SESAK

Lagmit usa ka simbolikong ngalan sa Babilonya. (Jer 25:26; 51:41) May nag-ingon nga ang Sesak nagkahulogang “May Ganghaan nga Tumbaga,” ug kini mohaom sa Babilonya. Giingon usab sa uban nga ang “Sesak” naghawas sa SiskuKI sa usa ka karaang Babilonyanhon nga harianong talaan. Ang Sisku o Siska lagmit maoy usa ka distrito sa karaang Babilonya. Apan ang Hudiyohanong tradisyon nag-ingon nga ang Sesak maoy takoban sa Hebreohanong ngalan nga Babel (o, Babilonya), pinaagi sa usa ka sistema nga gitawag ug athbash. Sumala niini nga sistema sa pagtakoban sa ngalan, ang kinaulahiang letra sa Hebreohanong alpabeto (taw) diha sa tinuod nga ngalan pulihan sa unang letra (ʼaʹleph), ug ang ikaduha-sa-kinaulahiang letra (shin) pulihan sa ikaduhang letra (behth), ug uban pa. Tungod niini, ang matag letrang behth (b) sa ngalang “Babel” ilisdan ug shin (sh), ug ang laʹmedh (l) ilisdan ug kaph (kh), busa mahimo kining She·shakhʹ. Ang ngalang Sesak mahimong magpasabot usab ug kaulawan, nga nahiangay sa Babilonya.​—Jer 25:​26, ftn sa Rbi8; Soncino Books of the Bible, giedit ni A. Cohen, London, 1949.