Si Jehova Miibot sa Sakoban sa Iyang Espada!
“Ang tanang unod makaila nga ako, mao si Jehova, miibot sa akong espada gikan sa sakoban niini.”—EZEKIEL 21:5.
1. Batok kang kinsa gigamit ni Jehova ang iyang espada sa Juda ug sa Israel?
ANG espada ni Jehova tukmang makapukaw ug kahadlok sa iyang mga kaaway. Apan dihang iyang gigamit kini batok sa mga mamumuhat ug daotan sa mga gingharian sa Juda ug sa Israel, nasayod ba sila kon unsa gayoy nahitabo? Oo, sila gipahibalo nga si Jehova nagpadala sa iyang simbolikong espada gikan sa sakoban niini.—Esdras 9:6-9; Nehemias 1:8; 9:26-30.
2. Unsay gipahayag ni Jehova bahin sa iyang ”espada,” unsang mga pangutana ang mobangon?
2 Pinaagi sa iyang manalagna ug magbalantay nga si Ezekiel, ang Diyos miingon: “Ang tanang unod makaila nga ako, mao si Jehova, miibot sa akong espada gikan sa sakoban niini.” (Ezekiel 21:5) Kadto bang mga pulonga aplikado lamang sa karaang panahon? O sila ba dunay kahulogan alang nato?
Mga Panagna sa Kalaglagan sa Jerusalem
3. Unsay gisulti ni Ezekiel sa mga binihag sa Babilonya, ug unsay katugbang niini sa modernong-adlaw?
3 Ang karro ni Jehova milihok na usab, ug nabalhin usab ang lokasyon ni Ezekiel. Ingon nga daw ang samag karro nga organisasyon sa Diyos mibalhin sa usa ka tan-awanan ibabaw sa Bukid sa mga Olibo. Gikan didto mitagna si Jesus sa kalaglagan nga midangat sa Jerusalem sa 70 K.P., usa ka kalumpagan nga matagnaon sa kataposan sa Kakristiyanohan. (Marcos 13:1-20) Diha sa panan-awon, si Ezekiel mismo gikuha gikan sa suba sa Chebar, apan pinaagi sa espiritu sa Diyos siya karon gibalik ngadto sa iyang balay sa pagkabihag sa Babilonya. Didto gisugilon niya sa ubang mga binihag ang ‘tanang butang nga gipakita kaniya ni Jehova panan-awon.’ Sa susama, ang dinihogang “maghalantay” ni Jehova ug ang kaubang mga saksi karong adlawa nagwali sa tanang butang gipadayag ngadto kanila sa Nagsakay sa langitnong karro.-Ezekiel 11:22-25.
4. Unsay pagsanong sa Hudiyohanong mga binihag sa simbolikong mga aksiyon ni Ezekiel?
4 Pinaagi sa simbolikong mga buhat, gipakita ni Ezekiel sa mga binihag nga Hudiyohanon nga haduol na ang kalaglagan sa nasod. (Basaha ang Ezekiel 12:1,7.) Ang manalagna nagdala ug “putos sa pagkabinihag” sa pagpaila sa pila ka butang nga madala sa mga binihag sa ilang mga abaga. Ang kalisang sa dili madugay molukop sa nailog nga Jerusalem. Bisag daghang wala kaayo mohatag ug seryosong pagtagad sa pasidaan, si Ezekiel gisugo sa pagsulti sa katawhan: “Dili na gayod igapauswag pa sa laing panahon.” Karon dunay samang pagyubit usab sa mga pasidaan sa Diyos sa mga tagna, apan dako kitag mahimo sa pagtabang sa mga tawong nagapangitag kamatuoran sa pagtuo sa katumanan niini.-Ezekiel 12:8-28.
5. Sanglit haduol na man “ang adlaw ni Jehova,” unsa ang tukma nga mga pagsaway?
5 Kadtong dili mamati sa magbalantay ni Jehova kinahanglang masayod nga ilang bation ang “espada” ni Jehova. Busa, kadtong responsable sa sayop nga pagtuo bahin sa kasegurohan sa Jerusalem ug sa Juda gihukman. Ang bakak nga mga manalagna gitandi sa makalaglag nga mga irong ihalas, ug gipakita nga gitabonan sa mga bakakon ang mahuyang nga kuta, o walay kapuslanang mga proyekto, sa katawhan. Ang bakak nga mga manalagnang babaye gihukman usab. “Ang adlaw ni Jehova,” haduol na, ug ang iyang nawong gipatumong batok niadtong ‘nagpalayo kaniya,’ sa ato pa, ‘nagpahinungod sa ilang kaugalingon sa pagpalayo gikan sa pagsunod sa Diyos.’ Kon kita nagpahinungod kang Jehova, siyempre dili gayod kita magpalayo gikan sa iyang balaang pag-alagad.—Ezekiel 13:1-14:11.
6. Duna bay tawo nga makaluwas, sa pagkabaliko sa katawhan sa Juda ug unsay gitudlo niini kanato?
6 Kinsa ang makaluwas sa balikong katawhan sa Juda? Bisan ang matarong nga si Noe, Daniel, ug Job dili gani makaluwas kanila dihang ipakanaog sa Diyos ang iyang paghukom sa yuta. Nan, aron kita maluwas, kinahanglan atong buhaton ang atong kaugalingong responsabilidad atubangan sa Diyos ug tumanon ang iyang kabubut-on.—Ezekiel 14: 12-23; Roma 14:12.
7. Gipakasama sa unsa ang Juda apan unsay tukoron sa Diyos uban sa mga matinumanon?
7 Tungod sa iyang dili-matinumanong mga molupyo, gipakasama ang Juda sa usa ka ihalas nga paras nga walay maayong bunga ug angay isugnod sa kalayo. (Ezekiel 15:1-8) Gipakasama usab siya sa usa ka masuso nga giluwas sa Diyos gikan sa Ehipto ug gipadako hangtod sa pagkadalaga. Gikuha siya ni Jehova ingon nga iyang asawa, apan mibali siya sa bakak nga mga diyosdiyos ug mag-antos sa kalaglagan tungod sa iyang espirituwal nga pagpanapaw. Apan, diha sa mga matinumanon ang Diyos ‘magtukod ug walay kataposang pakigtugon’—ang bag-ong pakigtugon sa espirituwal nga Israel.—Ezekiel 16:1-63; Jeremias 31:31-34; Galatia 6:16.
8. (a) Gipakasama sa unsa ang Babilunya ug Ehipto? (b) Sa unsang paagi may kalabotan kita sa pagbungkag ni Zedekias sa iyang panumpa?
8 Sunod, ang mga magmamando sa Babilonya ug Ehipto gipakasama sa dakong mga agila. Giputol sa usa ang tumoy sa sanga sa sidro pinaagi sa pagtangtang kang Haring Jehoiachin ug gipulihan siya kang Zedekias. Bisag nanumpa sa pagkamaunongon si Zedekias kang Nabucodonosor, iyang gibungkag kini, ug siya nangayog militaryong tabang sa magmamando sa Ehipto, ang laing dakong agila. Kon si Zedekias misangpit sa ngalan sa Diyos pinaagi sa iyang pagpanumpa, ang iyang pagbungkag niana mohatag pasipala kang Jehova. Ang mismong paghunahuna sa paghatag pasipala sa Diyos angay mopugong kanato sa pagkahimong bakakon sa atong pulong. Pagkadako sa atong pribilehiyo sa pagdala sa balaang ngalan ingong mga Saksi ni Jehova!—Ezekiel 17:1-21.
9, 10. (a) Unsang tagna ang narekord sa Ezekiel 17:22-24, apan unsay kinahanglang buhaton aron kita makapahimulos gikan sa katumanan niana? (b) Kinsa ang may tulobagon sa mga sangpotanan sa atong paggawi?
9 Misunod ang makalipay nga Mesiyanikong tagna. (Basaha ang Ezekiel 17:22-24.) Dinhi, ang “usa nga lunhaw” mao ang Mesiyanikong Hari, si Jesu-Kristo. Gitanom ni Jehova diha sa langitnong Bukid sa Sion, siya nahimong “usa ka dakong sidro,” usa ka tuboran sa panalipod ug panalangin dihang magmando siya ibabaw sa yuta. (Pinadayag 14:1) Sa pagkatinuod kita angay madasig niini.
10 Apan, aron makapahimulos kita sa katumanan sa Mesiyanikong tagna, kinahanglan maghupot kita ug maayong relasyon kang Jehova. Ang kauban ni Ezekiel nga mga binihag tingali naghunahuna nga sila dunay maayong relasyon sa Diyos ug ilang gipasanginlan ang ilang mga ginikanan sa ilang mga pag-antos. Apan gipasiugda sa manalagna nga ang matag tawo mao ang manubag sa mga sangpotan sa iyang kaugalingong paggawi. (Ezekiel 18:1-29; itandi ang Jeremias 31:28-30.) Sunod miabot ang usa ka hangyo. (Basaha ang Ezekiel 18:30-32.) Oo, si Jehova maluloy-on sa mahinulsolon ug walay kalipay sa kamatayon sa kang bisan kinsa nga mamatay. Busa, ang Diyos miingon: ‘Bumalik kamo ug mangabuhi, O kamo nga katawhan.’—Itandi ang 2 Pedro 3:9.
11. Gipakasama sa unsa ang mga magmamando sa Juda, ug unsay nahitabo niya dihang giigo siya sa “espada” ni Jehova?
11 Diha sa pagbakho tungod sa kalumpagan sa Juda, ang iyang mga magmamando gipakasama sa itoy nga mga leon. Si Haring Jehoahaz namatay sa pagkabihag didto sa Ehipto, si Jehoiakim nadakpan ni Nabucodonosor, ug si Jehoiachin gibihag ngadto sa Babilonya. Gibutang sunod ni Nabucodonosor si Zedekias sa trono ni Juda, apan siya ming-alsa. Sa ulahi, sama sa usa ka gikulong nga leon, si Zedekias gidala nga dinakpan ngadto sa Babilonya. Sa katumanan sa matagnaong pagbakho, sa 607 W.K.P. ang Juda nahimong daot nga paras, “ug siya walay malig-ong sungkod niana, walay setro sa pagmando.” Siya naigo sa “espada” ni Jehova!-Ezekiel 19:1-14: Jeremias 39:1-7.
12. (a) Sama sa ilang mga ginikanan, unsang daotang mga buhat ang gihimo sa mga katalirongan ni Ezekiel? (b) Nganong nangutana ang mga tawo kon si Ezekiel ba nagpamulong ug mga sambingay, ug unsang pasidaan ang gihatag niini alang kanato?
12 Giduol sa “mga tigulang gikan sa Israel,” gipahayag ni Ezekiel ang mensahe sa Diyos. Iyang gipadayag nga bisag giluwas ni Jehova ang mga Israelinhon gikan sa Ehipto ug gihatagan sila sa Iyang Kasugoan, ilang gisalikway kana ug misimbag mga diyosdiyos. Sanglit sad-an ang mga katalirongan ni Ezekiel sa ang daotang buhat, gihukman sila sa Diyos. Tingali tungod sa pagduhaduha ug dili tungod kay wala sila makatugkad sa gipasabot Ezekiel, ang mga tawo nangutana: “Dili ba siya magsusulti sa mga sambingay?” Ilang hibaloan sa ulahi nga dili mga sambingay ang mensahe sa manalagna. Kini maoy pasidaan kanato sa dili pagbaton ug maduhaduhaong tinamdan bahin sa katumanan sa mga pasidaan sa Kasulatan.—Ezekiel 20:1-49.
Si Jehova nga Maggugubat
13. Ang “espada” sa Diyos nagkahulogan ug unsa, ug unsay mahibaloan sa “tanang unod” dihang gamiton kanang maong espada?
13 Sa ikapitong tuig sa pagkahimong binihag (Ab 10, 611 W.K.P.), walay duha tunga ka tuig ang nabilin una mosugod “ang adlaw sa gubat ni Jehova” batok sa Juda ug Jerusalem. (Ezekiel 13:6; 20:1) Matikdi kon unsay giingon ni Jehova nga Maggugubat ngadto kang Ezekiel. (Basaha ang Ezekiel 21:1-5.) Ang “espada” sa Diyos nagkahulogan sa yutan-ong ahensiya nga iyang gamiton, ug kini mahimong maglakip sa iyang langitnon, samag-karro nga organisasyon. Ang “Matarong” ug “daotan” nga mga molupyo sa Juda ug Israel, maingon ang mga nasod nga may pagdumot sa katawhan sa Diyos, mamatay sa sulab sa “espada” sa Diyos. Sa pagkatinuod, “ang tanang mga unod” makaila nga si Jehova ang nakiggubat batok kanila.
14. (a) Sama kang Ezekiel, unsay gihatagag pagtagad sa dinihogang mga saksi ni Jehova? (b) Unsay nagpakita nga ang mga magmamando sa Kakristiyanohan dili makaikyas sa “espada” sa Diyos?
14 Sama kang Ezekiel, gihatagag pagtagad sa dinihogang mga saksi ni Jehova karong adlawa ang “espada” nga ibakyaw sa Diyos batok sa mga sumusunod sa Kakristiyanohan, diin ang gingharian niini mao ang antitipikong “yuta sa Israel.” Sa dili madugay kanang maong “espada” mabati sa “tanang unod gikan sa habagatan ngadto sa amihanan,” diha sa tanang tagsunod sa bakak nga relihiyon. Ang mga mapahitason sa mga adlaw ni Ezekiel walay angay ikalipay, sa pagtuo nga ang “espada” ni Jehova dili ‘mohimog kamatay’ batok kanila. Gisalikway nianang maong “espada” ang harianong setro sa gingharian sa Juda, sama sa pagsalikway niini sa laing “kahoy,” o setro. Sa pagkatinuod, ang mga magmamando sa Kakristiyanohan dili gayod ipabiling buhi sa ahensiya sa Diyos sa pagpatay.—Ezekiel 21:6-17.
15. Unsang hitabo maylabot kang Nabucodonosor ang nagpakita nga walay makapugong sa “espada” ni Jehova?
15 Ang tagna ni Ezekiel nagpadayon sa pagpakita nga walay bisan kinsa, lakip sa mga demonyo, ang makapugong sa “espada” ni Jehova. (Basaha ang Ezekiel 21:18-22.) Bisag migamit pa si Haring Nabucodonosor ug demonyohanong panagnatagna, gitino ni Jehova nga mosulong ang Babilonyanhon batok sa Jerusalem, dili batok sa mas huyang nga Ammonitehanong kapital sa Rabba. Gikan sa usa ka sudlanan mipili si Nabucodonosor ug usa ka udyong nga gitiman-an alang sa Jerusalem. Migamit siyag terapim (tingali, gagmayng mga larawan nga tawog porma) ug nangitag mga timaan diha sa atay sa usa ka pinatayang hayop. Apan, bisan pa sa panagnatagna, siya miagi sa alagianan paingon sa kapital sa Juda ug gisikop kana. Tinuod, si Nabacudonosor naghimog pakigsaad kang Haring Zedekias. Tungod sa ilang pagbungkag sa panumpa, si Zedekias ug ang ubang mga Hudiyo “nadakpan pinaagi sa kamot” ug gidalang bihag sa Babilonya.—Ezekiel 21:23, 24.
16. (a) Unsay nahitabu sa katumanan sa Ezekiel 21:25-27? (b) Kanus-a nagsugod ang Panahon sa mga Hentil, ug gitapos kini sa unsang hitabo?
16 Tungod sa pagsukol, si Zedekias gisamaran sa samad sa kamatayon. (Basaha ang Ezekiel 21:25-27.) Dihang napalagpot ang hari sa Juda, ang harianong mitra ug ang korona gikuha. (2 Hari 25:1-7) Ang “hataas” nga gingharian sa Juda ‘gipaubos’ tungod sa pagkalaglag niini sa 607 W.K.P. Busa ang “ubos” nga mga gingharian sa Hentil “gipataas,” nga gipasagdan sila sa pagmando sa yuta nga walay pagbalda sa mahulagwayong gingharian sa Diyos. (Deuteronomio 28:13, 15, 36, 43, 44) Busa nagsugod “ang tinudlong panahon sa kanasoran”—ang Panahon sa mga Hentil—nga natapos sa 1914 dihang gitugyan sa Diyos ang pagkahari kang Jesu-Kristo. ‘ang usa nga dunay legal nga katungod’ niana. (Lucas 21:20-24; Salmo 110:1, 2; Daniel 4:15-28; 7:13, 14) Uban kang Jesus diha sa langitnong trono, ang mga nasod sa Hentil dili makatamak nianang gisimbolohan sa karaang Jerusalem, ang legal nga manunod sa gingharian ni David.—Hebreohanon 12:22.
17. Unsang “bakak” ang gisangyaw sa mga manalagnang Ammonitehanon?
17 Ang mga propeta nga Ammonitehanon nag-ingon nga ang kapital sa Ammon, ang Rabba, makalingkawas sa kalaglagan pinaagi sa espada ni Nabucodonosor. Apan “bakak” kini, kay ang tibuok nga yuta sa Ammon gilaglag. Sa atong panahon karon, ang Diyos nagbaod nga ang kalaglagan sa mga nasod mosunod sa kalaglagan sa Kakristiyanohan, sama sa pagkalaglag sa Rabba human nga nalaglag ang Jerusalem.—Ezekiel 21:28-32; Pinadayag 16:14-16.
Ang Jerusalem Gipaatubang sa Hukmanan
18. Unsang mga kasal-anan nga gisaway ni Ezekiel ang Jerusalem, ug unsay atong reaksiyon niini?
18 Nagpahayag na usab sa pulong ni Jehova, gisaway ni Ezekiel ang Jerusalem tungod sa mga kasal-anan sama sa pag-ula sa dugo, pagsimbag mga diyosdiyos, haluag nga paggawi, panikas, ug sa pagkalimot sa Diyos. Giabusohan sa iyang mga pangulo nga sad-an sa dugo ang ilang gahom hangtod sa punto sa hudisyal nga pagbuno, ug pagbutangbutang aron mangawala ang ilang mga kaaway pinaagi sa pagpasaka ug bakak nga mga akusasyon kanila. Tungod sa maong buhat nga daotan, ang mga molupyo sa Jerusalem nagkatibulaag. Ang kahibalo niini angay makalig-on sa atong tinguha sa paglikay sa pag-abuso sa gahom, sa haluag nga paggawi, sa pagbutangbutang, ug sa ubang dagkong mga sala.—Ezekiel 22:1-16.
19. Sa unsang paagi pagatunawon ang mga katawhan sa Juda, ug nganong tukma ang pagpatay kanila?
19 Tunawon usab ni Jehova ang katawhan sa Juda diha sa hasohasan. Kini dili maoy paagi sa paghinlo kanila kondili sa pagtunaw kanila diha sa iyang nagkalayong kasuko. (Ezekiel 22:17-22) Kini nga paghukom maoy angay sa nagkunsabong mga manalagna, sa malapasong mga saserdote, dalo nga mga prinsipe, ug daotang katawhan. Ang tanan gisaway. Sanglit wala may bisan usa taliwala kanila nga nagbarog alang sa pagkamatarong, gilaglag sila sa Diyos pinaagi sa kalayo sa iyang kasuko.—Ezekiel 22:23-31.
Angay nga Silot
20. Diha sa unsang simbolikong mga babaye nga ibubo sa Diyos ang iyang kasuko, ug unsang mga detalye ang imong ikahatag mahitungod sa ilang pagkatawo?
20 Ang pagbubo sa kasuko sa Diyos mao ang sunod nga gipakita dihang gipakanaog ang paghukom diha sa duha ka simbolikong babaye nga sad-an sa espirituwal nga pagpanapaw. Ang usa mao si Oholah, ang napulo ka tribong gingharian sa Israel lakip sa Samaria nga iyang kapital. Siya mao “ang magulang” tungod kay ang iyang kadaghanang sakop gikan man sa banay sa Israel, lakip niadtong kaliwat gikan sa kamagulangang anak nga mga lalaki ni Jacob, si Reuben ug Simeon. Ang iyang igsoong babaye mao si Oholibah. ang duha ka tribong Juda lakip sa Jerusalem nga iyang kapital. Ang Oholah nagkahulogang “Iyang Balongbalong.” Ang Oholibah nagkahulogang “Ang Akong Balongbalong Anaa Kaniya,” nga haom usab sanglit ang balongbalong sa Diyos, kun templo, anaa man sa Juda.—Ezekiel 23: 1-4.
21. Diin nangitag kasegurohan si Oholah, nga naghatag ug unsang pasidaan kanato?
21 Ang Oholah (Israel) mihunong sa paglungtad dihang napukan siya sa mga Asiryanhon sa 740 W.K.P. Unsay iyang nahimo? (Basaha ang Ezekiel 23:5-7.) Ang Oholah sa pagkawalay pagsalig midangop sa politikal nga mga kaabin, ug kini misangpot sa iyang pagdawat sa bakak nga pagsimba sa iyang mga kaabin, nga sa ingon ‘iyang gihugawan ang iyang kaugalingon tungod sa ilang mga diyosdiyos.’ Napasidan-an gikan sa espirituwal nga pagpanapaw ni Oholah, kinahanglang magbantay kita batok sa kalibotanong mga panag-uban nga makalaglag sa atong pagtuo.—Santiago 4:4; 1 Juan 2:15-17.
22. Sama kang Oholah ug Oholibah, unsay gihimo sa Kakristiyanohan, apan unsay mahitabo kaniya?
22 Tungod sa pagpadayon sa mas makasasalang dalan kay sa iyang igsoong babaye, si Oholibah (Juda) nag-antos sa katalagman diha sa mga kamot sa Babilonya sa 607 W.K.P. Ang iyang mga anak nangamatay pinaagi sa espada gidala nga bihag, ug siya napakaulawan taliwala sa mga nasod. Sama kang Oholah ug Oholibah, ang Kakristiyanohan nakahimog espirituwal nga panapaw, usa ka kasal-anan sa panan-aw sa Diyos nga iyang giangkong ginasimba. Ang Protestantismo, uban sa iyang daghang mga denominasyon, naghugaw sa ang kaugalingon sa komersiyal ug sa politikal nga mga gahom sa kalibotan nga labaw kay iyang magulang nga igsoong babaye, ang Romano Katolisismo. Busa, tinoon ni Jehova nga ang tanang Kakristiyanohan malaglag. Unya ang mga tawo makaila nga siya mao ang Soberano Ginoong Jehova. Kini makalig-on sa tong determinasyon sa paglikay sa dili-angay kalibotanong panag-uban kon atong hinumdoman nga ang mga sagabay sa Kakristiyanohan sa dili madugay mobali batok kaniya ug mopakanaog sa silot sa Diyos diha kaniya ingong pangunang bahin sa Babilonyang Bantogan, ang kalibotanong imperyo sa bakak nga relihiyon.—Ezekiel 23:8-49; Pinadayag 17:1-6, 15-18.
Makurat ang mga Salingkapaw
23. Sa unsang paagi gihulagwayan ang Jerusalem diha sa mensahe kang Ezekiel sa ulahing bahin sa Disyembre 609 W.K.P., ug unsay mahitabo kaniya?
23 Sa mismong adlaw sa ulahing bahin sa Disyembre nga nagsugod si Nabucodonosor sa iyang 18-ka-bulang pagsikop sa Jerusalem (Tebeth 10, 609. W.K.P.), gihatagan sa Diyos si Ezekiel ug laing buhi nga mensahe. Diha niana, ang nasikop nga Jerusalem gihulagwayan ingong kawa nga sa sulod niini ‘gilat-an’ ang mga molupyo sa siyudad. Ang moral nga kahugawan nakahatag ug ‘taya’ nianang simbolikong kawa. “Sa tinagsa-tagsa,” ang mga mamumuhat ug daotan pagawason sa Jerusalem, ug dili matapos ang iyang pagkaalaot hangtod nga mag-antos siya sa kalaglagan. Gihukman ni Jehova ang Jerusalem sumala sa iyang daotang mga pakiglabot, ug ang siya angay laglagon, sama sa Kakristiyanohan.—Ezekiel 24:1-14.
24. (a) Nganong wala magpakitag kaguol si Ezekiel dihang namatay ang iyang asawa? (b) Dihang mokanaog kaniya ang “espada” ni Jehova, unsay reaksiyon sa Kakristiyanohan, ug unsa ang iyang maila?
24 Sunod, si Ezekiel gisugo sa paglihok sa katingalahang paagi. (Basaha ang Ezekiel 24:15-18.) Nganong ang manalagna wala man mopakitag kaguol dihang namatay ang iyang asawa? Sa pagpakita sa karurat sa mga Hudiyo sa kalaglagan sa Jerusalem, sa iyang mga molupyo, ug sa templo. Igo na ang nahisgotan ni Ezekiel bahin ning mga butanga ug dili na mohisgot pa sa mensahe sa Diyos hangtod nga ikasugilon kaniya nga napukan na ang Jerusalem. Sa susama, ang Kakristiyanohan ug ang iyang salingkapawng mga relihiyonista makurat unya sa panahon sa ilang kalaglagan. Ug human sa pagsugod sa “dakong kasakitan,” ang gipamulong sa dinihogang magbalantay nga matang bahin sa iyang kataposan igo na. (Mateo 24:21) Apan dihang ang “espada” sa Diyos mokanaog diha sa Kakristiyanohan, kining makurat nga mga relihiyonista ug ang uban ‘makaila nga siya mao si Jehova.’—Ezekiel 24:19-27.
Unsay Imong Tubag?
◻ Unsay nahitabo dihang gigamit ni Jehova ang iyang “espada” batok sa Juda ug Israel?
◻ Sa unsang paagi nakaapektar kanato ang pagbungkag ni Zedekias sa iyang panumpa kang Nabucodonosor?
◻ Unsay kahulogan sa “espada” sa Diyos?
◻ Unsang hitabo maylabot kang Nabucodonosor ang nagpakita nga walay makapugong sa “espada“ ni Jehova?
◻ Unsay nahitabo sa katumanan sa Ezekiel 21:25-27?
◻ Unsay gihulagwayan sa wala pagpakita ni Ezekiel ug kaguol dihang namatay ang iyang asawa?
[Hulagway sa panid 18]
Dihang gibungkag ni Zedekias ang iyang panumpa kang Nabucodonosor ug gibihag, unsang tagna ang misugod sa pagkatuman?