BOZRA

[Dili-Maduol nga Dapit].

1. Usa ka prominenteng siyudad sa Edom, ang pinuy-anan sa amahan ni Jobab, usa ka hari sa Edom sa ikaduhang milenyo W.K.P. (Gen 36:​31, 33; 1Cr 1:44) Dayag nga ilado kini tungod kay ubos sa pag-inspirar ang mga manalagna nga si Isaias, Jeremias, ug Amos naghisgot niini ingong nagrepresentar sa tibuok Edom, nga gitakda sa kalaglagan.​—Isa 34:​5, 6; 63:1-4; Jer 49:​12, 13, 17, 22; Am 1:​11, 12.

Ang Bozra gituohang mao ang modernong Buzera, nga nahimutang mga 50 km (30 mi) sa AAS sa Petra ug anaa duol sa karaang dalan nga gitawag ug Dakong Dalan sa Hari. Busa nahimutang kini sa sentro nga bahin sa gingharian sa Edom ug nanalipod sa mga agianan paingon sa mga minahan sa tumbaga didto sa Araba. Ang karaang mga kagun-oban sa Buzera nagpakita nga ang Bozra maoy kanhi usa ka kinutaang siyudad nga gitukod diha sa usa ka hiktin nga bukid nga mituybo gikan sa Jebel esh-Sheraʼ nga may lalom nga mga lugot sa matag kiliran.

Ang hubad sa Miqueas 2:12 diha sa King James Version naundan sa ngalang “Bozra,” apan ang kadaghanan sa modernong mga hubad nag-isip niini nga nagtumong, dili sa usa ka lungsod, kondili sa usa ka alad o toril sa mga karnero.

2. Sa pagtagna batok sa Moab, ang Jeremias 48:24 naghisgot sa Bozra ingong lakip sa mga siyudad “sa yuta sa Moab.” Lakip kini sa ubang mga siyudad diha sa patag ibabaw sa bukid o “sa yuta diha sa kapatagan” (Jer 48:21), ug tungod kay gigamit kining samang Hebreohanong ekspresyon maylabot sa Bezer (Deu 4:43) gihunahuna sa pipila ka eskolar nga kini lagmit nagtumong sa mao ra nga dapit.​—Tan-awa ang BEZER Num. 2.