Kinsa ang “Buhing mga Linalang . . . nga May Upat ka Nawong”?

1, 2. Nganong dihay mga higayon nga si Jehova migamit ug mga hulagway sa pagpahayag ug mga kamatuoran ngadto sa iyang mga alagad sa yuta?

IMADYINA ang usa ka pamilya nga may gagmayng bata. Naglingkod sila palibot sa lamesa sa kosina ug nagtuon ug Bibliya. Aron tabangan ang mga bata nga masabtan ang itudlo niyang kamatuoran, ang amahan nagpakitag simpleng mga drowing. Ang pahiyom ug ang bibo nga mga komento sa mga bata nagpakita nga milampos ang amahan. Pinaagi sa pagdugang ug mga hulagway sa iyang giingon, iyang gitabangan ang iyang mga anak nga makasabot sa mga pagtulon-an bahin kang Jehova nga lisod masabtan sa ilang edad.

² Sa susama, si Jehova naggamit ug mga hulagway aron tabangan ang iyang tawhanong mga anak nga masabtan ang dili makitang mga katinuoran nga dili unta nila masabtan. Pananglitan, aron ipatin-aw ang laglom nga mga kamatuoran bahin kaniya, gipakitaan ni Jehova si Ezequiel ug panan-awon nga may makapahinganghang mga hulagway. Sa miaging kapitulo, atong gitun-an ang usa niana. Karon magpokus ta sa usa ka bahin nianang nindot kaayong panan-awon ug atong tan-awon kon nganong mas masuod ta kang Jehova kon atong masabtan ang kahulogan niana.

 3. (a) Sumala sa Ezequiel 1:4, 5, unsay nakita ni Ezequiel sa panan-awon? (Tan-awa ang hulagway sa sinugdan sa kapitulo.) (b) Unsay imong namatikdan sa paagi ni Ezequiel sa pagsulat sa iyang mga nakita?

³ Basaha ang Ezequiel 1:4, 5. Si Ezequiel miingon nga ang “morag upat ka buhing linalang” may parte nga anghel, tawo, ug mananap. Matikdi kon giunsa gyod niya pagsulat ang iyang nakita. Miingon siya nga nakakita siyag “morag” buhing mga linalang. Kon imong basahon ang tibuok panan-awon sa Ezequiel kapitulo 1, imong mamatikdan nga ang propeta balikbalik nga naggamit sa mga pulong nga “nahisama” ug “sama.” (Ezeq. 1:13, 24, 26) Klaro, si Ezequiel nakahunahuna nga ang iyang nakita maoy sama lang, o larawan, sa dili makitang mga katinuoran sa langit.

 4. (a) Unsay epekto sa panan-awon kang Ezequiel? (b) Unsay seguradong nahibaloan ni Ezequiel bahin sa mga kerubin?

⁴ Seguradong nahingangha si Ezequiel sa iyang mga nakita ug nadungog sa panan-awon. Ang hitsura sa upat ka buhing linalang samag “nagsigang mga baga sa kalayo.” Ang ilang paglihok sama ka paspas sa “mga kidlap sa kilat.” Ang tingog sa pagkapakapa sa ilang mga pako samag “hinaganas sa nagbul-og nga katubigan” ug ang ilang paglihok samag “dahunog sa kasundalohan.” (Ezeq. 1:13, 14, 24-28; tan-awa ang kahong “Nagtan-aw Ko sa Buhing mga Linalang.”) Sa panan-awon sa ulahi, gipaila ni Ezequiel kining upat ka buhing linalang ingong “mga kerubin,” o gamhanang mga anghel. (Ezeq. 10:2) Kay nagdako sa banay sa mga saserdote, seguradong nahibalo si Ezequiel nga ang mga kerubin nag-alagad duol sa Diyos ug sagad anaa mismo sa Iyang presensiya.​—1 Cron. 28:18; Sal. 18:10.

 5. (a) Sa unsang paagi ang mga kerubin ug ang ilang upat ka nawong nagpakita sa dili hitupngang gahom ug himaya ni Jehova? (b) Nganong kining bahina sa panan-awon nagpahinumdom nato sa kahulogan sa ngalan sa Diyos? (Tan-awa ang footnote.)

⁵ Basaha ang Ezequiel 1:6, 10. Si Ezequiel nakamatikod sab nga ang matag kerubin may upat ka nawong—nawong sa tawo, leyon, torong baka, ug agila. Dihang nakita ni Ezequiel kining upat ka nawong, seguradong nakahunahuna siya sa dili hitupngang gahom ug himaya ni Jehova. Ngano? Ang matag nawong iya sa linalang nga nagsimbolo sa kahalangdon, kusog, ug gahom. Ang leyon maoy isog nga ihalas nga mananap, ang torong baka maoy makapahingangha nga binuhing hayop, ang agila maoy kusgan nga langgam, ug ang tawo mao ang kinalabwan sa mga linalang ni Jehova sa yuta, ang gihatagag awtoridad ibabaw sa tanang ubang linalang sa yuta. (Sal. 8:4-6) Apan niini nga panan-awon, nakita ni Ezequiel nga ang upat ka gamhanang representante sa kalalangan, nga gipakita ingong upat ka nawong sa matag kerubin, nahimutang ubos sa trono ni Jehova, ang Kinalabwang Soberano sa tanan. Haom kaayo kini nga ilustrasyon nga si Jehova makahimo sa paggamit sa iyang mga linalang sa pagtuman sa iyang katuyoan!a Tinuod gyod ang giingon sa salmista bahin kang Jehova: “Ang iyang kahalangdon labaw pa sa yuta ug sa langit.”​—Sal. 148:13.

 6. Unsay lagmit nakatabang kang Ezequiel nga masabtan kon unsa pay gisimbolohan sa upat ka nawong?

⁶ Paglabay sa panahon, dihang napamalandong na ni Ezequiel ang iyang nakita, lagmit iyang nahinumdoman nga ang mga alagad sa Diyos nga nabuhi una sa iyang panahon naggamit ug mga hayop sa pagtandi. Pananglitan, gipakasama sa patriarkang si Jacob ang iyang anak nga si Juda sa leyon ug ang iyang anak nga si Benjamin sa lobo. (Gen. 49:9, 27) Ngano? Kay ang kinaiya, o hiyas, sa leyon ug lobo maoy naglabaw sa personalidad niining mga tawhana. Base sa maong mga pananglitan sa mga sinulat ni Moises, si Ezequiel lagmit nakahunahuna nga ang mga nawong sa kerubin nagsimbolo sab ug pangunang mga hiyas. Apan unsang mga hiyasa?

7, 8. Unsang mga hiyas ang sagad nga gisimbolohan sa upat ka nawong sa mga kerubin?

⁷ Sa unsang mga hiyas gitandi sa mga magsusulat sa Bibliya una pa sa panahon ni Ezequiel ang leyon, agila, ug torong baka? Matikdi kini nga mga teksto: “Ang tawo nga sama ka isog sa leyon.” (2 Sam. 17:10; Prov. 28:1) “Ang agila molupad pataas” ug “ang mga mata niini magtan-aw sa layo.” (Job 39:27, 29) “Tungod sa kusog sa torong baka dagaya ang abot.” (Prov. 14:4) Base niini nga mga teksto, ang nawong sa leyon nagsimbolo sa maisogong pagpahamtang ug hustisya; ang nawong sa agila, layog abot nga kaalam; ang nawong sa torong baka, dili mapugngan nga gahom, sama sa pirmeng hisgotan sa atong mga publikasyon.

⁸ Apan unsay gisimbolohan sa “nawong sa tawo”? (Ezeq. 10:14) Kini dayag nga nagtumong sa hiyas nga ikapakita, dili sa bisan unsang hayop, kondili sa mga tawo, kinsa gihimo sa larawan sa Diyos. (Gen. 1:27) Kana nga hiyas​—nga sa yuta, tawo ray nakabaton—​gipasiugda sa mga sugo sa Diyos: “Higugmaa si Jehova nga imong Diyos sa bug-os mong kasingkasing” ug “higugmaa ang imong isigkatawo sama sa imong kaugalingon.” (Deut. 6:5; Lev. 19:18) Dihang sundon nato kini nga mga sugo pinaagi sa pagpakitag dili hakog nga gugma, atong gipakita ang gugma mismo ni Jehova. Sama sa gisulat ni apostol Juan, “kita nahigugma, kay siya ang unang nahigugma nato.” (1 Juan 4:8, 19) Busa ang “nawong sa tawo” nagsimbolo sa gugma.

 9. Kang kinsang mga hiyas ang gisimbolohan sa mga nawong sa mga kerubin?

⁹ Kang kinsa kining mga hiyasa? Kay mga nawong kini sa mga kerubin, mga hiyas kini sa tanang girepresentahan sa mga kerubin sa panan-awon​—ang pamilya ni Jehova sa langit nga gilangkoban sa tanang maunongong espiritung mga linalang. (Pin. 5:11) Dugang pa, kay si Jehova ang Tinubdan sa kinabuhi sa mga kerubin, siya sab ang Tinubdan sa ilang mga hiyas. (Sal. 36:9) Busa ang mga nawong sa mga kerubin nagsimbolo sa mga hiyas mismo ni Jehova. (Job 37:23; Sal. 99:4; Prov. 2:6; Miq. 7:18) Unsa ang pipila ka paagi nga gipakita ni Jehova ang iyang nindot kaayong mga hiyas?

10, 11. Sa unsang mga paagi nakabenepisyo ta sa pagpakita ni Jehova sa iyang pangunang mga hiyas?

¹⁰ Hustisya. Ingong Diyos nga “nahigugma sa hustisya,” si Jehova “dili magpihigpihig.” (Sal. 37:28; Deut. 10:17) Busa kitang tanan, bisag unsa pay atong kahimtang o kagikan, may kahigayonan nga mahimo ug magpabilin nga iyang mga alagad ug makadawat ug walay kataposang mga panalangin. Kaalam. Ingong Diyos nga “maalamon,” si Jehova nagtaganag basahon nga punog “praktikal nga kaalam.” (Job 9:4; Prov. 2:7) Ang pagpadapat sa maalamong tambag sa Bibliya makatabang nato nga maatubang ang adlaw-adlawng mga problema ug makabatog katuyoan ang atong kinabuhi. Gahom. Ingong Diyos nga “gamhanan kaayo,” gamiton ni Jehova ang iyang balaang espiritu aron hatagan tag “gahom nga labaw sa kasarangan.” Kini makapalig-on nato sa pagsagubang sa bisan unsang lisod ug sakit nga mga pagsulay.​—Nah. 1:3; 2 Cor. 4:7; Sal. 46:1.

¹¹ Gugma. Ingong Diyos nga “dagaya sa maunongong gugma,” dili gyod talikdan ni Jehova ang iyang matinumanong mga magsisimba. (Sal. 103:8; 2 Sam. 22:26) Busa bisag maguol ta kay dili na daghan ang atong mahimo sa pag-alagad kang Jehova tungod sa grabeng sakit o pagkatigulang, madasig ta sa pagkahibalo nga si Jehova nahinumdom sa atong mga paghago sa miagi tungod sa atong gugma kaniya. (Heb. 6:10) Tin-aw nga nakabenepisyo tag maayo sa pagpakita ni Jehova ug hustisya, kaalam, gahom, ug gugma, ug padayon tang makabenepisyo niining pangunang mga hiyas sa umaabot.

12. Unsay angay natong hinumdoman bahin sa atong pagsabot sa mga hiyas ni Jehova?

¹² Siyempre, angay natong hinumdoman nga ingong mga tawo, ang atong masabtan sa mga hiyas ni Jehova “wala ra sa kumingking sa iyang mga buhat.” (Job 26:14) “Dili nato bug-os masabtan ang bahin sa Labing Gamhanan,” kay “ang iyang pagkagamhanan dili matukib.” (Job 37:23; Sal. 145:3) Busa atong nasabtan nga ang mga hiyas ni Jehova dili nato maihap, malimitahan, o magrupo sa lainlaing kategoriya. (Sal. 139:17, 18; basaha ang Roma 11:33, 34.) Gani, ang mismong panan-awon ni Ezequiel nagpadayag niana nga kamatuoran. Unsang bahina sa panan-awon ang nagpasiugda nianang importanteng kamatuoran?

13, 14. Unsay gisimbolohan sa upat ka nawong sa mga kerubin, ug nganong nakaingon ta niana?

¹³ Nakita ni Ezequiel sa panan-awon nga ang matag kerubin dunay upat ka nawong, dili lang usa. Unsay gipasabot niini? Hinumdomi nga sa Pulong sa Diyos, ang numero kuwatro sagad nagtumong sa pagkakompleto, apil tanan o walay kulang. (Isa. 11:12; Mat. 24:31; Pin. 7:1) Makapainteres nga niini nga panan-awon, 11 ka beses nga gihisgotan ni Ezequiel ang numero kuwatro! (Ezeq. 1:5-18) Unsay atong ikahinapos niini? Sama nga ang upat ka kerubin nagrepresentar sa tanang ubang maunongong espiritung linalang, ang upat ka nawong sa mga kerubin kon lantawon sa katibuk-an nagsimbolo, o naglangkob, sa tanang hiyas ni Jehova.b

¹⁴ Nganong ang upat ka nawong sa mga kerubin lagmit nagtumong ug labaw pa sa upat ka hiyas? Konsideraha ang upat ka ligid niini nga panan-awon. Ang matag ligid kahibulongan, apan kon ang upat ka ligid lantawon sa katibuk-an, kini dili lang basta upat ka kahibulongang ligid​—kini mao mismo ang pundasyon nga gipatongan sa karo. Sa susama, dihang ang upat ka nawong lantawon sa katibuk-an, kini dili lang upat ka lainlaing nindot nga hiyas​—kini mismo ang pundasyon sa makapahinganghang personalidad ni Jehova.

15. Unsang makapadasig nga kamatuoran ang nakat-onan ni Ezequiel sa unang panan-awon nga iyang nadawat?

¹⁵ Pinaagi niining unang panan-awon, si Ezequiel nakakat-on ug importante ug makapadasig nga kamatuoran bahin sa iyang relasyon kang Jehova. Unsa kana? Kana nga kamatuoran gipakita sa pangbukas nga mga pulong sa iyang basahon. Human hisgoti nga siya anaa “sa yuta sa mga Caldeanhon,” si Ezequiel, base sa iyang kaugalingong eksperyensiya, miingon: “Didto, ang kamot ni Jehova midangat kaniya.” (Ezeq. 1:3) Matikdi nga si Ezequiel miingon nga nadawat niya ang panan-awon, dili sa Jerusalem, kondili didto​—sa Babilonya.c Busa unsay gipakita niana kang Ezequiel? Mao kini: Bisag siya usa lang ka destiyero, o binihag, nga layo sa Jerusalem ug sa templo niini, dili siya layo kang Jehova ug sa Iyang pagsimba. Ang pagpakita ni Jehova kang Ezequiel sa Babilonya nagpamatuod nga ang paghatag ug putling pagsimba sa Diyos wala magdepende sa lokasyon o kahimtang sa kinabuhi. Hinuon, nagdepende kini sa kahimtang sa kasingkasing ni Ezequiel ug sa iyang tinguha sa pag-alagad kang Jehova.

16. (a) Unsang makapahupay nga pasalig ang atong makuha sa panan-awon ni Ezequiel? (b) Unsay nagpalihok nimo sa pag-alagad kang Jehova sa tibuok nimong kasingkasing?

¹⁶ Nganong ang kamatuoran nga nakat-onan ni Ezequiel makapahupay pag-ayo nato karon? Kini nagpasalig nato nga kon kinasingkasing tang mag-alagad kang Jehova, siya kanunayng duol kanato bisag asa pa ta nagpuyo, bisag unsa pa ta ka guol, o bisag unsa pay atong kahimtang. (Sal. 25:14; Buh. 17:27) Tungod sa kadagaya sa maunongong gugma ni Jehova sa matag usa sa iyang mga alagad, himoon niya ang tanan para nato. (Ex. 34:6) Busa dili gyod mahitabo nga dili makaabot nato ang maunongong gugma ni Jehova. (Sal. 100:5; Roma 8:35-39) Dugang pa, kining makapahinganghang panan-awon sa pagkabalaan ug sa dili hitupngang gahom ni Jehova magpahinumdom nato nga si Jehova lang ang angay natong simbahon. (Pin. 4:9-11) Mapasalamaton gyod ta nga gigamit ni Jehova ang maong mga panan-awon aron tabangan tang masabtan ang pipila ka importanteng kamatuoran bahin kaniya ug sa iyang mga hiyas! Ang mas lalom nga pagsabot sa makapadaning mga hiyas ni Jehova mas makapasuod nato kaniya ug mopalihok nato nga dayegon ug alagaron siya sa tibuok natong kasingkasing ug kusog.​—Luc. 10:27.

17. Unsang mga pangutana ang atong hisgotan sa sunod nga mga kapitulo?

¹⁷ Apan ikasubo nga sa adlaw ni Ezequiel, ang putling pagsimba nahugawan. Sa unsang paagi nahitabo kana? Unsay reaksiyon ni Jehova? Unsay kahulogan sa maong mga hitabo kanato karon? Kining mga pangutanaha hisgotan sa sunod nga mga kapitulo.