Malipayon nga si Jehova Nagpakita Kanato sa Iyang Dalan

“Mahitungod sa matuod nga Diyos, hingpit ang iyang dalan; ang pulong ni Jehova nasulayan.”​—2 SAMUEL 22:31.

1, 2. (a) Alang sa unsa nga ang tanang tawo dunay pasukaranang panginahanglan? (b) Kansang panig-ingnan ang maayo natong sundogon?

ANG tanang tawo dunay pasukaranang panginahanglan ug giya. Sa pagkatinuod, nagkinahanglan kitag tabang sa paggiya kanato latas sa kinabuhi. Tinuod, si Jehova naghatag kanato ug usa ka sukod sa intelihensiya ug tanlag nga motabang kanato sa pag-ila kon unsay husto ug sayop. Apan ang atong tanlag kinahanglang mabansay aron mahimo kining kasaligang giya. (Hebreohanon 5:14) Ug ang atong hunahuna nagkinahanglan ug hustong impormasyon​—maingon man pagbansay aron sa pagtimbangtimbang nianang maong impormasyon—​aron makahimo kita ug maayong mga desisyon. (Proverbio 2:1-5) Bisan pa niana, tungod sa mga kawalay-kasegurohan sa kinabuhi, ang atong mga desisyon mahimong dili mosangpot sumala sa gitinguha. (Ecclesiastes 9:11) Sa atong kaugalingon, wala kitay kasaligang paagi sa pagkahibalo kon unsay anaa sa umaabot.

² Tungod niini ug sa daghang ubang mga katarongan, ang manalagnang si Jeremias misulat: “Ako nasayod, Oh Jehova, nga dili iya sa tawo ang iyang dalan. Dili iya sa tawo nga naglakaw bisan ang pagtultol sa iyang lakang.” (Jeremias 10:23) Si Jesu-Kristo, ang labing bantogang tawo nga nabuhi sukad, midawat ug pagtultol. Siya miingon: “Ang Anak dili makahimo ug usa ka butang sa iyang kaugalingong pagbuot, apan kon unsa lamang ang iyang nakita nga ginahimo sa Amahan. Kay unsa mang mga butanga nga ginahimo nianang maong Usa, kining mga butanga ginabuhat usab sa Anak sa samang paagi.” (Juan 5:19) Nan, pagkamaalamon nga sundogon si Jesus ug modangop kang Jehova alang sa tabang sa pagtultol sa atong mga lakang! Si Haring David miawit: “Mahitungod sa matuod nga Diyos, hingpit ang iyang dalan; ang pulong ni Jehova nasulayan. Usa ka taming siya niadtong tanan nga modangop kaniya.” (2 Samuel 22:31) Kon nagtinguha kita sa paglakaw diha sa dalan ni Jehova inay mosunod sa atong kaugalingong kaalam, makabaton kita ug hingpit nga giya. Ang pagsalikway sa dalan sa Diyos motultol sa kalamidad.

Gipakita ni Jehova ang Dalan

 3. Sa unsang paagi gigiyahan ni Jehova si Adan ug Eva, nga nagtanyag kanila ug unsang mga kalaoman?

³ Tagda ang kaso ni Adan ug Eva. Bisag wala silay sala, nagkinahanglan silag pagtultol. Wala pasagdi ni Jehova si Adan nga magplano sa tanan alang sa iyang kaugalingon diha sa maanindot nga tanaman sa Eden. Hinunoa, gihatagan siya sa Diyos ug buluhaton. Una, si Adan kinahanglang maghingalan sa mga mananap. Unya, gihatagan ni Jehova si Adan ug Eva ug layog-abot nga mga tumong. Kinahanglang gamhan nila ang yuta, pun-on kini sa ilang mga anak, ug atimanon ang kahayopan sa yuta. (Genesis 1:28) Dako kini nga tahas, apan ang resulta maoy tibuok-kalibotang paraiso nga puno sa hingpit nga tawhanong rasa nga nagpuyong kaharmonya sa kahayopan. Pagkakahibulongang kalaoman! Dugang pa, samtang si Adan ug Eva matinumanong naglakaw diha sa dalan ni Jehova, sila nakigkomunikar kaniya. (Itandi ang Genesis 3:8.) Pagkakatingalahang pribilehiyo​—nga makabaton ug nagapadayon, personal nga relasyon uban sa Maglalalang!

 4. Sa unsang paagi si Adan ug Eva nagpakitag kakulang sa pagsalig ug pagkamaunongon, ug uban ang unsang malaglagong mga resulta?

⁴ Gidid-an ni Jehova ang unang tawhanong magtiayon sa pagkaon sa kahoy sa kahibalo sa maayo ug daotan nga didto sa Eden, ug naghatag kini kanila ug dihadihang kahigayonan sa pagpasundayag sa ilang pagkamasinugtanon​—ilang tinguha sa paglakaw diha sa dalan ni Jehova. (Genesis 2:17) Apan, sa wala madugay nasulayan ang maong pagkamasinugtanon. Sa dihang si Satanas miabot uban ang iyang malimbongong mga pulong, si Adan ug Eva kinahanglang magpakita ug pagkamaunongon kang Jehova ug mosalig sa Iyang mga saad aron sila magpabiling masinugtanon. Ikasubo, nakulangan silag pagkamaunongon ug pagsalig. Sa dihang gitanyagan ni Satanas si Eva ug independensiya ug bakak nga nag-akusar kang Jehova ug pagpamakak, siya nalimbongan ug misupak sa Diyos. Si Adan misunod kaniya sa pagpakasala. (Genesis 3:1-6; 1 Timoteo 2:14) Ang miresultang kapildihan nila dako kaayo. Ang paglakaw diha sa dalan ni Jehova maghatag unta kanila ug nagauswag-kanunay nga kangaya samtang sila padayong nagatuman sa iyang kabubut-on. Hinunoa, ang ilang kinabuhi napuno sa kahigawad ug kasakit hangtod nga namatay sila.​—Genesis 3:16-19; 5:1-5.

 5. Unsa ang layog-abot nga katuyoan ni Jehova, ug sa unsang paagi niya gitabangan ang matinumanong mga tawo sa pagkakita sa katumanan niini?

⁵ Bisan pa niana, wala usba ni Jehova ang iyang katuyoan nga usa ka adlaw niana ang yuta mahimong paraisong puy-anan alang sa hingpit, walay-sala nga mga tawo. (Salmo 37:11, 29) Ug wala gayod siya mapakyas sa paghatag ug hingpit nga giya niadtong nagalakaw diha sa iyang dalan ug naglaom nga makita ang katumanan nianang maong saad. Alang kanato nga dunay mga igdulungog nga mamati, ang tingog ni Jehova anaa sa atong likod, nga nag-ingon: “Kini mao ang dalan. Lakaw diha niana, kamong katawhan.”​—Isaias 30:21.

Ang Uban Milakaw Diha sa Dalan ni Jehova

 6. Kinsa ang duha ka lalaki sa unang kapanahonan nga naglakaw diha sa dalan ni Jehova, ug uban sa unsang mga resulta?

⁶ Sumala sa talaan sa Bibliya, diyutay lamang sa mga anak ni Adan ug Eva ang milakaw diha sa dalan ni Jehova. Si Abel mao ang una niini. Bisan tuod nakaagom siya ug ahat nga kamatayon, namatay siya nga gipaboran ni Jehova ug busa dunay seguradong paglaom nga makaambit sa “pagkabanhaw sa . . . mga matarong” sa gitakdang panahon sa Diyos. (Buhat 24:15) Makita niya ang kataposang katumanan sa dakong katuyoan ni Jehova alang sa yuta ug sa tawo. (Hebreohanon 11:4) Ang lain nga milakaw diha sa dalan ni Jehova mao si Enoc, kansang tagna mahitungod sa kataposan niining sistema sa mga butang gipreserbar diha sa basahon ni Judas. (Judas 14, 15) Si Enoc usab namatay nga wala sa panahon. (Genesis 5:21-24) Sa gihapon, “siya nakabaton ug pagsaksi nga iyang napahimut-an pag-ayo ang Diyos.” (Hebreohanon 11:5) Sa iyang pagkamatay, siya, sama kang Abel, may seguradong paglaom nga mabanhaw, ug siya mahilakip niadtong makakita unya sa katumanan sa mga katuyoan ni Jehova.

 7. Giunsa pagpakita ni Noe ug sa iyang pamilya ang pagkamaunongon ngadto kang Jehova ug pagsalig kaniya?

⁷ Samtang ang una-Lunop nga kalibotan misamot pa ka daotan, ang pagkamasinugtanon kang Jehova nahimong labi pang pagsulay sa pagkamaunongon. Sa hapit nang matapos ang maong kalibotan, gamay lamang nga grupo ang nakaplagan nga naglakaw diha sa dalan ni Jehova. Si Noe ug ang iyang pamilya namati sa Diyos ug misalig sa iyang gisulti. Sila matinumanong nagtapos sa mga tahas nga gihatag kanila ug wala mabitik sa daotang mga buhat sa kalibotan niadtong mga adlawa. (Genesis 6:5-7, 13-16; Hebreohanon 11:7; 2 Pedro 2:5) Makapasalamat kita sa ilang maunongon ug masaligong pagkamasinugtanon. Tungod niini, sila nakalabang-buhi sa Lunop ug nahimong atong mga katigulangan.​—Genesis 6:22; 1 Pedro 3:20.

 8. Alang sa nasod sa Israel, unsay nalangkit sa paglakaw diha sa ngalan sa Diyos?

⁸ Ngadtongadto, si Jehova mihimog pakigsaad uban sa mga kaliwat sa matinumanong si Jacob, ug sila nahimong iyang linain nga nasod. (Exodo 19:5, 6) Si Jehova nagtagana ug direksiyon alang sa mga tawong iyang gipakigsaaran pinaagi sa sinulat nga Balaod, mga saserdote, ug nagapadayon nga matagnaong giya. Apan anaa ra kana sa mga Israelinhon kon sundon ang maong pagtultol. Gisugo ni Jehova ang iyang manalagna nga moingon sa mga Israelinhon: “Tan-awa, akong gibutang sa inyong atubangan karong adlawa ang panalangin ug ang tunglo: ang panalangin, kon kamo mosugot sa mga sugo ni Jehova nga inyong Diyos nga akong gisugo kaninyo karong adlawa; ug ang tunglo, kon dili kamo mosugot sa mga sugo ni Jehova nga inyong Diyos ug motipas kamo gikan sa dalan nga gisugo nako karong adlawa, sa pagsunod ninyo sa ubang mga diyos nga wala ninyo hiilhi.”​—Deuteronomio 11:26-28.

Kon Nganong ang Pipila Mibiya sa Dalan ni Jehova

9, 10. Tungod sa unsang kahimtang nga ang mga Israelinhon kinahanglang mosalig kang Jehova ug mag-ugmad ug pagkamaunongon ngadto kaniya?

⁹ Sama kang Adan ug Eva, ang mga Israelinhon kinahanglang mosalig kang Jehova ug magmaunongon kaniya aron sila makapabiling matinumanon. Ang Israel maoy gamay nga nasod nga gilibotan sa makiawayong mga silingan. Sa habagatan-kasadpan diha ang Ehipto ug Etiopia. Sa amihanan-sidlakan ang Sirya ug Asirya. Sa duolduol diha ang Filistia, Amon, Moab, ug Edom. Sa usa ka panahon o sa lain, silang tanan napamatud-ang mga kaaway sa Israel. Dugang pa, silang tanan nagtuman sa bakak nga relihiyon, nga nailhan sa pagsimba sa mga idolo, astrolohiya, ug sa pipila ka kaso sa mahilayon kaayong mga rituwal sa sekso ug linuog nga paghalad sa mga bata. Ang mga silingan sa Israel midangop sa ilang mga diyos aron tagan-an ug dagkong mga pamilya, abundang ani, ug kadaogan sa pakiggubat.

¹⁰ Ang Israel lamang ang nagsimba sa usa ka Diyos, si Jehova. Misaad siya kanila sa mga panalangin sa dagkong mga pamilya, dagayang ani, ug kasegurohan batok sa ilang mga kaaway kon mosugot sila sa iyang mga balaod. (Deuteronomio 28:1-14) Ikasubo, daghan sa Israel ang napakyas sa pagbuhat niini. Niadtong milakaw diha sa dalan ni Jehova, daghan ang nag-antos tungod sa ilang pagkamaunongon. Ang uban gani gipaantos, giyagayagaan, gilapdosan, gibilanggo, gibato, ug gipatay sa kaubang mga Israelinhon. (Buhat 7:51, 52; Hebreohanon 11:35-38) Pagkadakong pagsulay gayod kadto alang sa mga matinumanon! Apan, ngano man nga daghan kaayo ang nahisalaag gikan sa dalan ni Jehova? Duha ka pananglitan gikan sa kasaysayan sa Israel ang motabang kanato nga makita ang ilang sayop nga panghunahuna.

Daotang Panig-ingnan ni Ahaz

11, 12. (a) Sa dihang gihulga sa Sirya, unsay wala buha­ta ni Ahaz? (b) Ngadto sa unsang duha ka tuboran nga si Ahaz midangop alang sa kasegurohan?

¹¹ Si Ahaz nagmando ibabaw sa habagatang gingharian sa Juda sa ikawalong siglo W.K.P. Ang iyang pagmando dili malinawon. Sa usa ka higayon, ang Sirya ug ang amihanang gingharian sa Israel naghiusa sa pagpakiggubat batok kaniya, ug ang “iyang kasingkasing ug ang kasingkasing sa iyang katawhan misugod sa pagkurog.” (Isaias 7:1, 2) Apan, sa dihang si Jehova mitanyag ug pagpaluyo ug nagdapit kang Ahaz nga sulayan siya, si Ahaz tatawng mibalibad! (Isaias 7:10-12) Ingong resulta, ang Juda napildi sa gubat ug daghan ang nakalas nga kinabuhi.​—2 Cronicas 28:1-8.

¹² Bisan tuod wala sulayi ni Ahaz si Jehova, nagpaubos siya sa pagpangayog tabang sa hari sa Asirya. Sa gihapon, ang Juda nagpadayon sa pag-antos diha sa mga kamot sa mga silingan niini. Sa dihang ang Asirya usab misumbalik kang Ahaz ug “nagpahinabo kaniya ug kagul-anan,” ang hari “misugod sa paghalad ngadto sa mga diyos sa Damasco nga maoy naghampak kaniya, ug siya miingon: ‘Tungod kay ang mga diyos sa mga hari sa Sirya nagatabang kanila, magahalad ako ngadto kanila, aron tabangan nila ako.’”​—2 Cronicas 28:20, 23.

13. Unsay gipakita ni Ahaz sa pagdangop ngadto sa mga diyos sa Sirya?

¹³ Sa ulahi, si Jehova miingon sa Israel: “Ako, si Jehova, mao ang imong Diyos, ang Usang nagatudlo kanimo sa pagpahimulos sa imong kaugalingon, ang Usang nagpahinabo nga ikaw mosubay sa dalan nga angay nimong pagalaktan. Oh kon unta ikaw mamati lamang gayod sa akong mga sugo! Unya ang imong kalinaw mahimong ingon sa usa ka suba, ug ang imong pagkamatarong ingon sa mga balod sa dagat.” (Isaias 48:17, 18) Sa pagdangop ngadto sa mga diyos sa Sirya, gipakita ni Ahaz kon unsa na siya ka layo gikan sa ‘pagsubay sa dalan nga angay niyang pagalaktan.’ Siya bug-os nga nahisalaag sa panghunahuna sa mga nasod, nga midangop sa ilang bakak nga mga tuboran sa kasegurohan inay kang Jehova.

14. Nganong walay ikapangulipas si Ahaz sa dihang midangop siya sa bakak nga mga diyos?

¹⁴ Ang mga diyos sa kanasoran, lakip niadtong sa Sirya, dugay nang gipakita nga “walay-pulos nga mga diyos.” (Isaias 2:8) Sayosayo pa, panahon sa pagmando ni Haring David, ang pagkalabaw ni Jehova sa mga diyos sa Sirya tatawng nakita sa dihang ang mga Siryanhon nahimong mga alagad ni David. (1 Cronicas 18:5, 6) Si Jehova lamang, “ang Diyos sa mga diyos ug Ginoo sa mga ginoo, ang Diyos nga dako, gamhanan ug makalilisang,” ang makahatag ug tinuod nga kasegurohan. (Deuteronomio 10:17) Apan, si Ahaz mitalikod kang Jehova ug midangop sa mga diyos sa kanasoran alang sa kasegurohan. Ang resulta maoy malaglagon alang sa Juda.​—2 Cronicas 28:24, 25.

Ang mga Hudiyo nga Kauban ni Jeremias sa Ehipto

15. Sa unsang paagi nga ang mga Hudiyo sa Ehipto sa adlaw ni Jeremias nakasala?

¹⁵ Tungod sa hilabihang pagkadili-maunongon sa iyang katawhan, sa 607 W.K.P., gitugotan ni Jehova ang mga taga-Babilonya nga molaglag sa Jerusalem ug sa templo niini. Kadaghanan sa katawhan nadestiyero sa Babilonya. Apan, ang uban nahibilin, lakip kanila ang manalagnang Jeremias. Sa dihang si Gobernador Gedalia gipatay, kining maong grupo mikalagiw sa Ehipto ug gidala si Jeremias. (2 Hari 25:22-26; Jeremias 43:5-7) Didto, nagsugod sila sa paghalad ngadto sa bakak nga mga diyos. Nangatarongan pag-ayo si Jeremias uban sa dili-matinumanong mga Hudiyo, apan sila gahian. Wala sila modangop kang Jehova ug miinsistir nga magpadayon sila sa paghalad ug insenso ngadto sa “rayna sa kalangitan.” Ngano man? Tungod kay mao kiniy gibuhat nila ug sa ilang katigulangan ‘didto sa mga siyudad sa Juda ug sa kadalanan sa Jerusalem, sa dihang kaniadto natagbaw sila sa tinapay ug maayo ang kahimtang, ug wala gayod silay nakita nga katalagman.’ (Jeremias 44:16, 17) Nakiglalis usab ang mga Hudiyo: “Sukad kami mihunong sa paghalad ug insenso ngadto sa ‘rayna sa kalangitan’ ug pagtagay ug halad nga ilimnon ngadto kaniya nakulangan kami sa tanang butang, ug pinaagi sa espada ug pinaagi sa gutom nangamatay kami.”​—Jeremias 44:18.

16. Nganong ang mga Hudiyo sa Ehipto nasayop pag-ayo sa ilang pangatarongan?

¹⁶ Nahinumdoman lamang nila ang mihaom sa ilang mga hilig ug tinguha! Unsa ang tinuod nga mga panghitabo? Ang mga Hudiyo sa pagkatinuod naghalad ngadto sa bakak nga mga diyos diha sa yuta nga gihatag ni Jehova kanila. Usahay, sama sa panahon ni Ahaz, sila nag-antos tungod sa maong apostasya. Bisan pa niana, si Jehova “mahinay sa kasuko” uban sa mga tawo nga iyang gipakigsaaran. (Exodo 34:6; Salmo 86:15) Gipadala niya ang iyang mga manalagna aron awhagon silang maghinulsol. Usahay, sa dihang ang hari nagmatinumanon, si Jehova nagpanalangin kaniya, ug ang katawhan nakapahimulos gikan nianang maong panalangin, bisan tuod kadaghanan kanila wala magmatinumanon. (2 Cronicas 20:29-33; 27:1-6) Pagkasayop gayod alang niadtong mga Hudiyo sa Ehipto nga moangkon nga ang bisan unsang kauswagan nga gipahimuslan didto sa ilang yutang-natawhan naggikan sa ilang bakak nga mga diyos!

17. Nganong ang Juda nawad-an sa yuta ug templo niini?

¹⁷ Sa wala pa ang 607 W.K.P., giawhag ni Jehova ang katawhan sa Juda: “Tumana ang akong tingog, ug ako mahimong inyong Diyos, ug kamo mismo mahimong akong katawhan; ug kinahanglang managlakaw kamo sa tanang dalan nga akong isugo kaninyo, aron nga mamaayo ang inyong kahimtang.” (Jeremias 7:23) Ang mga Hudiyo nawad-an sa ilang templo ug sa ilang yuta tungod gayod kay wala sila molakaw ‘sa tanang dalan nga gisugo ni Jehova kanila.’ Tinoon nato nga malikayan kanang makamatayng sayop.

Si Jehova Nagapanalangin Niadtong Nagalakaw Diha sa Iyang Dalan

18. Unsay angayng buhaton niadtong nagalakaw diha sa dalan ni Jehova?

¹⁸ Karon, sama kaniadto, ang paglakaw diha sa dalan ni Jehova nagkinahanglan ug pagkamaunongon​—usa ka determinasyon nga moalagad lamang kaniya. Nagkinahanglan kinig pagsalig—​bug-os nga pagtuo nga ang mga saad ni Jehova kasaligan ug matinuod. Ang paglakaw diha sa dalan ni Jehova nagkinahanglag pagkamasinugtanon​—pagsunod sa iyang mga balaod nga dili motipas ug paghupot sa iyang taas nga mga sukdanan. “Si Jehova matarong; nahigugma gayod siya sa matarong nga mga buhat.”​—Salmo 11:7.

19. Unsang mga diyos ang gisimba sa daghan karon, ug uban sa unsang mga resulta?

¹⁹ Si Ahaz misalig sa mga diyos sa Sirya alang sa kasegurohan. Ang mga Israelinhon sa Ehipto naglaom nga ang “rayna sa kalangitan,” usa ka diyosa nga kaylap nga gisimba sa karaang Tungang Sidlakan, maghatag kanila ug materyal nga kauswagan. Karong adlawa, daghang diyos ang dili literal nga mga idolo. Si Jesus nagpasidaan batok sa pag-alagad sa “Bahandi” inay kang Jehova. (Mateo 6:24) Si apostol Pablo naghisgot bahin sa “hakog nga pangibog, nga maoy idolatriya.” (Colosas 3:5) Naghisgot usab siya bahin niadtong kansang “diyos mao ang ilang tiyan.” (Filipos 3:19) Oo, ang salapi ug materyal nga mga butang nalakip sa pangunang mga diyos nga gisimba karong adlawa. Sa pagkatinuod, kadaghanan​—lakip sa daghan nga dunay gianibang mga relihiyon—​‘naglaom sa walay-kasegurohang mga bahandi.’ (1 Timoteo 6:17) Daghan ang naghago sa pag-alagad niini nga mga diyos, ug ang uban nakaanig mga ganti​—nagpuyo diha sa kinanindotang mga balay, nagpahimulos sa mahalong mga butang, ug nagkaon sa maluhong mga pagkaon. Apan, dili tanan ang nagpahimulos sa ingong kaadunahan. Ug bisan kadtong nakapahimulos niini ngadtongadto dili matagbaw niining mga butanga. Kini walay kasegurohan, temporaryo, ug dili magtagbaw sa espirituwal nga mga panginahanglan.​—Mateo 5:3.

20. Unsang pagkatimbang ang kinahanglan natong huptan?

²⁰ Tinuod, kinahanglang praktikal kita samtang nagkinabuhi latas sa kataposang mga adlaw niining sistemaha sa mga butang. Kinahanglang mohimo kitag makataronganong mga lakang aron sa pagtagana sa atong mga pamilya sa materyal nga paagi. Apan kon mas gipabilhan nato ang taas nga sukdanan sa pagkinabuhi, ang pagpangagpas sa salapi, o susamang mga butang inay kay sa pag-alagad sa Diyos, nahulog kita ngadto sa usa ka matang sa idolatriya ug wala na maglakaw diha sa dalan ni Jehova. (1 Timoteo 6:9, 10) Apan, komosta kon makaagom kita sa mga suliran sa panglawas, sa pinansiyal, o uban pa? Dili kita mahimong sama niadtong mga Hudiyo sa Ehipto nga gibasol ang pag-alagad sa Diyos nga maoy nakaingon sa ilang mga suliran. Hinunoa, sulayan nato si Jehova, nga wala buhata ni Ahaz. Maunongong modangop kang Jehova nga Diyos alang sa giya. Masaligong ipadapat ang iyang giya, ug pag-ampo alang sa kusog ug kaalam sa pagdumala sa matag kahimtang. Unya, masaligong maghulat sa panalangin ni Jehova.

21. Unsang mga panalangin ang modangat niadtong nagalakaw diha sa dalan ni Jehova?

²¹ Latas sa kasaysayan sa Israel, si Jehova dagayang nagpanalangin niadtong naglakaw sa iyang dalan. Si Haring David miawit: “Oh Jehova, mandoi ako sa imong pagkamatarong tungod sa akong mga kaaway.” (Salmo 5:8) Si Jehova naghatag kaniya ug militaryong mga kadaogan ibabaw sa silingang mga nasod nga sa ulahi naghasi kang Ahaz. Ilalom kang Solomon, gipanalanginan ang Israel ug pakigdait ug kauswagan nga gipangandoy sa ulahi sa mga Hudiyo didto sa Ehipto. Sa anak ni Ahaz nga si Ezequias, si Jehova mihatag gani ug kadaogan ibabaw sa gamhanang Asirya. (Isaias 59:1) Oo, ang kamot ni Jehova dili mubo ngadto sa iyang mga maunongon, kinsa wala mobarog “diha sa dalan sa mga makasasala” apan kansang kalipay anaa sa balaod sa Diyos. (Salmo 1:1, 2) Tinuod gihapon kana. Apan, sa unsang paagi kita karong adlawa makaseguro nga kita nagalakaw diha sa dalan ni Jehova? Hisgotan kini sa sunod nga artikulo.

Nahinumdom Ka Ba?

◻ Unsang mga hiyas ang gikinahanglan aron makalakaw kita diha sa dalan ni Jehova?

◻ Nganong bakak ang panghunahuna ni Ahaz?

◻ Unsay daotan sa pangatarongan sa mga Hudiyo sa Ehipto?

◻ Sa unsang paagi mapalig-on nato ang atong determinasyon nga molakaw diha sa dalan ni Jehova?

[Hulagway sa panid 13]

Si Ahaz midangop sa mga diyos sa Sirya inay kay kang Jehova