SIBSIBANAN

Usa ka agrikultural nga yuta nga partikular nga gigamit sa pagpasibsib sa mga hayop, nga naglibot sa matag 48 ka Levihanong mga siyudad nga nagkatag sa Israel. Kining mga yutaa dili gayod ibaligya, bisan tuod ikabaligya ang mga balay diha sa maong mga siyudad ug mailalom sa regulasyon sa Tinghugyaw.​—Num 35:2-5; Lev 25:32-34; Jos 21:​41, 42.

Ang luna sa mga sibsibanan “magagikan sa paril sa siyudad ug paingon sa gawas nga usa ka libo ka maniko [445 m; 1,458 p] palibot.” Apan ang misunod nga bersikulo midugang: “Sa gawas sa siyudad sa sidlakang bahin magsukod kamo ug duha ka libo ka maniko” ug mao man usab ang himoon ngadto sa tanang upat ka direksiyon. (Num 35:​4, 5) Adunay ubay-ubayng mga sugyot aron magkatakdo kining duha ka sukod. Giingon sa pipila nga sa Gregong Septuagint mabasa ang “duha ka libo” diha sa bersikulo 4 inay nga “usa ka libo.” Apan diha sa Hebreohanong teksto ingon man sa Latin nga Vulgate ug sa Syriac nga Peshitta mabasa ang “usa ka libo.” Giingon sa Hudiyong mga komentarista nga ang unang usa ka libo ka maniko (Num 35:4) maoy bakanteng luna ug gigamit ingong kaolibohan ug mga kuwadra sa mga hayop, samtang ang ikaduhang sukod (Num 35:5) nagtumong sa aktuwal nga mga sibsibanan ug sa mga umahan ug mga parasan, nga ang katibuk-ang sukod maoy 3,000 ka maniko sa matag kiliran.

Apan sanglit kini nga mga pangagpas wala man ibutyag diha sa maong teksto, adunay lain pang katin-awan nga mas haom. Busa, ang ubang mga komentarista nagtuo nga gitino ang mga sukod sa sibsibanan pinaagi sa pagsukod ug 1,000 ka maniko gikan sa matag upat ka kiliran sa siyudad, sa sidlakan, kasadpan, amihanan, ug sa habagatan. Labot sa 2,000 ka maniko sa matag kiliran, sila nagtuo nga ang ekspresyon nga “gawas sa siyudad” nagkahulogan nga kining 2,000 ka maniko wala sukda gikan sa mga paril sa siyudad paingon sa gawas apan maoy sukod sa matag usa sa upat ka kiliran sa sibsibanan kon sukdon ubay sa mga utlanan niini. Kon mao, kini magpasabot nga ang luna nga nahimutangan sa ‘siyudad nga anaa sa taliwala’ wala malakip sa sukod nga 2,000 ka maniko. Pinaagi niini nga pagpatin-aw ug ingon sa gipakita sa dayagram sa ubos, mahimong magtakdo ang duha ka sukod.

Sa panan-awon ni Ezequiel sa templo, ang sangtuwaryo adunay 50 ka maniko ‘ingong sibsibanan sa matag kiliran.’ (Eze 45:2) Ang siyudad nga “Si Jehova Anaa Diha” nga nakita sa manalagna diha sa panan-awon adunay mga sibsibanan nga 250 ka maniko sa matag kiliran. (Eze 48:​16, 17, 35) Gihisgotan ang mga sibsibanan sa 1 Cronicas 5:16 maylabot sa “Saron,” nga gituohan sa uban nga mao ang rehiyon o lungsod sa S sa Jordan. Ang Hebreohanong pulong nga gihubad nga “sibsibanan” diha sa mga tekstong gihisgotan makita usab sa Ezequiel 27:​28, diin kini gigamit maylabot sa Tiro, ang siyudad nga nahimutang sa baybayon ug sa usa ka pulo. Niining tekstoha ang pulong gihubad nga “(mga) baybayon” (Mo, JB), “kabanikahan” (RS), “kapatagan” (NW), ug “mga distrito sa banika” (Le), sa ingon gipakita sa tagna nga lagmit kadtong ubay sa baybayon duol sa Tiro motuaw sa pagkapukan niini.

Ang kahayopan hinungdanon kaayo sa kinabuhi sa daghang Israelinhon, maong gikinahanglan ang mga sibsibanan aron makapanibsib ang ilang mga karnero ug mga kanding. (2Sa 7:8; 1Cr 4:39-41) Ang kakulang ug sibsibanan alang sa mga hayop magdalag kalisdanan. (Gen 47:​3, 4) Apan kon daghan ang sibsibanan adunay panahon sa kadagaya ug pakigdait. (Isa 30:23; Sal 65:​12, 13; 23:2) Sa pagpalapad pa sa kapadapatan niini, ang biniyaang sibsibanan magpaila sa bug-os nga pagkaawaaw (Isa 27:10), apan mailhan nga gipasig-uli na ang pakigdait ug pag-uyon kon ang mga sibsibanan gigamit na usab. (Isa 65:10; Jer 23:3; 33:12; 50:19; Miq 2:12) Maingon nga ang mga karnero gitultolan sa usa ka mahigugmaong magbalantay ngadto sa mga sibsibanan diin sila luwas ug may kadagaya, mao man usab ang katawhan sa Diyos gitultolan ug giatiman ni Jehova.​—Sal 79:13; 95:7; 100:3; Eze 34:31.