“Dili ba Kadto Maoy Pag-ila Kanako?”

1, 2. Nganong dili maalamon kang Jehoiakim nga ipadayon ang iyang proyekto sa pagtukod?

SI Haring Jehoiakim nagplanong magtukod ug usa ka dakong balay. Himoon kining duha ka andana nga may dagkong mga lawak. Tungod sa dagkong mga bentana niini, dali rang makalusot ang kahayag sa adlaw ug kanunayng makasulod ang lab-as nga hangin, sa ingon komportable ang hari ug ang iyang pamilya. Kini bungbongan ug humot nga sedro gikan sa Lebanon. Ang usa ka pulang pintal nga gikan pa sa laing nasod magpatahom kaayo sa sulod niini nga maoy gitinguha pag-ayo sa mga dungganon ug gamhanang mga tawo sa ubang kayutaan.—Jer. 22:13, 14.

² Dakog gasto ang proyekto. Nianang panahona, nahurot na ang panudlanan sa nasod tungod sa galastohon niini sa depensa ug sa gipangayong buhis sa Ehipto. (2 Hari 23:33-35) Apan si Jehoiakim nakakitag paagi aron matukod gihapon ang iyang bag-ong palasyo. Wala niya suholi ang mga trabahante sa pagpanukod! Gipakasama niya silag mga ulipon, ug gipahimuslan ang ilang singot ug kahago aron paluyohan ang iyang monarkiya.

 3. Unsay kalainan tali kang Jehoiakim ug sa iyang amahan, ug ngano?

³ Pinaagi kang Jeremias, gisaway sa Diyos si Jehoiakim tungod sa iyang kahakog.a Iyang gipahinumdoman ang hari nga ang iyang amahan, si Haring Josias, maluloton ug mahinatagon kaayo sa mga mamumuo ug sa mga kabos. Gilabanan pa gani ni Josias ang ilang mga kaso sa hukmanan. Sa pagpahinumdom kang Jehoiakim sa kaayo ni Josias alang sa mga kabos, si Jehova nangutana: “Dili ba kadto maoy pag-ila kanako?”—Basaha ang Jeremias 22:15, 16.

 4. Nganong ang pagkaila kang Jehova hinungdanon alang kanimo?

⁴ Samtang nagkagrabe ang kahimtang sa kalibotan ni Satanas, gikinahanglan nato ang tabang ug panalipod nga ihatag ni Jehova alang niadtong nakaila kaayo niya. Busa, paningkamotan nato nga mas masuod pa sa Diyos. Kinahanglan usab natong ipabanaag ang iyang maayong mga hiyas aron magmalamposon sa pagsangyaw sa maayong balita. Apan, ikaw tingali mangutana, ‘Sa unsang paagi ang usa ka Kristohanon makaila kang Jehova sama kang Haring Josias?’

5, 6. (a) Sa unsang paagi maimpluwensiyahan sa usa ka maayong amahan ang iyang mga anak? (b) Sukwahi sa sanong ni Jehoiakim, unsa ang angay natong sanong sa pagkaila kang Jehova?

⁵ Hunahunaa kon sa unsang mga paagi ang usa ka maayong amahan makaimpluwensiya sa kinabuhi sa iyang mga anak. Pananglitan, kon ilang makita nga ang ilang amahan manggihatagon sa mga kabos, sila usab lagmit mosundog niana. Kon makita nila nga ang ilang amahan nagmahal ug nagtahod sa ilang inahan, lagmit makatabang kini kanila nga mahimong masinabtanon sa ilang kaatbang nga sekso. Sa dihang ilang makita nga ang ilang amahan matinud-anon maylabot sa panalapi, sila usab maaghat nga mahimong matinud-anon. Oo, kon ilang masinati ang mga paagi ug mga hiyas sa ilang amahan, kini nga mga batan-on lagmit managko nga mosundog kon giunsa sa ilang amahan pagpakiglabot sa uban.

⁶ Sa samang paagi, ang usa ka Kristohanon nga nakaila kang Jehova sama kang Josias dili lamang kay yanong moila Kaniya ingong Supremong Magmamando. Pinaagi sa pagbasa sa Bibliya, ang Kristohanon mahibalo kon sa unsang paagi ang Diyos nakiglabot sa uban, ug buot niyang sundogon ang iyang langitnong Amahan. Ang iyang gugma kang Jehova magkalalom samtang palandongon niya sa matag adlaw ang mga gusto ug dili gusto sa Diyos. Sa kasukwahi, ang usa ka tawo nga nagsalikway sa mga balaod ug mga pahinumdom sa Diyos, nga sa ingon nagsalikway sa pagtultol sa Diyos diha sa iyang kinabuhi, wala makaila sa matuod nga Diyos. Siya nahisama kang Jehoiakim nga nag-itsa sa kalayo sa pulong ni Jehova nga gisulat ni Jeremias.—Basaha ang Jeremias 36:21-24.

 7. Nganong buot kang makaila kang Jehova sama sa gihimo ni Haring Josias?

⁷ Ang kalamposan sa atong sagradong pag-alagad ug ang atong paglaom sa kinabuhi sa bag-ong kalibotan nagdepende sa atong tinuod nga pagkaila kang Jehova. (Jer. 9:24) Susihon nato ang pipila sa mga hiyas sa Diyos ingon sa atong makita diha sa mga sinulat ni Jeremias. Samtang atong himoon kini, pangitag mga paagi nga personal nimong mailhan ug masundog siya sama sa gihimo ni Haring Josias.

 8. Unsa ang mahigugmaong-kalulot?

⁸ Diha sa daghang pinulongan, walay katumbas nga ekspresyon nga nagpalutaw sa bug-os nga diwa sa usa sa mga hiyas sa Diyos nga nailhang mahigugmaong-kalulot, o maunongong gugma. Sumala sa usa ka diksiyonaryo sa Bibliya, ang diwa sa Hebreohanong termino niini maoy kombinasyon sa kusog, pagkadili-matarog, ug gugma. Ang maong diksiyonaryo nagpadayon sa pag-ingon: “Kon wala kining tulo, dili gayod matumbok ang tinuod nga kahulogan niining pulonga.” Busa ang usa nga nagpakitag mahigugmaong-kalulot dili lang kay basta usa ka maayong tawo. Uban ang dulot nga kahingawa, siya maningkamot kutob sa iyang mahimo nga matagan-an ang uban sa ilang panginahanglan, ilabina sa ilang espirituwal nga mga panginahanglan. Ang pangunang hinungdan sa iyang pagsakripisyo sa kaugalingon mao ang iyang tinguha sa pagpahimuot sa Diyos nga Labing Gamhanan.

 9. Unsa ang gipamatud-an sa pagpakiglabot ni Jehova sa Israel?

⁹ Ang labing maayong paagi nga masabtan ang ekspresyon sa Bibliya nga “mahigugmaong-kalulot” mao ang pagtuon kon sa unsang paagi nakiglabot ang Diyos sa iyang tinuod nga mga magsisimba latas sa kasiglohan. Gipanalipdan ug gipakaon ni Jehova ang mga Israelinhon samtang sila didto sa kamingawan sulod sa 40 ka tuig. Sa Yutang Saad, ang Diyos nagtaganag mga maghuhukom aron sila mapanalipdan gikan sa ilang mga kaaway ug aron sila maagak ug balik ngadto sa matuod nga pagsimba. Tungod kay si Jehova miunong kanila sa kaharuhay ug kalisod latas sa maong kasiglohan, siya nakaingon sa nasod: “Gihigugma ko ikaw sa gugma nga hangtod sa panahong walay tino. Mao nga ako nagdani kanimo pinaagi sa mahigugmaong-kalulot.”—Jer. 31:3.b

10. Ingon sa nasinatian sa mga Hudiyo sa Babilonya, sa unsang paagi si Jehova magpakitag mahigugmaong-kalulot sa dihang siya magpatalinghog sa mga pag-ampo?

¹⁰ Sa atong adlaw, ang Diyos padayong nagpakitag mahigugmaong-kalulot sa mga paagi nga makahatag ug kaayohan sa iyang mga magsisimba. Tagda ang bahin sa pag-ampo. Si Jehova maghatag ug pagtagad sa tanang tim-os nga mga pag-ampo, apan siya maghatag ug linaing pagtagad kon ang iyang dedikadong mga alagad maoy moampo kaniya. Bisan pag sulod sa daghang katuigan kita kanunayng mag-ampo kaniya bahin sa mao rang nagpadayon nga mga problema, siya dili mawad-ag pailob kanato, ni siya mapul-an sa pagpaminaw sa atong mga pag-ampo. Kas-a, gisugo ni Jehova si Jeremias sa paghatag ug mensahe ngadto sa usa ka grupo sa mga Hudiyo nga nabihag na sa Babilonya. Sila nahimutang kapin sa 800 kilometros gikan sa templo, nga layo sa ilang pamilya ug mga higala sa Juda. Apan bisan pag sila halayo sa templo, si Jehova maminaw gihapon sa ilang mga pangamuyo ug mga pasalamat. Sa dihang imong hunahunaon ang imong tim-os nga mga pag-ampo, handurawa ang kalipay nga gibati sa mga Hudiyo sa dihang ilang nadungog ang mga pulong sa Diyos nga makita sa Jeremias 29:10-12.—Basaha.

11, 12. (a) Unsay gisaad ni Jehova sa katawhan sa Jerusalem? (b) Unsa nga tabang ang ikahatag alang niadtong nagkinahanglag disiplina?

¹¹ Makita nato ang laing ebidensiya sa mahigugmaong-kalulot ni Jehova sa iyang positibong panglantaw. Samtang nagkaduol na ang pagkalaglag sa Jerusalem ug ang mga molupyo sa siyudad nagpadayon sa ilang rebelyon, nga sa pagkatinuod pagrebelde gayod batok sa Diyos, unsa kahay dangatan nila? Mamatay ba kaha sila sa gutom o sa espada sa mga Babilonyanhon? Posible usab nga sila madestiyero sa dugayng panahon ug mangamatay sa usa ka langyawng nasod. Apan, si Jehova naghatag gihapon ug “maayong pulong” alang niadtong naghinulsol ug nagbag-o sa ilang kinabuhi. Siya nagsaad nga iyang ‘iliso ang iyang pagtagad’ ngadto kanila. Iya silang dad-on ug “balik niining dapita,” ang ilang yutang natawhan, gikan sa halayong Babilonya. (Jer. 27:22) Tungod niini, sila mopatugbaw: “Dayega ninyo si Jehova sa mga panon, kay si Jehova maayo; kay ang iyang mahigugmaong-kalulot maoy hangtod sa panahong walay tino!”—Jer. 33:10, 11.

¹² Tungod sa iyang mahigugmaong-kalulot, si Jehova maoy Tuboran sa pagdasig niadtong kinsa, sa tawhanong panglantaw, nakasinatig hilabihang kalisdanan. Adunay pipila karon nga sakop kanhi sa Kristohanong kongregasyon apan nakadawat ug gikinahanglan ug nahiangayng disiplina. Tingali nakonsensiya sila pag-ayo sa ilang sala ug nagpanuko nga makig-uban pag-usab sa katawhan sa Diyos. Gihunahuna tingali nila kon pasayloon pa ba kaha sila ug dawaton ug balik ni Jehova. Ang Labing Gamhanang Diyos adunay “maayong pulong” alang kanilang tanan. Sila mahimong malulotong tabangan aron makahimog gikinahanglang mga kausaban sa ilang panghunahuna ug panggawi. Ang atong mabasa sa nag-unang parapo mahimong ikapadapat kanila—si Jehova ‘magpasig-uli kanila sa ilang dapit’ taliwala sa iyang malipayong katawhan.—Jer. 31:18-20.

13. Nganong makadasig kanimo ang pagtabang ni Jehova kang Jeremias?

¹³ Ingong Diyos sa mahigugmaong-kalulot, si Jehova maunongon usab nga nagpaluyo sa iyang matinumanong mga alagad. Niining kataposang mga adlaw sa kalibotan ni Satanas, kita adunay katarongan nga mosalig nga si Jehova motabang ug manalipod sa tanan nga nangita pag-una sa iyang Gingharian. Hinumdomi nga panahon sa kataposang mga adlaw sa Jerusalem, si Jeremias misalig nga si Jehova magtagana kaniyag pagkaon ug panalipod. Wala gayod pasagdi sa Diyos ang manalagna. (Jer. 15:15; basaha ang Lamentaciones 3:55-57.) Kon ikaw makasinatig bisan unsang matang sa grabeng kapit-osan, makasalig ka nga si Jehova mahinumdom sa imong pagkamaunongon. Tungod sa iyang mahigugmaong-kalulot, siya nagtinguha nga tabangan ka aron dili ka “malaglag.”—Lam. 3:22.

14. Unsa nga mga inhustisya ang imong nakita sa dili pa dugay?

¹⁴ Ang pipila ka tawo nabilanggo sa daghang katuigan tungod sa salaod nga wala nila buhata. May mga kaso gani nga sentensiyahan sa korte ug kamatayon ang usa ka tawo ug human lamang sa pagpatay kaniya nga milutaw ang mga ebidensiya nga siya wala diay sala. Tungod kay wala na gayoy pagkaon, ang mga ginikanan sa ubang mga nasod nagbaligya sa ilang mga anak ingong mga ulipon aron ang ilang pamilya makakaon. Unsay imong bation kon imong madunggan ang maong inhustisya karong adlawa? Sa imong hunahuna, unsa kahay gibati ni Jehova? Tin-awng gibutyag sa Bibliya nga buot niyang hanawon ang tanang hinungdan sa pag-antos. Siya lamang ang Usa nga bugtong makahimo niana. Busa, ang mga kabos ug mga inosente nga nag-antos karong adlawa madasig gayod niini. Si Jehova, ang Diyos sa hustisya, molihok aron sa pagluwas kanila gikan sa ilang presenteng kalisdanan.—Jer. 23:5, 6.

15, 16. (a) Unsa ang gipasiugda ni Jeremias bahin kang Jehova? (b) Nganong ikaw makasalig sa mga balaod sa Diyos ug sa iyang mga saad?

¹⁵ Sa panahon ni Jeremias, ang pipila nasayod sa talagsaong hiyas sa Diyos nga hustisya. Pananglitan, gihisgotan sa manalagna nga ang Israel tingali maghinulsol sa ilang mga sala ug, ingong pamatuod nga nagbag-o ang ilang kasingkasing, sila daw samag moingon: “Ingon nga si Jehova buhi sa kamatuoran, sa hustisya ug sa pagkamatarong!” (Jer. 4:1, 2) Tinuod kana tungod kay walay luna ang inhustisya sa katuyoan ni Jehova. Apan aduna pay laing mga pamatuod nga si Jehova mahigugmaon sa hustisya.

¹⁶ Tumanon gayod sa Diyos ang iyang pulong ug siya dili salingkapaw. Bisan tuod lapason sa daghang tawo ang ilang mga saad ngadto sa uban, si Jehova dili ingon niana. Gani ang mga balaod sa kinaiyahan, nga iyang gihimo ug naghatag kanatog kaayohan, dili mahimong lapason. (Jer. 31:35, 36) Kita usab makasalig sa iyang mga saad ug hudisyal nga mga hukom, kay kini kanunayng makaayo.—Basaha ang Lamentaciones 3:37-38.

17. (a) Unsay himoon ni Jehova sa dihang maghukom? (b) Nganong makasalig ka sa pagdumala sa mga ansiyano sa mga problema sa kongregasyon? (Tan-awa ang kahon nga “Sila Mohukom Alang Kang Jehova” sa panid 148.)

¹⁷ Sa dihang mohukom, si Jehova dili gayod kontento kon unsa lamay dayag nga makita. Siya magatan-aw sa mga butang nga dili makita sa tawo ug magasusi sa tanang detalye. Tinoon usab niya ang mga motibo niadtong mga nalangkit. Ang mga doktor karon makagamit ug espesyal nga mga aparato ug pamaagi aron makita ang kasingkasing sa pasyente samtang kini nagabomba, busa masayran nila ang kahimtang niini. O kaha ilang masusi ang mga rinyon nga mao ang nagasala sa dugo. Labaw pa gayod niana ang mahimo ni Jehova. Siya magasusi sa mahulagwayong kasingkasing ug magatino sa mga motibo sa usa ka tawo ug sa mahulagwayong mga rinyon, nga nagpabanaag sa kinailadmang mga pagbati sa usa ka tawo. Busa iyang matino kon nganong ang usa ka tawo milihok sa ingon ug kon unsay iyang panglantaw sa iyang mga gihimo. Ug ang Labing Gamhanan dili malibog sa kadaghan sa mga detalye nga iyang makita sa dihang gihimo ang maong pag-usisa. Labaw pa kay sa labing makinaadmanon nga tawhanong maghuhukom, Iyang gamiton sa tukma ug timbang nga paagi kining tanan nga impormasyon aron matino ang atong kaugmaon.—Basaha ang Jeremias 12:1a; 20:12.

18, 19. Sa unsang paagi ang pagkahibalo sa hiyas sa Diyos nga hustisya makaapektar kanato?

¹⁸ Busa ikaw adunay lig-ong pasukaranan sa pagsalig kang Jehova, bisan pag usahay imong bation ang pagtulisok sa tanlag tungod sa nangaging kasaypanan. Hinumdomi nga si Jehova dili kay usa ka walay kasingkasing nga abogado nga nangitag sayop aron ang usa masilotan, hinunoa, siya usa ka maluluy-ong Maghuhukom nga buot motabang. Kon ikaw wala mahimutang tungod sa imong gihimo sa nangagi o may problema ka sa laing tawo, hangyoa si Jehova nga maoy modala sa imong “mga pagpakigsangka,” o mga pakigbisog sa emosyon, aron imo kining malimtan.c Pinaagi sa iyang tabang, imong makita nga gipabilhan pag-ayo sa Diyos ang imong padayong pagpakigbahin sa sagradong pag-alagad.—Basaha ang Lamentaciones 3:58, 59.

¹⁹ Dayag, ang Diyos sa hingpit nga hustisya nagtinguha nga kadtong nangita sa iyang pag-uyon magpakita usab ug hustisya. (Jer. 7:5-7; 22:3) Ang pagsangyaw sa maayong balita nga walay pagpihig maoy usa ka hinungdanong paagi sa pagpakita sa hustisya sa Diyos. Kon ikaw makugihong magbalikduaw ug magdumalag mga pagtuon sa Bibliya, imong gipakita ang hataas nga sukdanan sa Diyos sa hustisya diha sa mapuslanon gayod nga paagi. Nganong ingon man niana? Siya nagtinguha nga ang tanang matang sa tawo makakat-on bahin kaniya ug maluwas. (Lam. 3:25, 26) Pagkadako sa imong pribilehiyo ingong isigkamagbubuhat sa Diyos, kay pinaagi niini ikaw nagpabanaag sa iyang hustisya diha sa maong buluhaton nga makaluwas ug kinabuhi!

20. (a) Unsang bahina sa paagi sa Diyos sa pagpakiglabot sa katawhan ang gipasiugda ni Jeremias? (b) Unsay kalangkitan sa ‘pagbasol’ sa pagpasaylo ni Jehova? (Tan-awa ang kahon nga “Sa Unsang Paagi si Jehova ‘Nagbasol’?”)

²⁰ Giisip sa daghan ang mga basahong Jeremias ug Lamentaciones ingong mga mensahe lamang sa pagkondenar sa pagkadaotan. Ang maong panglantaw wala magtagad sa makapadasig nga mga awhag ni Jehova sa pagpasaylo sa iyang katawhan ingon sa narekord niini nga mga basahon. Siya nag-awhag sa mga Hudiyo: “Biya kamo, palihog, ang matag usa gikan sa iyang daotang dalan, ug himoang maayo ang inyong mga dalan ug ang inyong mga pakiglabot.” Sa laing higayon si Jeremias nagtambag kanila: “Himoa nga maayo ang inyong mga dalan ug ang inyong mga pakiglabot, ug sunda ang tingog ni Jehova nga inyong Diyos, ug pagabasolan ni Jehova ang katalagman nga iyang gisulti batok kaninyo.” (Jer. 18:11; 26:13) Sa atong adlaw, si Jehova padayong mopasaylo sa tanang tim-os nga magbasol ug mohunong sa daotang mga binuhatan.

21. Unsay buot ni Jehova nga mahitabo kon iyang pasayloon ang usa ka tawo?

²¹ Apan, dili lang kay ipamulong ni Jehova ang pagpasaylo. Siya molihok uyon niana. Gigamit ni Jehova si Jeremias sa pagtambag: “Balik, Oh masukihong Israel . . . Dili ako mosulinga sa kasuko nganha kaninyo . . . Dili ako magmayugtanon hangtod sa panahong walay tino.” (Jer. 3:12) Ang Diyos dili maghambin ug kasuko o kahiubos ngadto kang bisan kinsa sa iyang katawhan nga iya nang gipasaylo. Hinunoa, bisan tuod ang usa nakahimog sayop, buot gihapon ni Jehova nga mapasig-uli ang nadaot nga relasyon. Bisan pa sa mga sala nga nahimo sa usa ka tawo, kon ang maong makasasala tinuod nga maghinulsol ug mangayog pasaylo sa Diyos, ‘ihatag ug balik’ ni Jehova ang Iyang pabor ug panalangin kaniya. (Jer. 15:19) Kanang maong pasalig angayng magdasig kang bisan kinsa nga nahimulag sa matuod nga Diyos nga mobalik kaniya. Dili ka ba mouyon nga madani kita sa pagpakigsuod kang Jehova tungod sa iyang pagpasaylo?—Basaha ang Lamentaciones 5:21.

22, 23. Sa dihang sundogon nimo si Jehova maylabot sa pagpasaylo, unsay angay nimong tumong?

²² Kon may makapahiubos kanimo tungod sa iyang wala-hunahunaang mga pulong ug buhat, sundogon mo ba si Jehova? Maylabot sa karaang mga Hudiyo, ang Diyos miingon nga iyang “lunsayon” kadtong iyang gipasaylo. (Basaha ang Jeremias 33:8.) Siya makahimo sa paglunsay, o paghinlo sa kasaypanan sa mga mahinulsolon, sa diwa nga dili na niya kini hinumdoman pa. Siya maghatag sa usa ug kahigayonan nga makasugod na usab sa pag-alagad Kaniya. Hinuon, wala kini magkahulogan nga kon ang usa ka tawo gipasaylo na sa Diyos siya nalunsay na gikan sa napanunod nga pagkadili-hingpit, ug busa siya karon hingpit na ug walay sala. Apan, adunay leksiyon alang kanato sa giingon sa Diyos bahin sa paglunsay sa mga tawo. Mahimong maningkamot kita nga kalimtan ang kasaypanan o sala sa laing tawo, nga sa mahulagwayong paagi daw gilunsay ang atong panglantaw sa maong tawo diha sa atong kasingkasing. Sa unsang paagi?

²³ Handurawa nga ikaw nakadawat ug usa ka kabilin nga antik nga plato o plorera ingong gasa. Kon kini nahugawan o namansahan, imo ba dayon kining ilabay? Lagmit dili gayod. Tingali maningkamot ka nga hinloan kini pag-ayo, nga magtangtang sa bisan unsang lamalama o buling ug kaha kuhaon ang mansa. Buot nimong makita ang kanindot niini, ilabina sa dihang kini madan-agan sa kahayag sa adlaw. Sa samang paagi, mahimo nimong paningkamotan nga mawala ang imong gihambin nga kaaligutgot o kalagot sa usa ka igsoon nga nakasala kanimo. Ayaw pagpunayg hunahuna sa iyang makapasakit nga mga pulong o buhat. Sa dihang molampos ka sa paghikalimot niini, imong gilunsay diha sa imong kasingkasing ang larawan ug mga handomanan sa tawo nga imong gipasaylo. Sanglit nahinloan na man ang imong kasingkasing sa negatibong mga hunahuna batok sa maong tawo, dili ka na magpanuko nga ibalik ang inyong suod nga panaghigalaay nga daw nahanaw na sa bug-os.

24, 25. Unsa nga mga kaayohan ang imong mabatonan kon sama kang Haring Josias imong mailhan si Jehova?

²⁴ Atong nakat-onan ang pipila lang sa mga hiyas ug pakiglabot ni Jehova samtang kita mas nakaila kaniya. Atong makita nga tungod sa mga kaayohan nga atong mabatonan sa suod nga pagkaila kang Jehova kita mapalihok gayod sa pagsimba kaniya sa dalawatong paagi. Kon kita suod nga makaila kang Jehova sama kang Haring Josias, ang atong kinabuhi matugob sa kalipay, nga maoy lain pang bahin sa hiyas sa Diyos.

²⁵ Kon kita makaila pag-ayo kang Jehova, mouswag ang atong relasyon sa uban. Pinaagi sa atong pagpaningkamot nga ipakita ang mahigugmaong-kalulot, hustisya, ug pagpasaylo sama sa gipakita ni Jehova, molalom ug mahimong mas bililhon ang atong panaghigalaay diha sa Kristohanong kongregasyon. Dugang pa, kita mahimong mas takos sa pagpanudlo samtang kita maghimog mga pagbalikduaw sa atong teritoryo ug magdumalag mauswagong panagtuon sa Bibliya. Ang mga interesado mas madani sa Kristohanong pagkinabuhi nga ilang makita diha kanato. Busa, kita mas masangkapan sa pagtabang kanila aron sila mosimba kang Jehova sa dalawatong paagi ug mosubay sa “maayong dalan.”—Jer. 6:16.