵ Gitawag ni apostol Pedro si Jehova nga “magbalantay ug magtatan-aw sa [atong] mga kalag.” (1 Ped. 2:25) Unsa nga tinamdan ang gipakita sa Diyos ngadto sa iyang “mga karnero”? Mahibaloan nato kini pinaagi sa pagsusi sa panghitabo sa adlaw ni Jeremias. Human sawaya ang daotang mga magbalantay nga nagpatibulaag ug nagpasagad sa ilang panon, si Jehova miingon nga iyang “tapokon” ang iyang mga karnero, ug dad-on silag balik sa ilang sibsibanan. Iyang gisaad nga hatagan silag maayong mga magbalantay ‘nga tinuod gayong magbantay kanila’ ug paneguroon niya nga ang iyang katawhan mapanalipdan batok sa manunukob nga mga kaaway. (Jer. 23:3, 4) Oo, maingon nga bililhon kang Jehova ang iyang mga karnero kaniadto, mao man usab karon. Dako ang iyang gisakripisyo alang sa ilang dumalayong kaayohan.—1 Ped. 1:18, 19.

⁶ Sama sa literal nga mga magbalantay, ang Kristohanong mga magtatan-aw dili magpasagad sa pag-atiman sa kongregasyon. Kon ikaw usa ka ansiyano, alisto ka ba sa pagmatikod sa bisan unsang suliran sa imong mga igsoon, ug andam ka bang motabang dayon kanila? Ang maalamon nga si Haring Solomon misulat: “Kinahanglan nga ikaw tinong makaila sa dagway sa imong panon sa kahayopan. Ipunting ang imong kasingkasing sa imong mga panon.” (Prov. 27:23) Gipasiugda niining tekstoha ang pagkakugihan sa literal nga mga magbalantay, apan ikapadapat usab ang prinsipyo niini sa pag-atiman nga ginahimo sa espirituwal nga mga magbalantay diha sa kongregasyon. Kon ikaw usa ka ansiyano, naningkamot ka bang mabuntog ang bisan unsang tendensiya sa pagdominar sa uban? Sanglit gihisgotan ni Pedro ang ekspresyong “mahariharion ibabaw niadtong panulondon sa Diyos,” nan posible gayod nga ang usa ka ansiyano mahimong ingon niana. Sa unsang paagi imong matuman ang gihubit sa Jeremias 33:12? (Basaha.) Ang nag-inusarang mga ginikanan, balo, dili-pursosong pamilya, tigulang, ug mga batan-on lagmit nagkinahanglag linaing pagtagad ug tabang.

⁷ Sama sa buhaton tingali sa usa ka magbalantay sa literal nga karnero, usahay kinahanglang susihon ug tabangan sa magbalantay sa kongregasyon ang mga nahisalaag gikan sa panon tungod sa pipila ka hinungdan. Kinahanglan siyang magsakripisyo ug magmapainubsanon sa pagbuhat niana. Siya mapailobong mogugol ug panahon sa pag-atiman sa panginahanglan niadtong mga gipiyal kaniya. Ang mga ansiyano sa kongregasyon angayng prangkang mangutana sa ilang kaugalingon: ‘Naningkamot ba gayod ako sa pagdasig ug paglig-on sa uban inay nga manghukom ug manaway? Buot ko ba gayong makahimog mas maayo pa?’ Tingali gikinahanglan usahay ang sublisubling mga paningkamot aron matabangan ang usa nga masabtan ang panglantaw sa Diyos. Kon ang usa ka igsoon magpanuko sa pagdawat sa tambag sa Kasulatan (dili lamang personal nga opinyon sa ansiyano), hinumdomi ang Supremong Magbalantay ug Magtatan-aw nga si Jehova. Siya mapailobong “nagpadayon sa pagsulti” ug naningkamot sa pagtabang sa iyang masukihong katawhan. (Jer. 25:3-6) Karong adlawa, kadaghanan sa katawhan sa Diyos wala magabuhat ug daotan, apan kon gikinahanglan ang tambag, ang usa ka ansiyano maghatag niini sama sa gihimo ni Jehova.

 8. Sa unsang paagi masundog sa espirituwal nga mga magbalantay ang panig-ingnan ni Jeremias?

⁸ Samtang may paglaom pa nga ang mga isigka-Hudiyo mobalik kang Jehova, si Jeremias miampo alang kanila. Siya miingon sa Diyos: “Hinumdomi ang akong pagbarog sa imong atubangan aron sa pagsulti ug maayo bisan mahitungod kanila, aron sa pagpahilayo sa imong kaaligutgot gikan kanila.” (Jer. 18:20) Imong makita niining mga pulonga nga gihatagag pagtagad ni Jeremias ang maayong mga hiyas sa iyang mga igsoon, ug dili ang ilang mga sayop. Karong adlawa, ang Kristohanong mga magtatan-aw angayng mosundog sa tinamdan ni Jeremias gawas kon adunay tin-awng ebidensiya nga ang usa nagpatig-a sa iyang kasingkasing sa pagbuhat ug daotan. Ang maayong paagi mao ang paghatag ug komendasyon sa uban tungod sa ilang gihimo nga maayo ug ang pag-ampo alang kanila ug uban kanila.—Mat. 25:21.

9, 10. Nganong ang usa ka maayong magbalantay (ansiyano sa kongregasyon) usa usab ka magtutudlo?

⁹ Sumala sa atong mabasa sa Jeremias 3:15, ang Kristohanong mga magbalantay kinahanglang ‘magpakaon sa uban sa kahibalo ug sa hait nga salabotan,’ buot ingnon, mag-alagad ingong mga magtutudlo. (1 Tim. 3:2; 5:17) Gisaaran ni Jehova ang iyang katawhan nga buhaton kana sa maayong mga magbalantay. Ug iyang gidasig ang mga Hudiyo nga dawaton ang pagtul-id gikan sa iyang manalagna nga si Jeremias. (Basaha ang Jeremias 6:8.) Aron mahimong himsog, ang karnero kinahanglang pakan-on. Sa susamang paagi, aron magpabiling himsog sa espirituwal, kinahanglan sa katawhan sa Diyos ang espirituwal nga pagkaon ug pagtultol gikan sa Kasulatan.

¹⁰ Bahin sa pagpanudlo, ang mga ansiyano adunay duha ka papel—ang pagtabang niadtong anaa na sa kongregasyon ug ang pagtabang niadtong dili pa tinuod nga mga Kristohanon. Maylabot sa pagtabang niadtong dili pa mga Kristohanon, hinumdomi kini: Ang usa sa pangunang mga hinungdan nga naglungtad ang Kristohanong kongregasyon mao ang pagsangyaw sa maayong balita sa Gingharian sa Diyos. Busa kinahanglan nga ang mga ansiyano maoy masibotong mga ebanghelisador. (Jer. 1:7-10) Sa ingon, sila nagtuman sa ilang responsibilidad ngadto sa Diyos ug naghatag ug maayong panig-ingnan sa ilang mga igsoon. Kon ikaw usa ka ansiyano, wala ba nimo mamatikdi nga tungod sa imong regular nga pagpakig-uban sa lainlaing mga igsoong lalaki ug babaye ikaw makatabang kanila sa pagpauswag sa ilang mga katakos sa pagpanudlo ug ingon man usab sa imong kaugalingon? Kon ikaw masibotong manguna sa pagsangyaw, ikaw makahatag ug dakong kadasig sa kongregasyon ug makatabang niini nga mouswag.

11, 12. Kon buot sa usa ka ansiyano nga mahimong maayong magbalantay, unsay kinahanglan niyang hatagag pagtagad?

¹¹ Ang ipakig-ambit sa mga ansiyano ngadto sa kongregasyon kinahanglang ipasukad sa Bibliya, busa kana maoy makapahimsog nga espirituwal nga pagkaon. Nan, imong makita nga aron mahimong epektibong mga magtutudlo, kinahanglan nga ang mga magbalantay sa kongregasyon maoy masibotong mga estudyante sa Pulong sa Diyos. Itandi kini sa gihisgotan ni Jeremias kon nganong dili epektibo ang ilang mga pangulo: “Ang mga magbalantay migawi sa pagkawalay-salabotan, ug sila wala mangita bisan kang Jehova. Mao kana nga sila wala molihok uban ang hait nga salabotan, ug ang tanan nilang gipasibsib nga mga hayop nangatibulaag.” (Jer. 10:21) Kadtong kinsa mga magtutudlo unta wala mosunod sa Kasulatanhong mga prinsipyo ug wala mangita sa Diyos. Busa, dili mabanaag sa ilang mga lihok ang tinuod nga kaalam. Gimantala ni Jeremias ang mas bug-at pa nga paghukom alang niining gitawag kono nga mga manalagna.—Basaha ang Jeremias 14:14, 15.

¹² Dili sama niadtong mini nga mga magbalantay, tun-an ug sundogon sa Kristohanong mga magtatan-aw ang panig-ingnan ni Jesus. Busa, sila makaalagad ingong maalamong mga magbalantay sa panon. Usa ka hagit alang kanila ang pag-eskedyul ug regular nga pagtuon, sanglit daghang butang ang kinahanglan nilang hatagag panahon ug pagtagad. Apan kon ikaw usa ka ansiyano, kombinsido ka ba gayod nga ang imong gitudlo mahimo lamang nga mapuslanon ug kasaligan, nga nagpabanaag ug kahibalo ug pagsabot, kon imo kining ipasukad sa Pulong sa Diyos ug sa paggiya gikan sa matinumanon ug maalamong ulipon nga matang? Kon imong namatikdan nga wala ka na kaayoy eskedyul sa personal nga pagtuon ingon sa miagi, unsay imong buhaton aron ikaw magpabiling lahi gikan sa mini nga mga magbalantay sa adlaw ni Jeremias?

13. Unsay nakapahimo kang Jeremias nga maayong magtutudlo, ug unsay makat-onan sa Kristohanong mga magbalantay karon gikan kaniya?

¹³ Ang ilabinang nakapahimo kang Jeremias nga usa ka epektibong magtutudlo mao ang iyang paggamit ug mga ilustrasyon. Siyempre, siya gitudloan ni Jehova. Mahinumdoman gayod nato nga siya nagdugmok sa kulonon nga tibod nganha sa yuta ug nagmantala nga ang Jerusalem ug ang katawhan niini dugmokon usab sa samang paagi! (Jer. 19:1, 10, 11) Ang laing pananglitan mao ang paghimo ug pagpas-an ni Jeremias ug yugo nga kahoy aron ilarawan ang grabeng pag-antos nga maagoman sa iyang katawhan tungod sa pagkaulipon sa Babilonya. (Jer., kap. 27-28) Ang mga ansiyano sa inyong kongregasyon wala sugoa sa Diyos nga mohimo sa maong mahulagwayong mga aksiyon aron ipasiugda ang pipila ka punto. Apan, dili ba nimo pabilhan kon sila mogamit ug haom nga mga ilustrasyon ug mga kasinatian diha sa ilang pagpanudlo? Ang maayong pagkapili ug haom nga malarawanong mga pulong ug mga pananglitan epektibo ug makapadasig gayod kanato.

14. (a) Diin gipasukad ang gihisgotan ni Jeremias nga “balsamo sa Gilead”? (b) Sa unsang paagi mapatunhay sa Kristohanong mga ansiyano ang espirituwal nga kahimsog sa ilang mga igsoon?

¹⁴ Mapasalamaton gayod kita sa Kristohanong mga magbalantay tungod sa ilang pagpanudlo. Sa iyang adlaw, nakita ni Jeremias nga ang iyang katawhan kinahanglang ayohon sa espirituwal. Siya nangutana: “Wala bay balsamo sa Gilead? O wala bay mananambal didto?” (Jer. 8:22) Dihay literal nga balsamo sa Gilead, ang dapit sa Israel sa sidlakan sa Jordan. Ang humot nga lana niini nabantog nga makatambal, ug kasagarang ipahid aron moalibyo ug maayo ang mga samad. Apan, wala sila mamaayo sa espirituwal. Ngano? Si Jeremias miingon: “Ang mga manalagna nanagna sa kabakakan; ug bahin sa mga saserdote, sila nagmando sumala sa ilang mga gahom. Ug ang ingon niana gihigugma sa akong katawhan.” (Jer. 5:31) Komosta karong adlawa? Dili ka ba mouyon nga aduna gayoy “balsamo sa Gilead” sa inyong kongregasyon? Mahimo natong ipakasama ang makapahupay nga balsamo sa paghupay nga ginahimo sa mahangawaong Kristohanong mga magbalantay. Sila mahigugmaong nagtabang sa mga igsoon nga makita ang Kasulatanhong mga prinsipyo, nagpalig-on kanila, ug nag-ampo alang kanila ug uban kanila.—Sant. 5:14, 15.

15, 16. Nganong nagkinahanglag pagtagad ang literal ug ang simbolikal nga mga panon?

¹⁵ Handurawa ang kalipay sa usa ka literal nga magbalantay sa dihang bugti sa iyang paghago sa taas nga panahon iyang makita ang pagkahimugso sa himsog nga mga nati! Apan, siya nahibalo nga aron sila mohimsog, sila kinahanglang atimanon. Kinahanglang paneguroon sa magbalantay nga makakaon silag maayo. Ang mga karnero kinaiyanhong ipanganak nga tag-as ug mga ikog nga mahimong masangyad sa kinalibang ug mga hugaw. Buot sa magbalantay nga magpabiling hinlo ug himsog ang iyang mga hayop, busa iyang pamub-an ang ilang mga ikog, nga mag-amping pag-ayo aron dili sila masakitan. Ang espirituwal nga mga magbalantay usab maghatag ug mahigugmaong pagtagad sa mga karnero, ang mga membro sa ilang kongregasyon. (Juan 21:16, 17) Malipay usab pag-ayo ang mga ansiyano sa dihang ilang makita ang mga interesado nga naningkamot nga mahimong tinuod nga mga Kristohanon. Buot sa Kristohanong mga magtatan-aw nga ang tanang karnero, bata man ug tigulang, mahimong himsog, busa wala silay hunong sa pag-atiman kanila ug manalipod kanila kon gikinahanglan. Kini nga buluhaton tinong naglakip sa pagpahinumdom sa ilang mga igsoon bahin sa “giingon ni Jehova,” buot ingnon, ang gitudlo sa Kasulatan.—Jer. 2:2, 5; 7:5-7; 10:2; Tito 1:9.

¹⁶ Gikinahanglan ni Jeremias ang kaisog sa pagmantala sa mensahe sa Diyos. Mao man usab ang mga magtatan-aw sa kongregasyon, ilabina sa mga kahimtang diin kinahanglan silang mosulti aron panalipdan ang ilang mga igsoon. Pananglitan, tingali nakita sa usa ka espirituwal nga magbalantay nga kinahanglan siyang molihok aron panalipdan ang usa ka ‘bag-ong gipanganak nga nati’ o bisan ang gulanggulang na nga “karnero” aron dili mahugawan sa kalibotan ni Satanas. Ang igsoon nga nameligro wala gani tingali mangayog tambag. Apan, magpakabuta-bungol na lamang ba ang usa ka mahunahunaong magbalantay samtang iyang nakita nga nameligro ang usa ka membro sa iyang panon? Dili gayod! Ni ibalewala lamang niya ang maong kahimtang, nga para niya morag maayo ra ang tanan bisan ang tinuod aduna gayoy problema nga tungod niana ang iyang isigkaalagad mahimong mawad-an sa iyang kalinaw uban kang Jehova.—Jer. 8:11.

17. Kanus-a ug sa unsang paagi ang usa ka magbalantay tingali maghatag ug linaing pagtagad sa tagsatagsa ka karnero?

¹⁷ Kon ang usa ka dili-mabinantayong karnero maaghat sa pagpahilayo gikan sa panon, ang usa ka alistong magbalantay molihok dayon aron sa pagluwas niini gikan sa kapeligrohan. (Basaha ang Jeremias 50:6, 7.) May panahon usab nga tingali ang usa ka magtatan-aw prangka apan mahigugmaong magtambag niadtong hapit nang mahitumpawak sa kapeligrohan. Pananglitan, tingali iyang namatikdan nga ang usa ka kaslonon manglakaw nga walay kauban sa mga dapit diin lagmit dili nila kapugngan ang kainit sa ilang gibati. Mahimong tabangan sa maluloton ug mahunahunaong ansiyano ang kaslonon nga malikayan ang maong makapakompromiso nga mga kahimtang. Bisan tuod mabinantayon nga dili sila akusahan, mahimo niyang hisgotan ang mga kahimtang nga posibleng makabuhat sila sa gidumtan ni Jehova. Sama sa gihimo ni Jeremias, gikondenar sa matinumanong mga ansiyano ang gikondenar ni Jehova. Pinaagi niini ilang gisundog si Jehova, nga bisan tuod dili mapig-oton, nag-awhag sa iyang katawhan pinaagi sa iyang manalagna: “Palihog, ayaw buhata kining matanga sa dulumtanang butang nga akong gidumtan.” (Jer. 5:7; 25:4, 5; 35:15; 44:4) Tinuod mo bang gipabilhan ang gipakitang kahangawa sa mahigugmaong mga magbalantay alang sa panon?

18. Unsa ang makapadasig nga mga resulta sa mga paningkamot sa espirituwal nga mga magbalantay?

¹⁸ Siyempre, dili ang tanang gitambagan ni Jeremias nagpatalinghog kaniya. Apan ang pipila nagpatalinghog. Pananglitan, sa dihang ang kauban ug sekretaryo ni Jeremias nga si Baruk gikinahanglang hatagan ug puwersadong tambag, si Jeremias wala magpanuko sa paghatag niana. (Jer. 45:5) Unsay resulta? Nabatonan ni Baruk ang pag-uyon sa Diyos ug siya naluwas sa pagkalaglag sa Jerusalem. Karong adlawa usab, ang maayong mga resulta sa pagtabang sa mga isigkamagtutuo makadasig sa mga ansiyano sa kongregasyon nga “magmakugihon” sa ‘pagpanambag ug pagpanudlo’ nga makaluwas ug kinabuhi.—1 Tim. 4:13, 16.

19, 20. Unsa ang responsibilidad sa mga ansiyano sa pag-atiman sa mga mamumuhat ug daotan?

¹⁹ Ang laing papel sa mga magtatan-aw karong adlawa mao ang espirituwal nga pagkamaghuhukom. Usahay, atimanon sa mga ansiyano ang kaso sa tinuyong mga nagpakasala aron matabangan sila nga maghinulsol. Si Jehova maluloton apan prangkang nagdasig sa mga mamumuhat ug daotan sa pagbiya sa ilang daotang mga dalan. (Jer. 4:14) Apan, kon ang usa diha sa kongregasyon dili motalikod sa iyang masalaypong dalan, ang mga magtatan-aw kinahanglang molihok aron panalipdan ang panon gikan sa posibleng makadaot nga impluwensiya. Ingon sa gisugo sa Kasulatan, tingali kinahanglan nilang palagpoton ang mamumuhat ug daotan. Sa maong mga kahimtang, gidahom ni Jehova nga ang mga ansiyano magtuboy sa Iyang hustisya. Ang maayong hari nga si Josias nagpakitag panig-ingnan sa pagbuhat niini. “Siya milaban sa katungod sa sinakit ug sa kabos.” Iyang gisundog ang gugma sa Diyos alang sa hustisya. Busa, si Jehova nakapangutana bahin sa gibuhat ni Josias: “Dili ba kadto maoy pag-ila kanako?” Tungod kay gipatuman ni Josias ang hustisya ug pagkamatarong, ‘maayo ang gisangpotan niya.’ Dili ba mas makasalig ka kon ang mga ansiyano sa inyong kongregasyon maningkamot sa pagsundog sa panig-ingnan ni Josias?—Jer. 22:11, 15, 16.

²⁰ Makasalig ka nga disiplinahon ni Jehova “sa hustong paagi” ang mga mamumuhat ug daotan. (Jer. 46:28) Busa, depende sa mga sirkumstansiya ug sa tinamdan nga gipakita, ang mga ansiyano tingali kinahanglang magtambag, magpahimangno, o magbadlong sa mga isigkamagtutuo. Ug gani kinahanglan tingaling palagpoton ang usa ka dili-mahinulsolong mamumuhat ug daotan. Sa maong kahimtang, ang mga ansiyano dili mag-ampo sa publiko alang sa usa nga napalagpot ug nagpadayon sa pagpakasala, kay walay kapuslanan ang pagbuhat niana.a (Jer. 7:9, 16) Hinunoa, sundogon nila ang Diyos pinaagi sa pagpatin-aw sa tawong gipalagpot kon unsaon niya pagkahibalik sa pabor sa Diyos. (Basaha ang Jeremias 33:6-8.) Bisan tuod tingali sakit ang pagpalagpot, makatino kita nga ang mga sukdanan sa Diyos maoy matarong ug makataronganon ug labing maayo alang sa tanan.—Lam. 1:18.

21. Unsa ang angayng kahimtang sa panon sa Diyos, ug sa unsang paagi ikaw makatabang sa pagkab-ot niana?

²¹ Kon ilhon ug ipadapat sa mga magbalantay sa kongregasyon ang inspiradong mga sukdanan sa Diyos, ang panon mahimong himsog ug mapanalipdan pag-ayo. (Sal. 23:1-6) Ang gihisgotan ni Jeremias bahin sa mga tinamdan ug mga motibo, ang husto ug dili, makatabang sa Kristohanong mga magtatan-aw samtang ilang tumanon ang bug-at nga responsibilidad sa pag-atiman sa mga karnero sa Diyos. Busa, ang matag-usa kanato angayng mangutana, ‘Padayon ko bang ipakita ang pagpabili sa kahikayan ni Jehova sa pagtudlo, paggiya, ug pagpanalipod sa iyang katawhan pinaagi sa pagpaluyo sa mga magbalantay kinsa “magabantay” sa panon uban “sa kahibalo ug sa hait nga salabotan”?’—Jer. 3:15; 23:4.