Pamati​—Ang Magbalantay ni Jehova Nagpahayag!

“Gihimo ko ikaw nga magbalantay alang sa balay sa Israel, . . . ug hatagi sila ug pasidaan gikan kanako.”​—EZEKIEL 3:17.

 1. Nganong mamati kita dihang mosulti ang “magbalantay” ni Jehova?

ANG “magbalantay” ni Jehova nagpahayag sa mensahe sa Diyos karong adlawa. Ikaw namati ba? Ang imo mismong kinabuhi nagadepende sa imong pagsanong sa mensahe nga may pagpabili ug paglihok. Sa dili madugay, ‘ang mga nasod makaila kang Jehova’ dihang iyang ipabayaw ang iyang balaang ngalan pinaagi sa paglaglag niining daotang sistema ug sa pagluwas sa iyang katawhan. Naglaom ka ba nga malakip uban kanila? (Ezekiel 36:23; 39:7; 2 Pedro 3:8-13) Tingali, kon mamati ka lang dihang mosulti ang “magbalantay” ni Jehova.

 2. Unsay gisangpotan sa gingharian sa Juda tungod sa ilang pagdumili sa pagpamati sa manalagna sa Diyos?

² Ang ilang pagdumili sa pagpamati sa mga manalagna sa Diyos nakahatag kalaglagan gingharian sa Juda sa 607 W.K.P. Ang kaawayng mga nasod nalipay sa maong kalumpagan pinaagi sa mga kamot sa Babilonyanhon. Apan unsa ka dako sa kabayawan sa ngalan ni Jehova dihang iyang gimaniobra nga makabalik ang matinumanong mga Hudiyo sa ilang yutang-natawhan sa 537 W.K.P.!

 3. Unsay anaa sa bahahon ni Ezekiel?

³ Ang kalumpagan ug pagkatukod pag-usab gitagna sa magbalantay ni Jehova, si Ezekiel. Ang basahon sa Bibliya nga nagdala sa iyang ngalan ug gitapos niya diha sa Babilonya sa mga 591 W.K.P. nasudlan sa (1) buluhaton ni Ezekiel (2) mga tagnang giaksiyon; (3) mga mensahe batok sa Israel; (4) panagna bahin sa paghukom sa Jerusalem; (5) mga tagna batok sa ang mga nasod; (6) mga saad sa pagtukod pag-usab; (7) tagna batok sa Gog sa Magog; (8) ug panan-awon sa sangtuwaryo sa Diyos. Among gidapit kamo sa pagbasa sa basahon samtang atong tun-an kana. Sa ingon imong makita kon sa unsang paagi kita apektado karong adlawa ug pamati samtang mopahayag ang “magbalantay” ni Jehova.a

Gisugo ang Magbalantay sa Diyos

 4. (a) Unsay nakita ni Ezekiel diha sa panan-awon? (b) Kinsa ang ”buhing mga binuhat,”ug unsang mga hiyas ang ilang nahuptan?

⁴ Sa Tammuz 5, 613 W.K.P. (sa ikalimang tuig sa pagkalagiw sa hari sa Judea nga si Jehoiachin sa Babilonya), ang 30-anyos nga saserdoteng si Ezekiel maoy usa sa Hudiyohanong mga binihag nga didto sa daplin sa “suba sa Chebar,” use ka iladong agianan sa tubig sa Baba sa Euphrates. Diha sa panan-awon, iyang nakita ang langitnong karro ni Jehova, nga gimaneho sa “upat ka buhing mga binuhat.” (Basaha ang Ezekiel 1:1-10.) Ang matag ‘buhing binuhat,’ o pak-an nga mga kerubin, dunay upat ka panagway. (Ezekiel 10:1-20; 11:22) Kini nagpakita nga ang mga kerubin nakabaton sa hinatag sa Diyos nga gugma (ang tawo), hustisya (ang leon), gahom (ang baka), ug kaalam (ang agila). Ang matag kerubin nagbarog sa tapad sa dakong ‘ligid nga anaa sa sulod sa usa ka ligid,’ ug ang espiritu sa Diyos, o aktibong gahom, ang nagpadagan niini sa bisan asang direksiyon.​—Ezekiel 1:1-21.

 5. Unsay gihulawayan sa langitnong karro, ug sa unsang paagi ang paglantaw niini nakaapektar sa katawhan ni Jehova?

⁵ Ang Nagsakay sa karro mao ang mahimayaong representasyon ni Jehova. (Basaha ang Ezekiel 1:22-28.) Pagkamaayong pagkalarawan sa karro sa manulondaong espiritung organisasyon ni Jehova! (Salmo 18:10; 103:20, 21; Daniel 7:9, 10) Nagsakay si Jehova niini sa diwa nga nangulo siya ning maong mga binuhat ug gigamit sila sumala sa iyang katuyoan. Ang Nagsakay makalmahon, sama sa nag-ubang balangaw, ug si Ezekiel gidaog sa kahadlok. Sa tinuod, kining makalilisang nga talan-awon sa himaya ug gahom ni Jehova ingong Supremong Tig-organisar sa iyang langitnong mga panon sa mapaubsanon mopahimo kanatong mapasalamaton sa pribilehiyo sa pag-alagad kaniya ingong bahin sa iyang yutan-ong organisayson.

 6. (a) Unsang buluhaton ang nadawat ni Ezekiel, ug unsay iyang pagtamod sa iyang pag-alagad sa Diyos? (b) Ngadto sa unsang matang sa katawhan nanagna si Ezekiel, ug unsay kaayohang makuha ang pagkasayod kon giunsa siya sa pagtagad sa Diyos?

⁶ Bisan nga gipahinumdoman sa iyang tawhanong sinugdan ug ubos nga kahimtang pinaaAi sa pagtawag nga “anak sa tawo,” si Ezekiel gitudlo isip manalagna ni Jehova. (Basaha ang Ezekiel 2:1-5.) Gipaadto si Ezekiel sa “mga nasod nga masuklanon,” ang mga gingharian sa Israel ug Judas. Una, sumala sa sugo sa Diyos iyang gikaon ang usa ka linukot sa usa ka basahon nga nasudlan sa mga awit sa kamatayon, apan ang lami niini sama sa dugos tungod kay mapasalamaton siya nga nahimong manalagna sa Diyos. Sa susama, ang dinihogang mga Kristohanon ug ang ilang kaubang mga alagad nakakita nga matam-is nga mahimong mga saksi ni Jehova. Nagpanagna si Ezekiel taliwala sa matig-a ug kasingkasing ug gahig-ulong katawhan, apan himoon sa Diyos ang iyang dagway nga sama ka gahi sa ilang mga dagway, ang iyang agtang sama ka gahi sa diyamante. Siya maisogong nanagna mamati man sila o dili. Makalipayng masayod nga gitabangan sa Diyos si Ezekiel diha sa malisod nga mga kahimtang, Siya motabang kanato sa maisogong pagpamatuod diha sa bisan unsang teritoryo.—Ezekiel 2: 6-3:11.

 7. Ang buluhaton ni Ezekiel nagkinahanglan ug unsang kaakohan?

⁷ Dihang gikaon ang linukot nga basahon si Ezekiel ‘miinit sa espiritu’ nga haom sa mensahe niini. Mipuyo siya sa Tel-abib ‘nahibulong sulod sa pito ka adlaw’ nga nagpalandong sa mensahe. (Ezekiel 3:12-15) Kita kinahanglang magpalandong usab ug kuging magtuon aron masabtan ang lalom nga espirituwal nga mga butang. Nakabaton sa mensahe nga iwali, si Ezekiel gisugo ingong magbalantay sa Diyos. (Basaha ang Ezekiel 3:16-21.) Ang bag-ong tinudlong magbalantay nagpasidaan sa malapason sa kasugoan nga mga Israelinhon nga sila nag-atubang sa paghukom sa Diyos.

 8. Kinsa ang nag-alagad ingong ”magbalantay” ni Jehova karong adlawa, ug kinsa ang ilang kauban?

⁸ Kon napakyas si Ezekiel ingong magbalantay, panilngan siya ni Jehova sa mga kamatayon sa mga biktima. Bisag gigapos siya sa mahulagwayong higot niadtong dili magpabadlong kaniya, maisogon niyang giwali ang mensahe sa Diyos. (Ezekiel 3:22-27) Sa atong panahon karon, ang Kakristiyanohan nagdumili sa pagpamati ug naningkamot sa pagsanta sa dinihogang mga Kristohanon. Apan sukad sa 1919 kining dinihogang mga Kristohanon nag-alagad ingong mga “magbalantay” ni Jehova, maisogong nagwali sa iyang mensahe alang sa “panahon sa kataposan” niining sistema sa mga butang. (Daniel 12:4) Nakig-uban kanila ning buluhatona mao ang nagkadaghang “dakong panon” sa “ubang mga karnero” ni Jesus. (Pinadayag 7:9, 10; Juan 10:16) Sanglit ang “magbalantay” nga matang padayon man nga nagpahayag sa mensahe sa Diyos, siyempre ang matag usa sa dinihogan ug ang “dakong panon” nagtinguha usab sa pagpadayag niini ingong regular nga magmamantala.

Mga Tagnang Giaksiyon

 9. (a) Sa unsang paagi nahimong panig-ingnan kanato si Ezekiel? (b) Unsay gihimo ni Ezekiel sa paglarawan sa paglikos sa Jerusalem, ug unsay kahulogan sa 390 ka adlaw ug sa 40 ka adlaw?

⁹ Giaksiyon sunod ni Ezekiel ang matagnaong dulang walay sulti-sulti uban ang kamapaubsanon ug kaisog, naghatag panig-ingnan nga angay mopalihok kanato sa pagtuman sa hinatag-sa-Diyos nga mga buluhaton sa mapaubsanon ug sa maisogon. Aron malarawan ang pag-likos sa mga Babilonyanhon, gipahigda siya nga nag-atubang sa tisa nga iyang gikulitan sa hulagway sa Jerusalem. Gipahigda si Ezekiel sa iyang wala nga kilid sulod sa 390 ka adlaw aron sa pagpas-an sa sala sa napulo-ka-tribo sa gingharian sa Israel, dayon siya mihigda sa iyang tuong kiliran sulod sa 40 ka adlaw sa pagpas-an sa sala sa duha-ka-tribo sa Juda. Ang usa ka adlaw katumbas sa usa ka tuig. Busa ang 390 ka tuig nagsugod gikan sa pagkatukod sa Israel sa 997 W.K.P. ngadto sa kalaglagan sa Jerusalem sa 607 W.K.P. Ang 40 ka tuig sa Juda nagsugod gikan sa pagtudlo kang Jeremias isip manalagna sa Diyos sa 647 W.K.P. ngadto sa kalumpagan sa Juda sa 607 W.K.P.—Ezekiel 4:1-8; Jeremias 1:1-3.

10. Sa unsang paagi giaksiyon ni Ezekiel ang mga epekto sa paglikos, ug unsang pagtulon-an ang atong makuha gikan sa kamatuoran nga gipakaon siya ni Jehova?

¹⁰ Ang sunod nga giaksiyon ni Ezekiel mao ang mga epekto sa paglikos. Sa paghulagway sa kagutmanan, mikaon siya ug kapin lamang sa duha ka gatos ka gramong pagkaon ug mga tunga ka litrong tubig kada adlaw. Ang iyang tinapay (kadtong gidili nga pagsagol sa trigo, sebada, patani, balatong, dawa, ug espelta nga linuto sa hugaw sa mananap) mahugaw. (Levitico 19:19) Kining aksiyona nagpakita nga ang mga molupyo sa Jerusalem mag-antos ug dakong kakulangan. Apan pagkamakalipayng masayod nga sama sa pagpakaon ni Jehova kang Ezekiel ilalom sa malisod nga mga kahimtang, ang Diyos motabang kanatong magpabiling matinumanon ug magabuhat sa atong buluhaton sa pagwali atubangan sa tanang mga kalisod!​—Ezekiel 4:9-17.

11. (a) Unsang mga aksiyon an gihisgutan sa Ezekiel ,5: 1-4, ug unsay kahulogan niini? (b) Unsay epekto diha kanato sa kamatuoran nga gituman sa Diyos ang mga butang nga giaksiyon ni Ezekiel?

¹¹ Migamit ug espada, sunod giputol ni Ezekiel ang iyang buhok ug bungot. (Basaha ang Ezekiel 5:1-4.) Kadtong nangamatay sa kagutmanan ug kamatayon sama sa ikatulo ka bahin sa buhok sa manalagna nga iyang gisunog sa kinataliwad-an sa Jerusalem. Ang nangamatay sa gubat sama sa ikatulo ka bahin nga naigo sa espada. Ang mga buhi nagkatibulaag taliwala sa mga nasod sama sa ikatulo ka bahin sa iyang buhok nga gisaliyab sa hangin. Apan ang ubang mga binihag sama sa mga buhok nga gikuha gikan sa gisaliyab sa hangin ug gilimin sa besti ni Ezekiel sa pagpakita nga modangop sila sa tinuod nga pagsimba sa Juda human sa 70-ka-tuig nga kalumpagan. (Ezekiel 5:5-17) Ang kamatuoran nga gituman kini ni Jehova ug ang ang matagnaong mga butang nga giaksiyon mopalihok kanato sa pagsalig kaniya ingong Magtutuman sa tagna.—Isaias 42:9; 55:11.

Kalaglagan Anaa sa Unahan!

12. (a) Unsay himoon sa mga manunulong sumala sa gipakita sa Ezekiel 6:1-7? (b) Sumala sa tagna ni Ezekiel, unsa ang antitipikong Jerusalem, ug unsay mahitabo kaniya?

¹² Sa 613 W.K.P., mipakigpulong si Ezekiel sa yuta sa pagpadayag sa mahitabo sa tigsimbag mga diyosdiyos nga mga molupyo sa Juda. (Basaha ang Ezekiel 6:1-7.) Gub-on sa mga manunulong ang hatag-as nga mga dapit, ang mga talad sa insenso, ug ang mga halaran nga gigamit sa bakak nga pagsimba. Ang paghunahuna lang sa kagun-oban pinaagi sa kagutmanan, kamatay, ug gubat makapasinggit sa usa ug “Alaot!” ug ipakita kini pinaagi sa pagpakpak sa mga kamot ug sa pag-undak-undak sa mga tiil. Ang patayng mga lawas sa makihilawason sa espirituwal magpasad sa hatag-as nga mga dapit. Dihang antuson sa Kakristiyanohan, ang antitipikong Jerusalem, ang samang kalaglagan, siya masayod nga ang iyang katalagman nagagikan kang Jehova.​—Ezekiel 6:8-14.

13. Unsa “ang sungkod” diha sa kamot ni Jehova, ug unsay misangpot sa paggamit niini?

^{13 ‘}Ang kataposan miabot sa upat ka tumoy sa yuta,’ ang dili-matinumanong relihiyosong sistema sa Juda. Ang “girnalda” sa malaglagong mga butang ipatong sa ulo sa magsisimba sa mga diyosdiyos dihang “ang sungkod” sa kamot sa Diyos—si Nabucodonosor ug ang iyang Babilonyanhong kasundalohan—molihok batok sa katawhan ni Jehova ug sa iyang templo. Ang sakop sa “panon” sa mga magbabaligya ug mga pumapalit sa Juda nangamatay o nahimong bihag sa laing nasod, ug ang mga kamot niadtong nakapabiling buhi nangaluya. Inigkapukan sa ilang bakak nga relihiyosong sistema, ilang, pagaingon pa, upawan ang ilang mga ulo sa kaguol.—Ezekiel 7:1-18.

14. Napakyas ang paghiphip sa pagbuhat ug unsa alang sa Jerusalem, ug unsay gipadayag niana alang sa Kakristiyanohan?

¹⁴ Si Jehova ug ang iyang mga panon sa tigpatay dili kahiphipan. (Basaha ang Ezekiel 7:19.) Wala makaluwas ang paghiphip sa “tinago nga dapit,” ang Labing Balaan, gikan sa panamastamas dihang giilog sa “mga kawatan” nga Caldeanhon ang balaang mga sudlanan ug gipasagdan ang templo diha sa kagun-oban. ‘Gipahunong ni Jehova ang pagpalabilabi sa mga makusganon dihang nadakpan si Haring Zedekias ug ang mga pangulo sa Levitikanhong mga saserdote gipamatay.’ (2 Hari 25:4-7, 18-21) Dili, ang mga makasasala sa nailog nga Jerusalem dili makaikyas sa kaaway pinaagi sa hiphip dihang ‘hukman sila’ sa Diyos ingong maglalapas sa pakigtugon. Sa susama, unya sa haduol nga pagpasipala sa mga butang nga gipakabalaan sa Kakristiyanohan, dili niya kahiphipan ang iyang kaluwasan dihang ipakanaog ang silot sa Diyos diha kaniya. Ulahi na unya kaayo ang ilang pagpamati sa “magbalantay” ni Jehova.—Ezekiel 7:20-27.

Nanghupaw sa Dulumtanang mga Butang

15. Unsay nakita ni Ezekiel sa Jerusalem, ug unsay epekto niini alang kanato?

¹⁵ Dihang nakita ni Ezekiel ang Diyos diha sa himaya sa Elul 5, 612 W.K.P., ‘ang dagway sa usa ka kamot migunit sa usa ka pungpong sa iyang buhok’ ug gialsa siya sa espiritu sa pagdasig ngadto sa Jerusalem. Ang langitnong karro nabalhin usab didto. Ang nakita ni Ezekiel niadto angay mopugong kanato sa pagpamati sa mga apostata. (Proverbio 11:9) Diha sa templo, ang mga apostata sa Israel nagsimba sa usa ka idolatrosong simbolo (tingali usa ka sagradong tukon) nga nakahagit sa pangabubho sa Diyos. (Exodo 20:2-6) Dihang misulod sa sulod nga sawang, pagkatalamayong butang ang nakita ni Ezekiel! (Basaha ang Ezekiel 8:10, 11.) Pagkamakauulaw nga ang 70 ka tigulang sa Israel misunog ug insenso alang sa mga diyosdiyos nga gilarawan sa dulumtanang mga kinulit diha sa kuta!—Ezekiel 8:1-12.

16. Ang panan-awon ni Ezekiel nagpakita ug unsa bahin sa mga epekto sa apostasiya?

¹⁶ Ang panan-awon ni Ezekiel nagpakita kon unsa ka makapatay sa espirituwal ang apostasiya. Gani, ang mga babaye sa Israel gihisgotan nga naghilak mahitungod kang Tammuz, usa ka diyosdiyos sa Babilonya ug hinigugma sa diyosa sa pertilidad nga si Ishtar! Ug pagkatalamayong tan-awon sa 25 ka Israelinhong mga lalaki diha sa sulod nga sawang sa templo nga nagsimba sa adlaw! (Deuteronomio 4:15-19) Sa ilong sa Diyos ilang gibutang ang malaw-ay nga sanga, tingali naglarawan sa kinatawo sa lalaki. Dili ikahibulong nga dili mamati si Jehova sa ilang mga pag-ampo, sama sa kakawang sa pagpangayo sa Kakristiyanohan sa iyang tabang sa panahon sa “dakong kasakitan”!—Ezekiel 8:13-18; Mateo 24:21.

Gipatikan Alang sa Kaluwasan

17. Kinsa ang pito ka tawo nga nakita sa panan-awon, ug unsay ilang gihimo?

¹⁷ Sunod, atong mamatikdan ang pito ka tawo—ang usa sekretaryo nga nagsapot ug lino ug ang unom ka tawo dunay makalaglag nga hinagiban. (Basaha ang Ezekiel 9:1-7.) Ang “unom ka tawo” naghulagway sa langitnong mga panon nga tiglaglag ni Jehova, apan mahimo siyang makagamit ug mga tawo sa yuta. Ang mga agtang nga gipatikan sa ‘tawo nga nagsapot ug lino’ makatagamtam ug kaluoy tungod kay sila wala mouyon sa dulumtanang mga butang nga gihimo diha sa templo. Ang pagpamatay sa “unom ka tawo” nagsugod didto lakip sa 70 ka tigulang nga tigsimbag mga diyosdiyos, sa mga babaye nga nanaghilak mahitungod kang Tammuz, ug sa 25 ka magsisimba sa adlaw. Kini sila ug ang ubang dili-maunongon sa Diyos gipatay sa mga Babilonyanhon sa 607 W.K.P.

18. (a) Kinsa ang modernong-adlawng ‘tawo nga nagsapot ug lino’? (b) Unsa ang “patik,” kinsa karong adlawa ang nakabaton niana, ug unsay mosangpot sa pagbaton niana?

¹⁸ Ang antitipikong tawo nga ‘nagsapot ug lino’ mao ang matang sa dinihogang mga Kristohanon. Sila nagduaw sa balay ug balay sa pagbutang ug simbolikong patik sa mga tawo nga mahimong bahin sa “dakong panon” sa “ubang mga karnero” ni Jesus. Ang “patik” mao ang pamatuod nga kining mga karnero maoy mga nagpahinungod, bawtismadong mga indibiduwal nga dunay samag-Kristo nga personalidad. Sila ‘nagapanghupaw ug nagatiyabaw tungod sa tanang mga dulumtanang butang’ nga gihimo sa Kakristiyanohan, ug sila nanagpanggula sa Babilonyang Bantogan, ang kalibotanong imperyo sa bakak nga relihiyon. (Pinadayag 18:4, 5) Ang ilang “patik” tin-awng nagpadayag sa mga panon nga tiglaglag ni Jehova nga sila luwason sa “dakong kasakitan”? Padayon nilang mahuptan kanang maong “patik,” pinaagi sa pakig-uban sa mga dinihogan sa pagpatik pa sa uban. Busa, kon ikaw may “patik” na, pakigbahing madasigon sa buluhaton sa pagbutang ug “patik.”—Ezekiel 9:8-11.

Nagkalayong Kalaglagan Anaa sa Unahan!

19. Unsay gisabwag sa modernong-adlawng ‘tawo nga nagsapot ug lino’ sa tibuok Kakristiyanohan?

¹⁹ Ang tawo nga nagsapot ug lino misulod sa mga ligid sa langitnong karro aron sa pagkuhag baga nga kalayo. Ug kini gikatag diha tibuok sa Jerusalem, sa pagpasidaan nga ang kalaglagan niini maoy ekspresyon sa nagkalayong kasuko sa Diyos. (Ezekiel 10:1-8; Lamentaciones 2:2-4; 4:11) Sa mga adlaw ni Ezekiel, gibubo ang kasuko ni Jehova pinaagi sa mga Babilonyanhon. ( 2 Cronicas 36:15-21; Jeremias 25:9-11) Apan unsay ikasulti mahitungod sa atong panahon karon? Ang antitipikong ‘tawo nga nagsa-pot ug lino’ nagasabwag sa nagkalayong mensahe sa Diyos sa tibuok Kakristiyanohan sa pagpahibalo nga ang kasuko sa Diyos sa dili madugay ipahungaw diha kaniya ug sa nahibilin sa Babilonyang Bantogan. Siyempre, kadtong modumili sa pagpamati sa “magbalantay” ni Jehova walay paglaom nga maluwas.​—Isaias 61:1. 2; Pinadayag 18:8-10, 20.

20. (a) Sa unsang paagi ang kaangay tali sa langitnong mga ligid sa karro ug sa kerubin nakaapektar kanato? (b) Unsay gihimo sa pila ka prinsipe, ug unsang sayop nga paagi gipakasama ang Jerusalem?

²⁰ Ang langitnong karro na usab gihatagan ug pagtagad, ang langitnong organisasyon sa Diyos. Sa magpalandong sa kaangay sa mga ligid sa karro ug sa mga kerubin, kita angay mapalihok sa bug-os nga pagtabang sa yutan-ong organisasyon sa Diyos. Tungod sa pagkamaunongon, angay nga panalipdan nato kana gikan sa mga tawong mabudhion. (Ezekiel 10:9-22) Dunay ingon niining matanga sa mga tawo sa panahon ni Ezekiel, kay siya nakakita ug 25 ka prinsipe sa gingharian nga nagplano sa pag-alsa batok sa mga panon nga tiglaglag sa Diyos uban sa tabang sa mga Ehiptohanon. Ilang gipakasama ang Jerusalem sa usa ka kawa, ug sila sama sa unod nga luwas sa sulod niini. Apan pagkadako sa ilang sayop! Ang “espada” sa “mga langyaw” sa Babilonya mipatay sa mga tigplano, samtang ang uban gibihag. Nahitabo kini dihang gipanilngan sa Diyos ang mga Hudiyo sa paglapas sa iyang pakigsaad. (Ezekiel 11: 1-13; Exodo 19:1-8; 24:1-7; Jeremias 52:24-27) Tungod sa pangangkon sa Kakristiyanohan nga nagapakigsaad uban sa Diyos apan nagasalig sa mga kaabin sa kalibotan, siya mahanaw inig-asdang sa mga panon nga tiglaglag ni Jehova.

21. Unsay nahitabo human sa 70 ka tuig nga kalumpagan sa Juda, ug unsang samang hitabo ang nakaapektar sa dinihogang nanghibilin?

²¹ Bisag ang Israelinhon ‘nagkatibulaag taliwala sa mga nasod,’ sa 617 W.K.P., ang Diyos nahimong “usa ka sangtuwaryo,” o dalangpanan sa naghinulsol nga mga binihag. (Ezekiel 11:14-16) Apan unsa pa bay laing malaoman? (Basaha ang Ezekiel 11:17-21.) Human sa 70 ka tuig nga kalumpagan sa Juda, usa ka nanghibilin mibalik sa nahinloang “yuta sa Israel.” Sa susama, human nabihag sa Babilonya, ang dinihogang nanghibilin gipagawas sa 1919, ug ilalom sa pagtultol sa espiritu sa Diyos, ang nalumpag niadto nga “yuta” sa espirituwal nga Israel nahinloan. Busa, gitagamtam niadtong ‘gipatikan’ alang sa kaluwasan karong adlawa ang pag-uyon sa Diyos uban sa nabalik nga nanghibilin sa espirituwal nga Israel. Ug kon magpadayon ka sa pagpamati sa “magbalantay” sa Diyos, mahimong usa unya ikaw niadtong pagaluwason dihang ibton ni Jehova gikan sa sakoban ang iyang espada.

[Footnote]

Nahinumdoman ba Nimo?

◻ Nganong angay mamati dihang mosulti ang “magbalantay“ ni Jehova?

◻ Unsay gihulagwayan sa langitnong karro sa Diyos?

◻ Kinsa ang nag-alagad karong adlawa ingong “magbalantay“ ni Jehova?

◻ Unsang apostatang mga buhat ang nakita ni Ezekiel sa Jerusalem, ug sa unsang paagi kining maong panan-awon nakaapektar kanato?

◻ Kinsa ang modernong-adlawng ‘tawo nga nagsapot ug lino’: ug unsa ang “patik” nga iyang gibutang diha sa mga agtang?