Magtukaw, Sama Kang Jeremias
“Ako [si Jehova] nagpabiling nagmata mahitungod sa akong pulong aron tumanon kini.”—JER. 1:12.
1, 2. Nganong ang ‘pagpabiling nagmata’ ni Jehova gilangkit sa kahoyng almendras?
SA KABUNGTORAN sa Lebanon ug Israel, ang usa sa mga kahoy nga unang mamulak mao ang almendras. Ang nindot nga pink o puti nga mga bulak niini mobuswak sa hinapos sa Enero o sayo sa Pebrero. Ang Hebreohanong ngalan niini nagkahulogang “usa nga nahigmata.”
2 Sa dihang gitudlo ni Jehova si Jeremias ingong propeta, ang kinaiya sa kahoyng almendras haom nga gigamit sa pag-ilustrar sa usa ka hinungdanong kahimtang. Sa sinugdan sa iyang ministeryo, ang propeta gipakitaag panan-awon sa usa ka salingsing sa maong kahoy. Unsay ipasabot niana? Si Jehova misaysay: “Ako nagpabiling nagmata mahitungod sa akong pulong aron tumanon kini.” (Jer. 1:11, 12) Ingon sa kahoyng almendras nga sayong ‘nahigmata,’ si Jehova usab masambingayong “mibangon ug sayo” sa pagpadala sa iyang mga propeta aron pasidan-an ang iyang katawhan sa sangpotanan sa ilang pagkamasinupakon. (Jer. 7:25) Ug siya wala mopahulay—siya “nagpabiling nagmata”—hangtod natuman ang iyang tagna. Sa 607 W.K.P., sa iyang tinudlong panahon, ang paghukom ni Jehova midangat sa apostatang nasod sa Juda.
3. Unsay atong matino bahin kang Jehova?
3 Sa susama, si Jehova karon nagmata, nga matinagdanon sa pagtuman sa iyang kabubut-on. Imposible nga dili niya tumanon ang iyang pulong. Unsay epekto kanimo sa pagkamatinagdanon ni Jehova? Nagtuo ka ba nga niining tuiga, 2011, si Jehova “nagmata” alang sa katumanan sa iyang mga saad? Kon nagduhaduha kita sa kasaligang mga saad sa Diyos, panahon na karon nga momata kita gikan sa espirituwal nga pagduka. (Roma 13:11) Ingong propeta sa Diyos, si Jeremias nagpabiling nagmata o nagtukaw. Ang pagsusi kon sa unsang paagi ug nganong si Jeremias nagtukaw sa buluhatong gihatag sa Diyos makatabang nato sa paglahutay sa buluhaton nga gisugo ni Jehova kanato.
Usa ka Dinaliang Mensahe
4. Unsang mga suliran ang giatubang ni Jeremias sa pagpahayag sa iyang mensahe, ug nganong dinalian kadto?
4 Si Jeremias lagmit mga 25 anyos sa dihang gitudlo siya ni Jehova ingong tigbantay. (Jer. 1:1, 2) Apan iyang gibati nga siya bata lang, nga dili takos mosulti sa may awtoridad ug tigulang nang mga ansiyano sa nasod. (Jer. 1:6) Ipahayag niya ang sakit nga mga pagsaway ug makahahadlok nga paghukom ngadto sa mga saserdote, bakak nga mga propeta, ug mga magmamando, ingon man niadtong nagsubay sa “dalan nga gidawat sa kadaghanan” ug nakaugmad sa “mapinadayonong pagkadili-matinumanon.” (Jer. 6:13; 8:5, 6) Ang matahom nga templo ni Haring Solomon, nga maoy sentro sa matuod nga pagsimba sa halos upat ka siglo, pagalaglagon. Maawaaw ang Jerusalem ug Juda, ug bihagon ang mga molupyo niini. Tin-aw nga dinalian ang mensahe nga ipahayag ni Jeremias!
5, 6. (a) Sa unsang paagi gigamit ni Jehova ang Jeremias nga matang karon? (b) Unsay pangunang hisgotan niining artikuloha?
5 Sa modernong panahon, si Jehova mahigugmaong nagtaganag usa ka grupo sa dinihogang mga Kristohanon ingong simbolikong tigbantay aron pasidan-an ang katawhan sa iyang paghukom. Latas sa daghang dekada, ang Jeremias nga matang nag-awhag sa katawhan nga magtukaw. (Jer. 6:17) Ang Bibliya nagpasiugda nga si Jehova, ang Dakong Tigbantay sa Oras, dili langayan. Ang iyang adlaw moabot sa untop nga panahon, sa takna nga wala damha.—Sof. 3:8; Mar. 13:33; 2 Ped. 3:9, 10.
6 Hinumdomi nga si Jehova nagtukaw ug nga siya magpatungha sa iyang matarong nga bag-ong kalibotan sa untop nga panahon. Kini angayng magdasig sa Jeremias nga matang ug sa ilang dedikadong mga kauban sa pagtukaw sa pagkadinalian sa ilang mensahe. Sa unsang paagi kana mag-apektar kanimo? Gipakita ni Jesus nga ang tanang tawo kinahanglang modesisyon kon sila ba modapig sa Gingharian sa Diyos. Atong susihon ang tulo ka hiyas nga nakatabang kang Jeremias sa pagtukaw sa iyang buluhaton ug nga makatabang usab kanato.
Gugma sa Katawhan
7. Ipatin-aw kon sa unsang paagi ang gugma nagtukmod kang Jeremias sa pagsangyaw bisan sa lisod nga mga kahimtang.
7 Unsay nagtukmod kang Jeremias sa pagsangyaw bisan sa lisod nga mga kahimtang? Siya may gugma sa katawhan. Si Jeremias nahibalo nga ang bakak nga mga magbalantay maoy hinungdan sa kadaghanang problema. (Jer. 23:1, 2) Kana nakatabang kaniya sa pagsangyaw uban ang gugma ug kaluoy. Buot niya nga ang iyang mga katagilungsod makadungog sa pulong sa Diyos ug maluwas. Siya nasubo pag-ayo nga siya mihilak tungod sa katalagman nga mahitabo kanila. (Basaha ang Jeremias 8:21; 9:1.) Ang basahon sa Lamentaciones tin-awng nagpadayag sa dakong gugma ni Jeremias ug kabalaka alang sa ngalan ug katawhan ni Jehova. (Lam. 4:6, 9) Sa dihang makakita ka karon ug mga tawong “pinanitan ug nagkatibuagsa sama sa mga karnero nga walay magbalantay,” dili ka ba matukmod sa pagpaambit kanila sa makapahupayng mensahe sa Gingharian sa Diyos?—Mat. 9:36.
8. Unsay nagpakita nga bisan pa sa pagdagmal, si Jeremias wala mayugot?
8 Bisag si Jeremias gidagmalan sa mga tawo nga gusto niyang tabangan, siya wala mobalos o mayugot. Siya taas ug pailob ug nagmaluloton, bisan sa daotang Haring Zedekias! Human siya itugyan ni Zedekias aron patyon, si Jeremias mihangyo pa kaniya nga sundon ang tingog ni Jehova. (Jer. 38:4, 5, 19, 20) Ang ato bang gugma sama ka kusganon sa iya ni Jeremias?
Kaisog nga Gihatag sa Diyos
9. Nganong nahibalo kita nga ang kaisog ni Jeremias naggikan sa Diyos?
9 Sa dihang si Jehova unang nakigsulti kang Jeremias, siya mibalibad. Atong makita gikan niini nga siya dili kinaiyanhong maisogon ug determinado. Ang talagsaong kaisog nga gipakita ni Jeremias panahon sa iyang pagpanagna naggikan sa iyang bug-os nga pagsalig sa Diyos. Sa pagkatinuod, si Jehova nag-uban sa propeta “sama sa usa nga makalilisang ang pagkagamhanan” sa pagkaagi nga siya nagsuportar kang Jeremias ug naghatag kaniyag kusog sa pagtuman sa iyang buluhaton. (Jer. 20:11) Si Jeremias nabantog sa iyang pagkamaisogon, nga panahon sa ministeryo ni Jesus sa yuta, nasaypan sa pipila nga si Jesus mao ang nabanhawng si Jeremias!—Mat. 16:13, 14.
10. Nganong ikaingon nga ang dinihogang nahibilin gitudlo “[ibabaw] sa kanasoran ug sa mga gingharian”?
10 Ingong “Hari sa kanasoran,” si Jehova nagsugo kang Jeremias sa pagpahayag ug mensahe sa paghukom ngadto sa mga nasod ug mga gingharian. (Jer. 10:6, 7) Apan sa unsang diwa ang dinihogang nahibilin gitudlo “[ibabaw] sa kanasoran ug sa mga gingharian”? (Jer. 1:10) Sama sa propeta sa karaang panahon, ang Jeremias nga matang gihatagan sa Soberano sa uniberso ug buluhaton. Busa ang dinihogang mga alagad sa Diyos awtorisado nga ipahayag ang mga paghukom batok sa kanasoran ug mga gingharian sa tibuok kalibotan. Kay gihatagag awtoridad sa Labing Hataas nga Diyos ug naggamit sa tin-awng mensahe sa iyang Pulong, ang Jeremias nga matang nagpahayag nga ang kanasoran ug mga gingharian karon pagalukahon ug pagalaglagon sumala sa paagi sa Diyos ug sa iyang gitakdang panahon. (Jer. 18:7-10; Pin. 11:18) Ang Jeremias nga matang determinadong mopadayon sa hinatag-sa-Diyos nga buluhaton nga ipahayag sa tibuok yuta ang mensahe sa paghukom ni Jehova.
11. Unsay makatabang kanato nga mopadayon sa pagsangyaw bisan sa lisod nga mga kahimtang?
11 Dili ikatingala nga kita mahigawad usahay tungod sa pagsupak, kawalay-pagtagad, o lisod nga mga kahimtang. (2 Cor. 1:8) Apan sama kang Jeremias, kita magmalahutayon ug dili angayng mahigawad. Hinaot ang matag usa kanato padayong mangaliyupo sa Diyos, mosalig kaniya, ug ‘magbaton ug kaisog’ kay siya ang atong dangpanan. (1 Tes. 2:2) Ingong matuod nga mga magsisimba, kinahanglang magtukaw kita sa mga responsabilidad nga gihatag sa Diyos kanato. Kinahanglang mopadayon kita sa pagsangyaw bahin sa kalaglagan sa Kakristiyanohan, nga gihulagwayan sa dili-matinumanong Jerusalem. Ang Jeremias nga matang dili lamang magpahayag “sa tuig sa maayong kabubut-on sa bahin ni Jehova” kondili lakip usab “sa adlaw sa panimalos sa bahin sa atong Diyos.”—Isa. 61:1, 2; 2 Cor. 6:2.
Dulot nga Kalipay
12. Nganong makahinapos kita nga nahuptan ni Jeremias ang iyang kalipay, ug unsay pangunang hinungdan niana?
12 Si Jeremias nalipay sa iyang buluhaton. Siya miingon kang Jehova: “Ang imong mga pulong nakaplagan, ug akong gikaon kini; ug kanako ang imong pulong nahimong kasadya ug pagmaya sa akong kasingkasing; kay ako gitawag sa imong ngalan, Oh Jehova.” (Jer. 15:16) Para kang Jeremias, usa ka pribilehiyo ang paghawas sa matuod nga Diyos ug pagsangyaw sa iyang pulong. Matikdi nga sa dihang naghunahuna si Jeremias bahin sa pagbiaybiay sa mga tawo kaniya, siya nawad-ag kalipay. Apan sa dihang gisentro niya ang iyang pagtagad sa katahom ug kahinungdanon sa iyang mensahe, nahibalik ang iyang kalipay.—Jer. 20:8, 9.
13. Nganong hinungdanon ang pagtuon sa laglom nga kamatuoran aron mahuptan ang kalipay?
13 Aron mahuptan ang kalipay sa buluhatong pagsangyaw, kita nagkinahanglag “gahi nga pagkaon,” ang laglom nga kamatuoran sa Pulong sa Diyos. (Heb. 5:14) Ang pagtuon sa laglom nga kamatuoran makapalig-on sa pagtuo. (Col. 2:6, 7) Kini magsilsil diha sa atong hunahuna nga ang atong binuhatan makapatandog sa kasingkasing ni Jehova. Kon nalisdan kita sa paggahig panahon sa pagbasa ug pagtuon sa Bibliya, angay natong susihon pag-usab ang atong eskedyul. Bisan ang pipila ka minutong pagtuon ug pagpamalandong kada adlaw makapasuod nato kang Jehova ug makadugang sa ‘kasadya ug pagmaya sa kasingkasing,’ sama sa kahimtang ni Jeremias.
14, 15. (a) Unsa ang resulta sa pagtuman ni Jeremias sa iyang buluhaton? (b) Unsay nasabtan sa katawhan sa Diyos karon bahin sa buluhatong pagsangyaw?
14 Si Jeremias nagpahayag sa mga pasidaan ug mensahe sa paghukom ni Jehova nga walay hunong, apan sa samang higayon wala siya malimot sa iyang buluhaton “sa pagtukod ug sa pagtanom.” (Jer. 1:10) Namunga ang iyang buluhaton. May pipila ka Hudiyo ug dili-Israelinhon nga naluwas sa pagkalaglag sa Jerusalem sa 607 W.K.P. Lakip kanila ang mga Rekabihanon, si Ebed-melek, ug Baruk. (Jer. 35:19; 39:15-18; 43:5-7) Kining maunongon ug mahadlokon-sa-Diyos nga mga higala ni Jeremias naghulagway niadtong may yutan-ong paglaom karon nga nakighigala sa Jeremias nga matang. Ang Jeremias nga matang malipay gayod sa pagpalig-on sa pagtuo sa “dakong panon.” (Pin. 7:9) Sa susama, kining maunongong mga kauban sa mga dinihogan malipay sa pagtabang sa mga tawong matinud-anog kasingkasing nga makakat-on sa kamatuoran.
15 Nasabtan sa katawhan sa Diyos nga ang pagsangyaw sa maayong balita dili lamang publikong pag-alagad kondili pagsimba usab sa Diyos. May mamati man o wala, ang atong pagsangyaw maoy sagradong pag-alagad kang Jehova ug kana makahatag kanatog dakong kalipay.—Sal. 71:23; basaha ang Roma 1:9.
Pagtukaw sa Inyong Buluhaton!
16, 17. Sa unsang paagi ang Pinadayag 17:10 ug Habacuc 2:3 nagpakita sa pagkadinalian sa atong panahon?
16 Ang pagkadinalian sa atong panahon mapasiugda kon atong tagdon ang inspiradong tagna sa Pinadayag 17:10. Ang ikapitong hari, ang Anglo-Amerikanong Gahom sa Kalibotan, naglungtad na. Bahin niini atong mabasa: “Sa mahiabot na siya [ang ikapitong gahom sa kalibotan] magpabilin siya sulod sa mubo nga panahon.” Sa pagkakaron ang “mubo nga panahon” duol nang matapos. Si propeta Habacuc nagpasalig kanato bahin sa kataposan niining daotang sistema: “Ang panan-awon alang pa sa tinudlong panahon . . . Padayon sa pagpaabot niini; kay kini matuman gayod. Kini dili maulahi.”—Hab. 2:3.
17 Pangutan-a ang kaugalingon: ‘Gipasundayag ba sa akong pagkinabuhi ang pagkadinalian sa atong panahon? Kini ba nagpakita nga ako nagtuo nga duol na ang kataposan? O ang ako bang mga desisyon ug prioridad nagpaila nga ang kataposan morag layo pa o nagduhaduha pa gani ko kon moabot ba kini?’
18, 19. Nganong dili karon ang panahon sa paghinayhinay?
18 Ang buluhaton sa tigbantay nga matang wala pa matapos. (Basaha ang Jeremias 1:17-19.) Pagkamakalilipay nga ang dinihogang nahibilin lig-ong nagbarog, samag “haliging puthaw” ug “siyudad nga kinutaan”! Ang ilang ‘mga hawak binaksan sa kamatuoran’ sa pagkaagi nga ilang gitugotan nga ang Pulong sa Diyos maglig-on kanila hangtod matapos ang ilang buluhaton. (Efe. 6:14) Uban ang susamang determinasyon, ang dakong panon aktibong nagpaluyo sa Jeremias nga matang sa pagtuman sa buluhatong gihatag sa Diyos.
19 Karon dili ang panahon sa paghinayhinay sa buluhaton sa Gingharian kondili sa pagtagad nga seryoso sa kahulogan sa Jeremias 12:5. (Basaha.) Kitang tanan nagsagubang ug mga pagsulay nga kinahanglang antoson. Ang maong mga pagsulay ikatandi sa mga maglulumba nga batok kanila kita makigtigi. Apan, samtang nagsingabot ang “dakong kasakitan,” mograbe usab ang kalisdanan. (Mat. 24:21) Ang pagpakigbisog sa mas lisod pang mga suliran sa umaabot ikatandi sa “pagpakiglumba sa mga kabayo.” Nagkinahanglan kanag talagsaong katakos sa paglahutay aron ang tawo makaapas sa nagdagan nga mga kabayo. Busa ang pag-agwanta sa mga pagsulay karon makatabang kanato sa paglahutay sa umaabot nga mga pagsulay.
20. Unsay determinado nimong buhaton?
20 Kitang tanan makasundog kang Jeremias ug malamposong makatuman sa atong buluhatong pagsangyaw! Ang gugma, kaisog, ug kalipay nakatabang kang Jeremias nga magmatinumanon sa iyang 67 ka tuig nga ministeryo. Ang matahom nga bulak sa almendras magpahinumdom kanato nga si Jehova ‘magpabiling nagmata’ o magtukaw bahin sa iyang pulong aron sa pagtuman niini. Nan, may katarongan usab kita sa pagtukaw. Si Jeremias nagtukaw, ug busa kita makahimo niana.
Nahinumdom Ka Ba?
• Sa unsang paagi ang gugma nagtabang kang Jeremias sa pagtukaw sa iyang buluhaton?
• Nganong nagkinahanglan kitag kaisog gikan sa Diyos?
• Unsay nakatabang kang Jeremias nga mahuptan ang kalipay?
• Nganong buot nimong magtukaw?
[Mga hulagway sa panid 31]
Mopadayon ka ba sa pagsangyaw bisan sa pagsupak?