“Ang Kanasoran Makaila Gayod nga Ako Mao si Jehova”

UNSAY imong bation kon gipasanginlan kag krimen nga wala nimo buhata? Ug komosta kon tungod niana grabeng nag-antos ang uban, lakip na ang daghang inosenteng tawo? Seguradong hinloan nimo ang imong ngalan! Nahibalo ka bang ingon usab niana ang nasinati ni Jehova? Daghan karon ang sayop nga nagbasol sa Diyos tungod sa inhustisya ug pag-antos niining kalibotana. Buot ba ni Jehova nga hinloan ang iyang ngalan? Siyempre, oo! Tagda kon unsay giingon sa basahon sa Ezequiel.—Basaha ang Ezequiel 39:7.

“Dili ko na itugot nga pasipalahan pa ang akong balaang ngalan,” matod ni Jehova. Sa dihang basolon siya sa mga tawo tungod sa inhustisya, sila nagpasipala sa iyang ngalan. Sa unsang paagi? Sa Bibliya, ang “ngalan” sagad nagpasabot ug reputasyon. Ang usa ka reperensiya nag-ingon nga ang ngalan sa Diyos nagtumong sa “kon unsay nahibaloan bahin kaniya—ang pagpadayag niya sa iyang kaugalingon; kini nagrepresentar usab sa iyang kabantog ug kadungganan.” Ang ngalan ni Jehova naglakip sa iyang reputasyon. Unsay atong nahibaloan bahin kang Jehova maylabot sa inhustisya? Gidumtan niya kana! Siya naluoy usab sa mga biktima niana.a (Exodo 22:22-24) Sa dihang ang mga tawo moingon nga ang Diyos maoy responsable sa mga butang nga giayran niya mismo, gidaot nila ang iyang reputasyon. Busa ilang ‘gipasipalahan ang iyang ngalan.’—Salmo 74:10.

Matikdi nga kaduha gigamit ni Jehova ang ekspresyong “ang akong balaang ngalan.” (Bersikulo 7) Sa Bibliya, ang ngalan ni Jehova kadaghang gilangkit sa mga terminong “balaan” ug “pagkabalaan.” Ang pulong nga “balaan” nagpasabot ug pagkabulag; nagkahulogan usab kinig kahinlo ug kaputli. Ang ngalan ni Jehova balaan kay ang Diyos nga nagdala niana maoy balaan—bug-os nga nahimulag sa bisan unsa nga makasasala ug mahugaw. Nakita ba nimo kon nganong kadtong nagbasol kang Jehova tungod sa pagkadaotan nakapasipala pag-ayo sa iyang “balaang ngalan”?

Ang katuyoan ni Jehova nga hinloan ang iyang ngalan pinaagi sa iyang Gingharian mao ang pangunang tema sa Bibliya. Gipasiugda kana sa basahon sa Ezequiel, nga sublisubling nag-ingong “ang kanasoran makaila gayod nga ako mao si Jehova.” (Ezequiel 36:23; 37:28; 38:23; 39:7) Matikdi nga ang mga nasod dili mopili kon sila ba moila nga siya si Jehova o dili. Hinunoa, sila “makaila gayod.” Sa ato pa, katuyoan ni Jehova nga molihok aron mapugos ang kanasoran sa pag-ila nga siya mao si Jehova, ang Soberanong Ginoo, kansang ngalan nagrepresentar sa tanan nga balaan, putli, ug hinlo.

Ang kanunay-gisubling saad nga “ang kanasoran makaila gayod nga ako mao si Jehova” maoy maayong balita alang niadtong nangandoy nga matapos ang inhustisya ug pag-antos. Sa dili madugay, tumanon ni Jehova kanang saara ug hinloan ang iyang ngalan sa tanang pasipala. Iyang wagtangon ang pagkadaotan ug kadtong nagpaluyo niini apan tipigang buhi kadtong moila ug motahod sa iyang ngalan ug sa girepresentahan niana. (Proverbio 18:10) Dili ka ba mapalihok sa pagkat-on kon sa unsang paagi mas masuod kang Jehova, ang balaang Diyos, nga “mahigugmaon sa hustisya”?—Salmo 37:9-11, 28.