Pakiglalis ni Jehova Batok sa mga Nasod
“Ang usa ka dinahunog modangat gayod ngadto sa kinalay-ang bahin sa yuta, kay si Jehova adunay pakiglalis batok sa mga nasod.”—JEREMIAS 25:31.
1, 2. (a) Unsay nahitabo sa Juda human mamatay si Haring Josias? (b) Kinsa ang kataposang hari sa Juda, ug sa unsang paagi siya nag-antos tungod sa iyang pagkadili-matinumanon?
ANG yuta sa Juda nag-atubang ug mga panahon nga lisod sagubangon. Ang usa ka maayong hari, si Josias, sa temporaryo nakapalangan sa nagdilaab nga kasuko ni Jehova. Apan unsay misunod sa dihang gipatay si Josias sa 629 W.K.P.? Ang mga hari nga misunod kaniya nagpakaulaw kang Jehova.
2 Ang kataposang hari sa Juda, si Zedekias, nga ikaupat nga anak lalaki ni Josias, nagpadayon, sumala pa sa 2 Hari 24:19, “sa pagbuhat kon unsay daotan sa mga mata ni Jehova, sumala sa tanan nga gibuhat ni Jehoiakim [iyang magulang nga lalaki].” Ang sangpotanan? Si Nabukodonosor misulong sa Jerusalem, nagdakop kang Zedekias, nagpatay sa iyang mga anak atubangan sa iyang mga mata, nagbuta kaniya, ug nagdala kaniya ngadto sa Babilonya. Gawas pa, ang mga taga-Babilonya nag-agaw sa mga panudlanan nga gigamit sa pagsimba kang Jehova, nga nagsunog sa templo ug sa siyudad. Ang mga nakalabang-buhi nahimong mga binihag sa Babilonya.
3. Unsang yugto ang nagsugod sa pagkalaglag sa Jerusalem sa 607 W.K.P., ug unsay angay mahitabo sa pagkatapos nianang yugtoa?
3 Kadtong tuiga, 607 W.K.P., nagtimaan dili lamang sa tibawas nga paglaglag sa Jerusalem kondili sa pagsugod usab sa “ang tinudlong mga panahon sa mga nasod,” nga gihisgotan sa Lucas 21:24. Kining 2,520-tuig nga yugto natapos sa atong siglo, sa tuig 1914. Ang panahon miabot na niadto aron nga si Jehova, pinaagi sa naentrono niyang Anak, si Jesu-Kristo, kinsa labaw pa kay kang Nabukodonosor, magpahayag ug magpatuman sa paghukom diha sa daotang kalibotan. Kining paghukoma nagsugod diha sa modernong-adlaw nga katumbas sa Juda, usa ka katumbas nga nangangkon nga naghawas sa Diyos ug kang Kristo sa yuta.
4. Unsang mga pangutana ang karon gipatungha maylabot sa tagna ni Jeremias?
4 Makita ba nato ang kasamahan tali sa kasamok sa kataposang mga tuig sa Juda ubos sa iyang mga hari—uban sa malaglagong mga panghitabo nga nag-apektar usab sa silingang mga nasod—ug sa kasamok sa Kakristiyanohan karong adlawa? Tinuod gayod! Nan, unsay gipaila sa tagna ni Jeremias mahitungod sa kon unsaon pagdumala ni Jehova ang kahimtang karong adlawa? Atong tan-awon.
5, 6. (a) Sukad sa 1914, sa unsang paagi ang kahimtang sa Kakristiyanohan nahisama sa iya sa Juda sa dayon nang malaglag kadto? (b) Unsang mensahe ang gidala sa modernong Jeremias ngadto sa Kakristiyanohan?
5 Ang Britanikong matematisyan ug pilosopo nga si Bertrand Russell mikomento mga 40 ka tuig kanhi: “Sukad gayod sa 1914, ang tanan nga nakaamgo sa mga kiling sa kalibotan dulot nga nabalaka sa butang nga morag destinado ug natino-daan nga pagmartsa padulong sa dako pa gayong katalagman.” Ug ang Alemang estadistang si Konrad Adenauer mipahayag: “Ang kasegurohan ug kalinaw nahanaw gikan sa kinabuhi sa mga tawo sukad sa 1914.”
6 Karong adlawa, ingon sa adlaw ni Jeremias, ang pagsingabot sa kataposan sa sistema sa mga butang gitiman-an sa pag-ula ug daghan kaayong inosenteng dugo, ilabina sa duha ka gubat sa kalibotan niining sigloha. Sa kinadak-ang bahin, kining mga gubata gibugno sa mga nasod sa Kakristiyanohan, nga nangangkon nga nagsimba sa Diyos sa Bibliya. Pagkasalingkapaw! Dili katingad-an nga gipadala ni Jehova ang iyang mga Saksi ngadto kanila, nga nag-ingon, diha sa mga pulong sa Jeremias 25:5, 6: “Talikdi ninyo, palihog, matag usa ang iyang daotang dalan ug ang pagkadaotan sa inyong mga pakiglabot . . . Ug ayaw na kamo pagsunod sa ubang mga diyos sa pag-alagad kanila ug sa pagyukbo kanila, aron kamo dili makapasuko kanako pinaagi sa buhat sa inyong mga kamot, ug aron dili ko kamo pagadaoton.”
7. Unsay ebidensiya nga ang Kakristiyanohan wala magtagad sa mga pasidaan ni Jehova?
7 Bisan pa niana, ang mga nasod sa Kakristiyanohan napakyas sa pagtalikod. Kini napasundayag diha sa paghimo nilag dugang mga paghalad ngadto sa diyos sa gubat sa Korea ug sa Vietnam. Ug sila nagpadayon sa pagsuportar sa panalapi sa mga negosyante sa kamatayon, ang mga tiggamag armas. Ang kayutaan sa Kakristiyanohan mitagana sa mas dakong bahin nga halos usa ka trilyong dolyares nga gigasto sa armas matag tuig sulod sa katuigang 1980. Kada tuig gikan sa 1951 ngadto sa 1991, ang gasto sa militaryo sa Tinipong Bansa lamang milabaw sa limpiyong ganansiya sa tanang giipong Amerikanhong korporasyon. Sukad sa kusog nga giproklamar nga kataposan sa Bugnawng Gubat, may mga pagkunhod diha sa karaang nukleyar nga armas, apan ang labi pa ka dagkong pondo sa ubang makapatayng armas nagpabilin ug nagpadayon nga gigama. Sa pila ka adlaw kini mahimong gamiton.
Paghukom Batok sa Matinugotong Dominyo sa Kakristiyanohan
8. Sa unsang paagi ang mga pulong sa Jeremias 25:8, 9 matuman diha sa Kakristiyanohan?
8 Ang dugang mga pulong ni Jehova, nga makita sa Jeremias 25:8, 9, espisipikong mapadapat karon sa Kakristiyanohan, nga napakyas sa pagpahiuyon sa Kristohanong mga sukdanan sa pagkamatarong: “Busa kini ang giingon ni Jehova sa mga panon, ‘Tungod kay wala kamo mosunod sa akong mga pulong, ania ako nagapadala ug akong ipakuha ang tanang banay sa amihanan,’ nagaingon si Jehova, ‘nga ipadala pa ngadto kang Nabukodonosor nga hari sa Babilonya, ang akong alagad, ug ako silang dad-on batok niining yutaa ug batok sa mga molupyo niini ug batok sa tanang nasod sa palibot; ug ako silang igahin sa kalaglagan ug himoon silang usa ka tumong sa kahibulong ug butang nga pagasitsitan ug mga dapit nga biniyaan sa panahong walay tino.’” Busa, sugod sa nag-angkong katawhan sa Diyos, ang Kakristiyanohan, ang dakong kasakitan mosugod, nga sa kataposan makaabot sa tibuok yuta, ngadto sa ‘tanang nasod sa palibot.’
9. Sa unsang mga paagi ang espirituwal nga kahimtang sa Kakristiyanohan mograbe pa sa atong panahon?
9 Sa Kakristiyanohan dihay panahon nga gitahod ang Bibliya, dihang ang kaminyoon ug pamilyahanong kinabuhi sa halos tibuok kalibotan giisip ingong tinubdan sa kalipay, dihang ang mga tawo sayong mibangon ug nagmatagbawon sa ilang matag-adlawng trabaho. Daghan ang nagpapresko sa ilang kaugalingon pinaagi sa pagbasa ug pagtuon sa Pulong sa Diyos nga gigamit ang lamparahan sa magabii. Apan karong adlawa, ang pagpatuyang sa sekso, diborsiyo, pag-abusar sa droga ug paghuboghubog, delingkuwensiya, kadalo, tinapolang mga batasan sa trabaho, pagkagiyan sa TV, ug ubang bisyo nakadaot sa kinabuhi sa makahahadlok nga sukod. Kini maoy pasiuna sa kalaglagang duol nang ipahinabo ni Jehova nga Diyos diha sa matinugotong dominyo sa Kakristiyanohan.
10. Batbata ang kahimtang sa Kakristiyanohan human ipatuman ang mga paghukom ni Jehova.
10 Si Jehova nagpahayag, sumala sa atong mabasa sa Jeremias kapitulo 25, mga bersikulo 10 ug 11: “Kuhaon ko gikan kanila ang tingog sa kasadya ug ang tingog sa pagmaya, ang tingog sa pamanhonon ug ang tingog sa pangasaw-onon, ang tingog sa galingan ug ang kahayag sa lamparahan. Ug kining tibuok yuta mahimong biniyaang dapit, usa ka tumong sa kahibulong.” Makapahibulong gayod sa dihang ang dagkong mga templo ug maluhong mga palasyo sa Kakristiyanohan mangalumpag ngadto sa pagkagun-ob niini. Unsa ka malukpanon ang maong pagkagun-ob? Sa panahon ni Jeremias, ang pagkagun-ob sa Juda ug sa silingang mga nasod milungtad ug 70 ka tuig, nga gibatbat sa Salmo 90:10 ingong kasagarang gitas-on sa kinabuhi. Ang pagpatuman sa paghukom ni Jehova karong adlawa mahimong hingpit, walay kataposan.
Paghukom Batok sa Dakong Babilonya
11. Kinsa ang gamiton sa paglaglag sa Kakristiyanohan? Ngano?
11 Sumala sa gitagna sa Pinadayag 17:12-17, ang panahon moabot sa dihang sugdan ni Jehova ang iyang katingad-ang buhat pinaagi sa pagbutang niana sa mga kasingkasing sa “napulo ka sungay”—ang militarisadong mga membro sa Hiniusang Kanasoran—“ang pagtuman sa iyang hunahuna” sa paglaglag sa empiryo sa kalibotan sa bakak nga relihiyon. Sa unsang paagi matuman kini? Adunay daghang paagi nga “ang napulo ka sungay” sa Pinadayag kapitulo 17, sa mga pulong sa bersikulo 16, mahidangat nga “magadumot sa bigaon ug . . . sa bug-os magasunog kaniya sa kalayo.” Tinuod, ang nukleyar nga armas nagdaghan ug nagakadaghan gihapon sa daghang dapit sa yuta diin ang gubat hapit nang moulbo. Apan kinahanglang paaboton nato ug tan-awon kon sa unsang paagi ibutang ni Jehova sa mga kasingkasing sa politikanhong mga pangulo ang pagtuman sa iyang panimalos.
12. (a) Unsay nahitabo sa Babilonya human niya laglaga ang Kakristiyanohan? (b) Unsay mahitabo sa mga nasod human malaglag ang Kakristiyanohan?
12 Sa karaang mga panahon turno na sa Babilonya nga makaagom sa nagdilaab nga kasuko ni Jehova. Sumala niana, sugod sa Jeremias kapitulo 25, bersikulo 12, ang tagna nag-isip sa mga butang gikan sa nausab nga panglantaw sa kaulahian. Dili na diha sa papel nga Tiglaglag ni Jehova, si Nabukodonosor ug ang Babilonya karon nahiapil sa tanang kalibotanong mga nasod. Ang kahimtang susama karong adlawa. “Ang napulo ka sungay” sa Pinadayag kapitulo 17 maglaglag sa bakak nga relihiyon, apan sa ulahi sila mismo makaagom ug kalaglagan duyog sa tanang ubang “mga hari sa yuta,” sumala sa gibatbat sa Pinadayag kapitulo 19. Ang Jeremias 25:13, 14 nagbatbat sa unsang paagi ang Babilonya, duyog sa “tanang nasod” nga nakapahimulos sa katawhan ni Jehova, mahidangat sa paghukom. Gigamit ni Jehova si Nabukodonosor ingong tiglaglag aron sa pagsilot sa Juda. Bisan pa niana siya ug ang ulahing mga hari sa Babilonya magarbohong nagbayaw sa ilang kaugalingon batok kang Jehova mismo, sumala sa gipasundayag, pananglitan, sa pagpasipala sa mga panudlanan sa templo ni Jehova. (Daniel 5:22, 23) Ug sa dihang gilaglag sa mga taga-Babilonya ang Jerusalem, ang silingang mga nasod sa Juda—ang Moab, Ammon, Tiro, Edom, ug uban pa—nagsadya ug nagbiaybiay sa katawhan sa Diyos. Kinahanglang anihon usab nila ang nahaigong balos gikan ni Jehova.
Paghukom Batok sa “Tanang Nasod”
13. Unsay ipasabot sa “kining kopa sa bino sa kaaligutgot,” ug unsay mahitabo niadtong magainom sa kopa?
13 Busa, si Jeremias mipahayag, sumala sa nahitala sa kapitulo 25, mga bersikulo 15 ug 16: “Kini ang giingon kanako ni Jehova ang Diyos sa Israel: ‘Kuhaa kining kopa sa bino sa kaaligutgot gikan sa akong kamot, ug paimna ang tanang nasod nga paadtoan ko kanimo. Ug sila magainom ug magasamparay ug magalihok ingon sa mga tawong buang tungod sa espada nga akong ginapadala sa ilang taliwala.’” Nganong kini usa ka ‘kopa sa bino sa kaaligutgot ni Jehova’? Sa Mateo 26:39, 42 ug Juan 18:11, si Jesus mihisgot bahin sa usa ka “kopa” ingong nagsimbolo sa kabubut-on sa Diyos alang kaniya. Sa susama, ang usa ka kopa gigamit sa pagsimbolo sa kabubut-on ni Jehova aron ang mga nasod magainom sa iyang balaang panimalos. Ang Jeremias 25:17-26 nagtala niining nasodnong mga pundok nga naglandong sa mga nasod karong adlawa.
14. Sumala sa tagna ni Jeremias, kinsay magainom gikan sa kopa sa bino sa kaaligutgot ni Jehova, ug unsay gisimbolohan niini alang sa atong adlaw?
14 Human nga ang Kakristiyanohan, sama sa Juda, gihimong “usa ka biniyaang dapit, usa ka tumong sa kahibulong, nga pagasitsitan ug pagatunglohon,” ang nahibiling bahin sa empiryo sa bakak nga relihiyon sa kalibotan nagpaabot sa kalaglagan. Sunod, ang tibuok kalibotan, sumala sa gisimbolohan sa Ehipto, kinahanglang moinom gikan sa kopa sa bino sa kaaligutgot ni Jehova! Oo, ang “tanang hari sa amihanan nga anaa sa duol ug sa halayo, nga sunodsunod, ug ang tanang ubang gingharian sa yuta nga anaa sa ibabaw sa yuta” kinahanglang moinom. Sa kataposan, “ang hari sa Sesak mismo moinom sunod kanila.” Ug kinsa ba kining “hari sa Sesak”? Ang Sesak maoy usa ka simbolikong ngalan, usa ka takobang ngalan, o kontra-senyas, alang sa Babilonya. Maingon nga si Satanas mao ang dili-makitang hari ibabaw sa Babilonya, siya mao usab “ang magmamando sa kalibotan” hangtod niining adlawa, sumala sa gipaila ni Jesus. (Juan 14:30) Busa, ang Jeremias 25:17-26 mao ang katumbas sa Pinadayag mga kapitulo 18 hangtod sa 20 sa pagpatin-aw sa nagsunod nga mga panghitabo samtang ang kopa sa kaaligutgot ni Jehova igapasa. Una, ang empiryo sa bakak nga relihiyon sa kalibotan pagalaglagon, sunod ang politikanhong mga gahom, ug dayon si Satanas mismo igatambog sa bung-aw.—Pinadayag 18:8; 19:19-21; 20:1-3.
15. Unsay mahitabo sa dihang madunggan na ang singgit bahin sa “kalinaw ug kasegurohan”?
15 May daghang hisgothisgot bahin sa kalinaw ug kasegurohan sukad sa pagkatapos konohay sa Bugnawng Gubat, nga usa na lang ka gamhanan kaayong nasod ang nahibilin. Sumala sa giingon sa Pinadayag 17:10, ang maong gamhanan kaayong nasod, ang ikapitong ulo sa mapintas nga mananap, kinahanglang “magpabilin sa makadiyut.” Apan ang maong “makadiyut” hapit nang matapos. Sa dili madugay, ang tanang singgit bahin sa politikanhong “kalinaw ug kasegurohan” moiway alang sa “kalit nga kalaglagan [nga mahimong] modangat dihadiha kanila.” Kanay giingon ni apostol Pablo.—1 Tesalonica 5:2, 3.
16, 17. (a) Kon may mosulay sa pag-ikyas sa paghukom ni Jehova, unsay mosangpot? (b) Sa unsang malaglagong paagi ang kabubut-on ni Jehova duol nang matuman sa yuta?
16 Ang tibuok kalibotang sistema ni Satanas, sugod sa Kakristiyanohan, kinahanglang moinom gikan sa kopa sa panimalos ni Jehova. Ang dugang niyang sugo kang Jeremias, nga natala sa kapitulo 25, mga bersikulo 27 ngadto sa 29, nagpamatuod niini: “Kinahanglang moingon ka kanila, ‘Kini ang giingon ni Jehova sa mga panon, ang Diyos sa Israel: “Panginom kamo ug pangahubog ug panagsuka ug pangatumba aron nga kamo dili na makabangon tungod sa espada nga akong ginapadala sa inyong taliwala.”’ Ug mahitabo nga engkaso sila dili mokuha sa kopa gikan sa imong kamot aron pagaimnon, moingon ka usab kanila, ‘Kini ang giingon ni Jehova sa mga panon: “Moinom gayod kamo. Kay, tan-awa! ako nagasugod sa pagdalag katalagman diha sa siyudad nga gitawag sa akong ngalan, ug kamo sa inyong kaugalingon mahigawas ba sa silot?”’ ‘Dili kamo mahigawas sa silot, kay adunay usa ka espada nga akong ginatawag batok sa tanang molupyo sa yuta,’ mao ang ginaingon ni Jehova sa mga panon.”
17 Bug-at kanang mga pulonga—sa pagkatinuod, makapalisang nga mga pulong, kay kana gipamulong sa Soberanong Ginoo sa tibuok uniberso, si Jehova nga Diyos. Sa mga milenyong panahon, siya mapailobong nag-antos sa mga pasipala, sa mga pakaulaw, ug sa pagdumot nga gipahamtang sa balaan niyang ngalan. Sa kataposan ang panahon miabot na, hinunoa, aron iyang tubagon ang pag-ampo nga gitudlo sa iyang minahal nga Anak, si Jesu-Kristo, sa iyang mga tinun-an samtang dinhi sa yuta: “Nan, kinahanglang mag-ampo kamo niining paagiha: ‘Amahan namo sa mga langit, balaana ang imong ngalan. Umanhi ang imong gingharian. Matuman ang imong kabubut-on, maingon sa langit, dinhi usab sa yuta.’” (Mateo 6:9, 10) Kabubut-on ni Jehova nga si Jesus mag-alagad nga Iyang espada sa pagpatuman sa panimalos.
18, 19. (a) Kinsay magakabayo aron magapanaog diha sa ngalan ni Jehova, ug unsay iyang ginahulat sa dili pa mahuman ang iyang pagpangdaog? (b) Inigbuhi sa mga manulonda sa mabagyohong hangin sa kaaligutgot ni Jehova, unsang makahahadlok nga mga hitabo ang mahitabo sa yuta?
18 Sa Pinadayag kapitulo 6, atong mabasa nga una si Jesus misakay sa usa ka maputing kabayo ‘sa pagdaog ug sa paghuman sa iyang pagpanaog.’ (Bersikulo 2) Kini nagsugod sa iyang pagkaentrono ingong langitnong Hari niadtong 1914. Ang ubang mga kabayo ug mga mangangabayo nagsunod kaniya, nga naghulagway sa bug-os nga pakiggubat, gutom, ug kamatay nga sukad nagsakit sa atong yuta. Apan kanus-a ba matapos kining tanang kagubot? Ang Pinadayag kapitulo 7 nagpahibalo kanato nga ang upat ka manulonda nagakupot nga hugot sa “upat ka hangin sa yuta” hangtod matigom ang espirituwal nga Israel ug ang dakong panon gikan sa tanang nasod alang sa kaluwasan. (Bersikulo 1) Unya unsa man?
19 Ang Jeremias kapitulo 25, mga bersikulo 30 ug 31, nagpadayon: “‘Gikan sa kahitas-an si Jehova mismo modahunog, ug gikan sa iyang balaang puloy-anan siya mopagula sa iyang tingog. Sa walay pakyas siya modahunog diha sa iyang dapit puloy-anan. Usa ka singgit nga sama niadtong nagatamak sa pigsanan sa parras siya moawit batok sa tanang molupyo sa yuta. Aduna unyay kasaba nga moabot sa kinalay-ang bahin sa yuta, kay si Jehova adunay pakiglalis batok sa mga nasod. Siya mismo magahukom sa tanang unod. Mahitungod sa mga tuman-kadaotan, iyang igahatag sila sa espada,’ mao ang ginaingon ni Jehova.” Walay nasod ang sa ingon makaikyas gikan sa pag-inom sa kopa sa kaaligutgot ni Jehova. Busa, dinalian nga ang tanang matarong-ug-kasingkasing nga mga tawo mobulag sa ilang kaugalingon gikan sa pagkadaotan sa mga nasod sa dili pa buhian sa upat ka manulonda ang mabagyohong hangin sa kaaligutgot ni Jehova. Mabagyohon gayod, kay ang tagna ni Jeremias nagpadayon sa mga bersikulo 32 ug 33:
20. Unsang talan-awon ang nagpasiugda sa kagrabe sa paghukom ni Jehova, apan nganong gikinahanglan ang maong aksiyon?
20 “Kini ang giingon ni Jehova sa mga panon, ‘Tan-awa! Ang usa ka katalagman modangat sa nasod ngadto sa nasod, ug ang dakong bagyo mismo pagapatuyboon gikan sa kinahilitang mga bahin sa yuta. Ug kadtong pinatay ni Jehova niadtong adlawa molukop gikan sa usa ka tumoy sa yuta ngadto sa laing tumoy sa yuta. Sila dili pagahilakan, ni pagahiposon o igalubong. Sila mahimong sama sa kinalibang sa ibabaw sa nawong sa yuta.’” Mangil-ad gayod nga talan-awon, apan kining aksiyona gikinahanglan aron hinloan ang yuta sa tanang pagkadaotan sa dili pa ipatungha ang Paraiso nga gisaad sa Diyos.
Mga Magbalantay Magaminatay ug Magabakho
21, 22. (a) Sa Jeremias 25:34-36, kinsa ang “mga magbalantay” sa Israel, ug nganong sila napugos sa pagminatay? (b) Hain ba sa modernong mga magbalantay ang takos sa kasuko ni Jehova, ug nganong sa bug-os sila takos niana?
21 Ang mga bersikulo 34 hangtod sa 36 naghisgot sa dugang sa paghukom ni Jehova, nga nagaingon: “Magaminatay kamo, kamong mga magbalantay, ug magabakho! Ug managlunang kamo sa abo, kamong mga halangdon sa panon, tungod kay ang mga adlaw sa pag-ihaw kaninyo ug sa pagpatibulaag kaninyo nangatuman na, ug kinahanglang kamo mahulog sama sa maayong sudlanan! Ug nahanaw ang usa ka dapit nga kakalagiwan gikan sa mga magbalantay, ug ang usa ka paagi sa kaikyasan gikan sa mga halangdon sa panon. Pamati! Ang pagbakho sa mga magbalantay, ug ang pagminatay sa mga halangdon sa panon, kay si Jehova nagalaglag sa ilang sibsibanan.”
22 Kinsa ba ang maong mga magbalantay? Sila dili ang relihiyosong mga pangulo, kinsa nakainom na sa kasuko ni Jehova. Sila mao ang militaryong mga magbalantay, nga gibatbat usab sa Jeremias 6:3, kinsa nagtigom sa ilang mga kasundalohan sa dagkong mga pundok ingong paghagit kang Jehova. Sila mao ang politikanhong mga magmamando, nga nangadato sa kapildihan sa mga sakop. Daghan kanila maoy abtik sa panglimbong, mga batid sa kahiwian. Sila hinayan sa paghupay sa mga kagutmanan nga nakapatay sa dakong bahin sa enterong mga rasa sa kayutaang naalaot. Sila nagapadato sa “mga halangdon sa panon,” sama sa gamhanang mga negosyanteg armas ug hakog nga mga tigdaot sa kalikopan, samtang nagdumili sa pagtagana sa medikal nga tabang ug sustansiyadong pagkaon nga sa gamay kaayong bili makaluwas untag tinagpulo ka milyong himalatyong mga bata.
23. Batbata ang kahimtang sa dominyo ni Satanas human sa malaglagong mga buhat ni Jehova.
23 Dili katingad-an nga ang Jeremias kapitulo 25 mihinapos, sa mga bersikulo 37 ug 38, pinaagi sa pag-ingon bahin kanila nga mahakogong nangitag kalinaw alang sa ilang kaugalingon lamang: “Ang malinawong mga puloy-anan nawad-an sa kinabuhi tungod sa nagdilaab nga kasuko ni Jehova. Gibiyaan niya ang iyang tagoanan sama sa usa ka balhiboong batang leyon, tungod kay ang ilang yuta nahimong tumong sa kahibulong tungod sa madagmalong espada ug tungod sa iyang nagdilaab nga kasuko.” Kahibulongan gayod! Bisan pa, ang nagdilaab nga kasuko ni Jehova sa tino ipahayag pinaagi sa Usa nga gibatbat sa Pinadayag 19:15, 16 ingon nga “Hari sa mga hari ug Ginoo sa mga ginoo,” kinsa nagabantay sa mga nasod pinaagi sa olisi nga puthaw. Unya unsay mosunod?
24. Unsang mga panalangin ang ipatungha alang sa matarong nga katawhan sa pagkalaglag sa bakak nga relihiyon ug sa nahibiling bahin sa kalibotan ni Satanas?
24 Nakasinati ka ba sukad sa usa ka urakan o bagyo? Kini mahimong usa ka makalilisang nga kasinatian. Apan sa pagkabuntag human niana, bisan pag imo tingaling makita ang mga guba sa palibot, ang hangin sagad hinlo kaayo ug ang kalinaw makaparepresko gayod nga ikaw makapasalamat kang Jehova tungod sa nindot kaayong adlaw. Sa susama, iniglurang sa kusog nga hangin sa dakong kasakitan, ikaw makasud-ong sa yuta nga mapasalamatong buhi ka ug andam makig-ambit sa dugang nga buluhaton ni Jehova sa paghimong mahimayaong paraiso sa nahinloang yuta. Ang pakiglalis ni Jehova batok sa mga nasod mahidangat sa talagsaong kataposan niini, nga magabalaan sa iyang ngalan ug magahatag sa dalan aron matuman ang iyang kabubut-on sa yuta ubos sa Milenyong Pagmando sa Mesiyasnong Gingharian. Hinaot kanang Ginghariana moabot na sa madali!
Pagsubli sa mga parapo 5-24 niining artikuloha
◻ Unsang sinalingkapawng mga dalan sa Kakristiyanohan ang karon nahidangat sa paghukom?
◻ Unsang pinadakong hunahuna sa paghukom ang gihimo sa Jeremias 25:12-38?
◻ Unsang kopa sa panimalos ang gipasa ngadto sa tanang nasod?
◻ Kinsa ang mga magbalantay nga nagminatay ug nagbakho, ug nganong sila magul-anon?
[Hulagway sa panid 18]
Si Jehova ang nagpili sa galamiton sa paglaglag sa Kakristiyanohan
[Hulagway sa panid 23]
Human sa mabagyohong mga hangin sa dakong kasakitan, motungha ang usa ka nahinloang yuta