DIMON

Usa ka dapit nga gihisgotan sa pahayag ni Isaias labot sa kalaglagan sa Moab; tungod kay gipamatay ang mga Moabihanon, “napuno sa dugo” ang katubigan sa Dimon.​—Isa 15:9.

Giisip sa pipila ka komentarista nga ang Dimon maoy laing porma sa Dibon (nga gihisgotan sa bersikulo 2 sa maong tagna), sanglit ang Dimon gigamit man sa paglitok nga may parehong tunog sa unang letra sa Hebreohanong pulong alang sa “dugo” (dam), sa ingon “Dimon napuno sa dam.” Kini nga panglantaw nahiuyon sa kamatuoran nga diha sa Linukot nga mga Basahon sa Patayng Dagat mabasa ang “Dibon” imbes nga “Dimon” dinhi sa bersikulo 9, ug nahiuyon usab kini sa gipamulong ni Jerome nga sa iyang panahon (mga 347-420 K.P.) ang duha ka ngalan baylobaylo nga gigamit.

Apan, giisip sa uban nga imposibleng ang ngalan nga Dibon gamiton sa duha ka lainlaing paagi diha sa usa ka mubo ra nga pahayag, ug sila usab miingon nga walay laing dapit nga kaduha hisgoti sa maong pahayag. Sila mipunting usab nga ang Dibon wala mahimutang duol sa usa ka dakong “katubigan,” sanglit layolayo kini gikan sa kinadul-ang lugot, ang Arnon. Busa, sila nagtuo nga lagmit ang Dimon maoy resulta sa pag-usab sa magkokopya sa ngalan nga Madmen, nga gihisgotan diha sa paghukom ni Jeremias sa Moab (Jer 48:2), ug sagad nga gituohang mao ang Dimna, mga 4 km (2.5 mi) sa KAK sa Rabat-Moab, diha sa usa ka bukid nga nag-umbaw sa katubigan sa ʽAin el-Megheisil dapit sa HS.

Kining duha ka panglantaw maoy banabana lamang, apan mopatim-awng ingon sa gipakita sa konteksto kining ulahi mas katuohan sa pag-ingon nga kini maoy usa ka dapit nga duol sa katubigan.