ZEMARIHANON

Usa ka banay o tribo nga naggikan sa anak nga lalaki ni Ham nga si Canaan. (Gen 10:​15, 18; 1Cr 1:​13, 16) Ang paghisgot niining Canaanhong katawhan tali sa mga “Arvadnon” (gilangkit sa Arvad nga dili layo sa kabaybayonan sa Fenicia) ug sa mga “Hamatihanon” (lagmit nga gilangkit sa Hamat sa Sirya) nagpaila nga ang mga Zemarihanon nanimuyo ubay sa A nga kabaybayonan sa Fenicia. Sumala sa usa ka pagtul-id, gihisgotan sa Ezequiel 27:8 ang “hanas [maalamon] nga mga tawo sa Zemer” (RS; BE), nga giisip sa pipila nga mao ang siyudad sa mga Zemarihanon ug gituohan nga kini lagmit mao ang Tell Kazel, mga 35 km (22 mi) sa AS sa Tripoli. Apan, dinhi ang Hebreohanong teksto mabasa: “Ang imong hanas nga mga tawo, Oh Tiro.” Sa pagtumong sa laing dapit, ang uban naglangkit sa mga Zemarihanon sa dapit nga ginganlag Sumra, usa ka lungsod daplin sa baybayon tali sa Tripoli ug Arvad.