Mga Pangutana Gikan sa mga Magbabasa

◼ Si Jesus nagtumong ba kang Judas sa gisultihan niya si Pilato: “Kini ang hinungdan ang tawong nagtugyan kanako nganhi kanimo labi pang dako ug sala”?—Juan 19:11.

Si Jesus daw wala magtumong dinhi kang Judas o sa laing tawo. Daghang sad-an nga mga tawo ang nalangkit sa mga hitabo nga mitultol sa pagkataral ni Jesus sa atubangan ni Pilato ug pag-atubang sa kamatayon.

Lagmit si Judas ang unang moabot sa hunahuna kay kadtong korap nga apostol nagmaluibon. (Juan 6:64, 71; 12:4-6) Si Judas nakigtagbo sa pangulong mga saserdote, kinsa buot “maghipos” kang Jesus. Gibayran nila si Judas ug 30 ka buok nga salapi aron sa pagluib kaniya. (Lucas 22:2-6) Nan, sa walay duhaduha si Judas may dakong sala maylabot sa pagkamatay ni Jesus.

Apan si Judas dili mao lamang ang nakapahinabo sa kamatayon ni Jesus. Ang hataas nga saserdote si Caipas maoy nagsiba sa uban aron ipapatay si Jesus. (Juan 11:49, 50) Si Mateo miasoy nga dihang “ang pangulong mga saserdote ug ang tibuok Sanhedrin” naghukom kang Jesus, sila milihok ingong usa ka pundok. “Ang tanang pangulong saserdote ug ang mga ansiano sa katawhan nagsabutsabot batok kang Jesus aron siya ipapatay. Ug, tapos sa paggapos kaniya, ilang gidala ug gitugyan siya ngadto kang Pilato ang gobernador.” (Mateo 26:59-65; 27:1, 2) Dugang pa, tapos hikaplagi ni Pilato nga dili sad-an si Jesus, gihangyo sa “mga panon” nga buhian si Barabas. Sa kasukwahi, bahin kang Jesus sila misinggit: “Ipalansang siya!”—Mateo 27:20-23; Juan 18:40.

Busa lagmit si Jesus wala maghisgot sa usa ka espisipikong indibiduwal sa dihang siya miingon kang Pilato: “Ang tawo nga nagtugyan kanako nganhi kanimo labi pang dako ug sala.” (Juan 19:11) Bisan pag si Judas, “ang anak sa kalaglagan,” nagpas-an ilabina sa bug-at nga sala, daghan pang uban ang nakaambit sa sala sa pagpatay kang Jesus. (Juan 17:12) Kana ang hinungdan sa adlaw sa Pentekostes giawhag ni apostol Pedro ang mga Hudiyo sa paghinulsol sa ilang grabeng sala batok sa Anak sa Diyos. (Buhat 2:36-38) Kadtong mga Hudiyoha maoy bahin sa usa ka nasod nga napahinungod sa Diyos ni Jesus, si Jehova. Ilang nabatonan ang mga tagna nga nagpaila kang Jesus ingong Mesiyas. Ug daghan kanila ang nakakita sa mga milagro ni Jesus. Busa sila labi pang sad-an kay sa dili-Hudiyong opisyal nga nagpahayag nga si Jesus walay sala.—Juan 18:38.

◼ Unsay katuyoan sa pagsulti ni Jehova kang Ezekiel nga ang iyang nawong magmagahi, sama sa mga nawong sa mga Hudiyo?

Si Ezekiel usa ka propeta sa Diyos nga nag-alagad taliwala sa mga Hudiyo nga gidalang binihag ngadto sa Babilonya. Ang maong mga binihag lagmit naghunahuna nga si Jehova sa usa ka paagi modali sa pagluwas kanila kay sila maoy iyang piniling katawhan. Wala sila modawat sa kamatuoran nga ang nahitabo kanila maoy tungod kay sila angay sa iyang kasuko.

Busa sa gisugo ni Jehova si Ezekiel “nga ipahayag ang akong mga pulong ngadto kanila,” kadto dili sayon nga asaynment. Sa pagpangandam sa propeta, ang Diyos nagpasidaan nga “dili sila buot mamati kanimo, kay sila dili buot mamati kanako; tungod kay ang tanan nga iya sa balay sa Israel gahig-ulo ug matig-a ug kasingkasing.”—Ezekiel 3:4, 7.

Niadtong gutloa ang Diyos nagsulti kang Ezekiel: “Tan-awa! gipagahi ko ang imong nawong sama gayod sa pagkagahi sa ilang mga nawong ug ang imong agtang sama gayod sa ilang mga agtang. Maingon sa usa ka diamante, nga gahi pa kay sa santik, gipagahi ko ang imong agtang. Ayaw kahadlok kanila.”—Ezekiel 3:8, 9.

Ang katawhan gahian ug rebelyoso. (Ezekiel 2:6) Sila kaha makaarang sa pagpildi o makapahadlok sa mensahero sa Diyos? Dili. Sanglit siya gipaluyohan sa Diyos, si Ezekiel dili mahimong mas mahumok kay kanila. Ang santik maoy gahi kaayong bato, nga gahi pa kay sa asiro. Kon ang gahian, walay-pagsanong nga mga Hudiyo susama sa santik, mao usab si Ezekiel. Labaw pa gayod, siya mahisama sa diamante, ang kinagahian sa mga minerales, nga gahi kaayo nga magamit kini sa pagkaras bisan sa santik.—Jeremias 17:1, 2.

Kini wala gayod magkahulogang isipon sa katawhan sa Diyos karong adlawa nga maayo ang pagpagahi, nga dili mabination sa mga pagbati sa uban, o bisan mapintason sa pagbuhat sa ilang gibati nga matarong. Matikdi kon unsay giawhag ni apostol Pedro mahitungod sa mga pagpakiglabot sa usag usa: “Magbaton kamong tanan sa samang hunahuna, nga magpakitag pagkamabination, inigsoong gugma, maluluy-on, mapaubsanon sa hunahuna, nga dili mobalos ug daotan sa daotan o pasipala sa pasipala, kondili, sa kasukwahi, maghatag ug panalangin.”—1 Pedro 3:8, 9.

Ang kaluoy alang sa uban maoy usa usab sa nagpahiping mga motibo sa atong pagpakig-ambit sa maayong balita sa Gingharian sa uban. (Mateo 9:36-38) Apan bisan pag atong mahibalag ang kawalay-pagtagad, pagdumili, o laktud nga pagsupak, kita dili mohunong sa pagmantala sa mensahe sa Diyos alang sa atong panahon. Kana nagaapil sa pagmantala nga sa dili madugay ipadangat niya “ang panimalos niadtong wala makaila sa Diyos ug niadtong wala magsugot sa maayong balita mahitungod sa atong Ginoong Jesus.” (2 Tesalonica 1:6-9) Kita kinahanglang dili mahadlok o magpapugong. Niining diwaa kita magmagahi sama sa diamante sama kang Ezekiel.