Mga Mensahero sa Diyosnong Pakigdait Gipahayag nga Malipayon
“Ang mga linukat mismo ni Jehova mobalik ug moabot gayod sa Sion uban ang singgit sa kalipay; ug ang kasadya nga walay kataposan anha sa ibabaw sa ilang mga ulo.”—ISAIAS 35:10.
1. Unsay dinalian kaayong gikinahanglan sa katawhan?
KARONG adlawa, sukad masukad, ang katawhan nanginahanglan ug mensahero sa maayong balita. Adunay dinaliang panginahanglan alang sa usa nga mosulti sa kamatuoran mahitungod sa Diyos ug sa iyang mga katuyoan, usa ka isog nga saksi nga mopasidaan sa daotan sa umaabot nga kalaglagan ug motabang sa mga mabuot ug kasingkasing nga makakaplag ug diyosnong pakigdait.
2, 3. Sa kaso sa Israel, giunsa pagtuman ni Jehova ang iyang saad nga natala sa Amos 3:7?
2 Sa mga adlaw sa Israel, misaad si Jehova nga motagana sa maong matang sa mga mensahero. Sa kataposan sa ikasiyam nga siglo W.K.P., ang propetang Amos miingon: “Ang Soberano Ginoong Jehova dili mobuhat ug usa ka butang gawas kon iyang ipadayag ang iyang tinagong butang ngadto sa iyang mga alagad ang mga propeta.” (Amos 3:7) Kasiglohan human niini nga pahayag, gihimo ni Jehova ang daghang gamhanang mga buhat. Pananglitan, sa 607 W.K.P., grabe niyang gidisiplina ang iyang piniling katawhan tungod kay sila masinupakon ug sad-an sa dugo. Gisilotan usab niya ang kasikbit nga mga nasod nga nagsadya tungod sa pag-antos sa Israel. (Jeremias, mga kapitulo 46-49) Dayon, niadtong 539 W.K.P., gilumpag ni Jehova ang gamhanan nga kalibotanong gahom sa Babilonya, ug ingong resulta, niadtong 537 W.K.P., ang nanghibilin sa Israel mibalik sa ilang yuta aron tukoron pag-usab ang templo.—2 Cronicas 36:22, 23.
3 Kini maoy hinungdanon kaayong mga hitabo, ug uyon sa mga pulong ni Amos, kini gibutyag nga abante ni Jehova ngadto sa mga propeta nga mialagad ingong mga mensahero, nga nagpasidaan sa Israel kon unsay mahitabo. Sa tungatunga sa ikawalong siglo W.K.P., iyang gipatindog si Isaias. Sa tungatunga sa ikapitong siglo W.K.P., iyang gipatindog si Jeremias. Dayon, sa hinapos sa maong siglo, iyang gipatindog si Ezequiel. Kini ug uban pang matinumanong mga propeta mihatag ug bug-os nga pamatuod bahin sa mga katuyoan ni Jehova.
Pag-ila sa mga Mensahero sa Diyos Karong Adlawa
4. Unsay nagapakita sa panginahanglan sa katawhan ug mga mensahero sa pakigdait?
4 Komosta karong adlawa? Daghan sa kalibotan ang mobati ug kakuyaw sa dihang ilang makita ang pagkadunot sa tawhanong katilingban. Kadtong adunay gugma sa pagkamatarong masubo sa dihang ilang makita ang pagkasalingkapaw ug tumang pagkadaotan sa Kakristiyanohan. Ingon sa gitagna ni Jehova pinaagi ni Ezequiel, sila “nagapanghupaw ug nagaagulo ibabaw sa tanang dulumtanang mga butang nga ginabuhat sa taliwala niini.” (Ezequiel 9:4) Bisan pa niana, daghan ang wala makasabot kon unsa ang mga katuyoan ni Jehova. Kinahanglan pa silang sultihan.
5. Giunsa pagpakita ni Jesus nga adunay mga mensahero sa atong adlaw?
5 Aduna bay nagasulti karong adlawa uban ang maisogong espiritu ni Isaias, Jeremias, ug Ezequiel? Gipakita ni Jesus nga aduna. Sa dihang nagtagna sa mga hitabo sa atong adlaw, siya miingon: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Kinsa karong adlawa ang nagatuman nianang tagnaa, nga nagaalagad ingong mensahero, usa ka magsasangyaw sa maayong balita? Ang mga kaamgiran tali sa atong adlaw ug sa panahon sa karaang Israel motabang kanato sa pagtubag nianang pangutanaha.
6. (a) Hubita ang mga kasinatian sa “Israel sa Diyos” panahon sa unang gubat sa kalibotan. (b) Sa unsang paagi natuman ang Ezequiel 11:17 sa karaang Israel?
6 Panahon sa mangiob nga mga adlaw sa Gubat sa Kalibotan I, ang modernong-adlawng katawhan ni Jehova, ang nanghibilin sa dinihogang “Israel sa Diyos,” nabihag susama niadtong sa Israel sa Babilonya. (Galacia 6:16) Ilang giantos ang espirituwal nga pagkabihag sa Dakong Babilonya, ang kalibotanong organisasyon sa bakak nga mga relihiyon, nga niana ang Kakristiyanohan mao ang labing ilado ug makasasala. Bisan pa niana, ang mga pulong ni Jehova kang Ezequiel nagpakita nga wala sila biyai. Siya miingon: “Tiponon ko usab kamo gikan sa mga katawhan ug magtigom kaninyo gikan sa kayutaan nga niana kamo nagkatibulaag, ug akong ihatag kaninyo ang yuta sa Israel.” (Ezequiel 11:17) Aron tumanon kanang saara alang sa karaang Israel, gipatindog ni Jehova ang Persianhong si Ciro, nga mipukan sa Kalibotanong Gahom sa Babilonya ug nagbukas sa dalan alang sa nanghibilin sa Israel aron mobalik ngadto sa ilang yuta. Apan komosta karong adlawa?
7. Unsang hitaboa sa 1919 ang nagpakitang si Jesus milihok batok sa Dakong Babilonya? Isaysay.
7 Sayosayo niining sigloha, dihay gamhanang pamatuod nga nagalihok ang usa ka Mas Dakong Ciro. Kinsa siya? Walay lain kondili si Jesu-Kristo, nga naentrono sukad sa 1914 sa langitnong Gingharian. Kining dakong Hari nagpakita ug maayong kabubut-on ngadto sa iyang dinihogang mga igsoon sa yuta sa dihang, sa tuig 1919, ang dinihogang mga Kristohanon gipagawas gikan sa espirituwal nga pagkabihag ug mibalik sa ilang “yuta,” ang ilang espirituwal nga kabtangan. (Isaias 66:8; Pinadayag 18:4) Busa ang Ezequiel 11:17 nakabaton ug modernong katumanan. Sa karaang panahon kinahanglang mapukan ang Babilonya aron mabuksan ang dalan alang sa mga Israelinhon aron makabalik sa ilang yuta. Sa modernong panahon ang kapasig-ulian sa Israel sa Diyos maoy pamatuod nga ang Dakong Babilonya nakasinati ug pagkapukan diha sa mga kamot sa Mas Dakong Ciro. Kini nga pagkapukan gipahayag sa ikaduhang manulonda sa Pinadayag kapitulo 14, sa dihang siya misinggit: “Ang Dakong Babilonya napukan na, siya kinsa nagpainom sa tanang kanasoran sa bino sa kasuko sa iyang pagpakighilawas!” (Pinadayag 14:8) Pagkadakong pagkabalit-ad alang sa Dakong Babilonya, ilabina alang sa Kakristiyanohan! Ug pagkadakong panalangin alang sa matuod nga mga Kristohanon!
8. Giunsa paghubit sa basahon sa Ezequiel ang kalipay sa katawhan sa Diyos human sa ilang kagawasan sa 1919?
8 Sa Ezequiel 11:18-20, atong mabasa ang paghubit sa propeta sa kalipay sa katawhan sa Diyos human sa ilang kapasig-ulian. Ang unang katumanan sa iyang mga pulong nagkahulogan sa paghinlo sa Israel sa mga adlaw ni Esdras ug Nehemias. Ang modernong-adlawng katumanan nagkahulogan ug susamang butang. Atong tan-awon kon ngano. Si Jehova miingon: “Sila gayod mahidangat [sa ilang yuta] ug magakuha sa tanang dulumtanang butang niini ug sa tanan niining makaluod nga mga butang gikan niana.” Ingon sa gitagna, sugod sa 1919, gihinloan ni Jehova ang iyang katawhan ug nagpalig-on pag-usab kanila sa pag-alagad kaniya. Gisugdan nila pagkuha gikan sa ilang espirituwal nga palibot ang tanang Babilonyanhong mga kalihokan ug mga doktrina nga nakapahugaw kanila sa iyang mga mata.
9. Unsang talagsaong mga panalangin ang gihatag ni Jehova sa iyang katawhan, sugod sa 1919?
9 Dayon, sumala sa bersikulo 19, si Jehova mipadayon sa pag-ingon: “Ug ako silang hatagan ug usa ka kasingkasing, ug usa ka bag-ong espiritu akong ibutang sa sulod nila; ug ako gayong kuhaon ang kasingkasing nga bato gikan sa ilang unod ug hatagan silag usa ka kasingkasing nga unod.” Uyon niining mga pulonga, sa 1919, gihiusa ni Jehova ang iyang dinihogang mga alagad, naghatag kanilag “usa ka kasingkasing,” pagaingnon pa, aron sila magaalagad kaniya “abaga sa abaga.” (Sofonias 3:9) Dugang pa, gihatag ni Jehova sa iyang katawhan ang balaang espiritu aron sa pagpalig-on kanila sa buluhatong pagpanaksi ug sa pagpatungha diha kanila sa maayong mga bunga nga gihubit sa Galacia 5:22, 23. Ug inay sa di-masanongon, samag-batong kasingkasing, si Jehova naghatag kanilag humok, mauyonon, masinundanong kasingkasing, usa ka kasingkasing nga mosanong sa iyang kabubut-on.
10. Nganong si Jehova nagpanalangin sa iyang napasig-uling katawhan gikan sa 1919 paunahan?
10 Nganong iyang gibuhat kini? Si Jehova mismo nagasaysay. Atong mabasa sa Ezequiel 11:20: “Aron sila magalakaw sa akong kaugalingong kabalaoran ug magahupot sa akong kaugalingong hudisyal nga mga desisyon ug tumanon gayod kana; ug sila sa pagkatinuod mahimong akong katawhan ug ako mismo mahimong ilang Diyos.” Ang Israel sa Diyos nakakat-on sa pagsunod sa balaod ni Jehova inay kay magsunod sa ilang kaugalingong mga ideya. Nakat-onan nila ang pagbuhat sa kabubut-on sa Diyos nga walay kahadlok sa tawo. Busa, nagbarog silang lahi gikan sa imitasyon nga mga Kristohanon sa Kakristiyanohan. Sila ang katawhan ni Jehova. Sa ingon, si Jehova andam sa paggamit kanila ingon nga iyang mensahero, iyang “kasaligan ug mabuot nga ulipon.”—Mateo 24:45-47.
Ang Kalipay sa mga Mensahero sa Diyos
11. Giunsa paghubit sa basahon sa Isaias ang kalipay sa katawhan ni Jehova?
11 Mahulagway ba nimo ang ilang kalipay sa dihang ilang naamgohan kon unsa ka hamili ang posisyon nga ilang gitagamtam? Ingong usa ka grupo, ilang gipalanog ang mga pulong sa Isaias 61:10: “Sa walay pakyas ako magahugyaw kang Jehova. Ang akong kalag magamaya diha sa akong Diyos.” Ang saad sa Isaias 35:10 natuman diha kanila: “Ang mga linukat mismo ni Jehova mobalik ug moabot gayod sa Sion uban ang singgit sa kalipay; ug ang kasadya nga walay kataposan anha sa ibabaw sa ilang mga ulo. Sa paghugyaw ug paglipay sila makakab-ot, ug ang kasubo ug panghupaw mangahanaw.” Mao kana ang kalipay sa mga mensahero ni Jehova sa diyosnong pakigdait balik niadtong 1919 sa dihang sila nagsugod sa pagsangyaw sa maayong balita ngadto sa tanang katawhan. Sukad niadto hangtod niining adlawa, wala sila mohunong sa pagbuhat niining buluhatona, ug ang ilang kalipay nagausbaw. Sa iyang Wali sa Bukid, si Jesus miingon: “Malipayon ang mga madaiton, sanglit pagatawgon sila nga ‘mga anak sa Diyos.’” (Mateo 5:9, potnot) Ang kamatinud-anon nianang pahayaga nasinati sa nanghibilin sa dinihogang “mga anak sa Diyos” gikan sa 1919 hangtod karong adlawa.
12, 13. (a) Kinsa ang miduyog sa Israel sa Diyos sa pag-alagad kang Jehova, ug unsang buluhatona ang ilang ginahimo? (b) Unsang dakong kalipay ang nasinati sa dinihogang mga alagad ni Jehova?
12 Sa nanglabay ang katuigan, ang gidaghanon sa Israel sa Diyos misulbong hangtod sa mga 1930 sa dihang ang pagtigom sa mga nanghibilin sa dinihogan duol nang matapos. Nahunong ba niadto ang pag-uswag sa gidaghanon sa mga magsasangyaw sa maayong balita? Wala gayod. Ang usa ka dakong panon sa mga Kristohanon nga may yutan-ong paglaom misugod sa pagtungha, ug sila miduyog dayon sa ilang dinihogang mga igsoon sa pagsangyawng buluhaton. Nakita ni apostol Juan kining dakong panon diha sa panan-awon, ug ang paagi sa iyang paghubit kanila maoy talagsaon: “Sila anaa sa atubangan sa trono sa Diyos; ug sila nagahatag kaniya ug sagradong pag-alagad adlaw ug gabii.” (Pinadayag 7:15) Oo, ang dakong panon nagmapuliki sa pag-alagad sa Diyos. Ingong resulta, sa dihang ang gidaghanon sa dinihogan misugod sa pagkunhod, human sa 1935, ang pagsangyaw nga buluhaton gihimo sa mas gipadakong gikusgon pinaagi niining matinumanong mga kaubanan.
13 Niining paagiha ang Isaias 60:3, 4 natuman: “Ang kanasoran moduol sa imong kahayag, ug ang mga hari sa kadan-ag sa imong pagsidlak. Iliraw ang imong mga mata sa palibot ug tan-awa! Silang tanan natigom pagtingob; sila nanganhi kanimo. Gikan sa halayo ang imong kaugalingong mga anak nga lalaki padayong nagapangabot, ug ang imong mga anak nga babaye pagadad-on nga kinugos.” Ang kalipay nga ipahinabo niini nga mga kaugmaran ngadto sa Israel sa Diyos magilakong gihubit sa Isaias 60:5, diin atong mabasa: “Nianang panahona ikaw makakita ug tinong mosidlak, ug ang imong kasingkasing mokurog gayod ug modako, tungod kay ang kabahandianon sa dagat mahianha kanimo; ang mga kahinguhaan sa kanasoran mismo moabot kanimo.”
Organisasyon ni Jehova Nagaabante
14. (a) Unsang panan-awon sa langitnong mga butang ang nakita ni Ezequiel, ug unsang sugo ang iyang nadawat? (b) Unsay nasabtan sa katawhan ni Jehova sa modernong panahon, ug unsay gibati nilang obligasyon?
14 Sa 613 W.K.P., nakita ni Ezequiel diha sa panan-awon ang langitnon, samag-karong organisasyon ni Jehova nga nagaabante. (Ezequiel 1:4-28) Human niana, si Jehova miingon kaniya: “Anak sa tawo, lakaw, sumulod ka taliwala sa balay sa Israel, ug ikaw magasulti gayod sa akong mga pulong ngadto kanila.” (Ezequiel 3:4) Niining tuiga sa 1997, atong nasabtan nga ang langitnong organisasyon ni Jehova nagaabante gihapon nga walay hunong sa pagtuman sa mga katuyoan sa Diyos. Busa, matukmod gihapon kita sa pagsulti sa uban bahin nianang mga katuyoana. Sa iyang adlaw, si Ezequiel nagsulti pinaagig direktang pagdasig ni Jehova. Karong adlawa, kita nagasulti gikan sa dinasig nga Pulong ni Jehova, ang Bibliya. Ug pagkanindot sa mensahe nianang basahona alang sa katawhan! Samtang daghan ang nabalaka bahin sa umaabot, gipakita sa Bibliya nga ang mga kahimtang mas grabe pa—ug sa samang panahon, mas maayo pa—kay sa ilang mahunahuna.
15. Nganong ang mga kahimtang mas grabe pa kay sa gihunahuna sa daghan karong adlawa?
15 Mas grabe ang kahimtang tungod kay, ingon sa atong nakat-onan sa miaging mga artikulo, ang Kakristiyanohan ug ang tanang ubang bakak nga mga relihiyon sa dili madugay pagalaglagon, ingon ka bug-os sa Jerusalem niadtong 607 W.K.P. Dugang pa, ang bug-os globonhong politikal nga kahugpongan, nga gihulagway sa basahon sa Pinadayag ingong usa ka mabangis nga hayop nga may pito ka ulo ug napulo ka sungay, hapit nang mapapha, sama sa daghang paganong mga silingan sa Jerusalem. (Pinadayag 13:1, 2; 19:19-21) Sa adlaw ni Ezequiel tin-aw nga gihubit ni Jehova ang kalisang gumikan sa nagsingabot nga kalaglagan sa Jerusalem. Apan ang iyang mga pulong mas makahuloganon pa sa dihang masabtan sa mga tawo ang nagasingabot nga kalaglagan niining kalibotana. Si Jehova miingon kang Ezequiel: “Alang kanimo, Oh anak sa tawo, panghupaw uban sa pagkabunggo sa imong mga hawak. Bisan uban sa kapaitan manghupaw ka atubangan sa ilang mga mata. Ug mahitabo nga, sa diha nga sila moingon kanimo, ‘Tungod ba sa unsa nanghupaw ka?’ ikaw gayod magaingon, ‘Tungod sa taho.’ Kay kini moabot gayod, ug ang matag kasingkasing matunaw ug ang tanang kamot mangaluya ug ang matag espiritu magmagul-anon gayod ug ang tanang tuhod mahimong mahuyang ingon sa tubig. ‘Tan-awa! Kini moabot gayod ug pahinaboon gayod,’ nagaingon ang Soberano Ginoong Jehova.” (Ezequiel 21:6, 7; Mateo 24:30) Taliabot ang makalilisang nga mga hitabo. Ang atong dulot nga kabalaka sa isigkatawo magtukmod kanato nga ipalanog ang pasidaan, aron isulti ang “taho” sa umaabot nga kapungot ni Jehova.
16. Alang sa mga maaghop, nganong ang mga kahimtang mas maayo pa kay sa gihunahuna sa daghan?
16 Sa samang panahon, alang sa mga maaghop ang kahimtang maayo kaayo kay sa mahunahuna sa kadaghanan. Sa unsang paagi? Sa paaging si Jesu-Kristo namatay alang sa atong mga sala ug karon nagamando na ingong Hari sa Gingharian sa Diyos. (1 Timoteo 1:15; Pinadayag 11:15) Ang maorag dili masulbad nga mga suliran sa katawhan sa dili madugay buntogon pinaagi nianang langitnong Gingharian. Ang kamatayon, sakit, korapsiyon, gutom, ug krimen mahimong mga butang sa nangagi, ug ang Gingharian sa Diyos magamandong walay kababagan ibabaw sa usa ka paraisong yuta. (Pinadayag 21:3, 4) Ang katawhan magpahimulos sa diyosnong pakigdait—usa ka malinawong relasyon uban kang Jehova nga Diyos ug sa usag usa.—Salmo 72:7.
17. Unsang mga pag-uswag ang nakapalipay sa mga kasingkasing sa mga mensahero sa diyosnong pakigdait?
17 Sa pipila ka bahin sa yuta, tataw nga dakong panon sa mga maaghop ang misanong niining mensahea sa diyosnong pakigdait. Sa paghisgot lamang ug pipila ka pananglitan, sa miaging tuig ang Ukraine mitaho ug 17-porsiyentong pag-uswag sa mga magmamantala. Ang Mozambique nagtahog 17-porsiyentong pag-uswag, ang Lithuania may 29-porsiyentong pag-uswag. Ang Rusya may 31-porsiyentong pag-uswag, samtang ang Albania nakasinati ug 52-porsiyentong pag-uswag sa mga magmamantala. Kini nga mga pag-uswag naghawas sa tinagpulo ka libong matinud-anog-kasingkasing nga mga indibiduwal kinsa buot nga motagamtam sa diyosnong pakigdait ug kinsa mibarog dapig sa pagkamatarong. Ang maong kusog nga pagtubo nagahatag ug kalipay sa tibuok Kristohanong panag-igsoonay.
18. Maminaw man o dili ang mga tawo, unsa man gayod ang atong tinamdan?
18 Andam bang mosanong ang mga tawo sa dapit nga imong gipuy-an? Kon mao, kami nagamaya duyog kanimo. Sa ubang teritoryo, bisan pa niana, nanginahanglag daghan, daghang oras sa paningkamot una pa makaplagan ang bisan usa ka tawong interesado. Kadtong nagaalagad ba sa maong mga teritoryo naluya o nasubo? Wala. Nahinumdoman sa mga Saksi ni Jehova ang mga pulong sa Diyos ngadto kang Ezequiel sa dihang Siya unang misugo sa batan-ong propeta nga mosangyaw ngadto sa iyang Hudiyohanong mga kaubanan: “Alang kanila, maminaw man sila o dili—kay sila usa ka rebelyosong balay—sila manghibalo usab nga may usa ka manalagna sa ilang taliwala.” (Ezequiel 2:5) Sama kang Ezequiel, padayon kitang mosulti sa mga tawo bahin sa diyosnong pakigdait mosanong man sila o dili. Kon maminaw sila, malipay kita. Apan kon ila kitang isalikway, biaybiayon, o tingali lutoson, kita moagwanta. Gihigugma nato si Jehova, ug ang Bibliya nagaingon: “Ang gugma . . . nagaagwanta sa tanang butang.” (1 Corinto 13:4, 7) Sanglit kita nagasangyaw nga malahutayon, ang mga tawo makaila kon kinsa ang mga Saksi ni Jehova. Sila nahibalo sa atong mensahe. Kon moabot na ang kataposan, sila mahibalo nga ang mga Saksi ni Jehova misulay sa pagtabang kanila sa pagtagamtam sa diyosnong pakigdait.
19. Ingong mga alagad sa matuod nga Diyos, unsang dakong pribilehiyo ang atong gipakabahandi?
19 Aduna pa bay mas dakong pribilehiyo kay sa pag-alagad kang Jehova? Wala! Ang atong labing dakong kalipay nagasumikad sa atong relasyon sa Diyos ug sa kahibalo nga kita nagabuhat sa iyang kabubut-on. “Malipayon ang katawhan nga nahibalo sa mahugyawong pagsinggit. Oh Jehova, sa kahayag sa imong nawong sila padayong nagalakaw.” (Salmo 89:15) Hinaot nga ipakabahandi nato kanunay ang kangaya sa pagkahimong mga mensahero sa Diyos sa pakigdait ngadto sa katawhan. Hinaot kita sa kamakugihon magabuhat sa atong bahin niining buluhatona hangtod si Jehova magaingong kini natapos na.
Nahinumdom Ka Ba?
◻ Kinsa ang mga mensahero sa Diyos sa pakigdait karong adlawa?
◻ Giunsa nato pagkasayod nga ang Dakong Babilonya nakasinati ug pagkapukan niadtong 1919?
◻ Unsa ang pangunang kabalaka sa “dakong panon”?
◻ Nganong ang umaabot mas grabe pa kay sa gihunahuna sa kadaghanang katawhan karong adlawa?
◻ Alang sa mga mabuot ug kasingkasing, nganong ang umaabot mas maayo kay sa ilang ginahunahuna?
[Hulagway sa panid 21]
Sa dihang ilang makita ang pagkadaot sa tawhanong katilingban, daghan ang mobati ug kakuyaw
[Hulagway sa panid 23]
Ang mga mensahero sa diyosnong pakigdait mao ang labing malipayong katawhan sa yuta karong adlawa