TINTIRO SA SEKRETARYO

Sa Ezequiel 9:​2, 3, 11 ang tawo nga nagsul-ob ug lino nga gisugo sa pagmarka sa mga agtang sa mga tawo gihubit ingong adunay “tintiro sa sekretaryo sa iyang balat-ang,” nga lagmit gisab-it diha sa bakos sa iyang hawak. Kini nga tintiro sa sekretaryo lagmit susama niadtong tintiro nga gigamit kanhi sa karaang Ehipto. Ang Ehiptohanong ‘sudlanan sa mga gamit sa eskriba’ maoy usa ka taas, pahiktin nga kaha nga gama sa kahoy ug may mga kahita o mga butanganan sa mga pluma nga tangbo. Sa gawas nga bahin niini, duol sa tumoy, kini adunay usa ka lubyok nga butanganan sa gamayng hinulma sa uga nga tinta. Ang eskriba makahimo sa pagsulat pinaagi sa paghidhid sa basa nga tumoy sa iyang pluma diha sa tinta. Ang mga inskripsiyon nagpakita nga ang Siryanhong mga eskriba migamit ug susamang ‘sudlanan sa mga gamit sa eskriba.’