Kon sa Unsang Paagi ang Kristohanong mga Magbalantay Nagaalagad Kanimo

SA DAGHANG dapit posible nga makita kon giunsa sa mga magbalantay sa mga karnero pag-atiman sa panon. Sila nagapanguna, nagapanalipod, ug nagatagana alang sa mga karnero. Makapaikag kini sa Kristohanong mga ansiano, sanglit ang ilang buluhaton naglakip sa kalihokan isip magbalantay. Sa pagkatinuod, responsibilidad nila ang ‘pagbantay sa kongregasyon sa Diyos’ ug ‘sa pagtagad sa tanan nga panon.’​—Buhat 20:28.

Kon ikaw usa ka membro sa Kristohanong kongregasyon, sa unsang paagi ang espirituwal nga mga magbalantay nagaalagad kanimo? Ug unsay angay nimong pagsanong sa ilang mga paningkamot alang kanimo? Nganong ang kongregasyon nagkinahanglan sa ilang tabang?

Panalipod Batok sa Unsa?

Sa karaang mga panahon ang mga liyon ug ubang ihalas nga mga hayop nagpameligro sa mga panon ug manukob sa tagsatagsa ka karnero. Kinahanglang itagana sa mga magbalantay ang panalipod. (1 Samuel 17:34, 35) Buweno, si Satanas nga Yawa “nagasuroysuroy sama sa usa ka liyon nga nagangulob, nga nagapangita ug usa nga matukob.” (1 Pedro 5:8) Siya maligutgotong nagapakiggubat dili lamang batok sa yutan-ong organisasyon ni Jehova sa katibuk-an kondili usab batok sa matag usa nga alagad sa Diyos. Unsay tumong ni Satanas? Buot niyang mawad-ag kadasig ang katawhan ni Jehova ug bisan pagsanta kanila sa ‘pagsunod sa mga sugo sa Diyos’ ug sa pagtuman sa “buluhaton sa pagpanaksi bahin kang Jesus.”​—Pinadayag 12:17.

Gisumbong ni Jehova ang nagdumalang mga magbalantay sa karaang Israel ug pagpasagad tungod kay ang iyang mga karnero nahimong “kan-onon sa matag ihalas nga mananap sa kapatagan.” (Ezekiel 34:8) Bisan pa, ang Kristohanong mga ansiano adunay kinasingkasing nga tinguha sa pagpanalipod niadtong anaa sa kongregasyon aron walay usa ang mawala tungod sa pagpasagad o tungod sa impluwensiya ni Satanas, sa kalibotan, o sa apostatang “mga lobo.” (Buhat 20:29, 30) Sa unsang paagi ginatabangan sa mga magbalantay ang tanang membro sa panon aron maampingan ang ilang mga panimuot ug magmatukawon? Usa ka paagi mao ang paghatag ug maayong pagkaandam nga mga pakigpulong sa Kasulatan diha sa entablado sa Kingdom Hall. Ang lain mao ang positibo, makapadasig nga mga panagsultihay sa dili pa ug human sa mga tigom. Lain pang epektibong paagi mao ang personal nga pagduaw sa “mga karnero” diha sa balay. (Itandi ang Salmo 95:7.) Apan unsa ang pagduaw isip magbalantay? Sa unsang paagi pagahimoon ang maong pagduaw? Ug kinsa ang angay nga pagaduawon?

Unsa ang Pagduaw Isip Magbalantay?

Ang pagduaw isip magbalantay dili lamang usa ka sosyal nga pagduaw nga mag-estoryahay bahin sa mga butang nga dili kaayo hinungdanon. Usa ka ansiano miingon: “Ang kadaghanang magmamantala nalipay sa pagbasag teksto o paghisgot ug usa ka partikular nga tawo sa Bibliya. Siyempre, ang ansiano dili lamang mao ang mosulti. Ang magmamantala sa Gingharian nga giduaw normal nga malipay sa pagpahayag sa iyang mga hunahuna bahin sa Bibliya, ug ang pagbuhat niini makapalig-on sa iyang kaugalingong pagtuo. Ang ansiano mahimong magdalag magasing Bantayanang Torre o Pagmata! aron hisgotan ang makapalig-ong artikulo. Tingali kining espirituwal nga panaghisgot magpalahi sa usa ka pagduaw isip magbalantay gikan sa usa ka sosyal nga pagduaw.”

Ang laing may kasinatian nga ansiano mikomento: “Sa dili pa ang pagduaw, ang ansiano mogugol ug igong panahon sa pagpalandong sa mga panginahanglan sa magmamantala nga iyang duawon. Unsay magpalig-on sa magmamantala? Ang tim-os nga komendasyon maoy hinungdanong bahin sa mga pagduaw isip magbalantay, kay kini magpalig-on sa usa ka tawo sa paglahutay.” Oo, ang pagduaw isip magbalantay dili lamang usa ka mahigalaong pagduaw nga mahimong himoon ni bisan kinsa sa kongregasyon.

Nganong Moduaw Kanimo ang Usa ka Magbalantay?

Kon moduaw ang usa ka ansiano sa balay, siya andam sa pagdasig sa mga isigkamagtutuo ug tabangan sila nga magmalig-on sa pagtuo. (Roma 1:11) Busa kon ang usa o duha ka ansiano buot nga moduaw kanimo, unsay imong reaksiyon? Nag-ingon ang usa ka nagapanaw nga magtatan-aw: “Kon ang mga pagduaw isip magbalantay himoon lamang kon adunay problema, ang unang reaksiyon sa giplanong pagduaw tingali, ‘Unsa kahay akong nahimong sayop?’” Ang mahigugmaong espirituwal nga mga magbalantay mosundog kang Jehova, nga nag-atiman sa salmista ug kanunay nga ‘nagbag-o sa iyang kalag,’ ilabina sa mga panahon sa kaguol ug sa linaing panginahanglan.​—Salmo 23:1-4.

Ang tumong sa pagduaw isip magbalantay mao ang ‘paglig-on, dili ang pagpaluya.’ (2 Corinto 13:10) Makapadasig, tinuod, ang mga pulong sa pagpabili tungod sa paglahutay, kasibot, ug matinumanong buluhaton sa usa nga giduaw. Usa ka ansiano nag-ingon: “Sa pagduaw isip magbalantay, dili maayo ang paghatag ug impresyon nga miduaw ang usa aron tukion ug hisgotan ang mga problema. Siyempre, tingalig ang magmamantala mismo buot nga makigsulti bahin sa usa ka partikular nga suliran. Ug kon nagtakiang ang karnero o nagpalain sa iyang kaugalingon gikan sa uban sa panon, ang ansiano kinahanglang adunay buhaton sa pagtabang.”

Ang Kristohanong mga magbalantay sa walay duhaduha mohatag ug linaing pagtagad kang bisan kinsa nga sama niadtong gihubit niining mga pulonga: “Pangitaon ko [Jehova] kadtong nawala, ug pabalikon pag-usab kadtong natibulaag, ug ang nabalian akong bugkosan ug ang nagmasakiton akong palig-onon.” (Ezekiel 34:16) Oo, ang mga karnero kinahanglang pangitaon, pabalikon pag-usab, bugkosan, o palig-onon. Gipasagdan kining mga kaakohana sa mga magbalantay sa Israel. Ang paghimo niining buluhatona nagkinahanglan nga ang magbalantay moduol sa usa ka karnero ug atimanon ang mga panginahanglan niini. Sa dakong bahin, kini usa gayod ka magpailang bahin sa matag pagduaw isip magbalantay karong adlawa.

Ang Mahimsog nga mga Karnero Nagkinahanglag Pag-atiman

Angay ba natong ihinapos nga ang presenteng-adlaw nga espirituwal nga mga magbalantay dili angayng magpakitag linaing pagtagad sa mahimsog nga mga karnero? Aw, kon ang literal nga karnero magkaproblema, ang pagtabang niana mas madali kon kini may pagsalig sa magbalantay. Usa ka reperensiyang libro nag-ingon nga “ang mga karnero sa kinaiyanhon magpalayo sa mga tawo, ug ang pag-angkon sa ilang pagsalig dili kanunayng sayon.” Lakip sa ubang mga butang, ang samang libro nagsugyot niining pangunang giya sa pagdaog sa pagsalig sa mga karnero: “Pakigsulti kanunay sa mga hayop. Maanad sila sa tingog, nga makahatag kanilag pasalig pag-usab. Duawa kanunay ang mga karnero diha sa pasibsiban.”​—Alles für das Schaf. Handbuch für die artgerechte Haltung (Everything for the Sheep. Handbook on How to Keep Them Properly).

Ang personal nga kontak sa ingon hinungdanon aron adunay masaligong relasyon tali sa magbalantay ug sa mga karnero. Tinuod usab kana sa Kristohanong kongregasyon. Usa ka ansiano miingon: “Ang pagkainila sa kongregasyon ingong usa ka ansiano nga regular nga nagaduaw sa mga karnero magpasayon sa pagduaw sa usa nga may mga problema.” Busa, ang espirituwal nga mga magbalantay dili lamang maningkamot sa pagpakaon ug pag-atiman sa mga karnero diha sa Kingdom Hall. Kon itugot sa mga kahimtang, angay masuod sa mga ansiano ang mga karnero pinaagi sa mga pagduaw isip mga magbalantay diha sa ilang mga balay. Usa ka Kristohanon nahinumdom nga sa dihang siya bag-o pang natudlo sa pagkaansiano, ang nagadumalang magtatan-aw mitawag ug gihangyo siya sa pagduaw ug paghupay sa usa ka igsoon nga bag-o pang namatyan sa iyang anak nga babaye sa usa ka makalilisang nga aksidente sa dalan. Ang ansiano miadmiter: “Lain kaayo ang akong gibati, sanglit wala pa gayod ako makaduaw sa igsoon ug wala gani masayod kon diin siya nagpuyo! Nahupayan ako sa dihang usa ka hamtong nga ansiano mitanyag sa pag-uban kanako.” Oo, ang mga ansiano magtinabangay sa usag usa sa mga pagduaw isip magbalantay.

Sa pagpangandam ug sa paghimog pipila ka pagduaw isip magbalantay, mahimong kuyogan ang usa ka ansiano ug usa ka ministeryal nga alagad nga nagpangab-ot alang sa “maayong buluhaton” sa usa ka magtatan-aw. (1 Timoteo 3:1, 13) Pabilhan gayod ug dako sa usa ka ministeryal nga alagad ang pagkakita kon sa unsang paagi nag-alagad ang ansiano sa mga karnero sa mga pagduaw isip magbalantay! Ang mga ansiano ug ministeryal nga mga alagad sa ingon masuod sa tanan diha sa kongregasyon, nga nagalig-on sa bugkos sa Kristohanong gugma ug panaghiusa.​—Colosas 3:14.

Pagplanog Panahon sa mga Pagduaw Isip Magbalantay

Sa dihang gisalig sa usa ka lawas sa mga ansiano ang mga pagduaw isip magbalantay sa mga konduktor sa Pagtuon sa Kongregasyon sa Libro, ang tanang magmamantala sa pipila ka grupo naduaw sa unom ka bulan, samtang walay usa ang naduaw diha sa ubang mga grupo. Kini nagtukmod sa usa ka ansiano sa pag-ingon: “Ang ubang mga ansiano daw nanguna ug naghimog daghang pagduaw isip magbalantay, apan ang uban nagkinahanglan sa pagdasig sa ilang mga isigkaansiano sa pagbuhat niana.” Busa ang ubang lawas sa mga ansiano mihimog mga kahikayan sa tanang magmamantala nga pagaduawon sa mga magbalantay sulod sa espesipikong yugto sa panahon.

Siyempre, ang usa ka ansiano o bisan kinsang magmamantala makaduaw sa usa diha sa kongregasyon nga dili maghulat sa linaing mga kahikayan nga pagahimoon. Sa wala pa mohimog pagduaw isip magbalantay, usa ka ansiano mitawag ug miingon, “Moduaw ako ug usa ka pamilya matag bulan. Makaduaw ba ako kaninyo sulod sa usa ka oras o kapin pa sa sunod bulan? Kanus-a ba ang kombeniyente kaninyo?”

Mga Panalangin sa mga Pagduaw Isip Magbalantay

Samtang misamot ang mga kalisod niining daotang sistema, ang makapadasig nga mga pagduaw pinaagi sa masinabtanong mga magbalantay nahimo pang mas mapuslanon. Kon ang tanan sa panon hatagan ug pagdasig ug tabang pinaagi sa mga pagduaw isip magbalantay, ang matag karnero mobating luwas ug may kasegurohan.

Bahin sa usa ka kongregasyon diin ang tanang magmamantala sa Gingharian ginaduawng regular sa mga magbalantay, kini gitaho: “Ang mga magmamantala nahimong positibo kaayo bahin sa mga pagduaw isip magbalantay. Komon na sa usa ka magmamantala ang pagduol sa usa sa mga ansiano sa pagpangutana kon kanus-a siya sunod nga moduaw, kay nalipay ang nangutana sa makapalig-ong panaghisgot sa miaging pagduaw. Ang mga pagduaw isip magbalantay maoy usa ka paagi nga nakatabang sa pagpauswag sa espiritu sa kongregasyon.” Laing mga taho nagpakita nga sa dihang ang mga magbalantay mahigugmaong nagaalagad nianang paagiha, ang kongregasyon motubo diha sa gugma, panaghiusa, ug pagkamainiton. Pagkadakong panalangin!

Ang Kristohanong mga magbalantay nagaduaw aron mapalambo ang espirituwal nga kaayohan sa mga karnero. Nagtinguha ang mga ansiano nga madasig ug mapalig-on ang ilang mga isigkamagtutuo. Kon may motunghang seryosong problema nga nagkinahanglag tambag panahon sa pagduaw, labing maayo nga himoon ang mga kahikayan sa paghisgot niana sa laing higayon, ilabina kon ang ansiano giubanan sa usa ka ministeryal nga alagad. Bisan unsa may kahimtang, tukmang taposon sa usa ka pag-ampo ang pagduaw isip magbalantay.

Buot ka bang duawon sa usa ka espirituwal nga magbalantay sa imong balay sa dili madugay? Kon mao, magmalipayon sa pagpaabot sa pagdasig nga naghulat kanimo. Siya moabot sa pag-alagad kanimo ug sa pagpalig-on kanimo sa imong determinasyon sa pagpabilin diha sa dalan nga motultol sa kinabuhing walay kataposan.​—Mateo 7:13, 14.

[Kahon sa panid 26]

Mga Sugyot sa mga Pagduaw Isip Magbalantay

◻ Pakigsabot ug panahon sa pagduaw: Kasagaran maayo nga makigsabot ug panahon sa pagduaw. Kon ang ansiano nagplano sa pagdumala ug seryosong problema, maayo nga pahibal-on daan ang magmamantala bahin niini.

◻ Pagpangandam: Tagda ang kinaiyahan ug kahimtang sa igsoon. Itanyag ang kinasingkasing nga komendasyon. Himoang imong tumong ang paghatag ug pagdasig, makapalig-on sa pagtuo nga “espirituwal nga gasa.”​—Roma 111, 12.

◻ Kinsay iuban: Laing ansiano o kuwalipikadong ministeryal nga alagad.

◻ Panahon sa pagduaw: Ang ansiano kinahanglang relaks, mahigugmaon, positibo, ug mapailin-ilinon. Pangutana bahin sa pamilya, kahimtang niini, ug uban pa. Pamatig maayo. Kon motungha ang usa ka seryosong problema, labing maayo nga maghikay ug linaing pagduaw isip magbalantay.

◻ Gidugayon sa pagduaw: Tumana ang gikasabotang oras, ug biya samtang ang giduaw nalingaw pa sa pagduaw.

◻ Pagtapos sa pagduaw: Haom ang usa ka pag-ampo ug pabilhan gayod.​—Filipos 46, 7.

[Hulagway sa panid 24]

Ang Kristohanong mga magbalantay nagtaganag espirituwal nga proteksiyon

[Hulagway sa panid 26]

Ang mga pagduaw isip magbalantay nagtaganag maayong mga kahigayonan alang sa espirituwal nga pagdasig