Magpagiya sa Diyos sa Tanang Butang
“Kini nga Diyos mao ang atong Diyos hangtod sa panahong walay tino, bisan hangtod sa kahangtoran. Siya magagiya kanato hangtod sa atong pagkamatay.”—SAL. 48:14.
1, 2. Nganong angay kitang mosunod sa giya ni Jehova inay mosalig sa atong kaugalingong kaalam, ug unsang mga pangutana ang motungha?
DALI natong maisip ang walay-bili o makadaot nga mga butang ingong maayo o tilinguhaon gayod. (Prov. 12:11) Kon gusto gayod natong buhaton ang dili angay sa usa ka Kristohanon, ang atong kasingkasing sagad magpatunghag makapakombinsir nga mga rason sa pagbuhat niini. (Jer. 17:5, 9) Busa, ang salmista nagpakitag kaalam sa dihang miampo siya kang Jehova: “Ipadan-ag ang imong kahayag ug ang imong kamatuoran. Tultolan unta ako niini.” (Sal. 43:3) Siya misalig kang Jehova, dili sa iyang limitadong kaalam, ingong iyang kinamaayohang tinubdan sa giya. Sama sa salmista, angay kitang mosalig sa Diyos alang sa giya.
2 Apan, nganong angay kitang mosalig sa giya ni Jehova? Kanus-a ba gayod kita magpagiya niini? Unsang mga tinamdan ang angay natong ugmaron aron makapahimulos niini, ug sa unsang paagi si Jehova nagagiya kanato karon? Kining hinungdanong mga pangutana ang hisgotan niining artikuloha.
Nganong Mosalig Kita sa Giya ni Jehova?
3-5. Nganong bug-os kitang makasalig sa giya ni Jehova?
3 Si Jehova mao ang atong langitnong Amahan. (1 Cor. 8:6) Siya bug-os nakaila sa matag usa kanato ug makabasa sa atong mga kasingkasing. (1 Sam. 16:7; Prov. 21:2) Si Haring David miingon sa Diyos: “Ikaw nahibalo sa akong paglingkod ug sa akong pagtindog. Gitagad mo ang akong hunahuna gikan sa halayo. Kay walay mausa ka pulong sa akong dila, apan, tan-awa! Oh Jehova, ikaw nahibalo na niining tanan.” (Sal. 139:2, 4) Kay nakaila man kaayo si Jehova kanato, magduhaduha ba kita nga nahibalo siya kon unsay labing maayo alang kanato? Gawas pa, si Jehova maalamon sa tanan. Siya makakita sa tanang butang, makasusi nga mas lawom kay ni bisan kinsang tawo, ug nahibalo sa sangpotanan sa mga butang sukad sa sinugdan. (Isa. 46:9-11; Roma 11:33) Siya maoy “Diyos, ang bugtong maalamon.”—Roma 16:27.
4 Dugang pa, si Jehova nahigugma kanato ug nagtinguha kanunay sa atong kaayohan. (Juan 3:16; 1 Juan 4:8) Ingong mahigugmaong Diyos, siya mahinatagon kanato. Ang tinun-ang si Santiago misulat: “Ang matag maayong gasa ug matag hingpit nga regalo naggikan sa itaas, kay kini gikan sa Amahan sa langitnong mga kahayag.” (Sant. 1:17) Kadtong magpagiya sa Diyos makapahimulos pag-ayo sa iyang pagkamahinatagon.
5 Sa kataposan, si Jehova maoy labing gamhanan. Bahin niini ang salmista miingon: “Si bisan kinsa nga nagapuyo sa natago nga dapit sa Labing Hataas makabaton ug kapahulayan ilalom sa landong sa Usa nga Labing Gamhanan. Magaingon ako kang Jehova: ‘Ikaw mao ang akong dalangpanan ug akong salipdanan, akong Diyos, kang kinsa mosalig ako.’” (Sal. 91:1, 2) Sa dihang mosunod kita sa giya ni Jehova, gitinguha nato ang labing maayong giya, kay siya dili gayod mapakyas. Bisan pag kita supakon, paluyohan kita ni Jehova. Dili gayod kita mahigawad. (Sal. 71:4, 5; basaha ang Proverbio 3:19-26.) Oo, si Jehova nahibalo kon unsay labing maayo alang kanato, ug siya matinguhaon ug may katakos sa pagtagana niana. Pagkahungog nato kon dili nato tagdon ang iyang giya! Apan, kanus-a ba kita magkinahanglan sa maong giya?
Kanus-a ba Kita Magkinahanglan ug Giya?
6, 7. Kanus-a ba kita magkinahanglan sa giya ni Jehova?
6 Sa pagkatinuod, nagkinahanglan kitag giya sa Diyos sa tibuok natong kinabuhi, sukad sa pagkabata hangtod sa pagkatigulang. Ang salmista miingon: “Kini nga Diyos mao ang atong Diyos hangtod sa panahong walay tino, bisan hangtod sa kahangtoran. Siya magagiya kanato hangtod sa atong pagkamatay.” (Sal. 48:14) Sama sa salmista, ang maalamong mga Kristohanon dili gayod mohunong sa pagpagiya sa Diyos.
7 Hinuon, may mga higayon nga nagkinahanglan kitag dinaliang tabang. Usahay, makasinati kitag “kalisdanan,” nga tingali gilutos, may grabeng sakit, o kalit nga nawad-ag trabaho. (Sal. 69:16, 17) Nianang mga higayona, makapahupay ang pagdangop kang Jehova, nga masaligong lig-onon kita aron makaantos ug giyahan aron makahimog maalamong mga desisyon. (Basaha ang Salmo 102:17.) Apan atong gikinahanglan usab ang iyang tabang sa ubang mga higayon. Pananglitan, dihang atong sangyawan ang atong mga silingan sa maayong balita sa Gingharian, atong gikinahanglan ang giya ni Jehova aron magmalamposon kana. Ug kon kinahanglang mohimo kitag desisyon—bahin sa kalingawan, pamesti ug pamostura, pakig-uban, panarbaho, edukasyon, o bisan unsa pa—kita mahimong maalamon kon atong sundon ang mga lagda ni Jehova. Sa pagkatinuod, kita nagkinahanglag giya sa tanang bahin sa atong kinabuhi.
Mga Kapeligrohan sa Dihang Dili Magpagiya sa Diyos
8. Unsay sangpotanan sa pagkaon ni Eva sa gidiling bunga?
8 Apan hinumdomi nga kinahanglan kitang kinabubut-ong mosunod sa giya ni Jehova. Dili kita pugson sa Diyos sa pagsunod niana kon dili nato gusto. Si Eva ang unang tawo nga midesidir sa dili pagsunod sa giya ni Jehova, ug ang iyang panig-ingnan nagpakita kon unsa ka seryoso ang maong daotang desisyon. Hunahunaa usab ang sangpotanan sa iyang gibuhat. Mikaon si Eva sa gidiling bunga kay buot niyang “mahisama sa Diyos, nga mahibalo sa maayo ug daotan.” (Gen. 3:5) Ang iyang pagbuhat niadto nagpakita nga giilog niya ang katungod sa Diyos, nga mihukom sa kaugalingon kon unsay maayo ug daotan imbes mosunod sa mga lagda ni Jehova. Busa iyang gisalikway ang pagkasoberano ni Jehova. Gusto niyang walay mokontrolar kaniya. Kana usab ang gibuhat sa iyang bana nga si Adan.—Roma 5:12.
9. Kon atong isalikway ang giya ni Jehova, unsa ba gayoy atong ginabuhat, ug nganong dili gayod kana maalamon?
9 Karong adlawa, kon dili kita mosunod sa giya ni Jehova, wala usab nato ilha ang iyang pagkasoberano. Pananglitan, hunahunaa ang usa ka tawong nagsigeg tan-aw ug pornograpiya. Kon siya nakig-uban sa Kristohanong kongregasyon, nahibalo siya sa mga lagda ni Jehova bahin niini. Ang mahugaw nga mga butang dili gani angayng estoryahan, labi na ang pagkalingawg tan-aw sa law-ay nga mga hulagway. (Efe. 5:3) Pinaagi sa pagsalikway sa mga lagda ni Jehova, wala usab niya ilha ang pagkasoberano ni Jehova, nga nagsalikway sa Iyang pagdumala. (1 Cor. 11:3) Dili gayod kana maalamon, kay si Jeremias miingon, “dili iya sa tawo nga nagalakaw bisan ang pagtultol sa iyang lakang.”—Jer. 10:23.
10. Nganong angay natong gamiton ang atong kagawasan sa pagpili sa responsableng paagi?
10 Ang uban mosupak tingali sa mga pulong ni Jeremias, kay naghunahuna nga tungod sa paghatag kanato ni Jehova ug kagawasan sa pagpili, dili siya angayng mosaway kon gamiton nato kana. Apan ayawg kalimti nga ang kagawasan sa pagpili maoy usa ka gasa nga nagdala ug responsabilidad. Manubag kita sa Diyos sa atong isulti ug buhaton. (Roma 14:10) Si Jesus miingon: “Gikan sa kadagaya sa kasingkasing ang baba mosulti.” Siya miingon usab: “Nagagula gikan sa kasingkasing ang daotang mga pangatarongan, mga pagbuno, mga pagpanapaw, mga pakighilawas, mga pagpangawat, bakak nga mga pagpamatuod, mga pasipala.” (Mat. 12:34; 15:19) Busa, ang atong mga pulong ug mga buhat mobutyag sa kahimtang sa atong kasingkasing ug kon kinsa gayod kita. Mao nga ang maalamong Kristohanon magpagiya kang Jehova sa tanang butang. Sa ingon, makita ni Jehova nga siya ‘matul-id sa iyang kasingkasing’ ug Iyang ‘buhaton ang maayo’ kaniya.—Sal. 125:4.
11. Unsay atong makat-onan gikan sa kasaysayan sa Israel?
11 Hinumdomi ang kasaysayan sa Israel. Sa dihang gihimo sa nasod ang maayong mga desisyon, nga gisunod ang mga sugo ni Jehova, iya silang gipanalipdan. (Jos. 24:15, 21, 31) Apan subsob nilang giabusohan ang ilang kagawasan sa pagpili. Sa adlaw ni Jeremias, si Jehova miingon bahin kanila: “Sila wala mamati, ni nagkiling sa ilang igdulungog, apan sila naglakaw sa mga laraw sumala sa katig-a sa ilang daotang kasingkasing, mao nga paatras ang ilang direksiyon ug dili paabante.” (Jer. 7:24-26) Pagkamakapasubo! Hinaot dili gayod kita mosalikway sa giya ni Jehova ug molakaw sa atong kaugalingong mga laraw tungod sa pagkagahian o pagkamapatuyangon ug sa ingon mahimong ‘paatras ang direksiyon ug dili paabante’!
Unsay Gikinahanglan Aron Masunod ang Tambag sa Diyos?
12, 13. (a) Unsang hiyas ang modasig kanato sa pagsunod sa giya ni Jehova? (b) Nganong hinungdanon gayod ang pagtuo?
12 Ang atong gugma alang kang Jehova maoy modasig kanato sa pagsunod sa iyang giya. (1 Juan 5:3) Apan may gipunting si Pablo nga laing butang nga atong gikinahanglan sa miingon siya: “Kita nagalakaw pinaagi sa pagtuo, dili pinaagi sa makita.” (1 Cor. 5:6, 7) Nganong hinungdanon ang pagtuo? Buweno, si Jehova nagaagak kanato diha sa “mga alagianan sa pagkamatarong,” apan ang sangkoan sa maong mga alagianan dili bahandi o kadungganan niining kalibotana. (Sal. 23:3) Busa kinahanglang itutok nato ang atong mga mata sa pagtuo sa di-hitupngang espirituwal nga mga panalangin gumikan sa pag-alagad kang Jehova. (Basaha ang 2 Corinto 4:17, 18.) Ug ang pagtuo makatabang kanato nga makontento sa pangunang materyal nga mga kinahanglanon.—1 Tim. 6:8.
13 Gipaila ni Jesus nga ang pagsakripisyo-sa-kaugalingon nalangkit sa matuod nga pagsimba, ug nagkinahanglan kanag pagtuo. (Lucas 9:23, 24) Ang pipila ka matinumanong mga magsisimba nakahimog dagkong mga sakripisyo, nag-antos sa kakabos, panglupig, kamapihigon, ug sa grabe pang paglutos. (2 Cor. 11:23-27; Pin. 3:8-10) Nakaantos sila niana uban ang kalipay tungod sa lig-ong pagtuo. (Sant. 1:2, 3) Tungod sa lig-ong pagtuo bug-os kitang makasalig nga ang pagsunod sa giya ni Jehova kanunay nga labing maayo. Kini kanunay nga alang sa atong dumalayong kaayohan. Wala gayod kitay pagduhaduha nga ang ganti sa mga molahutay ug magmaunongon labaw pa kaayo kay sa umalaging pag-antos.—Heb. 11:6.
14. Nganong kinahanglang magmapainubsanon si Agar?
14 Tagda kon nganong ang pagkamapainubsanon gikinahanglan usab diha sa pagsunod sa giya ni Jehova. Kini gipasundayag sa panig-ingnan ni Agar, ang sulugoong babaye ni Sara. Sa naamgohan ni Sara nga dili gayod siya manganak, iyang gihatag si Agar kang Abraham, ug siya namabdos sa anak ni Abraham. Unya, si Agar nagmapahitas-on sa iyang dili-makaanak nga agalon. Busa si Sara “nagpakaulaw kaniya,” ug si Agar milayas. Gitagbo sa usa ka manulonda ni Jehova si Agar ug giingnan siya: “Balik sa imong agalong babaye ug magpaubos ka ilalom sa iyang kamot.” (Gen. 16:2, 6, 8, 9) Palabihon unta tingali ni Agar ang laing giya. Kinahanglang isalikway niya ang iyang pagkamapahitas-on aron masunod ang giya sa manulonda. Hinuon, mapainubsanong gisunod ni Agar ang gisulti sa manulonda, ug ang iyang anak nga si Ismael natawo didto sa kampo sa iyang amahan nga layo sa kapeligrohan.
15. Isaysay ang pipila ka kahimtang diin kinahanglan tingali kitang magmapainubsanon aron masunod ang giya ni Jehova.
15 Ang pagsunod sa giya ni Jehova basin nagkahulogan nga kinahanglan usab kitang magmapainubsanon. Kinahanglan tingaling dawaton sa uban ang punto-debista nga ang usa ka matang sa kalingawan nga gusto nila dili makapahimuot kang Jehova. Ang usa ka Kristohanon tingali nakapasilo sa lain ug siya kinahanglang mangayog pasaylo. O tingali siya nasayop ug angay niyang angkonon kana. Komosta man kon ang usa seryosong nakasala? Siya kinahanglang magpaubos ug isugid kana sa mga ansiyano. Ang usa ka tawo napalagpot pa tingali. Kinahanglan siyang mapainubsanong maghinulsol ug magbag-o aron mapasig-uli sa kongregasyon. Niini ug sa susamang mga kahimtang, makapahupay ang mga pulong sa Proverbio 29:23: “Ang pagkamapahitas-on sa yutan-ong tawo maoy magapaubos kaniya, apan siya nga mapainubsanon sa espiritu makahupot ug himaya.”
Sa Unsang Paagi si Jehova Nagagiya Kanato?
16, 17. Sa unsang paagi makapahimulos kita pag-ayo sa Bibliya ingong tinubdan sa giya sa Diyos?
16 Ang kinalabwang tinubdan sa giya sa Diyos mao ang Bibliya, ang Iyang inspiradong Pulong. (Basaha ang 2 Timoteo 3:16, 17.) Aron makapahimulos pag-ayo niana, maalamong dili kita maghulat nga motungha ang lisod nga kahimtang ayha pa tinguhaon ang mapuslanong mga pulong sa Kasulatan. Hinunoa, batasanon nato ang pagbasa sa Bibliya adlaw-adlaw. (Sal. 1:1-3) Sa ingon atong masayran ang inspiradong mga pulong. Kita makabaton sa mga hunahuna sa Diyos ug maandam sa pag-atubang bisan sa wala-damhang mga suliran.
17 Dugang pa, hinungdanong pamalandongon ang atong nabasa sa Kasulatan ug mag-ampo maylabot niana. Sa atong pagpamalandong, hunahunaon nato kon sa unsang paagi mapadapat kana sa espesipikong mga kahimtang. (1 Tim. 4:15) Kon magsagubang kitag seryosong mga suliran, moampo kita kang Jehova alang sa tabang aron makaplagan ang giya nga atong gikinahanglan. Ang espiritu ni Jehova motabang kanato sa paghinumdom sa mapuslanong mga prinsipyo sa Kasulatan nga atong nabasa sa Bibliya o sa mga basahong gibase sa Bibliya.—Basaha ang Salmo 25:4, 5.
18. Sa unsang mga paagi gigamit ni Jehova ang Kristohanong kapunongan sa paggiya kanato?
18 Ang atong Kristohanong kapunongan maoy laing bililhong tinubdan sa pagpagiya kang Jehova. Usa ka hinungdanong bahin sa maong kapunongan mao “ang matinumanon ug maalamong ulipon” uban sa Nagamandong Lawas ingong hawas niini. Kini nagtagana kanunay ug espirituwal nga pagkaon pinaagig pinatik nga mga basahon ug mga programa alang sa mga tigom ug mga asembliya. (Mat. 24:45-47; itandi ang Buhat 15:6, 22-31.) Dugang pa, anaa sa Kristohanong kapunongan ang hamtong nga mga membro, ilabina mga ansiyano, nga may katakos sa pagtabang ug paghatag ug Kasulatanhong tambag. (Isa. 32:1) Ang mga batan-on sa Kristohanong mga panimalay may lain pang bililhong tinubdan. Ang ilang magtutuong mga ginikanan maoy awtoridad nga gitudlo sa Diyos sa paggiya kanila, ug angay nilang tinguhaon kanunay ang giya sa ilang mga ginikanan.—Efe. 6:1-3.
19. Unsang mga panalangin ang atong gipahimuslan tungod sa pagpagiya kanunay kang Jehova?
19 Sa pagkatinuod, si Jehova nagtanyag ug giya sa daghang paagi, ug maayong pahimuslan nato kini sa bug-os. Sa paghisgot sa usa ka panahong ang Israel nagmatinumanon, si Haring David miingon: “Diha kanimo misalig ang among mga amahan; sila misalig, ug kanunay mo silang gitagan-an ug kaikyasan. Nganha kanimo sila mituaw, ug sila naluwas; diha kanimo sila misalig, ug sila wala modangat sa kaulawan.” (Sal. 22:3-5) Kon kita masaligong mosunod sa giya ni Jehova, ‘dili usab kita modangat sa kaulawan.’ Ang atong paglaom dili mapakyas. Kon atong ‘itugyan kang Jehova ang atong dalan,’ imbes mosalig sa atong kaugalingong kaalam, moresulta ang tugob nga mga panalangin bisan karon. (Sal. 37:5) Ug kon kita magmaunongon ug molahutay sa maong dalan, dumalayon na unya ang maong mga panalangin. Si Haring David misulat: “Si Jehova mahigugmaon sa hustisya, ug dili niya pagabiyaan ang mga maunongon kaniya. Sila pagabantayan hangtod sa panahong walay tino . . . Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Sal. 37:28, 29.
Makapatin-aw Ka Ba?
• Nganong mosalig kita sa giya ni Jehova?
• Unsay sangpotanan kon atong isalikway ang giya ni Jehova?
• Unsay pipila ka kahimtang diin kinahanglang magpaubos ang usa ka Kristohanon?
• Sa unsang paagi si Jehova nagagiya kanato karon?
[Mga hulagway sa panid 8]
Nagsalig ka ba kang Jehova diha sa tanang bahin sa imong kinabuhi?
[Hulagway sa panid 9]
Gitalikdan ni Eva ang pagkasoberano ni Jehova
[Hulagway sa panid 10]
Unsang hiyasa ang gikinahanglan ni Agar aron makasunod siya sa giya sa manulonda?